مسائك ورد فواحه
كل عام وانت بخير لو انها متأخره شوي

اشتقنا لك ولا ابطال الروايهـ

تسلم يد خطت الإبداع*

طارق وترف
دوم متهور ومتسرع في حكم غابت شوي وانجنيت وجأت وتهواش ليش انتوا يارجال تبون تكنون محط الاهتمام يعني الحرمه على ضغط اكثر منكم وتسكت ولا تشتكي لاحد*
انت عارف انها حامل وتتوحم ولا تركتك هي ميته تعب وانت جالس تتدلع
الحين جأ دورها تتدلع عليك شوي وانت عاد تحمل دلع ترف

ديمه ورياض
قدر ولقى غطه كل واحد اخبل من الثاني*
بس وش قصة السيارات اللي عند الباب احد من أهلهم صار له شئ

فياض
الموقف اللي صار معك هو اللي بيصحيك من الغفوه اللي انت عايش فيها الشغاله تشوف انك ماتهتم بزوجتك وهي ماتهتم فيك فعرضت نفسها عليك الله يكفين شر الشغالات*

هيا
بعد انت الغيره تتحكم فيك كثير والله يعينك على ظافر ويده

ام وسن دمتي لنا مبدعه

يا صباح الخير على ام وسن ومتابعاتها

وكل عام والجميع بخير

من زمان عن الردود احس نفسي مثل طالبه راجعه للواجبات بعد اجازه


مشكوره على البارت الهديه

الله يهديك كل ماتتنمين

ببدى بالشيخ فياض ابوعيون زايغه اليوم جات سلامات ماهو ان الشغاله تغريك والا انت تنجذب لها معروف ذوقك

لكن السلامه ان المدام مادخلت عليك والشغاله قدامك زلط ملط كان وش بيبريك

الا بتلبسك التهمه لأن تاريخك حافل بالنزوات عاد دور من يصدقك
هذا درس لك ان ربي فكك منها وتعوذ من ابليس وامش مستقيم ماهو كل مره تسلم الجره


دويمه ورياض

وين تبين ماشاءالله عليتس والله لو انتس طالعه ان تجيبون العيد قبل رمضان انتي ورياض

عقب عاد رقع يا مرقع ان تحسبين ليوم العرس اليوم يمر عليتس بسنه

هذا هو طايح تحبحب واخوتس قباله

وتكرهين كل ذكريات الملكه

الي سواه عبد العزيز كان عين الصواب

محد يضمن عمره

والله يستر من السيارات الي شافها رياض

لايكو ن بيتأجل الزواج بسبتها


ندى وعزام ماكان له مبرر ابد موقفك من ندى الحين انت ضربني وبكى سبقني واشتكى

دافها ومسقطه بسبتك بغض النظر عن وضع الجنين وبعد زعلان

المفروض بعد سواتك هذي ندى تاخذ موقف منك يا انك تسنع وتترك عنك يباس ها الراس والتحكم والحياه مشاركه ماهو انت تبي كل شي بكيفك ومن كيفك

والا انقلع الي جابك يجيب غيرك ما وقفت الدنيا على مثلك

ندى ما سوت الي سوته الا وانت مخليها تفقد الامل من النقاش معك انت معطيها الصوره يا اسود يا ابيض يا ابونقاش
فيه نوعيه من الازواج اذا شاف زوجته اخطت بشي قال لو ناقشتيني

كان وكان وهو ساد كل باب للمناقشه

لكن كلامه زياده با التعذيب


هيا وتسبدي يا ثقل دمتس من بد خلقه والله ان فيني حره منتس من وافقتي على فياض ولاهمتس احد

ليت عاد ظافر يرجع ام محمد علشان تجربين الحره صدق

على اني ما ادري وش هدف ام محمد من الزياره لكن عاد ليته يرنتس لين تعضين الارض على طولة ها اللسان

تبين الدنيا لتس وبس اجل عيب ومنقود ؟؟!!!!!!


نوال وهيثم

ما ادري وش مخبيه لنا ام وسن لكن البيوت ماتبنى على حب وزين خد

ياما حريم قدروا يواصلون حياتهم مع ازواج ماكانوا مقتنعين فيهم لكن كافحوا ووصلو للي بيون

ترف وطارق

عاد هذولا الي مالهم حل

الحين انت ياطويل اللسان طويرق تبي بس تناقر وتعاير ابشرك رجلك بمحلها

لكن لو انقطعت تستاهل جزا معايرك وهمزك ولمزك لترف

بتعرف بعدين هي وش سوت علشانك

ماشاءالله على طول مير مجهز لسانك للهواش

الا اطلعي من عنده واعلى ما بخيله يركبه

روحي استريحي وهو بيعرف بعدين سواتك

وبيتحسف على طولة لسانه

امتعتينا ببارت رائع امتعك الله بلباس الصحه والعافيه انتي ومن تحبين

السلام عليكم


[ 42]
_

[ ريـــآض]
_______

.. نزلت بسرعه اللمه اللي عند بيتناا مهيب طبيعيه ..
خاصه بهالوقت .. بعد العشا بساعتين تقريبا ..
.. فرزت الجمووع ودخلت ..
والا ولدي متكومين عليه يجادلون فيه..
احد يقول نشيله نسعفه واحد يقول لاا ..
يمكن شيلنا الغلط يسبب له شلل ..
واناا كلي درااستي عن الطب تبخرت من عقلي في هاللحظه ..


حتى كيف اسعفه ماادري ..!
وقفت مثل الابله اناظره وكني في عالم ثاني ..
ماحسيت الآ بالمسعفين يبعدووني عنه ويشيلونه من بين يدي ..
ركبت معهم وكني تو استوعبت الامر ..
مسحت الدم عن وجهه وقلبي تفطر من الرحمه والحزن له وعليه ..

.. ع طوول اجتمعوه عليه الاطبا والممرضين*
وانا متفرج بينهم وقلبي ينزف حزن ولسآني*
يردد*ً،يارب احفظه لي،*
.. بعد انتظار ماادري كم ..!
اظنه سنين مهوب دقايق ولا ساعات ..
طلع الدكتور وهو يمسح جبينه ..*
وابتسم لي ابتساامه شرحت قلبي ...

/ ابشرك حمدلله عدت على خير ..
وضعه تمام بمعجزه من ربي .. رحمه بهالصغير ..
شوي وادخلك تشوفه ...


في هاللحظه حسيت بس بقيمة الابتسااامه
احس ابتسامة الدكتور لي في هاللحظه تنشرى بفلوس الدنيا كلها ..

بدوون شعور ضميته بقووه
وماقدرت امنع دمعتي لاتنزل ...

مسكني بيدي لمكتبه ..
وقلت بعد ماجلس ..
/ بشر دكتور انا مادري وش اللي صار
جيت والناس مجتمعين والولد ع الارض ووجهه دم ..!

د/ سبحان الله ..
علميا اقل شي ممكن يكون عليه وضع ولدك
الشلل هذا لو نجى من الموت ..
لكن ربك ستر وقدر ولطف ..
الولد اصاباته ماتجاوزت الكسور والرضوض..
والنزف قدرنا نوقفه بفضل ربي ..
بس للاسف الولد راح يكون بغيبوبه لفتره ..
الله اعلم متى يصحا منها ..
لكن لاياس من رحمة الله ...


سجدت شكر لربي ..
الله حفظه لي ..
صحيح غيبوبته ممكن تطول ..
لكن هذي انانية الابوه .. او الرحمه له .. او التملك اللي ف البشر ..
ابي اشوفه قبال عيووني حتى لو جسد بلآ روح ..
المهم مايغيب عن عيني ...
طلعت بشوفه وحسيت قلبي ذااابً..
دعيت لامي وابووي ..
ياالله هالقد يحبونا ويرحموناا ويغلوناا ...!
تمنيت اكون مكانه بس هو يقوم ويعيش
وياكل ويشرب ويتحرك مثل الناس ..
حطيت يدي ع جبينه البارد .. ورقيته بقصار السور والفاتحه ودعيت له بالشفاء ...
وطلعت مجبر ماهوب مخير ..!


•
•

[ ديمــه ]
______

ياحظتس الآقشر ياديمه ..
كل ماقلت هانت جدّ علمٍ جديد ..


.. الله ياخذ روح ابليسك ياسعِيْوِد ..
.. مالقيت تصدم من بد هالناس الا ولد ريااض ..!
.. لك اربع اعيون ولا تلقى البركه ..
.. عيونْ تدير وقلبٍ غدير ...
.. ماالك ع الخرشه والرهجه والرجه ..
.. الحين وشلون بقابل رياض ..!
هه اصلاا من قال يبي يقابلني ... والا يشوف خشتي والا كشتي ..
تلقينه يقول ام المصايب ..
سدحت ولدي ونسيبي وخواتي بالمستشفى ببركاتها ..!
يااربي من ملكت عليه والعرب يتسدحون*
بالجمله في المشاافي ..
يارب لاتجعلني محضر للمصاايب ..


يااربي اكيد بيطلقني ..
والا بعد فيها شور ..!
اخوي بغى يذبح ولده وتبينه ياخذتس ..!
والا يمكن اني نضوول اسدح الخلق وانا مدري ..
لازم اخلي احد يكفني ويصلي علي*
عشان مااحسد احد ولا اعين احد >> بدعه هالاعتقاد ...


ارسلت له ...
[ الحمد لله ع سلامة عبودي .. طلقني ]

واتصلت بمفتي وانا العبره خانقتني*
وقلت له ع اللي صار معي ..
وهل اذا صلى احد علي صلاة الميت يروح الحسد والعين اللي فيني ..
والشيخ ماااات ضحك ... اول مره اشوف شيخ يضحك هالكثر ...
رد علي ..
/ يابنتي هذا ابتداع ..
ولاورد في الكتاب ولا السنه ولا الاثر ..
ان كنتي تحسين انك تحسدين او تعينين احد ..
بركي واذكري الله اول ماتشوفين اللي يعجبك ..
قولي( ماشاء الله تبارك الله .. اللهم صل على محمد )
وباذن الله مايطولهم منك اذى ...
اما هالخرافات يابنتي انتبهي تنشرينها
بين الناس ..
ترا البعض يجهل في هالامور ..

شكرت الشيخ بحيا ..
يافضحي ... نقد علي ...

.. طالعت ع الشاشه ..*
وفتحت الرساله ع طول .. وشفت رده ..

[ سلامات عسى ماشر ... وش طلاقه ..!]

قهرني اكيد يبي هو اللي تجي منه
ويذلنا عشان سعود واللي سواه ..
رديت ...

[ انا خلاص مابيك .. هونت بكيفي ]

رد بسرعه ...
[ ترا منيب رايق لخبالتس ومن الاصول تجين تزورين ولدتس ]


سكت مارديت ..
مدري هو جاد والا يتهزآ بي ...
دقايق واسمع صوت امي وعزوز يصوتون لي ..
نزلت وقال عزيز بدون لايشاورني ...
/ البسي عباتس ..
نزور ولد رياض قبل تسكر الزياره ...

سالت ..
/ سعود وووينه ..!
من صار اللي صار ماشفته ..!

بكت امي وهي تحوقل ...
/ في غرفته يابعد قلبي ..
من البارحه لاكل ولاشرب ..
مغير يتفجع ويصيح وعيا يفتح لنا ...

طبطب عليها عزيز ...
/ ماعليه يمه ..
اذا رجعنا خليته يفتح غصب وكلمته ..

سالت ..
/ غنادر وين ...
مهيب رايحه معنا ..!

رد باستعجال ..
/ راحت لاهلها من الصباح ..
بسرعه يالله ...

فتحنا الباب ...
وانصدمنا من رياض اللي واقف قباله ..
كانت يده ع الجرس بس سبقناه وفتحناا ..


تخبيت ورا امي بخجل ..
من موقفنا معه ومن اللي سواه سعود ..
وهو سلم وحب راس امي ..
ومد يده لي وسحبني من ورى امي ...
ضغط على يدي بقووه ومافكها ..
التفت لعزيز .. وابتسم ..،

/ وين سعوود ..!
مفروض هو اول من يزور عبودي ..
وترا باخذ العوض منه ...

امي نزلت راسها للارض بخجل ..
وعزيز فتح فمه بيتكلم لكنه كمل ...

/ والله لاخذ ازين بنااته لولدي عبودي ...
وبدون مهر بعد ...
اجل يكسر رجل ولدي واسكت له ..
ابتسمت امي بخجل وتوتر ..
وارتحنا كلنا لنبرته ...

وكمل بجديه ..
وين سعود ابيه بكلمة راس ...
رد عزيز وهو يأشر فوق ..

/ والله يابوعبدالله من امس وهو حابس عمره فوق
لا اكل ولاشرب ولاصلى بالمسجد حتى ...
يقول منيب طالع لين يجون الشرطه ياخذوني ..

رياض ..
/ لاحول ولاقوة الا بالله ..!
اللي صار مقدر ومكتوب من قبل لايولد ..
ولو ماكان هو السبب بيجي غيره اسباب ..
وانا من تطمنت ع ولدي وحالته استقرت ..
رحت اوقع تنازل حتى قبل لايكتمل المحضر ..
وحنا اهل لوفيها قطع روس بعد نظل اهل ..


انا بطلع له لغرفته ..
وانتم تسهلو لدربكم ...

جيت بطلع ومسكني بطرف عبايتي ..
/ بعد اذنتس ياخاله ..
انا مابعد ذقت شي من فطوري
ابي قهوه وعشا من يدين ديمه ...


طالعته بورطه ..
/ يمه اقعدي معي ..
ماعرف الا للقهوه وحظ ونصيب بعد ..


سحبت امي عباتها مني ..
وبكل برود ...
/ رجلتس وسنعيه باللي يبي ..
وخليه يعرف ماوراتس ودونتس ... وطلعت ..


.. دخلت وراه فيني الصيحه ..
احب آكل بس مآحب اطبخ ..
وعند باب المدخل التفت لي وتكتف وبعتب ...

/ تبين طلاااق اجل ....!
هذا بدال ماتكونين اول وحده تزور وتوقف جنبي ..!
اجل بكره لو جاني مرض والا عله ..
اول من بيتخلى عني انتي ...

قلت بحرج ... وصدق ..*
/ ع حسب صراحه ..
كانك اعرست علي والله لاشوتك للثانيه
وكانك صرت امين وحبيب ولاخذت غيري
لاعادي بصبر عليك واجري على الله ...


ابتسم ..
/ ياسلااااااام
ليه مسوي حرام والا عيب اذا خذت ثاانيه ..!
من حقي اجدد شبابي واغير الجو ...


رديت بغيره ..
/ لا حلااال زلااال ..
وهذا شرع ربي ما اقدر اعترض عليه ...

بس انا بعد مثلك ...
من حقي اجدد واغير جو ..
اذا عقدت عليها افسخ مني ..
وابعرس مثلك اجدد شباابي واغييييييير جو ..


عصب وقلب رسمي ..
/ بنت ......
وش هالكلااام .....!
روحي جيبي لي قهوه وسوي لي كبسه مع خضار ولحمه .. ميت جوع ..


رحت وانا اتحلطم ..
ياربي هالرجاال عادي يقهرونا ويرفعون ضغطنا
بس لاردينا عليهم عصبو وقطعو الحكي ..
ثم وش كبسته ماااعرف اسوووي ...!!
خذت جوالي وفتحت النت ...*
كتبت بقوقل ( كبسة لحم تعبي البطن )
وريااض طلع لسعود فوق ....


•
•

[ فيـــاض ]
_______

.. احس بضيييييق ...
مخنوووق لابعد حد ...
كنت طالع بجيب نجود وانصدمت بحادث ولد اخوي ...
رحت وقلبي يتكسر.. *ولقيت رياض اقوى مننا كلنا ...
ضميته بقوه والعبره خانقتني ..
لكنه صدمني بردة فعله ..
هون الامر علينااا كلنا ...
وانه حمد ربه وشكره اللي منْ عليه بحياة ولده ..
.. وهذا ابتلاء وهو صابر ..
ومصيبته اهون من مصايب غيره ...
حتى خواتي اللي دخلو يبكون هاوشهم ..
وسهل لهم وضعه ...
وابووي اول ماشافه بكى .. لان رياض بس*
شاف ابووي حس بالضعف والحااجه
لحضن ابوي ...

.. لكن ابوي من شافه عبودي ارتاح ..
وعزز لرياض ورفع معنويااته اكثر ...

مالي خلق احد ...
وديت عيالي وشغالتهم لاهلهم ...
ورجعت للاستراحه ونمت لبكره الساعه 3 العصر ...
قمت بضييق ومزاج متكدر ...
كلمت خواتي يجهزون فطور باخذه وافطر انا وابوي عند رياض بالمستشفى ...
امس اذن الفجر وهو ماتسحر واكيد تعبان وجوعان وعطشاان ...
جلسنا معه ونحاول نغير نفسيته اللي كانت*
احسن من امس مليوون مرره ...
ومن اذن العشا استاذنا بنصلي العشا والتراويح ... وطلع معنا ...
.. وبعد الصلاه استأذن منا بيخلص اشغاله ..
بعد ماتاكد ان خوااتي راحو له ..


.. كلمت نجود وقلت لها ابيها لحالها ...
تخلي العيال عند اهلها هم وشغالتهم ..
وانا في الطريق كنت افكر بصمت وهي بعد صمت ...
.. طاحت عيووني على فندق ال....
والتفت لها ... امرت بهدوء ...
/ افتحي الدرج اللي قبالك ودوري بطاقة العائله فيه ..
طلعتها ومدتها لي .. هزيت راسي وقلت رجعيها ...
دقايق ونزلت للفندق وقلت لها ...

/ انتظري بالسياره لين اجيك ...
اخذت البطاقه ونزلت خلصت الاجراءات ودخلنا ..
كان كل الموضفين يناظرونا بريبه ..
يعني لو شخص جاي مع زوجته اقلها يجيب شنطه ملابس له ولها لو صغيره ..
لكن حنا مامعنا ولاااشي ..
وكأني مواعدهاا من سوق والا من شارع ..!
ومع ذلك ... احساسي كاااان غييير ...

كنت عارف ان وضعي معهاا مريب ..
ومع ذلك احس بثقه ...
عكس لما كنت اواعد بناات ...
صحيح ماعمري اخذتهم لشقق او فناادق ..
وحدي مكالمات وكفيهات واسواق ..
لكن كنت ارجف خووف وانا امشي مع اي وحده منهم لو كنت بمكان عام
والوضع مايستدعي الشك او الخوف ...
سبحاااان الله .. اللي على باطل يخاف من ظله حتى ...


دخلنا وفصخت ثووبي وسط استغرابهاا ..
وهي شالت عبايتها ..
كانت متألقه كالعااده ...
لاول مره ادقق فيها ككل ...
.. جايبه 6 اولاد وجسمها جسم بنت ..،
ماكياج مرتب وهادي ...
شعرها بعد ماطولته لنص ظهرها مفرود قطعه وحده ..
لاول مرره انتبه ان شعرهااا طال ...
ابتسامتها حلووه ..*
كل شي فيها هاادي ومميز ....
احمر وجهها من تأملي لها ... وببحه ..

/ وووش فيك تطالعني ..!
ترا احرجتني ههه ...

سألتها ... سؤال كان يتردد بباالي من فتره ..
/ نجود لو احد ارسل لك صورتي
مع بناات تصدقين فيني والاا ...
يعني تصدقين اني اطلع مع بناات وكذا ...


طالعته ببراءه مصطنعه ...
/ هههه مستحييييل ...
زواج ممكن اصدق لو ما انك حلفت لي*
ماتتزوج بدون ما اعرف ...
اما حركات المراهقين والصيع فـ تكرم عنها يابو عبدالله ...
لو اشوفك بعيني ماا اصدق ...


ابتسم برااحه ...
/ ههه الله كل هذا ثقه فيني ...

ردت بفطنه وذكاء ..
/ اكيد ثقه ... لاني واااثقه اني حافظه
نفسي وبيتك *وعيالك لك .. في حضرتك وغيبتك ...
ولاعمري خنتك باي شكل من الاشكاال ..
فـ واثقه من ربي مثل حفظت نفسي ربي بيحفظك لي عن الحرام ...


.. حس بخجل وارتبااك ...
والعرق رغم التكييف المركزي يندى منه جبينه ..
.. ماعرف كيف يرد عليها وهو يحس بالصغر قدامهاا ...
كلم نفسه ..
/ ااااه يانجوود ...
لو تشووفين رجلتس وش ورااه من بلااوي ...
طلع شريحتته من جوااله وكسرها قدامهاا


شهقت بانتصاار وتمثيييل ..
/ وراااااه ...!

رد برااااحه عجيبه ...
/ مااابي ازعاااج من احد ...
ابي اكون عريس الليله ...
اول مره اشووفتس *وانتي اول مره تشوفيني ..
.. وغمز لها ...
/ بس بنطلع للسوق نجيب جهاز للعروس
وبضحكه ...
.. وبعد لايقفطوناا الهيئه ..
جااايين بهدومنا اللي علينا كنا متواعدين ...
وقف بسعااده ومد يده لهاا ..
البسي عباتس وانا بالبس ثووبي ..
بنطلع نتسووق ونروح *لكفي ..
ونرجع نتعشى بالفندق وننام هناا ...
وبالله قفلي جواالتس لايذيناا عبوود ...
والا اقوولتس ...
هااتي شريحتس بكسرها وارتااح ...


.. ابتسمت له براحه ..
وعطته ظهرها وهي تلبس ..
حطت يدها ع قلبها ..
/ ربي عند حسن ظن عبده فيه
وربي مااخيب رجااي ..
سترته وربي رده لي ردا جميلاا ...

•
•

[ طارق ]
______

.. ملييييت من دونها ...
الهواش معها يطير الوقت ..
ويعيشني حالاات في دقاايق ...


.. اتصلت فيها وردت بصمت ...
وبدون سلاام قلت بأمر ...
/ الزوار راحو ...
تعاالي وجيبي لي شوربه ..
وابي مكرونه بالبشميل ...

ردت وهي تبعد عن الازعاج اللي عندها ..
/ آسفين آستاز ..
مابنئدر نخدمك .. هلأ المطعم سكرناه ..
اتصل لبكرآ نتشرف بخدمتك ...


وسكرت بوجهي ..*
.. للحظات .. غطيت عيووني بذراعي ... وابتسمت ...
رجعت اتصلت وردت ..

/ يااا استااز بلاا هالازعااج *ازا تكرمت ..
خلص ماابدنا نبيع شي ...

بغلااظه قاطعتها ... وابتساامتي للحين ع شفايفي ...

/ ترررف بلا استهبااال ...
جيبي اللي طلبت وتعاالي ..
لا يأذن الفجر ماتسحرت ..
تراي ع فطوري اللي انتي خابره ..

بنذاااله وميووووعه ..
/ ااااااا آووول قوول اشقت لتس .. وآجيك


مسكت ضحكتي لاتفرط ..
ورفعت صووتي اغطي ع الضحكه اللي بتفضحني ....
/ بنت بلا حركآت مبزره ...
بسررعه لاتضيعين الوقت ..
ترااي مرره جوعاان واكل المستشفى ماينقبل ...

بعنآد ....
/ والله ثم والله مآ اجيك ..
الااا ان قلت لي اشتقت لتـــس ..
والا والله ان تصووم بجوعك ..
ولا افطررك بكرره ...


بس كذاا .. تحدي يعني ...!
طيب اووريتس ...
قلت بخبث واناا اهمس بدفى ...
/ توتو آشتقت لتس مررره ....
تذكرين ذيك الليله اللي ..... واللي .... واللي .....
كنت اعض ع شفاايفي بشماته ..
.. لان صوتهاا انكتم
ولاعاد اسمع الا صووت انفاسهاا ..
اول مره تسمع مني هالكلااام كأني واحد يغازل عشيقته مو زوجته ...
واخر شي قاطعتني .... بربكه وصوت مهزوز ...
/ تبي شوربه بخضار والا بدون ...


ضحكت بقووه ..*
/ ههههههه ع هوااتس ترفتيً..
اللي تبينه اابيه ...

ع طول .. ردت ..
/ مع السلاامه يالله يمديني ...

سكَّرت وسكَرت من الضحك ...
هههههههه ولقيناا مفتااحتس ياتروووفه ...
اجل تبين اقوول لتس مشتااق لتس وابيتس *...
تنهدت .. وطالعت حوولي .. ماافي احد ...
قلت بشوق ...
/ مشتاق لتس ووووبس ...!


•
•

[ ترررف ]
_______

.. وقح ..*
ماتوقعته جريء وقليل ادب بهالشكل ...
*شكل البنج اثر ع مخه ...
كنت اسوي الشوربه وعقلي يسترجع كلامه ..
وخدودي تولع حراره زود ع حرارة الفرن ..
.. مسحت جبيني ...
/ يااربي مارفق بقلبي ...
لا وهو مجافيه ولابوصله ...


.. بعد ساعه ونص ..
غرفت الشوبه بحافظه ..
والمكرونه حطيتها بصينيتها في سلة الصواني وسكرت عليها ...
سويت شاهي .. وخليت الشغاله تطلعه برا ...
اتصلت بابوي باحرااج يوديني ...
فياض جواله مقفل ..
ورياض مع ولده الله يقومه بالسلامه ...
وابوي طلع يتعشى مع عمي ...

/ دخلت وابوي بعد قلبي شال الاغراض عني ..
.. وماشلت الا ترمس الشااهي ...
.. تعدل طارق باحراج وهو يشوف ابوي
شايل الاكل ...
سلم ابوي واستاذن بسرعه لانه مواعد عمي ع العشا ...
.. ماقدرت احط عيني بعينه بعد كلاامه ...
.. وحاولت اخلي كل تركيزي ع الاكل وترتيبه ..
وهو يراقبني بصمت ...


.. قربت الكرسي بعد ماغسلت يديني وجلست ..
.. ناولته ملعقه وخذها مني وعينه علي ..
قال بلؤوووم ...
/ اهااا اجل قلتي لي تبين اقوولتس مشتاق لتس ومن هالكلاام ...
.. ولع وجهي غضب واحراج ...

/ خلااص عاد طاارق تعشى ...
وطاالعته احاول اخلي نظرااتي وااثقه ..
وقلت بثقل ....
/ ادري انك مشتااق *لي صدق
مهووب لعب ...

ضحك بقووه ...
/ ههههه عليتس ثقه ...!
ماشاء الله تنحسدين عليهاا ...


طالعته من طرف عيني .. ومارديت ...
سألته مغيره الموضوع ...
/ وش اخبار رجوولك ...
ماقالك الدكتور عنها شيً...
خلاص بنكمل اسبووعين ...


بعتب ذكرها ..
/ مهوب انتي قايله له قبل شهر لاتجونها ..!
ولاعاد سألتي عنهاا ...
وتابع ....

/ اليوم الدكتور وخزها في كذا مكاان*
فيه امكان ماحسيت بالوخز ابد ابد ...

عقدت حواجبها بيأس وكمل ...
/ وفي امكان حسيت بالوخز وعورتني ...


.. ابتسمت بتفاااؤل واشرق وجهها ..
وبأمل سألت ووين باي مكان ...!
تركت الاكل وتوجهت لرجوله وهي تكشف الشرشف عنها ...
وتسأله عن كل سنت في رجله المقرر بترها ...
وقلبها يدق مع كل اشااره له ...
مسحت ع وجهها بفرح ولبست غطاها وتركته بدون لاتقوله ووين ...
كل اللي قالت له شووي وراجعه ....


... مالقت الطبيب ع مكتبه ...
ولاقدرت تتنتظره ...
لحقته مع ممرضه لعند واحد من مرضاه اللي يتابعهم ..
ذكرته بالمريض وصلتها فيه وحاالته ...
وع طوول ذكره لانه في قائمة اهتمامااته ..
نجااح العمليه نجااح له هو بحد ذاته ...
ابتسم بثقه ...
/ حمد لله استرجع 20٪ من احساسه*
بالرجل المعطووبه ..
وهذي نتيجه ممتاازه ومتقدمه ..
ماتوقعنا يستجيب بهالسرعه ..
اقل تقدير لنا قبل شهر ...

باذن الله القادم افضل ..
وتحسن حالته *ماشاء الله سريع ..
واستجابة رجله المعطوبه لخلايا السليمه
كان حيوي وسريع لابعد درجه ...


شكرت الدكتور كثيييير ..
كان ودهاا تكافئه ...
بس ولااافي شي ممكن يوفيه حقه الا الدعاء له ...
.. دعت له دعاء اثلج صدره ..
وحسسه ان دراسته وتعبه وسهر الليالي ماراح سدى ..
قدر ينفع بعلمه الناس ويفرج كرباتهم بعد الله
ويسعد قلوبهم ...


رجعت لطارق ودمع عيونها بلل نقابها
دخلت وكشفت غطاها وانهااارت تبكي ...
.. عاقبة الصبر *حلووه ...

.. شبه عارف وش فيها ..
ترك معلقته من يده وتنهد بضييق ..
دايما هو اسباب حزنها وضيقها ودموعها ...


.. بهدوء ناداها ..
/ ترف تعاالي ...

.. مشت له بفرحه ومشااعر شفافه
ودها لو الكل يحس بفرحتهاا ...
جلست جنبه وضمها له قد ماايقدر ...
انهاارت اكثر وبللت صدره ...
تركهاا ع صدره لحد ماهدت ...
رفع وجهها الاحمر وابتسم لها ...

/ ولدي ذاا بيجي قدع ...
عاصر كل الازمات والصدمات*
وانواع الدمووع ...
.. بس الله يستر مايجي صيااح مثل امه ..
ولساان طوويل على .....


كملت بتحدي ..
ع ابووه اكيد ع ابووه ...
ناظرها بصدمه ....
/ لسااني طووويل ....!
زين زين ... كل شي بحسابه ..
بس اطلع من هناا امشي ... انتظري ...


بعدت عنه ...
/ اقرب عشاك ..!

/ لااا صبي لي شاهي ..
وتعالي دلكي ظهري وكتوفي *..
تعبت من نومة السرير *..

•
•


[ هيااا ]
______

.. جهزت لنواال غالبا ع ذووقي ...
كان قليل اعتراضها ع شي .. الا العاري ...
..*

.. والذهب خذت امها تشتريه لها ..
.. باسبوعين خلصنا جهازها ..
كان بسيط وحلو .. وربي سهله ..
وبعد العيد ب 5 ايام زواجهاا ...


.. من ذيك الليله اللي نفضني فيها ظافر
وكان نااوي يضربني لولا اني رفعت يدي اغطي وجهي اما عرفت نيته *..
وقلت ببكا ..
/ ورب البيت لو ضربتني ما اجلس دقيقه وحده عندك ...

تراجع باللحظه الاخيره وهو يتعوذ من ابليس
لكنه نفضني ورماااني ع الارض ...
ومن يومهاا وانا اتشااغل عنه بجهاز نوال ..
وتأثيث جناح هيثم ...
واذا شفته يبي شي مني ...
خذت بنتي وحطيتها حجه ...
انشغل فيها عنه ....
.. طريقته وهو يسحبني قدامهم ..
ونيته يضربني ورميه لي ع الارض كلها جرحتني ...
تعامله مع ام فهيد احترام ..
ومع ام محمد نفس مايسوي معي الحين ...
هي سكتت ولا اعترضت لانها ماعاشت بخير ببيت ابوها ...
ولاتدري وش اللي لها واللي عليها ..
وعارفه انها من دونه مالها ملفى ...
*

اما انا غير .....
اغار عليه ومن حقي ...
وحتى لو بيادبني مهوب بهالطريقه الهمجيه ...
.. اشووفه يبي يقرب لي بلا اعتذار ...
يعني ابلعي وانسي ووقت ما ابيك ابجيك ...


.. شفته دخل بعد مارجع من زواج واحد من جماعته ...
ومحلق ومضبط نفسه ...
.. اول مالمحته دخل وابتساامته ع وجهه عرفت نيته ...
.. اخذت بنتي ...
وطلعت بوجهه ...
/ عن اذنك ... بروح ارتب اغراض نوال معها في شناطها ....


مسكني بغضب بان ع وجهه ولاطلع بنبرة صوته ...
/ اقعدي ...
وش فيتس كل ماشفتيني هجيتي ...
تقل شايفه شيطاان ...!


.. عطيته نظره ...
وقلت بتذكير ...
/ ابد سلاامتك ...
بس للحين جنبي يوجعني من رميتك لي*
ع البلااط البارد ...


.. شتت نظره عني وقال بهدوء ..
/ الله يهديتس ..
انتي اللي حديتيني على شي مابيه ..
الوحده تثمن حكيها وتوزنه قبل ماتحكيه ..
* **

.. قلت بقهر ..
/ تقدر تأدبني بدوون اللي سويته
كني جزمه تشوتها برجلك ..!


قاطعني ..
/ تكرمين يابنت عمي ..
كرامتس من كرامتي ..
.. لاعاد اسمع هالحكي منتس ...

.. سكت احس للحين كاارهته
ونفسي ماصفت تجااهه ...
.. قرب وحاول يضمني ويرضيني ..
وحطيت يدي دووونه ...
عقدت حوااحبي وانا ماقدر اجبر نفسي ع شي ماتشتهيه ...
/ ظاافر ابعد عني هالحين ...
... ماقدر اتقبلك بعد اللي سويته بهالسرعه
عطني وقت ..،


.. ابعد عني بغضب ...
وهو يهدد ويتوعد ...
ويلعن الحريم واللي يتبع هواهن ...
خذ سلااحه وطلع ..
وسكر البااب وراه ..،
غصب عني كشيت عليه بيديني الثنتين ...
/ كش مااااااالت عليييك وعلى كل الرجاجيل
اللي مثلك ....
خذت بنتي اللي تبسم لحالهاا ...
وضميتهاا بتطنيش للي صار قبل دقاايق
وطلعت اكمل سهرتي مع نواال فووق السطح
وع ضو القمر ...
ومعنى قهوه وحلاا وشاهي ومكسراات ..

•
•


[ سلمااان ]
________


.. مع ريم اكتشفت اشياا اول مره ادري عنها
عمر ساره ماقالت لي عنها ولاطلبتها مني ...


.. بكل مراجعاتها تطلب ادخل معها
وكنت استمتع والدكتوره تقوولي بهالشهر وش بيصير معها ومع الجنين ...
.. واول ماركبنا السيااره قلت مستغررب كلام الدكتوره ...
/ صدق ممكن الحررمه تنسا برجلهاا ...!

هزت راسها ..
/ اي عاادي كثير من الحريم كذا ...

قلت بمزح ..
/ يرحم وااالدينتس لايجي وحامتس علي*
ووين ارووح ...!

ضحكت بعذوووبه ...
/ وش تتمنى ...!

قال بحمااس ...
/ ابي اخت لعياالي ...
ابي اجرب دلع البنات ...
وابي شباصات وفساتين في بيتي ...
وابي ثياب ملوونه احمر واخضر واصفر ...


/ ولو جا ولد ..!

/ هههه اللي منتس كله عسل على قلبي ..
بس اهم شي لايجي ولد ويشبه لتس ...!
واتورط به في مجاالس الرجاال
كل من شافه عرف اشباهتس هههه
ان كانها بنت ابيها نسخه منتس ..
وبخبث ... بس احلاااااااا ....


طالعته بطرف عينها ...
/ هين احلاا مني ماافيه ...
قل مثل حلااتس اقول يمكن ..


ضغط على يدها ...
/ ابي انام الليله عندتس ...

ناظرته باستنكاار ...*
/ سلماان الليله لساره ...
لاتظلمهاا ..


تنهد بضييق ...
/ اول مره اشوف وحده تطرد رجلها لجارتها
مفروض تفرحين ...


.. بطيبة قلب ردت ...
/ انا احس بالخجل منها ...
قريبتي واخذت رجلها منها وشاركتها فيه
تبيني بعد اطمع به كله ...!
وانا مابي اعينك ع ظلمها ...
واشاركك الذنب ...

.. نزلني عند اهلي وروح لها ...

حاول يعترض ...
/طيب ع الاقل بجلس معتس
ولاجاني النوم رحت لها ...


برفض قاطع ..
/ لاجا يومي تجيني من اوله
وماتعطيها شي منه ...
وابي لها مثلي ...


تنهد باحبااااط ... وبهياام ..
/ جعل من لااامني فيتس
يذووق حر ماذقت من فرقااتس ...


توجه لبيت ساره ...
ولقاها ع سجادتها ...
حس فيها شي غريب ....
هدوئها .. نظراتها .. الحزن اللي ع وجهها ..
.. مسك يدها وجلسها ...
.. ناظرها برحمه .. ياكثر ماظلمها ...
/ ووش فيتس ساره ...!

ردت بتردد ....
/ ودي اعتمر ...
ان كان تقدر والا ماهوب لازم ...،

.. مسح ع وجهها ...
ابشرري .. نمشي بكره لو تبين ...
بس هذا ...

.. هزت راسها بشكر ...
/ ماقصرت ..*
بس ودي اخلي العيال عند احد من خواتي ..

.. بنفس هدوئها ..
/ خواتس عند رجالهن لاتحرجينهن ..
باخذ العيال عند ريم ..


باعتراض ...
/ لااا صعبه ...
ماهيب ملزومه فيهم ..
ويمكن يضايقونها والا تضايقهم ...


طلع جوااله وبمغامره واثق من نتايجها ..
اتصل بريم وحطه ع السبيكر ... وكلمها وساره تسمع ..
/ ام اصيل انا وساره بنعتمر بكره
تقدرين تخلين العيال عندتس لين نرجع ..


ريم / بيت ابوهم والله يحييهم في حلالهم
ابد جيبهم وتوكلو ع الله ..

/ ماقصرتي ..
العصر اجيبهم واجيبتس من بيت اهلتسً..
وسكر منها ...


.. ممتنه لها ...
لكن قلبها ماراح يصفى لها مهما سوت ..
تظل ضره والضره مرره ...

•
•


[ رياض ]
_______


دخلت ع سعود اللي كسر نظرته للارض ..
وضعه مزري ...
.. حط ايديه ع وجهه يبكي .. ويحلف ...
/ والله مااشفته ...
حسبته كرتوون اللي صدمته ..
ماتوقعت بشر ابد ...
والله ماكنت مسرع ابد ..
اصلا كنت مهدي بوقف ..
و...... سكت ...... وصار يبكي بقوه ...


كلمته بحده ...
/ افاااااا تبكي ...!
الرجاال يذبحون رجاال *متعمدين ..
.. ولايرف لهم جفن ..*
كيف وانت ماقصدت ولادريت ..
اللي صار مقسوم وانا راضي بعطى ربي ..
وما الومك ...
البزران عند البااب والشارع ظلاام ..
وكلن هج وابعد عن السياره الا هالسفيه اللي*
يشفيه ويقومه بالسلامه ..
وحمد لله جت *سليمه ..
والغيبوبه باي لحظه ممكن يصحي منها ...


يالله قوم معي نروح نتطمن عليه ...
ونرجع نتسحر هناا ..
لايفوتك سحور ديوووم ...

جفت دمووعه لاكن لازال خجلان من اللي سواه
مسكه رياض ورفع ذقنه فوق ...
/ الرجااال مايمشي موطي راسه
الا اللي مخزي هو والا اهله مخزينه ..
وانت رجال واهلك يطلقون وجهك*
ارفع راسك لاعاد تنزله ...!


.. نزلنا والا ديمه بقهوتها ف الصاله ..
قلت بانتقاد ..
/ هيه من تغطين عنه ...!

بغباا ردت ..
/ عنك ...

رفعت حاجب ..
/ والله ... تراي حافظتس ولو تبين رسمتس رسم ..
مدت الفنجال وسالتها وش اخبار الكبسه ..
الريحه تفتح النفس ..
بس الطعم الله اعلم ....


ردت ..
/ الطعم ع ضماانتي ..
مغمسه اصاابعي العشر ه فيها
يمكن يطلع حلاهاا زياده والا ملحها كثيييير ...

توجهت للمطبخ وفتحت القدر ...
وباحبااط ...
/ ياااالييييييل مطووولك ....
وين خضارتس مابعد كبيتيها ...!
يالله بطلع انا وسعود مشواار*
ونجيب لبن ونجي ...
نبيهاا والمه ...
وكثررري ترا ابوي وابوتس بيتسحرون معنا ...
وذقتها ....
تبي زياده ملح ... وحطي حبتين ليمون اسود ..
.. التفت بشوفها ...
توعد سعود بالاشارات وهو كذلك ...
كأنهم ع الصاامت ...
ضحكت ...
/ والله مدري وش بينكم ...
بس اهم شي مرتي ياسعوود ..
تلمسها انتف اذااانك ..


سعود ببحه بعد البكا ...
/ ماعليك ذي لسانها ينتف ديره بحالها ..
وبنذااله متعودها معها ...

/ تقوول تكفى اساله ...
متى زواجنااا ...

ابتسمت ... واشرت لها ...
/ من الليله لو تبي ..


عصبت عليناا وطلعت ..
ورفعت صوتهاا تامرنا *...
/ كبو خضاركم ورزكم ...
بروح ارقد والا جهز قووموني ...!


•
•




.. * مر رمضان بايامه ومذااقه الخااص*
وروحاانيته ...
واقبل العيد بفررحته ولمة الاهل والاحبااب ...


واللي زاد العيد فرحه ...
.. صحوة عبودي من الغيبووبه ...
وكنه حاس بالعيد وفرحته ...


.. رياض بشر ابوه *وامه واخوه وخوااته ..
وعمه وعيال عمه ....
واستأذن ابووه ...
/ يبه ابي زواجي هالاسبووع ...
عبود محتااج اهتمام وانا بعد ...


ابوه بموافقه ..
/ نبي نشاور عمك وعيااله ...
وان وافقو حطيناه باستراحه*
وعزمنا الاهل والجيران ...



بس بنحضر عرس ولد عمتك ..
ثم نعزم لعرسك ...


..بليلة زواجها ...
حطت بشنطتها اللي بتاخذها للفندق صندووق ...
..، فتحته غنادر اللي تمشي بثقل ...
وهي ترتب معها شناط السفر ....
وتفاجات .....!
/ خيييير ديمه ....
كل ذا الكيك والشوكولاا ماخذته معتس ...!



ردت بتفكير ...
/ الود ودي اخذ معي كاس جبن كبير
وكيسة خبز وشطه وبطاطس ...
يختي عروس وبستحي اكل ...
والرجاال دفوش مايعرفون يلزموون ...


.. ضحكت من قلب ...
/ هههه صادقه والله*
ايام زوااجي اهلك جووع*
واستحي اكل قداام اخوتس ...


عزيز من وراهاا بضحكه ...
/ ههه بالله ...!
كل ذا حيااا ...
والله كنت بغصبتس بس خفت تجيبين العيد علي ...
.. يالله درس وتعلمنااااه ...
لاجت الثااانيه نلزم عليهاا بالحيل ...


تركت اللي بيدهاا ...
ووقفت بمساعدته بعد مامد يده لها يساعدها ...
/ يااشييخ ...!
انا وحده احب التفرد ...
.. مالي شريك في املااكي ...

كلامهاا يعزز رجولته ..
ابتسم لها ...
/ كم باقي ع الشيخ ويطلع ..
ترا ملينا من الانتظاار ...


اشرت باصابعها ...
/ 4 شهوررر اذا ربي سهل ...

بملل ...
/ اوووووف 4 ياطولهاااا
.. الحين يالله تقومين ..
اجل لاجيتي بالتاسع وش بتسووين ...!
وبشمااته ... تزحفين ...

ضربته ع كتفه ...
.. زعلهاا شييين ويالله رضت عليه ..
ومن يومها وهو يراعيها بشكل ماقد توقع
انه بيعاامل فيه اي شخص عدا امه وابوه ...


.. طللعو وديمه رجعت تحووس بشناطها ...
وتجرب الملاابس للمره الالف ...


___________
( انتهى &#127801*
___