بارت اليوم بارت قصير بالنسبه للبارتات الي قبل
كنت بكتب لكن خفت اتتعمق واتاخر عليكم وانا متاكده بحماسكم للبارت
اتركم مع البارت
الرجاء عدم طمر اسطوررررررر
البارت السابع والخمسون
عند نوف
بعد نزول شوق والجو مكهرب عندها خايفه تغلط بحرف وتنفضح ويصير الي خايفه منه
كل ماطالعتهم شافت عيونهم عليها وام سالم سرحانه فيها
حاسه نفسها جالسه بين وحوش صارت تفرك يدها وتحرك رجولها بتوتر
نوف بابتسامة احراج / شوق تاخرت
ام سالم وعيونها على نوف وبجديه / تلقينها تحت مع عمانها
لا ارادي كشرت بوجها
انتبهت لها ساره واستغربت وبجديه / شوق قالت لي انك متزوجه
نوف ارتاحت لقت شي تسولف فيه بدال مراقبتها لنظراتهم وبابتسامه / ايه وعندي بنوته
ام سالم باعجاب / ما شاء الله عليك الي يشوفك يقول انك ماتزوجتي
نوف حمرت خدودها وباحراج / مشكوره خالتي
ام سالم باعجاب / لو انك ماتزوجتي كان خطبتك لتركي
نزلت عيونها على يدها ومن القهر زادت فرك يدها يمكن يخف القهر الي داخلها من الي سيرته ملاحقتها بكل مكان
وفي نفسها وبحقد / عساه بالموت الي بكل مكان طالعه لي سيرته
عند تركي
جالس على الدرج ساند راسه على الجدار يتسمع لهم وصوتها هز اوتار قلبه
ونحرق قلبه لما قالت متزوجة و عندها بنوته
بيموت من غيرته و هو يدري ان غيره له الحق الكامل فيها
سمع كلمة امه الي خنقته اكثر واكثر كان يتمنى انها ظهرت بحياته قبل لا تتزوج
تركي بحرقه / اااااااااااااااه يمه صبيتي على الجرح ملح
اول مره الي ابيه تبينه والي يعجبني يعجبك
عند نوف
رفعت راسها شافت نظرات ام سالم تلتهمها
كان نفسها تقوم وتفجر العجوز الي كرهتها بالجلسه من نظراتها الي مانزلتها عنها
التقت عيونها بعيون هيا الي طول الجلسه ساكته
نوف في نفسها / سبحان الله هي وزوجها لهم نفس ملامح الطيبه
وانتقلت عيونها لام سالم الي واضح عليها القسوه والتسلط
وكملت في نفسها / الله يعينها شلون قادره تتحمل هالعجوز
عند شوق
دخلت الصاله وهي معصبه ومولعه من ركان وحركته الوقحه شافت عمها ابتسمت وهو قرب منها
باسها وبحنان / مبروك يابوك
شوق بضيقه / الله يبارك فيك
طالعها وابتسم استغربت ابتسامته مد يده وحركها بشكل دائري على رقبتها وبابتسامه خبيثه / وش سوى لك ولد ضاحي
لا ارادي حطت يدها مكان لمست عمها ووجها ولع حياء وقهر من الغثيث
شوق نزلت عيونها
سالم بحنان / ارفعي راسك يابوك
وبابتسامه / ولد ضاحي شغله عندي الي بغى ياكل رقبة بنتنا
اول مره تحس نفسها تستحي كانت تتمنى الارض تنشق وتبلعها
شوق باحراج / عميييييييي
سالم بحنان / جيت ابارك وبارجع لرجال
وقبل لا يدخل قسم الرجال التفت لها / ماشفتي عمك
شوق وعيونها بالارض مالها وجه اطالع بعمها
شوق / لا
سالم بعصبيه / وين ذلف تاركني لحالي مع الرجال
مشى وهو يغلي قهر من تركي
دخل سالم
وشوق مشت بخطوات سريعه وقفت قدام مرايه عند المدخل شافت بقعه حمره كبيره واضحه مع بياض بشرتها
شوق بعصبيه / الله ياخذك فشلتني عند عمي الحين شلون بجلس مع الجالسين فوق والله لصير طنازه لهم
وبصراخ / قلييييييييييييييل ادب وغثيييييييييييث يارب شلون رضيت بالعله يصير زوجي
يا رب يطلقني قبل لا تزوجته هذا لو عشت معه يا ذابحته يا ذابحني
اووووووووووووووف
مشت وهي مقهوره وقبل لا تطلع حطت يدها على رقبتها بتخفي المصيبه الي سوها الغثيث لو قدامها كان فجرته ومكفاها
طلعت فوق وانصدمت من شكل عمها الجالس على الدرج واضح عليه التعب
ركضت وحطت يدها على كتفه / عمي وش صار ليش جالس هنا
فز تركي وطالعها بنظرات حزينه / زين انه انتي الي جيتي مو غيرك الي شاف ضعفي
قربت منه اكثر وبضيقه / وش صار ليش انت هنا
تركي بابتسامه حزينه / شوفتها عرقلت رجولي عمك القوي عجزان يوقف
مد يده لها وبنظرات حزينه موجعه / قوميني مابي احد يشوفني بهالحاله
شوق حست بالضيقه مدت يدها وبصوت حزين / قوم عمي الله يهداك
مسك يدها بقوه من قوته حست كتفها انخلع ووقف وطالعها بنظرات موجوعه / اااااااااااااااااه الي شفته قاتل عمك
انتفضت شوق / بسم الله عليك عمي
تركي بصوت حزين / تعبان ياشووووق تعبان قولي لي شلون بعالج علتي
نزلت دموعها على حال عمها الي عشقه لامها بيذبحه تغيرت حالته من بعد ماشاف امها من عمها القوي لعمها الي واقف قدامها
تنهدت بحرقه / عمي دخيلك لا تعذب وتوجع نفسك صدقني ماتستاهلك
تركي بحرقه ووجع / تحسبيني انا الي اخترت احبها ومبسوط على العذاب
ماقول الا اني ابتليييييييييييييت
ادفع كل الي املكه واتعالج من العشق ولله لو علاجي باخر الدنيا سافرت وجبته
شوق ودموعها تنزل بحراره / خلني انزلك تحت ترتاح
تركي ترك يدها / امسحي دموعك للحين ماحتجت انك تبكيني
شوق ضمت عمها بحب / جعلك تبكيني قبل لا ابكيك والله اني ترجيتها تطلق من زوجها وتتزوجك لكنها
انتفض تركي بعصبيه ودفها عن حضنه وبصراخ هز المكان
/ لييييييييييييييش يشوق كملتيها علي وطلعتيني بنظرها خسيس مو تركي الضامي الي يرضى بوحده تبيع زوجها علشانه لو الثمن موتي
عند نوف
فزت مرعوبه من صراخ تركي وام سالم انحرجت
ام سالم باحراج / هذا صوت تركي تلقينه معصب على الشغالات
وبابتسامه احراج / ولدي طبعه حار ولا هو مافي منه
نوف في نفسها بحقد / عساكم تصارخون عليه ميت وارتاح من سيرته
طول الجلسه وهيا ساكته شافت هيا توقف
ساره بجديه / هيا وين رايحه
هيا بابتسامه / بروح اشوف عيال ناصر
ساره بجديه / انتي ما ترتاحين والله الي يشوف اهتمامك فيهم يقول انتي امهم ترى العيال عند المربيه
هيا بجديه / العيال امانتي مدامهم بعيد عن امهم الله يجمعهم فيها
صرخت ام سالم بوجه هيا / العيال امهم ماتت مستحيل بيجي اليوم الي بيشوفونها فيه
نوف عيونها تنتقل بين ام سالم وهيا وادخلها قهر وحقد على العجوز
وحب وامتنان لهياء الي حافظه عيالها بغيابها
نوف في نفسها بحقد / شفتهم وبشوفهم غصب عنك ياعجوز بليس ولا انا مت جعلك قبلي
وقفت نوف وبابتسامة حقد / اذا ماعندكم مانع بطلع مع هيا اشوف العيال
ام سالم بابتسامه / لهدرجه تحبينهم
نوف بحب / اغلى من روحي
طلعت هيا ونوف لحقتها
عند شوق
شوق بصوت باكي / تعبتني ياعمي ومالقيت الا هالحل وبعدين هي متزوجه شايب مخرف
غمض عيونه وبابتسامه حزينه / الشايب فاز فيها
شوق بصوت باكي / قلت اخلصها من الشايب وتتزوجها
تركي بصوت محروق / لا عاد اسمعك تعيدين هالكلام حبي لها غلطه ومستحيل اخلي حبي يجرني للحرام
شوق بصوت باكي / اسفه عمي ماقصدت كل الي قلته لكن حبيت اريحك من العذاب الي عايشه
مشى منكسر من قدامها وكل يوم ينطعن اكثر بسبت عشقه المجنون
عند ركان
وصل لبيته والابتسامه على وجهه والقشعريره تسري بقلبه وهو يتذكر قربه منها وبوسته لها
ركان في نفسه وبهيام / يحلووووو قربك ياذيبه ويحلوها ريحتك الي للحين اشمها حولي
وبابتسامه / وطلعت راعي حركات والله ماتوقعت بصير جري ها لكثر يمكن لو ماعضتني صارت علوم
مر غرفة ابوه شافه نايم وبعدها طلع لغرفته
فسخ ثوبه ووقف قدام التسريحه شاف اسنانها مرسومها على كتفه
ركان بابتسامه / صدق انك ذيبه ولا وحده بليلة ملكتها تعض زوجها
الله يستر من ليلة الزواج وش بتسوين يخوف تقطعين لحمي شرايح
نسومه تقولك ( ليلة الزواج ادهى وامر )
اخذ من التسريحه كلونيا ورشها على منديل وحطها على مكان العضه قفل عيونه من حرارة العطر
فتح الدولاب طلع له ثوب جديد ولبسه طلع من غرفته وطلع من بيته راجع لبيت تركي
وصل المجلس شافهم مثل ماتركهم جلس مقابل سالم الي واضحه الفرحه بوجهه ملكة شوق اشغلته عن وجعه
وقف سالم وجلس جنب ركان وبابتسامه / وين رحت
ركان بجديه / رحت اتطمن على ابوي
سالم بابتسامه خبيثه / وش سويت ببنتنا
انصعق ركان معقوله فيها الجرائة تشكيه عند عمهاااا
ركان انحرج / هاااااااااه
حط يده على فخذ ركان وبابتسامه / يحضرة الضابط اذا الواحد سوى جريمه يدور مكان مخفي مو بمكان مكشوف
لو ان الي يكلمه تركي كان اخذ واعطى معه لكن سالم يفرض احترامه على الكل
ركان ابتسم باحراج وهو يدعي على خباله لكن بداخله فرحان مثل ما وسمت فيه وسم فيها لكن هي مراح تسلم من الا حراجات
عند تركي
دخل غرفة الضيوف وانسدح من بعد ماشافها مايبي يشوف غيرها قفل عيونه
تنهد بحرقه وهو يتذكر شكلها ولبسها الاحمر والروج الحمر زادها جمال فوق جمالها المدمر
حط يده على قلبه يحاول يخفف من دقاته الي فجرت ضلوعه و بصوت حزين / بعمري ما حبيت الاحمر واستغرب ليش يحبونه من بعد ماشفته عليها اقول ماينلامون
والله بنجلط بسبتها
وبحرقه وقهر / ااااااااااااااااااااه يابخته الشايب فيها
وبتفكير وبقهر / انعمو الرياجيل يومها تاخذ شايب والله ان جمالها يدمر اقوى رجال وانا اكبر دليل
وتنهد بحرقه / هالنوف لغز صعب علي احله
عند نوف
وقفت عن الباب شاف هيا حاضنه ماهر وترضعه فارس جالس يلعب
قربت منهم فارس رفع يده لامه والثاني ترك الرضاعه وطالع بامه
هيا رفعت راسها شافت نوف وابتسمت لها
ردت نوف الابتسامه واخذت فارس وقربت من هيا ونزلت نفسها وباستها على راسها
انفزعت هيا من حركة نوف المفاجئة بلمت
نوف جلست بجديه / جمايلك مطوقه رقبتي وهذا اقل شي اسويه
هيا بققت عيونها من الصدمه وبتلعثم / وش
جـ جـ مايله
قربت اكثر من هيا وقربت فمها عند اذن هيا خايفه احد يسمع الكلام الي بتقوله
وبجديه / انا ام العيال الي حاضنه واحد وتلاعبين الثاني وبعمري ماكنت ناكره للمعروف
هيا بعدم استيعاب / قصدك مثل امهم
نوف بحرقه وضيقه / انا نوف زوجة ناصر وام عياله
شهقت هيا وحطت يدها على فمها من الصدمه وحست بنفضه بجسمها من قو الي سمعته كانت بتتكلم لكن لسانها عاجز عن الكلام
مشت نوف وعيون هيا تتبعها بصدمه
انشغلت عن الي بحضنها الي خلصت رضاعته وصار يرضع هواء
عند شوق
دخلت الصاله شافت جدتها وساره وما شافت امها قربت منهم
شافتها ام سالم وبحب وقفت لها وباستها / مبروك
شوق جلست وبقهر / الله يبارك بعمرك
الا امي وينها
ام سالم بعصبيه / وش بيجيبها امك ان شاء الله
شوق بارتباك / اقصد نوف
ساره بجديه / طلعت عند اخوانك
شوق بنفسها / اكيد بتفضحنا الله يستر لا تجيب العيد
وقفت وبضيقه / بطلع اشوفها
ام سالم بجديه / عمك وش بلاه يصارخ تحت فضحنا
نوف بضيقه / مدري عنه
ومشت من قدامها واليوم عندها اتعس يوم مر بحياتها اولها بملكتها وكملها عليها عمها شافت امها طالعه من غرفة العيال
قربت من امها وبضيقه / يمه وبعدين صايره تتصرفين تصرفات متهوره والله لو درو انك امنا بتصير مصايب الليله
نوف طنشت كلامها وبجديه / ادخلي عند هيا شكلها مفجوع
شوق بصدمه وخوف / ليكون قلتي لها
نوف ببرود / ايه
شوق بحرقه / ياربي وش هالمصايب الي تنحذف علي الليله صدق ان وجه لغثيث نحس
مشت نوف وشوق دخلت شافت هيا جالسه واخوها بحضنها يرضع الرضاعه فاضيه وهي مصنمه وعيونها على الباب
قربت من هيا وسحبت الرضاعه من فم اخوها
وجلست جنب هيا وبحنان / عمه وش فيك
صحت هيا على صوت شوق
هيا بصدمه / خويتك تقول انها امك
شوق بصوت واطي وبرجاء / ايه امنا الله يخليك عمه لحد يدري خلو الليله تعدي على خير
هيا بصدمه / شلون امكم مستحيلللللللل
شوق بجديه / والله العظيم امنا
هيا بصدمه / لكن هذي غير
شوق بضيقه / شلون غير
هيا بصدمه / هذي اصغر منك شلون تصير امك
شوق بضيقه / هذا الي صار
هيا بصدمه / ابوك دايم يسب فيها وانها عله على قلبه ومتحملها علشانكم لكن خويتك عكس كلامه
شوق بحرقه / مو خويتي هذي امي وبوي الله يرحمه كان ظالمها وياما حاولت اصلح لكم نظرتكم عنها لكن انتم مثبتين الصوره المشوهه الي سمعتوها من ابوي
هيا بستغراب / طيب ليش ابوك سوى كذا ليه ظلمها وكره الكل فيهاااااا وهي
قطعت كلامها شوق وبقهر / مدري والله العظيم مدري
وبرجاء / عمه الله يخليك لحد يدري حتى عمي سالم انتي شفتي جدتي شلون تعاملها وهي خويتي لكنها لدرت انها امي اكيد بتطردها
هيا ساكته
كملت شوق وبرجاء / عمه احنا كذبنا هالكذبه علشان جدتي تعرف امي على حقيقتها وبعدين لحبتها قلنا لها الحقيقه
هيا بجديه / تطمني يا شوق وهذا وعد مني محد بيدري
وبابتسامه / جدتك اكلتها بعيونها وبتزوجها لعمك
حست شوق بغصه / م اضنتي بيكون هذا كلامها لدرت انها امي
وقفت شوق / بطلع لهم
دخلت الصاله وجلست مقابل جدتها
ام سالم لاحضت البقعه برقبة شوق
ام سالم بخبث / شوق غطي البلى الي برقبتك
طالعت نوف بنتها وانصدمت من البقعه بغت تتكلم وتسال بنتها من شنو البقعه لكن فضلت تكون مستمعه واذ انفردت ببنتها بتسالها
شوق نست المصيبه / هاااااااا
ام سالم بابتسامه / كل هذا وانت مغصوبه عليه اجل لو انتي راضيه وش بيصير
وقفت شوق وكلام جدتها زاد من قهر وعصبيتها وحقدها على ركان
مشت من قدامهم ودخلت غرفة جدتها وصارت ادور على جوالها
اخذته وفتحت على اخر مكالمه مستلمه وكتبت رساله وبقهر وبحقد ارسلتها
الله ياخذذذذذذذذك ثم الله ياخذذذذذذذذذك ياجعلك الموت امييييييييين غثييييييييييييييييييييييييييييث
عند ركان
سمع صوت نغمة رساله طلع جواله من جيبه وانصدم وهو يشوق رقم شوق
فتح الرساله بحماس
وتاكد انها انفضحت ورسالتها الدليل
ماقد يمسك نفسه ضحك بصوت عالي / هههههههههههههههههههههههههههههههههههههههههههههههههههههههههههه ههه
كل الي بالمجلس التفتو عليه
ركان انتبه لنفسه وباحراج / واحد من الربع مرسل لي نكته وما تحملت ماضحك
سالم بجديه / ليكون صقر الي مرسلها
ركان مايدري شلون نسى صديقه الي قال بيحضر وماحضر لا ارادي وقف وطلع من عندهم وهو يدعي على نفسه شلون نسى صديقه
وصل للباب الخارجي واتصل على صقر
لكن مافي رد
ركان بضيقه / لا والله منت بخالي ياصقر الله يستر من الي مشغلك عني
عند صقر
جالس بالانتظار والكل داخل عند منى
سمع صوت جواله شاف رقم صديقه
انقهر من نفسه شلون نسى وعده لصديقه انه يحضر ملكته
صقر بضيقه / استغفر الله شلون نسيتك ونسيت وعدي معك
طالع بساعته كانت 7 عنده وقت يروح يبارك له
صقر في نفسه / الحين شلون بحضر ملكتك يا راكان وشكلي مبهذل وماعندي غير الثوب الي لابسه
لازم امر المغسله اغسل ثوبي وبعدها احضر
ياليت الملكه كانت بيوم غير هاليوم كان فرحت فيك عدل
وقف وطلع برى وقفت قدامه سيارة تكسي ركبها ومر المغسله غسل ثوبه مستعجل بعد نص ساعه وهو طالع من المغسله وركب بالتكسي الي واقف ينتظره
عطاه العنوان وبداخله حزن يهد جبال امس دافن عيال اخته واليوم بيحضر ملكة صديقه
تنهد بحرقه / وين القلب يفرح وداخله كل الوجع والهموم
شاف من بعيد بيت تركي وشاف صديقه واقف برا وبيده جواله
عند ركان
قلبه شاغله على صديقه سمع صوت سياره شاف سيارة تكسي توقف قدامه وارتاح وهو يشوف صديقه نازل مشى له بخطوات سريعه
حضنو بعض
ركان بعتب / الله يهداك خربت فرحتي بتطنيشك
صقر بضيقه / ماتاخرت عليك الا غصب عني وجعله زواج مبارك
ركان بجديه / والله اني قايل فيك شي ولا انت اطنش مكالماتي وتتاخر عن ملكتي
وتامل صديقه
ركان بجديه / قلبي كان حاس ان فيك شي والي يشوف شكلك يقول ميت عنده احد قولي وش صار
صقر بحرقه / خلني ادخل على الربع ابارك لهم وبعدها بقولك وش صار
صارو يمشون ويسولفون
ركان بجديه / الليله نومك في بيتي
صقر بضيقه / ما قدر اهلي بالمستشفى لازم ارجع لهم
ركان بخوف / اهلك بالمستشفى وش فيهم
قطع عليهم صوت سالم وهو يرحب بصقر
سالم بجديه / يالله حيه
وسلمو على بعض جلس صقر وركان جلس جنبه
صقر بجديه / وينه تركي ما شوفه
ركان بجديه / من بعد الملكه ماشفته
صقر وعيونه على سالم وبجديه / سالم تركي وينه بسلم عليه وبطلع
سالم منحرج ومنقهر من غياب تركي
سالم بتهرب / تو الناس العشاء جاهز
وقف صقر بجديه / عليكم بالعافيه الاهل ينتظروني وماقدر اتركهم
وقف معه ركان
وصل معه للباب لكن صقر منعه يطلع معه
صقر ببجديه / ادخل الليله حفلتك واذا خلصت نتقابل
ركان بجديه/ وين ننتقابل
صقر بضيقه / بينا اتصال
طلع صقر وعيون ركان تلحقه وفرحته انقلبت ضيقه بعد ماشاف صديقه ومقهور انه ماعرف وش صار على صقر الي مايهزه شي سهل
عند نايف
من بعد الي صار له عند بيت ركان وطول الوقت يفكر بهالموضوع
كان جالس بالصاله سمع الباب شاف صديقه وبيده اكياس
نايف بستغراب / ليش جايب كل هالاكياس
عبدالله بضيقه / هذي اغراض اهلي الي بسياره خفت حرارة الشمس تحرقها
وقف نايف واخذ منه بعض الاكياس / وين تبيني احطها
عبدالله بمزح/ بتشيل الاكياس الثقيلة زين انك قادر تشيل نفسك
نايف بابتسامه / تراني اقدر اشيلك فوق الاكياس
عبدالله بجديه / مابيك تشيليني ابيك تهز طولك وتجيب لنا عشاء اليوم طاحت علينا نومه زين لحقنا وصلينا العشاء بالمسجد
نايف بضيقه / اعوذ بالله منه ابليس قلبي ماكلني على الصلوات الي جمعناهم
عبدالله وهو يمشي من قدامه / الله يغفر لنا
لنا لقاء باذن الله الثلاثاء
اختكم نسايم نجد
03-01-12, 10:11 AM
جديد مواضيع قسم الارشيف
العرض العادي
