الجزء الخامس عشر

ابوخالد: حيا لله ابو محمد اقرب هنا يارجال

بيتك ومحلك

أبومحمد: تسلم يا يابو خالد بس والله ماهقيتها منكم

بنتي تاخذ وما اشهد على ملكتها الله يسامحكم بس

عبدالعزيز: حقك علينا يابومحمد بس والله


وهو شاهد علينا مادرينا أنها في خاطرك أقلط

يابن الحلال ولك اللي يسمح خاطرك

أبومحمد : ماني براضي لين الشيخ

ياخذ بطاقتي وش قلت

عبدالعزيز: تعال الله يهديك مشعل خذ بطاقة عمك

مشعل : تامريبه

أبومحمد: مشاء الله مجلس عامر بهله أن شاء الله

أبوخالد : تسلم يابو محمد الطيب انتم اساسه

أبومحمد: الله يرحم ابوك يارب عزالله انه يوم مات ترك وراه رياجيل

عبدالعزيز: تسلم يابو محمد ماعليك زود


أبومحمد: من عندكم

عبدالعزيز: مافيه أجنبي المعرس وواحد من معارفه

ابومحمد: شكلنا ابطينا عليهم تعال يارجال ندخل


**************************************
ام خالد : اقول ام مشعل تعالي بوريك أهل زوج حماتك

مها : وينهم

أم خالد : هنا تعالي نهلي بهم بس ترى بتنصدمين

مها: ليش


ام خالد : انتي بس تعالي

حيالله من جانا

ريوف : الله يحيك ويبقيك

ام خالد : أنا منيرة مرة سعد اخو شيهانه الكبير

وهذي حماتي مها مرة اخوها الثاني عبدالعزيز

ريوف: تشرفنا انا ريوف اخت مشرف زوج بنتكم

أم خالد:الله يحيكم ترا المحل محلكم

ريوف :تسلمين ماقصرتي

ام خالد : عن أذنك نشوف باقي المعازيم

ريوف : تفضلي

الحين اخوي مشرف متزوج من الناس هذي


وين طاح عليهم والله ان السالفه فيها شئ

اكيد بنتهم ماهيب صاحيه والا فيها بلاء


الله يستر على وخيي بس

هالحريم مهن هينات والعوابه بينه فينهن

***********************************

آخر شئ ممكن اتوقعه ان ابومحمد يحظر الملكه

انا مخليه منثبر وراي وش جابه هنا الله يستر بس

وش اسوي الحين اخذ بشور مساعد ومالي الا الصبر

الشايب مايحرز يمشي ودايم يشكي رجلينه

وشلون جا صدق المشتهي يقطع المستوي


المملك : اسم الزوج


بدون شعور: مشرف


المملك : الشاهد الاول

فواز : فواز سعود بن سعد


المملك : الشاهد الثاني

ابومحمد : تركي بن محمد

المملك : وين مشرف

مشرف : حاضر ياشيخ

المملك : هل تقبل بي شيهانه بنت خالد

زوجه لك

ماعرفت ارد على الشيخ وجسمي صار يرجف

وصدري ضاق معقول اخذ الحرمة اللي عمي كان ناوي يتزوجها

ارتفع نظري لعمي ابيه يدلني وش اسوي

شفته يهز راسه دليل وافق ماصدقت تنحت شوي واحتريت أي اشارة غيرها

المملك : اخ مشرف فيك شئ تشكي من شئ

عمي هنا ركز عيونه فيني وخلاص شوي وتطلع

مشرف : اقبل ياشيخ

المملك: وين وكيل العروس

عبدالعزيز: حاضر ياشيخ

المملك : وين صك الوكاله

عبدالعزيز: موجود

المملك : تعال وقع بالنيابه عنها

المملك : مبرووك ياولدي منك المال ومنها العيال ان شاء الله



مشعل : الو يمه عطيني عمتي

مها : لحظه بس اصبر

مشعل : عجلي طيب

مها : شيهانه ولد أخوك يبيك على الجوال

شيهانه : هاتيه ,,,الو

مشعل : الف مبروك ياعمة الرجال ملكوا

جعلها زواجه العمر ان شاء الله

شيهانه : الله يبارك فيك يامشعل

مشعل : عطيني امي

شيهانه : ان شاء الله مها ولدك يبيك

مها : هلا مشعل

مشعل : يمه جهزوا نفسكم شوي ويدخل الرجال

ضبطوا كل شئ خلاص

مها : ابشر

مشعل : مع السلامة شكل ابوي يناديني

مها : في امان الكريم

فواز: عن اذنكم

عبدالعزيز: وين يارجال تقهو

فواز : بس عن اذنكم عندي اشغال

أبوخالد: الله يحيك شرفتنا

فواز : تسلم الشرف لي

طلعت برا في الحوش وانا أحس انفاسي تضيق

وتضيق

مساعد : شف من شرف ياطويل العمر

فواز: من

مساعد : والد حرمكم المصون

فواز: وينه

مساعد : في الجهة الثاني ومعه ولده مطلق لاتلتفت شكلهم مادروا عنا

فواز: شف مشرف متى واعدوه الجماعة عجل بطلع من هنا


مساعد: ثواني طال عمرك

فواز: انتظرك برا الخيمة

مساعد: تم طال عمرك

انتظرته برا الخيمه وشكله طول

فواز: وراك تاخرت

مساعد : ابد احتري الرياجيل يخفون عنه

فواز : وش صار

مساعد : بيحركون بعد ربع ساعة تقريبا

فواز: يصير خير

مساعد: طويل العمر وش راح تسوي

فواز : ولاشئ يامساعد خل كل شئ يمشي على طبيعته

مساعد: كيف يعني

فواز: مساعد أنا الحين ماراح أقدر اخذ البنت

مساعد: ليه ياطويل العمر


فواز : الحين تشوف بعيونك جية أبومحمد


ماراح تخلي الامور تمشي مثل ماكنت متوقع

بس لاتخاف على عمك مصير الايام ترجع لي

اللي راح


وقريب ان شاء الله


مساعد : يعني زواج مشرف بيتم

فواز: وش اللي يخليه مايتم

مساعد : مدري


فقت من سرحاني على صوت مشرف

مشرف : عمي ليش سويت كذا

ركضت له وكأني خلاص باذبحة ومسكته مع ثوبته ورصيته على الجدار


فواز: والله يامشرف وانت رجل في الدنيا ورجل

في لاخرة لو أسمع انك لامسها والا ملتفت لها لو بنظرة

اذبحك تسمع


مشرف : عمي تطمن هذي عمتي وعلى

عيني وعلى راسي وماراح تشوف مني الا كل خير

شديت عليه زيادة لين خلاص بديت اخنقه

فواز: حتى الخير يامشرف مابيك تمن عليها

به من الحين اعلمك لاتجني على نفسك كانك تبيها

مساعد: فواز فكة خنقته انت في حوش العرب


دزيته بكل قوتي وطاح مني على الارض

فواز: بكرة تجيب تاج راسك وتسكن عندي

في البيت وافهم الكلمة من أولها لاتخليني

اسلك معك الطريق الثاني

أخذني مساعد بيدي وركبنا السيارة وحركنا برا الحي


كله وانا خلاص حاس روحي بتطلع أن طلعت من البيت هذا بس الظرووف تحكمنا

مساعد : تطمن ياطويل العمر

مشرف كلها شهر والا أقل وياخذالله أمانته

دكتوره اليوم قالي بعد النوبه الاخيره الرجال خلاص بأيامه الاخيرة


نزلت دموعي فجأة


فواز: مساعد أنت ماتحس روحي راحت وانا وش دراني أنه بيموت


يمكن عمره أطول من عمري


مساعد: أذكر الله


بعد كلمة مساعد ماحسيت بالعالم كله

مشعل : يبه يالله مشينا ندخل المعرس


عبدالعزيز: لا مانيب رايح أخذ عمك سعد


ماتشوف المجلس مليان مانقدرنخلي الرياجيل لازوم يجلس واحد


مشعل : يبه كلها خطوتين


عبدالعزيز: رح ولاتضيع وقت


مشعل : أن شاء الله يبه

سعد: يالله مشينا وانا عمك وين رجال عمتك


مشعل : برا عند المغاسل يغسل


سعد: أجل توكلنا على الله


عبدالعزيز: حيا الله أبومحمد وين يارجال يعني لوماعزمناك


ماجيت


أبومحمد: تسلم يارجال


عبدالعزيز: أبومحمد وش يقرب لك الرجال اللي جا مع المعرس


ابومحمد: من تقصد الشيخ فواز ايه هذا رجال بنتي الكبيرة


عبدالعزيز: ماشاء الله اجل طلعنا نسايب


ابومحمد: نسايب من قال


عبدالعزيز: انت قلته

ابومحمد : قلت اني نسيب فواز بس ماقلت اني نسيب مشرف


هذا مايقرب لهذاك


عبدالعزيز: معرفه

ابومحمد: لايشتغل عندة


عبدالعزيز: مدامه يشتغل مع الشيخ فواز اكيد ان له معزة خاصه عندة


ابومحمد: اكيد فيه احد مايعز سواقه اللي مقابلة اربع وعشرين ساعه


ههههههههههه


عبدالعزيز: ويش سواقه ؟؟؟؟

************************************

مساعد: طمني يادكتور

الدكتور : للاسف الحالة حرجه ونقلناها للعنايه

المشددة لين تستقر ونبدأ بالعلاج

مساعد : ليه يادكتور وش طلع معه


الدكتور : ثلاث جلطات بالرئه

السلام عليكم
كل عام وانتم بخير

الحين اللي تعب وبالمستشفى منهوووو؟ فواز والا مشرف


ونفسي اعرف ابو محمد وش سالفته

وتمنيت اشوف خشة عبد العزيز يوم قاله ابو محمد ان مشرف سواق فواززز ههههههه
شكرا قمم ويعطيك العافيه

يووووووووووه شهالبارت النكد ...........حسبي الله عليك يالشايب ليته يموت بحادث ومايلحق يوصل بيته .........عسى ربي يحرق قلبه مثل ماحرق قلب فهد هو وبنته عجوز النار


والله توقعت انو فواز بيسوي الي براسه من هالزواجة حتى لو تدخل الشايب ماتوقعت انو النذل المجرم كاشف كل خططه ..... لو ماجاب العجوز حسنا معه وخلاها تحترق هناك كان مابلغت ابوها عن حركات فهد


الجلطة في فواز دامه هو الي كان مع فواز بالسيارة ..............من القهر الرجال انجلط مااعتقد انو مشرف هو الي بالمستشفى والحين اكيد عبد العزيز مابيسكت بعد ماعرف انو العريس سواق


وابو محمد تعمد يقول هالشي علشان يقطع على فهد الي براسه .............الله يعين شيهانة اذا عرفت ..........وكيف راح تتخلص من هالمطب الاقشر الا اذا مشرف طب ساكت في نفس الليلة ومات



قمم والله حرقت دمي بهالبارت اووووف كنت متأملة في فهد انو جاهز لكل الظروف وبيحلها بطريقته .........مابرتاح الا اذا فهد ريحنا من هالشايب جعله مايوصل بيته وجه النحس ............موقادرة اخمن الي ممكن يصير بصراحة



في انتظار البارت الجاي ....