ياهلا بالحامل والمحمول من طول الغيبات جااااب الغنايم
الله يجعلها اخر الغيبااات خاصة الطويله ))) فيس مالمح لشي

ديمه ياحبي لها تذكرني بسواليف نوير للي يعرفون مجلة حياة لها صفحه بهالمجله كأنها ديييمه مره تجنن

والحمدلله ع قولت رياض طلع عندها انوثه وتستحي والله وانا اقرا مواقفها اضحك واسمي. لأني جالسه لوحدي

طااارق وترف. يا حلوك ياتروووفه وانتي عرفه لطارق وتقهرينه وتثيرين غيرته اييييه عندك اياااه خلي المستخبي يطلع


ندى وعزام عزوم ارفق على البنيه ترا دلوعه وهاااي وجاها واحد جلف مثلك احمد ربك حصلت لك عاد تصدقين ام وسون احب اشوف مواقف الدلوعات مع الجلوف وكيف يضيعن علومهم نبي موقف لهم من اللي يحبهم قلبك ترا مهما كان عزام جلف وراعي ابل وبر يضل رجااال ويضعف لا اوصيك ام وسسسسوووووون

عزيزتي ام وسن اشتقنا لقلمك المبدع ولجميع ابطال روايتك لخفة دم ديما وكيف ستكون حياتها مع رياض ولمعارك ترف مع طارق وشراستها معه وغطرسته معها ولجلافة عزام وغرور ندى ولحكمة بحر الزين وطيش فياض ورزانة نجود ولجميع الابطال بدون استثناء وارجو ان يكون المانع خير وراء غيابك فلا تحرمينا من ابداعك ودمت لنا

السلام عليكم

كيفكم حبايبي ..
ماراح اطول بالحكي ..
كل اللي بقوله في بارت الليله باذن الله
بزنق نفسي واحاول انزله ...

لكن .. امامكم اختيارين ..
اسكر الروايه كذا شهر لحد مااقدر اكملها
ونرجع لموعدنا الاسبوعي ..

او اتركها مفتوحه وانزل براحتي كل مالقيت فرصه ..
واكيد مو قبل 3 اسابيع او شهر ...

.. اللي تبون امشي لكم عليه بالغوالي ..
مع اني افضل تتسكر لحد مااتفرغ لها ..
لان اسبوعيا صعب علي الحين بوضعي الحالي ..*
واكيد انتم مثلي ...*

وشكر لصبركم معي 🌹

السلام عليكم ...
__________


[ 44 ]
____


•
•



ريآض
____

.. كنت مقرر يومين بمكه ..*
وعشر ايام ب التشيك *...
لاني ناوي ازور مراكز التوحد هنااك ...
واذا حصلت اي تقدم غير اللي عندنا جبت عبودي لهناك ...


.. مسكنا طريق مكه بالسياره ..
مهوب طيران ..
ابي اخذ راحتي ...
.. كانت ساكته مدري حيا والا ايشً..!
قلت افتح سالفه ...

/ تدرين ديووم ..*
قبل اسافر ماعمرتس مريتي ببالي ..
ولاهقيت ولا واحد بالميه افكر اخطبتس ابد ..
كنت اقول ماعندي بنات عم ...
اعتبرتس مثل اخوانتس ...
.. تذكرين يوم فرج ولد جيرانكم ...!
ي الظاالمه مالقيتي غير آذانه ...!
للحين ترا عضتس مشوهه اذنه ...


ردت بدفاع ...
/ يستااااهل ...*
والله لو اشوفه لاقطّع اذانه الثنتين مهوب وحده
حيوااان اجل ضاربني مع صدري متعمد
وانا في مرحلة البلوغ ...
بغيت اموووت من الوجع ...

/ ههههه انتي اللي تستااهلين
عجوز وتلعبين ف الشارع مع العيال
منتيب صغيره بثاني متوسط اظن ...
ثم وش معنى اذانه من بد جسمه ...!


بصدق / مافيه شي نظيف الا آذانه
حتى ثوبه لو يعضه تسلب انسعر ...

/ هههههههههه
من نظفتس عاد انتي ...!
اذكر عليتس كشه ... تسد عين الشمس ...
الله يجزآ *من صنع سشوارات الشعر خير ..
ولو انه ماسوى فينا معروف ...*
*ستر عيوووبكن وغشنا ووهقنا ....
لا والآ طلع الولد مكدش وكشه قالت ع اهلك ...!


بانكاار / اما شعري كششه ...
الا نااعم من صغرتي بس شكلك ماتذكر زين ...


ناظرها بتعجب ...
/ عيني عينك تنكرين *..
اول ماقالو خواتي بنخطب لك ديمه*
ع طوول طيران لاشرطة الفيديو القدديمه عندي
كل مقطع وصوره وانتي مرتزه فيها ...
كنتس العيد من بعيد ...!
ولا صوره ضاابطه لتس اوريها عيالي لاجو ...

.. نسى نفسه انه مسترسل بالسواالف
وسكوتها حسسه انه ثقل عليهاا ...
بدون ماينتبه ...
حب يلطف الجو ... ويرقعها*

/ بس عاد عوابتس ع ملح ..


.. قررت تسكت ماترد ..
وهو بعد قرر يسكت شوي يرتب افكاره
ويراجع كلامه ...


•
•


[ ديمـــه ]
______

يآمال الليل..
سوالفه تدبل التسبد ...
هذي سوالف تنقال لعروس ..!


.. تسني عجوزه من خمسين سنه ...
.. والله ظنتي دراسته مااهيب طب ..
ياكود حآرس بمستشفى وتخب عليه*
...

.. قررت احقره واسكت لين يغير سوالفه البايخه...
... *وفجأه طرآ ببآلي شي ...
سألته ....

/ ريآض ليش تزوجت من برآ ..!
ام عبودي كآن فيها ميزه عن بنآت البلد ...!


رد بعد فتره ...
/ انآ كنت صغير .. دوبني دآخل ال 19 سنه
والمغريآت هنآك كثيييره ..
وانصدمت بالانفتآح اللي هنآك كثيير ..
وام عبودي كانت علآقتها معي غير ...
غير انها مرحه وبسيطه كانت كـ صديقه لي ...
.. كنت اقولها اشيآ ما اقولها لاقرب قريب لي ..
.. بما انها من مجتمع غير مجتمعي ..
مجتمع حريه بلآ قيود ولا عيب ولآ منقود ..
عاادي افضفض باللي بخآطري مهما كان ..
ارتحت معهآ مرره ..*
اول سنه كانت تعآرف سطحي ..*
وسوالف وطلعآت كفي وكذآ ...
وبعدها بسنتين تعمقت علآقتنآ وصآرت صدآقتنآ قويه ...
.. وامون عليها وتمون علي ..
مره صارحتني انهآ تبي علاقه معي من نوع ثآني ...
.. يمكن لو غيري عآدي رحب بهالعلآقه مع هالرابط القوي بينا ..
.. لكن مكالمآت امي وابوي كآنت منبه لي ..
كل مره يعيدون ويزيدون فهالجمله ( الله الله ياولدي ... احفظ نفسك من الحرام يحفظك الله )
ومن هالكلااام ...
فكان الحرام خط احمرر عندي ...
كل مانفسي خضعت وهوى نفسي اغراني اتبعه تطلع برآسي رجاوي وتحذيرات امي وابوي ...

.. لكن مع اصرارهآ قررت اني اتزوجهآ بالحلآل ..
وااثر عليهآ واعرفها بدينآ ...
اول سنه علاقتنا روعه ... ورغم تحذيري لها
ماتحمل الا انهآ حملت ....
وتممت اللي تبيه ومن هنا بدت المشااكل ...


وزآدت لمن ولدت ..
وشفت ان الحريه اللي جذبتني لها
هي اللي نفرتني منها ...
.. كم مره لقيت صديقها معها سكرانين وولدي*
مع المربيه ...
غير ملآبسها وتراجعهآ عن الحجاب والدين اللي دخلته عشاني بس مهوب عن قناعه ...
..*

.. مهما كان انجذابي للغرب وطريقة عيشتهم
الا ان شي بداخلي ينكر كثير اشيا ...
تهاوشت معها عشان صديقها اللي ضربته ...
..*
ورمت علي ولدي وطردتني من شقتها ...
لو ملابسي وملابس عبودي حذفتها علي ...


.. كنت مرتااح نفسيا بفراقهآ ..
وحمدت ربي الف مره انها حذفت الولد علي
ماسببت اي مشاكل وقضآيا على حضانته ...

.. ع طول رتبت اموري ..
وقدمت استقالتي من المستشفى اللي توظفت فيها بواسطتها ...
ورجعت لديرتي كني مولود من جديد ...
ووبس هذا اللي صار ...


.. تنهدت ديمه بقهر ...
/ مفروض بعثة الدراسه ماتكون بعد الثاانويه
الا للتخصصآت الغير موجوده هنآ او النآدره ..
ثم مفروض تكون زوجته معه ...
مهوب بزر توه مراهق يبتعث ...!
يعني مهيأ للفسآد بسهووله ..
وغير كذا اختلاف الحضارات بينا وبينهم
تخليه متذبذب وينجرف بسهوله للأغرآءات ..


.. ابتسم وهو مصدوووم ...
.. هذي ديمه .....!
.. معقوووله يجي منهاا ..!
وتفكر مثل هالتفكير ...
.. كان ببآله انه بيتعب ع بال مايخليها زوجه وأم واعيه وناضجه ...
يمكن من كثر ماتعيد وتزيد بهالجامعه طلعت بشي ...


.. بس لو ماتخربها ماتكون ديمه ...
سألته سؤااال نزفزه مررره ....
/ يقولون سمحو بزواج السعوديه من الاجنبي ...
... فكره حلوه والله ..
نجدد الدماء ونتخير بهالمزايين الحمران الشقران ...
..ويصير قطار العنووسه فاضي محدن يركبه ..
وغير كذا مايتمنن علينا ابوسروال وفنيله
ويتشررط علينا ....
.. وبعفوووويه ...
ليتني ماتعجلت دايم امي تقول العجله ماهيب زينه ..،
.. وانا عجله بكل شي ....


.. كانت تهذر وهو يحاول يمسك اعصاابه ..
... لحد مافلتت خلااص ..
بعصبيـــه نزرهاا ...
/ بــــــنت بـــــــسسس ...
وش هالحتسي ..!


ودت بخوف ..
/ وشفيك ..!
امزح ترا ... ليش عصبت ...

.. داس ع البنزين وهو عاقد حواجبه وواصل حده ..
/ بااس انكتمي ...
ولاا حرف اسمع ...

.. سكتت وهي مقهوره ..
ياسلآم شي لهم عادي تزين فيه السواالف ..
أما اذا لنا هالشي وعليهم يعصبون ...


والله لانكتم لحد مايترجااني اتكلم ...


•
•



[ ســآره ]
______

.. كنت محتآجه للعمره مره ..
آبي آستخير ربي آجلس مع سلمآن او اتركه ..
وآبدعي ربي ينزع حبه من قلبي نزع ...


.. كنت احس نفسي في دوامه ..
مآدري وش أبي ووش مآ ابي ...
محتاااره متردده مشووشه لابعد حد ...


.. مرات افكر اترك سلمآن واريح رآسي
لكن أرجع واقول هو ملكي وكآن لي وحدي*
ليش اتركه لها ..
.. وليش انا اللي اتنآزل ..!
ومرات اقول اشغلني ولعب ف آعصابي*
والهآني عن حياتي ... وراحة بالي ..


.. فكرت انفصل عنه واشوف حياتي..
بس من باخذ بعده ...!
اكيد ماهوب جايني الا ارمل والا مطلق يبيني مربيه لعياله ...
والا شايب عايب يبي يجدد شبآبه ..
والا واحدٍ راميه الطير ومآفيه خير ..


.. جلست بالحرم ادعي وابكي واستخير ربي
يهديني لمآ فيه خير لي دين ودنياا ...
... وبعد صلاة الفجر قررت اجلس بمصلآي
ادعي واستغفر لحد ماتطلع الشمس واصلي الضحى ..

.. انكبيت برآسي ع رجوولي وانفجعت آبكي ..
.. احس بالضعـــف بهاللحظه ..
.. *احس بحاجتي لأمي ..
الصدر الحنووون اللي ارمي عليه همي ..
وتفهمني قبل لا احكي ...
واشورها واثق بشورها ورايهآ ..
.. اللي احكي لهآ واشكي وابكي وانا ضامنه
ان شكوآي وحكيي بيندفن بين ضلوعهاا ..
ماراح تعايرني فيه بيوم لو تزاعلت معها ...
والا تنشره لو اختلفناا ...
والا تفشيه لكآئن من كان ....


.. جفلت من حسيت بيد تحتضنيً..
رفعت راسي الا حرمه وقوره تمسح ع ظهري
وتحتضتني بيدها ..
.. من شفتها رميت نفسي عليها وانا ماعرف لو اسمهااا ...
ضميتهاا بقدر شووقي لاأمي واحضانهآ ...
بقدر حاجتي للأماان والدفى ..
بقدر ضعفي وقلة حيلتي ...


.. ماكنت اسمع وش تقول والا وش ردة فعلها
الا بعد ماهديت شووي وسمعت صوت مطمئن
يسمي علي ويذكر الله ويهلل ويقرا علي الفاتحه ..
.. سكنت باحضانها لحد ماحسيت اني آلمتها وثقلت عليها ...
.. انسحبت بهدوووء وانا اعتذر لها باحراج ...

/ آسفه ي خآله ..
.. ابتليتس بهمي وضيقي ...

ابتسمت لي ... وبراحه ..
/ ماعليتس وانا امتس ..
لا يضيق خآطرتس..
الدنيا زوال وكلنا للفنآ *...
يبقآ العمل الصالح والذكر الطيب ...


.. بدون شعور حكيت لها كل شي ...
واشياء ماقلتها حتى لخواتي بعد ما ملو شكوااي ....
.. حسيتني ارتحت من مجرد الفضفضه*
واني طلعت كل اللي بخاطري ...


وهي كانت خير منصت ...
ماقاطعتني الا بـ ( لاحول ولاقوة الا بالله )

.. خلصت وقلت بضعف ...
/ شوري علي ياخااله وش اسووي ...!
اتطلق منه والا اجلس ...!


ردت برزانه ...
/ شوفي يا امي ...
الطلاق ابغض الحلال عند الله
وكان لتس خاطر بالعياال والرجل ...
قدامتس حلين ...
يا تقولين له انت رجاال تعطيني حقي بالفراش واجيب عيال مثل الناس ...
والا ياولد الناس كلن له طريقً...

وان رفض فـ لتس حق تطالبين بطلاقتس
ولتس اسباب قويه ..
وماعليتس ذنب من الله ....
والله بيخلفه عليتس بابرك منه ...


وان رضا وقبل شرطتس .....( بابتساامه)
/ يابنتي امسكي مجنوونتس لايجيتس اجن منه ...


.. ضحكت رغم دمووعي ....
وكملت ...

/ ولاتجعلين الرجاال اكبر همتس ...
خلي همتس الآخره تجيتس الدنيا مقبله ولو اعرضتي عنها ...
.. والرجال لاشاف الحرمه ماهيب لمه راح يدورها ..
ولاشافها تلحقه *ادبر عنها...
.. ياامي لاتبخسينه حقه ولاتعطينه اكبر من قدره ...
خير الامور الوسط ...،


.. ارتحت كثييير ...
وبنفسي ... طيب ياسلوووم ..*
بتشوف وش السوري تسوي ...


•
•


[ نــــدى ]
______

.. في احلك احلامي ظلمه مآتخيلت اخذ واحد مثل عزام ....
... بس ربي بلآني بغلآه بلوووه ....
وع قولة امي ' ربي لاتبلاني بحب مقفي '


.. يالله ..!
كنت اابي واحد رومنسي مرره وشيك ف لبسه
واهتماامه باناقته ..!
بس عزام عكس كل شي تمنييته ..!
جلف اخر شي يفكر فيه لبسه ..
بشرته قالبه من الشمووس..
عمره ماحط كريم ع ايديه ...
اغلب وقته حاافي ..
ورجوله فيها شطووب كأنها صدوع سيل في طين ..


ومع ذلك من اشووفه قلبي يرجف ..
احس الرجال قدامه ولا شي ..
عجزت اتخيل نفسي مع احد غيره من خذته ..
احسه بدا يجرفني له ولاسلووبه ..
اتذكر لمن مره خلط اللبن مع مرقة لحم وبيره ..!
.. كنت احس كبدي تقلب واناا اشووفه يستلذ فيها ...
.. والحين احس ووودي اجربها ..
.. غير قناعااتي وعادااتي ونظرتي لكل شي ...
.. كانت سوالفه عاديه ..
ماطرى موضوع خلافنا ولا قال شي ولاعلق *..
..قلت بشرح له ...

/ عزاام انا كنت ابي الحين ولد او بنت ثم
اوقف كم ........

قاطعني ...
/ خلااص ...
ذا الحتسي ماله داعي ...
انتي ادرى بعمرتس وصحتس ...
وهذا انا اقولتس من هالحين ...
.. كل ثلاث سنين ابيتس تحملين باذن الله ...
..*

.. وان بغيتي قبل بكيفتس ..
وخلاص مانبي كثرة هرج ماله سنع ...


.. ابتسم وكمل ..
/ شفتي خوااني الصغاار ...!
ياحليلهم كنهم فروخ حماام ...


..*



[ عزااام ]
_______

.. البيت مغبر ولا اقدر انام فيه ..
.. لو الود ودي ننآم بالبر عند البل ...
بس هآه الشكوى لله ..
لنا اكثر من شهر مآشفنا بعض ..
.. قلت نغير جو .. ونطلع بشقه مفروشه كم يوم ..
مآبي فندق عشآن آخذ رآحتي ..
.. نزلنا ونزلت عزبة القهوه والطبخ معي ...


.. لآحظت وجههآ تغير يوم شآفت العزبه ههه
هي مآهيب بالحيل بالطبخ ..
بس آبصبر وآخليهآ تعلم شوي شوي ...
.. ارتحنآ بعد السفر والعشآ جبته خفيف من برآ ...
.. بس من قمت الصبآح قلت لهآ تسوي قهوه ..
.. وع الغدآ جبت معي لحمة حآشي وخليتها تطبخهآ بالكآتم ....
/ هآتس .. لحمة حآشي صغير ..
سويهآ مضغوط مع خضآر ورز ...
يآني مشتهييها من يدينتس ...


ندى بقهر /
مآعرف آطبخ حشيآن ..
حدي بنت المذن ووبس ...


/ هههه الله يخلف عليتس*
حشيآن اجل ...!
ماعليتس .. بسويه انا كله وانتي سآعديني وتعلمي ...
يالله قطعي البصل والثوم ..
والخضار قطعيها كبار ..
وغسلي الرز وانقعيه...

اللحم مقطع مآيحتاج ..
بس خذي القدر اغسليه ..*
فتحت عيوونها ع الاخر ...

/ الحين يقالك انت اللي مسويه ..!

/ اجل وش ..!
انتي بس ركزي معي المره الجآيه
من يدينتس ..

.. مآقدرت اصبر بالشقه اكثر من يومين ..
كني طير بقفص ...
.. جبت شركه تنظف بيتي ..
وهي كلمت شغالات بالااجار بالشهر ..


.. بعد المغرب كان البيت يلمع ..
.. استغربت الجرس يدق ..!
مالي ارتباط بالجيران وكل معارفي يجوني*
عند البل والابالمكتب ...
.. * رديت ع السماعه الا صوت حرمه ..!
غريييبه ...!


ارسلت ندى تفتح لها ..
.. وقبل ما انهي مكآلمتي مع الراعي ..
الا واصواات ضجه توصل لي ...!
.. طلعت والا ندى متمدده ع الارض ..
والحرمه تضربها ع خدهاا تبي تصحيهاا ..!


•
•



[ تــــرف ]
_______


.. الآخ طلع من المستشفى ع مسؤووليته ..
وامه حلفت الا يجلس عندهاا ...
لين يفك الشاش اللي ع رجله ...
وهو آصر آجي معه عند آهله ...
يقول آنه في ذمتي وآنا المسؤووله عنه ...


.. اوووف منه ..
ماابي اجلس عند اهله ..
طيب بكيفي ذمتي وسيييعه ابخليه هالفتره
دآمه عند اهله ...
اذا يبي يكون مسؤووليتي يجي لبيتنآ ...


.. ابوه سوآ له غدا مختصر ..
ع اسآس العشا الكبير بكره ..
واليوم بس اهلي واهله وخالته ياعلهآ تخلل هي وبنآتهآ العووب ..


.. تغدينآ وطالعت خواتي ..
فشله كلهن بكروشهن ..
ليت ندى فيه ع الآقل تكون وحده منآ ماهيب حامل ..
.. *بعد العصر دخل علينا طارق يدفه ابوه
بعد مآ الرجال كلهم طلعو ..
.. نزل من الكرسي ع السرير المجهز له
بغرفة الحريم ...
اللي بتكون مقر اقآمتنا مؤقتآ ...
حتى حطو فيها دولآب صغير لملابسنآ ..

جت الخاله وجلست ع طرف السرير معه ..
خذت يده وجلست تطقطق باصآبعه ...

.. صيته تصوت لبنتها ..
/ ملوووكه هآتي الشااهي لطآرق
مآحد يضبط الشآهي مثلك ...

.. نطت هي وغطآهآ اللي يقول شفني ..
/ تيب مااامي من عنووني ..

وانا طاارت عيووني ...
ياااويل قلبي ...
وطآرق يسمع هالتهونص والتدلع ..!

.. وقفت وقلبي جمره ...
/ اجلسي ملاك مانبي نتعبتسً..

ملااك / نوو تووتي ..
تعب تآرق رآحه ...

يااربي وش جاهاا ...!
كانت تنطق طارق زين *..
وش علتها ذي صارت تقول تاارق ...!!


.. مامداهآ تشحط رجلهآ الا وهي راجعه
بصينة الشااهي ...
.. صبت بيااله وعيآنآ بيآنا تبي تمدهآ لطآرق .. لااااااااا عآد ...
وصلت فيهآ الوقآحه تمد له الشااهي ..!
.. خطفت البياله من يدهاا ذا اللي كنهآ مخآلب قطوه ...
ومديتهآ لطآرق .. وووووو.. !
الآخ مفهي يقز في هالهلآك ..
واكلمه ومتنح مآحس علي .....!!


.. جلست بثقلي ع طرف رجله الملففه كنهآ جنآزه متعمده ...
من حر مآ اونس بجووووفي من غيض ..*
وهو صررخ بي ...

/ آآآآآآه .... رجلي ماتشووفين ...

قلت بقلبي ..
.. وجعآه بلآ وجعآه ...
.. جعل فآلهآ ايدينك بعد ...


.. عطيته نظرره حسسته بذنبه ..
وحطيت البياله فـ الصينيه ع الطاوله القريبه منه ...
.. وجيت بقوم ..
بس سبقني ومسكني بكفي وضغط عليهاا بقوووته ...
والخاتم مع شدة قبضته طلع رووحي من الالم ...
.. سحبني من يدي عشان اقرب وهمس وعشره من الجن معه ...
/ وش علتس انتي ...!
وش ذا حركآت المبزره ذي والنظرات ...
نذرين ماهوب واحد ان عآد عدتيهآ لـ.....


.. قآطعته ومعي نفس جنونه ...
/ ورب السماا ياولد السلمآن*
ان عآد فهيت في آحد من غير محآرمك في حضرتي .. لآذوقك مرْ غيآبي ...
.. وقل ترف مآقالت ...


.. طآرق بتراجع ..
/ تعووذي من ابليس وفآرقي دام النفس عليتس طيبه *..
.. انتي خآبرتني وخآبره جنوووني ...


ترف كـ رد اعتبآر ...
/ منيب مفآرقه الآ على بيت ابوي ..
وكآن فيك خير كلمه يجي يآخذني الحين ...



بجنوووووون قلب الطااوله باللي عليها ...
وكل شي تطااير حواليهم وعليهم ...
.. صدمهآ بردة فعله ....!
.. وفضحهآ قدآم الموجودين ...

وقفت تبي تطلع ...
تخاف يزيد جنونه ويتهور ويسوي شي اكثر من اللي سوآه ...
.. بس هو وشيآطينه تعينه وقف يبي يلحقهآ
نآسي ومتنآسي وضعه ورجوله وحآلته اللي ماتسمح ...
.. بغى يطيح بس ملآك اقرب له ارتكت له ..
وتعآنز عليهآ ...
.. حست بربكه ورآهااا من بعد الهدوء*
اللي تبع اصوات التكسير والقزاز ...


.. التفتت تبي تشوف الوضع قبل تطلع*
.. وشافت الوضع والاحضاان القريبه من بعض ...
ومادرت وش السبب ...!
.. عطته نظرة احتقااااااااااار وآســـــف وحزن ....*
هزت رآسها وطلعت ....!


•
•



[ طآآآرق ]
_______


.. ورب البيت كل احسآسي وجوارحي وعقلي وحضورري معهآ ...
.. بس حبيت اثير غيرتهآ علي شوي ...
وارضي رجولتي بحركآتهآ الغيرانه المكشوووفه ...

.. ماكنت اظن اني العب بالنآر ...
.. احرجت نفسي وجبت الحكي لملآك بدون قصد ...
.. ملآك اعتبرهآ اخت صغيره لااقل ولآ اكثر ...
وآشوفهآ بنظري قآصر في كل شي رغم نصوجهآ شكلا *..
.. حبيت اقرص آذنهآ لاتغلط علي وع البنت ...
لكن هي جننتني بكلامهاا وتحديهاا ...
.. حدتني ع شي مآبغيته ولآ نويته ...
.. بغيتها تصد عن وجهي لحظة غضبي ..
وهي فسرتها من كيفهآ انها طررده ..!


... صار اللي صآر ..
ولآ انتبهت ان كنت متكي عليهآ وسآندتني*
هي ملاااااااك الآ من نظرات تـــــرف ...
تظرتهآ اوووووجعت قلبي ...
.. حسيت مهمآ شرحت ووضحت بتظل*
نظرتهآ لي مهزوزه ...
.. وحتى لو تصآلحنا مآراح تنسى هالموقف ..
وبيظل حآجز بيناا ...


.. قربت لي نجود الكرسي وجلست بتعب ..
سحبتها لي وحكيت بفحمه *في اذنها ...
/ نجود الحقي ترف ...
تراها خبله ومطفووقه ....
وبتكبر الساالفه الحين ...
ع الاقل لاتطلع لين ترووق ...
لو تضطرين تقفلين عليهاااا ...
وجوالها اقلعيه في ستين دااهيه ..


.. وبآذني همست ...
/ ماهيب هي لحالها اللي مطفوقه ...
المطاافيق واااجد الله يواجرك ...
وبتشفي ....
... لاااا وبعد تحلف انهاا ماهمتك ولاقامت معك ولاقعدت ...!
نسيت يوم اقوولك والله انها ماكله قلبك اكل ...
حتى لو انكرت انااا وآثقه من احساسي وتصرفاتك اللي تحاول تغطي عليها ...
.. بس ماقلت لها شي مآبيها تعرف بكل هالغلآ ثم تطنشك ...
يآخوووي بين لهآ من شوي مآهوب كله ...
انت ترتآح وهي بعد ....


.. سكت مآرد ...
حس انهآ كشفت شي هو مآيبي يعترف فيه
لو لنفسه ...
.. كل اللي قاله ...
/ اذا هي بالمقلط وديني لها وقفلي البآب عليناا ....*


•
•



[ غنآدر .. الجميله المدللـه ]
__________________


.. رآحت ع اسآس مراجعه عااديه ...
لكن الطبيبه منعتهاا تطلع من المستشفى ..
وع طول كتبت لهآ تنويم وعمليه ...


... وعزيز مثل المسطووول ...
.. وش ولاادته وهي بالساادس ...!
ووش توووووأم وهو دوووبه يدري ...'
.. وعمليه والوضع حرج ..
ومآخذ واقف معه وهو جآهل بهالامور ...

.. وقع اوراقها بعد مادعآ بالاستخاره ..،
مآ امداه يصلي ويدعي ...
.. اللي يشوفه يقول هذا ولاهمه ..
لكن اللي بالصدر علمه عند ربي ...

.. جالس بهدوووء ع كراسي الانتظاار
وقلبه يردد يارب سلم ...
وكل دعآ بخاطره دعآ به ..
واهم شي سلامتهاااااا ...!
لو صآر لها شي ... مالها عوض ولآبديل ...
والا العيال يجي بدالهم عيال عوض ...


.. ساعه ونص كانت كفيله بحرق اعصاابه ع الاخر ...
.. واول ماطلعت الدكتوره كان مركز نظرااته عليها ...
.. يبي اي شي بوجهها يطمنه ع وضع غندورته .،،
.. طالعته بارهاااق ...
دوامها ع وشك ينتهي واليوم كاان ضغط عليها بقوه ...
ثالث عمليه اليووم ونفسهاا خلااص انقطع ...

.. عقد حوااجبه بيأس ..
وجههآ مايبشر بخير ....
بس مآقدر يتجرأ ويسألهاا ...
خله لو ثوااااني على الااامل ...

وهي يآدوووب جرت صوت من حلقها النااشف ...
/ الحمدلله العمليه ناجحه ...
.. ووضع الام مستقر ...


هذاا اللي هاامه الحين ماسمع وش قاالت بعد ...
سألها بفرحِه ..
/ اكيد طيبه ...!
غنآدر عبدالله الفيآض ..
لايكون غنآدر ثانيه ...!


الدكتوره ببتسامه باهته ..
/ ههه اظن بالمستشفى كولها*
مافي غنآدر الا زوجتك ..
اسم نآدر وغريب ..!
واول مره يصآدفني ...


.. مسح جبينه المندي رغم التكييف المركزي ..
/ طيب وش جابت ولد والا بنت ...!

هي كاانت واعدته تقوله ع جنس الجنين هالموعد ..

.. طالعته متعجبه من سؤاااله ...
ماهيب رايقه لاستهبااله او تنااحته بالاصح ..
رددت عليه ببطء ...
/ توأم جاابت ..
بنوووته قمر ... والولد الله يخلفه عليكم ..
دحين حنخرجها من غرفة العمليات ..
ومرا تانيه ... الف مبروك وسلامة المداام ..


.. جلس مصدووم مبتسم فرحاان متأمل*
وايضااا قلق للحين ع حال غنآدر وبنته *...
وحزن بسيط ع الولد اللي راح ...


.. طلع للحضانه يشوف البنت وكلت قلبــــه
كل مشاااعر الرحمه والحنااان فاضت برووحه ..
صغنوووونه بحجم كفه ...
تمنى ياخذهاا معه ويحطها بمخبآه ..
محد شايفهاا ولآداريً....

... بعد ساعه سمحو له يدخل ع غنآدر ...
وبين الصحوة والخدر .. تفتح عيونهاا وترجع تسكرهاا ...
.. تتكلم ونرجع تناام ...
... كانت تهذي وهو ميت ضحك ويسجل هذيآنهآ ...

وبهمهمه ...
/ عزوززززز فاات التسجييييييل
ااااااا وووووو ابي ااادرس..


وكل هذياانها ع الدراسه..
واعتذارها عن هالكورسً...
لانها ماقتنعت بالتخصص .. وزادها هم الحمل ..،
وشجعهاا كونهم توأم ...!


.. وبس صحت وصحصحت *...
من فرحته ماقدر يكتم مفتاجأته لهاا ..
خاصه بعد هذرتها وبعد ماعرف اللي بصدرها
والهم اللي كان مضايقها ولاعاد ناقشته فيه ...

.. وبس شافها تحس به ..
قرب وبااس راسها بفرحه ..
/ حمدلله ع السلااامه يا ام شيخه ...
وع البرررركه البنووته ..

ببلااهه سألت ...
/ من شيخه ...!

رد بضحكه ...
/ ههههه الشييييخه سمية امي ...
بنتناااا .....

.. بضيق ...
/ من سماها شيخه ...!
ولا شاورتني ...!

بفرحه ...
/ هي مسميه روحهاا قبل تجي ...
والله لااايق لها الااسم ...


.. سكتت وش تقوول ....!
هي تحمل وتتوحم وتتعب وتهلك وتعاني مر الولااده
ونفسية النافس وتعب التربيه والسهر ...
والزوج بكل بروود يجي يسمي ع فلاان وعلان ..
وابسط حق لهاا ان تسمي اللي تعبت 9 شهور عشاانه*
تنحرم من تسميته باللي تبي وع خاطرهاا ..
بس سكتت ...
اسم مآيسوآ يتزاعلون عشاانه ...
.. لو هو بيدهاا سمت نوره ع امهآ هي بعد ...


.. وبملل سألت ...
/ والوولد وش سميته ...!
ع ابوك اجل ...!


.. حل عليه الهدووووء وكل ملاامحه استكانت ..
.. و رجع صووته يتغير وبخفوت ..
/ ربي اختاره طير من طيور الجنه ...
والعوض بالشيخه ...
الله يجعله شفيع لي ولتس ...


.. هالكلمااات رغم انهاا تعزيه ..
الاا انهاا توووجع ...*
.. وتعصر القلب بالخزن ...
.. بكت بصمت ...،
ع قد ماابكت يوم عرفت انها توأم ..
ع قد مابكت لفراااقه ...
واحسااس بالذنب انها هي السبب بشكل او باخر ....


.. تركها تطلع اللي بخاطرهاا ..
ماقالها لاتبكين ولا تنعينه ...
طالع شاشة جوااله وفتحها ع طول ...

ديمه بخرشه ...
/ مبرووووووووووووك .... مبروووووووووك
ماالقت تطلع هالابنه العااااقه الا يوم سافرت عمتها لدياار الكفار ....!


امااااانه عزيز كانهاا حلوه ع امها سمها علي ...
كوووود تطلع حلاا وسنع وزين ع عمتهاا ...
وكانهاا شينه مثل الشيف اللي عندناا بالبيييت ..
.. سمها ع شغاالتناا *...
.. كود تقعد عندناا زود سنتين سماااوه ...


.. ماقدر يمسك نفسه ..
.. ضحك بقووووه ناسي اللي تبكي جنبه ..
لحد الحين محد درى انهم توم ..
وان الولد توووفى ...

رد وهو يحاول يكتم ضحكته ..
/ ااتهبين اسمي علييتس ..
عشاان تجي بنتي رجه ورهجه عليييتس..
.. سميتهاا الشيييخه ..
اسم ملكي ... يليق بها ..
شيخه بنت عبدالعزيز ...

.. ردت بقهر ...
/ ياارب ياارب ياارب ..
كل تشمتك فيني يجي في بنتك ...
وتطلع كوووووبي من عمتهااااا ...


... جفل وبسررعه شاال ظهره عن الكرسي بدون شعور ..،
/ اعووووذ بالله ...
هههههه استغفرررري ياابنت ...
واللهم اني اعيذها من اخلاقتس وتصرفااتس ..

.. غنادر اللي تتابع ضحكه ..
مسحت دموعها وخذت السمااعه منه بعد ماناولها اياها ...
وقبل لاتسلم وتتكلم ....
سمعت ديمه تغني لها .....
/ الشيييخه بنت ابوهاااا...
ياسبعه خطبوهااا ....
يوم شافو كشيشتهاااا ...
تناحشووو وخلوهااااا ....


.. ابتسمت ومن بين دموعهاا ..
/ والله لاحط ع بنتي سبعه ابواااااب
ومازوجهاااا لولدتس لين يكسر هالابوااب السبعه يدورهااا
وينقطع له سبع نعوووول وهو يطاارد وراهااا ...


ضحكت ديمه ...
/ الله يابنت السلطاان وولد الحطااب ..
مير كانها فيها لمحه من خشة ابوهاا والا سعووود الشيفه ..
تراي انا وولدي مسامحينتس دنياا واخره ..
تصدقي بها وزوجيها لاقرب طرار ...

.. واستمرت تهذر وماسكرت الا لمن خطف*
رياض السماعه منها يسلم ويبارك ...
.. وعلق عليها ...
/ تراها مكالمه دوليه ماهيب من كبينة ابووتس..


.. انتظرها عزوز تخلص مكالمتها وسالها ...
/ وش تبين هديه الولااده ...!


بحيره ... مافي بالها شي حاليا ...
بس ماتبي تفوت الهديه دامه عرضهاا ...
/ ما ببااالي شي حالياا ...!
بس اللي يجي منك حلووووو ...


بخبث شاورهاا ...
/ تبين اخررر ايفوون نزل بالسووق
والاا بعثه براا نكمل دراستناااا ...!


.. نطت بدوون شعوررر*
وصرخت من الاالم ...
ومن بين اسنانهاا ...
/ صااااادق والاا تلعب علي ....!

ضحك ...
/ والله ماقلت الله الصدق ..
قاعد اطارد فِ اوراق بعثتناا وعساها تسهل ...

_______



انتهى ( الى الملتقى 🌹 )

يالله ياحلواات استودعكم الله الذي لاتضيع ودائعه ..
اتمنى تسامحووني اذا غلطت بحق احد*
سهوا ..
وان طولت الغيااب لاتنسوني بدعوه في ظهر الغيب ..
يمكن اكون تحت الثرى وبأشد الحاجه لدعوة مسلم لي في ظهر الغيب ..


.. ع الباال انتم دايماا ..
الله يجمعنا ع الخير والطاعه ..
ويرزقنا توبة قبل الممات وحسن خاتمه ..


_____
مشرفااتي الغواالي ..

الله يعطيكم العافيه ..
ياليت لو تتسكر الروايه بعد استيفاء البارت حقه من الردود ....



الله يجزاكم عني الجنه ..،