كاتب الموضوع :
لا اريد مجاملة
المنتدى :
القصص المكتمله من وحي قلم الاعضاء
سبحان الله والحمد لله ولا اله الا الله والله آكبر
الجزء (16)
أحيانا ً اشعر بالشفقة عليها وأحياناً أجدها دخيلة
هل تعرفون متى أجدها إنسانة تضج بالروح المرحة والمشاعر فقط عندما يتصل بها احد أقاربها
أجدها إنسان مختلفة تماما ً
قضيت أول أيام زواجها أراقبها دون أن تدرين دخيلة
أقتحمت منزلنا وأبعدت ملاكه عنه اتى بها والدي في ليلية سكن الحزن قلوبنا وأعطى والدي لحزننا ظهره
عندما انتشر خبر زواجه كان الوضع عادي ولكن ما لم يكن عادي نظرات صديقي مخلد التي أربكتني صديقي الصدق اخذ يبتعد وقررت ان اقترب وأصارح
سحبته معي في جلسة أجبرته عليها ليخبرني بعد إلحاح بما صعقت به
زوجة والدي كانت على علاقة بأحد أعمامه كيف ومتى وما السبب
كلها أسئلة بقت تطوف برأسي كقشة عكرت صفاء حوض ماء نقي
بظنوننا صغار لا نفقه شيئا
تعالوا معي لأخبركم كيف استطاع مخلد كشف سر عمه والعم لا يدري
جرت بيننا محادثة لم استطع ان أسيطر على غضبي فيها وكدت ان اضرب مخلد فمهما يكن هذه زوجة ابي عرضه يعني عرضي
قلت بغضب :مخلد احترم نفسك لا والخلقني اوديك لبيتكم مكسر
ثورتي اصطدمت ببرود الواثق من قبل مخلد ليقول بكل هدوء :
يعني صارلك ساعة اتلح تريد تعرف شكو ومن عرفت اتريد اتكسرني
بيوي على شنو كل واحد يروح بدربه
حاول المغادر ولكنني ثبتته وقلت :مخلد احجي اشلون واشوكت
اجاب بسرعة :مخبل انت اخاف عبالك هسة وهي مرة ابوك لا والله هذا الحجي قبل 3 سنوات
وظليت اراقب عمي وانقطعت العلاقة بينهم ورى سنة
قلت بحدة وين جانوا يتقابلون
تأفأف بضجر وقال خالد الحجي يبقى بينة اني ما ناقص لاعمي ولا ابوك
اجبت بضجر :احجي مخلد هو هذا حجي ينحجي حتى انشره
اجاب :تذكر بيتنه القديم من شلنة (نقلنة) منه من كنت بالمتوسطة اني بقيت متعلق بيه وبين فترة وفترة اروح للمنطقة العب
فد يوم وكفت (وقفت) سيارة عمي يم باب بيتنة ونزلت وياة مرية كل شي ما مبين منها
اني عبالي مرة عمي بس من دقققت لا والله مو هي
راقبت البيت ومن طلعوا لحكتهم
اخذت ماطور(دراجة نارية) ضرغام وخليت شفقه (قبعة) على راسي ورحت وارهم
عمي نزل المرة بمنطقة بعيدة اشوي على البيوت وهي راحت مشي واني اشوي اشوي وراها الى أن اندليت البيت وعرفت هي منو بعد ما سألت وظليت اراقبهة
مرة من المرات كشفتني وعرفت اني ابن منو
بس المصيبة ما دارت بال ولا خافت
كالت (قالت) لاتدخل بأمور غيرك حتى لا يجي يوم الناس تدخل بأمورك وياخذون فكرة غلط عنك وأنت بريء
ومن ذاك اليوم بعد ما شفته وي عمي
بقيت مذهول من هول ما طرق مسمعي
وقررت المراقبة ولم تأتي المراقبة بنتيجة معها فهي قليلة الخروج وان خرجت فلبيت اهلها او احد إخوانها
تتكلم بالهاتف بعفوية وعندما وقع بيدي هاتفها لم اجد فيه ما يحوي بكونها لعوب
اذن علي ان اعرف السر
وبالفعل تمكنت من معرفة السر في يوم مشابه لهذا اليوم خلا البيت من سكانه الا انا وهي
بترتيب مني فأنا حريص على البقاء في البيت عندما تكون لوحدها فكرة سيطرة على عقلي ان تركناها لوحدها أغرقت البيت بالرذيلة
في ذلك اليوم
خرجت من غرفتها وهي صفراء اللون وتتلوى وتحاول إخفاء ألمها
قلت لها :عمة شبيج
اجابت وهي تحاول إخفاء ألمها :ما بي شي لا تشغل بالك
قلت :اتصل بأبوي
فأجابت بهلع :لا لا ماكو داعي ماكو شي
ولكنها بعد ربع ساعة قضتها بالحمام اتت الي حيث اجلس وقالت بوهن :ممكن تودين للدكتورة بس ما اريد احد يعرف
رضخت لطلبها لا رحمة بها بل لكي اعرف سرها فهذه فرصتي
انزلتها بقرب عيادة دكتورة معروفة في منطقتنا :ودخلت بعد فترة انتظار قصير لان الوقت كان مبكر والحجوزات كانت قليلة
ولكنها تأخرت داخل العيادة كثيرا
وخرجت وهي بالكاد تقف اسندتها وادخلتها للسيارة
قلت بخوف ليس عليها بل من ابي ان حصل لها شيئا وانا لم اخبره :اتصل بأبوي شكلج مو طبيعي
اجبت بأيمان :الحمد لله والشكر تخفيف الذنوب
نسيت الخوف من ابي لان الفرصة لاحت لي :لازم اذنبوج هواي
اجابت :كلنا النا ذنوب سبحان الخالي من الذنوب
قلت :بس ذنب عن ذنب يختلف
اجابت بتعب :والظن بالناس ظن السوء هم ذنب
وبعدها قالت :خالد اني مو غبية وبطل مراقبة الي
اني مو الانسانة الي رسمته انت ومخلد قبلك بخيالهم الي بيني وبين عم مخلد زواج مو قلة ادب هذا مو ثوبي
ورجاءا اغلق الموضوع ولاتسأل ليش اشلون لان اني هم مراح اسئلك ليش راقبتني واشلون
بس كل الي اكلك الامور مو مثل متشوفه اكو بواطن احسن الك لاتفكر بيه ولا تحمل نفسك ذنب انت في غنى عنه
كان الصمت جوابي
وصلنا للمنزل وجدنا والدي الذي ما ان دخلنا حتى قال :وين جنتوا
اجابت سماهر :يم الدكتورة كنت حامل والطفل راحلك فدوة
لم يجبها والدي بل اقترب منها وقبلها على جبينها وقال :الله يعوضنا بأذن الله
هل تعرفون والدي انسان يملك في قلبه مئة قلب ويوجد لديه الف عين كل عين تملك نظرة
عندما نتواجد في جلسة فيها سماهر لايرف له جفن وهو يراقبه بين فترة واخرى وهناك نظرة فرح ولعب داخل عينيه
اما مع والدتي
عفوا لا بد ان اوضح والدتي هي منى فهي التي استحقت هذا اللقب بعد وفاة والدتي رحمها الله
معها يكون والدي ذا نظرة عجيبة فيها عطف ورقة وحزم واحينا نظرة مبهمة احترت في نظرته لها واحترت في تحديد هل يحبها ام لا يحبها
اما عندما نذهب للاسواق ويلمح والدي امرأة خاصة ان كانت لا ترتدي الحجاب عندها تجد والدي يملك نظرة تشبه نظرة مخلد عندما يرى فتاة جميلة
مخلد صديقي ينفجع وتسكن عينيه عندما يرى فتاة جميلة
ابتسمت لهذا التشابه بالنظرات ليقطع ابتسامتي صوتها القائل :متروح اتشوف خوانك والله مراقبتي مجيب نتيجة
قلت بهدوء :عمة سماهر والله بطلت ليش مصدكين احنه هسة اصدقاء
قالت بأبتسامة لطيفة : خالد انت ابني صح انت متقبل تناديني ماما بس انت ابني حتى اذا في يوم انفصلت عن ابوك شرعا انت ابني وما احل عليك
قلت لها :شنو هذا الحجي ليش تنفصلين
اجابت :اذا في يوم انفصلت فتأكد مو كره بهذا البيت لا حبا بهذا البيت راح انفصل
وقبل ان اتكلم قالت :المهم يلة روح شوف اخوتك
هديل من الفرحة نست موبايله وصار ساعة محمد يدك واستحي ارفعه
هاك اخذ موبايلها اخاف يدك محمد مرة ثانية
صدمتم
نعم هديل تم عقد قرانها على محمد ابن العمة دجلة
والتفاصيل معها لادخل لي بها
وأما علاقتي مع سماهر فتغيرت جذريا أصبحت اكن لها حب واحترام يقوى مع الأيام ولن يزول ولكنها مع ذلك لن تصل لما وصلت لها والدتي منى
&&&&&&&&&&&&&&&&&&&&&&&&&&&
ان الملام عودت نفسي على صوتها في كل صباح قبل ان اذهب لعملي
أكاد اجن الساعة أصبحت صباحا ً8
واتصل ولا مجيب لا استطيع ان اتصل بيت اهلها ماذا اقول
زوجتي لا تجيب على اتصالاتي
لتوتري طلبت اذن لساعة من عملي لان اعصابي لا تتحمل المراجعين وضوضاء المستشفى
مالحل
آه منها وكيف اوصلتني لهذه الحالة كان اساس الخطوبة الاقتراب من اخي بالزواج من قريبة زوجته وقريبتي
ليتحول الاساس الى شيء اخر مختلف بت متعلق بكل تفاصيلها حتى حبها المبالغ لوالدها عشقت كلامها عنه
جرها لاخر الكلام حفظت طريقتها فيه
وقبل ان تفوه به اقوله قبلها لاغيضها
ما بالي اليوم هل حصل مكروه لمحبوبتي حتى اتذكر هذه الاشياء عنها
اتاني صوت الولدتي قائلا :محمد يمة اترييك
اخذت كوب الشاي وارتشفت منه رشفة بسيطة لتمد والدتي يدها المحملة بقطعة خبز دهنت بالجبنة
هل تعرفون نسيت بأني اكره الشاي وحده في الصباح ونظرات والدتي المتسائلة والمطالبة بتفسير أخجلني
قلت بعملية :الشغل ماخذ كل تفكير
اجابت والدتي بأبتسامة :الله يساعد هديل على هذا الشغل
قالت هديل هل تعرف شيئا عنها هل وصلها خبر عن اخبارها
هديل حسابك عندي انتظري
يالاهي لا لن احاسب هديل فقط كوني بخير
وهذا الاخر مضى شهر على زواجه وهو يظن نفسه عريس الساعة تجاوزت ال 8 وهو لم يصحوا من نومه
حسسناً زياد مخرجي
ابتعدت عن مائدة الافطار و والدتي من خلفي تقول :وين يمة ما كملت
قلت بأستعجال :هسة اجي يمة بس اخابر واحد عندي شغلة وياه
وبالفعل اتصلت بزياد الذي اتني صوته النائم قائلا :شكو من الصبح
قلت بحدة :يا صبح يابة ترة الساععة راح اتصير بال 9 هذا ما طلع عرس
ليأتني صوته الحاد:محمد شكو شتريد شعندك من صباح الله خير
قلت بعد أن اخذت نفس عميق :هديل اتصل بيه وما جاوب
اجاب بتهكم :يا اخي ملت انطي للبنية فرصة
قلت بحدة :يعني بس اني يملوني مني اعرف ناس صار الهة شهر مزوجة ومكابلة البيت محد مل منه
ليتأني صوته المتعجرف قائلا :هسة شتريد فضه
قلت :خلي منار تتصل بيه
وقبل ان يقاطع قلت :ادكول منار نايمة اكلك كعدها لان اعصابي تلفت من الساعة 6 واني انتظر وهديل مو عوايدهة
اتاني صوت زياد الجاد :ليش هي كل يوم بال 6 اتخابرك
قلت :اي ادكعدني من النوم
اجاب بهدوء :زين سد اتلفون واشوي واخابرك
عقارب الساعة ابت الحركة
وهذا اللعين الذي بيدي ابى الرنين
وكدت ان أتهور واذهب الى غرفة زياد ولكن الرنين كمم تهوري
قلت بهلفة :ها زياد بشر
أجاب بكل برود :ماكو شي بس امه جابت توم ولد ومن الفرحة من الصبح راحت الها ونست الموبايل
قلت بهدوء :ها الحمد الله على سلامتها
واغلق ذلك البارد الهاتف بكل برود
نست الهاتف وانا على اعصابي
حسننا هديل لاريك الوجه الاخر لمحمد
&&&&&&&&&&&&&&&&&&&&&
كانت ولادتي بفضل ربي سهلة جدا ووجودهم حولي بعد والدتي بساعات خففف عني الالم حتى نسيته تماما
هديل وحسام وهمام ومناف وعلي وام علي كلهم حولي طوق من الحنان بدد اللامي
بدأوا يتناقشون عن الاسامي
هذا يقول فلان والاخر يقول فلان اما انا فخصمت الموضوع وقلت بتعب :محمد يسمسهم غير
اجاب مناف :بس اني اريد اسمي واحد
اجابه همام :ادلل استاذ مناف ميغله (لايغلى)عليك
اجاب :اريد اسميه محمد على اسم الرسول
قلنا بعده اللهم صلي على محمد واله محمد
قلت :ليش اكو احلى من اسم الرسول زين خل يصيرون اسماء متقاربة
ليقول همام :يعني شنو تردين احمد ومحمد
قلت :لا الرسول اجه نشر الاسلام والسلام فواحد اسمه محمد والثاني اسمه سلام
الجميع أيد الاسم وعلقوا عليه تعليق جميل بأستثناء همام الذي لم يقل كلمة واحدة وابعد نظره عني لا ادري لماذا
أصبحت الساعة الثامنة والنصف صباحا غادر الجميع برفقة مناف وعلي
وبقى همام معي حتى تأتي والدة علي ببعض الإغراض الضرورية لبقائي لهذا اليوم في المستشفى
كانت الوجوم مسيطر على همام
بصراحة لا يهم فبعد ذلك الموقف معه اصبحت لا ابالي به كثيرا واليوم بالذات اصبح في حياتي رجلان ومع خالد وحسام اربعة رجال مناف خامسهم
اما هو فرجل استثنائي في حياتي
معه الوضع مختلف اقول غير مهم واجده مهم ومهم جدا
لذا فضلت منح مشاعري معه لا مبالاة لكي ارتاح حتى حين
اتاني صوته الغاضب الخافت قائلا :هسة اذا حجيت اصير مو خوش ادمي ومنغص عليج فرحتج
قلت بتعب :ليش شكو
اجاب بكل حدة :شنو شكو طرطور اني حتى زوجتني اسمي ابني على رجلها الميت اتخبلتي مني لو ترديت اتضحكين خلق الله عليه
لو اقسمت للناس جميعا بـأني نسيت ان سلام اسم زوجي واني الاختيار لم يكن على هذا الاساس لما صدقني احد
قلت بصدق :والله همام مو قصدي صدكني هيج لالاسم طلع مني
اجاب بحدة :تردين تنتقمين مو هشكل كتلج اختاري اشلون ترضين واني ارضيج بس مو على حساب كرامتي منى
قلت بحدة :كرامتك محفوظة وكرامتي تروح فدوة لكرامتك ولا كرامتك احد يضرها
اجاب بحدة :تستهزئين مو
قلت :مو استهزاء حقيقة من عرفتك واني عرفت معنى الكرامة المهدورة
وقلت بعدها :همام الله يخليك لا تنغص عليه خلاص انسى الاسم وخليهم احمد ومحمد وانتهى الموضوع
اجاب بحدة :عندج عادي ولا عبالك طلعتيني اصغير كدام اولادي واهلج
قلت بهدوء :ما عاش من يصغرك انت ابو اولادي همام وقدرك كبير
والله يخليك لا تسويهة سالفة اعتبرها غلطة وسامحني عليها كضيت عمر اسامحك هسة انت جرب مرة وحدة اتسامحني
اخذ نفس عميق ونهض من المقعد حيث يجلس واقترب مني وطبع قبل على رأسي وقال :الحمد لله على السلامة الجماهير منعتني من هذا الشي
وقال بعدها :اشوكت اتحنين عليه وتنورين بيتج منى كافي
قلت بكل هدوء :من اطيب جروحي اني اتصل بيك واكلك همام تعال اخذني
فرجاءا همام هذا الموضوع لاتفتحه
اجاب بهدوء :الله كريم
نعم أريد ان تبرئ جروحي لكي أتقبل همام الزوج وأتقبل سماهر الزوجة من اجل نفسي فبعد هذا البعد
أدركت على الرغم من الصورة المشوهة لمنى في بيت همام الا ان منى لا غنا لها عن همام
لذا قررت ان اعيد منى التي ترضي منى
وأعود الى همام منى جديدة ترضني وعلى همام تقبلها
متى
فقط لا تستعجلوا
وانتظروا
&&&&&&&&&&&&&&&&&&
منذ ان عدت وانا اتصل به ولا مجيب وبعدها اغلق هاتفه
اضطررت ان اتصل بمنزلهم
أتاني صوت زياد قائلا :نعم
قلت :السلام عليكم
اجاب بكل هدوء :وعليكم السلام
خجلت ان اطلب محمد وقلت : منار موجودة
اجاب :دقيقة
وبعد فترة اتاني صوت منار قائلا :متأكدة هذا الاتصال الي
قلت :يمة اسم الله انتي منو كلج اني على التلفون
اجابت بضحكة :منو يعني غير زياد
قلت :هو اشلون عرف رجلج مو امان
اجابت : لاعيوني امان انتي دماغج مو امان الله يساعد محمد
عرف من الكاشف ياذكية يعني بيت همام وحدة صوتها نشاز تريدني منو يعني اكو غير هديل
قلت بضجر :منار مو وكتج ترة اعصابي تلفانة
اجابت :شكو اليوم رجلج الصبح اعصابه تالفة وانتي هسة العصر اعصابج تالفة
قلت :محمد ميجاوب على التلفون شنو كفرت نسيت التلفون والله مو قصدي
اني من الفرحة نسيت علي موجودة وحجيت اشكال الوان من شفت خواني شنو أتعاقب على فرحتي
اجابت منار :شوفي ظلي وياي على التلفون ومن يجي اخليج تحجين وياه هسة على جيه هو ولا تعاتبين
سوي روحج عادي تلفونه مغلق وخابرتي على البيت
هديل لاتعاتبين وضبطي نفسج
وبالفعل بقينا نتكلم حتى اتى محمد واعطتني اياها
قلت بكل هدوء :السلام عليكم
اجاب ببرود :وعليكم السلام
وبعدها قال :الحمد الله على سلامة امج ومبروك ما جاكم
قلت بفرحة لهذه الذكرى :الله يبارك بيك
محمد لو تشوفهم يجننون يطيرون العقل
اجاب بتهكم :لا هم يطيرون العقل ويجننون ويخلون الواحد ينسى الناس كلها فهاي مسألة عرفتها قبل لادكوليهة
قلت :محمد انت زعلان
اجب بتهكم :لا يابة ليش ازعل قابل تلفت اعصابي وان ادك على تلفونج وانتظر اتصالج عادي قبل منو اني
كلي محمد رجلج قابل مجبورة انتي ادكليلي وين رحتي
عادي عادي براحتج
قلت بعتب :والله محمد نسيت الموبايل ومن اذكرته اني بالسيارة قابل اخذ موبايل بابا والله استحي
اجاب :هديل كلنا (قلنا)عادي وفدوة لعينج تعبان اريد اروح انام
قلت بحدة :متنام وانته هشكل زعلان
زين غللطانة اني قابل انظل مزاعلين كلي اشلون ترضة
اجاب بهدوء :الي يرضيني اعاقيج من اليوم للزواج ما احجي وياج ها شكلتي
قلت بزعل :كلت ياقساوة كلبك اذا صدك هذا عقابك
اجاب بضحكة قوية :واله انتن مينكدر عليجن النسوان بالبداية انتي تردين تراضيني وقلبت اني اريد اراضيج
بس يا هديل خل تنعاد هاي الشغل مرة ثانية
قاطعته وقلت بصدق :توبة ما اعيدهة و الله راح اسوي سلسلة للموبايل واخليه برقبتي
اجاب :لا ماكو داعي انت لو مخلية محمد بكلبج جان ما نسيتي الموبايل
كان الصمت جوابي
ليقول بتلاعب :ها شو سكتي لازم صدك محمد مو ابكلبج
قلت بخجل :والله محمد يعرف هو وين
اجاب :لا ميعرف واليوم يريد يعرف
قلت :اكيد يريد يعرف واحد ازوج وحدة حتى يصير قريب من اخوه عن طريقه اشلون يهمة يعرف هو شنو بالنسبة الها
لتقتحم ضحكاته ساعة الهاتف وبعدها قال :موكتلج انتن النسوان طركاعة (بمعنى شي مهول ) مينكدرالجن (لانقدر) قلبتيها عليه
هو مو صوجج صوج الي كل الي بكلبه على لسانه
قلت بدلال :لاعيوني اني مو بس منك عرفت اني كنت اعرف قبل لا ادكول وزين منك كلت كان حسابي يصير غير شكل
اجاب بضحكة :زين يا ام حساب سدي التلفون وبعد لاتخابرين ما دام صارت بيه حسابات خل اصفي حسابي لعد
قلت بزعل :محمد والله اسد التلفون وبعد ما اخابر
جاء صوته مملوء بنبرات عذبة :اذا تردين تموتيني سويهة
لتنتهي المشكلة ونستمر بأحاديثنا المعتادة
نعم محمد أصبح زوجي وكم تألمت لاني عرفت عن طريق الصدفة الهدف من زواجه بي
وهو لكي يكون واخيه متقاربين عن طريقي وعن طريق منار
وكدت ان ارفض لولا سنا التي نصحتني بالموافقة كنت في حيناها بقمة غضبي عندما ذهبت
لمنزل خالتي واختليت بسنا وقلت :لو يبقى اخر واحد ما قبلت بيه بابا مكيف بيه ويكول محمد خطب هديل مني حتى يصير هو واخوه قراب من بعضهم
بالله هذا حجي يحجيه عاقل
لتجيب بكل هدوء :وانتي عاقلة ترفضين محمد علمود هذا السبب شنو يعني اكو يخطب لخاطر اخوه ولخاطر اخته ولخاطر امه بس النتيجة هو فكر يزوج لخاطر نفسه وحتى يحب زوجته
وحب الزوجة ما الة علاقة بحب اي واحد من افرد العائلة الها حب مستقل
هديل عوفي الخبال وسوالف الافلام
محمد لا ترفضيه خوش ولد تندمين بعدين
كلمات سنا كانت مصباح لي لكي اهتدي به نحو الطريق الصحيح
هذه هي الحكاية ببساطة
استغفر الله واتوب اليه
التعديل الأخير تم بواسطة بياض الصبح ; 20-09-11 الساعة 03:05 PM
سبب آخر: تعديل رقم البارت
|
20-09-11, 09:53 AM
جديد مواضيع قسم القصص المكتمله من وحي قلم الاعضاء
العرض العادي
