كاتب الموضوع :
نسايم نجد
المنتدى :
الارشيف
بارت اليوم بارت متوسط الطول
اذا بستمر بالكتابه بانسى نفسي كالعاده وبتلوموني قلت انزله قبل لا اتعمق بالاحداث
واذا الله اراد نزلت بكره بارت ثاني وبيكون هذا نظامي اذا خلصت جزئ نزلته قبل وقته او بعد وقته
لا استطيع تحديد موعد لكن قبل لا انزله بيكون عندكم موعد عن الوقت كالعاده
بارت اليوم بارت خفيف ومثل الهدوء الي يسبق العاصفه
والعاصفه بتكون في البارت الجاي
فيه صدمه ومصيبه طاحت براس وحده من بطلاتنا و بتكون خفيفه عليكم
ومتاكده انكم متشوقين لها لكن الطريقه لم تتوقعوها وحترت كثير كيف اوصلهااااااا وهذا الي طلع معي
( صايره اتكلم كلمات غير مفهومه بالبارت الجاي بيذوب الثلج )
الرجاء عدم طمر السطوررررررر
البارت السابع والستون
عند سميه
دخلت بيتها جلست مع منى وصارت تتكلم بشغلات عشوائية بتغير من نفسية صديقتها لكن كان رد منى السكوت وبعد ربع ساعه وقفت منى ودخلت غرفة سميه بهدوء وتظاهرت بالنوم متجاهله وجود صديقتها
طلعت من الغرفه وهي فاهمه قصد صديقتها شلون ماتقرا افكارها وكل وحده فيهم توئم روحي لثانيه
لكن الحين العشاء وما زالت نايمه
دخلت الغرفه شافتها نايمه على تنهدت بحرقه ودمعت عيونها
سميه بنفسها وعيونها على صديقتها وبصوت باكي / اليوم بخليها على راحتها لكن بكره مستحيل اخلي هروبها بالنوم يستمر والي ابيه بيصير وبترجعين مثل اول
طلعت وصكت الباب وراها وتسندت على الباب محروقه على صديقتها واستسلام ديقتها لمصيبتها ومسئوليتها كبيره تجاه منى
سمعت صوت الجرس
طلبت من الشغاله تفتح الباب
دقائق وشافت اخوها واقف قدامها
قرب منها ماجد بابتسامها / وش عندك واقفه عند باب غرفتك كانك تحرسين احد
سميه بحزن / جالسه اراقبها انتظرها تصحى من الصبح نايمه
ماجد بستغراب / منهي النايمه بغرفتك
سميه بحرقه / منى
ماجد بصدمه / منى الي ماتو عيالها
سميه بحرقه / ايه
ماجد بصدمه / شلون اهلها سمحو لك تاخذينها وهذي حالتها
سميه بحرقه / ترجيتهم لين وافقو
ماجد مسك يد اخته وبحنان / تعال اجلسي ابيك بموضوع كنت بكلمك فيه امس لكن اجلته يوم شفتك شايله هم خويتك
مشت مع اخوها وجلست على الكنب
سميه وعيونها على اخوها / وش موضوعه يابو ريما
ماجد بجديه / جاك خطيب
وقفت وبعصبية / الموضوع صكه لانك تعرف ردي بهالموضوع
مسك يدها وجلسها / واذا قلت علشان خاطر اخوك توافقين بعمري ما طلبتك ياسميه
سميه بضيقه / تعرف انك غالي وطلبك صعب
ماجد برجاء / لمتى بترفضين تراني ماني بدايم لك
سميه بحرقه / ومنهو الخطيب الي طالبني اوافق عليه
ماجد وعيونه على اخته و بجديه / سيف خويي
سميه بصدمه / سيف ماغيره
ماجد بابتسامه / ما غيره
سميه بزعل / بتزوجني واحد معقد وكاره الحريم ما شفته الا مرتين وكلها هاوش معه
ماجد بثقه / متاكد انك بتغيرينه وتكسبينه
سميه بضيقه / خويك مغرور وشايف نفسه وفوقه معقد وش اغير واخلي
ماجد باصرار / تراه مستعجل على الرد ومتاكد بتوافقين عليه
سميه بضيقه / ماجد الزواج شايلته من قاموسي ومن خويك مرفوض
ماجد باصرار / خويي رجال ما ينعاب والظروف عقدته مثل ماظروف كرهتك بالزواج
سميه بضيقه / خويك ضيعف وقدرت حرمه تكسره وهالنوعيه من الرياجيل ما تعجبني
ماجد بثقه / بقوله انك موافقه وما ضنتي بتكسرين كلمة اخوك
سميه تنهدت وبضيقه / لو وافقت على خويك علشان ارضيك صدقني يومين ورجعه مطلقه وما ضنتي بترضاها لي
ماجد بثقه / اذا تبين منه ضمانات علشان مايطلقك اخذت منه
وانا واثق انك بتكسبين قلب سيف وتنسينه غدر طليقته
نزلت دمعتها وبصوت باكي / المفروض تحس فيني الي مات غالي ومستحيل احد يحل محله واذا تزوجت سيف بشوفه احمد
ماجد باصرار / زواجك من سيف بينسيك احمد
سميه بتهرب / اجل زواجي مقابله زواجك
ماجد بعصبيه / وش فيكم على زواجي وتربطونه فيكم زواج ماني بمتزوج
سميه بحنان / مستحيل اتزوج وانت عزابي اذا مو علشانك علشان بناتك الحين انا عندهم لكن اذا تزوجت من بيهتم فيهم
ماجد بحرقه / هذا الي معذبني واذا تزوجت من يضمن اني اخذ وحده تخاف ربها في بناتي اخاف تعذبهم
سميه جت عينها على غرفتها وبجديه / عروسك عندي وهي محتاجه لبناتك مثل مابناتك محتاجاتها ام لهم
ماجد رفع حاجبه وبعصبيه / شكلك حاطه موضوع زواجي براسك ومجهزه العروس
سميه بهدوء / العروس قد شفتها
ماجد بستغراب / قد شفتها وين
سميه بهدوء/ منى صديقتي
تذكر شكلها وبعصبيه / بتزوجيني وحده شينه
سميه بابتسامه / انت تبي زينها وانك عايف الزواج وما تبيها الا ام لبناتك وهي انحرمت من عيالها وبيصرو بناتك العوض
ماجد وقف وبتهرب / ببلغ سيف موافقتك
سميه وعيونها على اخوها وباصرار/ و زواجك
ماجد بتهرب / ما ضنتي ان صديقتك نفسيتها تسمح لها بالزواج
سميه باصرار / انت وافق و بناتك لها علاج
ماجد بضيقه / يصيررر خير
سميه بجديه / اخوها صقر يبي يكلمك
ماجد بجديه / وش عنده
سميه بجديه / بيشكرك
ماجد بستغراب / على شنو
سميه بجديه / على مساعدتك لاخته
ماجد بابتسامه / والله اني ضنيته يذبحني
سميه بجديه / حتى انا ضنيتهم يحملونك مسئولية الي صار لها لكن خيبو ضني
ماجد بجديه / شلون بتصل عليه وماعندي له رقم
سميه بجديه / رقمه بجوالي
ماجد بستغراب / وش جابه لجوالك
سميه بجديه / ام صقر عطتنيه تبيني اوصله لك
ماجد بجديه / هاتيه واذا جتني فرصه كلمته
سميه باصرار / ضروري تتصل عليه
ماجد بجديه / يصير خير يله اشوفك على خير
طلع
وسميه صارت تفكر بزواجها من سيف قلبها وعقلها كارهين هالزواجه
سميه بحزن / مستحيل سيف يكون بدالك ياحمد وبعدين هالمغرور شلو بقدر اعيش معه واتحمل غروره
وبتفكير / وش بيضرني لدخلت هالتجربه اقلها اغير من الروتين الي عايشته واذا مارتحت رجعت لبيتي والحمد لله ماني بحاجته
عند نوف
جالسه بجلسه جانبيه بالحوش مع صديقتها
مها من كلمت تركي وهي مقهوره ومالها خلق تتكلم
نوف بضيقه / لمتى بتجلسين بدون ما تتكلمين
مها طالعتها / حرق دمي هالحقيرررر وقدر يلوي ذراعي
نوف بجديه / وش قال لك
طالعتها مها وبحقد / يهددني بشرفي وانه بيلوث سمعتي
نوف بحقد / مو غريبه عليه ولا نسيتي سواته بفرنسا
مها بحقد / الي ما يخاف من ربه لازم نخاف منه
نوف بحقد / يعني مامنه فكه
مها بتفكير وبحقد / سمعتي المثل الي يقول ما اخذ بالحيله يسترد بالحيله
ركزت فيها نوف وبحماس / ايه لكن وش علاقته بوضوعنا
مها بابتسامه / له كل العلاقه ومدام الاخ مغرم فيك لشوشته نقدر ندخل عليه من هالجانب
نوف بحقد / وانتي مصدقه ان له قلب يحب
مها بثقه / حبه لك شي اكيد لكن لازم نستفيد من هالنقطه ونكسبها بصالحنا
نوف بحماس / شلون
مها بجديه / اول شي لازم تتصالحين مع بنتك علشان نقدر ندخل لبيتهم وبعدها نبتدي خطتنا
نوف بعصبيه / قولي وش ناويه عليه
مها بحقد وقهر / مثل ما حرق دمي بنحاربه بقلبه ونحرقه له
نوف بعصبيه / وش بستفيد من كل هذا
مها بابتسامه / بتستفيدين كثيرررررر
نوف وعيونها على صديقتها وبسخريه / قولي شلون بحاربه بقلبه
مها بجديه وحقد / هالتركي يجهل انك ارملة اخوه ووربي بلاه وحبك يضنك صديقة شوق
نوف بجديه / وبعدين
مها بحقد / ابيك تعلقينه فيك وتخلينه يحبك اكثر واكثر لين خلاص ما يقدر يستغني عنك
واكيد الخبل بيخطبك
واذا خطبك اشرطي عليه طلاقك واكيد بيطلقك وبكذا ضربنا عصفورين بحصاه وحده
نوف بعصبيه / مستحيييييييييييل اطيعك بالي تسوينه واكون خسيسه مثله وين كلامك عن القوة والمواجهه تبيني اخذ الي ابيه بطرق ملتويه
مها بعصبيه / وهو يوم تزوجك ما تزوجك بطرق ملتويه
نوف بعصبيه / اذا هو حقير تبيني اصير حقيره مثله
مها بعصبيه / اذا ما تبين الطرق الملتويه قولي شلون بتحصلين على طلاق
نوف بضيقه / اكيد فيه طريقه ثانيه
مها بعصبيه / قلت لك بنشتكيه قلتي خايفه على شوق وسالم
قلت بنحاربه بقلبه قلتي طرق ملتويه
نوف بحرقه / مستحيل اوافق على الاولى ولا على الثانيه اكيد فيه حل ثالث
مها بجديه / اجل قولي لركان الموضوع من اوله لا خره وبما انه ضابط اكيد بيده الحل
نوف بعصبيه / الا ركان مستحيل ادخله بموضوعي وتخرب حياة بنتي
مها وقفت بعصبيه / اووووووووووف من كل شي رافضته اجل خليك زوجه لها التركي وتحملي انتقامه
نوف بضيقه / حلولك مصيبه اكثر من زواجي من هالحقير
مها بعصبيه وحقد / اجل تقبلي زواجك منه ولا تجيني تشتكين وهالتركي حسابه معي وبخليه يدفع ثمن تهديده لي واكسر غروره مثل ماكسرته له بفرنسا
مشت قدام نوف وهي تغلي من سلبية صديقتها وبتنفجر قهر من تركي
وصلت لبيتها فتحته
شافت ابو ثامر جالس
قربت منه ويضيقه / السلام
ابو ثامر تاملها وبحنان / وش فيك
نزلت عباتها ونقابها وجلست
مها بجديه / مافيني شي
ابو ثامر بحنان / تراني اعرف الي فيك قبل لا تشتكين قولي وش مضايقك
مها بحرقه / نوف مكتوب لها العذاب طول عمرها قلنا ارتاحت من ناصر طلع لها تركي
ابو ثامر بستغراب / وش سوى فيها بعد
مها بحقد / استغل عيالها وتزوج امهم بدون علمها
ابو ثامر بصدمه / وهو على كيفه يتزوجها بدون موافقتها
مايدري ان موافقتها عليه اساس الزواج
مها بحقد / والي بيغتصبها بفرنسا بيهتم بموافقتها هو متزوجها انتقام
ابو ثامر بجديه / من شفته مارتحت له احسه مو مضبوط
مها بحقد / مقهورررررررره منه ودي اطيحه بستين مصيبه
ابو ثامر بابتسامه / ما ضنتي بتعجزين عن تركي
مها بقهر / الحقير لوء يدي وتعرف الي ما يخاف ربه يسوي أي شي
ابو ثامر رفع حاجبه وبستغراب / وش ماسك عليك علشان يقدر يلوي فيه ذراعك
مها بقهر / يقول انتي بالسعوديه منتي بفرنسا وانتي حرمه سهل الوث سمعتك وحلفي ومحد بيصدقك
ابو ثامر بعصبيه / وصلت معه هالمواصيل
مها برجاء / سعد برد حرتي فيه
ابو ثامر بحقد / ما طلبتي شي بسال عنه واكيد بالقى عليه شي ومنها بادبه وعلمه شلون يتطاول على حرمت الناس
مها بفرح / بعتمد عليك بتاديبه وياليت يكون بسرعه
ابو ثامر بابتسامه / بالعجله الندمه
وقفت / تعشيت
ابو ثامر بزعل / انتظرتك وانتي انشغلت مع صديقتك وطنشتيني
مها بابتسامه / ماعاش من يطنشك عشاك جاهز
عند شوق
كانت متمدده على السرير وساره اخذت اكياس الاكل ونزلتهم تحت
دخلت ساره وقربت من سريرها وتمددت
ساره بقهر / تدرين امي للحين برى
شوق ببرود / وش الغريب دايما جدتي برا يا معزمه يابمشغلها
ساره بقهر / اليوم غير يكفي انه ملكت ولدها
شوق بسخريه / من متى امي مهتمه بزواج عمي من امي وتاكدي انها مراح تحضر زواجه من بنت صديقه
ساره بصدمه / مستحيييل امي تسويها
شوق بقهر / امي رابطه عمي باميره وباقي زوجاته مو مهمه عندها
ساره بقهر / قلبي يقول ان تركي هالمره بيرضخ لامي وبيرجع اميره
شوق بسخره / عمي صاااااااام صام وافطر على ثلاث زوجات
ساره بابتسامه / باقي الرابعه ويصير الحج متولي السعودي
شوق بابتسامه / يمكن فيه رابعه وبيصدمنا فيها
ساره بابتسامه / لا درى عن امك طلق الثلاث
شوق بضيقه / عمي مدري كيف يفكر
عن سالم ولد ناصر
كان منسدح بغرفة الضيوف من بعد الملكه حاس بضيقه وحزن كلمه ثامر بيسهر معه لكنه صرفه ما يبي ينكشف لصديقه
سالم بضيقه / عرفتي يمه ولا باقي واذا عرفتي كيف استقبلتي زواجك
نزلت دمعه مسحها قبل لا توصل لخده / بتسامحني ولا بتغضبين علي لمتى بتهرب عنك
وقف / لازم اروح لها واتطمن عليها ولا اخليها تنام وهي زعلانه علي
فتح باب الغرفة وطلع برا البيت وصل لبيت امه وحط يده على الجرس بيدين تنتفض من الخوف والقلق من الي ينتظره داخل
فتحت المربيه الباب
دخل وصل لصاله كانت فاضيه طلع فوق وصل لغرفة امه تردد لكنه اخذ نفس قوي بعدها طق الباب
عند نوف
من بعد ما تركتها مها وهي بغرفتها تبكي زواجها من تركي والي زادها مالقت حل يخلصها منه
سمعت طق الباب توقعتها جاكلين
عند سالم
لما ما سمع رد فتح الباب دخل جت عينه على امه اوجعه قلبه وهو يشوف وجها احمر ودموعها على خدها تاكد انها درت بزواجها من عمه
ركض لها
رمى نفسه عند رجولها وسحب يدها وباسها
نوف
اول ما شافت ولدها ما مداها تفتح فمها الا وهي تشوفه عند رجوله ويدها عند شفايفه
نوف بصوت باكي / ليش يا سالم تذبح امك
سالم غصب نزلت دموعه / يمه انتي محتاجه رجال تكملين حياتك معه وصدقيني منتي بندمانه بزواجك من عمي
نوف بنحيب / وينه كلامك مستحيل اسمح لاحد يجبرك على شي ما تبينه
سالم دموعه بللت يد امه وبصوت باكي / يمه دموعك تذبحني والي يذبح اني سببها قولي الي يرضيك والحين اسويه
نوف بصوت باكي / الي يرضيني مثل ما زوجتني عمك اطلقني منه
سالم بصوت باكي / ابشري بالي تبينه لكن سامحيني
نوف بنحيب / اذا شفت ورقة طلاقي سامحتك
سالم وقف بصوت باكي / الحين طالع لعمي ومراح تشوفيني الا معي ورقة طلاقك
نوف بصوت باكي / متاكد انك قد الوعد ولا مثل الي قبله
سالم بصوت باكي / بكون قده لان الثمن غالي
وقف وبصوت باكي / بطلع اشوف عمي وبتفاهم معه
طلع مانتظر رد امه
طلع سالم من بيت امه رجع لبيتهم دخل البيت وطلع الدرج وصل لغرفة عمه
عند تركي
كان منسدح على سريره وتفكيره بحبيبته الي سلبت عقله بالكامل
سمع صوت الباب وبعصبيه / ادخل
دخل سالم وشاف عمه منسدح
عند تركي
تفاجئ من وجود سالم
تركي بصدمه / وش فيه وجهك معتفس
سالم بصوت مبحوح وبثقه / طلق امي ياعمي
تركي بسخريه / هااااه عيد الي قلته تراني ماسمعته
سالم بعصبيه / طلق امي
تركي بسخريه / افهم انك بتغصبني اطلق امك
سالم بعصبيه / ايه
تركي ببرود / طلاق ماني بمطلق ورني شلون بتغصبني
سالم بعصبيه / امي رافضتك وما تبيييييييييييييك شلون ترضاها لنفسك تتزوج وحده ماتبيك
تركي ببرود / اكيد جاي من عندها و نفختك علي حطها براسك اذا امك ما تبيني انا ما ابيها وبتزوج عليها بدال الوحده ثلاث
سالم بعصبيه / مستحيييييييييييل اطلع من هنا الا وانت مطلقها
عند شوق
سمعت صوت اخوها يصارخ
وقفت وبخوف / هذا صوت سالم يتهاوش مع عمي
ساره وقفت / الله يعينا على هاليوم
فتحت شوق الباب وطلعت بخطوات سريعه ومعها ساره فتحو الباب شافو تركي منسد وسالم واقف والعصبيه مرسومه على وجهه
شوق قربت منهم / خير وش صايرررر
سالم التفت على اخته وبعصبيه / كله منك
شوق بحرقه / وش صار
سالم بعصبيه / الي صار ان عمي رافض يطلق امك مو حب فيها بيقهرها وبيتزوج عليها
وبسخريه / هذا عمك الي يحب امك ويعشقها
شوق بجديه / ايه يحبها ويعشقها لكن كلامه لك من انفعاله من طلبك
تركي يطالعهم بسخريه / ممكن تكملون هواشكم برا ماني فاضي لخرابيطكم وراي سفر
وعيونه عليهم / بكره بسافر عند عروستي الجديده بعطيها المهر والاسبوع الجاي زواجي
شوق اطالع عمها بنظرات مقهوره وسالم زادت عصبيته
سالم بعصبيه / لا تخليني اوصلها للمحاكم وبطلقها غصب لان الزواج مزور
تركي ببرود / ماحد ماسكك روح المحكمه وارفع القضيه واول من بيتضرر انت واختك
انا واحد خطبت وانت ولي امر امك وقلت انها موافقه واختك وقعت على انها العروس
سالم طالع عمه ونزلت دموعه وبحرقه / صدمتني فيك ياعمي وحرام تنقال لك هالكلمه ومدامك منت بمطلق امي بختفي عن حياتكم
وبحرقه وبصوت باكي / لاني مالي وجه اقابل فيه امي بعد ما سمعت نوايك وبيدي سلمتها لك
فتح الباب وقبل لا يطلع / خاف ربك في امي لا يسلط ربي عليك بذنبها وطلع
طلعت ساره وراء سالم مسكته بيده
ساره بصوت باكي / وين بتروح
سالم بصوت باكي / لارض الله الواسعه
مسكته بقوه / مستحيل اتركك تروح
فكك يدها وبعصبيه / بروح ومحدن بيمنعني معاد لي احد هنا
ساره بعصبيه / لا تخلي كلام تركي ينسيك الي تحبهم ويحبونك
سالم بحرقه وبصوت باكي / وعدت امي بطلاقها وما اقدر انفذه مثل ماخنت وعدي لها اني احميها وماجبرها على شي وهالمره خنت وعدي لها
عند شوق
بعد ماشافت اخوها يطلع ودمعته على خده انقهرت من عمها وبعصبيه / اعجبك الي سويته مع سالم
تركي بعصبيه / لو ماعجبني ما سويته ياله وريني عرض مقفاك لخليك تلحقين اخوك
شوق بعصبيه / طيببب ياعمي
وقف وسحبها من يدها وطلعها برى غرفته وقفل الباب
عند تركي
داخله ندمان على الكلام الي قاله لسالم والي حرقه انه يشوف دمعته والي ذبحه كلام سالم له
حس ان الغرفه تخنقه فتح الباب ونزل متجاهل وجود شوق وساره ركب سيارته وعزم يسافر لمساعد
عند ساره
اول ما شافت شوق تطلع ركضت لها وبعصبيه
ساره بصوت باكي / عساك الحين فرحانه بانجازاتك
شوق بعصبيه / انقلعييييييييييي عن وجهي الي فيني مكفيني
ساره بصوت باكي / ما يوجعك قلبك على اخوك الي تناشب مع عمه وطلع منكسر ومنجرح
ولا ندري وين بيروح كل الي صار وبيصير بسبتك امك بغت تموت واخوك هج
شوق مشت من قدام ساره وداخلها مولعه قهر من عمها وتصرفه مع سالم
دخلت الغرفه ودخلت بسريره وتغطت بالحاف وصارت تبكي
دخلت ساره بتكمل عصبيتها على شوق لكنها بعد ماشافت شوق متلحفه بالكامل هدت ورحمتها كانت بتقرب منها تتاسف على الي قالته لكن قررت تتركها وتتاسف منها بكره
دخلت بسريرها والي صار اليوم ينعاد قدامها من ملكة اخوها لطيحت نوف لين تفكيرها وصل لسالم ومن التعب نامت
عند ابو مروان
جالس بالسياره ومروان يسوق وهو متملل من طول المسافه
ابو مروان بتعب / متى بناصل لنا يوم كامل نمشي وللحين موصلنا
مروان بسخريه / والله من سيارتك القرنبع ولا فيه احد بزمن هذا يسافر خطوط طويله بددسن
ابو مروان بعصبيه / والله ددسني غالي علي وعندي يسوى كل السيارات
مروان بسخريه / هذي حجة الفقير
ابو مروان بحرقه / مدامها بالحلال ما يهمني الي تقوله
مو سيارتك الي الله العالم من وين تجيبهم وتبيني اسافر بشي حرام ولو صار فينا شي شلون بقابل ربك
مروان بعصبيه / والله ماشفنا الحلال جاب لنا شيئ
ابو مروان بعصبيه / الحرام بيظهر عليك بصحتك
مروان بتعب / تراني تعبت بنمر أي مكان نريح فيه وبكره بنكمل السفر
ابو مروان بتعب / بكيفك
وقف مروان عند محطه بانزين ولقى فيها غرفة قديمه مع حمام استاجرها لبكره بالليل
دخلو الغرفه البنات تقرفو من المكان
سلوى بقرف / وش هذا
مروان بسخريه / والله على قد فلوسنا
تهاني جلست بدون ما تتكلم طول الطريق وتفكيرها باهلها واستقبالهم لها وحقدها عليهم
فتح ابو مروان بوكه واخذ 50 ريال
ابو مروان بتعب / هات لنا شي ناكله
اخذ الفلوس من ابوه وطلع من الغرفه بعد ربع ساعه دخل بكيسة رز بخاري وكيسه فيها لبن ومشروبات غازيه
حط الرز على السفره وبدو ياكلون بصمت بعد ماخلصو
وقف مروان بجديه / بطلع
ابو مروان بستغراب / على وين
مروان بجديه / مالي مكان عندكم وبنام بسيارتك
ام مروان بحنان / المكان فيه بركه بيكفيك معنا
ابو مروان بحرقه / خليه ينام بالسياره من متى يجمعنا بولدك مكان واحد زين منه تحملنا طول الطريق
مروان بعصبيه / قلبناها نصايح ومواعظ وانا مالي خلق
مشى من قدامهم وتهاني تسمع كلامهم وتندب قلبها الي حب له شيطان مثل مروان مافيه صفه عدله ممكن ينحب علشانها
اخذت زاويه وتلحفت بعباتها ونامت
لنا لقاء باذن الله بكره اذا زانت ظروف النت
اختكم نسايم نجد
التعديل الأخير تم بواسطة بياض الصبح ; 19-03-12 الساعة 05:18 AM
سبب آخر: تعديل رقم البارت
|
18-03-12, 10:31 PM
جديد مواضيع قسم الارشيف
العرض العادي
