السلام عليكم

الجزء تحت المراجعة
ساعة او اقل ويكون بمتناولكم
قراءة ممتعة ومفيدة اتمناها لكم

سبحان الله والحمد لله ولا أله ألا الله والله اكبر


الجزء (13)

أربعة أشهر أعيش حياة زوجية أمنة
نعم الكل يعتقد اني جريئة لأني تخطيت الأسوار وتزوجت مرارا ً وتكرار والأهل غافلون عن ما تقوم به ابنتهم
والكل يجهل ان خلف هذه الجرئة هناك خوف وقلق وترقب من أن يقتحم احد أخوتي الباب التي أوصدت ويرى أخته في أحضان رجل غريب

بالتأكيد لن يقول زوجها فأمرأة تغلق عليها الأبواب سرا ومعها رجل دون علم أهلها
الكل يتهمها بسوء الأخلاق حتى وأن علموا ان الزواج حلال
زواج بالسر لا تلجئ له الا المرأة ذات الأخلاق السيئة
هذا هو السائد

ربما تتساءلون عن همام وعلاقتي به
احمد الله بأني حظيت به زوج بالعلن
نعم عينه مملوءة بالحزن ولسانه دائما يزل ويقول :مناواي
وهناك رسمية قاتلة في تعاملنا واحترام يفوق الاحترام
ولكنه زوجي الذي أبدل نظرة الاحتقار بعيون إخوتي الى نظرة احترام لاتخلو من الشفقة وأمل أن تتحول الى حب
ادين له بالكثير احاول اعطاءه الكثير ولكنه يرفض عطائي بلطف كبير

اما علاقاتي مع اولاده علاقة احترام عالية جدا ً
نكاد نكون زملاء في العمل تربطهم كافتريا الشركة وهناك سلام بارد بينهم تلك التي خلف أسوار المنزل اجدها قريبة منهم اكثر مني أنا التي داخل الأسوار
لاتتوقف عن السؤال عنهم ولا يتوقفون عن السؤال عنها وقضاء سهرة أسبوعية برفقتها

احترمها لأنها تحترمني ولاتحاول الاقتراب من حياتي الخاصة وزعزعتها
قد تقولون ازحتها وجلست على مملكة تعبت في تشيدها
لاتلومني هى فرصة اقتنصتها وقد تكون غلطة من قبل همام وأنا عرفت كيف استثمرها لكي تكون خطوة صح في حياتي
ولكن مع ذلك حاولت إصلاح الأمر بينهم لأن ادين لهمام بالسعادة التي اشعر بها
و أريد ان أقوم بعمل اسدد به جزء من ديني له
عندما اتصلت بها من هاتف المنزل
فأجابت بشوق لانها ظنت أن من على الهاتف هديل :هلا ماما هديل
لأجيبها :السلام عليكم ست منى
أول الأمر اعتقدت انها سوف تغلق الهاتف لان الصمت كان يوحي بذلك
ولكنه اجابت بطريقة طبيعة :وعليكم السلام خير سماهر صاير شي عدكم
اجبتها بهدوء :لا الحمد لله الكل بخير
لم تجب وعاودت الكلام قائلة :ست منى احنه بنات منطقة وحدة ويربطنة بيت واحد
قاطعتني قائلة :ورجال واحد وبعد سماهر شنو المطلوب
اجبت :ترجعين للبيت همام والأولاد صدك محتاجيج
وخل نعترف بالواقع الي هو اني زوجة ثانية وانتي زوجة أولى واعتقد هذا مو شي جديد عليج ليش هسة طلعتي من البيت بعد ما رب العالمين رزقج بالحمل
شنو الفرق بيني وبين غيري
اجابت بكل هدوء :الفرق منى ادغيرت منى الى كانت تتقبل غيرج هسة صعب عليه تتقبلج او تتقبل غيرج
قاطعتها قائلة :يعني شنو تنتظرين همام يطلقني يالة ترجعين للبيت
اجابت بمرح :سماهر المشكلة انتي مخاذة المسألة شخصية وياج صدكيني حتى اذا همام ازوج غيرج ايضا راح يكون تصرفي نفس الشي مسألة يطلقج وارجع هاي مسألة غير واردة تماما
حتى أذا طلقج وهاي مسألة ما اتمناها ابدا صدكيني بيت همام مراح يكون بيتي
اني انتظر اشوكت همام ينطيني حيرتي انطيته هواي واعتقد استحق حيرتي مقابل عطائي
اجبت بثقة :وهمام مراح يطلك ابد وانتي تعرفين هذا الشي كلش زين هو يحبج
صح عايش وياي مثل اي زوجين طبيعين بس بعده يغلط بأسمج بعدج انته محور اهتمامة كلما تتصلين بالاولاد او يتصلون بيج يصير بعالمج انتي ينتبه لادق حركة تصدر من الأولاد من يتصلون بيج حتى يلتقط اي معلومة عنج
وصدكيني اذا البيت اتهدم بذيج اللحظة مراح ينتبه اله لان انتباه كله على اخبارج واخبار حملج
هيج واحد بكلبه هذا الحب ميستاهل الوحدة تتنازل اشوي حتى تعيش وياه حياة طبيعية
اخذت نفس عميق واجابت :شوفي سماهر يمكن زواجج من همام صحح هواي امور بحياتج

ادركت حينها ان همام اخبرها بحقيقيتي
اجبت بخجل :انتي تعرفين
اجابت بشهامة :وسرج أبير محد راح يعرف هذا الموضوع اطمأني محد راح يعرفه ابد ابد
وخل نرجع لموضعنا رجعتي لهمام حتى يكون هذا اخر اتصال بينة بخصوص هذا الموضوع

واكملت قائلة :شوفي سماهر انتي زواجج صلح حياتج بس اني زواجي خربط حياتي
اني اعرف منى المدرسة بس منى الزوجة شي مشوهة ما اعرف واذا افكر بيه حياتي كله تتخربط
من الزواج اعرف منى الام صح اولاد همام مو اولادي بس عرفت وياهم معنى الامومة واذا اكو شي اعتبر همام مفضل عليه بيه
أنو منحني شعور الامومة الحقيقي غير شي همام كزوج حياتي وياه ما بيه ذكريات الأزواج
اتمنى الج حياة غير شكل وياه وشليني من دماغج اني مراح ارجع لهمام
قلت :يعني ما احاول مرة ثانية
اجابت :لا لاتحاولين اذا اكو شي يستاهل المحاولة هو تحسنين علاقتج وي هديل والأولاد حتى يكمل الجو الأسري عدكم
هذا شي كلش يهمني خاصة هاي الفترة خالد محتاج لهذا الجو لان فترة امتحانات مصيرية
هذا كل الي اطلبة منج
قلت :احاول وياهم بس هم مينطوني مجال يعاملوني بأحترام مبالغ
احابت :مدام اكو احترام بالعشرة يجي الحب بس طولي خلك (خلق) وياهم
احبتها بصدق :بأذن الله
وبعدها قلت :اسفة بس اني غركانة ولكيت سفينة كدامي هو الي الغركان يجلب (يتمسك) بقشة حتى ينقذ نفسه واني لكيت سفينة حتى انقذ نفسي
اجابت :حقج واني ما الومج ابد اني الومه هو وألي اسبابي لو زواجج كان قبل فترة غير هاي الفترة كان الوضع عادي بس هسة مو عادي
عموما الله يوفقج
وبعدها قالت :محتاج شي
اجبت :لا مع سلامة
وانتهت مواجهة الضرائر بسلام

وعندما عاد همام في المساء قررت أن أصارحه بما دار بيني وبين منى ليس لرغبة مني في تأزم الوضع بينهم
بل لأني عاهدت نفسي على الصراحة معه وان أعيش حياة واضحة بعد حياة الإسرار التي عشتها
أخبرته بكل ما جرى بيننا وكان هو منصت جيد لما أقول
ولم يعلق مطلقا ألى أن انتهيت
اجاب :خليهة براحتهة هسة ومن تولد اني أتفاهم وياها
وبعدها قال :سماهر منى صفحة مسحيل اطويهة من حياتي اكو اشياء بينة صعب اقوله لاحد
واكو مشاعر انولدت بينة صعب انطيهة لغير منى وهذا موضوع اني كنت من البداية صريح وياج بيه
اجبت بكل ثقة :واني قبلت اكون الثانية واني ما اعرف شنو ينتظرني وكنت متوقعة اسوء الاحتمالات والى اشوفه احسنهة
اجاب :احسنهة لأ ن منى تركتلج البيت
وبعدها قال :اذا قررت منى ترجع انتي يكون الج بيت غير هذا البيت لأن هذا البيت بيت منى
وجودج بيه مؤقت
اجبت :يعني عندك امل اترجعهة
اجاب بهدوء :اتمنى اريحهة واطلك بس ما اكدر حاولت ما كدرت صعب عليه هواي
ومراح أيأس وراح ارجعه
بس رجاءاً شغل الضراير ما عندي استعداد يكون في بيتي
اجبته بصدق :مراح يصير كل وحدة بيته شلون راح يصير مشاكل
ليقل هو :سماهراني اسفة اذا اجرحج بتصرفاتي واذا اجاج جرح من جهتي كوني على ثقة اني ما متعمد اذيتج
حياتي قبل لا ادخليهة كانت بالبداية ودخولج بيه كان غلطة ما كدرت اصلحه
قاطعته بحدة :همام كافي والله كافي مو ذنبي الي صار مو ذنبي حياتك مخربطة قبل دخولي
اني ما ألي دخل بخربطته الحالية
حاولت اصلح بينك وبين منى وما فاد شنو اكدر اسوي حتى نعيش مثل أي اثنين مزوجين مليت هاي الرسمية وهاي الحقوق المجبر على تنفيذهة
اجاب بحدة :اني محد يجبرني على شي ما اريده هاي شغلة
ثاني شغلة الرسمية بالعشرة تنتهي واذا انتي تكدرين تنهين الرسمية بساعة
فأحب اكلج مو كل الناس سماهر اكو ناس محتاجين سنة حتى ينهون الرسمية من حياتهم واكو ناس حياتهم كلها تكون رسمية
اعتدت على كلام كهذا بين فترة واخرى ودائما اردد بيني وبين نفسي :كلام الحق ميزعل
وكلام همام حق الغرض منه تجريحي بس يبقى كلام صحيح ولن استطيع إنكاره
قلت :وسماهر ما خدعتك عرفته وهي تلغي الرسمية بساعة وخطبتهة كدام الناس وهي الي ازوجته بذيج الطريقة وتعرف ادق ادق تفاصيل حياتهة
انت ما انخدعت
اجاب بكل برود :وانتي هم ما انخدعتي من اول يوم كتلج اني أحب منى والي بينه مشاكل طبيعية وتنتهي
وموضوع الرسمية عوفيه هسة وأقبلي بالواقع الي انتي عايشته يمكن يتغير ويمكن لا
اجبت بهدوء :قابلة اني بس اتمنى الرسمية تبقى بس التجريح والتذكير بالماضي هو الي ينتهي
حاول المقاطعة ولكني قلت بأصرار :اني اعرف ماضي سماهر كلش زين ما احتاج احد يذكرني لأن بكل دقيقة يمر شريط حياتي كدامي وبكل دقيقة ألي بيتك احس اني مديونة الك بحياة سماهر الجديدة وبالنظرة الجديدة الى بعيون الناس لسماهر
يمكن نظرة الناس متغيرت لأن هم ميعرفون سماهر مثل ما انته واهلهة والي ازوجتهم يعرفوهة
بس صدكيني كنت احس نظرات الناس مثل نظرات اخوتي
احسهم يعرفون كل شي عن سماهر الي اهلهة يحملوهة مسؤولية ضياع شرفهة من غير ذنب
هذا كل انتهى بعد زواجي منك
لهذا السبب اني راح اتحمل كل شي بيتك لأن اخيرا حصلت على احترام الناس
اخذ مفتاح السيارة وخرج من غير كلام
بقيت خلفه اتودد لهديل لعلي أحظى بحب إخوتها عن طريقها
جو اسري يملؤه الحب هذا ما انا أريد الحصول عليه





&&&&&&&&&&&&&&&&&&&&&&&&&&


حامل بالشهر السادس جنس الجنين لن أقوله سوف ادعه مفاجئة حتى الد
عندما شككت بحملي وقبل ان اخبر همام بذلك اليوم المشئوم رسمت بمخيلتي صورة جميلة لليوم الذي سوف اخبر همام بجنس الجنين

وبما ان هذه الصورة لن تتمثل على ارض الواقع لذا قررت ان احتفظ بهذا الموضوع لنفسي فقط ولن استسلم لملحة هديل وخالد وحسام

ولن استسلم لاي احد بعد الأن سوف ارسم شخصية أخرى لمنى شخصية تقول لا ولايهمها سوى خالقها ولن تلتفت لكلام الناس
قد تقولون اين الحب
اقول لكم سوف اعيش الحب بكل طقوسه مع من احتضن بأحشائي الحب لن ينحصر بالعلاقة بين الرجل والمرأة ة الحب هو شعور يملأ القلب ويهبه القلب لمن يشاء
حتى الجماد ممكن ان يحظى بحب هذا القلب
حتى النبات ممكن ان يحظى بحب هذا القلب حتى الحيوان ممكن ان يحظى بحب هذا القلب
المهم قلب مملوء بالحب

تسألوني عن همام لن اقول لن يبقى له بالقلب مكان فهو والد ابنائي الذين من رحمي والذين هم تربوا على يدي
لذا فله كل الحب والاحترام
اما ارتباط زوج وزوجة فهذا موضوع لن اقدر عليه مطلقا تحملت الكثير ولن استطيع ان احتمل اكثر خاصة بعد أن تحولت حياتنا الى حياة زوجية فعلية 11 عشر يوم وبضع ساعات كانت كفيلة بتغيري تماما
ما كنت أتحمله سابقا لم اعد أتحمله اليوم
اشعر بأني شخص آخر وأتعجب من قوة تحملي السابقة خاصة وأنا أتقبل زوجات همام المتكررة
كنت في قمة اندماجي بوضع نموذج لأسئلة مطلوب مني فورا لطلبة الصف الثالث المتوسط لتهيئتهم للأمتحانات النهائية
عندما قالت هيام :تدرون ام ياسين السنة الجاية راح ادوام بمدرستنة
لتقول بعدها :درست وياه بمدرسة التواصل كانت ايام كلش حلوة وهي انسانة بكل معنى الكلمة وكريمة وبنت اصول
شاركتها بعض المدرسات الواتي دفعهن الفضول لمعرفة ام ياسين اكثر خاصة بعد مفدمة هيام الغزلية
لتجيبهم هيام وهي تلتفت لي قائلة :سألوا ست منى كانت صديقته بالجامعة واول تعينهم سوو
ومن ازوجت ام ياسين انقطعت العلاقات
لتسألني بوقاحة :اكلج ست منى انتي انقلتي قبل زواج ام ياسين لو بعدها
اجبت بكل برود :لا هي ازوجت وانقلت للتواصل وبعدها ما جمعتنه مدرسة سوى
وقلت بعدها بحدة :ما انقطعت العلاقات ابد بسس التواصل قل
اجابت بكل وقاحة :بس هسة انقطعت العلاقات اكيد اذا خطوبة ابو ياسين الج قبلها ما قطعت

العلاقات اكيد زواج رجلج من اخت رجلهة راح تقطع العلاقات

اجبت بكل هدوء :والهج ست هيام اذا انتي هوياتج تدخلين بحياة الناس الشخصية
فأحب اكولج حياتي الشخصية خليهة بعيد عن هوايتج لأن متفيدج
وقبل أن تتفوه بكلمة
قلت :اسمحولي عندي شغلة وي المديرة وذهبت الى الأدارة وسلمت نموذج الاسئلة
وعدت الى ادارة المدرسات
لتستلمني هيام بعتاب مصطنع قائلة :ست منى على كيف احنه نخاف على البيبي الى اجه بعد 14 سنة زواج
مو ست منى
اجبته بكل برود :والله انتي ادرى اني مراح اكون مضبوطة بشكلج انتي الى تراقبين الناس حتى تعرفين تفاصيل حياتهم
اجابت بحدة :شنو قصدج ست منى
اجبت بهدوء :ست هيام شنو تستفادين وانتي تجمعين معلومات على الناس وتذبيهة بوجههم حتى تجريحيهم
شنو راح يرجع الج
اذا ما تعرفين شنو راح يرجع الج
وقبل أن تدافع عن نفسها
قلت : اني اكولج راح تحصلين كره الناس وقلة احترام منهم الج ومشاكل اجذبيهة لوسط بيتج
ست هيام نصيحة من اخت كبيرة اهتمي بيتج بحياتج وعوفي الناس ربهة اعرف بيه
اجابت :ست منى اني ما مدخلة بحياة احد الناس تحجي واني اسمع
اجبت بكل برود :الله يهدي الناس
ورجاءاً حياتي الشخصية حتى اذا سمعتي خبر من الناس اتمنى ما تذكري كدامي
وبعدها قلت وانا ارتب حقيبتي استعداد للخروج :ممكن
اجابت بعد أن حركت عينيها يمين يسار :ممكن ست منى واسفين على الازعاج
قلت وأنا ارتدي عبائتي :ازعاج اليوم انتهى بس اتمنى ميتكرر
وقلت :مع السلامة

توجهت الى المنزل برفقة مناف الذي اصبح شخص مختلف تماما
نعم كان اخ حنون ويهتم بمصلحة اخواته اليوم اصبح اخ حنون ولايقبل بأذية اخواته حتى وأن هم ارتضوا بها
كم شعرت بالغبن وانا اره يتحضر لحضور زواج همام مدعيا واجب القربى و واجب الصداقة
بدوت امامه متفهمة واني داخلي ممزقة
وحاولت طرد الافكار من رأسي ولكن في تلك الليلة كانت تحوم حولي كالغربان التي تعكر بسوادها زرقة السماء
انتهى ذلك اليوم بمشكلة افتعلتها مع مناف حتى انفس عن غضبي وتقبلها برحابة صدر كبيرة
وتفهم وضعي
اما اليوم فهو حارسي الخاص الذي يرفض اقتراب همام مني ان لم اسمح له بالاقتراب
وسائقي الخاص الذي يسعى لراحتي طوال الطريق
رغم قلة استخدامه اليومي للسيارة الا انه اليوم اصبح يستخدمها كثيرا لتواجدي معه
وحرصا منه على سلامتي وسلامة من في بطني
وأنا احاول أن اكون مفيدة بحياته
اغسل ملابسه وارتبها
واعد الطعام واحرص على تناوله سويا
وصلنا للمنزل وبمجرد أن انتهيت من إبدال ملابس واخذ حمام سريع لان لهب الصيف قد الهب جسدي
توجهت للمطبخ لكي ارتب الغداء الذي حضرته قبل أن اذهب الى المدرسة
اما مناف فلقد ذهب لكي يشغل مولد المنزل لان الكهرباء بدأت تتبخر لتأثرها بحرارة الجو
الله يصلح حال العراق نحو الافضل
اتممت سفرة الغداء مع انتهاء مناف من تشغيل المولد ومبردة الهواء التي تشتغل بتيار المولد
وتنعش المنزل قليلا ونستعيض بها عن مكيفات المنزل
جلست الغداء مع مناف تكون مشبعة بالأحاديث المختلفة
بدأ الكلام قائلا :ثامر يسلم عليج ويكول ليش متجي للسليمانية تولد
عدهم الجو حلو والوضع الطبي كلش زين والكهرباء رتبوا امورهم وموالدتهم تشتغل بأستمرار
اجبت :مناف والله ما اكدر اذا تريد تكضي الصيف يم ثامر
روح واني اروح بيت ام علي
اجاب بحدة :انتي شنو قصتج اني احجي عليج انتي تحجين عليه
اني اروح لبيت ثامر بس مو هسة من تروح ست صفا للعمرة
طبعا ست صفا قالها باستهزاء
قلت بأبتسامة :مدكلي شنو قصتك وي هاي المسكينة والله البنية خوش ابنية وتستاهل كل خير
اجاب :أيييييي هذا المطلوب تستاهل كل خير بس فدوة لعينج الخير مو من جهتي
انتي وأبن اخوج طلعوني من دماغكم ودوروا الخير لصفا بعيد عني
قلت ضاحكة :انته متعقدة منه لو من الزواج
نظرة لي نظرة متفحصة وبعدها قال :تدرين كل نماذج الزواج الي داير مدايري متشجع
قلت مقاطعة :معليك بكله وركز بنفسك وخلي تجربتك ناجحة
اجاب بهدوء :الله كريم
تغلغل الفرح الى اعماقي وقلت :اقتنعت تزوج مناف صدك تحجي لو تشاقة
اجاب بهدوء :دا افكر بس لاتلحين عليه وكل 3 دقائق اتجيبين طاري صفا
اني من اقرر راح اجمعكم وأكللكم اخطبوا فلانة بس هسة ما اريد احد يحجي يوياي خلوني افكر
قلت بفرحة :يمعود فكر على راحتك بس لا اطول بالتفكير فدوة لعينك
اجاب بضحكة :لا مراح اطول العمر ميتحمل اطول
اجبت بهدوء :الله يطول عمرك بطاعته
اجاب :الله كريم
بعدها قال :همام اتصل اليوم يسأل عليج وعلى صحة الي بيطنج
قبل ان اتفوه بكلمة قال :منى همام اتغير انطيه فرصة
قلت بكل هدوء:المشكلة اني ما اكدر انطيه فرصة
والله مناف اتمنى ارجع منى الي قبل بس حتى انطي همام فرصة مو على مودة لا على مود الي
بطني بس ما دترجع منى القديمة ومنى هسة مصرة مترجع لهمام الا اذا انت طردتني من البيت
رمى ملعقة الطعام بقربه وقال :شنو هذا الحجي شنو اطردج هذا بيت ابوج والج بيه مثلي مثلج
ومطلعين منه الى اذا انتي ردتي تطلعين
وعوفي هذا الحجي وفكري زين بمصلحتج ومصلحة الي بطنج اذا مصلحتكم تبقين بيت ابوج
ادليلي محد يطلعج واذا مصلحتج ترجعين لهمام اني اتكفل بسعادتج بيت همام ومحد يدوسلج على طرف
قلت :بيت همام بعد ما الي سعادة بيه
اجاب :اذا ردتي ترجعين راح يطلع مرته بيت ثاني ويبقى البيت بيتج ومتقرب الج
قلت :المشكلة مو بيهة والله مو بيهة الله يخليك مناف سد الموضوع همام صفحة انطوت مراح افتحه
اجاب :يعني شنو
قلت بتردد :اريد اطلك
قال بحدة :منى طلاك ماكو
حاولت المقاطعة ولكنه قال :طلاك ماكوو شنو نكول للناس رجلة ازوج عليه طلكناها وياريت اول مرة يزوج
الا اول مرة يزوج زواجة عدله ترفع الراس

ضحكت بيني وبين نفسي
دائما تقاس الامور بظواهرها
زواج همام الحالي بالنسبة للجميع زواج موفق ويرفع الرأس
اما في باطنه فزواج متهور من مقتنصة فرصة للنجاة
تكلم مناف قائلا :شو صفنتي ما عجبج الحجي
منى شوفي سماهر بنت اصول مراح تنزل لمستوى واطي وتسوي مشاكل بينكم وهمام يحبج ويحترمج والي بطنج راح ينطيج حقوق مضاعفة
فكري بالموضوع
قلت بأصرار :شوف مناف اني ادري راح تظل تلح عليه حتى ارجع لهمام بس لاتضوج اذا تسمع دائما نفس الحجي
اني رجعة لهمام مراح ارجع
اجاب :والي بطنج اشلون بيه
قلت :اربيه احسن تربية مثل ما ربيت اخوته واذا اخوته عدهم ابو واحد هو راح يكون عدهة اربعة انته وهمام وخالد وحسام
مناف صدني فكرت بالموضوع واكدر ادبر نفسي
كان الصمت والاستمرار بالطعام جوابه

اما انا فبقيت اكرر بيني وبن نفسي لن اعود واستطيع الاستمرار وحدي
نعم استطيع ان اعيش بعيدا عنه وبعيدا عن حبه وعن حنانه سوف اعد بيئة حب وحنان ناجحة مثلما اعددت بيئة دراسية واجتماعية ناجحة




&&&&&&&&&&&&&&&&&&&&&&&&

اخيرا لم اعد اشعر بالغثيان اخيرا استطيع ان اسهر ليلي برفقة الأصدقاء

اخيرا أضيئت أنوار منزلي ليلا لتخبر كل من يمر من الباب ان هناك حياة في المنزل

اخيرا اصبح لمنزلي ابواب في منتصف الليل يطرقها الطارق وهناك من يفتح له الدار

اخيرااااا استطيع ان اتنفس هواء نقي
اخيرا استطيع ان اقف بين يدي خالقي واني احمل بين اضلعي قلب نقي

دخلت المقهى الذي اعتدت منذ شهر الجلوس فيه لان اغلب من اعرفهم يجلسون فيه ليلاً ويتمتعون بالسمر على نهر دجلة تحيط بهم الأضواء الخافتة التي تنعكس على مياه النهر وتعطي للنهر جمالا فوق جماله
القيت سلاما عاما
فردوا الجميع السلام لان اغلب الموجودين اما زملاء او تلاميذ درستهم ذات يوم
توجهت الى حيث ارتفعت الايدي التي تطلب مني الجلوس بقربها
معاوني ابو زهراء ومدرس الاحياء وليد ودكتور محمد ابن عمة علي
القيت السلام وجلست
توجهت بالحديث المازح لمحمد قائلا :يعني انته تجي اهنا على مود وليد لو علمود خوالك
اجاب محمد بأبتسامة :لا والله على مود هذا المكان الحلوو الا وليد لو بفرنسا ويدزلي فيزة بلاش ما اروح اله واسطر راسي بسوالفه
انطلقت الضحكات والتعليقات على وليد
ليقول مدعيا الغضب :مو صوجك صوج الى دلاك على هذا المكان الا انته سنين تدرس بالخارج شلون تندل لو ما اني
ليقول بطريقة تمثيلة :سوي خير وذب بدجلة متشوف دجلة ام الخير هن كثر ما اذب بيه خير
اجاب محمد :راح تحملني منية (بمعنى تتفضل علينة )
دجلة دجلتنة كلنة مو بس دجلتك همزين النهر من حق الشعب
كان من زمان منعت الناس منه مدام الخير الي بيه حضرة جنابك رامي بيه
اجاب وليد :ليش اني محمد اني وليد ابو الكرم
اعرف وليد جيدا انسان كثير المزح ولكنه يستطيع ان يتحمل المسؤولية تمنيته زوجا لهديل لاني عرفته طالبا مراهقا وشابا بمهنة التدريس تربى على يدي واعرف اهله جيدا
انا واثق من اخلاقه تماما
انخرطنا بأحاديث متشعبة سياسية واقتصادية و أوضاع التدريس وما استجد بها
الى أن انظم لنا زياد
وبدأ وليد بأغاضته كعادته دائما
يعشق إثارة أعصاب زياد على الرغم من حدة وليد بالمزح ألا أن زياد نادر ما يستفز
سبحان الله كلاهما غايته منار فمن سيحظى بها

أجواء رائعة من المزح والجد والضحك
انتهت بتعكير مزاج غير مقصود
عندما قال وليد :استاذ مناف اريد اطلب منك طلب ثاني مرةاطلبه صح المكان مو مناسب بس الوجوه الطيبة الموجودة ويانا اريدهة توكف وياي واذا قبلت اجيبلك عشيرتي كله للبيت

فهمت الموضوع وقلت :وليد سد الموضوع مو وقته
ولكن محمد الذي يجهل الموضوع تماما قال :استاذ مناف وليد اني اكفله بأي شي يريد
صح ما اعرف الموضوع شنو بس ابو خالد يستاهل من يكفله
اجاب وليد برجولة :والنعم بيك ابو جاسم
ليتشجع وليد ويقول :اعيد طلبي واريد بنة اختك الله يستر عليه على سنة الله ورسوله وهاي الوجوه شاهدة عليه اذا اجت الموافقة منكم شتردون اني حاضر
نظرت بالمتواجدين ووجدت الاصفرار واضح على وجه محمد والاحمرار نتيجة الغضب المكبوت واضح على وجه زياد
اما ابو زهراء فلقد علق قائلا :ابو خالد عرفت تختار نسب ينشره بالمال
اما أنا ففي موقف لا احسد عليه ابنة اختي المتزوجة تخطب مني امام زوجها الذي يتهرب بشتى الطرق من اكمال طلاقها تارة ايفاد وتارة لا يرد على الهاتف وتارة تدعي والدة الفتاة المرض وتارة تدعي والدة زياد المرض ليبقى الموضوع معلق حتى اشعار لن يحدد مطلقا
قلت بعد أن استغفرت الله بيني وبين نفسي :وليد الموضوع مو هشكل انته ما انرفضت المسألة بيهة مشاكل عائلية
اجاب وليد بثقة :كلي شنو المشاكل اكو احد من أعماممها يرديه اني مستعد اروح اله واخلص الموضوع وياه لو يزوجهة هو
لو يكلي شايف الخير بيه
قاطعه زياد بحدة :انته شنو هاي الملحة يكلك عنده مشاكل عائلية ليش اتخلي نفسك بالنص متستحي
وضع محمد يده على كتف اخيه محاولا تهدئته قائلا :زياد على كيف وليد ميقصد
اجاب زياد بحدة :شنو هو الي ميقصد كوم (أنهض)من خلقتي انته وصديقك لا هسة اكلب (اقلب)المكان على روسكم ناس متستحي
نهرته قائلا :زياد كافي
سكتت على مضض وسط نظرات وليد المندهشة
الذي قال :زياد اذا اتريد البنية تره اني اسفة ما كنت ادري
قاطعه زيباد بغضب :شنو اني اريدهة وانته اتريدهة هي سيارة لو جماد لو شنو بالله
استحي على روحك تحجي بأشياء متخصك براحتك
اول مرة عبرته الك وكلت ميخالف هاي ثاني مرة تعيد الموضوع كدامي بلا خجل ومستحة
اجاب وليد بغضب :ليش استحي شنو مسوي اني لا عيب ولاحرام الواحد يخطب واذا انرفض من حقة يعرف السبب
اجاب زياد بحدة :اني اكلك السبب
السبب انته فد واحد مو كفوو الواحد ينطيك مرة الناس اله الظاهر ميدرون بجنابك فاسد الشبكة العنكبوتية
ثارت اعصاب زياد ومعها ثارت اعصاب وليد ووصل الامر الى تشابك بالايدي
وتطلب منا ابعادهم خارج المقهى الى حيث موقف السيارات حتى لا تتحول المشكلة بينهما الى فضيحة ضحيتها منار
اخذ ابو زهراء وليد وابتعد به بعيدا عن زياد الذي منع من الحركة من قبلي وقبل محمد
وهو لايكف على توجيه الكلام ل وليد الذي ليتفت له بغضب وابو زهراء يحثه على المسير الى أن ابتعد عن انظارنا
وهدئ زياد قيلا وسط نظراتنا اللائمة
قلت بحدة :عجبتك هاي الفضحية
اجاب بغضب :هاي ثاني مرة تنخطب زوجتي كدامي ومن نفس الشخص ولمطلوب مني اسكت واتحمل كافي كافي
لوين اظل اتحمل
باجر اروح لبيتكم واطلكه واخلص من هذا الضغط
قلت بحدة :واحنه ننتظرك سيد زياد
نظرة لي نظرة حائرة ورفع رأسه الى السماء واخذ نفس قوي
ليقول محمد :صلوا على النبي
قلنا بصوت واحد :اللهم صلي على محمد واله محمد
قال محمد :زياد استهدي بالرحمن ماكو داعي للعصبية
اجاب زياد بحدة :موالي ايده بالمية مو مثل الي ايده بالنار
وتوجه الى سيارته بعد أن قال :باجر كل شي ينتهي لأن بعد ما اتحمل ضغط الاعصاب الى
انا عايش بيه وروحوا زوجوها لوليد الى فساد مستتر لان شغله كله بالنت الناس تحكم على الي تشوفه بعيونه ميدرون اكو مصايب اتصير ومحد يشوفهة

اما محمد فبقى في مكانه
والتفت نحوي قائلا :استاذ مناف الله يخليك لاتاخذ بحجي زياد
زياد كلش مضغوط عليه من البيت لأن امي رافضة يطلك
ومنكم لأن علي يلح على الطلاك وهو حياته ميعرف بيه تستمر وي منار لو متستمر
زياد ما متعود على هيج ربكة بحياته
حياته كلهة منظمة بس بشغلة منار يحس حياته كلش مخربطة
قلت:محمد محد جبره خل يطلقك ويفضه
ابدا ما كنت اتخيل زياد العاقل تطلع منه هاي التصرفات ويتهم الناس بالباطل
وليد اني ربيته على ايدي يتهم بالفساد بلا دليل شنو يسموهة
لم يعلق محمد على الموضوع
ولكنه قال :امسحه بوجهي واخذ كلمة رجال مني كل شي راح ينحل بأذن الله بس انته انطيني فرصة ولاتاخذ كلام زياد بحالة عصبية بشكل جدي
قلت بهدوء :الله كريم
وتفرقنا أنا سيرا على الاقدام الى منزلي
وهو توجه الى حيث يضع سيارته
السير على الاقدام يعطيك فرصة للتأمل
ياترى هل ما قاله زياد عن وليد صحيح لا املك معلومات واضحة عن الانترنيت سوى انه تلك الشبكة التي تتيح ايصال الرسائل بسرعة كبيرة
كيف يكون الفساد فيها هل هي علاقات كعلاقات التلفون ولتكن شباب وتهور وبعد الزواج ينصلح حاله
بس شنو يقصد زياد بقوله فساد محد يشوفه
اربكتني كلمات زياد واخذت افكر بها واعيد النظر بتقيمي لوليد
هل وليد نسخة مني عابد النهار سكير بالليل
زياد زرعت بذرة الشك وانا من سوف يتحمل عبئ ثمارها


&&&&&&&&&&&&&&&&&&&&&&&&

هذه هي المرة الأولى التي ارى بها زياد بمثل هذه الأعصاب الثائرة
وليد دائما يستفز زياد ولكنه لم يصل معه حد يفقد سيطرته على اعصابه
ما حصل اليوم لا ادري من ألوم به
ألوم زياد لأنه لم يتحكم بأعصابه ام ألوم وليد الذي خطب زوجة زياد هو لايعلم انها زوجته
المشكلة كلاهما على حق وكلاهما لهما معزة في قلبي
فالاول اخي والثاني رفيق دربي
دخلت المنزل ووجدت زياد متمدد على اريكة الصالة ويضع يده على راسه
قلت بهدوء :السلام عليكم
اجاب ببرود :وعليكم السلام
وقال بعدها :ولاكلمة بالموضوع ترة الي بيه كافيني وزيادة
فلا تزيد عليه
قلت :هو سؤال واحد
اجاب :ولا نص سؤال محمد اعتقني لوجه الله
لم ابالي به وقلت :اتحبه
ازاحه يده من رأسه وقال بحده :لا احبه ولا تحبني باجر اطلكه واريح دماغي
قلت بهدوء :انت ادكول اريد ارتبط بيه على مود امي مو
اجاب بهدوء :اي
قلت بكل برود وانا امدد جسدي على الاريكة المقابلة لها وادعي الاسترخاء :بسيطة طلكه واني ازوجهة وأنت ازوج هديل بنت همام هي هم تعتبر مثل بنت اخوهة لامي
وقف بذعر وقال بغضب :اذا خطبتهة اعوفلكم المنطقة وبعد محد يشوفني
اجبته :ليش تلوم علي
اجاب :محمد الله يخليك موضوع علي وزينة انتهى وبتهم راح اطلكه
قلت :واني بنت خالي وراح اخطبهة شنو المشكلة اني او غيري البنت اول وتالي راح تزوج
عاد للاستلقاء وزفرة زفرة غضب وصمت
قلت :اتحبهة
اجاب بغضب :اي اتورطت وحبيتهة اشلون ما اعرف
قلت :ليش متحجي وياه بالتلفون
اجاب بحدة :انته اتخبلت لو الغربة اثرت على عقلك
اجبت :ليش عيب لو حرام
اجاب :لا عيب ولا حرام بس اني ما اريد استغفل علي ولا اريد اخليه بموقف تستغفل بيه اهلهة على مودي
لم اقتنع بكلامه وقلت :خابرهة على الاقل حتى تتعود عليك خليهة تعرف انت مراح تتخلى عنه
اشغل افكارها بيك
اجاب بهدوء :تعرف
اجبت بلئم :يعني تتصل بيه
اجاب بهدوء :مرة وحدة بس ومو اني اتصلت هي اتصلت حتى تطلب مني اطلكه لخاطر علي
قلت :حلو هي اتصلت حتى توقف وي اخوه انته اتصل بيه وبين الهة انته واقف وياه ومراح تتخلى عنه لأن اكيد من زمان اتصلت بيك وهسة متعرف شنو وضعه وياك اتصل دز رسالة تأكد بيه موقفك السابق شنو خسران
بالعكس تربح انو افكاره تتوجه الك بينما اذا ما اتصلت اكيد البنية اتحاول تنساك على اعتبار انته راح اطلك
نظرة لي دون كلام
قلت :ها راح تتصل
قال بعد أن نهض وتوجه الى غرفته :ميخصك
عرفت حينها انه سوف يبدأ خطوة جديدة في حياته
رغم الشكل الرجولي والجرئة في مواقف العمل واتخاذ القرارات الى انه في عالم النساء خجول لابعد الحدود ويحسب الف حساب لكل خطوة يخطوها
اتمنى له خطوة موفقة في حياته
واتمنى لنفسي ان اجد من اخطو نحوها خطوة موفقة
فيا ترى من هي


&&&&&&&&&&&&&&&&&&&&&&&&&&&&

احاول اقناعها ولكنها لاتقتنع مطلقا دائما تردد لن تكون سعيدا
واترقب اخبار تلك التي على حين غفلة سكنت اضلعي
صارحتها بمشاعري في اخر يوم من الدورة وطلبت منها ترتيب وضع البيت لكي يستعدوا لاستقبالنا خاطبين لها
رأيت القبول بعينيها قبل أن تقول :انا ما اكدر انطيك كلمة الموضوع كله بيد اهلي اذا وافقوا مراح اخالفهم واذا ما وافقوا هذا مو معناه انطيتك كلمة واخليت بيه
قلت :لا تبقين اخت عزيزة وغالية
جملة قلتها وأنا اضغط على نفسي ولكن كان لابد من قولها

واني لحد الأن لم ارتب وضعي
في كل مرة افتح الموضوع مع والدتي تفتح مواضيع نقاش مختلفة عن سابقتها
فبعد ان تجاوزنا وضعي النفسي وو وضعها النفسي
برز على السطح موضوع عدم تقبل والدتها لأهل زوجها
لتقول والدي بمحاولة الاثارة عاطفتي :يمة علي انته هل واحد وام سنا معروفة عدنه متحب اهل رجله بلا سبب تكرهم وهي ما عدهة علاقة بيهم
يمة البنية اكيد راح تتأثر بأمها
يمة على بختك اني اريدك ابو بيتي بعد ابوك وهذا البيت الك واريدك ابو لاختك ومتكطع بيه حتى اذا ازوجت
يمة سنا ما متعودة على هيج اجواء وراح اتبعدك عنا
قلت بهدوء :يمة وين اني وين شخصيتي وين تربيتج الي بهاي السنين كله يروح
مرة(امرأة) تجي بين يوم وليلة اتخليني اتخلى عن اهلي واضيع تربية امي وابيع اختي
اجابت بثقة :اي يمة اتسويهة انته مو اول واحد يزوج ويترك اهلة على مود مرته
قلت ضاحكا محاولا امتصاص غضبها :يمة زوجتيني وخليتني محبس باصبع مرتي وضاعت الرجولة وعفت البيت واني بعدني خطوبة ما خطبت
اجابت :اخطبلك هديل بنت همام جمال واخلاق كلش كافي تربية منى خالتك
قلت :زين متخافين تطلع بيه عقدة نفسية من سوالف ابوهة
متخافين تطلع على خالته وتخليني اعوفج واعوف اختي
وبعهدها قلت بهدوء :يمة اتوكلي على الله وعوفي وسوسات الشيطان

قالت بحدة :مراح اغير رأي سنا لا
قلت :واني غير سنا مراح ازوج
اجابت بحدة :هاي انته من تريد شي مثل الجهال اجلب بيه
قلت :هشكل اتشوفيني يمة
اشاحت بوجهها عني وتوجهت لغرفتها
وتركتني وحدي ابحث عن وسيلة لكي اقنعها
خرجت خارج المنزل وركبت السيارة وتركتها تقودني الى حيث تريد فأنا لا اعرف ما اريد
قادتني الى جسر منطقتي منتصف الليل ظلمة حالكة على الجسر الإنارة مفقودة لانقطاع التيار الكهربائي
انارة سيارتي كشفت لي عن سيارة تقف على جانب الطريق
قررت أن اعمل خيرا رغم صعوبة الوضع وعدم الامان وحقدت من كل قلبي على من سبب هذه الحالة لبلد الشهامة العراق وقطع سبيل المعروف فكثرة القصص التي تبين اساليب الاختطاف جعلتنا نتخوف من مساعدة من يطلب المساعدة على قارعة الطريق
دنوت من السيارة الواقفة وترجلت من سيارتي وتوجهت نحوهم قلت :السلام عليكم خير تحتاجون مساعدة
اجاب الشيخ الذي يقف بقرب سائق السيارة الذي يحاول اصلاح سيارته المتهالكة :وعليكم السلام الله يسلمك ابني السايق خابر اهلة وراح يجون يصلحون السيارة
ليقول السائق بحدة :عمي انته اجرة خسرانة اتوكل على الله وي الرجال وعوفني بهمي السيارة

كام المحرك مالته والي يجيني راح يجرني حتى اوصل السيارة للبيت وادبر روحي اشلون اصلحه
ووضع يده في جيبه واخرج 5 الاف وقال :ها ي فلوسك وعلى الله العوض بس نزل اهلك من سيارتي وكفوني شركم بهاي الليلة

انكس الرجل رأسه وذهب لكي يخرج اهله من السيارة
قلت للسائق :اشلون تريد الله يوفقك وانته كسرت بهذا الرجال بنص الليل ما فكرت وين يروح
اتخيل اني ما جاي أ شلون تعوفه بهذا لليل وحده هو واهله
اجاب ببرود :وليش اتخيل شي ما صاير انته اجيته اخذه والتوفيق الي يجي من وراه ما اريده تركته الك
وتركني وجلس في مكانه خلف مقود السيارة منتظرا من يساعده
توجهت الى سيارتي وقدمتها لكي تكون بقرب الشيخ ومن معه وفتحت الباب وقلت له :اركب عمي اني أوصلك
اجاب بصوت خجول :عمي وين دريك
قلت :عمي دربي هو دربك واذا متركب وياي اني ابقى وياك الى أن تجي سيارة تنقلك
لو تجي وياي لبيتي والصبح اوصلك لبيتك
اجاب بقلة حيلة :ابوي انته اني اريد اوصلل للـ......
اجبت بنخوة :ابشر اصعد انته واهلك

وبالفعل توجهت الى حيث يريد وتشعبت الاحاديث وعرفت قصة الشيخ ومن معه وحمدت الله على نعمة العافية
ابنة ابنه تعاني من غدة منعتها من الكلام وهي بحاجة لعملية لكي تزال الغدة وتستطيع الكلام
وقدم لمنطقتي لسؤال اهل الخير لمساعدته
وقبل أن نصل الى حيث يريد سألته محاولا معرفة اين يقع المنزل
قلت :عمي وين بيتكم بالضبط حتى اوصلك يم الباب
ولكن لا اجابة
كررت السؤال مرة اخرى
ايضا لا اجابة
وضعت يدي على يده وجدت هناك برودة في إطرافه وضعتها على جبهته وجدت جبهته تشتعل نارا
ادركت ان الرجل ليس بخير فتوجهت الى المشفى بأقصى سرعة
وسط صرخات الفتاة الغير مفهومة ومحاولتها منعي من القيادة
لا ادري ما بها لابد انها شعرت بالخوف لاختفاء صوت جدها الذي يشعرها بالأمان
بصعوبة وصلت للمشفى
وتناول الممرضين الرجل مني واخذوا الفتاة لتهدئتها فلقد كانت تصرخ وتشير بيدها نحوي بإشارات لا افهمها
بقيت وحدي انتظر من يخبرني عن وضع الرجل
لأفاجئ برجال بزي شرطة يقيدون يدي يتهموني بمحاول قتل الرجل واختطاف ابنته
أخبرتهم بالحقيقة ولكنهم لم يصدقوها
سحبوا رخصتي ومفاتيح سيارتي وهاتفي واقتادوني الى مركز الشرطة
ولاول مرة ادخل السجن مع من كنت اعتقد انهم مجرمين
اول الامر كنت في حالة رهبة وتخوف وخاصة وأنا استذكر كل الافلام التي تحكي عن السجون وما يحصل بها
توجهت الى ركن منزوي وانا في حالة استعداد لاي طارئ
لافاجئ بعد ذلك بأن اغلب الموجودين احضروا لانهم مشتبهم بهم
تخيلوا احد الموجودين اقتيد للسجن لانه تلقى اتصال هاتفي من رقم مجهول بالنسبة له
وتصادف ان صاحب الرقم قتل واخر شخص اتصل به هو هذا الشخص الذي لا يعرفه
هو متهم بالقتل لانه اخر شخص تم الاتصال به وهو بالسجن منذ ثلاثة اشهر والتحقيق لايتوقف معه دون نتيجة ترتجى
وذلك الذي اقتيد للسجن بسبب ذهابه لبيت عمه بعد أن اخبروه ان هناك مشكلة في بيت العم ليدخل البيت ويفاجئ بعمه مقتول
اقتيد للسجن واتهم بقتل عمه العجوز ولا يوجد دليل سوى دخوله المنزل
وغيرها غيرها
في هذا السجن صحت المقولة التي تقول :يامة بالسجن مظاليم

اعلن الفجر عن قدومه بأذان الفجر الذي شرح النفس توجهنا للوضوء وأأمنا ذلك المتهم بمقتل عمه دون ذنب
انهينا الصلاة بخشوع تام
وتوجهنا كل الى مكانه تقاسمت الفراش مع من أأمنا في الصلاة ودخلت بنوم عميق

صحوت منه على صوت الشرطي وهو يخبرني بأن الضابط يريد مقابلتي
اقتادني الى غرفة القائد :دخلت بثقة البرئ :وقلت :السلام عليكم
اجاب بهدوء: وعليكم السلام أتفضل اخ علي
قلت بهدوء :زاد فضلك
سألني عن اسمي الرباعي
فأجبته بكل هدوء
وجدته ينظر لي بتمعن بعد معرفته الاسم
وبعدها قال :اهلك يعرفون
قلت :اشلون يعرفون وانتوا اخذتوا تلفيوني
قال :تحب ابلغهم
قلت بدهشة :جضرتك تعرفني
اجاب بهدوء :اني ماهر ألــ
هذا ما ينقصني زوج زينة وفي مثل هذا الموقف
اعانني الله وسهل امري

&&&&&&&&&&&&&&&&&&&&&

اخبرتها بما دار بيني وبين علي
لتخبرني بأني فتاة سهلة يستطيع الشباب الضحك على عقلها
اخبرتها بأنه عاملني بأدب وطلب مني تهيئة الوضع ليحضروا أهله لخطبتي
اخبرتني بأنه يختبرني ولأني وافقت على اقتراحه سقطت من نظره وتركني
ممزقة الافكار لا اريد أن تتسلل شكوكها الى رأسي
انتظره بلهفة أترقب إخباره بشوق وارفض إنصاف الفرصة لأن فرصته أجدها كاملة
اشعر به نصفي الاخر مثلما هو شعر بأني نصفه الآخر
لم يستطع قلبي تحمل ضغط اسراره وتحمل ضغط والدتي عليه فبحت بكل ما يجول بخاطري
لرفيقتي وصندوق اسراري هديل
اخبرتها بكل ما حصل لي بجلسة جمعتنا كعادتنة
لتتقول بدهشة :اتحبين علي زينة
اجبتها بهدوء :هو لو بعدهة علي زينة كان ما فكر يحجي وياي ويطلب هذا الطلب
اجابت بفرحة :والله حلو اخيرا عرس بالعائلة
قلت بأستهزاء :هو خل يخطب اول وخل خالتج تقبل ثاني شي بعدين يصير عرس
اجابت :تدرين خالتي وضعه عجيب اخر واحد اتوقعت ترفضه هو علي لي شو امه كلش صديقته شنو هذا التناقض
قلت بتأكيد :عليج نورر تناقض يشيب الراس
لتقول هديل بأستعجال :ما جاوبتيني اتحبين علي
بصراحة احترت بما اجيب
لذا قلت بصدق :شوفي هديل هو موحب يعني اكدرين ادكولين اقبل بيه شريك حياة والحب يجي بعدين مواصفاة شريك حياتي شفتهة بيه ومن نزوج اكيد راح اشوف بيه صفات فارس احلامي
اجابت بشرود :والله امرج عجيب الناس اتشوف صفات فارس الاحلام قبل صفات الزوج انتي قلبيتيه بالمعكوس
اجبتها :لان عندي الزوج الجيد لازم يأخذ صفات فارس الأحلام بالعشرة
اجابت وهي تضع يدها على رأسي مدعية الطبطبة عليه :الله يهديج ويعقلج
ابعدتها بمرح :ليش شايفتني مخبلة
اجابت بأستهزاء :لا عيوني ترحين فدوة للمخابيل والله يعين ابن عمي عليج
قلت :خل يصير نصيبي والله كريم
اجابت بثقة :يصير نصيبج لأن نيتج طيبة الله راح ينطيج على كدهة
اجبت بأيمان: الله كريم
لتغير هديل الموضوع تماما
وتقول :فتحي لاب توبج حتى تعلميني اشلون اسوي جداول تعبت حتى اتعلمه واستحي اسأل اكثر
فتحت الابتوب وكعادتي فتحت صفحة الفيس بوك ووضعت نفسي في حالة اتصال
ونسيت نفسي وأنا اعلم تلك الكسولة كيفية عمل الجدوال ولم انتبه أن هناك من يتكلم معي الا بعد ان لاحظت هديل ان صفحة الفيس بوك تشير الى رسالة جديدة
فتحتها على الفور ووجدت ددكتور محمد يقول :مساء الخير
اجبت :مساء النور اشلونك دكتور واشلون اخبارك بالعراق
اجاب بوجه مبتسم :بأحسن حال انتي اشلونج واشلون الاهل
اجبت :بخير
وأستأذن بلطف لانه يريد أن يتصفح بعض المواقع العلمية واسمي استوقفه ليلقي التحية
شكرته على لطفه واقفلت الصفحة تماما
والتفت لهديل التي تنظر لي بدهشة
قلت :شبيج تباوعين عليه هشكل
اجابت بحدة :هسة تحجين وي الرجال وسلام وكلام
قلت :شنو حجيت سلام بس لاغزل ولا غرام
اجابت :مو هذا يوصل لهذا
قلت :هديل فدوة لعينج اني مشرفة بمنديات عراقية وعربية واحجي وي اشكال الوان يعني كل واحد احجي وياه راح ينتهي حجينة بغزل وغرام شنو هذا الحجي الي مو منطقي

اجابت بعدم اقتناع :كيفج بس هذا شي ما اتوقع يعجب علي

قلت :وعلي ما اله علاقة بشي يخصني قبل لا ارتبط بيه
الرجال أتهمة اخلاق زوجته واني اخلاقي واثقة منه اذا هو ما واثق ماكو داعي يتقدم ويخطبني
اجابت بلوم :ها شبيج كلبتيه زعلة
قلت : هديل هاي انتي تكلين هشكل لعد الي ميعرفني شيكول
قالت :سنا احنه تربينة كل ولد وابنية يكلمون بعض يعني علاقة حب
اجبت :غيري هذا المفهوم ومو كل اصابيعج سوى
لتقلب الموضوع رأسا على عقب وتقول : تعالي كليلي هذا الحلو منو صورتة اجنن بيه شبه من ابوي
لتقول بضحكة :شسوي شكو واحد حلو اشوفه يشبه ابوي
اجبت :بس هو صدك يشبه ابوج اكلج هو ابو هم يقربلكم من العمام
اجابت بذهول :منو هو الي ابوه يقربنة
اجبت :محمد
اجابت :يا محمد
سألته بتعجب :معقول ما مسوولفتلج على محمد اقصد دكتور محمد
هذا دكتور محمد اتعرفت عليه بلأزمة الصحية مال بابا الله يرحمه وبعدين صار بينة كلام وعرفت هو ابن عمتج دجلة
شهقت هديل من هول المفاجئة
وقالت :شنو مكوشة على شباب العائلة كلهة علي ومحمد مدكولين هاي بنت خالتي المسكينة اخليلهة واحد
قلت بمرح :يمعودة محمد كله الج
وبدأنا سلسلة من الأحاديث المازحة الجادة
انستني الانتظار الذي طال وعيون والدتي اللائمة وذلك الذي يلح بطرق الباب ولا ارغب بالجواب


استغفر الله واتوب أليه

السلالالام عليك ورحمه الله

ابداااااااااااع ابداااااااااع البارت رهيييييييييب

سماااهر ماحبتها ااابد ولا تعاطفت معها حتى بجزء اليوم واحسن
يسوون فيها عيال همام لاوالاخت مسويه طيبه ورايحه تراضي ضرتها
لانها خايفه انها تطلب من همام يطلقها عشان ترض ترجع له فقالت
اراضيها واكسب ودها عشان لاتقلب علي

هماااااااام عساك بهالحال واردى اللحين عرفت قيمه منى ومدى حبها بقلبك
وانت من قبل طايح لك زواجات سريه

منى ماااااااااتنلامييييييين في الي تسوينه بهمام بس افضل انك ترجعين بيتك عند عيالك
وتحافظين على مكانتك في البيت لا تستولي عليها سميهر وترى البعيد عن العين بعيد عن القلب
ولا يهمونك هالفضوليات ولا ثرثراتهم الماصخه همهم بس القيل والقال

[COLOR="DeepPink"]مناااااف وبعدين ويااااااااااا شزف عااااااااد ترىمالك الا صفا طرت والا حليت ماراح نقبل الا بها
عشان تتزوجها ولاتسوي فيها انك ماتحبها ومدري ايش تراك ميت فيها بس تكابروتعال بعدين ليييه ماتصدق زياد في وليد ترى الناس مالهم الا الظاهر وما يعرف
بالخوافي الا رب العالمين

زياااااااد ياعمري انت والله الي يستوي فيك مو اشوي والارجال مرته تنخطب قدااااااام
عينه ولا يقدر يقول شيء هذا القهر بعينه واتحدااااااااااك تقدر تطلقها
واخيرررررررررا اعترفت بحبك لمنار والله ياحظهاوان شاء ربي يهدي سركم ويجمعكم مع بعض

علي لالالالالالالالاحرااااااااااااااام الي يصير والله انه مظلوم عاد اللحين كيف رااح يقولهم والاوضااااااع
هناااااك متلخبطه الله يعينه واتوقع ان زوج زينه راح يساعده وراح تتوطد العلاقه بينهم

محمد وهديل قصه حب جديده راح نسمع عنها قريب

ابلا تسلميييييييييين على البارت المثير لاخلاولاعدم[/COLOR]