كاتب الموضوع :
نسايم نجد
المنتدى :
الارشيف
ادري انكم بتلوموني اني مانزلت البارت امس لكن نزلته اليوم وباذن الله بارت بكره بيكون الفجر
بارت اليوم بارت طويل وبارت انتقالي وظهور المكشوف وتكملته بكره باذن الله
في بارت اليوم بتحقدون اكثر على تركي وامه
قي بارت اليوم مفاجئة بتفجرها لكم ام سالم
في بارت اليوم انكشاف سر نوف وظهور الظرف الي كانت فيه جرايم ناصر الي انشغل عنه ماجد
بارت اليوم بارت مليئ بالاحداث كنت اتمنى اني اكملهم ويكون مع بارت بكره ويصيرون بارت واحد
لكني ما قدرت لان الاحداث تجر بعضها وتعبت وما وصلت للي ابيه لو كان الوصول له بصفحه تحملت وكملت لكن يبي من صفحات
قراءة ممتعه
الرجاء عدم طمر السطوور
البارت السابع والعشرون
مر شهر على ابطالنا
عند ام سالم
فرحانه برجعت عيال ولدها ناصر وقلبها محروق على حال تركي الي تغير كثير صار كل يومه برى ما يرجع الا وقت النوم وتكون نايمه وما تشوفه
سالم
مشغول مع ابو فواز بتاسيس شركته الجديده ودخل شريك معه على طلب من ابو فواز
هيا
مشغوله مع ماهر وفارس الي ترجت شوق تكون مسئوله عنهم
من بعد الي صار بين شوق وجدتها وام سالم ماسكه لسانها عن هيا وهذا الشي مفرح هيا كثير وتتمنى خالتها تستمر كذا وما تتغير
تركي
يحاول يشغل نفسه بالشغل يمكن ينسى عشقه لكنه قبل لا يحط راسه على المخده يطلع صورتها ويحضنها ويتكلم معها ويناجيها يشتكي لها وجع العشق والحرمان وغرقها بكلمات العشق وقبل لا يرجعها تحت فراشه باسها بحب
عند ساره
مبسوطه برجوع شوق وكل يوم لهم سوالف مع بعض
عند شوق
اجلت دراستها لسنه الجديده ونقلت نومها لغرفة ساره وصارت تحوس بساره وتطبق فيها مكياج الخدع وساره عاجبها الوضع
سالم ولد ناصر
طفشان من المستشفى لكن ماخر طلعته لانه للحين ما سترجع صحته بالكامل علشان يقدر يواجه امه
مازال يمثل الغيبوبه لما يزورونه عمانه وجدته
زارته شوق وتاثر من وجودها وكان بيكشف نفسه لكن بصعوبه قدر
عيال ناصر وسعود / لا جديد بحياتهم
ثامر
قابل ابوه مرتين عند عمه وابوه وعده اذا خلص شغله يزور سالم وبعده رجع لسالم ومن بعدها ما تركه
عند نوف
ساكنه عند مها لان ابو ثامر انشغل بالرياض ويمكن سفرته تطول اكثر شهر اشترت الكتب الي قالت عنهم مها وبدت تقرها وستفادت
لكن ماجاء فرصه تختبر الي قرته على نفسها
زارت سميه وعزتها وسئلتها عن الظرف وقالت انها ما شافته وبعده دخلت شقتها مع مها يدورونه لكن ماحصلوه
وتاكدت انه مع سوزان وبدا الخوف يدخل قلبها
عند مها
مشتاقه لزوجها الي قال لها بيغيب سبوع غاب شهر والعذر انه مالقى الفلتين الي يبيهم
كل يوم يتصل عليها وهي ترد عليه بحب وداخلها مقهوره منه
عند ماجد
من بعد موت نوره منطوي بغرفته اهمل شغله وشكله اعتزل الناس
ما شاف سيف من اخر مره ويتجاهل اتصالاته اذا نام حضن فستان نوره ودموعه على خده
عند سميه
متضايقه وموجوعه على حال اخوه الي صار لا ياكل ولا يطلع من غرفته اهمل بناته واهمل صحته فكرت كم مره تتصل بسيف يجي يطلعه من عزلته وباخر لحظه تتراجع
عند بنات ماجد
تاثرو بالبدايه وبفضل سميه خف الحزن وتاقلمو على فقدهم لامهم لانها كانت قبل لا تموت غايبه عنهم وهذا الي سهل عليهم يتعايشن مع موتها
سيف
مشغول تفكيره بماجد الي ماشافه من شهر وفوقه ما يرد على اتصاله خايف صاير فيه شي فكر انه يزوره في شقته لكنه تردد
عن سوزان
ماجله انتقامها من نوف لين تهدا الاوضاع ما تبي تفتح العيون عليها
وائل
كل يوم نومه عند سوزان الي ادمنت وجوده صاير يترجاها تجيب نوف لعندها والباقي عليه لكن سوزان تعصب عليه ورافضه هالشي لانها بتتورط اكثر منه
عند ام صقر
لاجديد بحياتها فاتحت ديما للمره الثانيه بخطبتها لنايف وحاولت معها انها توافق لكنها اصرت على الرفض وماحبت تجبرها على الزواج ويصير لها ماصار لمنى لما اجبرتها تتزوج ولد اختها
صقر
من الشغل لبيتهم لبيت ركان وبعض الاحيان يتعشى وينام عند صديقه مبسوط بورقة نقله وامه فرحانه وبينتظر لين تستقر اوضاع صديقه وينقلون سوا
من بعد اخر مره ماجابت امه له سيره ساره
عن راكان
وصلت له ورقة نقله لرياض مع صقر الي بتكون بعد شهرين بياجل النقل لين تجي زوجة ابوه وتستقر الاوضاع وبعده بينقل وكلم تركي وطلب منه يوفر له فلتين جنب بعض
وتركي كان يملك فلل جنب بيتهم عارضها للبيع كل فليتين لاصقين في بعض وبينهم وبين بيت اهله شارع فرعي كل فلتين تختلف عن الفلتين الثانيه فلتين صغار وفلتين كبار
طلب ركان يحجز له الفلتين الكبيره الي لازقين في بعض
ومشكله الفلل انها تفتح على حوش بعض بباب جانبي تصلح لعايله وحده
ديما
لا جديد بحياتها من الجامعه للبيت واحيانا تتقابل مع مرام ويطلعون لسوق مستغربه غياب سلوى اتصلت فيها لكن جوالها كان مغلق
نجود
جاء عندهم بدر وتملكت والزواج بيكون باخر الاجازه
عند منى
من مدرستها لبيتها بالبدايه كل يو طالعه لمحلات اثات وبخلال اسبوعين اكتمل كل الاثاث
مرتاحه انها ماشافت سلطان بعد ما تركت شقته
ومهمومه من احلام ولدها المتكرر خايفة من حلمه لانه نفس الحلم صارت تتقرب من عيالها كانها بتفقدهم
و ترفض انهم يروحون بدونها خايفه الحلم يتحقق ماتبي تعيش بدنيا بدون عيالها
عند وليد
كل ليل يفز مرعوب بسبب احلامه الي كانت نفس الحلم كان يحلم انه مع ابوه وغلا بسيارة مبسوطين يضحكون وفجئة انقلبت السياره وشاف امه من بعيد تحاول تقرب منهم وتنقذهم لكن كل ما قربت خطوه بعدت اكثر واذا حس بروحه تطلع يقوم مفزوع من النوم
عند ندى
حياتها مع سلطان بارده امها وابوها لما اعرفو ان منى ساكنه فلتها زاروها ومعهم ندى وشترو لها هديه ثمينه للبيت استقبلتهم منى بحب
سلطان
مشتاق لمنى امنيته انها تتصل عليه وتطلبه يجي و متاكد ان امنيته مستحيل تتحقق وكرامته تمنعه انه يزورها او يشوفها
شاف وليد بمدرسته ووصله للبيت وغلا ما شافها
مو راضي يتقبل ندى كابديله عن منى لكنه يحاول انه ما يظلمها عايش معها ببرود
عند عبدالله
نقل لمدرسه نايف بفضل واسطة اخوه صقر حس براحه كثير وحب التعامل مع الصغار اكثر من الكبار تحدد زواجه بعد زواج نجود بشهر
عند نايف
متضايق من بعد ما بلغه عبد الله برفض ديما الكلي لزواج مو له شخصيا وانه كان متوقع الرفض بسبب طلاق امها وابوها
قرر ينتظر فتره وبيرجع يخطبها حاطها براسه ومستحيل يتزوج غيرها هي محتاجه الي ينسيها حرمانها من امها وابوها وهو محتاجها تنسيه ظلم اخوه والوحده الي عايشها متاكد انها هي المناسبه له
عند ام مروان
متضايقه على حال تهاني صارت تبكي حرقه على حال تهاني والحزن الي عايشه فيه بعد موت امها
ابو مروان
من بيته للبقاله ينتظر ولده يرجع علشان ينفذ وصية ام تهاني وياخذ بنتها عند عايلتها مع انه متوقع بيرفضونها
مروان
بجده بين السهر والبنات والمجون اعجبه الوضع هناك وبقى مع عامر الي متكفل بكل شي لانه عارف وضع صديقه
كل يوم يتصل بسميره ونجلاء سميره تعلقت فيه كثير وصارت هي الي تتصل عليه
سلوى
من بعد موت خالتها ما دوامت بالجامعه وجوالها مقفلته موجوعه على حال تهاني الي تغيرت كثيررررررررر صارت ساكته ودايما سرحانه
تهاني
من بعد موت امها صارت منطويه وساكته ودايما سرحانه وزاد الحقد والكره بقلبها لابوها واكثر شي لزوجة ابوها الي تعتبرها متطفله اخذت مكان امها والاكيد هي السبب بطلاق امها
متشوقه تشوفها علشان تنكد عليها عيشتها وتبرد فيها حرمان السنين
نبداء
عند سميه
جالسه بالصاله متضايقه على حال اخوها قررت تدخل عليه وتجبره يطلع من صومعته بالغصب حاله ما عاد ينسكت عنه
طقت الباب وبعده دخلت شافت الغرفه مظلمه
شغلت النور سمعت صوت ماجد بتعب / قفلي النور
سميه قربت منه وبحزن / لمتى بتجلس بغرفتك هاجر الكل واولهم بناتك الي تسويه انتحار وربك يعذب المنتحر
ماجد بصوت مخنوق / سميه الله يعافيك اطلعي لتخليني اطلع وما تعرفين مكاني
سميه بقهر / ما توقعتك ضعيف من اول مصيبه تهتز وتفقد ايمانك
ماجد بعصبيه / سمييييييييييه
شافت سميه جوال اخوها ينور واضح انه على الصامت قربت شافت اسم سيف
خلاص ما تقدر تصبر وعجزت في اخوها يمكن صديقه يقدر بطريقته يطلعه من الحاله الي فيها سحبت الجوال وطلعت
عند سيف
لما فقد الامل انه يرد تفاجئ بصوت انثوي
سميه بجديه / هلا اخوي معك اخت ماجد
سيف بجديه / وينه ماجد عن جواله من شهر اتصل وما يرد
سميه بصوت باكي / ماجد من موت زوجته وحالته ما ترضي الكافر لاياكل ولا ينام وحابس نفسه بغرفته اخاف انه يلحقها
سيف برجوله / اقدر ازوره بالبيت ولا فيه مانع
سميه بجديه / يا ليت تزوره وطلعه من الحاله الي فيها مهمل بناته الي مشتاقات له
سيف بجديه / بجيكم الحين ياليت تاخذين البنات وتطلعين فيهم ما بيهم يشوفون ابوهم وما ضمن نفسي يمكن اسحبه قدامهم وتهتز شخصيته
سميه برجاء / الله يخليك لا تقسى عليه ترى الي فيه كافيه
سيف بعصبيه / سوي الي قلته والي بسويه بماجد ماني بماخذ شورك فيه
سميه بعصبيه / صدق انك همجي ومتوحش بطلع بعد ربع ساعه وبترك لك الباب مفتوح
قفلت الجوال بوجه ما نتظرت رد منه هالادمي مستفز ويقهرها
سيف ولع قهر شلون تتجرء وتقفل الجوال بوجه وفوقه تسبه
سيف بحقد / هيييييييييييين بعلمك منهو الهمجي والمتوحش بعدك ما شفتي شي
عند سميه
دخلت عند البنات شافت ريما سرحانه وحزينه هي كبيره وتفهم معنى الموت ووجع الفراق
سميه متاكده انها تفكر بامها وحزينه على موتها
سميه بحنان / ريومه وش رايك نزور خالتك نوف ومها
ريما بحزن / ونترك بابا
سميه اوجعها قلبها / بابا بيزوره صديقه واذا طلع من عنده رجعنا
ريما بحزن / عمه متى يرجع مثل اول يجلس ويسولف معنا
سميه قربت منها اكثر وحضنتها / قريب بيرجع مثل اول ياروح عمتك لا شوف نظرات الحزن هذي بعيونك ترها تذبحني يله البسي بنطلع قبل لا يجي صديق ابوك
اسحبت ريما نفسها من حضن عمتها وصارت تمسح دموعها مشت من قدام عمتها وفتحت دولابها وطلعت لها لبس ولحنين لبس
وقفت سميه وفتحت الدولاب وطلعت لها فستان طويل لونه بني مشجر وحجاب بني
دخلت الغرفه بدلت وطلعت لقت البنات جاهزات وميار ملبستها الشغاله
طلعت من الشقه نزلت وهي عند الباب الشارع تقابلت مع سيف تبادلو نظرات الحقد صدت عنه سميه وطلعت بدون ما تعبره ركبت السياره
عند سيف
وقف دقائق وهو يغلي من حركة سميه انتبه لنفسه انه واقف بالحاله
مشى وطلع فوق وصل لشقه لقى الباب مفتوح دخل والمشكله ما يدري وينها غرفة ماجد شاف الشغاله بالمطبخ
سيف بجديه / وين بابا ماجد
الشغاله اول ما شافت الرجال الغريب خافت وارتاحت لما سال عن ماجد
اشرت الشغاله بيدها على غرفة ماجد / هذي غرفه
وصل سيف للغرفه طق الباب لكن ماسمع رد فتح الباب شاف الغرفه مظلمه وكئيبه وريحت العفن منتشر بالغرفه لانه مغلقه ماتتهوا
قرب من مكبس الانوار شغل كل انوار الغرفه
ماجد قفل عيونه من قوة الاضاءه / سميه قفلي الانوار
انصدم وهو يشوف ماجد انسان ثاني نحف وبانت عظام وجه والشعر مغطي وجهه وشكله مبهذل
سيف بعصبيه / انا سيف الي يتصل عليك ومطنشه واثاريك معيش نفسك بمقبره وانت عايش
ماجد وفتح عيونه / سيف وش جابك وكيف دخلت
سيف بعصبيه / الي جابني انت وكيف دخلت اختك وبناتك طفشو من البيت بسبتك مايبون يعيشون مع اموات
ماجد بصدمه / شلون تركو البيت
سيف بعصبيه / وليه يجلسون وانت ما تدري عنهم حين ميتين عايش مع شبح الاموات والاحياء مطنشهم
ماجد بعصبيه / اخلص قول الي عندك وطلع مالي خلق لمقابل احد
سيف بعصبيه / متى اخر مره شفت شكلك بالمرايه الي اشوفه مو ماجد صديقي هيكل انسان واغلب الظن انك من شهر ما تسبحت لان الغرفه ريحتها خياس
ماجد بضيقه / يله مع السلامه
سيف بعصبيه / ماجيت ودخلت غرفتك علشان اطلع بدونك اذا بطلع انت قبلي
ماجد باصرار / ماني بطالع
سيف بعصبيه / بتطلع وبتقابل شغلك وبناتك غصب عنك
ماجد بعصبيه / شلون بتغصبني
سيف بعصبيه / ماضنتي يا صديقي انك تجهل وش ممكن اسوي
اتقي شري وادخل الحمام اخذ شور ولا والله لدخلك واسبحك
ماجد جالس ما تحرك قرب منه سيف وسحبه بيده وقفه غصب عنه
سيف بعصبيه / بتدخل ولا انفذ حلفي
ماجد بضيقه / بدخل
دخل ماجد الحمام وانصدم وهو يشوف شكله بمراية الحمام اخذ شور على الماشي يبي يفتك من حنت صديقه
طلع لقى صديقه واقف عن باب الحمام
ماجد بضيقه / تسبحت انبسطت
سيف بجديه / واضح ان الماء يدوب لمس جسمك لكن بعديها لك يله البس هدومك وبنتظرك بالصاله
ماجد بعصبيه / ما خبرك غثيث ولصقه
سيف بعصبيه / انتظرك بالصاله تتاخر دقيقه بدخل اطلعك بطريقتي
ماجد بضيقه / والله انك بلشه
طلع سيف من الغرفه وجلس بالصاله دقائق طلع له ماجد واضح عليه العصبيه
جلس على الكنب وبعصبية / خلصت اوامرك ولا عندك شي ثاني
سيف بجديه / يله قدامي عازمك نتغداء بالمطعم
ماجد بعصبيه / الي بفهمه منهو معينك وصي علي
سيف بسخريه / مدامك ما تعرف مصلحتك عينت نفسي وصي عليك احميك من جنانك يله اخلص علي
وقف ماجد وبعصبيه / اللهم هاتك يا طولة البال
سيف وهو يمشي / صادق الله يجيبها طولت البال الي بدت عندي تخلص
مشى ماجد وراء صديقه مغصوب نزل تحت وقف سيف قدام سياره ماجد
ماجد بستغراب / جيت بسيارتك
سيف / ايه لكن بركب سيارتك وانت الي بتسوق لانك مرتاح شهر وانا اتعبتني السواقه والمشاوير
ماجد بتهرب / مفتاح السياره فوق بطلع اجيبه
سيف بجديه / ابشرك مالك مجال تتهرب المفتح معي
ماجد بصدمه / شلون اخذته ومتى
سيف بسخريه / اخذته من ثوبك الي معلق له شهر والمفتاح بجيبه
حذف سيف المفتاح لصديقه مسكها ماجد وفتح الباب وركب وركب سيف جنبه
ماجد التفت على صديقه وبضيقه / وين تبي تروح
سيف بسخريه / والله انا جوعان ابي مطعم وياليت تفرد هالكشره لاني ابي نفسي تنتفتح للاكل مو اغص بلقمتي
ماجد حرك السياره بضيقه / مايهك الا بطنك والباقي بطقاق
سيف فهم نغزة صديقه / والله وش ذنبي اذا الباقي مافيهم عقل ولا يعرفون ان الصبر عند المصيبه
حرك السياره ومارد على صديقه
عند سمية
في السيارة اتصلت على جوال نواف الي اخذت رقمه منها لما زارتها
عند نوف
كانت جالسه بالصاله مع مها وتسولف ومها شارده وسرحانه
نوف بحنان / وش فيك مها
مها صحت من افكارها / كنتي تقولين شي
نوف بابتسامه / شكلي من اليوم اتكلم مع نفسي وعقلك وقلبك بالرياض
مها بضيقه / قال بيغيب سبوع والحين غايب شهر واكثر وعذره انه مالقى طلبي
نوف بستغراب / وش طلبك
مها / طالب يشتري فلتين لازقين في بعض
وطالعت بنوف بحب / ابي مثل ما تجاورنا بفرنسا نتجاور بالرياض مانبي الدنيا تفرقنا عن بعض ولو بالسكن
نوف رمت نفسها بحضن مها هذا كثير مها عوضتها عن الحرمان والفقد وصارت لها الام والاخت والصديقه الي تخاف وتهتم فيها
مها رفعتها عن حضنها / انتي ماعندك الا الدموع فرحتي بكيتي زعلتي بكيت والحل
نوف بصوت باكي / عيوني تعودت على البكا والدموع واذا كنت فرحانه او حزينه تنطق قبل قلبي
مها بجديه / مابي اشوف دموعك سواء فرحانه او زعلانه لانه ترمز لضعف وانتي قويه لا تسمحين لاين كان ينزلها واذا بكيتي ابكي بمكان محد يشوفك فيه لا تبينين لناس ضعفك ويدمرونك انتي وراك مشوار وعيشه مع وحوش لازم تكونين وحش مثلهم
نوف بضيقه / تتوقعين اصير وحش وانا قلبي قلب عصفور
مها بجديه واصرار / ما سمعتي المثل الي يقول اذا لم تكن ذيبا اكلتك الذئاب لازم وغصب عنك تصيرين ذيب ما قول تظلمين ابيك تاخذين حقك وما تسكتين عن الي يظلمك
نوف بياس / ادعي لي يامها اصير مثل ما تقولين
مها بعصبيه / بدينا حركة الضعافه ادعي لي بايدك تكونين ضعيفه او قويه حطي في بالك نوف الضعيفه ماتت واندفنت وانولدت بدالها نوف القويه حطي براسك كلمتين ( انا قويه كرريها دايم وصدقيني وعن تجربه بتتغيرين و حطي في بالك الارنب مع الاسود ما يعيش
سمعت صوت جوالها اخذته من الطاوله الي قدامها شافت رقم سميه
نوف بابتسامه / هلا سميه
سميه بابتسامه / شخبارك
نوف بجديه / الحمد لله بشريني عنك وعن اخوك والبنات
سميه بضيقه / كلنا بخير جايتكم زياره مع البنات ابيهم يغيرون جو
نوف بترحيب / ياهلا فيك انتي والبنات
سميه بمزح / ما كلمت انتظر ترحيبك مكلمه اسئلك عن العنوان
عطت العنوان لسميه وقفلت الجوال
مها كانت مستمعه / بتجي سميه
نوف بجديه / ايه على الاقل نغير جو
مها باعجاب / سبحان الله هذي الانسانه ماعرفتها الا من ايام ودخلت قلبي كاني اعرفها من سنين
نوف بصدق / سبحان الله تفرض حبها واحترامها على الي قدامها
مها بجديه / بدخل اسوي غداء
نوف بسخريه/ من متى ادلين طريق المطبخ
مها مشت من قدام نوف / انتي خليك بمكانك وبتشوفين ابداعاتي
نوف بجديه / طيعيني وخليني اطبخ بدال عفيستك الي تاليها لزباله وهذا فيها تبذير
مها بجديه / مصدقه ان محد يعرف يطبخ غيرك انتظري وبتشوفين
نوف بسخريه / بنشوف
في شركة سالم وتركي
كان سالم جالس بمكتبه مشغول بالاوراق دخل عليه تركي جلس مقابل كرسي اخوه ولحزن والهم مرسومين على وجهه
تركي بجديه / طالبني وش عندك
سالم بضيقه / عاجبك حالك تمشي كانك ميت وينه تركي الي كله حياه وحماس لشغل
تركي بضيقه / ليه كل هالكلام ما شوف نفسي قصرت بشغلي
سالم بضيقه / ما قصرت بشغلك لكن قصرت بصحتك وتركيزك كم مره اراجع اوراق بعد ما توقع عليها القى فيها اغلاط وتودي بداهيه تدري من كم يوم موقع على مناقصه لو ما راجعت الورقه بعدك كان خسرنا مليون ريال
انتبه لشغلك يا خوي ابيك لي عون وسند
اجل موضوعك الشخصي لرجعت البيت
لا تنسى ان مسئولين عن حلال ايتام لازم مانضيع فلوسهم واكيد ما يخفيك عقاب الي يضيع مال اليتيم
تركي بسخريه / من قال لعيال اخوك شي
سالم وقف من الكرسي بعصبيه / ما هقيتك يا خوي تاكل اموال الايتام
تركي بعصبيه اكبر / هذا اذا كان لهم اموال تدري اخوك الغبي مسجل كل ممتلكاته والفله حقته باسم الحقيره زوجته لا وطالب مني اتزوجها
وازيدك كانت بفرنسا وبسبتها انحشت من فرنسا ورجعت عندكم
سالم بصراخ / يعني كلام هيا صدق ومنحاش بالعيال ماتبيهم يشوفون امهم
تركي بعصبيه وحقد / لو اخر يوم بعمري عيال ناصر ما يشوفون امهم
سالم فقد اعصابه / واخر يوم بعمري اذا صار هالكلام عيالها بيشوفونها ويتربون بحضن امهم لو متزوجه وغصب عنك
تركي بسخريه / الحقيره مكفاها الزوج الي
متزوجه جالسه بفرنسا كل يوم بحضن رجال وبالحرام
شلون تبيها تكون امينه على عيال وبنات اخوك لو اخذتهم صدقني بيمشون ممشا امهم امهم كان الي يربطنا فيها ناصر ومات الله يرحمه لكن عيالها عيالنا والي يدنسهم يدنسنا
زوجة اخوك الحقيره وصديقتها سو لي مكيده واجبروني اوقع تنازل عنهم تصدق ان اخوك ينجبر على شي مايبيه ونحشت بالعيال احميهم من امهم
سالم بصدمه / وش تقول وش تهذي لا ترمي المحصنات يا تركي وانت تعرف عقوبتها عن ربك
تركي بعصبيه وقهر / تتوقعها مني اظلم وحده برية بشرفها والله شوفت عيني وبحضنها واحد وسحبته بيدي هذي من حضنها وضربته
وعلشان يدارون الفضيحه جابو لي فرنسيه وسو تمثليه ما يصدقها بزر
سالم جلس على كرسيه وكلام اخوه مثل الصاعقه على راسه / وش هالمصيبه لا حول ولا قوة الا بالله ياليتك ياخوي ما قلت لي
وبرجاء / اوعدني ما تقول لاحد عن سوالف زوجة ناصر واولهم امك السالفه ادفنها هنا ولا اسمعك تتكلم فيها
تركي بقهر وحرقه / من غير ما تقول السالفه ماتنقال ومستحيل هالكلام يطلع مني لاي احد موعلشان الفاجره علشان عيالها ابيهم يمشون بين الناس مرفوعه روسهم
سالم بضيقه / اطلع لمكتبك
وقف تركي وترك سالم الي زادت همومه وضيقته من الي سمعه من اخوه
سالم بنفسه / معقوله باعت نفسها لبليس ومافكرت بسمعت عيالها الرياجيل وبنتها العروس من الي بيفكر يتزوجها ومها
حس بغصه وماقدر يكمل الكلمه / استغفرك ربي واتوب اليك يارب تحفظ بناتنا وبنات المسلمين من شياطين الانس والجن
عند تركي
طلع من مكتب اخوه ماله خلق يكمل بالشركه طلع من الشركه ركب سيارته بطريقه للبيت
عند ماجد
وصل مع سيف للمطعم وبعد ماخلصو ركبو السياره
سيف بجديه / بنروح سوء لشركتك من زمان عنها
ماجد بضيقه / وبعدددددددين صاير مستفز
سيف بسخريه / على الي بتقوله بتمشي كلامي فماله داعي تعترض من البدايه
ماجد بعصبيه / مدري شلون اطيعك واسمع كلامك
سيف بابتسامه / لانك تحبني وما تقدر على زعلي
سكت ماجد ويد سيف صارت تفتح الدرج الي قدامه بيشغل نفسه باي شي
شاف ظرف استغرب وجوده طلعه من باب الفضول
شاف مكتوب عليه سري
سيف بستغراب / ماجد وش فيه هالظرف
التفت ماجد لسيف وشاف الظرف / ياربي شلون نسيته هذا لقيته على الدرج وانا نازل وفيه اوراق وجواز سفر لكن مادري لمين
سيف بجديه / تسمح لي افتحه واعرف صاحبه اكيد محتاس وهو يدور عليه
ماجد بدون اهتمام / بكيفك
ركز ماجد عيونه في الطريق وسيف فتح الظرف وفتح الجواز وشاف صورة نوف
سيف باعجاب / الجواز لبنت مو أي بنت بنت تذبح بزينها
ماجد بسخريه / من متى يعجبونك البنات الي تشوفهم مثل الحشرات
سيف بجديه / والله الجمال غصب عنك يخليك تنطق لو انك حجر
ماجد بسخريه / ياليت ترحم بنت الناس من نظراتك الي احرقتها
قفل الجواز وطلع ورقة الي كاتبه ناصر بيده وفيها فضايحه
لما قراها سيف طلعت عيونه من قوة الكلام الي يقراه
انصدم ان ناصر صديقه الي تعرف عليه عن طريق ماجد يطلع بهالبشاعه وحش بلبس بشر لواحد قاله مستحيل يصدق لكن هذا مكتوب بخط ناصر الي مستحيل ما يعرفه
سيف بصدمه وبعصبيه وبصراخ / خسيييييييييييييس نذل شلون صادقته شلون ما كشفته ياليته حي وبين ايديني مجرم مجررررررررررم
ماجد انصدم من شكل سيف الي وجه اسود من العصبيه والقهر / وش فيك منهو الخسيس النذل
سيف بصراخ / ابي اقابلها ابي افهم منها
ماجد بصدمه / من تقابل تكلم
سيف بضيقه / زوجة ناصر ابي اقابلها
وقف ماجد بسيارته على جنب / لو سمحت عطني الورقه الي بيدك الي قلبتك وحاستك
سيف بضيقه / نصيحه لا تقراها اذا انا انهرت شلون انت
ماجد بعصبية / قلت لك هاتها مالي خلق لسوالفك وتحليلك لخالتي
مد سيف الورقه لماجد الي قراها وانصدم اكثر من صدمت سيف ولع قهر من صديق عمره شلون قدر يغشه ويمثل عليه الانسان الشريف الطاهر وهو اكبر مجرم استحقر نفسه انه كان صديق لمثل ناصر
ماجد بعصبيه وقهر / ياليتني كنت ادري بسوالفه قبل كان انا الي بيدي دخلته لسجن هذا مايخاف ربه قتل وظلم وزور
حرك سيارته بطريقه لبيت سيف
سيف بجديه / لازم اقابل زوجته ونفهم منها السالفه كامله
ماجد باصرار / اترك مقابلة زوجته علي المجرم مات وباقي شريكته
سيف بجديه / الي فهمته من الي قريته ان زوجته مظلومه كان اساس زواجه منها انه يتخفى بجرايمه فيها الي مايخاف الله متزوج طفله انتهك طفولتها و برائتها بجرايمه البشعه لا ويبيها تسامحه
ماجد بسخريه / من متى ادور اعذار للحريم زوجة ناصر حسابها معي
سيف برجاء / طيب بقابلها معك
ماجد باصرار / بوصلك لبيتك وزوجة ناصر محد بمقابلها ومتفاهم معها غيري
سيف بجديه / طيب وش بتقول لها حرام تظلمها فوق ظلم زوجها لها
ماجد بسخريه / من متى قلبك رحيم وبذات على صنف الحريم
سيف بعصبية / كل ما قلت لك شي قلت هالجمله هذي الي تبط الكبد
صحيح اكره الحريم بالمقابل اكره الظلم
وانت متاكد ان بنت الناس بريئه مثل ما ذيب بريئ من دم يوسف فماله داعي تتفرعن على هالمسكينه وتحط ذنوب زوجها فيها
ماجد بعصبيه / انزل ودور لك احد يوصلك لبيتك
سيف بعصبيه / بتوصلني لبيتي وانت ماتشوف الدرب
عند نوف
استقبلت سميه والبنات بحراره وكانت مها بالمطبخ
نوف قربت من ريما وحنين وحظنتهم بحنان / ياهلا فيكم وبعماتكم مشتاقه لكم كثيرررررر
ريما بحياء / حتى احنا مشتاقين لك
سميه وهي تدخل / شخبارك وينها مها
نوف بابتسامه / تسوي لك غداء بمناسبة تشريفك لها بالزياره
سميه وهي تجلس على الكنب / ماله داعي غداء جلستنا مراح اطول
نوف وهي تجلس مقابل سمية وبابتسامه / الكلام هذا قوليه لمها الي بتذبحك ان سمعتك
سميه بصوت عالي / مهااااااااا تعالي ماله داعي الغداء ما قدر اطول على ماجد
مها طلعت من المطبخ على صوته
وبابتسامه / مو بكيفك بتاكلين طباخي ترى نادر ادخل المطبخ واطبخ وانتي اليوم مميزه اني طبخت لك وجاية تقولين بطلع
سميه بابتسامه / تعالي سلمي ولا بتغلبيني بالصوت
طلعت مها وقربت من سمية وسلمو على بعض
سميه بمزح / الله يهداك كتمتيني من ريحة البصل والثوم
مها بابتسامه / شوفو النصابة اصلن طبخي ما فيه لا بصل ولا ثوم
سميه بستغراب / وش الطبخه الي ما فيها بصل ولا ثوم
نوف بابتسامه / الجبن والزيتون والمربى وال عسل ابشرك هذا غداك
سميه / ههههههههه وتحلفين علي ماطلع الا متغديه وانك اول مره تدخلين المطبخ وتطبخين تاليتها بتغديني معلبات
مها بابتسامه / تحسبيني نوف ما شاء الله عليها طباخه ممتازه وفوقه لها نفس بالطبخ لو تغلي ماء يطلع طعمه حلو اما انا اغسلي يدك مني مخربتني الطباخه لو بجلس بدونها بجوع
نوف بجديه / والله انتي مانعه نوف تدخل المطبخ تسوي على الاقل شي ينبلع ويبيض الوجه في ضيفتك
مها / سميه راعيت محل مو ضيفه وبتستر علي
سميه بجديه / اكيد ويشهد علي ربي اني حبيتك من اول ماشفتك ومعتبرك اخت
مها بحب / والله ياسميه ان تشرفت بمعرفتك واذا تذكرت انا بنفترق يضيق صدري
سميه بصدق / من قال اني بفارقكم وحده ساكنه وحيده ما عندها الا صديقه وحده غاثتها وان شاء الله بغثكم معها واعرفكم عليها ومتاكده بتحبونها
مها بجديه / شكلي بالرياض بتفرغ للمساير لاني بترك وضيفتي لرجعت هناك
سميه بجديه / ليش تتركينها بالعكس هناك بنحتاج وظيفتك بدال الوحده ما توكل محامي وتضطر انها تتكلم معه وتبين لها ظروفها على الاقل اذا صارت بداله محاميه بتقول مشكلتها لها بكل راحه وبدون خجل والمره تحس باوجاع المره الي مثلها
مها بجديه / ما سمعت ان وظيفتي ما طلوبه هناك او بامكاني افتح مكتب محاماه
سميه بجديه / وانا نفس الشي ماقد سمعت لكن يمكن بالايام يصير لان فيه تخصصات نسائيه جديده تفتح
نوف بقرف / وش هالدوله الي اعتمادها على الذكور وتهميش النساء
سميه بعصبيه / اسكتي لا اذبحك وادفنك بمكانك كله ولا اسمع احد يغلط على بلادي واسكت
نوف بسخريه / دولتك وش سوت علشانك
سميه / سوت كل خير وشكل من الي يدعون بالمساوه وتحويل البنت من نعومتها الى خشونه وتشتغل شغل الرجال
دولتنا معززتنا ومكرمتنا وحنا ملكات ببلادنا نجلس ورجالنا او اخونا يقومون بكل شي يخصنا
قولي لي وش استفدتي من الضياع والصياع الفرنسي
نوف بجديه / كلن معجب ببلاده وانا عاجبتني فرنسا
سميه بعصبيه / فرنسا مو بلادك ويا شين من يلبس ثوب غير ثوبه
نوف بابتسامه / مها وينه الفطور هاتيه قبل لا نتذابح مع بعض
مها وقفت وعيونها على سميه / لا تتعبين نفسك الادميه الي قدامك ممسوح مخها ومافي منها امل
دخلت مها المطبخ وسميه غيرت الموضوع وصارت تسولف طبيعي لانه مؤمنه انها ماتقدر تغير تفكير الشخص الي قدامها
عند تركي
دخل البيت شاف امه بالصاله
تركي قرب من امه باس راسها / شلونك يمه
ام سالم بزعل / دوب تذكر ان لك ام من زمان ما شافتك
تركي جلس بحرج / مشغول والشغل لفوق راسي
ام سالم بضيقه / حالتك ما ينسكت عنها واذا ما حليتها بنفسك انا بحلها بطريقتي
تركي بحزن / شلون بتحلينها بطريقتك
ام سالم / بخطب لك
تركي بتعب وياس / سوى الي تبينه واذا على الزواج النفس عايفته واذا تبين تزوجيني علشان انسى فتاكدي اني نفسي انسى لكن ماقدر
ام سالم بفرح / اخطب لك اميره
تركي بحرقه / ما عاد يهم من تخطبين اهم شي ما يصير الزواج الا بعد سنه لاني مستحيل اتزوج واخوي قبره ما نشف
ام سالم بحزن / الحي ابقى من الميت
تركي بتعب / يمه لا تخليني ارفض الموضوع من اساسه
ام سالم باستسلام / خلاص بعد سنه وان بغيت سنتين اهم شي ما ترجع وتظلم اميره
تركي بجديه / اتركي زواجي على جنب فيه موضوع مهم بقوله لك
ام سالم بحماس / قول الي عندك
تركي بجديه / لما رحت لفرنسا قابلت صديق ناصر وكان ناصر تارك عنده وصيه كاتبه بخط يده اخذت منه الوصيه وقريتها وكان مضمونها ان ناصر كاتب كل املاكه لزوجته وطلب مني اتزوجها ويكون زواجنا على ورق
ام سالم بصدمه / اخوك اكيد فيه شي جابره يكتب حلاله للي ما تنتسمى وهي م احترمت موته تزوجة بيوم وفاته
تركي وقف / وصيته غصب عنا لازم انفذها لانه كاتبها وموقعها بالمحكمه ومع زوجته نسخ من الاوراق
ام سالم بعصبيه / مستحيل تاخذ ريال واحد تبها تبسط مع زوجها بفلوس وتعب ولدي
تركي بضيقه / مو بكيفنا لو تقدم الاوراق الي معها للمحكمه حكمو لها انها تاخذ ممتلكات ناصر وحنا نشوف
ام سالم بحقد / تزوجها ونفذ وصية اخوك ويكون زواجكم على ورق واحرق قلبها وتزوج اميره عليها
ابيك تربيها مدام اخوك ماعرف يربيها وتعذبها وتحرق قلبها مثل ماحرقت قلبي على ولدي اخوك اكيد ماكان بعقله يوم كتب كل حلاله لها
تركي بضيقه / نسيتي انها متزوجه شلون تبيني اتزوجها
ام سالم بحقد / بفلوسك تشتري طلاقها وبفلوسك تتزوجها ولا تبيني افهمك بهالسوالف
تركي بقرف / يمه مااااااااااابيها ومستحيل تصير زوجتي هذي ما يشرفني يرتبط اسمها باسمي هذي توسخ الاسم الي يقترن باسمها
ام سالم بعصبيه / بتتزوجها غصب عنك مو بكيفك والله يا تركي لو مانفذت الي ابيه لانت ولدي ولا انا امك وقلبي بيغضب عليك وبكل صلاة بدعي عليك
تركي بخنقه / يمه انتي تكرهينها توقعت بتعارضين وترفضين اني اتزوجها ليش تبيني اربط نفسي باكره مخلوقه عندي على وجه الارض
ام سالم بحقد / بيعجبك فلوس اخوك وتعبه تتمتع فيها هي وزوجها واذا انت تكرها مره انا اكرها مليون مره
وزواجك لها على ورق حتى بيتها ما ابيك تدخله ولا تشوفها وبيكون زواجك منها عذاب لها ومنها فلوس اخوك ترجع لك وانت تكتبها لعياله
تركي اقتنع بكلام امه هو ينتظر الفرصه الي يرد لها الي سوته له بفرنسا وداخله حقد وكره مراح ينطفي الا بعذابها
تركي بحقد / لك الي تبينه واذا على طلاقها بطلقها منه بالغصب وبخليه يبيعها وبتعرف انها بلا قيمه عند الزوج الي فرحانه فيه واذا تبيني اتزوجها ابشري واذا على عذابها بتذوق مني العذاب الوان واشكال وبتتمنى الموت يريحها مني
ام سالم بانتصار / ايه الحين انت ولدي الي بيبرد قلبي في الي حرقته
في بيت مروان
ام مروان جالسه بالصاله حزينه ومتضايقه دخل عليها ابو مروان
قرب منها وجلس / اكيد متضايقة بسبب تهاني
ام مروان بحزن / ايه البنت من بعد موت امها تغيرت لا صارت تاكل مثل الناس ودايما ساكته وسرحانه
ابو مروان بجدية / مصدومه من موت امها ونصدمت اكثر لما درت ان ابوها الي طول السنين معتبرته ميت عايش وماسال عنها صدمتين براس توجع وتهاني بزر ماتتحمل هالمصيبتين سوى
ام مروان بضيقة / الله يسامحها امها الي ما حطت في بالها هاليوم وكذبت على بنتها واليوم بنتها بتدفع الثمن
ابو مروان بضيقه / البنت كبرت بعيده عن اهلها وابوها اكيد نساها وين بيتذكرها وهو ربي منعم عليه بزوجه وعيال
ام مروان بحرقه / الا متى توصلها لهلها البنت لازم تتعرف على اهلها اخاف الله ياخذ امانته وتضيع
ابو مروان بحرقه / انتظر ولدك الداشر الي من سافر لا كلم ولا سال كل ماكلمته القى جواله مقفل
ام مروان بضيقه / الله يحميه اخاف صاير فيه شي سفرته طولت
ابو مروان بحزن / ولدك كل بعد فتره يغيب وغيابه يطول ويرجع ولا معبرني ولدك كسر شيبتي لا لبسه ولا شكله مثل المسلمين شوشته نافشها كانه جني ولبسه اليهود ما يلبسونه
ام مروان بحزن / الله يهديه ويحميه من عيال السوء الي بيضيعونه
ابو مروان بقهر / ولدك يضيع بلد ادري بسوالفه البطاليه ودي اطرده من البيت يمكن البيت ينظف لكن بعدين اتراجع قلب الابو مو قادر يطيع على طرده
ام مروان دمعت عيونها كل ام تبي ولدها افضل الناس وتنوجع لسمعت شي عن ولدها الي مربوط بروحها
ام مروان بصوت باكي / الله يهديه ويسخره لنا
ابو مروان بحرقه / امين
عند سلوى
جالسه على فراشها وتهاني جالسه على فراشها وعيونها بالفراغ
سلوى بضيقه / تهاني ما صارت المفروض تفرحين ان ابوك عايش وعندك اخوان وعايله مو هذا الي كنتي تتمنينه
تهاني التفتت على تهاني وعيونها كلها دموع
تهاني بحقد / ابوي ياثقلها هالكلمه على لساني يا كثر ما تمنيت انطقها وكنت احضن صورته واحسد البنات ان عندهم ابو وهذا النقص عايش معي طول حياتي
ولما كبرت يقولون ابوك حي ولك اخوان وينه هالابو وامي تشتغل خدامه بالبيوت علشان تقدر توفر لي لقمه نظيفه وتخليني البس مثل الناس كنت احترق وانا اشوف امي على اوجاعها تطلع تخدم بالبيوت يا كثر ما ترجيتها اطلع اشتغل بدالها وتقول مابي لك الشقى والتعب
بسبته شاركتك انتي واخوك بجرايمكم مابي اضغط على امي بمصروفي
وبحقد / تبيني افرح انه تخلى عني وفضل عياله وزوجته علينا
زوجته تطفلت علينا اخذته من امي وجابت العيال الي المفروض اكون مكانهم وعايشه معه ومنتعمه بخيره احنا لنا الشقى وزوجته وعياله له الدلال والغنى
سلوى بحزن / كل هذا بقلبك يا تهاني ابوي بياخذك لهلك شلون بتشوفينهم وتقابلينهم وهذي نظرتك
تهاني بابتسامه حزينه / مصدقه انهم بيرضون فيني ويتقبلوني متوقعه منهم الرفض وفوقه الطرد والاهانه
سلوى وبجديه / وبطيعين ابوي بتروحين معه لهم وانتي متوقعه انهم يهينوك ويطردونك
تهاني بحقد / ابي اقابلهم ابي ابرد قلبي فيهم
سلوى بسخريه / بتحطين راسك براسهم لا تنسين بتكونين وحيد والكثره غلبت الشجاعه
تهاني بحقد / لا تستقلين فيني ترى النار تبدء بشرر وانا الشراره الي بحرقهم
سلوى بسخريه / نشووووووووف وش بتسوين بعايلة الضامي
تهاني بحقد / بتشوفين وش بتسوي تهاني بنتقم لنفسي ولامي منهم وانتقامي عسيررررر
عند سالم بالشركه
من بعد سالفة اخوه وهو ماله خلق لشغل حاس بضيقه بتخنقه صاير ياخذ نفس عميق لعل وعسى تهدا الضيقه لكن ضيقته كل مالها تزوج الي سمعه صعب وقوي وما يرضاه الواحد للبعيده شلون للقريبه ام عيال اخوه
سالم بضيقه / وش فيني كل مالها ضيقتي تزود والي سمعته شي مو سهل انك تدري ان زوجة اخوك وام عياله تمشي بطريق حرام طيب ليش مشت هالممشى البطال طيب لو كانت كذا من زمان بناتها مرايتها عمرنا ما شفنا او لاحظنا منهم اسلوب غلط بتربيتهم والله اني افتخر بعيال وبنات اخوي ناصر واتمنى لو عيالي يكونون مثلهم شلون ام صايعه وعايشة بملذاتها تربي هالجواهر
متاكد انه فيه سر بالسالفه لو تركي ماحلف بربه والله ما صدقته ياربي من يريح حيرتي
وشهي التمثليه الي يقولها تركي وعلى قولته ما يصدقها بزر اكيد فيها اجابه لسر
صحاها من افكاره صوت السكرتير / استاذ سالم في رجال عندي بمكتبي يبي يقابلك
سالم بجديه / من الي عندك
السكرتير / يقول انك ما تعرفه ويبيك بشغله ضروري
سالم / قوله يتفضل
طلع السكرتير وبعد ثواني دخل ابو ثامر لمكتب سالم
وقف سالم وتفاجئ بوجود ابو ثامر وبالمقابل ابو ثامر تفاجئ ا ن الي قدامه سالم صدق عمره الي انقطعت اخباره بعد ماسافر
ابو ثامر بصدمه / سالم
سالم بصدمه / فهد
ابو ثامر / والله الدنيا صغيره جيتك بموضوع مدريت اني بقابلك
سالم قرب من ابو ثامر واخذه بالاحضان الحاره كانت صداقه فرقتها المشاغل
سالم بحراره / يا هلا فيك متى رجعت من فرنسا من سافرت يالظالم مافكرت تتصل فيني وطمني عليك
ابو ثامر باحراج / ادري ان الغلط راكبني من راس لرجولي لكن يا خوي جوالي الي فيه رقمك انسرق بمطار فرنسا ومن بعده الدنيا نستني ولا انت لك وقفات ماتنسي
سالم سحبه بيده وجلسو بكنبه جانبيه بالمكتب
سالم / قولي اخبار وش علومك
ابو ثامر / الحمد لله بخير وولدي ثامر عمره 18 وبالسعوديه يزور ولد اخوك
سالم بستغراب / المزيون الي لازق بسالم يطلع ولدك
ابو ثامر / ايه ولدي روحه متعلقه بصديقه من جيت هنا ما شفته الا مرتين ورافض يطلع من المستشفى بدون صديقه
سالم / والله ان فيه خير
ابو ثامر بابتسامه / قول انه احسن من ابوه الي قطع بصديقه
سالم بابتسامه / وان قلتها ماكذبت لا تاخذني السوالف وماضيفتك وش تشرب
ثامر بجديه / انا جايك بامر ضروري وبعده بنطلع بر المكتب ونكمل سوالفنا
سالم بجديه / صحيح نسيتني قول الامر الضروري الي جمعنا بعد غيايب
ابو ثامر بجديه / لي شهر جاي من فرنسا وكان هدفي اني ادور لي فلتين جنب بعض وتعبت ومالقيت وبالصدفه كنت واقف قدام اربع فلل جنب بعض ولما سئلت عرفت انها مو معروضه لليسع ودلوني عليك
سالم بجديه / وينها فيه
ابو ثامر / في الحي ..........
سالم / هذي الفلل خاصه لتركي اخوي ووحده خاصه لخوي ناصر الي تنازل عنها لزوجته
ثنتين محجوزه للثنين من ربع تركي
ابو ثامر بجدية / والفله الثالثه الخاصه لاخوك وينها عن فلة اخوك ناصر
سالم بجديه / لازقه فيها وبينهم باب وهي قريبه من بيتنا ما يفصلنا بينهم الا شارع فرعي
ابو ثامر باصرار / طالبك حاول مع اخوك يبيعها لي وانا اشتري جيرتكم
سالم بنخوه / ابشر هي لك واحنا مانبيع الي يشتري جيرتنا
ابو ثامر بجديه / كفو وما تقصر بعتمد على كلامك لاني تعبت وانا ادور من مكتب عقار لثاني وبدون فايده
ابو ثامر بنفسه / سبحان الله الله كاتب انك يامها تسكنين جنب صديقتك والظروف ساعدت
سالم بجديه / اعتمد وغريبه قبلت بفله مع انك متعب نفسك على فلتين
ابو ثامر بجديه / تنازلت عنها مادام الثمن جيرتكم
سالم بجديه / تسلم يله بنطلع نتغدى وبالمره اكلم تركي يجينا للمطعم ونحلص الموضوع
وقف سالم وابو ثامر وطلعو من الشركه ركب السياره
لما شاف ابو ثامر مشى بطريقه
سالم بجديه / تعال اركب معي وبرجعك لخلصنا لسيارتك
رجع له وفتح الباب وركب جنبه حرك السياره ورفع جواله واتصل على تركي
عند تركي
كان جالس عند امه وبينهم القهوه سمع صوت جواله طلعه من جيب ثوبه شاف رقم اخوه
تركي بجديه / هلا سالم
سالم تركي / تعال للمطعم ال ..... فيه واحد يبي يقابلك بموضوع ضرور
تركي بستغراب / منهو الواحد وش موضوعه
سالم بجديه / مابي اطول لجيت بتعرف وش موضوعه
قفل من اخوه وقف / يمه طالع سالم يبيني بشغله ضروري
ام سالم بجديه / الكلام الي صار بينا لا يدري عنه اخوك تعرف مثالياته بيخرب علينا الي ناوين نسويه
تركي بجديه / منجنيت علشان اقول له يله مع السلامه
طلع تركي وام سالم طلعت فوق مرت على غرفة البنات
فتحت الباب وتروعت من شكال ساره والوحه الي راسمتها شوق بوجها
ام سالم برعب / وش ذا وش مهببه بوجه عمتك
شوق وهي ترسم على وجه عمتها / هههههههه وش رايك تصلح مجرمه
لم سالم بعصبيه / وانتي يا لخبله مستسلمه لها تحوس بوجهك على كيفها
ساره بمزح / يمه انا اشجع المواهب وحاطه نفسه حقل تجار لشوق يمكن ندخل التاريخ من اوسع ابوابه
ام سالم بعصبيه / الا بتدخلون مستشفى المجانين من اوسع ابوابه هذي تصرفات بزران او مجانين وانتم كبرتو والاكيد انجنيتن
شوق اتركت الفرشه الي بيدها وطالعت بجدتها وبابتسامه / يمه تعالي اسوي لك مكياج يرجعك بنت ام 15 وتشوفين الخطاب طوابير عند بابك
ام سالم كاتمه ضحكتها / ليه قالو لك مجنونه بسلمك وجهي مثل الهبله الي بين ايدينك
شوق بابتسامه / اصلن سارونه هبله من زمان يشهد الله اني بريئة من هبالها
ساره بسخريه / كملي شغلك وانتي ساكته لعلمك الهبله وش بتسوي لك
شوق برجاء / يمه مدامني فاضيه واشغل نفسي بوجه المسكينه الي قدامي الي وجها بيطلع فيه تجاعيد وتطيح بكبدك ومحد بيخطبها ولا عاد احد بيطالع بوجها وش رايك توظفيني بمشغلك امكيج الحريم
ام سالم بسخريه / ليه انهبلت اوظفك عندي ناويه تجلطين العالم وتنحشينهم من مشغلي اذا بغيته يخسر ويتسكر وظفتك ابرك لك تتسلين بوجه عمتك الخبله
ساره بعصبيه / انا محد بيطالعني الحلو حلو لو كله تجاعيد مو انتي يعيون القطووو الي في الليل تنور
شوق وهي تفتح عيونها بكبرها / الي ما يذوق العنب حامض عنه يقول موتي حره يام العدسات كل يوم حاطه لون لو مخترعين اللون الاحمر كان حطيتيه يالهبله
ام سالم بعصبيه / يا مثبت العقل ثبت عقلي بطلع قبل لا انجن من جنانكم
عند سالم بالمستشفى
واقف يطالع من شباك المستشفى ويكلم ثامر
سالم بحزن / الليله بطلع ومن المستشفى للجنوب
ثامر بجديه / طيب وش بقول لابوي وهو ما يدري انك فقت من غيبوبتك
سالم باصرار/ مالي شغل باذن الله بكون الليله بالجنوب بك او بلياك
ثامر بجديه / باذن الله بكون معك مستحيل اتركك بمحنتك لحالك وخايف عليك من مواجهة امك وزوجها
سالم بسخريه / تطمن ماني بذابحه لكن الحرقه الي بداخلي مقابلتي لامي بطفيها
ثامر بقلق / طيب لو كل شي قالوه طلع صدق وش بيكون ردت فعلك
سالم بحرقه / خلها بوقتها لكن الاكيد ماني براجع لرياض مالي وجه اقابل فيه احد
ثامر بجديه / امك تزوجة ما جرمت
سالم التفت على صديقه / اذا سوتها امك بيكون هذا كلامك
ثامر اضطر يسكت لانه لو قال ايه بيكون كذاب ومليون كذاب لان الي حاس بمعاناة صديقه موجع ويكسر الولد اذا تزوجت امه شلون لتزوجت بيوم موت ابوه وفوقه تنسى ولدها وماتكلمه ولا تطمن عليه لو مره وحده واضح انها شرت الزوج وباعت العيال
لكن يحاول يخفف على صديقه لو كان رافض تصرف ام صديقه لكن الي يسويه مع سالم واجبه عليه كصديق
كنت اتمنى اوصل للجزء الي ابيه لكن احداث تجر احداث وكتفيت بهذا القدر ولنا لقاء بكره باذن الله تكمله للبارات
اختكم نسايم نجد
|
04-06-11, 04:34 AM
جديد مواضيع قسم الارشيف
العرض العادي
