كاتب الموضوع :
نسايم نجد
المنتدى :
الارشيف
اليوم ماعندي تعليقات على ردودكم
وبنبداء بالبارت
الرجاء عدم طمر السطوررررررر
البارت الحادي والسبعون
عند ام صقر
جالسه بالصاله مع اختها والبنات وتفكيرها عند ساره
ام صقر بحرقه / الله يهداك ياصقر ليش ماتصلت اطمنتي وانت عارف اني على نار وليش مقفل جوالك
ام مرام بجديه / اتصلتي على خوية بنتك
ام صقر بضيقه / الي صار لبنت الناس نساني بنتي
التفتت لديما وبضيقه / يامك اتصل على خوية امك بتطمن عليها
ديما بصوت مبحوح / الرقم بجوالك
ام صقر وعيونها على جوالها / قومي هاتي الجوال عظامي ماتشيلني اجيبه
اخذ الجوال وضغطت على رقم سميه ومدت الجوال لجدتها اخذته ام صقر وحطته على اذنها
عند سميه
كانت بالصاله ومنى قدامها والحزن والتفكير مرسومين على وجهها متاكده ان اخوها وبنته السبب
سمعت صوت جوالها شافت رقم غريب رفعته / الو
ام صقر بحنان / شلونك يا بنتي وشلونها منى
سميه بجديه / الحمد لله حالها احسن بكثير
ام صقر بضيقه / مابيك تريحيني بهالكلمتين ابيك تقولين الصدق اذا هي تعبانه اخذناها
سميه بجديه / من الصباح واحنا برا البيت مرينا بيت ماجد وانبسطت على بناته ومن شوي راجعات
ام صقر بحنان / مدام الطلعه وزيارة بنات اخوك بتريحها كثري منها نبيها ترجع لنا مثل اول
سميه بجديه / باذن الله بترجع احسن من اول
مابيك تشيلين همها وهي معي
ام صقر بحنان / الله يجزاك خير يابنتي ومانبيها اطول علينا
سميه بجديه / كلها يومين وبترجع لكم
ام صقر بجديه / مع السلامه
حطت جوالها على جنب وعيونها على صديقتها وبحنان / بيطول هالسرحان والتفكيرررر
صحاها صوت سميه من تفكيرها / افكر بكلامك
سميه بهدوء / وش طلع نتيجه هالتفكير
منى بحرقه / ابي اخذها لبيتي بدون لا اتزوج اخوك
سميه بهدوء / وتبين ماجد يرضى بكلامك ويعطيك بنته تراها غاليه عند ابوها
منى بصوت باكي / والحل
سميه بحنان / الحل قلته وطلبت منك تفكرين فيه
منى بصوت باكي / الي قلتيه صعب انفذه
سميه مرتاحه ان صديقتها صارت تناقشها وتجادلها وطلعت من العزله الي حاطه نفسها فيها
سميه بحنان / اذا فكرتي بسالفه مثل ماهي بتوافقين
منى بصوت باكي موجع / ياليتني ماشفت هالبنت ولا تعلقت فيها
سميه بحنان / لا تتحسفين على شي ما تدرين يمكن بالامر خيره
منى بصوت باكي / وتشوفين زواجي من اخوك خيره
وقفت سميه وبهدوء / الله يكتب لكم الصالح الحين قومي نامي
منى وبصوت باكي / اذا بتنامين نامي انا مافيني نوم
سميه بحنان / طول نهارنا برا اكيد تعبانه واول ماتحطين راسك على المخده بتنامين
منى بصوت باكي / اذا جاني النوم نمت
سميه بحنان / اجل بكيفك
ماحبت تجبرها على الي تبيه دخلت غرفتها
عند منى
رجعت لها صورة حنين الي تشوف فيها شبه كبير في بنتهاااااااا
منى باصرار / مستحيل اخليك تبعدين بعد ما لقيتك لكن وش حلي مع هالزواج
عند ام صقر
حطت جوالها على الطاوله بجديه / تقول انها احسن
ام مرام براحه / ياجعله
ام صقر وعيونها على ديما / اخذي مرام وطلعو نامو
ديما بحزن / شلون انام ومدري وش صار على ساره
ام صقر بضيقه / الله يهداك ياصقر لا جيت ولا اتصلت
سمعت صوت طق على الباب وقفت فتحت الباب شافت ولدها
ام صقر بلهفه / بشر عنها
باس صقر راس امها
صقر وبجديه / تطمني يالغاليه مافيها الا سخونه واذا انخفضت طلعت
ام صقر بعتاب / وانت شلون تجي وتتركها
صقر بجديه / بنت ناصر عند عمتها
ام صقر بامل / وجدتها معها
صقر بجديه / لا ماجت هذي لو درت ان بنتها بتموت ما ضنتي بتجي تشوفها هالادميه حرام فيها كلم ام
ام صقر بضيقه / الله يهداها ويحنن قلبها على بنتها اذا رجعت المستشفى اخذني معك
صقر بجديه / يالغاليه ارتاحي وياليت تسون لها شي تاكله
ام صقر بحنان / وانا امك صلح الباب الطايح ابيها لجت تشوف كل شي طبيعي ما بيها تاخذ بخطرها من شيلت الباب
صقر بجديه / تامرين امر الحين برجعه مثل ماكن
دخل قسم الضيوف رجع الباب مكانه وتنحن بيدخل الصاله سمع صوت خالته
ام مرام بجديه / ادخل مافي احد
دخل صقر وقرب من خالته باس راسها
ام مرام / تبوس الكعبه ان شاء الله
واقف وعيونه على امه / الباب ورجعته تبين مني شي قبل لا اطلع
ام صقر بحنان / ابيك تشتري كل شي يحبنه البنات وتحطه بغرفتها يمكن لشافته تاكله البنت تستحي منا وماتعودت تاكل معنا
صقر بحب / كل شي تفكرين فيه يالغاليه
وبابتسامه / الحين بطلع اشتري لها الي يحبنه البنات وتصير غرفتها سوبرماركت
ام صقر بحب / جعل عيني ماتبكيك
طلع صقر
عند ماجد
من بعد كلام اخته وهو معتكف بمكتبه مطنش اتصالات سيف
سمع صوت الباب ينفتح رفع راسه شاف صديقه
دخل سيف وجلس مقابل ماجد
سيف بعصبيه / مريت بيتك ومالقيتك واتصالاتي مطنشها
ماجد بضيقه / قافله اخلاقي وماني برايق اقابل احد
سيف بسخريه / وهالمره وش مضيق اخلاقك لا تقول اختك رفضتني
ماجد بسخريه / تبيها من الله لكن ابشرك وافقت
سيف بصدمه / وافقت
ماجد بجديه / ايه وافقت وش فيك مصدوم
سيف بجديه / مو سالفة مصدوم لكن من كلامك عنها كنت متاكد انها بترفضني
ماجد بضيقه / وافقت والله يسعدكم
سيف بستغراب / ومادامها موافقه وش سبب ضيقتك
ماجد بضيقه / بتزوجني صديقتها
سيف بجديه / صديقتها
ماجد بضيقه / الي صار عليها الحادث
سيف بابتسامه / اجل مايحتاج الشوفه الشرعيه انت شايفها وحاضنهااا
ماجد بعصبيه / وش هالكلام لو يسمعك احد يضن فينا الشينه
سيف بابتسامه / ما تقدر تنكر انك حضنتها
ماجد بضيقه / حالتها ووضعها خلاني اتصرف بدون وعي وبحسن نيه الله يغفر لي سواتي
سيف بجديه / شلون بتخطبها وهذي حالتهااا
ماجد بجديه / كلامك قلته لسميه
سيف بجديه / اختك هذي مدري شلون تفكر
ماجد بضيقه / تفكيرها مثل تفكيرك حاطين زواجي براسكم
سيف بجديه / انا معها في الفكرة لكني ضد اختيارها
ماجد بضيقه / اليوم زارتنا في بيتنا وحالتها ماتسر
سيف بجديه / اكيد من بعد الي صار لها حالتها ما تسر واذا تزوجتها وهذي حالتها بتصير حمل ثقيل عليك
وقف ماجد وبجديه / وهذا الي بيخليني اوافق عليها لانها مالها بالزواج وبيكون همها بناتي
وقف سيف وبجديه / بتتزوجها ولا تبيها مربيه لبناتك
ماجد بضيقه / اكيد ابيها مربيه لبناتي ومن بعد نوره كاره كل النسوان ومالي رغبه فيهم
سيف بجديه / واذا رفضت تكون مربيه لبناتك
ماجد بجديه / قبل لا املك عليها بقول لها الي ابيه اذا وافقت تممنا كل شي واذا رفضت ادور لها زوج غيري
سيف بجديه / زين تسوي وين بتروح
ماجد بجديه / برجع للبنات اكيد لحالهم
سيف بجديه / اجل بروح معك
طلعو من المكتب وكلن ركب سيارته بطريقهم لبيت ماجد
عند ابو مروان
جالس بالغرفه الي مستاجرها مروان وهو طفشان
ابو مروان بعصبيه / هالولد جنني وانا اصحي فيه لو ميت صحى
ام مروان بهدوء / لا تلومه له يومين صاحي والطريق كان طويل واتعبه
ابو مروان بقهر/ دايما ادورين له الاعذار وياليته بار فيك
عند سلوى
جالسه مع تهاني بعيد عن ابوها وامهااا وتسمع كلامهم
سلوى بحرقه / ياليته مايقوم والله اني خايفه من الي بنسويه
تهاني ببرود / ماضنتي انها اول ولا اخر مره تسوين هالشي
سلوى بخوف / قلبي مو مرتاح حاس السالفه بتنقلب علينا
تهاني ببرود / عندك وقت ترفضين وماتمشين ورى اخوك الي بيورطك
سلوى بسخريه / الي يسمعك يقول منتي بشريكتنا
تهاني بحرقه / شاركتكم علشان اخفف مصاريفي عن امي و الحين بشاركم علشان انتقم واسود سمعت اهلي
سلوى بعصبيه / تبينا ننكشف علشان انتقامك
تهاني من قلب وبحقد / يارب تنكشفون وتصير سمعت الضامي بالارض
سلوى بعصبيه / اقول انكتمي يكفيني الخوف الي فيني تكملينها بدعوتك
دخل عليهم مروان
مروان بقسوه / يله مشينا
ابو مروان بعصبيه / كان كملت نومك لبكره
مروان بقسوة / انتظركم بالسياره
وطلع مطنش امه وابوه
ابو مروان بحرقه / لو اني صبي عنده ماعاملني هالمعامله الولد مستعر مني
ام مروان بحنان / تراه جاهل لا تاخذ باخاطرك منه
ابو مروان بقهر / الولد بيصك الثلاثين وتقولين عنه جاهل
التفتت ام مروان للبنات / يله بنسري
طلعو البنات ووراهم ابو مروان وزوجته
عند تركي
فتح عيونه بكسل رفع ايدينه يتمطط جلس اخذ جواله شاف الوقت وانصدم
تركي بصدمه / اعوذ بالله كل هذا نوم
وقف وتنحنح وبعدها دخل الحمام توضاء ورجع يصلى كل الصلوات الي فاته
بعد ماخلص صلاته التفت على مكان سالم الخالي
تركي بجديه / الولد وين راح وليش مخليني ايم كل هالوقت
طلع من الغرفه وفتح باب الشارع مشى خطوتين شافه جالس برا على جلسه مرتفعه قرب منه
تركي بعصبيه / من متى صاحي
سالم التفت لعمه وبابتسامه / من بدري
تركي بعصبيه / ويومك صاحي من بدري ليش ما صحيتني اصلي
سالم بجديه / شفتك متعمق بنومتك وماحبيت ازعجك وانكد عليك
جلس وحط يده على المركى وبعصبيه / اذا السالفه تخص الصلاه مسموح تنكد علي
سالم بابتسامه / خويك ماجاء شكله ساحب عليك
تركي بستغراب / والله غريب هالرجال شلون يترك اهله بالبر لحالهم اذا ماخاف عليهم من البشر اقلها يخاف عليهم من الذيابه الي صوتها قريب من هالمكان
سالم بخوف / ذيابه
تركي بابتسامه / ماضنتي انك اصمخ وماتسمع صوت الذيابه ليكون تضن هالصوت تغريد عصافير
وقف سالم وبخوف / اجل مدام فيها ذيابه ندخل داخل بدال لانجلس برا ونصير عشاء لهم
تركي بسخريه / اشوفك خايف يادلوع امك والله الجو عاجبني ماني بتاركه وداخل
سالم يتلفت حوله من الخوف / مدامه عاجبك اجلس فيه لحالك والله ماني بايع عمري
مشى من قدام عمه وتركي يتمسخر عليه
عند نوف
بعد ما تعشو عيالها اخذتهم لغرفتها وبسطت لهم على الارض ونسدحت وسطهم مثل ماكانت بفرنسا
طالعت بالساعه الي بالجدار وكانت وحده
رفعت جوالها واتصلت على ركان
عند ركان
كان بغرفته نايم صحااه صوت الجوال رفعه واستغرب من مكالمة نوف بهالوقت
حط الجوال على اذنه وبصوت كله نوم / الو
نوف استغربت من صوت ركان النايم / نايم
ركان بصوت مبحوح / ايه و ماضنتي انك متصله هالوقت علشان تسئلين هالسؤال
نوف باحراج / البنات قالو ان شوق طالعه مع وتوقعتك توصلها لبيتي
ركان بصدمه / بنتك ما شفتها ولا طلعت معها
نوف بخوف / شلون ماشفتها ولاطلعت معك اجل منهو الي طالعه معه وليش للحين ماوصلها
ركان بجديه / ومن وصل لك هالاكلام
نوف بخوف / خواتها قالو انهم شافوها راكبه مع رجال توقعته انت
ركان فز واقف وبعصبيه / اذا كلام بناتك صدق فتاكدي اني ذابح بنتك
وياليت تتصلين عليها وتتاكدين وينها فيه قبل لا اجن
نوف خافت من عصبية ركان / طيب بتصل عليها
ركان بجديه / لا دريتي وينها كلميني وطمنيني
نوف بجديه / ان شا ءالله
انهى اتصاله وصار يتحرك بالغرفه بعشوائيه وداخله بركان بينفجر
ركان بعصبيه وبصوت عالي / وين طاسه اخر الليل ومع من رايحه ليكون البنت
اعوذ بالله منك يا بلبيس دخل الحمام توضا يطرد وسوسه الشيطان
ماقدر يصبر اخذ جواله / متاكد انها بطنش اتصالي الله يهداها وترد وتريحيني من هالوساوس
عند شوق
جالسه بكفتريا المستشفى طفشانه سمعت صوت جوالها اخذته من شنطتها شافت رقم صقر
كشرت بوجهااا
شوق باستغراب / وش عنده متصل بهالوقت
خليني اكلمه واحط حرت ساره فيه
حطت الجوال على اذنها وبعصبيه / خيرررررر
ركان بعصبيه / وينك فيه ياهانم
شوق بعصبيه / وين ما كون مالك شغل فيني
ركان بعصبيه / شوووووق تسنعي وقولي وينك ولا والله مايحصل لك طيب
شوق بعصبيه / اقول الي ماطوله بايدك وصله برجلك
وقفلت بوجه ركان
عند شوق
رجعت جوالها لشنطتها ودقائق الا وتسمع صوته
شوق بعصبيه / اووووووووووف
رفعت جوالها وتفاجئت برقم امها
شوق بلهفه وحب / اهلين
نوف بعصبيه / انتي وينك فيه ومع من طالعه
شوق بجديه / ليكون ضايعه ودورون علي
نوف بعصبيه / سئلتك وجاوبيني على قد السؤال
شوق بهدوء / السالفه طوووويله
نوف باصرار / قوليها ماوراي شي
شوق بجديه / الموضوع يخص عمتي ساره
نوف بستغراب / وش فيها
شوق بجديه / الحين بالمستشفى
نوف برعب / ليش بالمستشفى وش صاير عليها
شوق حست بخوف امها / عمتي ساره ارتفعت حرارتها بجلس عندها واذا طلعت وصلتها البيت و جيتك وفهمتك كل شي
نوف بعصبيه / ومنهو الي الي وصلكم المستشفى
شوق بجديه / صقررر
نوف بصدمه / وليش صقر يوصلكم وينهم عمانك
شوق بجديه / السالفه بتفهمينها لجيتك
نوف بعصبيه / بنتظرك
شوق بجديه / فمان الله
بعد مانهت اتصالها من امهااا وقفت وحطت الكاس على الطاوله ورجعت لغرفة عمتها
عند ركان
نزل الجوال من اذنه مقهور ومعصب منها
ركان بعصبيه / وصلت فيها المواصيل تقفل الجوال بوجهي هييييييين ياشوقان
صحاه من وساوسه صوت جواله شاف رقم نوف على طول رد
ركان بعصبيه / وينهااااااااا وفيه
نوف بجديه / بالمستشفى مع عمتهاااااااا
ركان بصدمه / عمتهاااااااا بالمستشفى وش صاير عليها
نوف بجديه / تقول سالفه طويله اذا جتني بتقولها
ركان باستعجال / مع السلامه
انهى اتصاله / وش صار على البنت ليكون انتحرت وتورطك ياصقر
رفع جواله وتصل على صديقه
عند صقر
كان بالمجلس وتفكيره عند ساره وشوق سمع صوت جواله رفعه شاف رقم ركان
صقر بجديه / اهلين ركان
ركان بخوف / البنت وش سوت بنفسها وليش مرقده بالمستشفى
صقر بهدوء / ما فيها الا حراره بسيطه وبعد شوي بتطلع الا انت من قالك
ركان بجديه / انت وينك فيه
صقر بجديه / نايم في بيتنا
ركان بعصبيه / نايم وزوجتك بالمستشفى يابردك يا شيخ
صقر بجديه / زوجتك المصون عند عمتها تكفي وتوفي
ركان بستغراب / وشوق من قال لها ومن الي خذها لعمتها
صقر بجديه / قبل لا خذ عمتها شفتها واقفه بوجهي واصرت تروح مع عمتها وراحت واخرتها طردتني من المستشفى
ركان بجديه / وهم باي مستشفى
صقر بستغراب / وش عندك تسال عن المستشفى
ركان بجديه / بروح لهم
صقر بجديه / ماله داعي تروح لاني بروح اطلعهم
ركان بجديه / انت روح طلع زوجتك وانا بطلع زوجتي
صقر بعصبيه / اقول انتثبر مكانك مابي اوصلها لحالنا ابي زوجتك محرم
ركان بجديه / اذا وصلتها لامها اتصل علي
صقر بجديه / ان شاء الله
لنا لقاء باذن الله بكره متاخرررررر
اختكم نسايم نجد
التعديل الأخير تم بواسطة بياض الصبح ; 17-04-12 الساعة 03:22 PM
سبب آخر: تعديل رقم البارت
|
16-04-12, 03:06 PM
جديد مواضيع قسم الارشيف
العرض العادي
