كاتب الموضوع :
b3thra had2a
المنتدى :
القصص المكتمله من وحي قلم الاعضاء
البارت العاشر
( حياه جديده )
ابتسمت اول ما سمعت صوت المأذن يكبر لصلاه العيد .. بديت اتجهز شوي شوي لين ما ايون من الصلاه .. متعوده اقضي بدايه العيد عند يدووه .. مرن ها الشهرين شرا سرعه البرق ما حسيت بهن قضيت فيهن كل ما احتاجه لزهبه عروس شويخ ساعدتني واايد كنت متمنيه منيره اللي تساعدني بس ما بدر منها اي شي صح هي عروس بعد .. بس عرسها فإجازه بين الفصلين عندها وقت هب شراتي و فوق هذا صارت تحسدني دوم تقول " احينه انتي اللي تبين تتدريس رسم تسافرين و تتدريس برع و انا يمنعوني من طب " .. حسيت بضيجه لين متى بتم جذا !! ربي يهديها ..
بالنسبه للصندوق الهدايا كان من صقر اكتشتفه قبل شهرين هزبته هزاب ليش انه خش عني ها الشي بس لين احينه يطرش الهدايا بس ها المره بيديه بدون لا لف و لا دوران .. طول ها الشهرين شرب مره بس قبل رمضان يوم اعلن انه بيتزوج ميثا ( خطيبه اربيعه ) يدووه فرحت واايد بس هو كان حزين فها اليوم شرب و طول رمضان ما شرب ماادري اذا بتم ميثا عنده بيتم يشرب و لا لا !! الله يهديه ..
خذت الليسن بعد ثاني مره و صقر شترلي سياره [ bmw m5 2011 ] بيضه حبيت السياره من كل قلبي صارت مشاوري فيها اظهر انا و شويخ لكل مكان كنت اطلع بشكل يومي عشان الزهبه بس من اسبوع شحنوها لندن .. سيارتي و سياره عبدالله لانه بنتم هناك طول السنه محتاجين سياير ..
اما بالنسبه للشي اللي انساه تماما لما يطرى عبدالله فبالي .. ياسر اللي صرت اتحاشى اروح بيت عمي و اتحجج بشغلي فالزهبه و ماعد اتصل و اليوم لازم اروح بيت عمي كنت متمنيه يكون عنده سفره لانه كابتن طياره بس مع الاسف موجود .. يحليله منصور البارحه كان عنده رحله وما بيرجع الا الليله عشان يكون موجود فعرسي ..
لبست مخورتي الحمره و رسمت عيوني و حطيت مسكرا و بلشر و كلوز احمر و سشورت شعري نزلت قصتيه ع عيني .. و لبست نعالي المسطح اللي عليه فص احمر و تعطرت و لبست اكسسوراتي ها الاشياء صقر شرالي اياهم .. طلعت من حجرتيه و سمعت اصواتهم تحت دخلت قصتيه لاني سمعت اصوات عيال خالتي .. نزلت تحت عايدت عليهم و اتصلت فمنصور
: عيدك مبارك
منصور : الله يبارك فيج يالعروس , كل سنه و انتي سالمه
ستحيت : وانت سالم , شحالك !!
منصور : بخير و سهاله و من صوبج !!
: الحمدالله بخير
منصور : وينج !!
: بعدني فبيت يدووه توهم قوم خالتي يووه
منصور : هيه خير ان شالله اذا شفتي حمود بوسيلي اياه
: ان شالله فديتك
منصور : سلمي ع الكل و عيدي عليهم عني
سكرت عنه و خبرتهم انه منصور يسلم عليهم و يعايدهم .. يلسنا ع سفره العيد و صقر اذانا بفلاشاته ما قدرت حتى احط شي فحلجي روحي يوعانه و اتصلت فامايه مهره عايتها و عايد منيره و سعيد و سعود معنه رد بدون نفس و حمودي اللي كانت مستانس لانه منصور بي الليله .. الريايل ظهروا يسريون بيت العرب و نحن الحريم قلنا بنظهر بنسير بيت اليران يدووه تبا تروح تسلم عليهم خذت مفتاح سياره يوسف الرينج قبل ما يظهر و لبسنا عبينا و ظهرنا سرنا مشي بيت اليران يدووه قالت تروم تمشي و ما بتركب السياره و عايدنا عليهم خلاف قالت تبا تسير بيت ام مايد عمتي ..
: امم يدووه ما يتسوي اسير وياكم
يدووه : ليش !! تعالي عايدي ع عمتج
: بس يدووه شقايل اسير بيتهم و عقب باجر عرسي
يدووه : شو فيها !! هذا عيد و لازم تعايدين ع الاودام عيب عليج يلا
حست بوزي ما عرفت ارد عليها و ركبنا الموتر بس توهقت ما ادل بيتهم ههه و يدووه ما دل منها شرد و ما رحنا بيتهم .. قالت يدووه بتسير بيت اربيعتها وديتها لاني وديتها مره فرمضان عندها عايدنا عليهم و تمينا اكثر من نص ساعه يدووه مستانسه و داقه سوالف و انترس الميلس حريم و الصدفه عمتي ام مايد يت .. زين احسن من اني اسير بيتهم شو بيقولون العرب عني وايد مستعيله .. ساعه 10 بعد الحواطه رجعنا البيت .. حصلنا المواتير ممزوره جدام الباب و زين مني ما دعمت وحده من المواتير خخ ..
حدرنا داخل و يلسنا فالصاله .. فصخت عبايتي و رحت شربت لي ماي و خذت لي قطعه جوكليت .. انتبهت لفون يرن كان نهيان
نهيان : كل سنه و انتي سالمه
ابتسمت : وانت سالم ياخوي
نهيان : اسمحييلي انشغلت ويا العرب و ما عايتج
: ولا يهمك شحالك !!
نهيان : بخييير الحمدالله و انتي يقولون بتعرسين عقب باجر شو المعنويات
ادري به يتمخصر عليه : وياكم انتو احباط بس عاااد
ضحك : خلاص سكتنا .. اقول ميره بسكر عنج يو الربع
: ربي يحفظك
نهيان : مع سلامه
خالتي : بنتي باجر ساعه كم بتسيرين الصالون !!
طالعته خالتي و ابتسمت لها : ساعه 2 الظهر بسير ان شالله
خالتي : بنسير يميع
: ان شالله , يدووه ما بتغيرين رايج !!
يدووه : لا .. بعد ها العمر اروح احط حنا الشباب شبيقولون عني العرب
ضحكت : بيقولون رجعت شباب
،
ساعه 2 الظهر ظهرت من بيت يدووه بعد ما خذت سياره يوسف و رحنا صوب بيت عمي .. جسمي يرتجف ماابي اشوفه احس بخوف احس اني خنت بشرى اللي تحبه من مراهقتها .. حدرت البيت حصلت السياير صافه و وحده منهم سيارته .. تميت شويه فالسياره اقوي عمري لازم ما اطالعه و لا اعطي مجال يتمادى .. نزلت من السياره و سحبت شنطتي و سكرت السياره و دخلت داخل بهدوء .. كلهم كانوا مجتمعين فالصاله و يسولفون و يضحكون لما وصلت التفتوا لي ابتسمت لهم و سرت سلمت عليهم واحد واحد ..
لما وصلت صوب الشباب ما رفعت نظري بس طالعت الارض و عايتهم و رحت خذت مكاني بين البنات .. لين احينه ما شفته بس يالسه اسمع صوته و لما يت عيني فعين بشرى كرهت عمري و تناسيت ياسر عشانها " يارب يكتب لهم نصيب " بس شي يخوف اذا هو تم ع ها الحال هي تحبه و هو . . . ااه .. خلاف تغدينا ع طاوله وحده و السوالف و الضحك لا ينتهي بس اللي ناقص منصور فديت روحه عشان عرسي ضغط ع عمره فالسفره و ما قدر يكون ويانا فالعيد .. اووف شها النحاسه ..
شوي شوي قامو يقومون و انا و بشرى مخلصين بس يالسات حق السولف .. فديتها و الله بفدقتها و الفتره اللي فاتت ساعدتني فشرات الزهبه كانت تتشرالي من النت ع ذوقها و ماشالله عليها ذوقج راقي الله يعطيها ع قد نيتها .. خلاف قمنا و قلنا بنسير فوق فحجره بشرى بس شفت محمد يصيح ..
: بنات سيرن انتن و انا يايتنكن
بشرى : لا تتاخرين شي سوالف خخخ
: هههه انزين
رحت عند محمد اللي عند امايه مهره شليته و يلسه ع طاوله : ليش تصيح يابطل !!
محمد يصييح : بابا ما يااا
حبيبي لويت عليه : بابا بي حبيبي اليوم فليل بي ياقلبي
محمد طالعني : يعني ما بي احييين !!
: بعدين بي حبيبي خلاص لا تصيح ترى بابا بيزعل
هز راسه و نزلته راح عند امايه مهره و انا صعد فوق صوب البنات .. رن فوني مسج وققت و شفته كان من يوسف " حووه سيارتي لا تتدعمين فيها غاليه ع قلبي ترى , اذا سويتي بها شي ما بعطيج لعبدالله " .. حمااار يعرف يضرب ع الوتر الحساس حمرييت .. حسيت بإيد تسبحني و ضرب ظهر ع الجدار بالقوو توييعت من خاطر ..
و بنفس الايد رفعت راسي : مستانسه باللي سويته !!
فتحت عيني اول ما سمعت صوته : هدني
ياسر بألم : مستانسه !! بس تعرفين بتحسين بتأنيب الضمير لاني باخذ بشرى و هي تحبني و انا احبج تعرفين شو بيستوي بها لو عرفت !! بتكرهج بتستحقرج لانج اوهمتيني بمسمى الحب و سرتي تزوجتي غيري
همست : بس انا من اول خبرتك اني ما ابيك لا تألف
ساير ضحك بغرور : منو بيصدق !!
شل ايده عني و خطف جدامي .. يلست ع الارض من الزيغه .. بيتزوجها !! بتتحطم اذا عرفت انه يحبني و ما يباها و فوق هذا بيجذب عليها عضيت ع شفايفي بغضب خلي يجرب يسوي جي والله برويه شغل الله .. قمت احاول اقوي عمري و حدرت حجره بشرى اللي صوت ضحكها عالي .. يعلها دوم ها الضحكه اااه ياربي ..
بشرى : ميره شبلاج !!
جنه كنت اتريا منها ترمس عشان اصيح
بشرى شهقت يت يلست عندي : شبلاج ليش تصيحين !!
روضه : فديتج شوفيج حد قالج شي !!
ودي اصرخ و اقول هو شو سوى بي و شو بيسوي فبشرى ودي ..
،
ما ياني نووم خايفه من ياسر و اللي بيسوي فبشرى .. وخايفه من يوم العرس احس بتوتر خصوصا اني ما اعرف عبدالله .. و السفر و عقدتي وياه ياربي ><" , قمت من سريري و نزلت تحت كانت الساعه 3 الفير .. ساعه 8 رقدت و ع ساعه وحده وعيت مره ثانيه ما اعرف شو ياني هذا وباجي يوم ع العرس لو باجر العرس شو بيتسوي بي !! سمعت صوت تحت خفت تيبست فمكاني لو كنت فبيت يدووه كنت بتوقع انه صقر , ياربي منو بي ها الوقت ليكون حرامي !! امييييه لفيت و صعد اول درج و انا اسمع الصوت يقترب خفت حسيت ريولي هب شايلتني و ثجال ..
.. : ميره
فزيت و حطيت ايدي ع قلبي التفت : زيغتني حسبالي حرامي
منصور ضحك : شها الحرامي المتحرم يدخل من الباب
ابتسمت و ركضت و لويت عليه : حمدالله ع سلامه كابتن
منصور لوى عليه بزياده : الله يسلمج يالعروس
وخرت عنه طالعته بنص عين : هب وقته ها الطاري روحي زايغه
منصور ضحك : عروس عروس عروس هههههه
: اقول سير ارقد احسن لك
منصور : وين محمد !!
: راقد فحجرتيه لا تحاول تشيله مافيني يقوم و بعدين ابيه يرقد عنديه الليله و باجر بعد
منصور غمز لي : ان شالله يا حرم عبدالله المصون
ضربت ريلي بالارض و منصور يضحك .. رجعت حجرتيه شفت محمد و هو راقد بعمق فديته يا ناس رحت تسدحت عند و مسحت ع خده شوي شوي و لما تحرك شليت ايدي بسرعه ههههه كانت ملامحه منزعجه خلاف رقدت ..
،
لبست قميص كت لونه ابيض ساده و شورت فوق الركب لونه اسود جينز و لبست عبايه ساده و لبست شيلتي و سحبت مفتاح سياره يوسف اللي لين احينه ويايه .. نزلت تحت و انا اربع ظهرت بسرعه و ركبت السياره و بسرعه لبيت خالوو .. وصلت باب الحوي كان مفتوح فدخلت داخل بسرعه شفت واحد واقف فالحوي سويت طاف و دقيت هرن عشان تتطلع شيخه بس يحليله فز و التفت بسرعه و عقد حواجبه كان حمدان .. ياويلي احراج لفيت ويهي اوني اعابل فشنطتيه
فزيت لما سمعت صوت دق ع الزجاج التفت تروعت لما شفت حمدان ضحك عليه .. نزلت الجامه وانا منحرجه
حمدان : مبروك
: الله يبارك فيك عقبالكم
حمدان ابتسم : خلي شويخ تعرس خلاف بنتفرغ لعمارنا و بعدين عنا شيبه ما تزوج لين احينه
كانت اول مره ارمس حمدان بها الطريقه , كل اللي بينا رسميات .. ابتسمت
حمدان : ربي يسعدج و ان شالله بقلب عرس لحدث جمهوري " غمز لي "
امبيه هذا شو ناويه : ههه لا تقصرون
حمدان طالعني لثواني و قال : تصدقين لما كنتي صغيره كنت تخافين مني !!!
ماادري ليش تحمست احب حد يرمس عن طفولتي اللي ما اذكرها : والله !! ليش !!
حمدان ضحك : كنت متوحش فالنسبه لج هههه كنت بس ادور اي شي عشان اضربج
طالعت بنص عين : عيل صدق متوحش
حمدان انحنى يضحك عليه و انا ضحكت
سمعت صوت شيخه محتشره : ياللي ما تستحي تغازلها اشركه و لا باجر عرسها يا الثور
حمدان اعتدل فوقفته : لا تخليني امنعج من الروحه والله اسويها ما يخصج
امبيه تبدل هه اشك انه عنده انفصام فالشخصيه ..
حمدان طالعني : شوي شوي فالدرب لا تسرعين ابي امايه ترى
ابتسمت : لا توصي
ركبت خالتي ورى و شويخ جدام و تحركنا جدا الصالون كنت حاجزه لما دخلت على طول بدت الحنايه تحنيني بعد ما فصخت عبايتي و شيوخ اونها محتشره ليش انه خالوو ما تخليها تلبس جذا وما تقولين انا شي هههه .. عطتى فالوييه " عرسي خلاص لبسي لريلج " نقعت ضحك عليها كانت معصبه و مسويه سالفه ..
يلست شويخ عندي تتريا دورها : بشتاقلج
طالعتها : شويخ والله بصيح لا تذكريني احس بشتاق للكل حتى لمنيره و سعود
ابتسمت : حني ع راسه ع كل اجازه تعالي ههه
ابتسمت ..
تميت اطالع الحنايه و هي تحني كانت بطيئه شوي بس كبدايه حسيت نقوشها حلووه .. حنيت لكتفي و ريلي لركبتي و تميت يالسه و انا ماده ايدي و ريلي خلاف بدت فشويخ اللي بتحني لنص ايديها و بتنقش نقوش بسيطه ع ريلها و بعدها خالوو اللي طلبت حنا خفيف فايدها و ريلها .. و فوني يرن اكثر من عشر مرات و محد منا يروح يطلع الفون طالعنا بعض نضحك .. شوي و شفت بنت بعشر سنوات تقريبا تقرب من شنطتها تفتحه و طلعت الفون و حطته ع اذنها
: فدييتج تسلمين حبيبتي .. الوو
صقر : تراني هب ربيعتج
ضحكت : ما ارمسك .. بلاك تتصل !!
صقر : بخصوص الحلويات طلبت تقريبا ست انواع تبين اكثر !!
: تريا " طالعت خالتيه " خالوو ست انواع حلويات يكفي !!
خالتيه : ماادري !! خليي ياخذ نوعين زياده
: خذ نوعين زياده ع ذوقكك , هيه شو ستوى ع فستاني !!
صقر : هاذو فالسياره لا تحاتين .. تبين اودي بيتنا و لا بيتكم !!
: لا حطته فبيتنا
صقر : خلاص صار منصور فالبيت صح !!
: هيه
صقر : خلاص بمر احينه مع سلامه
: ربي يحفظك ..
حطت البنت فوني فالشنطته و شكرتها فديتها قمر .. تمينا يالسات تقريبا ثلاث ساعات تعبت و مليت بس خالتيه مصره اني اتم اكثر عشان يثبت اللون خلاف رحت غسلت فحمام الصالون و ظهرنا رجعنا البيت ع ساعه سبع المغرب .. دخلت حصلت سعيد و سعود مارين بيدهم كنادير شلكهم يايبنه من الدوبي و محمد ماشي وراهم ههه فديته انا .. رحت صوب حجرتيه حصلت فستاني فكيس خاص و محطوط ع السرير بشكل مرتب رحت فتحت سحاب الكيس طالعته .. ياربي شقايل بلبس ها جدامه اوووف احس نفسي بينقطع .. شليته و علقته فالكبت ..
ظهرت المسكه و الكعب حطيتهم فمكان .. شفت شنطتي الصغيره باجي الشنط حطوها فسياره نهيان عشان ما يتغربلون بها باجر .. حسيت بتوتر ما اروم ايلس بروحي بدلت لبست مخوره و نزلت تحت حصلتهم يالسين ما عدا امايه مهره
اببتسم منصور : عروس عروس
ياربي ويههي احترق مول ما يقدر ><" .. رحت يلست و انا مطنشيته لو عطيته مجال بصيحني .. نزل محمد من حضن منصور و يلس فحضني تم يطالع حناي ..
محمد : أعموو بابا يقول ماما ما بتي ليش !!
طالعت منصور يت عيني فعينه ثم طالعت محمد : ماما مشغوله حبيبي " رديت طالعت منصور " دوم يسأل عنها !!
منصور : ها الفتره هيه
غلا ما يت تشوف محمد من يوم اللي خذ منصور محمد عنها .. هاي اللي متمسكه به هاي اللي يت صرخت و احترشت لانها تباه !! هه شكله الريل اليديد نساها محمد و طوايف محمد .. شو تبى به اكيد بتيب عيال من ريلها الثاني و بتنسى محمد .. و بينسيها مع الايام .. تعشينا مبجر اليوم ع اساس انا العروس لازم ارقد عدل لانه وراي لويه باجر و فوق هذا السفر ساعه 3 الفير ><" ..
نهيان : سيري ارقدي احس بنقطع لج عرج من كثر التفكير لهدرجه متوله " و نقع ضحك "
قبل ما ارمس يته فلعه ع راسه من امايه مهره : صدق ما تستحي امسك لسانك
نهيان ضحك : خليني امايه شوفيها والله مره فالعمر اشوفها جذا
بشتاق لغيره نهيان و مغثته لي طالعته و الدمعه فعيني ..
نهيان ابتسم بحنان : لازم ترتاحين قومي ارقدي
هزيت راسي و قمت رحت جدا حجرتيه و انا ساحبه محمد ويايه .. تم يتعبث باغراض بس ما خليته يلمس المسكه مافيني تخترب هب وقته .. بحركته روح توتري تميت اطالعه و اضحك ع حركته قمت التعبث باغراضي وياه لين ما داخ و رقد .. طالعت الساعه كانت 12 رحت تسدحت عنده تميت اطالع ملامحه لين ما دوخت و رقدت ..
،
توتر .. خوف .. ارتجاف .. برد .. حراره .. احس اني اعاني من امراض الدنيا ااه ياربي خلاص اليوم .. الليله بتنتهي حياتي هني فها البيت اللي شاركني احزاني و افراحي .. البيت اللي حتواني طول سنين عمري الاولى و الناس اللي شاركوني حياتي بفتقدهم واايد .. احس الدموع بتنزل فاي وقت بدون سابق انذار .. قبل ساعه كتبنا العقد صرت حرمته حلاله خلاص صرت ملكه .. خبروني انه بيدخل بعد شوي عشان نتصور بس بلغني منصور انه بي قبله هو و نهيان اللي ما شفتهم من الصبح .. خلصت دارين من المكياج و التسريحه و لبست فستاني و كعبي و الطرحه اللي ضبتطها دارين ع التسريحه بها اللحظه اندق الباب الخارجي و دخل منصور و نهيان بعد ما اذنت لهم ..
تجدم منصور وحبني ع راسي : ربي يحفظج من كل حاسد و ربي يوفقج دنيا و اخره
قبل ما ارد تبطل الباب الثاني و دخلت شويخ بفستانها و تسريحتها و مكياجها , شهقت : شوووييييخ
شهقت زين ما شفط الهوا كله و ظهرت بسسسرعه منصور كان معطيها ظهر بس نهيان كان ويهه ع الباب طالعته كان يطالع الباب اللي دخلت منه شيخه بسرحان خخ مسرع ما ثبت شكلها ..
منصور : طلعت !!
ضحكت : هيه هيه
التفت نهيان : هااه !!
منصور ضحك : ول عليك شو هب شايف بنت فحياتك بلاك مبهت
نهيان : خوز عن دربي " حبني ع راسي " ربي يوفقج و يحفظج اقري ع عمرج عن اطيحين ع ويهج و انتي ع الكوشه
ضربته ع جتفه : لا تفاوول ترى ما بطلع
خذنا كمن صوره و خلاف يو صقر و يوسف سلموا عليه و باركولي و تصورنا يميع .. تموا يسولفون ويايه و يضحكوني شكلهم يحاولون يشيلون التوتر عني بس رجع التوتر بلحظه دخول عبدالله الحجره نزلت نظري للارض حسيته اقترب و حبني ع راسي
عبدالله همس : مبروك يا عروس
همست : الله يبارك فيك
ظهروا كلهم ما عدا عبدالله اللي لبسني الدبله و المصوره تصور و بدت الصور الماصخه و انا كل شوي أأشر لها تخف و بلا مصاخه بس هب راظيه بس فالحه تضحك عليه و عبدالله ساكت ما قال شي ذكرني ها الشي بأول يوم شفته فيه ما رمس بهذاك اليوم !!
و طلع .. طلعت نفس و يلست ع الكرسي و دارين و المصوره يضحكون عليه هزبتهم و هم بس يضحكون .. تذكرت شويخ اتصلت بها يتلي و هي معصبه هزبتني بغت تصييح دمعتها فعينها هي خبله انا شو يخصني منو قالها تتدخل جذا تعرف انه ملجنا و قالوا بعد ساعه بيون انا شوي يخصني والله بريئه خخ .. اندق الباب و دخلو ثلاث بنات مبين انهم فالعشرين وحده منهن حامل ..
شيخه : هايل حريم اخوان ريلج
يو سلموا عليه ما شالله كل وحده احلى عن الثانيه ..
وحده الحامل : انا وديمه حرمه مايد الكبير و هاذي شما حرمه سالم و هاذي أحلام حرمه حامد
كنت اعرف انه عنده ثلاث اخوان غيره بس ما كنت اعرف اساميهم ابتسمت لهم
شما : استريحي يحليلج شكله الفستان ثجيل علييج روحج صغيرونه
ابتسمت
وديمه يت يلست عندي و حطت ايدها ع كتفي : هدي اعصابج و كل شي بيعدي ع خير لا تفكرين واايد لانه ما بودي و لا يب
يااه نبره صوتها تهدي الروح فابتسمت لها بأمتنان
شيخه : لو تشوفين يدووه ما خلت حد فحاله تبا كل شي يكون مثل ما تبا يحليلها
عضيت ع شفايف لما يت فبالي : فديت روحها
وديمه : يارب عن اربي
أحلام شهقت : ليكون تتويعين !!
وديمه غمضت عيونها بألم : هيه رجع العوار
خفت امبيه بتربي !! طالعتها برعب : وقت ولاتج !!
وديمه : هيه والله بذبحك يا عبدالله ان ربيت الليله
شما : قومي تسدحي
وديمه : خلاص راح الألم
أحلام : واايد تحركتي قومي تسدحي
وديمه : خلاص ما فيني شي
دخل محمد فدييييته طالع كيووت لابس كندوره بيضه و مغترينه و بيده سلاح ع قده يا صوبي و خاشمني فدييته يا ناس :$ .. شوي و دخلن بنتين وحده بعمر خمس سنوات و الثانيه بعمر محمد عرفت انهن بنات مايد و شما عندها بيبي عمره 3 شهور اما احلام اللي عرفته انها متزوجه من ست شهور .. تمو يالسات ويايه و وديمه شوي تتويع و شوي تنصحني و تهديني ..
شوي و صرخت وديمه : مااروم خلاص بربي شما شما اتصلي بمايد شمووو
خفت فوق خوفي امبيه اول مره اشوف وحده بها الحاله كلنا توترنا اتصلت شما فريلها سالم و خبرته يخبر مايد و طلعوا من الباب الخارجي و انا اسمع انينها ياربي خفت واايد خفت يمكن اعيش ها الدور فيوم من الايام !! و قبل ما ترجع شما اللي راحت ويا وديمه توصلها لسياره خبروني انه لازم انزل .. دارين عدلت مكياجي شويه و طلعت و انا ارجف من الخوف و سالفه وديمه و ترتني زياده يارب سترك !! بصيييييييح ><" ..
نزلت ع شعر مكتوب باسمي و اسم عبدالله كانت هديه من يوسف .. مشيت و انا راسمه ابتسامه ع شفاتي و صرخه وديمه لين احينه فراسي .. شفت بنات ما اعرفهم اظن من اهل عبدالله !! و شفت يدووه رحت حبيتها ع راسها و سمت عليه و ركبت الكوشه كان طاغي عليه اللون بطيخي و الرصاصي كان فخم و راقي وهادي شويه .. و اخيرا وصلت و يلست و من يلست يو البنات يلسمون عليه و احلام واقفه فوق راسي و تقولي هاي فلانه و هذيج علانه كلهن بنات عم و عمات و خوال و خالات عبدالله ماشاالله عايلتهم كبيره .. و يت يدووه تصورت ويايه و امايه مهره ..
يت شما سألتها : شو ستوى ع وديمه !!
شما يلست عندي و ابتسمت : لا تحاتين ان شالله ما عليها شر
احلام : عاد حرام ما ستانست
شما : مقدر و مكتوب ان شالله يوصل عبدالله بالسلامه
طالعته باستغراب , عبدالله وين سار عيل !!
احلام ضحكت : مايد حالف ان ياه ولد بيسمي عبدالله
نزلت راسي مستحيه منها و ابتسمت ان شالله يوصل البيبي بالسلامه : ليش ما عرفت شو فطبنها !!
احلام : لا اونه خلي مفاجاه
بعد نص ساعه قالو المعرس بيدخل .. دخل و وياه صقر , يوسف , منصور , نيهان , سعيد , سعود , عمي جاسم , عمي عيسى , عمي حمدان .. شوي و انقلب المكان لميدان كل الشباب يالس يولون و ابهرني يوسف مول ما توقعت انه عنده كل ها المواهب كان احسن واحد فيهم بيولته تخبل و منصوور ماسك ايد محمد و بيده الثاني ايول و محمد يول بسلاحه و سعيد و سعود ع تشابهم مسوين دوتيو نفس الحركات و اشوف البنات يأشرون عليهم ههه صار عندهم معجبين , اما صقر و نهيان حسيتهم مالهم فالسلاح يعني شوي يرقصون عشان خاطري و عمي حمدان شل البقعه بحركاته ..
خلاف انسحب الكل و تمينا يالسين بشكل هادي .. يت عمتيه ام مايد سلمت علينا و باركت لنا .. خلاف قصينا الكيكه و المراسيم الثانيه و حانت النهايه خلاص احينه و بنتهي .. مسك ايدي حسيت بكهربا تسري فجسمي كانت ايده اكبر عند ايدي و ادفا مشينا لفوق صوب الحجره ..
عبدالله : تعشي و بدلي باجي ع الطياره ساعتين ونص
هزت براسي و عيني ع الارض و ظهر .. بدلت الفستان بفستان بسيط حرير خفيف لونه رصاصي بكم واحد و مسحت دارين مكياجي وحطت لي مكياج خفيف و بسيط و فتحت شعري و رفعته بكلبس .. حاسبتها و سارت خلاف يت شيخه يابت العشى بس صدق ما كان لي نفس ما كلت بس شربت عصير برتقال معنها لحت عليه اكل بس ما كلت ..
طلعت نفس لما شفت يدووه يايه تسلم عليه وياها امايه مهره و منيره و خالتيه سلمت عليهم و انا اصيح لدرجه انه الكحل ساح طريت اني امسحه كله و ظهرت لما يت وقت الظهره و سلمت ع اخواني و خوالي و عمامي و هم يوصون عبدالله عليه ثم رحنا المطار و صقر ويانا .. قبل ما نركب الطياره وصلنا خبر ولاده وديمه اللي يابت عبدالله الصغيرون .. سلمت ع صقر بشوق كبير ما رمت اودره هذا الامان كيف اوده بها السهوله .. و ستسلمت و ركبت الطياره ويا عبدالله ..
كان الوضع جدا هادي انا اكتفت بدموع صامته و انا اتذكر كل شخص ودرته ع ارض البلاد .. ليش وافقت !! ليش وافقت اسافر دامي اني مااروم ليش وافقت .. اااه استغفر الله .. هدى الوضع فالطياره التفت بشويش اطالع عبدالله كان يالس بهدوء و يطالع جدامه بشرود .. تمينا فالطياره سبع ساعات لاعت جبدي حتى ما كلت شي فالطياره مافيني تنقلب معدتي و بعد ها السبع ساعات و ها التعب كله وصلنا لندن بالسلامه ع ساعه 6 الصبح بتوقيت لندن .. نزلنا و هو طول الوقت ماسك ايدي استلمنا الشنط و طلبنا تكسين عشان أغراضنا ..
من اربع او خمس سنين هب يايه لندن يتها مره سياحه فالصيف ويا اخواني حبيتها فالصيف كان الجو وقتها غرام مع لفحه بروده الله يعين فالشتا و نحن احينه ع ابواب الشتا تقريبا .. تميت اطالع الشوارع اللي فيها شويه ناس و بدوا يزيدون لما قربت الساعه ع السبع .. وقف التاكسي جدام فله طابعين تشابه الفلل اللي حذالها لونه ابيض .. نزلنا الشنط و دخلنها داخل و اول ما دخلنا كنا فالصاله كان الاثاث ابيض و سماوي اثاث اوربي .. و جدامنا باب المطبخ و ادراج المطبخ باللون الاسود و الابيض .. و ع يساري دري و ع يميني باب حمام .. صعدت فوق كان في ممر متوسط الحجم و عريض شويه ع يميني كانت حجره مأثثه بسرير لشخصين و الحجره كانت كبيره وفيها حمام و الحجرين الثانين فوسطهم حمام واحد منهم مكتب مأثث و الثانيه شرا الصاله الصغيره ..
دخلت الحجره الكبيره لما شفت عبدالله يحط الشنط عند باب .. سحبت شنطه صغيره لداخل و يلست ع الغنفه اللي فالحجره كانت الحجره باللون بني كاكاو و الابيض ..
بطل عبدالله شنطته و طلع ملابسه و قال بصغيه امر : رتبي كل ملابسي فالكبت
ودخل الحمام .. حسيت بحد كفخني ع ويهي !! ليش رمسني بها الطريقه و بعدين ما يحس انه تونا رادين من السفر و قبلها العرس !! عضيت ع شفايفي حسيت اني بصيح خفت من نبره صوته ليش جذا رمس !! فصخت عبايتي و نزلن دموعي , خوف و وحده خفت من ها الشي .. قمت سحبت شنطه كانو شنطتين كبار و بديت اصف ملابسه فالكبت و انا اكتم شهقاتي و مسحت دموعي لما فتح باب الحمام .. حسيت بحركته وراي ماادري شو يسوي !! كملت شغلي و انا ساكته و لما خصلت التفت حصلته راقد ع السرير بعمق .. قمت خذت لي لبس قطني مريح و رحت تسبحت كان الماي باااارد ياربي خلص كل الماي الحار ><" .. طريت اتسبح بالماي البارد ياربي احس ضلوعي تجمدت من بروده الماي وفوق الهذا الجو في بروده شوي .. لبست ملابسي بسرعه و انا ارتجف خلاف ظهرت و رحت تسدحت ع السرير بطرف اليمين ع حافه السرير و نمت من تعبي ..
|
17-11-11, 12:36 PM
جديد مواضيع قسم القصص المكتمله من وحي قلم الاعضاء
العرض العادي
