كاتب الموضوع :
حديقة الظلام
المنتدى :
القصص المكتمله من وحي قلم الاعضاء
الفصلْ الثآلثْ والثلآثيـنْ.... ¤ { شّآهـد زورْ .. ~
.
.
ومآ كآن سوى
شآهـد زور على الطريقْ ~
.
.
نّآظرتْ الحذآء .. لي يلمعْ ويبرقْ من نظآفتـه ... حتى هذا الحذآ أطهر وأنظفْ منكْ يا حمدآنْ .. فتحتْ سجلْ الأسماء .. وأنا أبحثْ عن اسمْ معينْ .. نآظرتْ حروفْ الاسمْ ويديْ ترجفْ وهيه ملامسة الزر الأخضر .. للحظـة كنتْ بتهـور وبضغطْ عليه .. لكنْ شي كبير ارخى بيدي حتى تسقط وتلامسْ بطني .. انتي حامل يالريمْ وهيه بالمثل .. كيف فكرتي مجردْ التفكير بإنج تتصلينْ بها وتخبرينها بأنْ ريلها يسوي معاجْ انتي جيه و انتي بنتْ عمها .. لا يالريمْ اعقلي وطنشي .. خل يحترق .. !!
انتفضتْ من اهتزازة الفونْ على ريلي .. رفعته وأنا أعقد حوايبي .. من جرأته .. ضغطتْ الزر الأحمر أعطيه بزي كرده فعل طبيعيه منيه .. حتى لا يتجرأ ويتصلْ مرة ثانية .. عل وعسى يفهم انيه ماريد اي اتصال به .. وانيه اريد يبعد عن حياتيه تكفيني مشاكليه مع سيف ومرضه لي ما كنتْ متوقعته ... اطلقتْ تنهيدة طويلة مع وصول مسجْ يديد ..قريته مرة وحده ورميتْ الفونْ من بعده باهمال بالجنطة .. حقير صدق انك حقير .. بكل قوآة عينْ بعد تقولها " السموحة ع الازعاجْ من تفضينْ كلميني " شو تحسبْ نفسكْ يا حمدانْ ترا والله تعديتْ حدودك وايد .. بس مالي غير الصمتْ الحينه .. ما أقدر أخبر أي مخلوقْ .. تكفي المشاكل اللي صارتْ .. تكفيني الحينه فرحة غاية بالجنينْ .. أخاف يوصلها العلمْ .. ويطيحْ لي ببطنها اذا تأذرتْ نفسيتها .. الله يعيني عليكْ يا حمدانْ ..
،،،،،،،،،،،،،
ببسآطـة التجآهل كانْ حليفي .. بعدْ مسجآتْ متعـددة واتصالاتْ ما انتهتْ لساعآتْ طويلـة .. اكتفى بالصمتْ والسكوتْ .. شو تحسبنيه يا حمدانْ .. !! لأنيه بس على خلافْ مع سيف ْ ومشاكلنا كثيرة ولا له ذرة حب بقلبي .. بسير أركض ورا غيره .. جانْ ركضتْ ورا سالمْ لي ميتْ بحبي .. هب وراكْ انتْ لي ما تسوى شي ..!! ~ ما قول غير الله يعينْ غاية عليكْ .. والله ماشي حد بصبرها وقدرة تحملها ..
رفعـتْ تفآحـة خضرآء لثمي أقضمهـآ بشهيـة مفتوحـة .. بعـد ما خلصتْ صحنينْ من الباستآ ..
سلوى وهيه تناظرني بطرف عينها : بسجْ بتمتينْ .. من أصبحتي وانتي تاكلينْ ..
قلتْ وأنا أمسحْ ثمي بكلينكسْ : شو عليجْ انتي منيه .. وبعدينْ صارلي يومينْ ما كلتْ عدل يوعانة .. خاطرية ببرتقال وملحْ
سلوى وهيه تعتدل بيلستها و تعقدْ حوايبها : برتقال وملح ..!!!
هزيتْ راسي : هيه والله خاطري .. من أمسْ بعد ..
سلوى وهيه تضحك : شو بدأ وحامج ..!!
قلتْ وأنا أرفعْ حايب واحد : ليشْ تضحكين .. بعدينْ مدري بس من أمس وأنا خاطريه ببرتقال وما عنديه بالحجرة .. زقري بشكارتكم خليها تييب لي
قالتْ وهيه تسكر الكتاب لي كانْ بحضنها : بشكارتنا شردتْ أمس بسير أنا أييب لج ..
بطلتْ عيوني : شرررررررردت ..!!!!
هزتْ راسها : هيه ،، عنلاتها من بشكارة بويه من الصباحْ ساير يبلغْ عليها ويكنسلها بالمرة
قلتْ وأنا أضحكْ : هب من شي بتشرد من حشرتج غربلتيها حليلها .. حشا حتى كوب الماي تييبه لج
قالتْ وهيه توقف : جب جب .. نسيتي أيام الدلع.. مع رولا لي كانتْ حتى لبسجْ اظهره لج .. [ سكتتْ شوي وكملتْ ] الا انتي شعنه طرشتيها بلادها !!! شو كانتْ مسويه
قلتْ وأنا أتأمل التفاحة لي بينْ يدي : ما يخصجْ .. وسيري اييبي لي الاكل ..
قالتْ وهيه تكش ع ويهي : مالتْ .. زينْ سايرة .. هب عسب خاطرج عسب الحلو لي ببطنج
ضحكتْ : زينْ بعد عيل أنا وياه بنتدلعْ عليجْ عدل ..
قالتْ وهيه تمشي : خليه يشرف وخلاف ان ما طلعتْ الدلع ها من عينج ما كونْ سلوى ..!!
ضحكتْ وأنا أقول بصوتْ عالي : ما عليه وها وأنا أدعي انج تاخذينْ اللي فبالي وأبا لج الخير تقولينْ ليه جيه ..
ما وصلنيه منها غير صوت ضحكتها لي غابت مع ابتعادها .. ابتسمتْ بهدوء .. وأنا أتذكر خاليه لي صارلي يومينْ من أرمسه ما أييب طاري حد غير سلوى .. حتى صارْ يهزئني بكل مرة .. ويسكر الخطْ بويهي .. عقدتْ حوايبي وأنا أحسْ باليدْ لي انمدتْ وشلتْ التفاحة لي كانتْ بينْ يدي .. رفعتْ راسي لفوق .. ما غادرتني غير ابتسامة واسعه وأنا أشوفه يقضمْ التفاحة وهو يرمي بثقله كله ع الكنبة ..
قلتْ بهدوء : ما تعرف تسلم ..؟!!
اكتفى بأنه يناظرني ببرود وكملْ أكل التفاحة ..
رفعتْ حايب واحد وقلتْ : متى وصلتْ ؟!
قال وهو ياكل : من ساعه .. [ اعتدل بيلسته وهو يرمي التفاحة ع الطاولة لي ع يمينه باهمال ] يالسة اروحج ..
قلتْ وأنا أوقفْ : لا سلوى كانتْ ويايه [ مشيتْ لعنده وانحنيتْ اشل بقايا التفاحة ومشيتْ ] لمتى بتمْ جيه مهمل يعني ما تشوف الصحنْ جانْ حطيته هنيه .. [ قلتها وأنا أحط التفاحة بالصحنْ ] .. قوم اسبحْ وبدل بتم بلبسْ الدوام يعني
قال ببرود وهو يدخل يده بينْ شعره الكثيف : شو عليجْ انتي انا مرتاح ..!!
مشيتْ وقعدت ع يمينه بعيدة بمقدار خطوة : بذمتكء سيف من سافرتْ جم مرة سبحت ..!!
ابتسمْ ببرود : ليشْ شامة ريحتيه ..
قلتْ و أنا أعقدْ حوايبي و أنا أتذكرْ ريحة دمْ أحمد وشكله : قوم سيف اسبحْ دخيلكْ .. [ قلتْ بغبنة ] دخيلكْ نش ما قدر أتحمل ريحتك ..؟!!
يانا صوتْ سلوى : اييه لا يكونْ تتوحمينْ ع ريحة أخويه ... سيف يا ويلكْ بتشوتكْ برا الحجرة ..
سيف ببرود : صدق ..
قلتْ وأنا أحسْ بالدمعة تحدر من عيني : لا بس مدري ذكرتْ احمد وريحة دمه .. [ كملتْ وأنا أحسْ بيد سيف تمسحْ الدمعه ] وكأنْ ريحة دمه عالقه فيك ..
سيف تمْ ثوآني يطالعنيه .. وأنا كنتْ أطالعهْ بترجي .. وأبتعدْ عنه حتى أبعدْ اللوعـة لي وصلتْ حدها .. تأفف وهو ينشْ ..
سلوى وهيه تتطالعه : الله يعنيه جانْ صدقْ وحامج انهد عليه
قلتْ وانا أعقد حوايبي : لا لا ما اعتقد بس هو لي ذكرنيه بأحمد من ذكر سالفة الريحة .. صايرة جبديه تلوع من اتذكره .. وأتذكر شكله الله يرحمه يومها
سلوى وهيه تعقد حوايبها : الله يرحمه [ قالتْ تغير الموضوع ] هاجْ يلا كلي سويتْ لجْ أحلى برتقال مقطع مع ملحْ .. عمايل ايديه وحياتْ عنيه
ضحكتْ بخفة : الا هو برتقال وملحْ .. حسستيني مسوية وليمة .. وبعدينْ نفسيه لاعتْ وانسدتْ بنشْ أزهبْ ملابس سيف لا يعفسْ لي الدنيا
نشيتْ حتى أمشي بس مسكتنيه مستنكرة : هيه من لقى أحبابه .. أقول يلسي اكلي وما تنشينْ الا وانتي مخلصته اتعب ْ وبالأخير ما تاكلينْ منه شي
خذتْ الصحنْ من يدها الثانيه : خلاص بكله فوق .. خلينيه أسير ..
هزتْ راسها : خلاص سماح بس تاكلينه هب تفرينه بالزباله بذبحجْ ..
قلتْ وأنا أضحك : زينْ لا تهددينْ .. ترا بخبر عليجْ سيف .. برايجْ
سلوى من ورايه و أنا أمشي : الله يالدنيا .. أمس ما يسوى شي واليوم بتخبرينْ عليه سيف ..
صديتْ أطالعها بطرف عيني ييتْ برمس بس قاطعتنيه بسرعه : بس بس خلاص لا تردينْ وسوري وحقج عليه ما بقول هالرمسة مرة ثانيه .. بس انتي استعيلي بسالفه العرس بديتْ أغار
ابتسمتْ وأنا أتجدم عندها : سلوى صدق والله اذا خطبجْ خاليه بتوافقين عليه
سلوى وهيه تتطالعنيه ببرود : اسولف انزينْ
قلتْ وانا أحكمْ مسكتي للصحنْ لي بينْ يدي : لا والله سلوى صدقْ ارمسْ ..
اكتفتْ بالصمتْ لثواني وهيه تتطالعنيه بنظرة ما فهمتها .. حسيتْ بقهر .. واحساسْ بالذنبْ يمكنْ .. وأنا أطالعْ نعومتها وويهها الطفولي .. كيفْ تفكرينْ يالريمْ تربطينْ سلوى بخالجْ وفرق السنْ كبير بينهم ..
قلتْ من غير تفكير : ترا فرق السنْ ما هو عيب .. وخاليه صحْ كبير لكن الكل يتمناه .. لأنه مريض يعني .!!
سلوى : أنا ما قلتْ شي .. !!
قلتْ وأنا أصد عنها : ما كنتْ أقول الرمسه هاي لج .. كنت أفكر بصوتْ عالي .. ع العموم انسي وجنج ما سمعتي شي
سلوى : ما أقدر يالريمْ أفكر بالموضوعْ غير لا نوى خالجْ جد ... ما أحبء أحلمْ بأشيا صعبة المنال .. و تبينْ الصدقْ خالجْ حلمْ كل بنتْ .. وبيني وبينجْ ترا كل البناتْ من يتيمعنْ يرمسنْ عنه .. ويقولنْ كيف يكونْ عبدالله خالْ الريمْ فرق السما والأرض ..
صديتْ وأنا رافعه حايبْ واحد : لا والله شو قصدكنْ ..!!!
سلوى وهيه تضحكْ : ماشي بعدينْ هب أنا لي أقول هن لي يقولنْ .. هدى موزة عذاري وليلى .. انا مالي شغل ..
قلتْ وأنا أمشي وأهدها : برايهنْ .. من يومهنْ ما أعيبهنْ
ابتسمتْ بانتصار .. نقطة حلوة انْ سلوى تفكر بخاليه بطريقة ايجابية .. لكنها خايفة انها تبيني أحلامْ تتحطمْ بعدمْ تفكير خاليه لها .. لي أنا متأكدة انها ماخذةْ لو جزء بسيطْ من تفكيره .. لكنْ مرضه مانعه من انْ تفكيره بها يزيدْ .. الله يشفيكْ يا خاليه وأشوفكْ معرس .. وأحسْ بوجودكْ شراتْ قبل .. وأحسْ بحنانكْ وعطفكْ عليه ..
،،،،،،،،،،،
حدرتْ الصآلـة حطيتْ الصحنْ ع الطآولة .. وسرتْ بعدها للحجرة أدور على سيف .. تنهدتْ بحسرة من اهمال هالانسانْ .. ورميه وبعثرته لملابسه بالحجرة .. وجنه ما صدقْ يوصل الحجرة حتى يزيل حمل ملابسه من عليه .. شليتهمْ بثقل .. ومشيتْ لغرفة الملابسْ .. فريتهم بسلة الملابسْ .. ومشيتْ أطلعْ له لبسْ خفيف ع السريع .. وحطيتهم ع الطاولة .. و يلستْ ع كرسي موضوع ع الطرف .. وأنا أمسكْ فوني لي كانْ ع الجارج .. عقدتْ حوايبي وأنا أشوف الاتصالاتْ الـ 5 ومسجْ منْ بينهم .. كانو كل الاتصالاتْ من حمدانْ .. بطلتْ المسجْ .. أول ما قريته حسيتْ بغضبْ يعتريني لدرجة بدأ العرق يتصببْ منيه .. من حرارة العصبية ..
" السموحة بس اتصلتْ حتى أبلغجْ بوصولْ سيف .. قلتْ يمكنْ ظاهرة مكان ..!! "
ارتجفتْ بقوة وتحول الغضبْ لتوتر أول ما شفتْ سيف يظهر من الحمام .. بالروبْ والماء يقطر من راسه .. نزلتْ بنظريه للفون حذفتْ المسجْ .. و رميته ع الطاولة باهمال
قلتله وأنا أأشر ع ملابسه : زهبتْ لك ملابسكْ ..
ومشيتْ بعدها اتخطاه وأنا أرجف .. وحدرتْ الحمام وسكرته من ورايه بسرعه .. سندتْ بجسمي ع البابْ و بدتْ دموعي تحدر .. حاسه بحمل كبير جاتمْ ع صدري .. و دموعْ كثير أباها تحدر بس هبْ قادره أنزلهمْ .. ناظرتْ الحمامْ .. وأنا أسمعْ صوتْ الماي لي يرش .. تأففتْ وأنا أتحكمْ باضطرابي .. وسرتْ أسكر الماي لي دومْ يخليه سيف مبطل .. مشيتْ أغسل ويهي وأنا أخذ نفس وأهده .. وطلعتْ بعدها .. دورت عليه بنظريه لكنيه ما حصلتْه لا بغرفة الملابس ولا بالحجرة ظهرتْ لصالة الجناحْ .. حصلته يالسه و الصحنْ بيده ياكل منه . وشعره للحينه مبلول .. رديتْ سحبتْ أقربْ منشفة .. ومشطْ ومشيتْ لعنده .. حطيتْهم بحضنه وسحبتْ الصحن بخفة من يده .. ويلستْ على يساره رفعتْ الخاشوقة لثي كلتْ حبة برتقالة
قلتْ : نشفْ شعركْ ومشطه لا تسوى ياهل
سحب الصحنْ من يدي : هب زينْ تاكلينه متروس ملح ..
قلتْ وأنا أردْ الخاشوقة بالصحنْ : ملحه قليل .. وبعدينْ ها ميوب حقي شعنه تاكل منه
قال ببرود : كيفي .. عيبني وكلته ..
قلتْ وأنا أطالع حباتْ الماي لي تقطر من شعره : برايكْ كله ماباه . خلاص انسدتْ نفسي
سحبتْ المنشفة وأنا أقربْ منه و بديتْ أنشفْ شعره بقوة
سيف : شوي شوي بطيتي راسي
قلتْ وانا أشل يدي والمنشفة للحينه ع راسه : برايكْ انت نشفه
سحبْ يدي ورده لراسه وقال : خلاص برايجْ كملي ..
ما حبيتْ أرده ... كملتْ تنشيفْ وأنا أتمنى بداخليه ان الاحترامْ لي بينا يتسمر .. وحالتنا هاي ما تتبدل .. هدوء .. مختلطْ بأنفاسنا .. وابتساماتْ رغمْ انها باردة الا انها مشبعة بالاحترام .. شلتْ يدي ببطء عن راسه وأنا مستنكرة سؤاله المفاجئ ..
سيف : اشتقتي لي ..!!!
بلعتْ ريجي وأنا أرمي المنشفة ورايه .. سحبتْ المشطْ ورفعتْ يدي حتى أمشطْ شعره .. بهدوء .. وصمتْ قاتل .. حطيتْ عيني بعينه بعدْ ثوآني .. اكتفيتْ باغتصابْ ابتسامة .. وأنا أزيحْ ويهه حتى يعطيني جنبه .. واتميتْ أمشطْ شعره المنكوشْ .. رفعْ يده ليدي وهو يسحبنيه بقوة حتى انسدحتْ على فخذه ..
همس : ردي عليه ..
غمضتْ عيوني وأنا أدعي الألم همستْ وأنا أنشْ : سيف لا تنسى انيه حامل
قال وهو يحطْ يده على ظهريه يمسحْ عليه : عورتج .!!!
هزيتْ راسيه وأنا أبتسمْ : لا ما عليكْ ... [ قلتْ أغير الموضوع ] ما بتسير عند علي .!!
قالْ وهو يطالعْ الأرضْ : باجر ان شاء الله ...
بعلنـآ الصمتْ من يديدْ .. وكل منْ فينا سبحْ بعالمه الخاصْ .. لكنيه هالمرة كنتْ أفكر بحالنا .. يا ليتْ يا سيفْ نتمْ جيه ع طول .. نتحاور بهدوء من غير عصبية .. من غير لا يخربْ علينا شي .. ولا يعترضْ طريقنـآ أي شي .. حسيتْ بالغصة وأنا أتذكر مسجاتْ حمدانْ واتصالاته .. سيف باليومينْ لي طافو ما كانْ مويود هالحينه الحل اختلفْ .. سيف مستحيل يفسر مسجاته غير غلط في غلطْ .. لازمْ أحل هالمشكلة بسرعه .. ما عنديه غير حل من الاثنينْ اما أخبر منصور أو سيف نفسه ..
سيفْ ... آهْ يا سيف .. ليتنيه بس أقدر أقولكْ بكل شي يصير لي بيومـي من غير خوفْ لا منكْ ولا منْ مرضكْ .. أخافْ من ردةْ فعلكْ .. شو بتخسرينْ يالريمْ ان يربتي .. ولا شي .. الضربْ وتعودتي عليه.. بس يمكنْ ترتاحينْ وها الأهم ..
رفعتْ بنظريه له .. كانْ ما زال على حاله .. تقربتْ منه أكثر سحبتْ يده لي بدتْ رعشتها تبانْ .. بلعتْ غصة كانتْ عالقة .. رسمتْ ابتسامة هادية ..
نطقتْ : سيف ..!!
صدْ يطالعنيه ببرود .. : خير ..
قلتْ وأنا أحاول أبقي ابتسامتي المتوترة : بخبركْ شي .. بس طلبتكْ لا تعصبْ واسمعنيه للآخر ولو لمرة ..
تمْ يطالعنيه ساكتْ .. رصيتْ من قبضة يدي أول ما حسيتْ برعشته بدتْ تزيدْ ..
قلتلهْ بترجي : دخيلكْ ........!!!
قال ببرود : شو مسوية .. ؟!
احبااااط .. يعني لازمْ أكـونْ مسويه شي يا سيف .. دآيمْ تفهمنيه غلطْ .. هالمرة ما سويتْ شي لا خنتْ ولا بكيتْ على غيركْ .. ولا تمنيتْ لكْ الشر .. هالمرة قلبي يبآ يعيشْ مرتاحْ .. أريدْ أعيشْ مرتاحة يا سيف تعبتْ من الألمْ وأشوآكه ..
قلتْ وأنا أنزلْ راسيه : خلاص ماله داعي
رفعْ يده الثانية ومررها على يدي المتعلقة بيده وهوس بعدها عليها بقوة وهو يبتسم : لا له داعي .. بسمعج للآخر .. ارمسي ..
خذتْ نفس طويل وأنا أحاول انتزع يدي من بينْ يده لكنه زاد من تهويسته .. و هز راسه بمعنى لا ..
قلتْ بتوتر ملحوظ : باليوم لي كنتْ فيه عند سارة بالدختر .. ما كنتْ سايرة عند علي مع حمدانْ ولا وصلنيه منه اي اتصال .. [ حطيتْ عيني بعينه وكملتْ بغبنة ] كنتْ بمكانْ ثاني برا الدختر .. مقدر أخبرك وينْ بس والله كنتْ سايرة عشانا نحن انا وانت وولدي .. [ غمضتْ عيوني أول ما هوسْ ع يدي بقوة آلمتني ] .. هب المشكلة وينْ كنتْ وشو كنتْ أسوي .. !! المشكلة ان حمدانْ قام يتصل فيه ويرسل ليه ويهددني و ...
ما كملتْ وأنا أشوفه يهد يدي ويوقفْ مرة وحده وهو يدور حول نفسه .. انتفضتْ خايفة مدري ليش .. بس جسميه كله بدأ ينتفضْ خوف وتوتر من انه يغوص بحالة ازدواج ثانيه .. أو انه يأذيني ..
زاعجْ : وينه ..!!! [ مسح ع ويهه وهو يطالعنيه وأنا أضم نفسي ] فونج وينه ..!!
قلتْ بتوتر : فغرفة الملابـ ..
ما كلمت الا وأنا أشوفه يهدنيه ويحدر الغرفة .. رفعتْ ريولي لفوق الكنب وأنا أضمْ نفسيه بقوة وأدفنْ ويهي بينْ ركبي .. وبديتْ فنوبة بكاء .. خايفة .. خايفة وايد .. دموعي صارتْ تنزلْ بسرعه .. صرتْ حساسة وايد .. من أي شي وع أي شي أصيحْ .. بلا توقف .. ارتعبتْ وأنا أسمعْ صوته وهو يزآعجْ ..
سيف : يالنـذل صدق انك هب ريال .................................... قسما يا حمدانْ ان شفتْ رقمكْ عندها لا أدفنكْ دفانْ حتى النظر ما تناظرها فاهم ............................ حياتنا الخاصة مالكْ دخل بها والماضي لا تنبش وراه وانت مالكْ مكانْ فيه من الأساس .................. .............. انته اشو دخلكْ ................. انا الغلطانْ لي أرمسكْ الكلامْ ما ينفع معاك ..................... هيه كلمة ماشي غيرها حرمتيه ما تيي صوبها ........................... الزمْ حدكْ وحكم ألفاظك ترا الحشمة هب لكْ لأميه مزنه ولا انتْ ما تسوى شي عنديه ....................... الله يلعنكْ زين
تهتْ وتاهتْ أفكاري .. ودمعي زادْ ... وحمدانْ شو دخله بماضيه مع سيف ... صرختْ وأنا أحسْ بيده وهيه تسحبنيه ..
زآعج : انْ اتصل بج مرة ثانية خبرينيه
قلتْ وأنا أهز راسيه : غير رقميه أحسنْ ...
قال وهو يدفرنيه ع الكنبة : ما ينفعْ أريد أعرف شو وراه وشو يقصد بأنه شاف اللي صار ليلتها..
قلتْ وأنا مستعجبة : أي ليلة ..!!
مسحْ ويهه وهو يقع بعمره عنديه : يقصد مزرعه السنينة ...!!
سكتْ ثوآني .. وقلتْ بعدها : وانتْ ما تدري .!!!
صدْ يطالعنيه بلعء ريجه وقال : اذا جاوبتجْ بتصدقيني
هزيتْ راسيه بهيه ..
مسكْ يدي وهو يسحبنيه بحضنه .. قال بهمسْ و ثمه يلامس اذنيه : والله يالريمْ انيه من هديتجْ مدري شو صابجْ ومن رديتْ شفتجْ بهاييجْ الحال .. ما أذكر انيه قربتْ صوبجْ أو سويت بج شي .. ولا ليه علمْ بالجرحْ لي عندج ..
قلتْ وأنا أدفنْ نفسيه بحضنه ودموعيه تحدر وأنا أذكر مرضه يعني ممكنْ ما تكونْ انتْ ... ممكنْ يكونْ شخص ثاني .. كنتْ أريدْ أصرخْ أرمسْ أرد عليه بأي شي أي شي لكنيه اكتفيتْ بدفنْ نفسيه أكثر وأكثر بحضنه وأنا أسمعْ همسه وهو يقول : بس أتمنى أكونْ أنا ولا يكونْ غيري .. أكون أنا ولا يكونْ غيري ...!!
،،،،،،،،،،،،،،،،،،،،،
يلستْ بثقلـي ويدي تلامسْ بطنـي الدآئري .. ويعني تناظر خارطة النجومْ بالسمآء .. وتحصي عددها .. بلحظاتْ تستغفل عيوني العقل وتبعدْ بنظرها عن النجومْ للشخصْ السارحْ ع يمينها .. ضحكتْ مطولا وهيه تمدْ يدها لهْ وتحطها على بطنها وهيه تراقبْ اهتزازْ بطنها وحركته ..
قلتْ بفرحه : مستانسْ هههه ..
خاليه وهو يبتسمْ وهو يشيل يده بعد شويه : يا ربيه عليهْ .. فديتْ قلبه ولد خاله ..
ابتسمتْ : ان شاء الله يكونْ نسخه عنه ..
خاليه : وان شاء الله يبعد عنه المرضْ ولا يذوقْ لي ذقته
قلتْ بهدوء وأنا أناظر الأرضْ : بس الحمدلله صحتكْ الحينه وايد أحسنْ ..
قال بصوتْ حسيتْ بالألمْ فيه : الحمدلله ..
قلتْ بتساؤول : هب ناوي تفكر بالموضوع لي خبرتكْ عنه ..
رد بسرعه : اذا زقرتيني حتى ترمسينْ عن هالموضوعْ خبريني حتى أمشي ,, ترانا تناقشنا به وايد
قلتْ وأنا أمسكْ يده : يا خاليه كم بتعيشْ .. فلوسكْ وحلالكْ ها كله ما فكرتْ بيوم لمنو بيتمْ وشو بيكونْ مصيره بعد عمر طويل ان شاء الله .. هب ناوي تييب لكْ ولدْ يحمل اسمكْ ..
خاليه : ومنو هاي لي بترضى بواحد سقيم مثليه وبهالعمر .. يالريمْ الموضوع هب سهل ..
قلتله وأنا أبتسمْ : انتْ عزمْ وخل موضوع البنتْ عليه .. طلبكْ أعرفه والمواصفاتْ لي تريدها بعد أعرفها .. انتْ قول يلا .. و بتشوفها بينْ يدكْ بعد ساعه
ضحك : ساعه عاد .. اخرطي ع قدج ..
منصور لي يا صوبنا : ضحونيه وراكم
قلتْ وأنا أطالع خاليه : ما تخبره بشي سر بيني وبينك
منصور : أفااا
قلتْ وأنا أناظره بنص عينْ : هيه شراتْ ما انت عندك اسرار خاصة معاه .. أنا بعد ..
منصور : لا أنا أحتج ..
قلتْ وأنا أنشْ : احتجْ كثر ما تبا ماشي تعرف ،، خاليه أمانه ما تخبره و ترانيه أريد منك الأنسر .. برايكم بسير أزهبْ جنطة ريلي وراه رحلة باجر ..
منصور : أوه تطوراتْ
خاليه وهو يشوفنيه وأنا أصعد الدرياتْ : هيه ما تدري قبل كانتْ تتصل كل يوم هالحينه اتصالاتها بالقطارة .. حتى من رديتْ هاي أول مرة أشوفها بها ..
قلتْ وأنا أوقفْ عند الدري الأخير : والله الحمل متعبني وياه .. هب من شي ثاني .. وسيف رحلاته هالايامْ زادتْ بس أشيل وأحط بهالملابس بالجناط من جيه ..
خاليه : أووه والله تطوراتْ استويتي حرمة بيتْ ما شاء الله
منصور : هيه يقولكْ حتى المطبخْ قامتْ تحدره
قلتْ وأنا أحسْ بالصيحة : بس تطنزو عليه انتو .. انا الغلطانة لي ايلس عندكم
منصور : شفيجْ نسولف
هديتهم .. وأنا أحسْ بالدمعه بتنزل .. همْ يتستخفونْ دمهم .. وأنا أحسْ بالغصة .. حياتي معّ سيف صايرة شرا المد والجزر يوم حلو ويومْ مر .. صار حمدانْ شرا الشبح لي من يشوفه سيف يراقبْ كل تصرفاتي قعدتي ووقفتي صرتْ أكره أقعد بمكانْ يكونْ حمدانْ موجود فيه خوف من كلام سيف وشكه .. هل اعترافي لسيفْ كانْ هب بمحله .. ؟! بس الأهمْ انْ يده ما عادتْ تنمدْ عليه .. ولا يقسى عليه .. بسْ بروده كل يوم يزداد .. وأحسْ انه يتعمد يبتعدْ عنيه برحلاته الزايده .. ~
يتبعْ الأربعآء .. // أعتذر عن فصل الأحد سأكونْ يومها منشغله قليلا ..
موعدنا الأربعاء مع الفصلينْ [ الرابع والخامس والثلاثينْ وهما ما قبل الأخير ..
|
16-06-11, 01:18 AM
جديد مواضيع قسم القصص المكتمله من وحي قلم الاعضاء
العرض العادي
