حابه اوضح نقطه (عبدالله يجهل وجود اخت لنايف
وركان يعرف ان لها اخو لكنه يجهل ان الي كان مع عبد الله نايف
الغوالي الي يضنون اني نسيت نوره لها بارت طويل وبشركم زواجها من تركي بيتم
وحابة ازف لكم خبر حزين فيه بطله بتموت بالروايه ( عليكم التخمين )
موتها راسمته من البدايه لان بموتها بتصير احداث
ختمت بارت اليوم بالحزن بيكون بدايه لشغلات كثيره
الرجاء عدم طمر السطوررررر
البارت التاسع والخمسون
عند ركان
و قرر يقول لصديقه عن سالفة زوجة ابوه علشان يرتاح
ركان بارتباك / فيه موضوع بقول لك عنه
تركي اعتدل بجلسته وبجديه / قول الي عندك
ركان بجديه / من شهرين جاني رجال وقالي زوج ابوك والعروس اختي وهي بفرنسا
شرطت اسمع موافقتها اتصل عليها وسمعت الموافقه بعدها تمت الملكه وعطيت اخوها مهرها
صقر عصب علي وقالي شلون وثقت بكلامه
وشاك انه ينصب علي
تركي قاطعه وبجديه / صادق وانت شلون تثق بكلامه يمكنه نصاب بياخذ الفلوس وبيهج
ركان بجديه / الفلوس ماكانت تهمني والي طلبه مهر قليل
تركي بحماس / وبعدين
بعد شهر جاني وقال اختي بتجي
وبعد الظهر جاء مع اخته الي انصدمت انها تزوجت ابوي وصارت تبكي وانهارت واغمى عليها ورقدناها بالمستشفى
تركي بعصبيه / صدق اخوها خسيس
كمل ركان بجديه / ترجيتها تبقى وتعتبرني اخوها وابوي تعتبره ابوها
الاجوديه وافقت وسبحان الله صارت لي الاخت ولابوي البنت
تركي بجديه / وينه موضوعك ابوك وتزوج
ركان بارتباك / الموضوع بزوجته
تركي بجديه / ليكون تبي تطلق من ابوك
ركان وعيونه على صديقه / لا الموضوع يخصك
تركي بصدمه / وش يخصني بزوجة ابوك
ركان وعيونه بوجه صديقه وبجديه / زوجة ابوي هي زوجة اخوك ناصر
تركي بقق عيونه وبصدمه / زوجة ابوك هي زوجة ناصر
ركان بجديه / زوجة ابوي هي نفسها ارملة اخوك
وقف تركي وبعصبيه مانتظر صديقه يكمل كلامه
تركي بعصبيه / انت خبل شلون تامنها على ابوك وهي ذابحه ناصر واكيد ابوك بيصير من ضحاياها
ركان صرخ بوجه تركي وبعصبيه / اصحى مو كل شي يصير فيكم رميتوه على راسها قولي شلون ذبحت اخوك وهو مات عندكم بالرياض
تركي بعصبيه وبحقد / قلب ناصر ماقدر يتحمل فعايلها فيه
وبصوت حزين / كان يشكي لي عن سواياها فيه قلت له طلقها وكان يرفض وعذره انه مخليها علشان عياله وهذي تاليتها مات بالجلطه
ركان بعصبيه / ليش ما تقول انها هي الي شافت من اخوك الويلات
تركي بعصبيه / والله وقدرت بنت ابليس تفر راسك وتحط نفسها المسكينه والضحيه وليش ما قالت لك سواد وجها وصياعتها هناك
ركان قرب اكثر من صديقه ومسكه برقبته
ركان بعصبيه / اول سكت لك وضغطت على نفسي وتحملتك وانا اسمعك تتلفظ عليها الفاظ ماترضاه لعدوك والحين بعد ماعرفت من تكون والله ان سمعتك تسبها قدامي لموتك بيدي
دفه تركي و طاح ركان على الارض
تركي بعصبيه / بسبها ولو انها قدامي لعنت خيرها
ركان وقف وبعصبيه وصراخ / زوجة ابوي بحمايتي والله يا تركي لسويت لها شي لتندم
تركي بعصبيه / وهي الي قالت لك تجي تخطب بنتها علشان تصير قريبه منها لكن تحلم اخليها تنفذ الي براسها
لو اجبرتك اطلق شوق
ركان يصرخ بوجه صديقه / ليش شايفني خبل وبطيعك بنتها زوجتي ولو تحب السما ماطلقتها ولا ازيدك العيال بيرجعون لامهم الي انت بدون قلب حرمتها منهم
تركي ما صار يشوف من العصبيه / تخسى انت وهي والله لو اني داري قبل لا تملك كان ماصار هالزواج
ركان بعصبيه / نشوووووف ياتركي والله لتندم قد شعر راسك على كلامك عنها والي فيك من ظلمك لها
تركي بعصبيه وبحرقه / تعايرني ياركان اطلع مابي اشوف
ركان بهدوء / ما عايرتك ومصيرك بتفهم كلامي وبتعض اصابيعك ندم على الكلام الي قلته فيها
اخذ ركان غترته وما انتظر رد تركي الي صار بينهم كافي
طلع ركان وتركي بعد الي سمعه ضاقت عليه الغرفه
اخذ مفتاح سيارته وركبها وطلع يفرفر بالشارع بدون هدف يبي يهدي من عصبيته
صار يضرب على الدركسون / يالحقيره وقدرتي تتمسكنين لركان والله وعرفتي تلعبينها عليه شفتيه طيب واستغليتي طيبته لكن انا تركي مستحيل اعدي الي سويته بساهل
ولا انا وركان نتضارب بسبتك
لا ويقول مغصوبه والله وعرفتي تختارين صيدتك شايب بطران وطايح يا جعلها الحريقه الي تخلصنا منها
عند ركان
طلع وهو مولع قهر ندم انه قال له لكن من داخله مرتاح
اخذ جواله واتصل على صديقه
عند صقر
جالس على الكرسي وعيونه على غرفة اخته سمع صوت جواله طلعه من جيبه شاف رقم ركان
صقر بجديه / هلا ركان
ركان بضيقه / انت وينك فيه
صقر بتعب / بالمستشفى
ركان باصرار / أي مستشفى لاني جايك
صقر بضيقه / مستشفى الـ ....
عند ركان
ركب سيارته وصار ياخذ نفس بيخفف من العصبيه معروف عنه انه نادر يعصب
ركان بجديه / لازم افهم منها الي صار بينهم بفرنسا سمعت منه ولازم اسمع منها
بعد ربع ساعه وصل للمستشفى حط سيارته بالمواقف الخاصه ونزل دخل المستشفى واتصل على صديقه
صقر بضيقه / هلا ركان
ركان بجديه / الحين بالمستشفى وين القاك
صقر بضيقه / ادخل الكفتريا وبقابلك فيها
انهى اتصاله ودخل المستشفى وصار يطالع بالوحات لين لقى لوحه مكتوب عليها الكفتريا دخلها وجلس على اول طاوله طاحت عينه عليها
انتظر 5 دقائق شاف صديقه داخل وقف له قرب صقر من صديقه
صقر بضيقه / اجلس ارتاح
جلس ركان / قولي وش بلاك
صقر جلس وبصوت مبحوح / سلطان وعياله ماتو من يومين بحادث سياره
ركان بستغراب / منو سلطان
صقر بحرقه / زوج اختي منى وعيالها
ركان بحزن / الله يرحمه ويغظم اجرك فيهم واختك شلونها
صقر بحرقه / الله ياجزاك خير
اختي الله يكون بعونها حضرت موت العيال وابوهم والحين طايحه بالمستشفى
ركان بتاثر / فيها اصابات
نزلت دمعه على خد صقر انكوى فيها قلب ركان
وبصوت باكي / اصاباتها بسيطه الخوف على نفسيتها لصحت اخاف انها تنجن
ركان بحزن / ان لله وانا اليه راجعون طيب ليش ما اتصلت علي وقلت لي اكون جنبك
صقر يمسح دموعه / مابي اخرب فرحتك
ركان بعصبيه / من متى ياصقر الواحد منا ما يحس بالثاني شلون ترضاها لي افرح وانت بمصيبه
صقر بضيقه / الي صار صار وجودك مراح يغير شي
ركان بزعل / اقلها اكون واقف معك بمصيبتك وماضنيت بتسامحني اذا سويت سواتك وخشيت عنك حزني
صقر بحرقه / الله يعافيك ركان خلاص والله ماني متحمل نفسي
ركان بجديه / ادفنو سلطان وعياله
صقر بحرقه / العيال اندفنو امس وابوهم اخوه اخذه واكيد بكره دفنه
ركان بستغراب / ليش ماندفن مع عياله
صقر بقهر / اخوه المتخلف رافض انه يندفن بالجنوب ومصر يدفنه بالمقبره الي فيها امه وابوه
ركان بجديه / صدق انه متخلف
صقر بابتسامه حزينه / فكنا من سيرته انت شلونك بعد ما صرت متزوج
ركان بجديه / مابعد صار الزواج اذا تم اسئلني
صقر بجديه / شلونها معك الناصوره
ركان حط يده على كتفه وبابتسامه / معلينا
صقر بجديه / ورى ابتسامتك سالفه
ركان بجديه / بتعرفها بعدين
صقر بجديه / بتشرب شي
ركان بجديه / لا من اليوم اتقهوى اذا تبي جيب لك ومعليك مني
صقر بتنهيده / من له نفس ياكل او يشرب
ركان بجديه / تعال معي بيتي ارتاح والصبح تعال لهم
صقر بحرقه / ما قدر اخلي اهلي بالمستشفى لحالهم
ركان بتاثر / الله يكون بعونكم
صقر / ارجع لبيتك وارتاح وانا برجع لهم
ركان بجديه / اروح واتركك
صقر بضيقه / اذا جلست بتجلس لحالك لاني بنشغل مع اهلي
وقف ركان وبجديه/ اجل رد على اتصالاتي
صقر وقف وبضيقه / ان شاء الله
مشو مع بعض ركان طلع برىالمستشفى وصقر رجع لغرفة اخته
شاف الوضع مثل ماهو
تنهد بحزن وطلع برى مايحتمل يشوف امه بهالحاله وهي رافضه انها تسمع كلامه وترتاح ومايقدر يجبرها على شي ماتبيه
عند نوف
بعد ماخلصو العشاء جلست مع ام سالم والبنات بالصاله وهي كاره الجلسه
قلبها ماكلها على هيا من بعد ماقالت لها ما شافتها حتى العشاء ماتعشت
نوف وعيونها على بنتها وبضيقه / شوق وينها هيا
شوق بجديه / مدري كانت بغرفة اخواني
نوف بضيقه / ليش ما تعشت
ساره بجديه / ارسلت لها الشغاله ومافتحت لها شكلها نايمه
ام سالم اطالع بنوف وهي تغلي قهر من اهتمامها بهياء لكن مضطره تسكت
وقفت ساره وبابتسامه / ياله الدي جي ينتظرنا
شوق بضيقه / اشوف ان جلستنا هنا ابرك من ديجهيك
نوف وقفت وبابتسامتها الي تذبح / والله فيني حرة رقص ومن زمان مارقصت
شوق وقفت وبابتسامه / اخاف اطيحين علينا اذا مرقصتي الرقص ادمان عندك
ام سالم وعيونها على نوف وبابتسامه / تحبين الرقص
نوف بحقد / اعشقه لانه يطلعني من الضيقه والقهر الي اعيشهم
ام سالم بابتسامه / لو مافيني نوم كان دخلت وشفتك وانتي ترقصين
نوف طالعتها بحقد في نفسها / لو بكيفي رقصت على بطنك وافتكيت منك ياساس البلى
ساره حبت نوف ومرتاحه كثير لها تحسها مكمله لها ولشوق بجديه / يله
مشت ساره ونوف حضنت بنتها قدام ام سالم وكانها تغايضها وتقول هذاني جيت وحضرت ملكة بنتي والحين حاضنتها وقدامك يالعجوز
ام سالم ماهتمت من تصرف نوف توقعته حركات ومزح بنات وقفت وطلعت لغرفتها
عند عبدالله
وصل للشقه وهو مقهور على حال صديقه الي يمشي قدامه وكانه صنم
دخل وسكر الباب وراه وشافه جالس على الكنب واضح عليه الحزن والتفكير قرب من صديقه
عبدالله بحزن / تعوذ من ابليس
ماسمع الا تنهيدات صديقه
عبدالله بجديه / اذا جو الشقه مضايقك بنطلع نسهر برا
طالعه نايف بنظرات حزينه / الدنيا كلها مضايقتني
عبدالله بعصبيه / شوفني على المصيبه الي فيها احاول اخفف على نفسي لو استسلمت لحزني وضيقتي يمكن لقيتني ميت قدامك
نايف بضيقه / المصايب نزلت علينا مره وحده
عبد الله بجديه / اللهم لا اعتراض
وقف نايف وبحزن / بدخل انام
عبدالله بجديه / بتنام ولا
قطع كلامه نايف وبحزن / محتاج افضي الي بداخلي ويمكن يكون سبب لراحتي
عبدالله بضيقه / لك ساعه تفضي الي بداخلك وبعدها بدخل عليك
مارد على صديقه دخل غرفته وتمدد على سريره
حاول يبكي لكن البكي معانده
عند سميه
كانت جالسه مع مها تتقهوى وتفكيرها عند منى تتمنى تروح او تتصل لكن فيه شي يمنعها بكره لازم تزورها
مها بجديه / سميه فيك شي من اليوم سرحانك اكثر من كلامك
سميه بحرقه / افكر بصديقتي الي قلت لك عنها
مها بجديه / وش فيها
سميه بحزن وضيقه / صار عليها حادث وزوجها وعيالها ماتو وهي اطالعهم
مها بتاثر / وهي وش صار عليها
سميه بصوت باكي / فيها ضربات خفيفه لكن البلى بنفسيتها ياخوفي يامها انها تنجن ماتتخيلين حبها وتعلقها بعيالها والمصيبه فقدتهم مره وحده
مها بتاثر / ان لله وانا اليه راجعون الله يصبرها ويعوضها
سميه بصوت باكي / خايفه عليها الدكاتره قالو انها رافضه تصحى وياخوفي انها تبقى طول عمرها نايمه
مها بحزن / والله مصيبتها كبيره جعلنا ما نمر فيها لكن مالها الا الصبر
سميه بصوت باكي / لها فتره وهي خايفه على ولدها وصارت مثل ظله ذبحها الهم والمحاتاه ونزل وزنها لنص وهذا بسبب حلم الحين وش بيصير فيها يوم صار الحلم علم وبدال مايكون ولدها صارت اخته معها
مها نزلت دمعتها / هذا قضاء ربك وما نقدر نعارضه واجب علينا نرضى ونصبر
سميه اخذت منديل وصارت تمسح وجها الغرقان دموع / الله يرحم حالها ويصبرها
مها / امين وبكره بروح معك نزوره وان شاء الله نلقاها صاحيه
سميه بامل / يارب
مها بتغير الموضوع بجديه / ترى العشاء جاهز ومسويته خصوصي لك
سميه فهمت تصرف مها
وابتسمت / والله اني جوعانه وريحة الاكل زادت جوعي
مها بحب / يخسى الجوع قومي
وقفت سميه ودخلت غرفة الطعام شافت الاكل ممدود على الطاوله جلست وصارت تتغصب على الاكل
ومها طول الوقت تراقب سميه وحست براحه وهي تشوفها تاكل
عند ركان
رجع للبيت شاف المربيه حاضنه البنت و وترضعها وعيونها كلها حب وحنان مستغرب من حنيتها والي يشوفها يتوقع الي بحضنها بنتها
طنشهم ودخل غرفة ابوه سمع وناته دخل المطبخ جهز عشاء ورجع عند ابوه وصار ياكله بحب من زمان انحرم ياكل ابوه بعد ماخلص ابوه مسح فمه
ركان بحب / يا لغالي اليوم تملكت على بنت زوجتك ياليتها تكون حنونه معي مثل حنان امها معك على اني مستبعد هالشي
وبحزن / انا وتركي تهاوشنا وكل واحد تطاول على الثاني وكله علشان ادافع عن زوجتك الي حاطينها شيطان
وبضيقه / معقوله يكون تركي صح وانا غلط تركي معتبرني ساذج وينقص علي بكلمتين صدق ان لبسها فاسخ لكن الحق ينقال ماشفت منها الا كل زين
وقف وفتح دولاب ابوه واخذ حفاظه وبدل له وجلس على الكرسي صار يتامل ابوه وكانه اخر يوم بيشوفه
فز من هالفكره / اعوذ بالله منك يا بليس اعوذ بالله منك يا بليس
غطى ابوه وقفل النور وطلع من الغرفه
دخل الصاله شافها فاضيه قرب من الكنبه على الكنبه جلس بينظر زوجة ابوه
عند نوف
دخلت غرفة ساره شافتها تشغل الاب توب وتختار لها اغنيه وطولت على السماعات
شوق جلست على سرير ساره
ونوف بدت تتمايل على كلمات الاغنيه رقصها ابهر ساره الي استحت ترقص معها وحبت تتفرج على رقصها
عند تركي
وصل للبيت بعد ساعه من الفرفره وهو ما يشوف قدامه من العصبيه والقهر طلع فوق سمع اصوات اغاني طالعه من غرفة اخته رفع يده شاف ساعته كانت 1 بالليل
بكل عصبيه قرب من الغرفه وفتح الباب
تركي بعصبيه / وب
قطع كلماته وهو يشوفها بكامل جسمها المغري واقفه قدامه ترقص بشكل يذبح
كان شكلها فوق احتماله حس بنفضه سرت بكل جسمه ونشف ريقه وبدت الدنيا تظلم بعيونه لين طاح بقسوة على الارض وصوته افزعهم
عند نوف
صوت الاغاني وانسجامها بالرقص ماخلاها تنتبه لدخول تركي
عند شوق
التفتت للباب وانصدمت وهي تشوف عمها وانرعبت اكثر وهي تشوفه متمدد قدامها
طالعت بساره المصدومه والمفجوعه لكن قبل لا توصل له كانت ساره عند ه
شوق طالعت بامها بنظرات كلها حزن وعتب ونوف وقفت عن الرقص و ماكانت مهتمه لنظرات بنتها
شافت شوق وساره جالسات عند شي طايح قربت اكثر شافت تركي متمدد على الارض
بداخلها فرحان ومتشمته بطايح قدامها وتمنت من كل قلبها انه يلحق اخوه
ونفسها ترجع تشغل الاب توب وترقص بهالمناسبه
اخفت فرحتها ودخلت الغرفه اخذت شنطتها واخذت عباية ساره الي كانت بالعلاق ولبست حجابها
وقربت من الباب كان تركي ساده قربت من رجوله ونقزتها وصارت تركض على الدرج وطلعت بر البيت وداخلها سعاده وفرحه ما تنووصف
عند شوق
صارت تبكي وتضرب خد عمها / عمي اصحى عمي قوم الله يخليك
ساره بصوت باكي / تركي قوم وش صار عليك
شوق وقفت وبسرعه اخذت عطر وبخته بيدها وقربت منه وحطت يدها عند خشمه
ارتاحت وهي تشوف عمها يفتح عيونه
تركي عيونه غصب ناظرت داخل الغرفه وانصدم انه ما شافها كان يتمنى تكون قدامه لفتح عيونه اعتدل بمساعدة شوق وسند راسه على الباب
تمسك بالباب بضعف وبانكسار / يله تصبحون على خير
شوق مسكت يد عمها الي نفض يد شوق بقسوه وبضعف / اتركيني قادر امشي
مشى وعيون شوق تلحقه لين شافته يدخل غرفته ويقفل الباب
التفتت شافت ساره جالسه على الكنب الجانبي قربت منها
شوق بصوت باكي / عمي غروره بيذبحه ليش ما خلاني اوصله واجلس عنده لين اتطمن عليه قولي شلون بارتاح وهو بهالحاله اخاف ينتكس
ساره بابتسامه / ماني بمصدقه ان خويتك بغت تجلط تركي الثقيل الحمد لله ما شافها سالم كان راح فيها
شوق بسخريه / اشوف حضرتك مستانسه
ساره بجديه / مو سالفة اني مستانسه سالفة اني مصدومه ابو الهول بغت تجلطه بنت الي مايكره شي كثر مايكرهم
شوق تجلس على الكنب / ما شاء الله عليك حللتي وصدقتي تحليلك عمي من الصباح واضح انه تعبان ولا مالك عيون تشوف
ساره بجديه / انتي الي مافيك عيون انا شفت تركي اول ما داخل كان بيهاوش وشوفتها صدمته وتقولين مالها علاقه الا هي سبب طيحت تركي
شوق وقفت وبحزن / بروح له
ساره بجديه / اقول روحي نامي احسن
شوق بضيقه / قالو لك ساره بدون احساس
ساره بابتسامه / وانتي صادقه الا راحمه نفسي من عصبيته
طلعت شوق وساره دخلت الحمام
عند تركي
دخل غرفته ونار شوفتها مشتعله داخله
دخل الحمام وشغل المروش على البارد وجلس تحته بثيابه يتمنى الماء البارد يخفف من ناره
ومتاكد مافي شي يقدر يطفيها الي صابه شي عظيم ولا تركي ينصرع بسبت بنت
عند شوق
دخلت الغرفه ما شافت عمها قربت من الحمام سمعت صوت الماء
شوق بخوف / عمي
حطت اذنها على الباب تتسمع له
شوق بضيقه / عمي الله يهداك وقت تسبح وانت دايخ
تدري ان عمها يسمعها ومطنش لكن لازم تطمن عليه جلست على كرسي التسريحه بتنظره لين يطلع لو جلس لصبح بتنتظره
عند تركي
سمع صوت شوق تناديه ماله خلق يجاوبها لان الي صار قدامهم حارقه فوق ناره تحمل ضعفه قدام شوق لكن قدام اخته هذا شي قاسي وموجع لتركي المعتز بغروره
بعد ساعه والماء البارد نازل عليه وقف ومد يده وقفل الماء وطلع من الحمام
عند شوق
كانت تحرك رجولها بتوتر عمها طول كثير بالحمام وقفت كانت بطق عليه الباب
شافت الباب فاتح و تركي طالع بملابسه الي كلها ماء
ركضت له
شوق برعب / عمي ليش غرقان بالمويه
تركي بصراخ وعصبيه / اتسبح ولا هذا ممنوع عندك
شوق ودموعها تنزل / والي يسبح يسبح بثيابه
تركي بعصبيه وقهر / كيفي وياليت تطلعين من الغرفه واياني وياك اشوفك داخله بدون ماسمح لك
شوق بصوت باكي / عمي
تفاجئت بتركي يسحبها ويطلعها برى غرفته ويقفل الباب
عند تركي
بعد طرده لشوق فتح دولابه واخذ له بجامه لبسها وتمدد على سريره وداخله حزن وضيقه وهم يهدون جبال
صار يتنهد تنهيدات متواصله بيخفف من حالته لكن مافي امل
عند نوف
اول ما دخلت البيت حذفت العبايه بقرف على الارض ونزلت حجابها وحطه بشنطتها ودخلت الصاله
عند ركان
رفع عيونها شاف نوف بجمالها القاتل قدامه ماقدر يرمش
ركان في نفسه / والله انك ماتنلام ياتركي و الي صابك عقوبه من ربك
عند نوف
اول ماشافت ركان قربت منه بعصبيه
نوف بعصبيه فز منها ركان
نوف بصوت عالي وبعصبيه / ما هقيتها منك انت يا ركان تستقوي على بنت وتكسر فرحتها بليلة ملكتها
ركان وقف مصدوم من ثورانها / يا بنت الحلال مافيه شي يحمل كل هالعصبيه
نوف بعصبيه / والي سويته لشوق مايخليني اعصب
ركان بصدمه / وش الي سويته يخليك تصارخين وتعصبين بوجهي
نوف بعصبيه / والي برقبتها من منو
ركان بابتسامة حراج / ايه مني
ركان في نفسه / ول كل هالعصبيه والصراخ علشان بوسه اجل لو كانت ضربه وش بيصير
نوف بعصبيه / مستحيييل اسمح لك تتطاول على بنتي وتخليها تعاني معاناتي مع ابوها واذا هذي اولها تنعاف تاليتها وياليتك اطلقها
انصعق ركان من جرائت نوف وبنفسه / ما يلام ناصر اذا سوى سواتي اذا انا العاقل الرزين صرت خفيف اجل هو شلون
نوف صرخت وفز ركان / مستتتتتتتتتحيل اسمح لك لا تضن انها يتيمه واني مسالمه بتستقوي عليها والله لا نتفك بظروسي كله الا عيالي
ركان خاف من عصبيتها / هدي اعصابك والي صار مراح ينعاد
نوف باصرار / توعدني
ركان في نفسه / هذي صاحيه شلون اوعدها اني مابوس بنتها هذا فوق طاقتي
ليكون بتكتب على بنتها ممنوع الاقتراب والبوس
حاول يتهرب من الموضوع مالقى الا سالفة تركي اطلعه من الموقف
ركان بهدوء / اجلسي فيه موضوع لازم اعرفه منك
نوف بستغراب / وش موضوعه
ركان بجديه / وش صار بينك وبين تركي بفرنسا
جلست نوف وبحقد / من قال لك
ركان بجديه / تركي
نوف بحقد / اول مره اشوف واحد يفضح نفسه
ركان بجديه / تركي ما فضح نفسه يقول انتي
ماقدر يكمل كلمته من قوها
نوف بضيقه / انا شنو
نزل ركان راسه ليده وبارتباك / انك صايعه وكل يوم بحضن رجال
نوف انصعقت من كلام ركان وغصب نزلت دموعها على خدها
وبقهر / اناااااااا صايعه وش عرفه فيني علشان يحكم علي ولا علشان يبري نفسه يقول عني هالكلام حسبي الله عليه حسبي الله عليه
وبصوت باكي / واكيد صدقته
ركان اوجعه قلبه عليها ودموعها تدل على برائتها
ركان بهدوء / ما صدقته ومستحيل اصدقه ولما قال عنك هالكلام تضاربت معه انتي من اهلي مستحيل اسمح لتركي او لغيره يغلط عليك لو بحرف
طالعته بعيون كلها دموع / صدق ركان ماصدقت فيني
ركان بجديه / والله العظيم ما صدقت فيك لكن حبيت افهم السالفه لاني سمعتها على لسانه وحبيت اسمعها على لسانك ولو داري انك بتبكين كان ما تكلمت بهالموضوع
نوف بجديه / انا حلفت ما فضحه ولا اجيب سيره بهالموضوع مو علشانه علشان عيالي مهما كان هذا عمهم اذا صديقك ظلمني مستحيل اقول الي صار وافضحه
كلامها زاد اعجاب ركان فيها
وقفت تمشي شاف علامة الاكس المفرغه والفتحه الي توصل للفخذ غض نظره من الفتنه الي يشوفها وداخله قهر منها
كان بيتكلم ويهاوشها على لبسها لكن لما رفع نظره شاف مالها اثر
ركان بعصبيه / وبعدييييييييييين والله ماينسكت على لبسهااااااا
شلون ناصر سامح لها تلبس هالبس
وابتسم / والله انك ماتنلام ياتركي يوم هجرت الرياجيل وقاعد لحالك زين موقف قلبك يوم شفتها والله شوفتها تذبح
هذي متى تفهم ان الي تلبسه حرام ومايجوز بلبسها ثيرنا وتحدنا على الحرام لو بالنظر
وقف وطلع لغرفته
عند نوف
دخلت غرفتها وقفلت الباب وراها وصارت تبكي بحرقه والم
نوف بصراخ / عساك الموت انا صايعه وكل يوم بحضن رجال ما تدري حتى بحضن اخوك بعمري ما نمت فيه
التفتت لضاحي شافته نايم والابتسامه مرسومه على وجهه استغربت
قربت منه وباست جبينه البارد
استغربت برودته وصارت تتحسس اطرافه المثلجه
خافت صارت تهزه / ضااااااااااحي
لكنه ما ستجاب لها فتحت الباب وصارت تركض وهي مرعوبه خايفه تفقد ابوها للمره الثانيه وترجع معاناتها من جديد
صوت نحيبها وبكاها مالي المكان
فتحت الباب على ركان
عند ركان
كان متمدد على سريره شافها وانفجع من شكلها ونياحها
ركان بخوف / وش صار
نوف بصوت متقطع باكي / ا ب وك ما يتحرك
قبل لا تكمل كلمتها كان ركان نازل عند ابوه
الخوف وارعب يحركه قرب من ابوه ومسك اطرافه وانفجع من برودتها صايره قطعة ثلحه تامل وجه ابوه المنور المبتسم قرب من ابوه وباس جبينه وغرق وجه ابوه بدموعه
كمل عليه صوت بكا ونحيب نوف
نوف بصوت باكي / ركان ابوك وش فيه ليش بارد
ركان رفع نفسه عن ابوه وطالعها بدموع وبصوت باكي / تعالي
ودعي ابوي
نوف بصوت باكي موجع / الله يخليك لاتقول اني تيتمت مرتين اول مره قدرت اتحملها لكن الثانيه ما اقدر
سحبها ركان وقربها من ابوه / الله يرحمه هذا يومه ولازم تودعينه
نوف صارت تهزه بقوتها / لا تموت وتخليني بعدك بضيع
وحطت راسها على صدر ضاحي وصارت تبكي بنحيب وقهر
ركان بحاجه لوقف احد جنبه رفع جواله واتصل على صديقه
عند تركي
كان بهمه وضيقته سمع صوت جواله شاف رقم ركان
مستغرب من ساعه متهاوشين والحين يتصل فيه كان بيطنش لكن لقى نفسه يرد عليه
تركيه بعصبيه / خير وش عندك متصل
ركان بنحيب / تركي الحق علي ابوي مات
فز تركي واقف / لا حول ولا قوة الا بالله دقائق وبكون عندك
انهى اتصاله من ركان وبسرعه لبس ثوبه ونزل
وطلع برى البيت طق الجرس وفتحت له المربيه صد عنها
عند ركان
بعد مانهى اتصاله التفتت لنوف / اطلعي فوق تركي بيجي يشيل معي ابوي
نوف تجيبه بدموعها ونحيبها / بروح معكم
ركان بعصبيه وبصوت باكي / اطلعي فوق
استجابت له نوف وطلعت من الغرفة ودخلت بالصاله وكملت نحيبها
عند ركان
قرب من ابوه وحضنه سمع صوت تركي يتنحنح
ركان بصوت باكي / ادخل
دخل تركي واوجعه قلبه على حال ركان قرب منه واسحبه عن ابوه
ركان رمى نفسه بحضن صديقه وصار يبكي بحرقه / ابوي مات
تركي ودموعه تنزل / الله يرحمه انت شوف وجهه شلون منور وميت وهو يبتسم المفروض هذا يفرحك
ابوك ارتاح من معاناته واوجاعه
ركان رفع وجهه الي كله دموع / هذا ابوي ابوي
تركي بضيقه / الله يرحمه ويجعل مثواه الجنه
لنا لقاء باذن الله بعد الاجازه
واتمنى لكم اجازه سعيده
اختكم نسايم نجد
16-01-12, 01:58 PM
جديد مواضيع قسم الارشيف
العرض العادي
