الجزء الخامس....



لها ربع ساعة تترياه عند باب الحوي...انا متاكده ها وقت سيرته للروضه...وينه وايد تحير علي اليوم...ما اقدر اترياه اكثرعن جي بتاخر على دوامي...وقبل ما تركب السيارة ..ياها صوت من وراها ..خلاها تيبس يمكانها ...والدموع تيمعوا بعيونها .
نديم:ما راح يسير الروضه اليوم...راقد متاخر امس
ما ابى اهرب ما اباه يجوف دموعي...منو الي قاله اني اتريا هيثم
نديم:ليش يا سجايا...ليش تعذبين نفسج وتعذبيني معاج...ليش بعتيني برخيص
اتوسلك يا نديم لا تفتح دفاتر مسكره...لا تنزف جروح بعدها ما برت...اه لو تعرف ليش اتريى ولدك كل يوم...عسب الوي عليه واشم ريحتك فيه...المفروض يكون ولدي انا ...ولدي انا وانت ...8 سنوات واحنا نرسم حياتنا مع بعض ...سامحني يا نديم القدر هو الي فرقنا ..لو الود ودي ..ارمي نفسي بحضنك اللحين.. ...
نديم:شو السبب يا سجايا ...ريحيني وريحي عمرج...شو استوى بالاسبوع الي سافرت...شو الي قلبج علي
: وقفتنا غلط يا نديم...قلتلك انساني ...عيش حياتك...انت عندك عايله اللحينه..هم محتاينلك...انا ماضي بالنسبة لك...بس هم حاضرك ومستقبلك
ما تريته يرد علي ...ركضت لسيارتي..لا تزيدها علي يا نديم...محد حاس بالنار الي فيني....كل ما اجوفك مع حرمتك وولدك...احس روحي بتطلع....
الحمد لله وصلت بالسلامه لدوامي...الطريج كان ضبابي جدامي من كثر الدموع...طول الدرب والهرنات ما وقفت ...مرة ادخل الدوار من خير ما احاسب...ومرة كنت جريب اطير هندي الي يمشي بالرصيف ...وبالنهاية وصلت....ما مداني ايلس ...الا والسكرتيريه تقول مدام سجى وصلت...قلتلها خليها تتفضل


رحلت .....
يا من كنت ..حلم الطفولة....وعشق المراهقة...وامنية الشباب
تركتني........
للامواج الدنيا ......تقذفني ...كيفا تشاء
رحلت...
يا من لم تكن لي يوما.........ولن تكون لي يوم

لا ..لم انسك يوما..........ولن انساك ما حييت...
وعزائي....ان التقيك بدنيا غير عن دنيانا الفانية....


بما ان اليوم ويكند ...قررت ان بطبخ الغدا اليوم..خلاص ما اقدر اخبي مواهبي الطبخية اكثر...نزلت من الدري وانا اركض وميوده بيدي البهارات الي يايبتنهم من البلد...فريتهم بالمطبخ وسرت صوب الصالة اقول لعيوزي ان بطبخلهم اليوم...لا شو هاي المناظر ...وعلى السريع بدلت قير ريولي من الجدام للريوس وركض للمطبخ....لا عيوزي مب ناويه تيبه للبر ...الا حالفه مية يمين تثقفني بهاي الامور...يا امي عندكم غرفة تباوسوا على كيفكم...بوي حسوا شي غرب هنا ...بايعين الحيا والمستحى هذوله....كلي تبن اذا تتوقعين اني بيي ازقرج...انت الي بيفوتج نص عمرج تجوفين الطبخ باصوله...المهم ان بديت اطبخ بضمير حي ...ببيض الويه اليوم...وعقبه بطبخلهم اي شي ...مشي حالك يعني...رفعت راسي للباب ...جفت عيوزي تجوف علي ...سالتني شو يالسه تسوين ..وشو ها الي تسمعينه...كنت مشغلة القران بصوت العجمي ...دايما اشغله وانا اطبخ او حتى وانا اذاكر...واشغله لما ارقد بس اخف الصوت ...قلتلها ها قران...اتري علي يا عيوزي ان ما خليتج تسلمين ...في احلى شعور بالدنيا من انك تجوف حد يسلم على يدك ....اهم شي النية موجودة...ودونما ذلك يتيسر...سرت صوبها وبست راسها ويدها ...وعيوزي الفرحة مب سايعتنها ...الله يسلمكم انا قايله لعيوزي انه احنا عندنا لازم نبوس راس ويد عيايزنا وكبارنا ...وها دليل الاحترام عندنا ...وقلتلها ان بعد ببوس يدج وراسج...دليل احترامي لج...فعيوزي وايد عيبها الموضوع ...والله انكم مساكين وتترحمون...الحمد لله بس احنا مسلمين ...المهم قلت لعيوزي اني طابختلج ذيج الطبخة الي بتاكلين ادينج وراهم...سرت ازهب طاولة الطعام...وانا افكر بالشي الي ناويه اسويه...ناويه ادخلها الاسلام...امم مب ناويه استخدم معاها اسلوب النقاش..لانه انا صراحة ما ابى انحط بموقف انها تسالني اساله غريبه وما اقدر ارد عليها...ترى هم لازم يسالوا اسئله غريبه وانت المفروض تتبع معاهم اسلوب السياسة والاقناع بالرد..وانا صراحة مب ذاك الزود ...ورحم الله امرء عرف قدر نفسه..فعسب جي قلت اقنعها واحببها بالاسلام عن طريق التعامل معاها ...واهم شي القران يكون دايما شغال بالبيت ولو بصوت واطي...صح هم مب فاهمين شي...بس والله صوت العجمي يخليلك تبكي وتخشع ...يت عيوزي وهي ميوده يد شيبتها وساسرته بشي..خلي شيبتها يضحك ضحك مب طبيعي...ما عليه حشي فيني يا عيوزي...عسل على قلبي ..بس حلمي جان اطبخلج مرة ثانية...لحد ما تيين وتطلبين بروحج مني اطبخ...عقب الغدا يلسنا نسولف بالصالة ...وشيبتها قال انه اكلكم لذيذ بس وايد بهارات فيه وما اقدر ااكل اكل جي...يا ذا العلم..ويش ها المنكر..جي وانت منظف الصحن وما يباله غسيل ...عيل لو كان عايبينك شو كنت بتسوي...اما عيوزي..فديتها ...يلست تتمدح بالطبخة ..لحد ما قالت بس...بس بعدج لا تحلمين ان اطبخلج مرة ثانية..لحد ما تقولينها بصريح العبارة ...المهم سرت ايبلهم الجاي السليماني (الاحمر)الي مسوتنه ...لا شيبتنا عيبه الجاي...ما طلبت كل ويكند بسويلك جاي سليماني..مع اني غاسله يدي بالماي والصابون ..من انه ييى من وراك شي...بس علشان خاطر عيوزي ...سمعت عيوزي تتحمحم..هلا والله غردي ...سالتني عن ريحة البخور...تبى تعرف ...افا بس ما طلبتي شي...بقولج ليش ما اقول...مب وراي شي..لا يا الحلوة وراج دراسة ...ومستقبل ...ما علية بنطبق الي قريته عن النية الذكية...امم يعني...انا حاطه النية الاساسية لدراستي طلب العلم ...ولي اجري عند ربي...بغض النظر عن المستقبل الي ييني من ورى دراستي...يعني امر دنيا ودين مرة وحدة...مثل انك تصوم يوم الاثنين والخميس اقتداء بالرسول...بس بنفس الوقت تقدر تدمجه كنوع من الرجيم ..وتزيد ايام الصيام...بنية الصيام والرجيم..لاني قريت دراسة انه الصيام يساعد على تخفيف الوزن مع توافر عنصر الرياضة...يعني تمشي قبل الافطار بنص ساعة...لا تقولوا صعب ومتعب مع الصيام...ترى الرسول عليه السلام والصحابة..كانوا يحاربون برمضان...واحنا مستكثرين ومستعصيين سالفة المشي...كان مكتوب بالدراسة ..انه وانت صايم وممتنع عن الطعام...جسمك يبدى يحرق الاكل المخزن بالجسم...فاليبقى بالجسم عبارة عن الدهون...فاذا مشيت جريب الافطار ...الي اكيد يحترق الدهون...سبحان الله ...الغرب يكتشفوا هاي الاشياء اللحين بس


لبست عبايتي وشيلتي...وسكرت باب الشقة...ها اول يوم اداوم من بعد ما خذيت اجازة اضطرارية ...نفسيتي كانت دمار...يبالي اسير عند طبيب نفسي...لانه كل ما اقتنع اني تجاوزت ونسيت سالفة عرسي..الا انهار اسبوع من كل شهر...مع انه ها شي طبيعي ...الي مر علي شي مب هين...بس لازم اعالج نفسي ...وانسى هاي المرحلة من عمري...المشكلة انا حتى ما اعرف اذا هو مطلقني ولا انا على ذمته...ما اريد اجوف ويه ...انا حتى ما جايفه ويه ....وصلت الشركة الي كارهتنها كره العمى...لولا الحايه ولا انا جان من زمان مستقيله..كل الي بالشركة كارهتنهم من المدير للموظفين ...نظراتهم ...همساتهم...ضحكاتهم..كلها فاهمتنها ...بس سافهتنهم غصب عني...ما ابى اناقش معاهم اصلا...وشو فايده النقاش في موضوع عقيم ...الا زيادة الجرح...والقيل والقال فيه...وصلت للقسم الي اشتغل فيه..من متى وانا احاول انتقل منه ...بس طلبي دايما يقابل بالرفض...نفسي اعرف مديري شو الي وراه...جفت طارق يترياني عند المكتب...اصبحنا واصبح الملك لله ...ها مايبى يعتقني لوجه الله .. شو مشكلته معاي...ياخي اذا انت مب طايق تجوف ويهي مره...فانا مب طايقتنك الف مرة ...
ميسم:خير
طارق:الناس يسلموا بالاول ...
ميسم:قول الي عندك من الاخر...وبعدين ما ظنتي بينا كلام
طارق:لا يروح فكرج لبعيد...انتي لو اخر وحدة بالدنيا ما فكر فيها
ميسم:سير ولي لاه...وريني عرض كتافك...ومكتبي يتعذرلك
طارق:لا عليتي وتشمختي اخت ميسم
احسن شي اني احقره...ترى الحقران يقطع المصران...يلست على الكرسي وبديت اجيك ايميلي ...واجوف الشغل المتراكم والي ينتظرني...
ما عليه موت بحرتك...بس مب يايه ارد عليك...
طارق:كلمه ورد غطاها...ابتعدي عن اخوي ...لا تظني اني مب فاهم عليج...ادري بج تبين تلعبين براس اخوي ...وها الشي مب مستبعد من وحده شرا ماضيج...بس حطي ببالج انه ها الشي ولا باحلامج
العب على اخوك ها..والله انك تترحم يا طارق جان على بالك اني ابى اخوك...بوي انا جنس ادم كلهم بايعتنهم برخيص...بس ما عليه انا الي اعرف اشقى احرق اعصابك..
ميسم:امم تعرف بما انه ماضي اسود ..وانت تعرف انه شركتم هي الشركه الوحيده الي رضت توظفني...فلازم ارد الجميل لاخوك...فكرت وفكرت وما حصلت غير اني اربطه بخيوطي العنكوبتيه واحكم ربط الخيط علشان يطيح بهواي طيحة محترمة...صاحي انت ولا شارب شي ...شو تجوف الاوادم كلهم شراكم ...لا مذهب ولا سنع...الاحترام منفي في قاموسكم...ما يحكمكم غير فلوسكم وانفسكم المريضه ...شو على بالك اني ميته على اخوك ...شوف والله وانا حالفه بربي...جان جفتك مره ثانية راز ويهك بمكتبي ...لاسويلك فضيحه لا سوت ولا استوت...خبرك انا ماضي اسود يعني ما هامني شي
طارق:تهددين يا ميسم...انا طارق تهددني وحده شراج...ما عليه اتري علي بس
ميسم:اعلى ما في خيلك اركبه...ويله فارجني
:شو ها الصراخ ...شو تتحرون سوق سمج..هاي شركة محترمة ...طارق انت شو يالس تسوي بمكتبها...ميسم ليش صوتج واصل لاخر المكتب...شو رايكم اني اعاقبكم ..واعطيكم ملف اسود
طبعا عرفتوا من ها الي يصارخ...ها مديرنا مروان...اول مرة اجوفه جي معصب...
مروان:ميسم لو سمحتي ممكن تسيرين صوب مكتبي....وانت كلامي معاك عقب
سرت لمكتبه...شو يبى يفصلني مثلا...والله ولا على بالي..جان بيذلني على ها الشغل يحلم....بس والله ما اذل عمري عسب شغل..
مروان:ممكن تفهميني شو سبب الصراخ الي كان من بينكم
ميسم:والله يا استاذ مروان ...اخوك لا يحشم ولا يستحي...
مروان:رجاءا ميسم من غير ما تغلطي على اخوي..ودخلي بالموضوع دايركت
ميسم:استاذ مروان ظنتي احسن تتخبر اخوك
مروان:بساله ..بس ممكن من غير كلمة استاذ
يلست اجوف عليه ...شو وراك يا مروان...انا مستقصده اناديك استاذ ..عسب ارسم حدود من بينا...نفسي اعرف السر الي خلاك توظفني
مروان:وين سرحتي ...اكلمج وما تردي
ميسم:معاك ...انا استاذن وراي اشغال
وطلعت من مكتبه...يلست بالكرسي ...وانا افكر بحياتي...شو النهاية...احس عمري معلقة ...ابى اسير ازوره واساله سؤال واحد...انا بعدني على ذمتك ولا ...بس مب رايمه اجوف ويه...غمضت عيوني...وبمجرد ما غمضتهم...الذكريات بدت تمر علي شرا الفليم ...يالسه بالكوشه ...ولابسه فستان مرة رقيق بس ينبان عليه غالي...اهله هم يابوا لي قبل الزفاف بيومين...مع ان كنت معترضه انهم هم الي يبون فستان العرس...حسيته قويه بحقي ...شو يعني مب واثقين من اختياري ...بس اخوي جبرني اني اسكت ..شرا ما جبرني على المعرس ...كنت فاله شعري ...على ميكب هادي ...ونشوا اهل المعرس يرقصوا ..كنت مستغربه اي قدرة غريبة عندهم انهم يخفوا الي داخلهم...لانه كل تصرفاتهم قبل العرس يبين انهم مب راضين على ها العرس...بس يمكن لزوم البرستيج..علشان جي يتصرفون انهم فرحانين والعرس عرسهم ...اتذكر لما الدي جي اعلنوا دخول المعرس ...حرمة اخوي كانت واقفه حذالي ...وهي ميوده الشال الابيض الطويل عسب اغطي شعري واجتافي ...كنت منزله راسي وانا ارتعش ...اول مرة بجوف ويه...بس ما مداها حرمة اخوي تحط الشال الا وسمعنا صريخ...واصوات حريم تصيح.....شو السالفة ...شو مستوي ...يا رب سترك..دخل علينا ريال وطلب من الحضور كلهم المغادر...انا ما جفت الريال الي دخل ...لاني كنت اصيح...والرؤيه كانت ضبابيه...بس من سمعت صوت الريال ...شديت الشال من يد حرمة اخوي ...ابى اغطي عمري ...بس هي رمت الشال وسارت ركض صوب الباب ...تجوف شو السالفة...جفت كل الحريم يسيروا صوب الباب ...وهم يتساسروا فيما بينهم...كنت ابى اسمع شو يقولون ...بس وضعي ما كان مساعد ابدا... جفت عمتي تصيح ...وهي تقول يبولي ولديه ..ليش تسوون فيه جي ...ويت صوبي ...كانت تبى تعطيني كف ..بس بنتها يودت يدها ...وقالتلها ...بسنا فضايح امايه ...سارت عمتي وهي تتحلطم وتقول ...هاي وحده منحوسه ولا ملعونه...شو منحوسه ولا ملعونه ...انا شو سويت ..اصلا شو مستوي ...يا ربي اشقى اتصرف اللحينه ...كنت اصيح وتحول الصياح لشهاق ...جفت وحده مدت لي الشال ...ييت اشكرها بس هي قالت ...انا اخت ريلج ...بساعدج تبدليين فستانج...لا تفتكرين حبن فيج ...لا من ستر مسلم ستره الله يوم القيامة ...وسالتني عن اغراضي ...قلتلها ما اعرف ...بس اظن بسيارة ييت ااقول ريلي بس يودت عمري ...هي فهمت علي ...قالت اترييني بسير اييب الجناط من سيارته ...وسرنا انا وهي لغرفة التبديل ...وطلبت منها توصلني لبيت اخوي ...كاخر معروف لوجه الله ...سرنا صوب بيت اخوي ..ويا ليتني ما سرت ...اول ما جافني جنه جاف يني ...يلس يصارخ ..ويقول ظهري من بيتي ..انا ما اعرفج...ويلس يكفخني بويهي...وانا كنت اترجاه واحاول ابوس ريوله ...واقوله وين بسير ..انا ما عندي غيرك...انا ما سويت شي...ولا اعرف شو استوى بالقاعة...سكر البا بويهى وقال ما ابى اجوف ويهج ..وان طبيتي بيت ..ليكون اخر يوم في حياتج...يا الله ما جفت حد اقسى من اخوي...تخلى عني باصعب وقت بحياتي...ما فكر حتى وين بسير بها الليل ...تصدقون ليومنا هذا ما سال عني ...بس وين تسير من ربك يا اخوي...ما عرفت وين اسير...بس سمعتها تقول تعالي بوصلج للمكان الي تبينه...سرت فندق ..بس ما قدرت اطول بالفندق...ما عندي فلوس....بعت كل شي كان غالي عندي..وما وبعد ما قدرت ايلس بالفندق اكثر من شهر ...قدمت في كل الشركات الي يت على بالي حتى بوظايف اقل من شهادتي بس ولا شركة رضت توظفني بسبب سمعة ريلي الي انتشرت بالجرايد...ليتني ما قدمت استقالتي بوظيفتي الاوليه ...ظليت ثلاثة اسابيع وانا ادور شغل ...وما كان جدامي غير شركة وحده ...كنت متاكده اني ما راح اتوظف فيها ...هاي الشركة وايد قويه...يعني سمعتها وايد زينه ..طول الدرب وانا اقرا قران واقرا الادعية...واستغربت اليوم الثاني اتصلوا فيني ...وطلبوا مني اداوم بعد اسبوع ...شكيت بالسالفه...ولما بديت اداوم سالت مديري الي هو مروان عن سبب توظيفهم لي ...قال انه الخبررة الي عندج وتخصصج هو الي كان نباه...ما فكرت وايد بالسالفة ..لاني كنت محتايه الوظيفه ...واستاجرت شقة ببنايه فيها عوايل ...طبعا بعد مذله محترمه من راعي البنايه .. بس ربي يسرها ...نسيت او بالاحرى تناسيت وضعي المعلق ...بس لما اييلس بروحي كل الذكريات تمر علي .. كنت ناويه اسير لطبيبة نفسيه تساعدني اني اجاوز ها الموضوع واعيش حياتي بشكل طبيعي ...بس دايما انشغل او انسى ...بس شكلي بسير من باجر واحجرز موعد

يعطيش العافيه على القصه الرائعه
توقعاتي ان غصون يكونوا اهلها مزوجينها من مدثر

ميسم انسانه عاشت الظلم من اقرب الناس وهذا بحد ذاته عذاب
مروان هو وظفها يمكن كان معجب فيها او انتقام من احد عن طريقا هي الضحيه

مياسه يحلوش انتي وعجوزش المتصابيه
بس حلو منك تحولين تدعين الناس للاسلام عن طريق تعاملك معاهم

صالح اخ حقير الواحد مايشك في اخته الا يشك في نفسه وانت مضيق عليها
في كل شي انت اللي رميتها وانت اللي تتهمها

ردينه حلو الواحد يحافظ على الحدود وخاصه دينه من دون تهون فيها مع اي كان
بالعكس الناس راح تحترمه ماتقول عنه منافق