كاتب الموضوع :
نسايم نجد
المنتدى :
الارشيف
اليوم ماعندي هذره كثيره لكن بارت اليوم كله احداث
اتمنى اني ما تاخرت بانزال البارت
اتركم مع البارت
الرجاء عدم طمر السطورررررر
البارت الرابع والاربعون
في الفندق
صحى ماجد وشاف مكان سيف خالي قام من سريره ودخل الحمام اخذ شور سريع طلع سمع صوت الباب يقفل
التفت للباب وشاف الحزن والضيقه مرسومه على وجه صديقه
ماجد بجديه / من وين جاي
سيف تمدد على سريره وبضيقه / اختنقت وطلعت اشم هواء
ماجد قرب وجلس على كرسي قريب من سرير سيف ماجد بجديه / من جينا وانت ما تنتحاكى
سيف بعصبيه / مدامني ما انتحاكى ليش واقف تكلمني
ماجد بهدوء / هدي ياخوي الدنيا ماتستهال الي تسويه بنفسك
سيف بحرقه / كرهتني بالديره وكرهتني بكل شي فيها وكل الاماكن هنا تذكرني فيها وتذكرني اني غبي
ماجد بجديه / ربي انعم علينا بنعمة النسيان انسى ياخوك
سيف بعصبيه / شلون تبيني انسى وانا مابردت قلبي فيها اخذت كل شي وقبله اخذت قلبي
وبغصه وقهر / جابت من زوجها الجديد عيال مو ولد واحد اربعه كارهه تجيبهم مني كنت لها جسر يوصلها للي تبيه ولما وصلت ماعاد لي لزمه والغبينه انها ساكنه معه في بيتي وتصرف عليه وعلى عياله من حلالي
وبصراخ / مقهورررررر وبداخلي نار قولي شلون بطفيها
ماجد بحنان / استهدي برحمن فيه رب كريم بياخذ لك حقك منها
سيف بصراخ / كلامك يقوله الضعيف عمري ماكنت ضعيف وحلالي بيرجع لي ومثل ما تركتني على الصفر برجعها لصفر
ماجد بتغير الموضوع / زرت امك
سيف بضيقه / حالتي ماتسمح لي اقابلها
ماجد بجديه / روح لها تلقاها متلهفه على شوفتك
سيف بضيقه / خلها بعدين لين اهدء مابيها تشوف ضعفي
ماجد بجديه / وش رايك اغديك من يد سميه لذقت اكلها نسيت هموم
سيف بضيقه / من له نفس ياكل
ماجد باصرار / بكلمها تجهز لنا غداء معتبر
سيف بعصبيه / حتى بالاكل بتجبرني
ماجد بجديه / واذا قلت طالبك بتردني
سيف بستسلام / بكيفك
رفع جواله واتصل على سميه
عند سميه
كانت بمكتبها تفطر سمعت صوت جوالها وقفت واخذت شنطتها وفتحتها وطلعت جوالها شافت رقم اخوها
سميه بحب / هلا باللي ناسينا
ماجد بجديه / شخبارك واخبارك البنات
سميه بجديه / الحمد لله كلنا بخير والبنات مشتاقات لك
ماجد بجديه / حتى انا مشتاق لهم وترى غدانا عندك ونبي غداء يبيض الوجه
سميه بجديه / وجهك دوم ابيض من بيجي معك
ماجد بجديه / معي سيف ومدحت له طبخك مو تفشليني قدامه
سميه بسخريه / وخويك يتنازل ياكل طبخ طابخته حرمه
ماجد وعيونه على سيف / اثبتي له ان الحرمه طبخها افضل من طبخ احسنها شيف
سميه بحقد / لو بكيفي طبخت له سم يفكنا من لسانه
ماجد / ههههههههه ترى مارضى عليه
سميه بجديه / حط في بالك غداكم متاخر
ماجد بستغراب / ليش متاخر
سميه بجديه / يبيلي ساعه لين اطلع وتجهيز الاكل المعتبر يبي له وقت
ماجد بجديه / مدام غداك متاخر بفطر لاني ميت من جوعي
سميه بجديه / لا تكثر فطور وبعدين ما تتغداء
ماجد بحب / وانا اقدر مااكل من طبخك يله مع السلامه
سميه بجديه / فمان الله
انهت من مكالمتها من اخوها واتصلت على بيتها تطلب من الشغاله اطلع سمك ولحم ودجاج ولجت البيت بتشوف وش بتطبخ
عند ماجد
بعد مانهى اتصاله من اخته / سميه ترحب فيك
سيف بضيقه / ماضنتي اني ضيف مرحب فيني
ماجد بابتسامه / شعوركم متبادل
سيف بعصبيه / وعلى هذا بتزوجني اختك
ماجد بهدوء / لاني متاكد انك بتحافظ عليها وبتصونها
سيف بضيقه / لا تتاكد من شي فياليت ترحم اختك من زواجها من واحد معقد
ماجد بجديه / متاكد ان سميه هي الي بتعالجك من عقدتك
سيف بحقد / اختك بتجيب لي عقد فوق العقده الي عندي
عند صقر
وقف سيارته عند الباب فتحت منى بابها بهدوء ونزل وليد واخته نزلو وبسرعه دخلو البيت
دخت منى البيت ووراها صقر وبصوته القوي / ادخلي المجلس بينا كلام
منى بضيقه / صقر اجل كل شي لبعدين خلني اسلم على امي والبنات
صقرباصرار / من يقدر يصبر لين تسلمين عليهم كلها كلمتين وبعدها براحتك
استجابت لاخوها ودخلت وراه المجلس
نزلت نقابها
تاملها صقر وانفجع من وجه اخته الشاحب وعظام وجها البارزه
صقر بصدمه / وش الي فيك انتي وولدك الولد عظم وجلد وانتي مختفيه وش فيكم وبعدين وينه سلطان
نزلت دموعها بحراره وبقهر / سلطان تزوج علي
صقر بعصبيه / الخسيس الي ما يسوى ريال بمجلس الرجال ماحمد ربه اني وافقت عليه وزجته وحده يستاهله افضل منه
وبصراخ / من متى متزوج
منى بضيقه / له شهر او اكثر
صقر / وليش ماكلمتيني اربيه
منى بضيقه / صقر سلطان ماكان يهمني ولاني بزعلانه عليه فرقاه عيد عندي
صقر بتكذيب / مدام فرقاه عيد ليش انتي بهالمنظر وليش دموعك على خدك
منى جلست على الكنب وصارت تبكي بحرقه خوفت صقر عليها قرب منها
صقر بصوت عالي / والله لو كان سلطان سبب هالبكي والله لخليه يبكي عمره كله
منى بصوت باكي / وليد بيروح مني
صقر برعب / الولد مريض
منى بصوت باكي / ياليته مريض واعرف علته يمكن ارتاح لكن سليم ومافيه الا العافيه
صقر براحه / احمدي ربك على سلامة ولدك ترى العافيه مادوم
منى بصوت باكي وبحرقه / وليد يموت قدام عيوني وما بيدي شي اسويه لاعاد صار ينام ولا صار ياكل واذا نام صحته الاحلام
صقر بهدوء / تعوذي من ابليس وتركي عنك الوساوس وولدك معليه شر ان شاء الله
وقفت منى / اكيد امي استبطتني بدخل اسلم عليها
صقر بجديه / امسحي دموعك لا تفجعين امك مع ان شكلك انتي وولدك بيخوفها
منى بضيقه / الله يعين
عند ام صقر
كانت بالصاله شافت الباب يفتح شافت وليد واخته يدخلون وقفت تستقبهم ركض وليد لجدته وباسها على راسها
ام صقر انفجعت من شكل وليد وصارت تتحسس يدينه وجسمه / يمه وش فيك
كان رد وليد على كلام جدته ابتسامه حزينه
انتبهت ام صقر لغلا الي واقفه تنتظر جدتها تخلص من سلامها على وليد
تركت ام صقر وليد وحضنت غلا وباستها
عيوناه عند الباب تنظر دخول بنتها / امكم وينها
وليد بابتسامه / مع خالي صقر
ام صقر بحب / روحو سلمو على خالتكم تلقونها بالمطبخ
مشى وليد وغلا من قدام جدتهم دخلو المطبخ كانت نجود مشغوله سمعت الحركه التفتت شافتهم واقفين
ركضت لهم وضمتهم لحضنها سوى / شخباركم والله مشتاقه لكم
وليد بلهفه / الحمد لله بخير وينها ديما
نجود بحب / اختك بالجامعه قولي شلون نحفت علشان انحف مثلك اسوي رجيم وبدال مانحف اسمن
غلا بطفوله / وليد ماصار ياكل علشان كذا صار نحيف
نجود / مشكلتي ماقدر اترك الاكل وعلى قولتهم طباخ السم لازم يذوقه وانا اطبخ شلون ماكل يله اسبقوني عند جدتكم وبجهز فطوركم وبجيبه لكم
عند منى
بعد كلامها مع صقر زادت ضيقتها دخلت الصاله شافت امها جالسه قربت من امها شافتها امها وفز قلبه وهو تشوف بنتها بهالشكل
قربت من امها باست راسها / شخبارك يمه
ام صقر بخوف / الحمد لله بخير الا انتي من شكلك منتي بخير
قربت منى وجلست جنب امها / بخير يمه
ام صقر / وينه الخير وانتي بهالشكل قدامي
منى بضيقه / يمه وش فيه شكلي مافيني الا العافيه
ام صقر بضيقه / وتكذبين قلب امك الي حاس انك منتي بخير لا انتي ولا ولدك
منى بضيقه / الي فيني ان سلطان تزوج علي
ام صقر ضربت على صدرها وبصدمه / تزوج عليك وانتي ساكته وجالسه عنده
منى بهدوء / من حقه يتزوج بدالي ثلاث والرجال ماغلط
ام صقر بعصبيه / لو انك راضيه ماكانت هذي حالتك انتي شلون ترضينها على نفسك تجلسين عنده وهو متزوج عليك
منى ببرود / تركت له الجمل بما حمل
ام صقر بستغراب / شلون تركتي له الجمل بما حمل
منى بجديه / سكنت فلتي وتركته لها
ام صقر بعصبيه / حققتي لها الي تبيه
منى بهدوء / الله يهنيهم في بعض
ام صقر بعصبيه / تبينه يتهنى معها وهو قاهرك حسبي الله عليه
منى بضيقه / يمه لا تتحسبين عليه سلطان مايهمني علشان تنقهرين من زواجه
ام صقر بضيقه / انتي وعرفت علتك ولدك وش فيه
منى بضيقه / ولدي الي فيه من هم الاختبارت ماصار لا ياكل ولا يشرب والحين اجازه بيمتن
ام صقر بحنان / نجود مجهزه لكم فطور مابي يبقى شي بالصحن اربنه يزين حالكم
منى بجديه / نسيتيني اسئل عن البنات شلونهم
ام صقر بجديه / كلهم بخير
منى بحرقه / شخباها ديما
ام صقر بحنان / الحمد لله مافيها الا العافيه
منى بتسال / بالجامعه
ام صقربجديه / امس خلصت امتحانها وقالت بتروح اليوم تودع صديقاتها علشان بننقل لرياض
منى بحرقه / وش سوت بامتحاناتها
ام صقر بجديه / معليها
قطع عليهم دخول نجود والعيال قربت من اختها وباستها
نجود بحب / شلونك وش فيك تتنافسين مع ولدك بالنحف ليكون فيكم شي
منى بضيقه / الحمد لله بخير واذا على نحفي مسويه رجيم مو مثلك يادبه
نجود بحماس / قولي رجيمك يمكن ينفعني وانحف قبل الزواج
ام صقر بعصبيه / ترى البنت حالتها مليااااااانه مو عصاقيل لو هفها هواء طارت
نجود بابتسامه / هذا الي نبيه ان الهواء يطيرنا
ام صقر بضيقه / جهزي الفطور واياني واياكم اشوفكم ماتاكلون مدامكم عندي مابي رجيماااااااااات ولصرتن في بيوتكم براحتكم
نجود بابتسامه / ام صقر مشروع تسمين واقول ليه للحين ما نحفت عزله بيصير وزني دبل
ام صقر بجديه / قومو افطرو بيجي وقت الغداء وانتم مافطرتو اتركو سوالفك بعد الفطور
قامت منى وانتبهت لامها الجالسه / يمه قومي افطري معنا
ام صقربجديه / سبقتكم وافطر تعرفين لازم افطر بدري علشان اكل علاجي
منى باصرار / طيب اجلسي معنا علشان تفتحين نفوسنا للاكل
وقفت ام صقر وجلست معهم على طاولة الطعام
في الجامعه
كانت ديما ومرام بالكفتريا يفطرون
ديما بستغراب / ما تلاحظين ان سلوى تتهرب من الجلوس معنا
مرام بجديه / هي كانت عندك امس بالبيت ليكون سويتي شي زعلها
ديما بجديه / ماذكر اني زعلتها وبعدين ماطولت جاها اخوها بدري وطلعت معه قبل لا تتعشى
مرام بجديه / اجل قومي اسئليها
ديما بكسل / وين بدور عليها بالجامعه لشفتها سئلتها
مرام بسخريه / فيه اختراع اسمه جوال اتصلي عليها وشوفي وينها وروحي لها
رفعت ديما جوالها واتصلت على سلوى
عند سلوى
من الصباح وهي متضايقه مالها وجه تقابل فيه ديما كل ما شافتها حست بعظم ذنبها وطول نهارها تتجنب شوفتها علشان ما تضعف
جالسه بقاعه فاضيه / حسبي عليك يا مروان خليتني مثل الجربانه جالسه لحالي
سمعت صوت جوالها شافت رقم ديما / ليش متصله ماني بناقصه
حطت يدها على الشاشه ماتبي تشوف اسم ديما
حاولت تقوي نفسها / ديما مثلها مثل غيرها من البنات الي دمرناهم اهم شي مصلحتك يا سلوى
وقفت / اليوم اخر يوم لنا مع بعض وبعده كل وحده بتروح طريقها وديما ماتهمني
رفعت جوالها واتصلت على اخوها يجي يطلعها من الجامعه
عند مروان
كان نايم بشقة عامر ازعجه صوت جواله رفعه
وبعصبيه / الووووووووو
سلوى بضيقه / مروان تعبانه تعال اخذني من الجامعه
مروان بعصبيه / لو بتموتين ما تتصلين علي يله تقلعي
قفل الجوال بوجه اخته
عند سلوى
انقهرت من اخوها بوبحرقه / جعلك الموت الي يريحني منك
دقت على رقم ابوها الي رد عليها من اول ارنه
سلوى بضيقه / الو
ابو مروان بحب / هلا ببنيتي وش عندك متصله
سلوى بضيقه / تعال الجامعه بطلع
ابو مروان نو مصدق طلب بنته / تبيني اطلعك مروان وينه عنك
سلوى بجديه / مروان مشغول
ابو مروان بفرح / الساعه المباركه الي اطلع بنتي من الجامعه ياليته مروان كل يوم مشغول
سلوى بضيقه / لا تتاخر علي
ابو مروان بفرح / الحين عندك لا تطلعين لين اتصل عليك
سلوى/ طيب
قفل من بنته وركب سيارته وبعد 10 دقائق واقف بسيارته القديمه قدام الجامعه
اتصل على بنته طلعت سلوى وهي تتجنب البنات خايفه احد يشوفها ركبه سيارة ابوها القديمه فتحت الباب بسرعه وكانها مجرمه خايفه تنصاد بسرعه يبه لحد يشوفنا\
ابو مروان بحب / تو مانورت السياره
سلوى بستعجال / يله امش ليه واقف
ساق ابو مروان سيارته والفرحه مو سايعته اول مره من دخلت بنته الجامعه يجيبها من الجامعه يدري ان بنته متفشله منه ومن سيارته لكن لو بايده صار افضل الناس
عند ركان
دخل الصاله طق الباب ما اسمع رد تاكد انهم سافر حس بضيقه لهم ايام عنده وصار اختلاف كبير بالبيت بعد ماكان ميت رجعت له الحياه
وحس بالكائبه والملل / رجع البيت ممل شكلي بعجل بسفرتي لرياض البيت ما يسوى بدونهم
دخل غرفة ابوه شاف الشغاله عنده انصدم ان نوف تركتها لو يدري انها عند ابوه كان عجل برجعته
ركان بصراخ / اش يسوي هنا
الشغاله برتباك / فيه يندف ارفه
ركان بصراخ افزع الشغاله / هذي الغرفة لا اشوفك فيها ويله طسي
طلعت الشغاله وركان قرب من ابوه يتفقده قرب اذنه من ابوه ارتاح وهو يسمع تنفس ابوه المنتظم
ركان بضيقه / الله يهداها ليش خلت العلة عندي لازم ما تقعد دقيقه بالبيت مالي الا بيت صقر ارسلها لهم
رفع جواله واتصل على صقر
عند صقر
بعد كلامه مع اخته طلع من البيت يدور بسيارته وحس داخله قهر من سلطان شلون يتزوج على اخته لولا امه واصرارها ماكان وافق يزوجها له
اتصل على سلطان وقبل لا يفقد الامل سمع صوت سلطان يرد
عند سلطان
كان بشغله سمع صوت جواله تفاجئ وهو يشوف رقم صقر
بغى يطنش الاتصال لكن مالقى نفسه الا يرد عليه
سلطان بجديه / اهلين صقر
صقر بعصبيه / لا اهلين ولا سهلين
سلطان برعب / الله يهداك وش فيك معصب وش جاك مني
صقر بعصبيه / الي جاني منك انك ما صنت الامانه
سلطان بداء يفهم الموضوع وبخوف / يابن الحلال قبل لا تعصب خل لي فرصه اتكلم
صقر بعصبيه / اذا منى مو مريحتك ومزهقتك عيشتك تعال قول وحنا بنربي بنتنا مو تتزوج عليها وتقهرها
سلطان بصدق / اكون كذاب لقلت انها مزهقتني عيشتي الا كانت مريحتني لكن احيان الواحد ما يعرف قيمة الي عنده الا بعد مايجرب غيره
صقر بصرخه / الكلام هذا ما ينفع بالجوال الليله تجيني واذا اختي لها حق باخذه ما تنظام ام وليد وراسي حي
سلطان كان بيرد لكن صقر قفل مانتظر رده او اعذاره
سلطان بضيقه / الي خفت منه وصار الحين وش بيفكني من صقر اكيد الاوراق كلها هلتها منى قدامه لا منى بنت اصول مستحيل اطلع عيبي عند اخوها
يوم انك داري ياسلطان انها بنت اصول ليش قهرتها وحرقة قلبها بزوجك
عند صقر
لقى اتصال من ركان اتصل عليه
صقر بعصبيه / خير وش عندك متصل
ركان بصدمه / وش فيك معصب
صقر بقهر/ سليطين الكلب قهرني
ركان بضيقه / متصل عليك ابيك تاخذ العله لبيتكم
صقر بصدمه / وامي وش بتسوي ببنت ناصر ناوي علينا
ركان بصدمه / وش دخلها بنت ناصر العله الشغاله ولا بنت ناصر مكانها القلب مو بيتكم
صقر بجديه / وزوجة ابوك ليش ماخذتها معهم
ركان بجديه / وش يدريني اكيد بتحتاجها بترتيب البيت هناك
صقر بتسال / الا وين بتسكن
ركان بجديه / كنت ابيها تسكن فلتي لكن بنتها رفضت وماحبيت اجبرهم
صقر بعصبيه / والله بنت ناصر هذي لو ما كسرت راسها منت برجال
ركان بعصبيه / رجال وغصب عنك وبتشوف اذا ماصارت بنت ناصر تفز لنذكر اسمي
صقر / هههههههههههه يخوفي العكس
ركان بعصبيه / اقول تعال فكني من العله
صقر بجديه / ليش ما تتركها عندكم بتستفيد منها
ركان بعصبيه / اقول تعال اخذها لفتح باب الشارع وطلعها
صقر بجديه / وش تفتح الباب لها ناوي بالمشاكل دقائق واكون عندك
ركان تذكر مبارك وبجديه / كلمت اخوك
صقر بجديه / لا ما تصلت عليه لا جيتك اتصلت عليه
ركان باصرار / لا تتاخر علي والله لو تاخرت لفتح لها الباب ماني متحمل قعدتها عندي
صقر بعصبيه / يالخبل لا تسوي شي من راسك مسافة الطريق وبكون عندك
عند ديما
طلعت برى بالجامعه وعيونها ادور على سلوى بخاطرها تودعها نقهرت يوم مالقتها لبست عباتها وركبت مع سواق مرام وصلتها مرام للبيت
فتحت ديما الباب بمفتحها ودخلت البيت دخلت الصاله شافت امها جالسه مع جدتها تمنت لو انها داخله مع الباب الخلفي مالها خلق لمقابل امها
عند منى
شافت بنتها داخل وباين على وجها الضيقه انعصر قلبها من كره بنتها لها
شافت بنتها تقرب منهم وقفت لها باست امها على خدها بدون نفس وجت بتمشي وقفها صوت جدتها
ام صقر بعصبيه / ما تستحين تسلمين على امك مثل الغريب يمكن تسلمين على الغريب احسن منها اجلسي مع امك مو تطلعين لغرفتك
ديما خانقتها العبره جلوسها مع امها يرجع لها مواجع تتمنى تنساها لكن مو قادره
ديما بصوت مخنوق / يمه تعبانه بطلع لغرفتي
تبي تطلع لغرفتها وتبكي امها الي فضلت الزوج عليها ما تنسى قبل لا تسافر امها كانت متمسكه بثوب امها تبي تسافر معها وامها فكت يدها من ثوبها بقسوه وركبت جنب زوجها وماعتمت بصوتها وهي تبكي كانت تنظر امها ترجع وتاخذها لكن خاب املها
طول ليله تبكي وجدتها سهرانه معها تحاول تخفف عليها ماتنسى ان كل الي بالبت بكو متاثرين من بكاها حتى صقر اخذها ونمها بحضنه بينسيها امها ومن ذاك اليوم وهي حاقده على امها
قطع عليها صراخ جدتها / ديماااااااااااا
منى باختناق / يمه خليها على راحتها لاحقه تجلس معي
مشت ديما ودموعها على خدها بعمرها ما كانت قاسيه لكن تصرفها غصب عنها ياما قررت تفتح صفحه جديده مع امها اذا شافتها رجعت اقسى من اول تدري انها عاقه لامها لكن تحاول تكون باره لجدتها لانها هي امها
وصلت لغرفتها رمت نفسها على سريرها وصارت تبكي بحرقه / ليش جيتي كان جلستي عند زوجك الي فضلتيه علي
تحت
نجود حزنت على ديما الي واضح انها خانقه عبرتها وحزينه اكثر على منى الي تشحذ حب ديما وديما زايد نفورها من امها
منى نزلت دموعها الي فيها يكفيها تكمل عليها بنتها
ام صقر تعرف القهر الي تحس فيه بنتها بسبب صدود ديما لها ما تدري كيف تخفف على بنتها
ام صقر بقهر / الله يحنن قلبها عليك
منى بياس / ماضنتي يمه بيحن قلبها علي شفت بعيونها كرهي و الضيقه من وجودي وش الذنب العظيم الي اقترفته علشان تكرهني هالكثر
نجود بحرقه / منى تعوذي من ابليس مستحيل ديما تكرهك يمكن عتبانه عليك انك تزوجتي وما خذتيها معك
منى بصوت باكي / والله ندمانه اني تركتها قولو شلون بصلح غلطه لها 20 سنه لو الزمن يرجع ما تزوجت ونرت عمري كله لها
وبصوت كله مرار وقهر / يمه بنتي صارت تنخطب ومثلي مثل الغريب اخر من يدري زين منها اذا عزمتني احضر زواجها
نزلت دموع ام صقر / اسكتي يامنى لا توجعين قلبي بنتك ياست منها يمكن لجربت العيال تعرف انها مذنبه
منى بصوت باكي / متى يمه متى
ام صقر بضيقه / ما تدرين يمكن قريب ان شاء الله
منى بصوت باكي / البنت متعقده من الزواج بسبتي شلون بيجيها عيال
ام صقر بحنان / ما فيه شي بعيد عن ربك يمكن ترجع لك وتحس فيك قبل لا تتزوج
( نسومه تقول صح لسانك يام صقر )
عند ركان
بعد ماانهى مكالمته من صقر قرر يتصل على تركي ويخطب شوق منه بالتلفون معاد فيه صبر ينطر لين يسافر عنده
عند تركي
كان متمدد على سريره وبحضنه ولده سمع صوت جواله اخذه من الكمودينه شاف المتصل ركان
تركي بابتسامه / الساعه المباركه انك اتصلت توقعت انك نسيتنا من كثر مانتصل مافي رد
ركان بجديه / الله يبارك فيك شلونك وشلون ولدك واهلك
تركي بجديه / كلنا بخير بشر عنك وعن ابوك واخبار زوجة الشايب معكم
ركان في نفسه / هذا وقته تسال عن نوف
ركان بجديه / كلنا بخير وزوجة ابوي ذهبه مهتمه في ابوي وقايمه فيه
تركي بسخريه / اغلب ضني انها نحاس ولا ماكان تزوجة ابوك
ركان بجديه / تركي اترك عنك زوجة ابوي ابيك بموضوع
تركي بجديه / من اتصلت علي هالحزه وانا داري منت بخالي قول موضوعك
ركان صار ينتفض خوف من ردت فعل تركي من الي بيسمعه حياته متعلقه بموافقة تركي
تركي بستغراب / وش فيك ساكت قول موضوعك
ركان بارتباك وتلعثم / ابي اخطب بنت اخوك ناصر
تركي بصدمه / وش دراك ان عند ناصر بنت بسن زواج
ركان بارتباك / المهم بتقبل فيني زوج لها ولا بترفضني
تركي في نفسه / والله وجت برجلها وبربيك يا شوق خلي امك تنفعك
تركي بجديه / هي لك اذا ربي اراد
ركان ماسمع او ماصدق الي سمعه / ما فهمت
تركي بابتسامه / ترى مانزوج بنتنا لواحد اصمخ
ركان بيوقف قلبه من الفرح / يعني افهم انك موافق واقدر اتقدم رسمي
تركي بجديه / وهذي المكالمه وش تسميها اذا مو خطبه تعال وسو فحوصاتكم وبعدها حدد الملكه
ركان يحس نفسه بحلم مو مصدق ان اموره تسهلت وخوفه ماله اساس
ركان بحماس / بكره باذن الله عندك
تركي بجديه / على بركة الله
ركان بفرح / اجل قيل مابي اخرب عليك قيلولتك
تركي بمزح / وش ينفع هالاكلام بعد ماخربتها
ركان بجديه / يله مع السلامه
تركي فرحان ان ركان صديق عمره خاطب بنت اخوه وفرحان انه بيجبر شوق عليه ومراح يندم انه اجبرها لان مثل ركان مايرد
عند ركان
بعد مانهى اتصاله الا على دخلت صقر
صقر بابتسامه / اخيرا اقدر ادخل بيتكم بدون طق بيبان
قرب منه ركان وباسه على خده وبابتسامة فرح / فرحان ياصقر وفرحتي ما تنوصف
صقر بسخريه / توقعت اشوف تسبح بدموعك من فرقى الحبايب
ركان بفرح / وافق تركي يزوجني بنت اخوه وبكره بسافر اسوي التحاليل وكم يوم وبتزوجها رسمي
صقر جلس وبعدم تصديق / كنت نايم وحلمان ولا الشغاله ضربتك على راسك وصاير تهذري
ركان بابتسامه / حتى انا ماني بمصدق انه وافق علي بسهوله هي وافقت بسهوله وعمها وافق ولا وفوقه مستعجل على الملكه اكثر مني شكل هذا كله نتائج بري في ابوي
صقر بسخريه/ يا لفالح وافق وهو ما يدري ان زوجة اخوه زوجة ابوك لا درى تاكد انه بيرفضك وزين ماشاتك
ركان بقهر / يا ليتني ما خليتهم يسافرون لين تتم الامور على خير
صقر بجديه / ما ينفع ياليت وما ليت اتصل على زوجة ابوك وقولها تسكن فلتك ولا تطلع منها وحرص عليها ما تقول لاحد من تكون لين يخلص موضوعك
ركان بقهر / كيف اتصل عليها
صقر بسخريه / ارفع جوالك واضغط على رقمها وهي بترد عليك وقول لها
ركان بعصبيه / قالو لك غبي ماعرف اتصل المشكله ما عندها جوال ولا فيه رقم اقدر اتصل عليها فيه
صقر بجديه / اجل بدال ما تسافر بكره سافر الحين بالطياره وبتكون هناك قبلهم وقول لهم الي بخاطرك
ركان بضيقه / وابوي شلون اسافر واخليه
صقر برجوله / ابوك عندي بالحفظ والصون وما يحتاج ترجع باجيبه معي
ركان بستغراب / شلون بتجيبه
صقر بجديه / محلوله السواق يسوق باهلي وانا باخذ سيارتك وبصير السواق الخصوصي لابوك
ركان بجديه / طيب شلون بتهتم فيه
صقر بجديه / نسيت اني مبطح عندك 24 واعرف شلون تبدل له وتسبحه يعني اكتسبت منك الخبره
ركان بحب / والله مراح انسى معروفك
صقر بجديه / روح للمطار يمكن تلقى رحله قريبه
ركان بضيقه / ما ضنتي بالقى حجز الصيف كل الرحلات للجنوب
صقر بمزح / اجل بكلم واحد اعرفه بالخطوط يدبر لك مكان لو يحطك مع العفش
ركان بجديه / طيب وش تنتظر اتصل عليه
اتصل صقر على الي يعرفه ومن حسن حظ ركان لقى له حجز مكان واحد من ساعه الغى حجزه
قفل من صديقه / عطني شوي من حظك الي يكسر الحجر
ركان بعصبيه / اذكر ربك لاتتنكسل الرحله
صقر بجديه / اطلع للمطار
ركان بجديه / متى الرحله
صقر بجديه / بعد ساعتين
ركان بصدمه / وش يقعدني بالمطار كل هالوقت
صقر بجديه / اقول احمد ربك وفز روح للمطار ليسبقك احد وتصير من نصيبه السفره
ركان بجديه / وش معجلني برتب شنطتي وشنطة الوالد وبعده اطلع للمطار
صقر بجديه / رتب اغراضك واغراض ابوك بحطهم بالشنط وش وراي
وقف ركان وباس صديقه على راسه عرفان بالجميل
صقر بسخريه / يالاخو تراني مو ابوك ابوك وراي سلم على راسه مو على راسي
ترك صقر وقرب من سرير ابوه وباسه على راسه
والتفت لصقر / صقر ابوي امانه برقبتك
صقر بسخريه / اذا سافرت باكل ابوك واترك لك عظامه لذكرى
ركان بعصبيه / مافيك امل تقلب الجد لمزح ابوي بعد ساعه تغديه وتغير له واذا ماعرفت شي اتصل علي
صقر بسخريه / ما يحتاج اتصل عليك الي يسمعك يقول بنخترع الذره والسالفه كله توكيل وتغير لشايب اقول روح لهفك بجوالي
طلع ركان وبعد ربع ساعه دخل غرفة ابوه شاف صقر متمدد على الكنبه قرب من سرير ابووه باسه على راسه وخده
ركان بحب / يبه بسافر وانت امانة برقبة صقر وبكره ان شاء الله وانت عندي واذا ماجيت جيت اخذك
وقف صقر / اقول تعال سلم علي خنقت ابوك بسلامك قرب من صديقه باسه بحب
ركان برجاء / لاوصيك على ابوي
صقر بطفش / يابن الحلال تراك غثيتني من كثر ما توصي على ابوك لهدرجه شايفني مو تكانه
ركان بجديه / محشوم لكن ماتعودت اسافر بدونه
صقر بغمزه / بنت ناصر قدرت تخليك تسافر مو انا الي ياما ترجيتك نسافر سوى ورافض
ركان بجديه / مالك شغل في بنت ناصر اذا ملكت عليها بقص لسانك لجبت طاريها
صقر بجديه / روح لتطير الطياره بدونك وتجيني تندب حظك
طلع ركان للمطار وصقر رجع يتمدد على الكنبه ينتظر اذان العصر تذكر اخوه
رفع جواله واتصل على رقم عبدالله
عند عبدالله
كان في شقتهم يتغداء مع نايف سمع صوت جواله وقف ودخل الغرفه واخذ شاف رقم اخوه
عبدالله بحب / الووووو
صقر بجديه / شلونك
عبدالله بجديه / الحمد لله
صقر بجديه / خويك جنبك
عبدالله بستغراب / نايف بصاله يتغداء وانا بالغرفه
صقر بجديه / اخوه مبارك توفي ولازم يجي يدفن اخوه
عبدالله بصدمه / شلون مات ومتى مات
صقر بجديه / سالفه طويله لازم يجي الليله او بكره اكرام الميت دفنه
عبدالله بضيقه / ان لله وانا اليه راجعون مدري شلون بقدر اقوله وهو من كم يوم تعب وكان خايف على مبارك كانه حاس
صقر باصرار / قو قلبك وقوله واذا ماقدرت جيبه للجنوب وقوله هنا يمكن تاكون صدمته اخف
عبدالله بضيقه / ما تقدرون تدفنونه بدون حضوره
صقر بعصبيه / وانت بترضى الغريب يدفني وانت موجود
قاطعه عبدالله / الله يخليك لنا ولا جعلني مااذوق حزنك
صقر بجديه / اكيد صديقك ما يبي غيره يدفن اخوه ولو سويت الي تقوله بيلومك وبيزعل عليك
عبدالله بضيقه / الله يكون بعونه
صقر جديه / اهم شي توقف معه وما تفارقه لين ترجعون الرياض سوى الحين بحاجتك اكثر من قبل
عبدالله بحرقه / اكيد بابقى معه يمكن وجودي يخفف عليه مصابه
صقر بجديه / الله يجبر مصابة ويبرد على قلبه
عبد الله بضيقه / امين
صقر بجديه / يله مع السلامه وانتبه لصديقك
عبدالله بضيقه / ا ن شاء الله مع السلامه
رمى جواله على السرير وتمنى لو انه ما قام يرد على اتصال اخوه
طلع لصديقه الي جالس ينتظره على الغداء جلس عبدالله بضيقه على الكنب وعيون صديقه عليه
نايف بستغراب / ليش جلست عندك تعال كمل غداك
عبدالله وعيونه على صديقه كمل غداك شبعت
نايف لاحظ الحزن على وجه صديقه وقف وجلس جنب صديقه
نايف بقلق / من الي متصل عليك وقالب لك مزاجك
عبدالله بحزن / اخوي صقر
نايف بستغراب / الي اعرفه لتصل عليك صقر تصير الابتسامه من الاذن للاذن
عبد الله بضيقه / يبيني اسافر للجنوب
نايف بصدمه / تسافر للجنوب وش صاير عندهم
عبدالله بتصريفه / قال تعال الليله الجنوب واذا وصلت بتعرف
نايف بجديه / بتسافر لحالك
عبدالله باصرار / وجودك ضروري معي
نايف بستغراب / وجودي معك ضروري ليش
عبدالله بضيقه / خلك من الاسئله وجهز اغراضك وبدخل اجهز اغراضي وبنطلع للمطار اذا لقينا رحله ولا سافرنا بر
نايف بجديه / سيت ان بكره عندنا مدرسه
عبدالله بعصبيه / بطقاق المدرسه السفر اهم
نايف بشك / قلبي يقول ان صقر قايل لك شي وماتبيني ادري عنه
عبدالله بضيقه / يا لاجودي ليش تحن وتبي تعرف لوصلنا اكيد بتعرف الله يرحم غالينك اخلص علي
دخل الخوف لقلب نايف وافكاره صارت توديه وتجيبه خاف على اخوه
نايف بخوف / احلفك بربك مبارك فيه شي
نزل عبدالله راسه
فز نايف واقف وبرعب / مبارك وش فيه
وقف عبد الله وقرب من صديقه وحضنه يبي يكون قريب منه لقال له عن وفاة اخوه يتمنى يشاركه حزنه
عبدالله بصوت حزين / ترحم على اخوك مات امس وينتظرونك تدفنه
نايف صار ينتفض بحضن صديقه الي حضنه بقوه صار يبكي بنحيب / مبارك مات وهو زعلان علي مات وانا ما شفته وارتمي عند ارجوله اطلبه يسامحني
عبدالله ودموعه خانتها / اهدء الله يخليك لايصير فيك شي
نايف بصوت باكي موجع / تفهم وش معنى اخوي الوحيد يموت وهو زعلان علي الله يلعنها الفلوس الي فرقتنا خله يرجع وياخذهم ما ابيهم
عبدالله بصوت باكي / يابن الحلال لا تنهار اخوك بحاجتك ولا تبي غيرك يدفنه
نايف بصوت باكي / لا حد يدفنها ابي اشوفه واستسمح من ميت يوم ماقدرت استسمح منه حي ابي اشوفه واودعه
سحب نفسه من حضن صديقه ووجه مختنق وصوت بكاها يفجر المكان / مبارك مات معاد لي سند بهالدنيا
عبدالله بدال مايخفف عن صديقه صار يبكي على حاله وبصوت باكي / لا تقول هالكلام انا سندك وعضيدك واخوك واذا ضاقت فيك الدنيا تلقاني على يمناك دخيلك نايف قوي نفسك وطلب له الرحمه
نايف يبكي بحرقه / قوتي اخذها مبارك وراح اااااااااااااه يا عبد الله اخر اهلي مات ابوي مات وامي ماتت وبعدهم اختي والحين لحقهم مبارك ليش عايش ليش مالحقهم
عبدالله يصرخ بوجه صديقه / لا تكفر يا نايف بعتراضك على قضاء ربك قال ربك (الذين إذا أصابتهم مصيبة قالوا إنا لله وإنا إليه راجعون أولئك عليهم صلوات من ربهم ورحمة وأولئك هم المهتدون )
نايف بصوت باكي / استغفر الله يله مشينا
عبدالله بصوت باكي / بناخذ لنا اغراض تكفينا اليومين الي بنجلسهم هناك
بدون رد مشى نايف من قدامه وفتح باب الشقه نازل تحت
عبدالله بصدمه / نايف انتظرني
دخل الغرفه وسحب لهم كم ثوب من الدولاب وشالهم بمعاليقهم وسحب لهم ملابس خاصه وشالهم بيده ما عنده وقت يرتبهم بال شنطه طلع من الشقه يركض بيلحق على صديقه شافه واقف عند سيارتهم
قرب من السياره فتح الباب الخلفي ورمى الملابس وفتح لصديقه الباب دخل نايف وصوت بكاه يغطي على هدوء المكان ركب السياره وقلبه منفطر حزن على صديقه
عند شوق
شوق برجاء / سالم والي يعافيك مر مطعم وطلب اكل سفري تراني من غداي امس
سالم بجديه / من وين المطعم بها البر
شوق بضيقه / والحل اموت من الجوع
سالم بجديه / بعد ساعتين بنمر محطه بنعبي بانزين ونشتري لش سندويشات تسد جوعك
نوف بحنان / سالم وقف على جنب
شوق بضيقه / ليكون تبين الحمام وشلون بتغسلين بهالبر
نوف بابتسامه / لا اختك مسويتها وابي اغير لها ولا تبين تنكتمين من الريحه
شوق بجديه / يوقف ارحم ما يكفيني منخنفه بالنقاب تكمل علي بريحتها الخايسه
سالم بجديه / شريف وقف جنب الخط
وقف شريف ونزلت نوف شايله بنتها وشنطتها
وفتحت شوق الباب
سالم بستغراب / وانتي ليش نازله
شوق بابتسامه / باطلق رجولي
نزلت شوق عند امها الي باسطه مفرش بنتها على الارض وتغير لها
سمعت صوت اخوها ينادي طالعته شافت جوالها بيده
سالم بجديه / خذي جوالك ازعجنا
قربت من اخوها اخذت جوالها شافت رقم عمها شكله مصر انها ترد ركضت عند امها ورمت الجوال عليها
شوق برجاء / يمه عمي تركي متصل ومالي خلقه صرفيه
نوف بحقد / ما تبين تردين عليه طنشيه
شوق برجاء / عمي شاب مني ومابي يزود كلميه وقولي له اني نايمه طالعه
نوف مدت لشوق البنت واخذت منها الجوال / الله يعيني على لسان عمك
عن تركي
بعد ما قفل من ركان وهو يتصل على شوق لكن مافي تغطيه وارتاح وهو يسمعه يدق كرر اتصاله اكثر من مره لازم ترد عليه
سمع انفاس بدون كلام وبجديه / الو شوق
نوف بجديه / معك امها وش تبي فيها
تركي بقرف / وانتي وش يدخلك بينا يالفيله
نوف لما سمعت الفيله ماقدرت تمسك نفسها / هههههههههههه
ماتدري ان ضحكتها اربكت وتكهرب منها تركي وقفل جواله بدون شعور
مدت الجوال لبنتها
شوق بستغراب / مسرعها امانتهت المكالمه وبعدين وش قال لك عمي واخلاك تضحكين
نوف بابتسامه حزينه / قال فيله لقب جديد من عايلتكم الكريمه
قربت من امها وحضنتها / الا غزال والغزال منك يغار
نوف بحب / امشي تاخرنا على سالم وبعدين اذا ا تصل عمك انتي الي تردين عليه واذا ما تبين تردين عليه طنشينه لا تعيدين حركتك هذي
شوق بجديه / ان شاء الله
عند تركي
ما يدري وش فيه يوم سمع ضحكتها / الله يا خذها ما يكفي صوتها العذاب تكمل بضحكتها الي ادمر
وش فيني من سمعت ضحكتها ضاعت علومي والله كنت ناوي اشرشحها لكن ضحكتها ضيعتني
وبعدين الخبله اسبها وتضحك صدق ماعندها احساس
الحين متى يمديها شوق تجي وتسوي فحوصاتها وتصير ملكتها لجاء ركان
الله ياخذ امها الي ردت وهبلتني
انتبه يا تركي الحرمه صايعه ومتزوجه وفوقه عجوز وفيله لا يصير فيك ماصار لناصر لا انا غير وناصر غير مستحيل التفت للعجوز
وبقلبي غيرها الي كرهتني بصنف الحريم اااااااااااااااااااااه ياليت اقدر اشيل صورتها من راسي كان عشت براحه
لما تذكر نوف الحبيبه زاد كره على نوف العدوه رفع جواله واتصل مره ثانيه على شوق لكن انقهر انها خارج التغطيه
تركي بعصبيه / الله يا اخذها ماصدقت يشبك الخط تجي ترد الحين يبي لي وقت لين يشبك معي لخط
لنا لقاء اذا مو الخميس باذن الله الجمعه
اختكم نسايم نجد
|
14-11-11, 02:33 PM
[/COLOR]
جديد مواضيع قسم الارشيف
العرض العادي
