المنتدى :
الحوار الجاد
معذرة ... هؤلاء لا احب ردودهم على رواياتى ابدا ...
مرحبا بكم جميعا
فى الحقيقة وددت ان اكتب فى هذا الموضوع لكى لا اسبب احراجا لاحد
يوجد خمس او ست اشخاص لا احب ان اراهم فى رواياتى او فى موضوعاتى
فرجاء حفظا لماء وجههم يجب الا يدخلوا ابدا
فدخولهم يستفزنى و يعصبنى
اما اذا دخلوا رغم هذا الكلام فلا يلوموا الا انفسهم ........ فيس غاضب
مساء الخيييييير
محدش يقلق ياجماعة
اكيد كل اللى هيدخل الموضوع ده مش من المقصودين
ليه ... ؟ سؤال وجيه
لان طبعا اللى هيدخل القراصنة المميزون ..... اخواتى .......
اصلا لو مدخلتو كلكن هزعل منكن ....... ( بتزهقنى نون النسوة دى اوى )
المهم
عاوزين تعرفوا انا اقصد مين
انا اقصد ناس ردودهم مستفزة وهم :
1) العضو النايتى ( الحنين زيادة عن اللزوم ...... اللهم طولك يا روح ) :
العضو ده بتلاقى رده عاوز يخليك تجيب عصا غليظة وتتخيل الكمبيوتر بتاعك هو الشخص وتنزل على نافوخه .......
واليكم نموذج لرده على رواية كتبتها مثلا :
هاى يامان ( مان مين ياعم ماتقول اى كلمة عربى ..... خلصوا يعنى ؟! )
عامل ايه ..... مش عاوز اقولك البارت الجديد عمل فيا ايه ...... ياااااى يهبل ........ خاسة ( ياعم خاصة بالصاد متشلناش ) الجزء الاخرانى بتاع البطلة لما ودعت البطل بجد حزن اخر حاجة ( ياعين امك ياحبيبى ...... صعبت عليا ) .......
وبعدين يامان عندى ملحوظة ( صدعنا ياعم .... خير ) ....... البطل المفرود كان يصارح البطلة بحبه من زمان عشان يليها خاتم فى صوباعه ( المفرود !! ... هو انت بتتكلم عن فطيرة يابنى وبعدين صوباعه ايه بس .... ارحمنى يارب ) ......
عموما يامان انا منتظر البارت الجديد اوى ...... وحئيئى ( طبعا البيه قصد " حقيقى " ) انا فرحان موت ان واحد زيك بيكتب هنا ..... سى يو باااااااى ( ارحمنى يا رب ) .
همسة : دا بقى لو دخل موضوعى وكتب فيا قصايد مدح مببقاش طايقه والحمد لله تقريبا ليلاس كله رجالة حتى البنات اسلوبهم محترم ....... البنت لما تقول بارت او هايل مفيهاش حاجة...... لكن البيه الراجل ........ لاتعليق .
2) العضو المندفع ( المخييييف من وجهة نظرى .... شوفوا بنفسكم ) :
صبح يابرنس ........ خلصت الفصل بتاعك من ربعاية كده ( يقصد ربع ساعة طبعا ) ....... فى الحقيقة دماغك عالية اوى ( دماغى عالية ؟! ) ...... ايه النجومية دى يابه ( يابه ؟! ..... لا دا كتير بجد ) ........ البت بصراحة ادت للواد فى جنابه ( البيه المحترم يقصد البطل والبطلة ) ........ بس لامؤاخذة بقى فيه حتة فلتت منك ( فلتت ...... ياجمال اللغة ) ....... ازاى الوليه امها توافق انها تهرب مع الواد (والله ياجماعة قريت رد فى منتدى قبل كده رد بالاسلوب المرعب ده ) اعذرنى دى ست خربانة ( سامحونى انا محرج منكم لكنه صنف لازم اتكلم عنه ) .......... منتظرين بقيت الحكاية بقى يا ابو المبدعن ( حكاية ؟! ....... انت شايفنى ابلة فضيلة ياعم ) ........ بالاذن ( اذنك معاك يا حبيبى ذهاب بلا عودة ان شاء الله )
همسة : بعضكم مش هيصدق وجود النوع ده ....... لكن والله العظيم النوع ده موجود فعلا .
3) العضو المثقف ( هو بقول على نفس كده ) :
مرحبا ....... فى الحقيقة اثر فى ذاتى الفصل الاخير لك ( لحد كده كويس ) ........ النظرية الفلسفية للحرية المطبقة فى سالف الزمن الغابر تعاكس النمو الزاهى ( مين اللى طفا النور ) .......... النظرية البحتة المطلقة تجعل من البطلة حلم بارع فى دهاليز العصر المنبثق من الحياة المرمرية التى تعيش فيه مع البطلة ( ياعم العنوان غلط ) ...... والزوجة الصحيحة كما قال افلاطون هى الزوجة التى تحبذ الحياة فى مكان تعايش زوجها المنطوى على نفسه ( ابقى انسان مبفهمش حاجة لو افلاطون قال كده فعلا ) ...... ولكن المجمل العام لجنبات روايتك المخملية رائع ومذهل وينبئ بفكر متشنقر فى رونقه الملم بالينايع المحيطة بالفرهزق العام ( كتر الف خيرك ..... فى الحقيقة لامست خطوط الواقع ) ........ استمحيك عذرا حان وقت المغادرة ( يا عم انت طالع دبى ؟! .... بالسلامة ) .
همسة : طبعا هو مش بيقول كده بالظبط لكن بتبقى النتيجة واحدة بالنسبة لى ....... مفهمتش منه حاجة لانه بيحاول يجيب الكلمات الصعبة عشان يظهر انه مثقف ومبدع وقارئ ..... الخ .
4) العضو الخجول ( مش بيجمع ابدا ) :
مـ .... مساء الخير ...... احم ...... انا ...... انا قريت روايتك ( فيه ايه ياعم ) ...... فيه ملحوظة صغيرة ..... لا .... مفيش ملحوظة ... هى نقطة صغيرة ...... لالا مش نقطة ...... انا قصدى اقول ان البطل كان المفروض يقول للبطلة من الاول على الحقيقة ( اخيرا قلت جملة ) ....... بس انا قصدى ..... يووووه ....... انا المفروض اقولك ان الفصل ان المفروض يبقى اطـ ( اطول يعنى ..... ماشى حضر ) ....... اقصد اقصـ ( اقصر مش كده ..... وماله ) ....... اقصد ارفـ ..... ( ايه ارفع ؟؟ ...... ياعم انطق ) ....... عامة شكرا ليك ..... هستأذن ( غووووووووووور ) .
همسة : دا بقى عاوز ينضرب بالنار .
5) العضو المستعجل :
موضوع حلو ... شكرا ( اعم صحيح خير الكلام ماقل و دل لكن دى رواية وانا لاشفت خير ولا دل كل اللى شفته قل بس ..... شكرا يا سيدى )
اتمنى اكون وصلتلكم اللى انا عاوز اقوله
شكرا لكم اخواتى
|
18-09-11, 03:27 PM
جديد مواضيع قسم الحوار الجاد
العرض العادي
