الجزء العاشر

خديجه .. خديجه ............ فتحت عيونها ورفعت راسها من على مكتبها وهي بتطلع بتسنيم ................. حطت تسنيم ايدها على جبين خديجه وهي بتقول .. من فتره صحتك مو عاجبتنى .. ضعفانه اكتر عن قبل .. في شى شاغلك ! ............... هزت راسها بلأ وهي بتبتسم بود لتسنيم وبتقول .. لا تقلقي عليّ .. الظاهر دور البرد الى اخدته لسى مؤثر عليّ ................. بلطف رفعت تسنيم وجه خديجه لها وهي بتقول .. حبيبتى لازم تعتني بحالك اكتر من هيك .. شوفي عيونك كيف صايره .. منتفخه ودبلانه .. لازم تنامي 8 ساعات كل يوم على الاقل .. انت شكلك مابتنامي نصهم .. اقفلى موبايلك شوى وارتاحي من دوشة المدرسات .. مشاكلهم مالها نهايه وبتستنى شوى لحتى ترتاحي ..................... هزت راسها بطيب وهي بتقول لحالها .. لو تعرفي شو شاغل بالي ياتسنيم ................... سألتها تسنيم .. باقى عندك حصص ؟ ............................. بتعب ردت .. لأ بس بستنى استاذه علياء تخلص من حصتها .. بدها مني مساعده ببعض ................ قاطعتها تسنيم وهي بتشدها بلطف .. يالله يالله على بيتك .. انا بساعد علياء .. انت روحي ارتاحي ..................... حاولت خديجه تعترض بس تسنيم عطتها نظرة بتتصنع فيها الشده وهي بتقول .. اذا بعد ساعه دقيت عليك ورديتى ياويلك مني .. بدي الاقى التلفون مغلق لمدة لا تقل عن 4 ساعات .. ويالله على البيت انت لازمك شويت راحه حتى تستعيدى نشاطك متل قبل .. لسى ماصار لك اسبوع طالعه من مرضه تقيله ........................ باستها خديجه من خدها وهي بتقول .. الله لا يحرمنا من قلبك الحنون ياتسنيم ................... ابتسمت لها تسنيم وهي بتقول .. انا الحنونه ولا انت !! .. يالله خديجه نوم العوافي حبيبتى ................................... فعلا محتاجه تنام وترتاح .. من بعد يوم المكتبه والكلام الى صار بينها وبين يوسف وحاسه كل طاقتها استنزفت .. مع انها ارتاحت كتير لما طالعت الى بقلبها بس كلام يوسف هزها من الاعماق .. خاصه بعد ما توسلها تحبه متل مابيحبها .. ماقدرت تصمد امام نظراته وغطت وجهها وصارت تبكي وتبكي وتبكي ويوسف ماله عرفان كيف يهديها .............

وصلت بيتهم ولما نزلت من السياره تقابلت معه عند الباب .. بسرعه سلم عليها وسألها عن صحتها .. جاوبته وعيونها بتتهرب منه واستأذنت بسرعه ودخلت لبيتهم .............................. تنهد بقلة حيله .. شو اعمل اكتر من هيك !؟ .. بعترف ان الى عملته اثر فيها أكتر مما تصورت .. وأمنت اني جرحتها خاصه لما بالأخر صارت تبكي وتشهق وهي بتشاور على حالها وبتقول .. تعبانه .. تعبانه .. حسو فينى انا تعبانه .. قلبي رح يوقف من الألم الى فيه .............. غمض عيونه بألم .. من زمان كنت أحضنها كل مابكيت .. وامسح على شعرها لحتى تنام .. اما هلأ مالي عرفان كيف اتصرف معها .. كيف اريحها !! ....... بكاءها عصر قلبه .. فقال وهو بيتوسل لها .. خلص انا ببعد عنك شوى بس وقفي بكى الله يخليك .. بوعدك ما ازعجك خلال هالفتره لحتى تقدرى ترتاحي وتفكري فينى منيح .. خديجه منشان الله وقفي بكي قطعتي قلبي ..... مسك بقوه طرف تنورتها وهو بيطلع فيها بتوسل .. خديجه انا بحبك .. بحبك .. باس طرف التنوره وهو بيضيف .. لا تبكي .. لا تبكي منشان الله .. انا طالع هلأ منشان ترتاحي .. اوعديني انك توقفي بكى .. رح اوقف ورا الباب واذا سمعتك لسى بتبكي رح ادخل ووقتها لا تحاسبينى على الى رح اعمله .........................

رمت اغراضها بغرفتها .. بدلت ولبست بجامتها وهي تتنهد بتعب وبتفكر .. عيونه مرهقه .. كأنه مو نايم منيح من فتره !! .. ياترى قسيت عليه زياده !؟ .............. رن تلفون البيت .. فتحت الباب وبسرعه رفعت السماعه منشان ماينزعج ابوها بنومته .. الو .......................... السلام عليكم .................... احمر وجهها وهي بتقول وعليكم السلام ..................... صباح الخير انسه خديجه .. شو هالصدفه الحلوه ! كيفك ان شاء الله استرديتي صحتك وعافيتك ؟ ......................... صباح النور دكتور سامر .. الحمد لله احسن بكتير ...... بتردد ضافت .. شكـ .. شكرا على الورد .. والله معذب حالك كتير ........................ ان شاء الله يكون عجبك .. انت بتستاهلي اكتر من هيك ...................... احمر وجهها زياده وهي بتقول بخجل .. كلك ذوق شكرا ................... سمعته بيتنهد قبل مايقول .. عمي ابو سليمان موجود ........................ نايم .. ان شاء الله بس يصحى بخبره بأتصالك .................. مو مشكله .. طيب سلامي للجميع .. مع السلامه ......................... فكرت تقوله ولا ماتقوله تقوله ولا ماتقوله .. بسرعه قبل مايقفل قالت .. دكتور سامر ................................ جاوبها بلهفه .. امرك ........................ انحرجت كتير من رده .. بتوتر قالت .. انا اسفه لأني تأخرت عليك كتير .......................... فهم عن شو بتحكي .. بتفهم رد .. ولا يهمك .. خذى وقتك انسه خديجه .. واذا عليّ .. تغيرت نبرة صوتها وهو بيضيف ... مستعد انتظرك العمر كله اذا كان جوابك نتيجته انك تزيني حياتي بوجودك فيها ........................ انفاسها تسارعت وقلبه صار يدق بسرعه .. مستغربه من قوة تأثيره عليها !! .. بسرعه ردت منشان ماتطول المكالمه اكتر .. بوعدك اني ما اطول اكتر من هيك .. ان شاء الله بس يصحى أبي بخبره بأتصالك ................ بأنتظاركم .. مع السلامه انسه خديجه ...................... مع السلامه ................

*****

ايام وهي بتفكر شو القرار الصحيح !؟ وين سعادتها !؟ .. مع يوسف ولا سامر !! .. كل واحد بتميل له بطريقه مختلفه .. صحيح حبها ليوسف اكبر بكتير من انجذابها لسامر بس مابتنكر ان بالفتره البسيطه الى عرفته فيها اثر فيها كتير .. سامر الشخص المناسب لها بكل المقايس .. بيعرف كيف يعاملها وبيفهم على طباعها وبيقدر بيئتها وتربايتها .. مابيتجاوز حدوده وكلامه موزون وله رنه خاصه بتحرك مشاعرها .. الحياه معه مريحه وامنه ومستقره وهي متأكده انه حيحترمها ويقدرها ويشبعها حب وحنان لو عطته الفرصه ........ ياريت القلب كان خالي لما اجي سامر كان الموضوع اسهل بكتير .... السؤال الى محيرها كتير .. هل الافضل تبني حياة مع انسان بيحبها وبيحترمها ولا مع انسان بتحبه حتى النخاع ؟ .... مابتقدر تقول ان مع يوسف رح تعيش بأستقرار .. مع انها بتعرف انه بيحبها بل مجنون فيها .. بس مع هيك حبه كان كله الم ودموع وقلة احترام .. كله يصب بمصلحته الشخصيه برغباته هو وبس .. بتخاف تسلمه عقلها متل ماسلمته قلبها فتدمر حياتها على الاخر .. بتخاف من الاستسلام التام له وهالاستسلام يدمرها نهائى ........

بوحده من حصص الفراغ الى بتقضيها مع فاء سألتها .. وفاء .. بدى اسألك عن موضوع بس بدى تجاوبيني عليه بصراحه .............. نفضت وفاء ايدها من الشبس الى بتاكله وقالت وهي بتعطي كل اهتمامها لخديجه .. معك .. تفضلي ............ حاولت قدر الامكان يكون كلامها عام ومايحسس وفاء ان المشكله بتخصها .. امم هداك اليوم شفت فلم غريب .. البطله بتحب البطل كتير لدرجه انه مهما غلط ومهما جرحها بتسامحه ................... قاطعتها وفاء بقهر .. غبيه ................. هلأ استني خلينى اكمل لك ........................ شو تكملي لي !! .. مبين من اولها غبيه واكبر غبيه .. علمته انه يغلط وهي تسامحه .. بالله كيف حتستمر بالعطاء اذا كان مابيعطيها شى ................... تفاجئة خديجه من كلامها فسألتها .. شو عرفك ان مابيعطيها شى !! .............................. واضحه .. هي بتحبه وبتسامحه وهو المغرور الى واثق ان مهما عمل او غلط او ابتعد رح يرجع ويلاقيها بتستقبله بالاحضان والورد .. واذا حب يعطيها فبيكون عطاء يشبع رغباته الشخصيه .. هاى كليشاه معروفه دائما هالنوعيتين بيجتمعو مع بعض ........................ بتوتر قالت .. لا ماكانت تعمل هيك بالعكس هي كانت معرفته قيمته ومو عاطيته وجه ولا محسسته بحبها له لأنها بتعرفه اناني بتصرفاته .. بس مع هيك هو احيانا يعبر لها عن حبه وحاجته لها ............... حطت وفاء ايدها على خدها واطلعت بخديجه وهي بتقول بتريقه .. ايه وبعد هالمهزله شو صار ؟ .. لحظه لحظه انا بقول لك ..... صارت تحكي بنبره حالميه وهي بترف بعيونها .. ماقدرت تبعد عنه لأنه حبيب القلب والى بيسحرها بنظراته وبيدوبها بقبلاته .... رجعت تقول بقهر .. مو قلت لك غبيه .......................... بخوف سألتها .. يعني انت رأيك تتركه ؟ .................... من زمان لازم ترميه برا قلبه مع اول غلط بغلطه بحقها .. الرجال انسان اناني ولازم المرأه من اول العلاقه تعلمه كيف يلزم حدوده معها ويعطى متل مابياخد .............................. رفعت خديجه حواجبها وهي بتقول .. بس انت هيك بتطلبي منها انها تعيش بلا قلب !! .. معقول ياوفاء تقدر تنتزع كل هالحب من قلبها !؟ ......................... بنزق ردت وفاء .. احسن لها من هالعيشه المشرشحه .. تعيش بكرامه احسن ما تعيش بحب .. اصلا انا بكره هالنوع من النسوان الضعيفات المخيسات بحالهم .. بتلاقي الوحده معذبه حالها كأن مافي بهالبلد الا هالولد !! .. مع انها اكيد بتستاهل احسن منه الى بيفهمها والى بيحبها والى بيبادلها العواطف بطريقه محترمه وعادله ............... بس ........................ قاطعتها وفاء بسرعه .. بس شو ! خليها تدوس على قلبها احسن ماهو يدوس عليه ويرميلها اياه بعد مايكون شبع حب وحنان ............. ماكملت معها وغيرت الموضوع .. حست ان وفاء متحامله على قضية الحب بسبب تجربتها الاولى بالزواج ...... بس مع هيك كلامها اثر فيها .......................

******

من غير مايرفع راسه سأل ممرضته .. لسى باقى مرضى كتير ؟ ............... لا دكتور .. بعد ربع ساعه موعد جولتك على المرضى ....................... تنفس بعمق وهو بيقول .. لكان خلينى ارتاح شوى قبل موعد الجوله ...... هزت الممرضه راسها وطلعت وسكرت الباب وراها ........... تمدد على الكنبه الوحيده الموجوده بعيادته .. حط ايداه ورا راسه وهو بيفكر فيها .. الموضوع صار معقد كتير ياسامر .. مع ان البنت بتستاهل بس !! ....... الى بينها وبين يوسف اكبر من اعجاب وهالشى واضح من الى صار على درج العماره وماعاد في شك بالموضوع ... الظاهر انها كانت بتحبه من غير مايعرف حدا بحبها حتى هو .. بس ليش بترفضه !! .. وليش مارفضتنى بسرعه اذا بدها اياه وبتحبه !! ...... تفكيرها بطلبي بيعطينى امل .... شكله جرحها جرح كبير مو قادره تسامحه عليه !! .. اكيد في شى خلاها ترفضه وخلاه يحكي عليها هالكلام !! .. طيب يعنى ممكن توافق عليّ انتقاما منه !؟ .... حك ذقنه .. لا خديجه اعقل من هيك .... طيب اذا وافقت عليّ معناها محتاجه فترة نقاها لتعالج قلبها ! .. ...... تنهد .. هدا بالضبط الى بحكي عليه .. حال البنات بمجتمعاتنا العربيه .. ضحية لسطوة الذكر بشكل او بأخر .. لو خديجه كانت برا كانت تصرفة بطريقه مختلفه تماما مع يوسف .. مسكينه سوء سمعتها بين الناس مع ان البنت متل الالماس الحر .. طيب شو الى بيمنع انها تعيش حياتها وتبدأ من جديد !! ........ حك جبينه بتعب وهو بيفكر .. لازم تصرفاتي معها تكون محسوبه وصحيحه .. لازم ما اضغط عليها واخليها تتخذ قرارها بسلام .. اذا يوسف تصرف بطريقه عوجا انا لازم اتصرف صح اذا بدى اكسب قلبها .. بكفيها الى مرت فيه ........... ابتسم وهو بيتذكر وجهها المورد ونظرتها الخجوله .. تنهد بحب وقال .. انت بس اعطينى فرصه وانا رح اعمل جهدى لأنسيك الدنيا كلها واداوي كل جروحك .. رح اعاملك بالطريقه الى بتستحقها انسانه متلك ........................ دقت الممرضه الباب قبل ماتدخل وتقول .. د. سامر موعد الجوله ...........

******

طلعت من غرفة الاداريه بعد ماخلصت طباعة اوراق فصل 2\أ .. الحصه الأخيره عندهم اختبار تقيم .. اطلعت على ساعتها .. ابتسمت وهي بتتجه للمقصف منشان تشتري كاستين شاى لها ولوفاء قبل ما تروح لعندها .. مسكت باب المقصف وفتحته بهدوء ... اختفت ابتسامتها وهي بتسمع ليندا .. عرفتها بسرعه من نبرة صوتها المميزه .. فتحت عيونها على الأخر .. بسرعه تراجعت لورا وسكرت الباب بهدوء ومشيت بخطوات سريعه لغرفة المدرسات .. حطت الأوراق بالدرج وقعدت وهي بتفكر بالي سمعته .. مافى دقائق وبتدخل ليندا الغرفه .. اطلعت فيها خديجه .. وجهها احمر ومرتبك .. متل الى عامل عمله وبيخبيها .. هي حاسه من الأول ان هالبنت رح توقع بمشكله بس ماتوقعتها بهالكبر .. كيف لازم تتصرف .. صعب تتجاهل الى سمعته .. كيف بدها تدخل لها وتخليها تعترف لها بالى سمعته !! ... ولا الاحسن لها تتجاهل الى سمعته !! .. اصلا هي سمعت بالصدفه وجزء صغير من المحادثه .. هدا معناه ان القصه مو كامله لازم تفهم كلشى منها قبل ماتظلمها .. بس الى سمعته كان واضح كتير ... يالله دخيلك الهمني الصواب ............. خمس دقائق مرت وهي بتهز برجلها بتوتر وعيونها ما انشالت عن ليندا .. ماقدرت تتحمل اكتر من هيك .. وقفت ومشيت لمكتب ليندا ... رسمت ابتسامه لطيفه على وجهها وهي بتقول .. مساء الخير ........................ رفعت ليندا راسها من على جوالها وهي بترد .. مساء النور أهلا استاذه خديجه ................. زادت خديجه من ابتسامتها وهي بتقول .. بتمنى تشيلي الكلفه بينا .. خليها خديجه حاف ............. هزت ليندا راسها وهي بتقول .. خلص بنخليها خديجه ..................... مشغوله شى !؟ ......................... لا ابدا بتريدي مني اي مساعده ؟ ........................... هزت خديجه راسها وهي بتقول .. والله اذا ماعندك مانع حابه اخد رأيك بموضوع ....................... حطت ليندا جوالها بالدرج وهي بتقول .. طبعا تفضلي .. ويارب اقدر اساعدك ....................... سحبت خديجه كرسى وقعدت جنب ليندا وهي بتقول .. بما انك لفيتي الدنيا وشفتي العالم حابه اخد رايك بموضوع وحده من صديقاتي .. هي وضعها متل موضعك .. بتسافر كتير وشايفه الدنيا كمان فقلت ببالي مافي حدا احسن منك يساعدني ................ بأهتمام واضح بعيونها قالت .. تفضلي .. شوبها صاحبتك !؟ ...................... ركزت خديجه النظر بعيون ليندا منشان تشوف شو ردت فعلها من الكلام وقالت .. ياستي صاحبتى البنت الوحيده لأهلها ومتل ماقلت لك انها بتسافر كتير .. مره بوحده من سفراتها قابلت شخص وحبته وهالحب مسبب لها مشاكل وألم بحياتها .............. بأستنكار ردت ليندا .. ليش الحب بجي معه ألم ومشاكل .. بحالميه ضافت .. الحب مابيجي معه الا السعاده والهنا حتى لو فيه مشاكل هالمشاكل لها طعم لزيز بخلي الحياة لزيزه .................... ابتسمت لها خديجه وهي بتقول .. بتتكلمي عن خبره .. شكلك واقعه لأذانك بالحب !؟ .................... توترت ليندا وهي بتقول .. ليش في صبيه ما دق قلبها ولو مره وحده بحياتها !! .. كلنا الا مانكون مرينا بقصص حب بحياتنا من الطفوله لحتى هلأ ........................ حطت خديجه ايدها على خدها وسنتدت ايدها على مكتب ليندا وهي بتقول .. والله كلامك حلو كتير ياليندا .. انت مريتي بشى تجربة حب !؟ .. لأن مابحكي عن هالشى الا انسان فاهم وعارف فيه وكلامك بحسه مقنع كتير ...................... احمر وجهه ليندا وهي بتقول بتوتر .. لما كنت طفله حبيت ابن الجيران .. كان كتير كيوت ولزيز ودماته خفاف وكنت متعلقه فيه كتير لدرجه اني تخيلت حالي رح اتزوجه .. بس بعد ما انتقلنا من بيتنا ماعدت شفته وانتهت قصة الحب الى بينا ...................... اطلعت فيها خديجه بحالميه وهي بتقول .. ياسلام .. بالله كيف كان شعورك بهديك الفتره .. احكيلي عن حب الطفوله تبعك .................... مرت حصه كامله وليندا ماوقفت حكي عن نظرتها للحب وتجارب الحب السابقه الى عاشتها لما كانت صغيره .. هالحديث فتح باب لحديث تاني بتتمنى خديجه تلاقي الفرصه المناسبه له لحتى تقدر تواجه ليندا فيه ......... رغبة ليندا المستميته للبحث عن الحب خلوها توقع بأكتر من غلطه بحياتها وكل مره رب العالمين كان بيسلمها معها بس هالمره غير .. حاسه بالخطر بيحوم حولين البنت ............

كلام ليندا عن الحب كان بيرن براس خديجه وهي راجعه للبيت .. مين فينا مابيحلم ينحب بجنون من شخص ويشارك هالشخص حياته بماضيه وحاضره ومستقبله ... تذكرت مشاعرها ليوسف والحب الى كبر مع الأيام بقلبها .. تذكرت شوقها الشديد له لما بيغيب .. انتظارها له على الشباك لتلمحه من بعيد .. الفرح الى بيملئ قلبها من ابتسامه صغيره موجهه لها منه .. احلامها فيه باليقظه والمنام .. خططها عن المستقبل الى رح يجمعهم .. معقول تكب كل هدا بسبب تصرفه الارعن معها !! .. معقول ترمي بسعادتها الأبديه الى بتحلم فيها منشان تعاقبه على أغلاطه !! ................. رجع لها صوت العقل يقول .. تذكرتى كل هدا وماتذكرتي الألم والأهانه الى سببها لك .. ولا هالألم كمان لزيز على قولت ليندا !؟ ...................... اخدت نفس وهي بتفكر .. ابدا ما كان لزيز او محبب .. كان كله دموع وغيره وقلق وحيره .. انا مالي من البنات الى بيحلموا بحب الروايات .. انا بالعكس بحلم بزوج يحبنى ويحترمني .. بزوج اخدمه بعيوني وهو يداريني ويحتويني برجولته .. بزوج ابني بيتي معه على الموده والرحمه .... مع هيك لما حبيت حبيت حب روايات .. كله عذاب وآآآهات .. لازم اعرف اتعايش مع هالحب .. شو رح ينقص مني اذا سامحته هالمره كمان !؟ ... بالعكس يمكن يصير الى بتمناها من زمان واحصل على حلمي بالبيت الهني والزوج الحبيب .. مستحيل اقدر اقتل قلبي هيك ببساطه متل ماقالت وفاء .. شوي شوي بوصل للنقطه الوسط بيني وبين يوسف .. لازم اقرب منه وامسك ايده واساعده .. انا مصره هالمره اني احصل على السعاده الى بحلم فيها .. مهما كان الثمن .. هاى فرصتي الأخيره ........................ جاوبها صوت العقل .. بس هالمره غير ياخديجه .. هالمره اذا سامحتيه معناها رح تثبتي للعالم كل الى قاله عليك .. معناها تحقق هدفه من كل الكلام الى طالعه عليك ... معناها ان يوسف حيبقى متل ماهو بطريقة تعامله معك .. معناها ان كل عمرك هو حيغلط وانت تسامحي ببساطه .. هو اول وبعدين انت .. واذا اعترضتي بيوما ما فالسؤال الاول الى حتتواجهي فيه .. شو تغير !؟ ليش بالاول كنت تسامحي ومتفهمه الوضع وهلأ لأ !؟ .. يعني ببساطه انت رسمتي حياتك من هلأ وبتعرفي كيف حتكون ... واذا وافقتي معناها وافقتي على يوسف ورضيتى فيه مع كل عيوبه الى كنت ترفضيها بالسابق ... اذا كنت موافقه على هالشى ليش ما وافقتي عليه من زمان وريحتى قلبك !؟ .................. بحده سكتت الصوت الى براسها وهي بتقول لحالها .. لأ .. رح نتفاهم ونحط اسس سليمه لحياتنا .. رح يتصرف صح ويحكم العقل قبل هواه .. رح يحترمني ويقدرني ويعرف كيف يتعامل معي .. هو بيحبني والى بيحب بيسعد حبيبه ما بيأذيه .. انا لازم اقوم بدوري معه .. التجاهل والصد مانفعوا معه .. بالعكس زادت الفجوه بيني وبينه .. لازم اتصرف بأيجابيه هالمره .. هو بيتهمني بالكبرياء والكرامه .. انا رح احطه امام الأمر الواقع ووقتها على حسب تصرفه وكلامه رح تكون ردت فعلي وقراري ......................... طيب وسامر !! .. ليش ما رفضتيه من الأول مادامك كل هالقد متأكده من مشاعرك تجاه يوسف وعارفه شو بدك !! ........................ دق قلبها بقوه .. سامر .. مابعرف !! .. الى بعرفه انه بيحرك مشاعري بطريقه مختلفه عن يوسف .. والله حتى التفكير بهالموضوع بيحرجني .. بس هاى الحقيقه .. بحب الأمان الى بحسه بحضوره .. بحب الأحترام والتقدير الى بشوفه بعيونه .. بحب الأحساس الخجول الى بيحركه بقلبي من ابتسامته او كلمته ........................... بمكر قال الصوت براسها .. ليكون حاطتيه احتياطي !! ............................ بسرعه جاوبت .. لأ ابدا سامر بحترمه لدرجه اني مستحيل اعامله بهالطريقه ..... بحيره ضافت .. بكل صراحه مو قادره افهم مشاعري تجاهه .. هو الرجل الوحيد الى بيشتت انتباهي وحاز على تفكيري .. مع ان يوسف ساكن بكياني قدر سامر يحتل مكان مخصص له بداخلي .. ليش مابعرف !!! ..... بسرعه وتوتر ضافت ... على العموم انا وصلت لقراري خلص .... برقت عيونها بشوق كانت دافنته من سنين فجره ذكرى ضمته لها .. قربه منها .. همسه بكلمة حبيبتي ........ فكرت بأصرار .. رح اخبر أبي بقراري هلأ ويوسف كمان .. ماعدت اقدر انتظر اكتر من هيك .. لازم أكون ايجابيه .. بيكفي انه خلال هاليومين محترم كلمته وبيبعد عني ومابيضغط عليّ بشي .. بكفي بُعد خلص صار وقت القرب ............................. صفت سيارتها امام العماره ونزلت والفرح والسعاده واضحه على وجهها .. بتتخيل كيف حتكون ردت فعل يوسف وقت تقول له قرارها .. احمر وجهها وهي بتفكر انه ممكن يتهور ويحضنها او يعمل شي .. يوسف مجنون وبيعملها ........ فتحت باب البيت وهي بتتخيل عيونه والفرحه فيهم .. اخيرا الحلم رح يصير حقيقه .. هي لهلأ مو مسدقه ............. رجعت لأرض الواقع لما شافت مرت عمها ابو محمد بالبيت عندهم واقفه امامها .. انقبض قلبها لخديجه .. بداخلها تعوذت من الشيطان قبل ماتقول بتوتر .. اهلين مرت عمي .. شو وينها امي ليش تاركتك لحالك ! .............. زادت القبضه بقلبها وهي بتشوف ام محمد بتقرب منها وعيونها بتلمع بالدموع .. خديجه يابنتي ............... قطعت كلامها لما شافت خديجه بتمشى بسرعه لغرفة ابوها .. فتحت الباب ماشافته جوا .. بسرعه تحركت بجهة غرفة المكتبه .. فتحت بابها كمان ماشافته جوا ............ ألتفتت لأم محمد وقربت منها بخطوات مترنحه .. وجهها شاحب من الأفكار الى بتلعب براسها .. عيونها كانت معلقه على ام محمد وبتترجاها تقول شى يطمنها ........... اشفقت عليها ام محمد فقالت بحزن ... يابنتي ان شاء الله مافيه الا العافيه لا تقلقي وتوكلي على الله ....................تجمعت الدموع بعيونها وتعلقت برموشها وهي بتسأل بصوت مهزوز .. وينه أبي !؟ ................

رائعة سحابة بس أنا زعلانة منك ليه تعبتي بابها ولا عشان ـاجل القرار الى خذته وتدي سامر فرصة

يااااااااااااااااااه اندمجت معال بالسرد الحلو والله ما قطع علي الا لما انتهت الصفحه
حراااااااام سحابه سامر يحبها حب محترم ولنتي طلعتي من الحسبه وسامر انا متني بصفه ابد