كاتب الموضوع :
غيوم الشوق
المنتدى :
الارشيف
الجزء التاسع عشر
خالد بضحك .. أخس بنت خالي مهيب هينه
التفت راكان بحنق وعصبيه على أخوه وفي خاطره ضو تشب الحين ماعنده ذره رجوله يتكلم في محارمه قدام خويهم
والباقين صاروا يطالعون الي شافه خالد من بعيد الوضع عادي كأنهم طالعين العرق مايبين انهن مغرزات
ابو عبدالله وجاب العيد .. ذيبه وانا أبوك وخت ذيابه
ضحكوا الشباب وسط استغراب ظافر وكان ظافر ما يحب يتدخل في موضوع فيه حريم حرص منه على حفظ حرمة خوياه
لكن لابد يطالع وين ما شباب يطالعون وشاف السياره طالعه العرق وتوقيفتها توضح ان السايق مهوب بسيط
خالد باريحيه .. خالي منهي من البنات الي تسوق
ماخذا خالد إلا فنجال القهوه جايه
بشهقة .. وش فيك
راكان .. قوم صب لي
وشاف وجه اخوه درى انه جاب العيد
والعيال الباقين ماسكين ضحكتهم ويحاول عبدالله يغير محور الموضوع
عبدالله .. ظافر تخاويني انتمشى على السياره ونسير على قصرانا الي حولنا
ظافر .. شورك وهدايه الله
مساعد .. بخاويكم
طلعوا من المخيم كان الظلال ممتد وفيه نسمه خفيفه
ابو عبدالله .. خالد يابوي جب فرشه وفرشها هنا ظلال زين وهات القهوه والشاهي
خالد .. ابشر ولا يهمك
وصوت عبدالله من بعيد عند سيارته .. راكان تعال خاونا ريح اعصابك شوي
راح راكان معهم وهو وده يروح لراعيات العرق يهزئنه شوي مشى ومر على خالد بيبرد حرته شوي
راكان .. اغد مثل الرجاجيل يا ثور تكلم في شافاتك انت ما تستحي
خالد وهو يمشي بسرعه ويخلي راكان يحس ان الموضوع عادي
وراكان ناوي يربي خالد من جديد ويعلمه دروب السنع
:::::::::::::::::::::::::::::::::::::::::::::::::::::::::::: ::::::::
كانت متمدده على السرير وحاطه خداديه بحضنها والاب توب فوقها وتتصفح النت وتسولف على جواهر
مشاعل .. جواهر شفتي منتدى القمه وش كاتبين
جواهر الي تدهن ايدينها بالكريم بعد الكرف رفعت عيونها .. وش
مشاعل .. يوه كاتب موب صاحي يقول الشمس راح تطلع من مغربها عام 1450هـ اذا اقترب كوكب وامريكا هي الي بتتسبب فيه لانها بتطلق عليه صاروخ راح يجزئه ثلاث اجزاء اضعف جزء بيطيح على جزيرة العرب وبيصير تباطئ في دوران الارض وجزء بيطيح على شرق اسياء وبيعكس دوران الشمس وبتطلع من مغربها
جواهر .. لا تكملين خرافات
مشاعل .. بس مستدل بقران واحاديث
جواهر.. لو تشوفين عام 2000 وش الاشاعات الي طلعت يوم بغى يجي ريحي عمرك وابعدي عن هالمواضيع
مشاعل تضحك .. لا يفوتك رد الاعضاء عليه مهوب صاحيين
جواهر تغير مجرى الحديث .. مشاعل عرس صيته بتشترين جاهز او تفصلين
ناظرتها بتعجب .. حددوه
جواهر .. ما حدد وانا فاضيه وأول عرس في العايله
مشاعل .. وشيبان العايله وينهم ليه ولا واحد يتلحل ويعرس
جواهر .. في مؤامرات تحت تحاك ضدهم
مشاعل ونطت وخلت الاب .. وشي بليز
جواهر .. ماعندي خبر اصبري لحد ما امي تقول
مشاعل .. انا داريه اول مره جدتي ماتقول اقعدوا لاترقون فوق
ياني فيني فضووووووووول ابي ادري وش بيصير وامي لو احفر مراح تقول لنا
:::::::::::::::::::::::::::::::::::::::::::::::::::::::::::: :::::::
وش رايك يمه
ساره .. مشاء الله بس لو تجين تساعدين مهوب ابرك
وسمية .. بس يمه وذا الشغالات ثنتين وحقت خالي صفت معهم والهندي برى عند المجالس حقت الرجاجيل وش باقي
ساره .. ابيك تشوفين بنفسك عشان اذا اعرستي توجبين زوجك
وسميه .. بدررري انا ناويه افلها واستانس والعرس اخر اهتماماتي حالياً
اخس يا حالياً الا اول رجال يطق بابنا بزوجتس اياه
وسوم .. لا ما اهون عليك ادري اني غاليه عندك
فهد .. أي والله غاليه والتفت على ساره "ام ظافر" وماتعلمين ولدتس وينه طاس مهوب داري ان عندنا عزيمة
ام ظافر .. اكيد انه مايدري لونه يدري ما راح
فهد .. تعذرين له شغله عندي اذا جا ولونتس مره ما تعدى مجلسي لكن الشرهه علي انا
وطلع وهو معصب
وسميه .. يمه ترا ظافر زودها يحب يقهر ابوي
ام ظافر .. مانيب قايله شي لين يجي اكيد الي مانعه شي قوي
:::::::::::::::::::::::::::::::::::::::::::::::::::::::::::: ::::::::
ابو عبدالله .. محمد ياولدي الوقت جا العصر واختك لهلحين راقده
محمد .. رفوع
ابو عبدالله .. أي روح قومها تصلي وتروح لخوياتها
محمد .. ابشر يبه
راح محمد يمشي والتفت على ابوه .. يبه معها احد غيرها
ابو عبدالله .. لا وانا ابوك بنات عمتك مع غاليه
ضحك محمد .. اثرها غاليه الي تسوق
وراح يمشي لاخته دخل الخيمه القاها نايمه ومن شدة ماهي غارقه في النوم فاتحه فمها ابتسم فكر يسوي مقلب فيها بس تردد وقومها بهدوء
محمد .. رفعه
رفعه بصوت كانها تحلم .. هه
محمد .. رفعه انتي صليتي قومي وجبت صلاة العصر والبنات سبقوتس يطعسن وانت راقده
هنا الاشارات وصلت لها وفزت .. والله راحوا
ابتسم محمد لها .. أي تعالي بنصلي وتقهوي بعدها تصحصحين وبوديتس لهن
رفعه .. لبى عيونك الله يسعد قلبك
:::::::::::::::::::::::::::::::::::::::::::::::::::::::::::: ::::::::
كانن البنات عايشات جوهن المكان مايجب الملل كانن جالسات بالقمه ويهب عليهن هواء منعش بين سوالف وضحك وغناء كل وحده تشل شله بصوتها وتعليقات على اصواتهن
غاليه .. ياني مشتهيه قهوه وكاكاو
عبير .. الرفاله شينه وانا اختس لونا زينا لنا ترمس
شيهانه .. معقولة محد درى انا مغرزين وش رايتس تشغلين الفلشر
غاليه .. لا اصبروا اذا ماجونا شغلته عندهم ضيف تبونهم ياكلونا
شيهانه .. عادي
عبير .. مايحتاج شوفوا سياره جايه متجهه لنا
غاليه .. اخيرا هذا محمد ما بغو
محمد من احترامه للبنات ما حب يطلع العرق وقف تحت يبي ينزل رفوع وانتبهت غاليه انه بينزل اخته ويروح
وبخوف
شيهانه وعبير .. غاليه بيروح تكفين ناديه
غاليه بصوت عالي وهي تنزل العرق .. محمد
كان الرجال داخل جو ومشغل شله
يامرحبـا ترحيبـة البـدو بالبـرق
اللي لهم عاميـن مـا رحبـوا بـه
رحبه اوسطهم ومن فرحته غـرق
جفنه بدمـع بلـل أطـراف ثوبـه
البرق شرق وهو له صويحب ٍ شرق
وبرَق وصـدره بـارق ٍ مادروبـه
ياللي سرقت النوم والعافية سـرق
يازاد قلب اللـي هـواك وحروبـه
تغيب ماهمك وأنـا ألاحـي الـورق
ولا تخـاف مـن الجفـا والعقوبـه
الوصل مرهم كبد وإلا الجفا حـرق
والصبر ينفض في غيابـك جيوبـه
كسرت كل أبواب وصلك من الطرق
وغيرك طرق قلبي ولانـي بصوبـه
واللي يريد الوصل يامكثـر الطـرق
لو وقفوا كل العـرب فـي دروبـه
لكن رفعه انتبهت ورجعت لسياره وطقت عليه الباب
محمد وهو يلتفت لرفعه ويشوف غاليه مقبله عليهم .. وش فيكم
رفعه .. شوف غاليه تناديك
نزل محمد يسلم على غاليه الي صدرها ينزل ويرتفع بسبب نزلوها من العرق
غاليه .. اوف فحمت حمود حبيبي سيارتنا مغرزه
فقع محمد ضحك .. وانا اقول غريبه وش هـ الركاده وقفن ولا اشوف السياره تفتر
غاليه .. عين رفوع
رفعه .. ابركها من ساعه عشان ماتخلني مره ثانيه
محمد .. يالله اركبوا
ركبن البنات وقام محمد يسوق بهن ويخوفهن و فحط بهن ورقى العرق وقف بعيد شوي من السياره في الوقت الي بنات عمته ويحاولن يسترن انفسهن ومنحرجات مره
عبير .. فشله
شيهانه .. عادي خواته معنا
جا يمشي محمد ويحس بدقات قلبه الي صارت ترج في اذنه وغاليه تسولف وكان رده عليه .. هم بدون ما يستوعب وش تقول
وبصوت جهور .. وش اخباركن يابنات
همسات بسطه تدل على رد
ضحك اشهد بالله انكن غرزتن هذي يبي لها سحب
غاليه .. يالله قرب سيارتك
محمد .. السبته مع العيال والتفت عليهن وبدون قصد شافهن لكن على طول نزل عيونه .. هاه وش بتسون
غاليه .. معك مشنا او خلنا نروح ناخذ السبته
محمد .. خلاص اركبن بس تراني مواعد ابوي نروح للبل يبي يغتبق منها والعيال هناك
غاليه .. ماعليه
وسمع شهقة بسيطه
ومشى مايبي يحرجهن
عبير .. تبينا نركب خلاص ينزلنا عند الخيام
رفعه .. لا خلونا نروح نتمشى معنا ابوي وش خايفات منه
شيهانه .. عبير الهده جايه جايه خلينا نستانس
عبير .. مشاء الله عليتس والله اني ذاله
غاليه .. يالله امشن تعازمن
شيهانه .. المشكلة بتاخذنا السياره
غاليه .. عادي نتقدم ونتزاحم امشو بس
كان ينتظرهم وضرب بوري يستعجلهم وجوه يمشون وركبوا بسرعه خواته وبنات عمه جو من باب الثاني حق المعاون وركبوا بهدو وغاليه ركبت قدام
ومروا الخيام ونزل محمد ياخذ سحله عشان يحلب فيها حليب
وخذن البنات راحتهن في التزاحم ورى
عبير .. وش بابه يا الخبل تعالي انتي جنب رفعه تبينا نقرب من اخوتس تبطين
غاليه .. يوه السحا الي مهوب في محله
عبير .. غاليه تكفين لا تحرجينا
غاليه .. خلاص بتنازل لكن المره هذي
جا ابو عبدالله يمشي لهن .. يا مرحبا بالي بيخاونا
رفعه وهي تضحك .. لبى قلبك يابوي ليت كل الرجاجيل مثل
محمد وهو يركب .. افا ليه وش مسوين حنا
رفعه وهي تسوي نفسها تشاور محمد بس بصوت عالي شوي .. ماعليك ارفع معنويات ابوي ولا انتوا نظر عيني
ضحكوا ورد ابوها .. تراني ما سمعت شي
رفعه وهي تسوي نفسها خايفه .. سمعت يبه
ابو عبدالله ببتسامه .. ابد ما سمعت شي
غليه .. محمد شغل شي نسمعه
ابو عبدالله .. لا بالله لا تشغل شي الحين حزت ذكر قولن اذكاركن بس
ابتسم محمد ولا علق التزم الصمت يحس بفرحه منعشه انعشت روحه
انتظروا البارت على خير بكره اذا الله قدرني
|
15-09-11, 11:02 AM
جديد مواضيع قسم الارشيف
العرض العادي
