السلام عليكم ورحمة الله وبركاته

أولا أحب أشكر أختي أوركيد عالاستضافة و آسفة عالتأخير أحس أني جننتك سوري ... شوفوا ذا أول درس ... لا تثقون بأوقات أي إنسان يدرس طب ولا طبيب << خبصتها كني هههههه
ما ادري اختار لكم أي قصة وأي تجربة ، أكثر شي نشوفه بالمستشفى هو التجارب من كل الأنواع والأغلب التجارب المأساوية ، بس بأختار شي أقل مأساوية عشان ما أسبح الموضوع بالدموع 
أكيد قلتوا دامها طب بتتكلم عن الصحة ، وذا فعلا اللي بأسويه ما أحب أخالف التوقعات <<< محد درى عنك بس خلصينا خخخخخ...
جديا ، كلنا نعرف إن الله أنعم علينا بنعم لا تحصى .... بس ما ادري لو فكرتوا يوم بتمعن بكل نعمة ما نحس فيها ، ونشوفها شي اعتيادي وطبيعي ، أنا ما كنت أفكر ... ما فكرت اعد أنفاسي إلا لما صرت اشوف مرضى يقدرون يعدون أنفاسهم من كثر ما يعانون مع كل نفس ياخذونه ، لو قدروا ياخذونه ، وما قد فكرت بنعمة إني اقدر انام بدون ما انكتم إلا يوم صرت اشوف مرضى ينامون جالسين عشان ما ينكتمون ... وما قد فكرت بنعمة الحركة إلا يوم شفت مرضى ما يقدرون حتى يرفعون يدهم يأكلون بنفسهم وبالتالي يحتاجون من يأكلهم ويشربهم ويلبسهم ، وقيسوا على ذا كل شي تفكرون فيه....
أحد الأيام السابقة كان يوم مزحوم , كان لازم أنا وصديقاتي نمر على عدد من المرضى نفحصهم والنتيجة إنه ما كان عندنا وقت ، و على صلاة الظهر سرقنا الوقت عشان نصلي ، بعد ما خلصت صلاة كان عندي لستة محترمة باقية من المرضى، لكن حسيت بالجوع و كمان رغبة بقضاء حاجة وكان ذا الشي ضد مخططاتي اللي ما تشمل إلا إني أخلص القائمة اللي معاي ، بداخلي تذمرت بشدة ، ليه هالتعطيل وخلاص انتظر للبيت و كلام كثييييييييير مر ببالي ، طبعا طنشت وقررت إني ما راح استجيب ل( التعطيل) وطالعت بأول مريضة بقائمتي وانطلقت لها ولسه داخلي أتذمر من ألم بطني والشعور الغير مريح اللي أحس فيه ..
دخلت للمريضة وكانت مبتسمة ، ترى نادر أشوف مرضى مبتسمين وهي لفتت انتباهي لأن ابتسامتها ما كانت عادية كانت ابتسامة من القلب وتدل على راحة ، طالعت بعمرها لقيتها بأوائل الأربعين وكان شكلها واهتمامها يدل أنها أصغر ، بديت أسألها عن مشكلتها و هنا كانت صدمتي ، كانت مصابة بسرطان في القولون و خضعت لعملية فشلت بإنها تحد من المرض وهي بالمستشفى بسبب مضاعفات المرض...وكانت تقولي ..بطني تألمني بس الحمدلله على كل حال ..نعمة من الله ..
جلست فترة صامتة لأن آخر شي توقعته تكون المريضة المبتسمة بتفاؤل مشكلتها بهالحجم ..
وبديت الفحص ، يوم بديت اركز بديت اشوف نقص الوزن والشحوب اللي هي عليه ، اشياء دايم من اول ما ادخل لمرضى بالمراحل النهائية من الامراض الخبيثة اتعرف عليها على طول ، بس ما قدرت اشوفها فيها إلا بعد تركيز ..يمكن الجو اللي كانت فيه نجح بتشتيتي ..
كشفت بطنها أشوف و هنا كمان كانت مفاجأة ثانية ، مو بس شفت آثار العملية الكبيرة ولا بس كيس تفريغ البراز وانتم بكرامة اللي كان مركب بالبطن بس ذهلني الانتفاخ , كانت بطنها منتفخة بشكل غريب وغير متساوي يوم بديت افحص كان ظاهر إنه غازات متجمعة في الأمعاء وبأماكن كان في كتل و أشياء ما عرفت اتعرف عليها ، بس كلها كانت تعطي انطباع إن الألم اللي ذكرته لي مو بس موجود إلا موجود بشدة ، كانت طبعا تتبرز بكيس خارجي لانهم استأصلوا الجزء الأخير من القولون ، وما أدري لو احد جرب ألم الغازات يوم تتجمع بمنطقة معينة ، ألم مزعج جدااا ،كل ذا والمريضة الله يشفيها تحاول تتمسك بالتفاؤل و عدم التذمر رغم كل الألم ...
عارفين طبعا إيش كان يدور براسي طول الوقت ؟ كنت اقول شوفي يا غدير النعمة اللي تتذمرين منها قبل لحظات ، شوفي ردك على تفضل الله عليك ، شوفي كيف الناس تعاني لشي تسوينه كل يوم ويا ليت تحافظين عالأذكار بكل مرة تدخلين فيها وتخرجين ، شوفي ضعف الإنسان وعجزه ...
أقدر أقول إني تعلمت كثير من إنسانة الله يرزقها الشفاء والعافية ... كل الأذكار اللي وصانا فيها الرسول اللهم صلي وسلم عليه تذكرنا بهالنعم ، ويا ليت نحافظ عليها عشان كل مرة نقولها نتذكر ونشكر الله ، الصحة فضل كبير من الله ، فضل كبير إنك ما تحتاج دكتور ممكن يكون يخاف الله فيك وممكن تكون آخر همومه وما درى عنك ، ادعوا دايم إن الله يديمها عليكم وعلى من تحبون ، واتذكروا أخواننا المرضى بالشفاء وذا أقل شي نسويه ....
أتمنى تكون تجربتي مفيدة لكم ، ورسالتي بالمختصر إنه دايم أشكروا الله على ما تفضل عليكم ، أشياء نحصيها والكثير ما نقدر نحصيه ...

كان ودي أحط لكم تجربة فرفوشية و الحياة حلوة بس بالاستضافة الجاية إن شالله <<< عجبني الجو..خخخخخخخخ...سعدت بوجودي من جديد هنا وإن شالله أرجع بعد ما اخلص من هالسنة المرعبة ...واستودعكم الله على أمل اللقاء بكم في وقت لاحق <<< سرقتها من مكان بس مدري من وين ..خخخخ

مع السلامة