كاتب الموضوع :
نسايم نجد
المنتدى :
الارشيف
فيه كثير من الاخوات كان عندهم انتقاد بالرويه اني اذكر غسل واكل وطلع كما سبق وقلت لكم لما اكتب الروايه اتخيل التفاصيل الصغيره قبل الكبيره وكاني معهم واقع
فلما انقل البطل من مكان لمكان اخر وظروف اخرى يتشوش ذهني
فمثلا لو قلت ركان كان في بيته وقطعت عليكم وذكرت بعدها محادثته مع فهد
ما حب الاستعجااااااال وانتم تطلبون مني ادخل على طول بالعميق الي يمكن يفسد لروايه قيمتها ( اطبخها على نار هادئة مابيها تنحرق )
( يمكن هذا عيب فيني ) لكن لا استطيع تجاوزه فتحملوني
ولما ذكرت اني قلت بنقل لمرحله انتقاليه اتوقع لم اكذب بالبارتات بدت تتوضح الصوررره مابقى الى ان تظهر لسطح وتاخري لمعرفتكم امر مقصود
بارت اليوم طويل و مليئ بالاحداث ولقضايا المطروحه
في بارت اليوم ناقشت بعض المواضيع المهمه
في بارت اليوم انتقلت للجانب الفكاهي بخفف من احزان البارتات الي فا تت
وقضية اليوم ( باشراف منى ) والثانيه باشراف ( عبدالله ونايف )
البارت التاسع عشر
عند تركي
طلع من البيت وشاف السواق بسيارته ركب جنبه وطلب منه يمشيه بشوارع فرنسا بعدها ماطفش من الفرفره بالسياره
تركي بجديه / وصلني لجامعة شوق
تركي في نفسه / والله وانجنيت رسمي وش بتسوي بجامعة البنات
يمكن اشوفها والمحها واعرف منهي ويرتاح قلبي الي متعلق فيها
كلام شوق للحين يدور في راسي لازم اقابلها و احل هالغز الي صدع براسي
بعد نص ساعه وقف السواق عند باب الجامعه وتركي عيونه مركزه على باب الجامعه لعلى وعسى يلمحها
عند شوق
كانت جالسه وبيدها نسكافيه وكل ماتذكرت كلام عمها غصب تبتسم / والله وطحت يا عمي بحب امي وغصب عنك تحقق المستحيل خلك تكتوي بنارك بالاول راحمتك لكن تستاهل الي يصير فيك
سمعت صوت جوالها طلعته من شنطتها
شوق / هلا الهنوف وصلتي
الهنوف / ايه برى لا نتاخر على الجامعه
شوق وقفت لبست حجابها وطلعت شافت سيارة الهنوف واقفه بالشارع المقابل لبيتهم ركبت وحركت السياره
شوق بابتسامه / السلام
الهنوف / وعليكم السلام
شوق بستغراب / وش فيك موقف السياره بعيد عن بيتنا
الهنوف بمزح / يمدحون المشي قلت تجربينه
شوق بابتسامه / والله انا جسمي خيال الباقي عليك
الهنوف بجديه / بداومين اليوم ولا بتكملين اجازه
شوق ببجديه / مدري
الهنوف بجديه / لو اني مكانك اخذت ساعات كثيره علشان اتخرج بسرعه
شوق بحيره / تشوفين كذا
الهنوف / ايه
وقف السواق عند باب الجامعه
الهنوف بستغراب / شوق سيارة سواقكم عند باب الجامعه وش جايبه
شوق متفاجئه وهي تشوف السياره / مدري با نزل اشوف وش عنده
نزلت ومشت وصلت لسياره قربت من باب السواق لمحت عمها لفت عند باب عمها الي مو مع العالم قلبه وعيونه عند باب الجامعه
وصلت لعنده وهي كاتمه ضحكتها وفي نفسها / والله وصرت روميو تنتظر جوليت وينك يمه تشوفين العاشق الولهااان ولله انك ياعمي سالفة الموسم
شوق بخبث / عمي وش جايبك للجامعه
تركي تفاجي وحاول يتصنع الثقة قدامه يعرفها ذكيه ادور عليه ممسك
تركي بسخريه / وش ملقفك جاي ارقم بنات الجامعه
شوق بخبث / الترقيم هناك مو هنا وتطمن الي ادور عليها مو بالجامعه
تركي باحراج وسخريه / وان شاء الله على منوا دور
شوق بثقة / صاحبة الصوره
تركي بعصبيه / طسي عن وجهي لدعسك بالسياره
شوق بابتسامه / بطس ماني بايعه عمري
ياروميووووو
تركي بعصبيه / شوووووووق
شوق تمشي على السريع وصلت للهنوف الي تنظرها عند باب الجامعه
الهنوف بجديه / من تكلمين
شوق بجديه / عمي تركي
الهنوف بستغراب / وش عنده بالجامعه
شوق بتصريفه/ من كثر ما مدح بجامعتي جاء يشوفها
الهنوف / يله تاخرنا
عند تركي
طلب من السواق يتحرك وهو مقهور من شوق الي تلعب بعصابه وبيدها تفك حيرته وتريحه
تركي في نفسه / ليكون البنت تخرجت وطارت لديرتها وهي معلقتني يارب وش الحاله الي صايبتني والله كنت مرتاح وجبت الشقى لحالي ولا وش لي بصور شوق اتفرج عليها
اخر امل اني اشوفها فيه تبخررررررر والحل مالي الا اعترف لشوق وافضح نفسي عندها واترجاها تقول لي منهي
مستحيل اعترف لها واصير مطنزه كله مني استاهل كل دقيقه اقول مافيه بنت تهز فيني شعره وجت الي هزتني كلي على بعضي وحاستني من صوره وصرت مراهق على كبر
في المستشفى
عند ثامر
من جاء ما طلع من غرفة سالم جالس على كرسي مقابله وسالم بعد الكلام الي صار بينهم غاط بنومه عميقه
ما يدري ليه ما يبي اهله يدرون انه فاق من غيبوته
ثامر في نفسه وعيونه على سالم النايم / وش صار لك يا سالم بعد موت ابوك ليه ما تبي احد يدري انك صحيت من غيبوتك وليه حرمت اهلك الفرحه برجوعك ليش نزلت دموعك هل هو تاثر او فيه سبب ثاني مدري عنه
دخل عليهم الدكتور وستغرب تواجد ثامر اول مره يشوفه
الدكتور بابتسامه / من انت
ثامر بابتسامه / صديق سالم
الدكتور بجديه / اول مره اشوفك
ثامر بابتسامه / كنت بفرنسا وجيت لما دريت عن حالة صديقي
بدا الدكتور يكشف على سالم وتاكد انه صاحي من الغيبوبه
الدكتور / سالم تسمعني
سالم حس بتواجد الدكتور لكنه تظاهر انه مازال بالغيبوبه
الدكتور بابتسامه / لا تنسى اني دكتور ومتاكد انك تسمعني وتحس بتواجدي وانك صحيت من الغيبوبه
سالم فتح عيونه ودموعه تنزل بحراره / دكتور مابي اهلي يعرفون اني فقت من الغيبوبه
الدكتور بجديه / ليش تقول هالكلام لازم يعرفون انك رجعت لهم انت ما شفت حالهم متشوقون لرجعتك لهم من جديد
سالم وبصوت باكي / ارجووووك لا تقول لهم واذا قلت لهم صدقني بطلع من المستشفى
الدكتور بستسلام / على ان هذا مخالف لإ مانتي الطبيه لكن صحتك تهمني
سالم / مشكور دكتور
بعد الكشف والاطمنان عليه طلع من الغرفه
ثامر بجدي / فهمتي ليش ماتبي اهلك يعرفون انك صحيت من الغيبوبه وليش كل هالدموع
سالم لف وجهه عن صديق للجهة الثانيه
ثامر وقف وجاء من الجهه الثانيه / لا تبعد وجهك عني بتقولي يعني بتقولي من متى نخش عن بعض
سالم صار يبكي بحرقه / امي يا ثامر كسرت وجهي معاد لي وجه اقابل فيه احد
ثامر بصدمه وخوف جلس على طرف السرير / وش سوت خالتي نوف
سالم بصوت باكي / امي تزوجت بيوم دفن ابوي ابوي مدخلينه قبره وهي عروس
ثامر منفجع / ما صدق قول غير هالكلام
سالم بقهر / وتبيني بعد الي سوته اواجه الناس وحط عيني بعينهم حتى اقرب الناس ما رحموني عايروني بفعلة امي والحمد لله ربي رحمني بالغيبوبه
ثامر بجديه / يمكن كل السالفه كذب مستحيل اصدق ان خالتي نوف تتزوج
سالم بصوت باكي / عمي تركي كلم اخوها بيوم دفن ابوي وقال انها في بيت زوجها
ثامر بتفكير / اسمح لي سالم عمك ما يحب امك ويدور الفرصه الي يبعدكم عنها ولا تستبعد ان الي قاله ماله اساس و هذي الوسيله الي بيحرق قلب امكم عليكم
سالم بجديه / صحيح عمي يكره امي لكن مستحيل يسوي الي تقوله ويحرق قلوبنا عليها
ماصدق يسويها
ثامر بزعل / ما تصدق بعمك وتصدق في امك لاتسمح لاحد يقهرك بامك واذا كان فعلن كلام عمك صدق شوف امك وسمع منها لا تسمع للي يكرهونها يسمونك بالكلام واكيد بيفهمون تصرفها على كيفهم
سالم باصرار / الحين بطلع اسافر للجنوب
ثامر بجديه / للحين ما تعافيت اذا تعافيت سافرنا سوى للجنوب
سالم بضيقة / شلون تبيني اجلس بحيرتي
ثامر باهتمام / الحين ارتاح لا تنتكس حالتك وحنا ماصدقنا ترجع لنا
عند مروان
طلع من شقة الفساد مر محل ورد اشترى باقة ورد كبيرررره واخذ بطاقه وكتب فيها
صباح الحب من قلب عشق روحك وتمناها
عشق همسك عشق خطك ومراسيلك تحراها
اخذ الباقه وطلع من المحل حطها بالسياره وراء وطلع للجامعه
ونزل اتصل على جوال اخته
مروان بجديه / سلوى وينك
سلوى بجديه / بالجامعه
مروان بجديه / معي باقة ورد ابيها تاصل لمكتب سميره
سلوى باعجاب / اووووووف وصلنا للورد
مروان بعصبيه / اخلصي علي شلون ا وصلها
سلوى بجديه / عط البواب بطاقتك وانك بتسلم الباقه لاختك و الحين جايتك عند الباب
نفذ مروان كلام اخته دقائق طلعت له سلوى اخذت الباقه ومن حسن حظها البنات قليل وصلت لمكتب الدكتورات كان الباب فاتح ومافيه احد
قربت من طاولة سميره وحطت الباقه وطلعت
عند سميه
من رجعت من عند نوف وهي متضايقه مخنوقه مو راضيه تصدق ان نوف تقتل نفس بريئه
سميه بنفسها / والله شكلها مايقول تقتل ذبانه شلون تقتل روح طيب يمكن مجبره اكيد مجبره حالتها وانهيارها يثبت هالشي
شلون فقدت اعصابي بوجها ليش ماحتويتها وسمعت منها هي تحتاج للي يوقف معها مو ينهار بوجها
احساسي يقول انها مجبوره على القتل طيب من الي قتلته وليش قتلته
طيب وش سر كرهها لزوجها لدرجة انها تدعي عليه بنار جهنم لو ان زوجها مات هنا كان قلت انها قاتلته طيب وينهم عيالها ليش جالسه بهالشقه وحيده والله وراء هالبنت اسرار مراح ارتاح لين اكشف الي وراك يا نوف
صحاها من افكارها صوت ريما
ريما بجديه / عمه كيفها هنوفه
سميه بضيقه / طيبه
ريما / اش رايك عمه اناديه تفطر معنا
سميه ببرود / بكيفك
ريما بفرح / اجل باخذ شور والبس وبعدين اطلع اناديهاا
سميه بنفسها / مستحيل اخليك تطلعين من هنا لين اعرف الي وراك
عند اميره
قامت شافت ولدها نايم بحضنها مسحت على شعره
اميره بحنان / يسوري حبيبي قوم
ياسر / .........
اميره بابتسامه / ترى بنتاخر على الملاهي
فتح عيونه وطار النوم
اميره بابتسامه / لازم اجيب طاري الملاهي علشان تقوم يله ادخل الحمام ونفطر وبعده نطلع
قام من سريره دخل الحمام ودخلت معه اميره بتسبحه
ياسر بخجل طفولي / لا تسبحيني انا كبير عيب تشوفيني
اميره بابتسامه / انا امك عادي
ياسر ببرائة / بابا يقول عيب احد يشوفني حتى بابا
اميره مدت عليه الفوطه باستسلام / اجل يله تسبح و بطلع لك ملابس
دخل ياسر واميره فتحت شنطته طلعت له بنطلون جنز وبلوزه خضراء من لوكست
عطرتهم بعطرها المفضل
دقائق طلع ولدها وابتسمت بوجهه
اميره بابتسامه / اقدر البسك ولا عيب
ياسر بابتسامه / عيب
اميره مدت له ملابسه / اجل البس وبنزل
تحت
كانت ام فواز تفطر مع زوجها
ابو فواز باصرار / اقنعي بنتك بالزواج لمتى بتجلس بدون زواج ماني بدايم لها
ام فواز بحزن / بنتك عنيده كل ما فتحت معها الموضع قفلته قبل لا اكمل
ابو فواز / امس ابو علي خطبها مني لولده علي الولد ما يعيبه شي
قطع عليهم صوت اميره الباكي
اميره بصوت باكي / لهدرجه صرت ثقيله عليك وتبي الفكه مني
ابو فواز بحنان / انتي تعرفين غلاك عندي والزواج سنة الحياة مو معناته ابيك تتزوجين ابي الفكه منك
اميره بصوت باكي/ الله يخليك يبه انا جربت الزواج مره وحده وفشلت ومالي خلق اعيد الفشل
ابو فواز بحنان / يا بنتي لا توقفين حياتك بسبب طلاقك انت مو اول ولا اخر وحده تطلق وتتزوج مره ثانيه وتستمر حياتها يا بوك علي اعرفه ما ينرد
اميره قربت منه وباست راسه / يبه الله يعافيك ويخليك لا تجبرني على شي ما بيه الزواج اخر اهتماماتي
ابو فواز بياس / الله يوفقك يا بوك ويهديك ويلين راسك اليابس
اميره بابتسامه / طالعه لك
دخل عليهم ياسر مسحت دموعه وستقبلت ولدها بابتسامه / يله يسوري سلم على جدك وجدتك ولحقني للمطبخ
سلم على جده وجدته ولحق امه الي جهزت فطور سريع
بعد ما فطرت مع ولدها وطلعت لصاله شافت ابوها واقف قربت منه
اميره تمد يدها بابتسامه / يا ليت اطلع بوكك وتمد لي 1000 ريال ليسوري بطلعه للملاهي
ابو فواز فتح بوكه مد لها البطاقه / علشان يسوري المبلغ مفتوح له
اخذت منه البطاقه اميره / مدامك مديت بطاقتك فرصتي اتسوق على حسابك
ابو فواز بحنان / اشتري الي نفسك فيه ولا تنسين ياسر لا تحرمينه من شي
اميره بحب / الله لا يحرمني منك يالغالي
ابو فواز / بوصلكم لسوق وبمر سالم بشركته
ياسر يسحب امه من بجامتها / يله ماما تاخرنا
اميره بحب / ولا يهمك حبيبي الحين طالعه ابدل وبنزل مراح اطول عليك
طلعت فوق وعيون ولدها تلحقها دخلت غرفتها حطت البطاقه بالشنطه غيرت ملابسها والبست عباتها واخذت شنطتها ونزلت لبست نقابها وقربت من ولدها مسكت يده بحنان وطلعت معه ركبت السياره جنب ابوها وياسر وراء وصلهم لسوق كان الصباح فاضي خاف عليهم
ابو فواز / با نزل معكم ما قدر اتركم بالسوق وهو فاضي
عند نوف
فاقت من غيبوبتها ولامت نفسها شلون فضحت نفسها عند وحده غريبه شلون ما قدرت تمسك اعصابها وهي طول هالسنين تحاول تخفي الي بداخلها وحست بندم انها طردتها
نوف بصوت باكي / يارب شلون فضحت نفسي قدامها وشلون بتكون نظرتها لي اكيد بتستحقرني وبتمنع بنات ماجد يزوروني يارب رحمتك
سمعت صوت الجرس قامت وهي محطمه طالعت العين السحريه شافت ريما استغربت
فتحت الباب بابتسامه / هلا ريومه
ريما بابتسامه / تعالي افطري معنا
نوف بضيقه / عمتك موجوده
ريما بابتسامه / ايه وهي قالت اناديك للفطور
نوف استغربت وشافتها فرصه تعتذر وتبرر لها تصرفها وكلامها وتعتذر باي عذر
ريما / بدخل انتظرك
نوف بابتسامه / تنورين
دخلت ريما وجلست عند التلفزون ونوف دخلت الحمام اخذت شور طلعت لغرفتها وهي ناويه تتزين الي مثل ناصر حرام الواحد يحزن عليه وزين منه رحمها من العده
فتحت شنطه جانبيه طلعت علبة مكياج وحطت قربت من التسريحه حطت لها مكياج خفيف وستشورت شعرها وقربت من دولابها طلعت لها تنوره بيضاء لركبه وبلوزه سماوي مخصره بتعلن للعالم فرحتها لموت ناصر تحس الي صار البارح زال بعض الثقل الي بصدرها
طلعت عند ريما الي فتحت فمها باعجاب لما شافت نوف برغم من مكياجها الناعم صايره تبهر
نوف بابتسامه / انتظريني بالبس البالطو والحجاب
ريما وعيونها معلقه بنوف / ما يحتاج بابا بالمستشفى
نوف بجديه / اخاف يجي وانا عندكم
ريما بجديه / تطمني مراح يجي الا بالليل
اخذت البالطو والحجاب بيدها تفاديا لظروف
وصلت لشقة ماجد وهي ما تدري باي وجه بتقابل سميه
دخلت ريما الي تاركه الباب مفتوح دخلت ونوف وراها شافت عمتها جالسه
ريما / عمه نوف جت معاي
رفعت سميه راسها شافت نوف بشكلها الي يبهر متغيره عن شكلها المنهار وكانها وحده غير
وقفت سمية وستقبلتها ببرود / حياك نوف
قربت منها نوف وعيونها بالارض وبصوت مخنوق / اسفه بعمري ما غلطت وجرحت احد لكن البارح ما كنت بوعي
سميه قربت منها ورحمتها / صار خير وبعد ما نفطر بينا جلسه
نوف بدا قلبها يدق بسرعه خايفه تفتح معها الموضوع الي تحاول تنساه وتدفنه بقبر ناصر
نوف بصوت مرتبك / اذا عن البارح كنت اهذي والي قلته من غير وعي اخذرف بسبب الابره المهدئة
سميه مصره تكشف سرها مهما كان الثمن
دخلت مع سميه المطبخ جلست مقابلها وريما جنبها وحنين جنب عمتها
جلست تاكل وعيون سميه تسرق النظر لها
سميه بنفسها / وش عندها متزينه وجايه ماكانك الي البارح منهاره معقوله الي صار طير عقلها
الخبل عنده هالجمال ويطلقها صحيح رياجيل ما يملئ عينهم الا تراب طيب شلون مطلقها من 10 سنين والبنت الي عندها ما كملت ايام
نوف تاكل وهي متاكده ان سميه تراقبها وكل ما رفعت عيونها شافت سميه سرحانه وعيونها فيها
نوف في نفسها / ياربي وش فيها اكيد سرحان بالي صار البارح وتبي تكلمني فيه يارب عطني طولت البارح واسترني دنيا و اخره
صارت تتغصب على الاكل وعيونها على سميه الي يدها جامده على الكاس
وقفت / الحمد لله
صحت سميه على صوتها / اكلي ما كلتي شي
نوف بارتباك / اكلت الي اقدر عليك مشكورين
طلعت نوف ولحقتها سميه / نوف لو سمحتي تعالي معي
نوف بتهرب / اسمحي لي بطلع تاخرت على بنتي
سميه باصرار / كلامي مراح ياخرك
استسلمت لسميه ومشت معها ادخلت غرفه جانبيه فيها مكتب
جلست سميه وجلست نوف بالكرسي مقابلها
نوف ترتجف وصارت تفرك يدها بتوتر / قولي الي عندك
سميه لاحظت توتر نوف وتاكدت ا ن الي مخفيته شي كبيررررر
سميه بهدوء فتحت المكتب طلعت قران / احلف لك على هالقران ان الكلام الي بتقولينه يبقى سر بينا وانتي تعرفين ذنب الي يحلف بالقران ويكذب
نوف حست براحه / ايه اعرف شوق بنتي ثقفتني شوي بامور ديني
وبتسمت بحرقه / بدال ماعلمها تعلمني
سميه بحنان / قولي الي موجعك
نوف بصوت كسير / صدقيني لو بقولك بتثورين علي وتكرهيني الماضي مايرجع علشان اصلحه والحاضر يحاسبني على ماضي انجبرت بفعل شغلات كان مسيطر علي الخوف واليتم ماعندي احد يحميني من الوحش الي عايشه معه
سميه بقوه / الوحش نااصر قولي لك قصتك لاني متاكده انك ندمانه وتايبه ومن تاب من الذنب كمن لا ذنب له
نوف بفرح وبصوت باكي / صدق ربي بيتوب علي
سميه بجديه / الله غفور رحيم
نوف بصوت باكي / انتي بتستحقريني وتكرهيني
قبل لا قول لك سالفتي والله اني ندمااااااااانه وكل ليله تجيني كوابيس لكن الماضي ما يتصلح
سميه بحنان / اوعدك اوقف جنبك
نوف بصوت باكي حكت لسميه كل شي صار بالماضي وزادت باكي لما وصلت لاول جريمه صارت تنتفض
مدت سميه يدها ومسكت يدها وسميه متاثره مع كل حرف وكلمه تنطقها وصارت تبكي
سميه ماقدرت تتحمل وبصوت باكي / خلااااااااااااص لا تكملين معقوله فيه بشر كذا يستغلون براءة اطفال امسحي الماضي ورميه وراء ظهرك
نوف بصوت باكي / قول لي شلون ا نسى وامسح الماضي من راسي وامنع الكوابيس تجيني
وقفت سميه وبتاثر / حسبي الله على اخوك وعلى ناصر فوقه اااااه لو داريه ان الي جتك سبب المصايب والله لا اشرب من دمها حرام الي مثلها يعيش
نوف بانكسار / يعني ما ستحقرتيني ولا كرهتيني
سميه قربت منها وضمتها وتكلمت بحنان / ليش استحقرك بالعكس اوجعني قلبي عليك الي مريتي فيه مو سهل شلتي الهم من بدري وانحرمتي من شغلات وعوضتيهم بتعلقك وحبك لعيال ناصر انتي امهم انتبهي تقولين لهم بتخسرينهم وتخسرين كل شي صبرتي علشانهم
ووانتبهي شوق تدري بسواتك بتكرهك ويمكن تضرك
ووصيت ناصر بحذفك لاخوه علشان يداري جرايمه لا تنكشف لا تنفذينها يكفية الي سواه فيك وهو عايش بيقضي عليك وهو ميت
رفعت نفسها من حضن سميه / ما تدرين اش كثر كلامي معك ريحني صديقتي هجرتني لما اكشفت حقيقتي وانتي يالبعيده تقبلتيني
سميه بحنان/ صديقتك مصدومه والي سوته معك لانك ماقلتي لها وكتشفته بنفسها واكيد بتسامحك لانها متاكده مالك ذنب
نوف بامل / ياليت تسامحني ماطلعت بالدنيا الا بهالصديقه
سميه بابتسامه ياله بنطلع اغسلي وجهك وعتبري نفسك من اليوم مولوده من جديد والماضي ماضي وراح خلينا بالحاضر
وقفت نوف وبامتنان / مشكوره على الي سويته معي امس واليوم
سميه بجديه / اعتبريني اختك اذا احتجتي شي تجين لها
نوف بابتسامه / تكلمت عن نفسي ولا قلتي لي شي عنك
سميه وهي تمشي / مافي شي يذكر بحياتي الا اني ارمله بعد زواج سنه وربي ماكتب لي عيال
نوف / لازم ارجع لشقتي من اليوم تاركه بنتي لحالها
وصلتها سميه عند باب الشقه سميه بحنان / لا تقطعين زورينا كل يوم
نوف / ا ن شا ءالله
عند سميره
دخلت غرفة الدكتورات وتفاجئت من باقة الورد المحطوطه على مكتبها
اخذت الباقه شافت البطاقه استغربت الكلام المكتوب وهي تقلبها بتعرف هوية المرسل سمعت نغمة رساله على جوالها
طلعت جوالها من الشنطه لما شافت رقم مروان ابتسمت فتحت الرساله ( ان شا ءالله ذوقي بالورد اعجبك ياحياتي لو بكيفي جمعت كل الورود الي بالعالم وسويتها قلاده لك )
سميره ماقدرت تتحمل كلمات الغزل جلست على الكرسي وهي ذايبه كل هذا كثير على قلبهاااااااا متعطشه للكلام الحلو يجي مره وحده متاكده ان هالتصرف غلط لكنه حسسها انها مرغوبه و صحى انوثتها النايمه وصارت مثل البنات ترسم مستقبل وحياه سعيده مع واحد قدر يستولي على قلبها بكلامه المعسول اخذت الباقه وضمتها بحب
عند نايف
كان يفطر مع صديقه وتذكر سالفه
نايف بحماس / عبد الله الاسبوع الي فات كان عندي مناوبه
عبد الله بسخريه / جبت شي جديد ادري ان عندك مناوبه نسيت اني الي ارجعك وتلطعني
نايف بجديه / اصبر ما كملت شفت العماره الي مقابل المدرسه
عبد الله حاول يتذكر / لا مان تبهت وش فيها
نايف بجديه / طول الاسبوع الي فات لما كنت اوقف عند باب المدرسه اشوف بنت تنزل من نفس العماره وتكلم عامل بلديه وبعد دقائق يلحقها
عبدالله بستغراب / كل الاسبوع تنادي العامل
نايف / ايه
عبدالله بتسال / نفس العامل ولا غير
نايف بحيره / مدري ماني متاكد ضنتي انه غيررر
عبدالله باستغراب / وش تبي فيه
نايف بجديه / اغلب الضن بسوالف بطاليه
عبدالله بجديه / مثل
نايف بعصبيه / رجال غريب مدخلته بيتها اكيد تبيه ينام معها
عبدالله بقرف / عامل نظافه ما توقع احس فيه شي كبير تعرفني اخو صقر لازم احساس المباحث يشتغل عندي
نايف بجديه / اجل وش تبي فيه
عبدالله بجديه / عندك حصه اولى
نايف بستغراب / لا ليش تسال
عبدالله بابتسامه خبيثه / لانك اليوم بتصير عامل النظافه
نايف بصدمه / انهبلت ولا صايبك شي بعقلك
عبد الله بفضول / مذبحك الفضول تعرف وش تبي بالعامل
نايف بصدق / لا
عبدالله بجديه / لكن انا ذابحني الفضول وابيك تصير العامل وتدخل بيتها وتقولي وش تبي بالعامل
نايف وقف بعصبيه / والله اذا ذبحك الفضول صير انت العامل وش بيضمني وش بتسوي فيني وانا جاهل ببلاوي الحريم
عبدالله بترجي / وش بتسوي بتغتصبك ما ضنتي بتقدر فيك اذا رفضت الا اذا تبي
نايف بعصبيه / تعرف اني ماني براعي بنات ولا اهتم فيهم ومستحيل اقرب منهم بالحرام
عبد الله يستفزه / اثبت هالشي وصير العامل
نايف باصرار / لا تحاول مستحييييييل
عبدالله بترجي / واذا قلت علشان الصداقه الي بينا
نايف بسخريه / الي بفهمه من متى اللقافه وبعدين وش بتستفيد بالي بتسويه
عبدالله بجدية / مدري احس اني متحمس اقوم بمغامره وهذي بتكون المغامره
نايف بجديه / سوها انت
عبدالله بجديه / والله لو ماعندي اليوم ضغط حصص كان قمت بدور بلا منتك
نايف بستسلام / من وين اجيب لبس عامل النظافه
عبدالله بابتسامه / تعرف المصري الي ساكن تحت مكيانيكي ولبسه يشبه لبس عامل البلديه بانزل اتسلفه والمكنسه خذ المكنسه الي بالمطبخ
نايف بسخريه / هزلت بدال ما شيل كتبي اشيل مخمه
عبد الله بجديه / تطمن محد بداري تخلص من مهمتك ترجع الشقه تبدل لبسك وترجع للمدرسه ولا من شاف ولا من درى
نايف بقهر / امري لله
عبدالله وقف / بانزل عند المكانيكي قبل لا يطلع وابتسلف بدلته
نزل عبدالله لدور الارضي طق الجرس فتح له
عبدالله باحراج / كيفك مصطفى
مصطفى بابتسامه / الحمد لله كيفك انت
عبدالله باحراج / ممكن اتسلف منك بدله الشغل
مصطفى مستغرب / بتعمل فيها ايه
عبد الله بتصريفه / عندنا حصه عن المكانيكي ونبي بدلتك كتطبيق عملي
مصطفى بابتسامه / دقائق والبدله عندك
دخل مصطفى وبعد دقيقه طلع معه بدله بكيستها جديده
عبد الله باحراج/ مابي جديده عطني مستعمله
مصطفى بابتسامه / عندي كثير وجديده راعي العمل كريم يوزع علينا البس بالهبل
اخذها منه / مشكوررر
طلع لشقته شاف نايف على الكنب قرب منه
ومد له الكيسه / تفضل جديده محد لبسها غيرك
نايف بسخريه / يا ما جاب الغراب لامه
عبدالله بجديه / يله البس وخذ مكنستك معك
نايف بخوف / والله لا صار لي شي ما سامحك طول عمري
عبد الله بجديه / عندك جوالك لا صار شي كلمني تلقاني صاروخ عندك
اخذ الكيسه من صديقه ودخل غرفته لبس وطلع عند عبالله الي استقبله بالمكنسه
نايف بسخريه / مبسوط تستقبلني فيها تخيل طلابي يشوفون مدرسهم ماشي بمكنسه
عبدالله بجديه / محد بيمك الطلاب الصباح يمشون نايمين بسرعه بنسبق عامل النظافه لا يسبقنا
طلع عبدالله ومعه نايف متفشل من لبسه
وخايف احد يشوفه ويعرفه / حسبي عليك عبدالله تخيل مصطفى يشوفني لابس لبسه
عبدالله بجديه / معليك من مصطفى قايل له عندي موضوع عملي عن المكانيكا
نايف بسخريه / صدق انك اخو صقر المباحث تمشي بدمك وانا ضحيتك
ركبو السياره وصلو للعماره نزل نايف
عبدالله مد له المكنسه وبابتسامه / طالع خطير اول مره اشوف عامل نظافه يلق لق لا وصيك تقمص الدور ونظف الشارع عدل
نايف بعصبيه / بلا طنازه لهون
عبدالله حرك سيارته ونايف صار يكنس بعشوائية
نايف بطفش / اووووووف متى تجي هذي
مر من جنبه طالب من الي يدرسهم انتفض خوف خايف يكشفه انصدم من الطالب الي قرب منه
الطالب / استاذ نايف
نايف يحاول يتكلم هندي / اش كلام مافي معلوم
الطالب استغرب الشبه / سبحان الله تشبه استاذ عندنا غثيث
ومشى وتركه
نايف بسخريه / انا غثيث يالكسلان هذي اول ثمراتك يا عبد الله يخوفي يطلع المدير من العماره واكيد بيفصلني تارك المدرسه واكنس الشارع
سمع صوت انثوي ناعم صابت جسمه نفضه
طالع فيها شاف بنت محتشمه
البنت / تعال فوق
نايف وقلبه يرجف خوف / يهز راسه مثل الهنود خايف ينفضح
البنت تتامله في نفسها / شكله عامل نظيف ومزيون عكس الوسخين الي كل يوم
اشرت بيدها للعماره / انت فيه يخلص يدفع لك 100 ريال
نايف في نفسه بخوف / يا ويلي وش اخلص منه شكل البنت بايعتها
مشت ونايف يمشي برجول تنتفض
ويتكلم بقلبه / انا خبل وش قاردني على مغامرتك يا عبد الله طول عمري بحالي الله يستر من الي ينتظرني فوق اغلب الظن ان البنت فاتحه شقتها ***** والله ومشى سوقهم عمال النظافه وصارو مرغوبين
عند منى
من طلعت للبيت مخنوقه ما تدري وش نهاية نهاية حالة وليد ولما ركبت السياره حست بفقدها لصديقتها يزود محتاجه لهاااااا الهموم تجمعت عليها
وصلت للمدرسه نزلت مع بنتها دخلوا المدرسه بنتها طالعت لفصلها وهي دخلت مكتبها فسخت عبايتها وجلست على مكتبها
شافت مستخدمه العجوز تمسح الطاوله تعاطفت معها شلون يسمحون بتوظيف وحده كبر امها تشتغل بالتنظيف وتخدم بنات كبر حفيداتها
منى وقفت وقربت منها واخذت المنشفه الي بيدها ورمتها على الارض
المستخدمه خافت من حركة منى / ابله منى ليكون تنظيفي مو عاجبك والله اني احاول بقصى جهدي
منى بحنان / الي مثلك ينخدم ليش جايه هنا تنظفين
نزلت راسها وبانكسار / الحاجه
منى بحنان / عندك عيال وبنات
العجوز بحزن / الله عطاني عيال معاقين
منى بجديه / من اليوم ورايح ما شوفك بالمدرسه
العجوز دمعت عينها / اترجاك لا تقطعين باب رزقي فضلت الخدمه بالمدرسه عن الشحاذة لو طردتيني ذنبي برقبتك بتشوفيني بالشارع اشحذ
منى بتاثر / انا ما رضى امي تخدمني وتخدم بنات اصغر من حفيداتها والي ما رضاه لمي مارضاه لغيرها اجلسي في بيت وراتبك بيوصل لعند
العجوز بزعل / ما ضنتي بيرضيك اكل واكل عيالي مال حرام
منى بجديه / مساعده من جيبي الخاص
العجوز بضيقه / مدام فيني شده اتحرك ماني بحاجه لصدقتك وصدقة غيرك
منى بعد تفكير / خلاص بسجلك بالضمان الاجتماعي
العجوز بحزن / الضمان يبي له روحات وجيات وانا شوفنك عجوز وبصعوبه اقدر اتحرك وامشي
منى بجديه / اذا على روحتك انا بوديك واجيبك لين تخلص اوراقك
العجوز بابتسامه / الله يجزاك خير ويرحم والدينك ولا تشوفين عازه
منى بابتسامه / اطلعي لبيتك ارتاحي وذا متملله لحالك بالبيت اجلسي هنا من دون شغل واذا احد نقاشك قولي هذي اوامر المديره
العجوز بصوت باكي / الله يسترك دنيا واخره ويسخر لك عبيده
منى / امين
العجوز بتطلع وقفتها منى / افطرتي
العجوز تمسح دموعها / لا ما فطرت
منى بحنان / اجل تعالي نفطر سوى
طلعت من مكتبها نى نادت مستخدمه بنت وطلبت منها تجيب لهم سندويشات من المقصف وتسوي دلة شاهي بالنعناع
رجعت لمكتبها شافت العجوز جالسه على الارض تحت قربت وجلست مقابلها
دقائق وجابت المستخدمه الاكل متفاجئة من الي تشوفه المدير جالسه تسولف وتاكل مع المستخدمه تمنت انها معهم لكنها طلعت
بدت منى تفك الكيس عن السندويشات وتمدها للعجوز وصبت كاس شاهي ومدته لها
فتحت سندويشه لها واكلتها
بعد ماخلصت العجوز وقفت بتمشي
منى بجديه / وش رايك نطلع الحين نقدم بالضمان مدام فاضيه اليوم
العجوز بابتسامه / انا جهزه بطلع البس عباتي
طلعت ومنى تركت الاكل الي بيدها ورجعت لمكتبها لبست عباتها وشنطتها وطلعت شافت العجوز واقفه عند باب الشارع تنتظرها نادت سواق سميه من غرفة الحارس سميه تمنعه يرجع للبيت تخاف تحتاجه وما يكون موجود فطلبت منه يجلس عند الحارس
طقت منى باب الحارس / وسيم
سمع السواق اسمه طلع شغل السياره وركبت منى والعجوز وطلبت منه يوصلها لضمان
قبل لا تنزل لمكتب الضمان اتصلت على اخوها صقر
منى بجديه / السلام
صقر بشوق / هلا والله بصوت وراعيته
منى بجديه / صقر انا عند الضمان الاجتماعي الي ف ..... ابيك تخدمني
صقر باستغراب / وش عندك بالضمان
منى بجديه / بعدين اقولك تعرف احد هنا يقدر يساعدني
صقر بجديه / ايه تعرفين معارفي وربعي بكل الدوائر الحكوميه اخوك اخطبوط خلاص انتظري 10 دقائق وبعده ادخلي
قفلت من اخوها وانتظرت 10 دقائق الا تسمع صوت جواله كان صقر
منى بلهفه / هلا صقر
صقر بجديه / ادخلي وسئلي عن محمد الفايز وقولي له جايتك من طرف صقر وهو بيساعدكم وبتطلعون من عنده وكل شي خالص
منى بفرح / تسلم يالغالي يله مع السلامه
دخلت مع العجوز وسالت عن محمد دلها الموظف على مكتبه شافت قدام المكتب رجال واضح عليه الصلاح من شكله ولبسه بعد ربع ساعه استلمت الاوراق وسجلت العجوز بالضمان الاجتماعي
ركبت السياره وطلبت من السواق يوديها البنك
العجوز بستغراب / وش له البنك
منى بجديه / يا خاله علشان تفتحين حساب يرسلون فلوس الضمان عليه بدال الروحه والجيه لهم
العجوز بامتنان / ماقصرتي يابنتي
وصلت للبنك بعشر دقائق خلصت وطلعت راجعه للمدرسه
منى بجديه / وين بتك ياخاله
العجوز بجديه / وصليني المدرسه وبمشي من هناك لبيتي
منى باصرار/ بوصلك لباب بيتك
استجابت له العجوز وصارت توصف لمنى لين وصلتها لبيتها كان حي قديم وبيت قديم من دور واحد
وقفت عند باب البيت نزلت العجوز / انزلي يا بنتي تقهوي
منى بابتسامه / تسلمين خليها مره ثانيه تاخرت على المدرسه
دخلت العجوز بيتها ومنى طلبت من وسيم يرجعها للمدرسه
عند نايف
صار يمشي وراء البنت مبتعد عنها خطوات ركبت الدرج وانتظر كم عتبه ولحقها وصلت لباب الشقه فتحتها بدا يدخل الخوف قلبه ما يدري شنو بيستقبله بالشقه قراء المعوذات ودخل برجول تنتفض شكل الشقه مليانه ناس يسمع اصوات وازعاج ماقدر يرفع عينه ويشوف
قربت البنت من غرفه والتفتت على نايف / ادخل هنا انا فيه يقفل باب انت فيه يخلص طق الباب علشان افتح وتطلع
نايف في نفسه وبخوف / يويل حالك يا نايف السالفه فيها تخلص وتقفيل غرف حسبي عليك يا عبد الله وش اسوي بالمصيبه
البنت بزفره / انت ماف ي يسمع ادخل
دخل وعيونه بالارض خايف ومنصدم من الي بيشوف قدامه سمع تقفيلة الباب
نايف في نفسه / يارب وش بسوي بالمصيبه الي قدامي معاد فيه بنات يستحون صارو هم الي يجيبون الشباب اكيد الحين لو بارفع راسي بشوفها مفسخه قدامي ياليتني ماسمعت كلامك استاهل الي يجيني وصار يكرر الدعاء ( الله لا اله الا انت سبحانك اني كنت من الظالمين )
بقى نص ساعه وعيونه في الارض متصبب عرق وحس بهالحظات كل فصول السنه
متجمعه عليه استغرب هدوء المكان والبنت ما نادته وما اصدرت أي صوت يثبت واجدها رفع عيوووووونه بشويش وهو متوقع بيشوف بنت متفسخه على سرير وكانت صدمه حياته
شاف نفسه بالمطبخ والمواعين واصله لسقف حس براحه ان ربي حفظه من الحرام
ونقهر لما فهم انها جايبته بديل لشغاله وملزوم عليه يغسل كل الصحون والقدور والكاسات والملاعق حس بالعبره خانقته شلون بيغسلهم
اذا كاسين يتقاسم غسيلهم مع عبد الله شلون بالمصيبه الي قدامه شلون بيغسلهم
نايف في نفسه / والحل لازم اخلص نفسي من هالورطه المشكله البنت مقفله علي ماني قادر انحاش ولو بجلس اغسلهم بجلس هنا يومين
بصدمه / اعوذ بالله كل هذ موعين شكلهم يا كلون ويرمون بالمغسله وشكلها مواعين سنه يارب والحل كل منك يا عبد الله لو انك بين ايديني كان حطيتك وسط هالصحون والقدور وخليتك عظه وعبره ( هين يا عبد الله )
شلون نسيت المدرسه والحصه بتبداء شكل اليوم المدير بيسجل على غياب استاهل ولا تارك مدرستي وجاي هنا اغسل مواعين ياشماتت العدوين فيك يا نايف واولهم عبدالله الي غاثه بشغل الشقه
وعيونه تنتقل بين الموعين الي ماليه الغساله والي طايحه على الارض / ياربي من وين ابداء غسيل
قرب من المغسله ورفع كمه وبدا يغسل بدون نظافه يبي يخلص بسرعه الي يغسله يحذفها وكلها ماء داخل الدولاب
في الجامعه
كانت ديما ومرام جالسات بالكفتريا جتهم من وراء سلوى وغطت عيون ديماااااااا
التفتت مرام / اهلين سلوى لك وحششششششه موت
سلوى بعدت يدها من عين ديما / وانتم اكثر
ديما بشوق / شخبارك سلوى
سلوى قربت وجلست جنبهم / بخير وانبسطت كثير بجمعتنا ذاك اليوم
مرام بجديه / وش ورانا نعيدها لكن اكيد عندي في البيت
سلوى فرحت جتها الفرصه علشان تاخذ من ديما الي تبيه
سلوى بفرح / وانا موافقه على عزيمتك
مرام بجديه / بناجلها بعد الامتحانات مانبي ننشغل ووبسوي بدال العزيمه حفله نجاح في بيتنا
سلوى بخيبه / حلوووووو اهم شي ننجح ونتفوق علشان نستاهل الحفله
ديما بستغراب / اليوم الدكتوره سميره مو طبيعيه
مرام بجديه / وش فيها
ديما بجديه / ما نتبهتي لها كله تسرح وتبتسم هذي بعمرنا ماشفنا سنها
سلوى في نفسها / والله وبانت مواهبك يا مروان بعجوز بليس
مرام بجديه / مانتبهت لها لاني طول محاضرتها حاطه راسي على الطاوله ما تحمل قرقرتها
عند سلطان
من دخل شغله وهو يشوف خالد مو طايقه ساس البلى والي فيه بسبته قرب منه خالد طالعه بنظرت ومشى
خالد مستغرب من صديقه وتهربه منه ما يذكر انه غلط بحقه
وجالس على مكتبه مشغول تفكيره بمنى الي شوفتها اليوم عذبته مشتهيها ويبي قربها لكن هي تصده
سلطان في نفسه / كله منك يا ساس البلى ليتني ما سمعت كلامك وجبت التعب لنفسي كنت راضي بحياتي طلعت لي ودمرتها
سمع صوت خالد / ابي افهم ليش تتهرب وش شايف مني
سلطان بعصبيه / اطلع عن وجهي مالي خلقك
قرب خالد / مراح ابعد لين افهم الي قالبك علي
سلطان بعصبيه / تدري ان حياتي تدمرت بسبتك
خالد بخوف / وش صار
سلطان بضيقه / زوجتي درت عن مسياري وعافتني
خالد بجديه / ما عندك سالفه قول ا ن الي سيرت عليها طلقتها
سلطان بسخريه / ابشرك رجعتها وطقت صداقه معها على حسابي حتى غرفة نومنا تبرعت فيها للعروس الجديده
خالد بصدمه / شكلها ما تحبك وما صدقت تجيها الفرصه وتعيفك لاتحملني ذنبك المفروض تشكرني الي كشفت لك ان زوجتك ما تحبك والي ما يحبك ماله لزوم
سلطان بصراخ / انا احبببببببها والعروسه الي ابتليت فيها لو منى طالبه طلاقها رميتها وما هتميت اهم شي ترجع لي
خالد بجديه / انت تلحق وراء المقفي والي باعك بيعه لو كان غالي
سلطان بعصبيه / ياليت تروح عن وجهي مالي خلقك
خالد وقف / ياليت تفكر بكلامي وتوزنه عدل بعقلك
سلطان بعصبيه / يا ليت تحتفظ بكلامك لنفسك ما جاني من وراء كلامك الا اقهر والندم
في بيت الجده
غرفة ام سالم
صحت من نومها شافت بنتها على نومة الصبح رفعت نفسها من السرير دخلت الحمام ولبست اخذت عباتها من علاق الملابس لبستها ناويه ادوام بمشغلها لها فتره ماداومت نزلت تحت شافت هيا جالسه طلعت ماعبرتها
ركبت سيارة السواق وطلبت منه يوصلها للمشغل الي شرته من صديقتها لما جاء زوجها بعثه اضطرت تبيعه وتسافر مع زوجها
وصلت للمشغل استقبلوها العاملات بترحيب دخلت مكتبها نزلت عباتها وطلعت تتجول بالمشغل تتفقد الشغل باليومين الي غابتهم شافت كل شي مضبوط نزلت تحت للكفتريا طلبت من الطباخه تسوي لها قهوة تركيه تعدل راسها
عند هياء
ضاق صدرها لما شافت خالتها متجاهله وجودها تستغرب كميه الكره الي بقلب خالتها تجاها بدت تفقد الامل من خالتها الي
قلبها حجر توقعت بيلين بوفاة ولدها لكن زاد قساوة
عند ساره
فتحت عيونها بكسل سندت جسمها على السرير اخذت جوالها شافت الساعه عشر قامت من السرير وطلعت من غرفة امها ودخلت غرفتها دخلت الحمام اخذت شور ولبست تنوره سوداء لنص الساق وبلوزه قطنيه بيج فيها رسومات من قدام
نزلت تحت شافت هيا بالصاله واضح عليها الضيقه قربت منها
ساره بحنان / سلامات وش مضيقك
هيا نزلت دموعها خافت ساره وجلست جنبها
ساره بخوف / وش فيك ليش تبكين
هيا بصوت باكي / ليش خالتي تكرهني ما ذكر اني سويت لها شي
ساره تنقهر من تصرفات امها وظلمها لهيا الحنونه
ساره بضيقه / امي طبعها كذا الله يعنك عليها ما تدرين يمكن بكره تصيرين الغاليه واغلى مني بعد
هيا بصوت باكي / والله حاولت اكسبها وضغطت على نفسي كثير وتحملت الي ما ينتحمل ومالها تزود قسوتها علي
ساره بمزح / يكفيك سالم وانا وشوق وعيالك بتطمعين بامي الي صعب يتغير طبعها
والله ياهيا ان معاملت امي لك توجعني لكن هذي امي وهذا طبعها واجب علينا نتحمل ونصبر يمكن الايام تغيرها للاحسن
هيا مسحت دموعها / الله يعين ليش غايبه وعندك امتحان
ساره بجديه / ما ذكرت وامي تكفلت بموضوع العذر الطبي
هيا / اقطرتي
ساره / لا
هيا / اجل هزي طولك ودخلي المطبخ ندور لنا شي ناكله
وقفت ساره / يحبك لتعب
هيا / الاكل جاهز ينتظرك تاكلينه
دخلن المطبخ كان الاكل محطوط على الطاوله جلسو ياكلون ويسولفون
في بيت فيصل
اتصلت منال بزوجها تذكرة بطلعة السوق وزياره زوجة سلطان
بعد ساعه طلع من مكتبه وفتح الباب بمفتاحه شافها جالسه على نار
منال بعصبيه / باقي ساعتين عن صلاة الظهر وش يمديني اشتري
فيصل / اخلصي علي فيه وقت
طلعت مع زوجها ركبو السياره وصلو السوق نزلت ونزل معها دخلت محل الذهب اشترت طقم ناعم
فيصل / ما خلصتي تراني مهرب من الشغل
منال بعدم اهتمام / لاحق على شغلك اهم شي اخلص
طنشته ودخلت محل عطورات اشترت شنطه فيها طقم عطورات
عند ندى
بعد ما طلعت منى رجعت لغرفتها نامت ضبطت منبه الجوال على الساعه على 10
دق جوالها قامت دخلت الحمام توضت وصلت الضحى وطلعت دخلت المطبخ شافت الشغالات جالسات يفطرون
صبت لها كاس حليب كافي وطلعت لصاله فتحت التلفزون على برنامج نسائي انجذبت لموضوع الحلقه كان عن سحر الاخرين بالحلال ورفعت على لصوت مستغربه ان فيه سحر حلال الي تعرفه تحريم السحر بانواعه واشكاله
السحر الحلال بتطبيقك الاتي
- ابتسم في وجوه الآخرين .
- ابدأ بالسلام عليهم .
- أظهر الحفاوة والترحيب .
- ادع لهم ولوالديهم عند الفراق .
- احترم الكبير .
- ارحم الصغير ، وقبل رأسه .
- اقبل الإنتقادات بروح طيبة .
- لاترفع صوتك في الحديث والمناقشات .
- اعترف بالخطأ في حال الخطأ .
- اعترف بالفضل لأهل الفضل .
- تغاض عن هفوات الإخوان وزلاتهم .
- انصح المقصر بلباقةولين وتلطف .
- تصدق على الفقراء والمساكين .
- اعف عن من ظلمك .
- أكرم صديقك وجارك .
- صل رحمك .
- أعط كل ذي حق حقه .
- أغث الملهوف .
- أعن المكروب .
- قم على حوائج الناس .
النتيجة : ، سوف تسحر قلوب الناس ,
وتسبي ألبابهم ، وتستميلها نحوك
بعد ماخلص البرنامج تفكيرها طار لمنى شكلها تستخدم ذا السحر اذا طبينتها قدر تكسبها
ندى بجديه / شغلات بسيطه وصعبة بنفس الوقت
عند تركي
رجع البيت نزل شاف تركي وماجد طالعين من الفله
تركي بابتسامه / على وين يا شباب
ماجد بابتسامه / بنطلع نفطر برى وش رايك تخاوينا
تركي بجديه / والله فكره ميت جوع
تركي ولد ناصر بابتسامه / بعزمكم وبفطركم على ذوقي
ماجد بجديه / اهم شي تدفع لاني مفلس
تركي اوجعه قلبه خاف ان عيال اخوه محتاجين فلوس من مات اخوه ما قابلهم ولا سالهم يعرفهم معتمدين بمصروفهم على ابوهم واكيد مستحين يطلبون من غيره
قرر لطلع معهم يمر بنك ويصرف لهم فلوس ويعطيهم
عند عبدالله
طول وقته وتفكيره بصديقه خايف انه وهقه بالسالفه
اول ما طلع من حصته دخل غرفة المدرسين قرب من مكتبه فتح درجه طلع جواله واتصل على نايف بيطمن عليه
عند نايف
على كل المواعين الي غسلهم باقي كثرهم عشر مرات
حس باصابيعه متورمه ويده توجعه والجوع ذبحه
ترك الي بيده وصار يفتح بالدواليب يدور شي جاهز مايبي يطبخ ويزيد عدد المواعين الي مو راضيه تنتهي
لقى له علبة تونه فتحها واخذ خبز على الطاوله وصار ياكل
نايف في نفسه / والله وطلعت قطو مطابخ هيييييييييييين ياعبدالله ان ماخليتك تذوق معاناتي وتجرب ها المغامره بنفسك ما كون نايف
سمع صوت جواله شاف رقم صديقه حطه مشغول وتكررت الاتصالات وكله يعطيه مشغول
نايف بقهر / بيذبحك الفضول تعرف الي صاير عندي موت بفضولك وشغلك لرجعت للبيت
عند عبد الله
هذا وش عنده معطيني مشغول انا جالس احترق عليه وهو عايش بالعسل خلني ارجع لحصتي ابرك
عند نايف
ياكل وعيونه معلقه على باب المطبخ المقفل / يارب تفك اسري
خلني اكلم المدرسه احط عندهم خبر اني غايب وادور أي عذر يرحمني من المدير
رفع جواله الي كان بيده اتصل على مكتب المدير رد عليه
نايف بتوتر / السلام ابو خالد
المدير هلا من معي
نايف بارتباك / نايف ال ..... مدرس العلوم
المدير بشده / ليش حضرتك غايب بدون عذر
نايف وعيونه على الصحون المنثوره حوله / صابتني سخونه الصباح وما قدرت اتصل اعتذر
المدير بهدؤ / اجل جيب لك عذر طبي لا ينخصم من راتبك
نايف بضيقه / ا ن شاء الله مع السلامه
نايف في نفسه / ومن وين بجيب ورقت عذر طبي والله عذري من صباح الله خير مصبح غسل الموعين وراسي مندفن بين هالصحون والقدور حسبي على عدوينك يا عبدالله
سمع اذان الظهر ترك علبة التونه
نايف بجديه/ الحين شلون ادخل الحمام اتوضا واصلي
صار يسكشف المكان يدور على حمام شاف غرفة جانبيه صغيره وجنبها حمام فيه غسالة ملابس والسلال ماليانه بالملابس الوسخه حمد ربه انها طلبت منه يغسل المواعين مو الملابس دخل الحمام توضاء
ورجع للمطبخ فتح الادرج طلع سفره بسطها وصلى عليها بعد ما خلص صلاته رجع لمعانته بغسل المواعين
عند صقر
اتصل على امه يحط عندها خبر انه بيتاخراليوم لانه بيطلع مع فهد لبيت اهل القتيل
رفع جواله واتصل على راكان
عند راكان
طلع من البيت بعد ما تغدا ابوه وسبحه وتطمن على نومه ركب سيارته سمع صوت جواله
رد وهو يبتسم / جاي بالطريق اعرف انك مولع مني
صقر بجديه / الحين ليش تبلشني بفهد ومشكلتي ما اعرف سالفته
ركان بجديه / جايك بطريق وبقول لك السالفه ومتاكد بترحمه
صقر بجديه / من متى نستخدم الرحمه بشغلنا مطلوب بشغلنا قسوة قلب
راكان بضيقه / ليش احنا مو بشر عندنا احاسيس ومشاعر
صقر ماحب يطولها بالجوال / بنتظرك بمكتبك يله مع السلامه
في بيت صقر
بعد ما خلصت مكالمتها مع ولدها التفتت لنجود الي منسدحه على سريرها
ام صقر بحنان / يمه نجود نمتي
نجود / لا مابقى شي عن صلاة العصر
ام صقر بجديه / اليوم ديما تاخرت
نجود بجديه / كل يوم سبت تطلع الساعه اربع
ام صقر / الله يوفقها ويستر عليها ويحميها من بنات بليس
نجود / امين
ام صقر بحنان / يمه ولد عمك ينتظر ردك وانتي تماطلين
نجود رفعت نفسها / يمه انتي عارفه سبب ترددي ما قدر اسافر بعيد عنكم
ام صقر بحنان / البنت لا تزوجت تتبع زوجها وين ما كان وهذا مو سبب يخليك ترفضين
نجود باستسلام / اجل الي تشوفينه انتي وصقر
ام صقر بابتسامه / اجل مبروك والله يهنيك ويسعدك معه ويسخركم لبعض
نجود / امين
دخلت ديما البيت ودخلت غرفة جدتها باست راسه
ديما / يمه طالعه لغرفتي بصلي وبنام المغرب صحوني
ام صقر / ا ن شا ءالله اطلعي ارتاحي
طلعت ديما من غرفة جدتها وطلعت فوق دخلت غرفتها نزلت عباتها توضت وصلت ادخلت سريرها بملابسها ومن التعب والارهاق نامت
عند منى
دخلت عليها بنتها مكتبها مالها خلق تكلم سلطان وتطلب منه يجي ياخذ بنته
منى بحنان / غلويه اليوم بنرجع مع بعض للبيت بابا مشغول
غلا / طيب
عند ندى
دخلت المطبخ صلحت الغداء على الساعه 3 خلص طلعت لصاله تنتظرهم
انفتح باب الشقه شافت وليد يدخل والهم والحزن مرسومين على وجهه دخل غرفته ندى اوجعها قلبها عليه وقفت ودخلت وراه
ندى بحنان / احط غداء لك
وليد بحزن / مابي مالي نفس
قربت منه وبدت دموعها تنزل / وليد انا اعرف انك تكرهني وما تحبني لكن والله حبيتكم مثل عيالي وزواجي من ابوكم غصب عني ما قدرت ارفض طلب ابوي
وليد كسرت خاطره لما شاف دموعها
وليد بصدق / انا ماكرهك ولا احبك يمكن مع الوقت نتعود عليك ونحبك
ندى قربت منه وسحبته بيده / اجل ما دامك ما تكرهني لازم تذوق طبخي
وليد استسلم لها ووقف معها / بننتظر امي وابوي نتغداء سوى
ندى بحنان / شكلك تعبان والغداء جاهز واخاف لنتظرتهم تنام بدون اكل
وليد بضيقه / ما فيني نوم بجلس العب بلاستيشن واذا جو نتغدى مع بعض
ندى بابتسامه / زين تسوي
عند عبدالله
طلع من مدرسته مر على مدرسة نايف وانصدم لما سال عنه وقالو غايب
طالع بالشارع المقابل كان هدوء
عبدالله بقلق / يمكن سبقني للشقه
ترك المكان وصل لشقه وصار يطلع درجتيني درجتين فتح الشقه ودخل كل الغرف يدور على صديقه
عبد الله بخوف / معقوله من الصبح هناك الله يستر
رفع جواله واتصل على جوال نايف
عند نايف
ارتاح وهو يشوف المواعين بدت تنقص كل المواعين الي غسلهم بدون نظافه يبي يخلصهم والسلام
سمع صوت جواله متاكد انه عبدالله رد عليه مقهور
عبدالله لما سمع الخط يفتح / نايف وينك
نايف بسخريه / لو تشوف الي انا فيه بتحسدني وتتمنى انك كنت بمكاني
عبدالله بفضول / قول الي صار عندك
نايف بيقهره / ماني فاضي لك يله مع السلامه
سكر في وجه عبد الله الي جالس يفكر شنو الي لاقي نايف بشقة البنت وخلته يطنش مدرسته معقوله نايف رضخ للبنت وستسلم لها
عبد الله بخوف / لا ا ن شا ءالله لو سواها والله بيكون ذنبه برقبتي طول عمري
عند منى
طالعت ببنتها الي نايمه على الكنب قربت منها
منى بحنان / غلويه قومي بنطلع
لبست عباتها وطلعت مع بنتها قربت من غرفة الحارس سالت عن السواق قالو انه طالع
صارت عيونها اطالع بالسيارت وتفاجئت بشوفت سياره سلطان قربت منها فتحت الباب الي قدام وركبت وبنتها وراء
منى بهدوء / وينه وسيم
سلطان بحب / صرفته حبيت ارجعك للبيت
منى بسخريه / من متى هالكلام
سلطان بترجي / من اليوم وياليت تفتحين معي صفحه جديده
منى بقهر وضيقه / كل اوراق صفحاتك تقطعت معاد بقى اوراق
مسك يدها انتفضت يد ها من مسكت يد سلطان لاحظ تاثرها بمسكته وانبسط بتاثر بلمساته
سلطان بحب / اشفعي لي علشان عيالي
منى بجديه / بكذب عليك لو قلت اقدر اشفع لك انت من زمان طايح من عيني والحين اكتملت وطحت من قلبي والي يطيح من القلب مستحيل بيرجع فيه
سلطان باخر امل / طيب وش رايك نتغداء برا ونتفاهم
منى بضيقه / خلاص الي بينا انتهى وبكره بانقل فلتي وبيكون انفصال بينا بدون طلاق وفضايح
سلطان بعصبيه / مو على كيفك وحقي لو ابيه باخذه غصب عنك
منى بعصبيه / قصر صوتك بنتك لتسمع خبالك واذا على حقوقك خلاص عندك البديله وانا عفتك افهمها يابن الناس عفتتتتتتتتتك والي رابطني فيك هالعيال لولاهم كان شفت مني تصرف ثاني
كلامها خناجر تطعنه بدون رحمه ما يقدر يكذب كلامها الي تقوله صادقه فيه لكنه انسان ولانسان يخطي وهو اعترف بغلطته لكن راسها يابس مو راضي يلين
استمر الهدوء بالسياره دخلوا لشقه كانت ندى ووليد ينتظرونهم
وقفت ندى لما شافت وجه منى منقلب والعصبيه واضحه على سلطان الي دخل غرفته من غير لا يعبر احد
منى دخلت غرفة بنتها وسكرت الباب عليها وهي
وندى واقفه محتاره ما تدري وش تسوي واضح ان صاير بينهم شي كبيرر ما تقدر تدخل عن سلطان تخاف يعصب عليها ويحط حرته فيها ولا تقدر تدخل عند منى خايفه يكون زواجها من سلطان السبب
اضطرت تدخل المطبخ وتجهز الغداء بعد ماخلصت اطلعت لوليد
ندى / وليد ادخل ناد امك وابوك
وقف وليد دخل على امه الي منسدحه بملابسها على سرير بنتها
وليد / يمه تعالي تغدي
منى بضيقه / غلويه اطلعي تغدي وقولي لخالتك اني تغديت بالمدرسه
طلع وليد من عند امه دخل غرفة ابوه شافه منسدح على سريره / يبه تعال تغد معنا
سلطان بزمره / مالي نفس اطلع وسكر الباب وراك
طلع وليد شاف غلا وندى جالسين على الطاول ولاكل قدامهم
ندى بجديه / وينه ابوك
وليد وهو يجلس / ما يبي وشكله معصب
غلا / وامي تقول متغديه بالمدرسه
تاكدت شكوكها ان صاير بينهم شي كبيررررر
عند ركان
وصل مكتبه شاف صقر لابس بدلته العسكريه اول ماشافه وقف من مكانه وجلس بالكرسي المقابل
صقر بجديه / ممكن تفهمني سالفة فهد مو اطلع معه عمياني
راكان / حكى له السالفه بالتفصيل
صقر بتشكك / متاكد من صدق كلامه
راكان بثقة / مثل ما متاكد انك قدامي
صقر / اجل بطلع معه الحين ما نبي نتاخر
طلع صقر لمكتبه و طلب من الشرطي يجيب له فهد
بعد دقائق جاء الشرطي وبيده فهد واشر لشرطي يطلع ويتركهم
صقر بجديه/ مستعد للمقابله
فهد بحزن / من زماااااااااان
صقر بجديه / راكان وثق فيك ياليت تكون عند ثقته
فهد بحزن / تطمن مثل ما طلعتني بترجعني هي كلمتين باقولها لام محمد واريح فيها ضميري
صقر بجديه / اجل توكلنا على الله
ركب السياره مع صقر وسيارة الشرطه وراهم
صقر بجديه / وصف لي مكان بيتهم
استمر فهد بالتوصيف لين وقف عند بابهم وقلبه يرجف وكله ينتفض من هول مقابلة ام محمد خايف يطلع من عندها مكسور مثل ما طلعت امه معزم ما يطلع من عندها الا مسامحته ولا ذابحته
طقو الباب طلعت لهم الشغاله وطلبو منها تقول لام محمد فيه رجال بيقابلونها ضروري
بعد دقائق جاهم الرد بالموافقه دخلو وراء الشغاله المجلس دقائق و ام محمد داخله
لما شافت فهد كل الجنون نطت بوجها / انت وش جابك
فهد بانكسار / تذكرين يمه لما كنتي تزعلين مني لما اناديك خالتي وتقولين انت ولدي الي ما جبته يمه وغلاك من غلا محمد نسيتي لما كنتي توقفين بصفي لما اتهاوش مع محمد وتقولين ولدي فهد مايغلط
شلون يمه تصدقين اني ذابح محمد متعد وانتي تعرفيني حبي له
يمه انا جيتك مو خايف من الاعدام جيتك ابشرك محمد قبل لا يموت نطق الشهاده ووصاني عليك وطلب مني طلب ماضنتي بالحق انفذه
يمه تعاهد انا ومحمد كل واحد يتزوج اخت الثاني علشان نتقرب اكثر من بعض
وصار يبكي بحرقه / لكن بدال مازفه معرس لاختي ذبحته بايدي يا ليت الرصاصه فيني ولا وفيه ياليتها فيني ولا فيه خسارتي بمحمد كبيره وحزني عليه ماينوصف
يمه سامحيني مو علشاني علشان امي ماينكسر وجهها لانذكرت بعد موتي وقالو ولدها اعدموه قاتل صديقه
وفجئة سحب المسدس من صقر صقر انتفض وخاف يصير شي
قرب من ام محمد / خذي المسدس وذبحيني مثل مذبحت الغالي لان حياتي بدونه عذاب
ام محمد تنتفض من البكي الموجع والمحروق
ام محمد بصوت باكي / سامحتك الله يسامحك
فهد لا شعوري قرب منها وسحب يدها وباسها وباس راسها
فهد برجاء / يمه كملي معروفك وحققي وصية محمد وزوجيني اخته اعرف اني طمااع لكن ابي اصير ولدك رسمي وقدام الكل
ام محمد سحبت يدها / خلها بعدين لين اطيب جروحي
الموضوع المراد مناقشته
الواسطه ومادراك مالواسطه
مارايك باستغلال عمال النظافه بتنظيف البيوت بدال الشغاله ودفع لهم مبلغ زهيد
وهل انتي مع تصرف البنت وطلبها من عامل النظافه القيام بتنظيف المطبخ والملابس وقيامه بدور الشغال والمقابل 100 ريال
انتي مع او ضد توضيف مستخدمات عجائز في مدارس البنات
موعدنا باذن الله الاربعاء
اختكم نسايم نجد
|
02-05-11, 05:44 AM
جديد مواضيع قسم الارشيف
العرض العادي
