السلام عليكم


ومن العايدين ياغيومه طولتي علينا لين نسينا الاحداث بليز نزلي كل سبوع بارتين



حرام والله كسر خاطري ظافر ابوه شكله عقده عشان حبه



وغاليه ابدا ماتوقعتها بنت فلوه حسافه والله بس شكل قصتها مابتدات ولها تطورات حرام تبي خواتها وخايفه من امها امحق ام علمت عيالها


ياحليل العيال وشديد البل ذكروني بعيالنا اذا شددو البل كانهم بيحررون فلسطين وبنتظار طلعت البر اكيد بصير فيها احداث



البنات كثار وللحين مابعد استوعبت كل واحد من امه حتي العيال هع


ودمتي غاليتي بنتظارك بشوق

الجزء السادس عشر

لو تحبين راسي من اليوم لبكره مراح ارضى

تكفين يمه

فلوه .. غاليه طسي عن وجهي
غالية .. يمه ترا حرام عليك الي تسوينه ذولي اخواني
فلوه .. انتي تعرفين الحرام وعصيانك لي مهوب حرام شفتيني رحت لهلي تسحبتي انتي وختس لهم
غاليه .. ابي اذاكر مع رفعه
فلوه .. لا وجدتس تكلمني تشره علي اني ماعلمتها بخطبة صيته ما انتظرتي لين تملك تبين رجحا وبناتها يطيرنها بعيونهن

غاليه بشهقة .. يمه لو تشوفين فرحتهم كيف
فلوه .. انتس خبل ماتعرفين صديقتس من عدوتس
غاليه بتنهيده طالعه من قلب .. خلاص يمه عجزت اقنعتس
فلوه .. أنا اخبر وخابره انها مهيب سافطه لكن شي زين

رحت والدمعه في عينها وش الكره الي في عيون امها ليش عمتي رجحا انسانه طيبه يكفي انها اذا شافتني ضمتني كاني بنتها عكس امي الي دايم تهاوشني اذا شافتني

صيته .. يا غاليه كان سويتي مثلي ورقيتي وماتعبتي نفسك عشان ماتعتفس نفسيتك
غاليه ببكي .. يا صيته انا طفشت من جو بيتنا من القهر الي اشوفه من معاملة امي من برود ابوي معها عكس ما اشوفه في بيت اخواني انا كرهت بيتنا انتظر الوقت الي اروح فيه ابي احد يحبني يهتم فيني كلكم لاهين عني
صيته .. اذكري ربك وانتي عارفه ان امي تحبك وكلنا نحبك وابوي واخوانك لا تخليني اقول عنتس مراهقة
غاليه .. صيته انا لي مشاعر لي احساس ابي اهتمام خاص فيني ابي صدر حنون احط راسي عليه ابي ادلع والقى من يدلعني ويضحك على دلعي ابي ابتسامة في وجهي مو دايم لوم
صيته .. اقول غلوي قومي وذكري الله ان شاء الله تلقين رجل يحبتس ويطير بتس قولي امين
غاليه بدموع .. مابي زوج ابي ام حنون ابي ابو حنون مو لاهين عني
صيته .. شوفي جوالك اكيد رفعه تبي تطمن
غاليه .. مابي ارد وش بتقول بتقول امها هاوشتها عجزت وانا اشوف نظرات الرحمه مابي
صيته .. لا اله الا الله تعالي ياقلب صيته انا الصدر الحنون وجتها بسرعه وضمتها
بكت غاليه وضحكت بنفس الوقت .. خلاص ابعدي خنقتيني
صيته بنظرات تضحك .. ليه يا غاليه صدري مافيه حنان يعني بتوهق بعريس الغفله
غاليه بضحك .. الله يعين بدر بيقول جايبين لي اسكريمه مثلجة
صيته .. كش كش عليتس والي بيراضيتي تكسرين مجاديفي
وقفت غاليه بحيويه وضمت اختها .. خلاص ولا يهمتس انتي فلفل حرني من الحنان الفايض
صيته .. اما حبا ولابرك
ضحكت غاليه تحس انها نفست شوي من الضيقه الي في خاطرها

:::::::::::::::::::::::::::::::::::::::::::::::::::::::::::: ::::::::::

جواهر .. رفوع ترا ازعجتيني
رفعه .. غاليه ما ردت علي اكيد عمتي فلوه هاوشتها
جواهر .. تعودوا منهم صغار وهذي دبر عمتي
رفعه .. ومشاعل الي خاست رقاد
الله يعين مشاعل على السانك
رفعه .. اخيرا شرفتي
مشاعل .. قومي سوي لي نسكافيه راسي صاكني
جواهر .. وانا بعد
رفعه بقهر .. مابي مابي يعني عشانكن الكبار تأمرن علي
مشاعل .. بتقومين بالطيب ولا جيتس الحين
جواهر تبتسم تبي تقهر رفعه .. اسمعي مابيه يجينا بارد مثل كل مره
رفعه وهي تقوم ومنقهره .. جعله مايحدر يارب
مشاعل بضحكة .. بسم الله علينا
طلعت وهي شوي وبتصيح وتحلطم .. الله يفكني منكن يارب الله يفرج لي

التفت جواهر على مشاعل .. دريتي باخر خبر
مشاعل وهي ترفعه شعرها بشباصه .. وش صار
جواهر .. صيته بتعرس
مشاعل .. بربتس من بتاخذ
جواهر .. حزري فزري
مشاعل .. جواهر علميني ترا راسي صاكني
جواهر .. ولد خالها
مشاعل بندهاش .. بدر
جواهر .. وش رايك
مشاعل .. مشاء الله الي اعرفه عنه انه والنعم الله يوفقها
جواهر .. امين
مشاعل .. من علمكم
جواهر .. تو البنات رايحين منا
مشاعل .. حسافه ودي ابارك لها
جواهر .. اكيد مراح يجونا قريب اذا امهم درت انهم جايين بدونها
مشاعل بثقه .. اذا ماجونا بروح لهم
جواهر .. مشاء الله عليتس مايهمتس تنغيزات عمتي
مشاعل .. بصرها تنغز براحتها انا رايحه لخواني بجلس عندها شوي وبروح لغرف البنات
جواهر .. رفوع ابطت عسى مهيب تسممنا
مشاعل بضحكة .. رحمتها ولكان بقولها تسوي لنا سندوتش
جواهر وهي تضحك بقوة .. عشان يجي الصبح وهي تدعي

دخلت عليهن بالصنيه .. تسممن جعل اوله على الذرعان وتاليه انتن خابراته

البنات .. هههههههههههههههههههههههههههههه استغفري

خذت كتابها الي عندهم وطلعت وهي تلف كتابها بقهر







:::::::::::::::::::::::::::::::::::::::::::::::::::::::::::: ::::::::::::
عبير جعلتس القوم افرشي فرشه في الحوش
عبير .. جده الحوش سموم خلونا داخل
ام ضيدان .. داخل عند المكيف يلعب في ركبي
ام راكان (رفعه ) .. اسمعي الكلام وهاتي القهوه وشاهي
عبير .. هجل مناب جالسين معكم
ام راكان .. البسي برقعتس وتعالي
عبير .. عشان تغدي اعيوني تسني لابسه نظارات
ام ضيدان .. اشهدن به حتسي انتي ماتسمعين هاتي الفرشه
عبير .. على خشمي يمه ولا تزعلين علينا
فرشت لهم الفرشه وحطت ترامس القهوه والشاهي والطوفريه وجلست تقهويهن وهي متلثمه بجلال
عبير .. جو باريس ولا جنيف
ام ضيدان وهي تطنش كلام عبير .. ليت من خاوى العيال للبل
رفعه .. وش تبين يا يمه بالشديد والغثا
ام ضيدان .. سجت نفس وانا امتس
رفعه .. يمه الحمدلله الي ربي فكنا من الشديد والحط
ام ضيدان .. جعله يسقى على عيني ذيك الايام
عبير .. كأني في مسلسل بدوي من بطولة امي صيته وامي رفعه
رفعه وهي تطالع بنتها .. ليت من حطتس يا عبير في البر اسبوع وبشوف وش بتسوين
عبير .. يمه انا اموت في البر بس انا بفتك من كرف الدراسه والكليه
رفعه .. والله لو تجلسين ان تنطلين خلقتس وما اكون بنت ابوي
ام ضيدان .. خليها تاخذ لها بدوي ثم يشددها عند ابله
عبير .. بسم الله علي وش فيك اما حبا ولا برك انا ابي كشتات بس
رفعه .. والله اني اروح للبر عشان ابوي ولا البر ماودي بشوفته اقول يا عبير روحي قومي شيهانه بياذن المغرب وهي على رقدتها
عبير .. بتذبحني ماعندها صلاه وهي شاده حيلها تبي نسبه
رفعه .. تبي طب والعيال مهوب مخلينها تدخل طب
عبير .. خبل انا امر على بنات الاحياء وهن يشرحن حيوانات وتقرف شلون بشر
ام ضيدان .. خلها تصير دختوره عشان تعالجنا ما نروح للرجاجيل
عبير بضحكه .. ليتها تسمع



:::::::::::::::::::::::::::::::::::::::::::::::::::::::::::: ::::::::::::

كان فارش الفرشه قدام الخيام ويشرب قهوه ويتفرج على المكان كان يعم الهدوء الا هواء خفيف يحرك العشب الي كان مهوب كثير مره لكن واضح في حمار التربه كانت حمرا وملسه وكانت منبسطه الا عرق كبير بعيد شوي وراه عروق تتفاوت بالطول وكان مجلس الرجاجيل مهتمين به وجايبين بيت شعر اسود وفارشينه زوالي حمرا ومراكي وحاطين وجار ودلال حولها

كان سارح بفكاره وحتى انا ما غصت بفكاره :) مدري وش يفكر فيه
ياعم
استيقظ من عالم التفكيرللواقع
:هلا عباس
عباس .. الشباب ما اتوقع بيجو اليوم
عبدالله .. خلاص زين العشا لك وللشباب الباقين
عباس .. وانت مابتكل معنا
عبدالله وهو يبتسم له .. إلا مانيب عايف شغلك يا عباس
بادله الابتسامة .. الله يطول في عمرك يارب


:::::::::::::::::::::::::::::::::::::::::::::::::::::::::::: ::::::::::::





يا خالد ترا مانيب رايق تقوم تطعس
خالد .. يا راكان ترا كل مواصلات الترفيه مقطوعه هنا مافيه الا التطعيس تبي تحرمني
راكان .. اغد رجال قبل والله ان تنحرم منها اذا عودنا للبلاد
ظافر .. اقول يا راكان تراك متشدد مره خلنا نستانس انا عاجبني سواقة خالد وتطعيسه
راكان .. عاجبك وهو كم مره هجج البل واخذ لي نص ساعه لين تهدا وجمعها والله لو ما تهدون لا انزلكم اثنينكم وخليكم تركبون على البل وتتبعوني
ظافر وهو يناظر خالد ويبتسم .. مهيب شينه عطنا ترمس الماء الي معك وروح وخلنا

خالد ابي ركوب ابوي الشايب يعجبني
ظافر .. مهوب على كيفك تتشرط وتختار انا ضيف عليكم انا الي اختار
خالد .. والله انك تطلع لابلنا اكثر مني من قال انك ضيف
ظافر خلاص انا باخذ حق عمي ابو ضيدان
خالد .. ورطتنا بترمس الماء
ظافر .. شوف البدوي وانا اخوك على حق وحقيق
رفعه ظافر ثوبه وحزمه على حقوه وتلطم بشماغه وحط ترمس الماء الي وسط مهوب صغير ولا كبير في جيب الي في مسام الحدوج ونط على ظهر المسام ومسك حبل الناقه ومشى وشافه خالد وراح يركض لحدوج جده وسوا مثله

وبدا ظافر يشل شلات بصوته العذب وخالد يشل معه وراكان يجي يمشي بهدوء معهم والبل تمشي قبلهم الصغار تدرهم مع امهاتها والي منزله راسها تاكل والي سابقتهم بواجد منتشره بشكل ما نقول الا سبحان خالقها وسمعوا معي صوت ظافر الي خلا راكان يقرب عشان يسمعه


ياهيه إلتفت لي وإسمع دعاي لك يا هيه
ترى عادتك تشبع من البعد واتواجه

دعيتك بصوتٍ ياصلك ليه ما توحيه
وأنا أسمع ضلوعك من صدى الصوت لجاجه

عليك الفؤاد إخلاجه مصمخ راعيه
خف الله في راعيه ما تسمع إخلاجه

ترى العفو قد جاك أوله وإغتنم تاليه
وترى الحلم بحرٍ غير لا تامن أمواجه

وترى الود ليلٍ مظلمٍ جيتلك ساريه
سراجه وصالك والجفا ينفخ سراجه

وترى قصرنا اللي كم سنة نجمع ونبنيه
هوى العذل طيح بابه العود وسياجه

لي أيام مدري وين دارك ولا أدري ليه
وأنا خابر إني باب شفك ومزلاجه

غيابٍ بلا سبة هجادٍ بلا تنبيه
وجفا أغلى العرب نارٍ على الكبد وهاجة

نضج قلبي من البعد وش حاجتك تكويه
جفاك الجمر والصبر في بعدك الصاجه

واسرع راكان وخلاهم عشان يرد البل الي راحت مكان ثاني غير الي متوجهين له


ظافر .. خالد هذا مساعد الي شاب الضو
خالد .. أي بالله هذا زوله
ظافر .. ليه مناب رايحين لعبدالله
خالد .. لا البل بتمسي ذليل وبكره الفجر نمشي صوبه وبيكون غدانا عنده
ظافر .. على خير يا نوم عيني يا مساعد وش دراه اني ابي فنجال قهوه
خالد .. كلن وهواه يا عمري يا موا بارد
ظافر .. اشهدنه يحوم تسبدي
خالد بضحكه .. الناس اذواق
ظافر .. ودي اصورك وانت تشرب موكا وعلى الذلول
خالد .. ههههههه بدوي مميز
ظافر .. والله يا خالد اني اعرف لك ناس تحطهم على يمناك حضر مهوب بدو وان بعض البدو مافيه خير
خالد .. انا خوياي كلبوهم حضر ولا شفت منه شي شين
ظافر بضحكة .. عشان كذا ما تحب البر
خالد وهو يرفع حواجبه .. والله يا ظافر انهم راعين بر وكشتات وطلع معهم انا ما احب بر اهلي كرف في كرف



اقبلت البل على الوايت تتدافع تبي تشرب وكان مساعد مجهز لها الحوض ومجهز عشاها وبسرعه الشباب نزلوا من ظهر الذلول خافوا الكبار تكسر الصغار عشان يحيزون الصغار من الكبار
وكان راكان رامي شماغه وماعليه الا سروال وفنيله ويدفع الصغار بعيد وستقر الوضع وشبعت البل راحو الشباب للفرشه الي فارشه مساعد وكان عليها القهوه وجلسوا يتقهوون

السلام عليكم غيومه

والله ونستيني بلبارت ماتوقعت صراحه الله يعيدك علي هذا وامثاله هع

والله اني اقرا واضحك دخلت معهم جو كلهم العيال والبنات


الله يعين عسي بس بنتي ماتفوتها المدرسه للحين مانتظم نومنا بعد رمضان

دمتي حبيبتي

السلام عليك ورحمه الله وبركاته
ياهلاا والله ومليون غلااااااا بغيومه تو مانور المنتدى يالغلا
كل عام وانتي بخير وعساك من العايدين والفايزين ان شاء الله

بارتين روووووووعه تسلم يمينك

واخيرا عرفنا ان غاليه بنت فلوووووووووه صدقين ماتوقعتها الصراحه
الله يعينهااااااا على هالام القشره مدري متى يصفى قلبهاااااااا من ناحيه رجحا
لا والي يقهر انها هي الي داخله حياتهم غلط
بس برد قلبي يوم قالت غاليه ان ضيدااااان ما يهنم بامهاااااا فيس متشمت

اما العيااااااال الصراخه دخلتينا معهام جو ولا اروع حتى اني اشتهيت اروح البر بس حر الله
يصبر لين يرد الجو

تسلم يمينك يالغلا جعلهاااا تنحرم من النار