كاتب الموضوع :
دهــن الــعــود
المنتدى :
الارشيف
السلام عليكم
مساء الخير للجميع آسفه على التأخير
وآسفه بعد على اللي صار اليوم لكن ان شاء الله انه مايتكرر
البارت القادم ان شاء الله بكره
وشكراً للمراقبات جد على اهتمامهم بس(نوف بنت نايف)ترا خفت يوم شفت فيسش اللي معصب آسفه لاني عصبت بش
اتمنى لكم قراءه ممتعه
البارت الواحد والثلاثين
.....................................
في مدينة الضباب
لطام وهو يشاهد التلفاز وعقله مع من تختبئ في الغرفه منذ ذهبا والداها
لطام وهو يهمس بضيق:الله يدبل كبدها من يوم راحو وهي ضايقه والله لو انها تدري ضيقتها وش تسوي والله ماتضيق كذا
وقف وهو يتجه للغرفة
فتح الباب ليجدها متمدده وتغطي جسدها النحيل بالغطاء
لطام وهو يجلس على طرف السرير امامها:وش عندش معتكفه
شاهه بضيق:تكفى لطام خلني في حالي
لطام وهو يضع يده على جبينها:مانتيب حاره اجل ليه متلحفه كذا
شاهه بهدوء غريب:لطام لو سألتك بتجاوبني
دب في قلبه القلق من سؤالها:على حسب
شاهه بزعل:خلاص اجل مانيب ساءله
لطام وهو يمسك بكفها الرقيق وهو يبتسم:لا قولي بجاوبش
قذفت حروفها وهي لاتعلم مدى خطورتها:تحبني يالطام
اكفهر وجهه ليصد:شفتي ان سؤالش بايخ مثلش
شاهه وهي تمسك بيده وترخي اهدابها بخبث:وان قلتلك تكفى رد علي
اعتدلت وهي تلح عليه:تكفى لطام خلني ارتاح
لم يجبها سوى انه ضمها بقوه الى ان اسكرها وسكر معها
ثم ابتعد بهدوء:ها عرفتي انا احبش ولا لأ
شاهه وهي في احضان سكرها العذب الذي كرهته هي:لا ابي اسمعها منك
اقترب منها ليضع فمه عند اذنها فيقول بحالميه وصوت يجره من اعماقه:اي والله احبش احبش من عادش تشبحين في الوجيه مستنكرتها ...... حبيتش وانتي في اللفه وحبيتش وانتي تلعبين في حضني وحبيتش وانتي كارهتني عقب اللي قلته وحبيتش وانتي مره وحبيتش وانتي ذاالحين مرتي وش عاد تبين
ابتعدت وكأنها في غيبوبه اغلقت عينيها وتمددت وخبأت نفسها في الفراش بهدوء وهي تقول له بهمس:لطام الله يخليك اطلع وخلني لحالي
وقف وهو ينظر لها بغضب اهذا جواب اعترافي
الهذه الدرجه هي عاجزه عن تقبلي
خرج وهو يتركها خلفه في حالة ندم وخوف منه وعليه و خضوع
وكل تلك المشاعر هي تنبذها
............................................
في بيروت
ناصر وهو يجلس مع وضحه في البلكونه
ناصر بروقان:وضوح
وضحه وهي تشرب من القهوه التركيه:لبيه
ناصر:ترانا بنعود عقب اربعة ايام
وضحه بضيق:ليييييه
ناصر بتبرير:وش اسوي تخرج العوال ولا كان قعدنا اكثر
وضحه:مره ثانيه نقعد شهر ولا شهرين
ناصر وهو يبتسم بحب:نقعد كثر ماتبين
ابتسمت وصمتت لانها مشغولة الذهن حالياً بموضوع لوتحقق سيتغير مسار حياتها كلياً فهي متلهفه له
........................................
بعد مرور يومين
كانت تجلس بهدوء في الصالة فهما منذ آخر لقاء لهما اصبحا يتحاشيا بعض
حتى في جلسات العلاج كان يقف في خارج الغرفه ينتظرها الى ان تخرج
لطام بهدوء وهو لم يزيح عينيه عن التلفاز:عاجبش حالنا كذا
ظهرت على فمها ابتسامه ماكره صغيره خافيه عن ناظريه:انت اللي حاط الحواجز
نظر لها بصدمه:انا؟
شاهه بابتسامه:ايه انت ولا انا صراحه راضيه كل الرضا عن اللي صار
ابتسم لها بحب:ايه ضمنتيني في مخباش
ضحكت بفرح:ههههههههههه زاكثر بعد
امسك بكفها:تدرين عاد لاضحكتي احس الدنيا كلها تضحك
صمتت بخجل:لطااااام
نظر لها لفتره فهو يعشق التأمل في ملامحها
نظرت له باستغراب:طيب بما انا حنا قاعدين ورايقين كذا عطني علومك
ضحك بقوه:هههههههههههههههههه وش علومي اللي بتعرفينها
شاهه:يعني وش تحت وش تكره وش سويت طول ذا السنين وش دوامك وغيره
لطام وهو يبدأ بالشرح:هذا ياطويلة العمر دوامي من سبع الى ثنتين اما وش سويت طول ذا السنين هذي حددي وانا اجاوب
شاهه وقد بدأت بالسؤال عن اشياء كثيره ومتعدده وهو يجاوبها بين ابتسامه ونظره حب
وبعد مرور ساعتين
لطام وهو يمسك بيدها ويسحبها لتقف:يالله قومي نرقد بكره عندش آخر جلسه
ابتسمت بفرح كبير:ليه ماقلت لي
ثم اردفت:يعني بنعود بسرعه
لطام بنبره عاتبه:ليه ماودش تقعدين معي لحالنا ترانا ماخذينا شهر عسل يكفي ان حنا ماسوينا عرس
شاهه بخجل:لا ودي بس
اصمتها وهو يسحبها لغرفتهم ليعبر لها عن حبه بعمق
......................................................
في الدوحه
فقد مر يومين بكل هدوء منذ وصولهم
كانوا يجلسون امام القهوه
ام سعد بتعب:عليا يامش تعالي حلليني احس اني تعبانه
عليا وهي تقوم بسرعه لتأتي بجهاز تحليل مرض السكر ثم بدأت تحللها
عليا بعتب وضيق:يمه جعلني قبلش وش ماكله سكريش ثلاثميه وعشرين
ام سعد وهي تراها تذهب لتحظر الابره:هفت نفسي على رهش وكليت منه
عليا التي تجلس بجانبها:الله يهديش يمه رهش عاد انا الظاهر اني بحذف ذا الرهش اللي رفاع سكريش دايم
ام شاهه التي يجلس ضيدان في حضنها ويلعب مع حصه بيديه:لا تاكل بس اللي يرد شهوة خاطرها يعني ملعقه وحده كافيه
حصه بعتب:عاد جدتي فديتها لوانها ترضى بملعقه كان اشوا لازم خمس ست ملاعق
نزل ابوضيدان من الطابق العلوي متوجه للمجلس
اقبل ليقبل رأس والدته:مسا الخير
الجميع:مسا النور
قفز الصغير ليجلس في حضن والده:بابا يالله نلوح
ابوضيدان بابتسامه:وين
ضيدان:دوانيه
ابوضيدان وهو يعلم لما هو يريد الذهاب:ليه وش تبي في المجلس
ضيدان:عسان فحاد اليوم يدي
عليا:يوووه صدعنا من اليوم وهو يالله يالله يبينا نوديه المجلس يقول فهاد جا
ابوضيدان:ماشفتووه يوم دخل ولاعينه في المجلس كش وجهه وطق
ام سعد باستغراب:ليه ماشافه الى ذالحين
ابوضيدان:لا هو في التدريب عشان التخرج وتوهم مطلعينه اليوم نص يوم وبيعود
ام سعد وهي تدعي لهم بقلب صادق:جعل ربي يوفقهم فهاد ابن نوره وفلاح ابن صيته
الجميع:آميين
ام شاهه بصوت خافت لخجلها منه امام اهله:ابوضيدان ابي اروح السوق انا والبنات
اومأ برأسه بالموافقه
نظرتا حصه وعليا في بعضهما لموافقته بهذه السهوله
ضحكتا بصوت خافت
ابوضيدان وهو يخرج البوك ليمد مابه لام شاهه:هاش ولاتقصرون بشي على حصه
ام شاهه بخجل:يابن الحلال معي اللي يكفينا
ابوضيدان بحزم غاضب:اقولش اخذي انا راعي البيت مهوب انتي
اخذت الفلوس وهي خجله بشده
وقف متجهاً هو وصغيره للمجلس
اوقفته ام سعد بابتسامة فرح:قل للمصدوع ونهار لاملكتو يدقون علي
هربت تلك الخجله
ليقول ابوضيدان بضحكه:ههههههه ابشري يمه
خرج لتقول ام شاهه:يالله ياعليا قومن اجهزن عشان نمشي ماعاد به وقت
علاي وهي تقف:ابشري
التفتت ام شاهه لام سعد:يمه تروحين معنا
ام سعد بتعب:لاوالله يامش مافيني حيل
ام شاهه وهي تتجه لتأخذ عباءتها :اللي يريحش يمه
.................................................
في مجلس الرجال
دخل ابوضيدان ليقول بصوت جهوري:سلام عليكم
الجميع:وعليكم السلام اقبل فهاد وفلا ونايف للسلام عليه فهم لم يروه الا اليوم
فهاد وهو يحمل الصغير :هلا هلا بالشيخ خشمك خشمك
الصغير وهو يقبل خده بقوه:لا خسمي لا
ضحك الجميع
اتجه به ليجلس بجانب الجد:يايبه انت شفت مثل ذا الصبي يايبه
الجد وهو يقبل الصغير:يابيك مازينه في عينك الا الغلا
فهاد وهو يتفحص الصغير:انتو تاكلون عشاه
ابوضيدان وهو يضحك:ههههههههه لا بالله هو اللي ياكل عشانا
فهاد:لا لا ضعفان
ابوضيدان:يتراوا لك بس ذبحته الشطانه يجري ويطمر
فهاد وهو يضمه يقوه:اشتقتلك
الصغير بعتب طفولي:انت وين
فهاد:انا في الدوام
الصغير:حيوان الدوام
فهاد:ياناس ويلوموني لاحبيته
فلاح وهو يدخل ويتبعه الشيخ:السلام عليكم
رد الجميع السلام وبدأوا بالمراسم
...........................................
في منزل ابوناصر
جواهر وهي تتكلم في التلفون:انا بفهم انتي شفيف متنحه
الطرف الاخر بكسل على غير العاده:مالي خلق جوجو صدقيني تعبانه
جواهر بعتب:دلول لاتصيرين سخيفه ويالله تعالي والله نايف طالع ولاهوب جاي الا الساعه وحده
دلال بضيق:الا انتي اللي تعالي
جواهر وكانها اعجبت بالفكره:خلاص اشوف امي واقولش
دلال:اوكي يالله باي
ثم انهتا المكالمه
تشعر بضيق لاحدود له منذ اخبرها جدها وهي تود البكاء ولكنها ترى انه لاداعي للبكاء
اخذت هاتفها للتصل بمن تشاركها حتى قلبها
ضغطت الازرار وبعد ثواني اتاها الصوت المعشوق لها :ارحبي ياعروس الدوحه
دلال بابتسامه بارده:هلا والله شلونش
وضحه باستغراب:انا طيبه انتي شفيش
دلال وهي تتنهد:امممم ولا شي متضايقه شوي
وضحه بقلق:اشفيش امي فيها شي انتي فيش شي جدي ابي فيصل فيكم شي
دلال بهدوء:لايابنت الحلال مافينا الا العافيه
وضحه بحيره:اجل شفيش
دلال وقد هربت منها القوه والصمود طوال تلك الايام وانحد صوتها لبكاء:وضحه انا ماابي نايف
وضحه بصدمه فهذا الامر مسلم به منذ صغرهم فلما تنفر منه الان:ليه وش فيه نايف
دلال بترير:وضحه انا مااحس نايف الا اخي والله مااعده الا كذا
وضحه بهدوء:دلول اسمعيني انتي الحين تشوفينه اخيش بس لارحتي عنده وعاشرتيه وعودتي نفسش على ذا الشعور صدقيني بيصير كل ذا الحب لحب زوج بس حاولي جربي يادلول صدقيني بتنجحين انا واثقه فيش
بعدين قول لي وش فيه نايف رجال وكفو ولاشايفه عليه شي
دلال ببكاء شديد:لا الظليمه شينه
وضحه بألم:طيب لاتبكين كذا هدي
دلال وهي تحاول ان تهدئ:ان شاء الله
وضحه اردفت:بعدين اذا شفتي نفسش خلاص ماعاد تقدرين قولي لا والله مايغصبش لاجدي ولا ابي فيصل وانتي داريه
دلال وهي قد هدأت:ادري جعلني ماذوق حزنهم
وضحه:اجل ريحي عمرش الموضوع كله بايدش
دلال بحيره باكيه:بس ياوضحه مابي ارد جدي والله لو انش شفتيه وهو يقولي كأنه يقول تكفين خليني ارتاح واتطمن عليش
وضحه:يابنت الحلال العرس مافيه غصايب بعدين من اللي بيعرس انتي ولا جدي يادلول العرس عمر لاسنه ولاسنتين ولاعشر حطي قدامش انه انتي ونايف الين يموت حداكم عقب عمر طويل وصدقيني انا لو مكانش مانيب راده نايف
دلال:هذا اللي ذابحني بيقولون ليه عيت من ولد عمها اللي ماينرد
وضحه بعصبيه:وانتي شعليش منهم من تتبع حكي العرب ضاع
دلال بحيره ومتاهه:طيب وضحه شوري علي وش ارد وش اقول لوبغيت اعيي
وضحه:قولي الصدق انش ماتشوفينه الا اخيش
ثم اردفت وكأنها تنبهها:بس ها ترى نايف قرع من دون ولدآل دبيس يعني لاتهقين انش بتعرسين الا بشوره
دلال:انا ماهمني اعرس الاهم اني مابي تخرب اخوتي انا وياه بعدين انا صراحه احس ان نايف نفسي فحرام نظلم انفسنا
وضحه:خلاص انتي استخيري واللي ربي كاتبه بيصير
دلال وهي تمسح دموعها:ان شاء الله يالله ازعجتش وشايبش عندش يالله مع السلامه
وضحه:الله يحفظش سلمي على امي وجدي والجميع
ثم انتهت المكالمه
اتجهت لوالدتها
كانت تجلس في الصاله واماها قهوتها
دلال وهي تجلس بكسل:سلام عليكم
ام وضحه وهي تتفحصها:وش فيش
دلال:مافيني شي يمه
ام وضحه وهي تشير بجانبها:تعالي تعالي جنبي والله ان به علم بين جنوبش
جلست بجانب والدتها:هلا يمه
ام وضحه وهي تضربها بخفه على كتفها:ها يادليل كبرت وخرفت وماتبين تقولين لي وش فيش
دلال وهي تقبل كتفها:لا جعلني فداش بس متضايقه شوي
ام وضحه بتخمين متيقن:عشان موضوع الخطبه
صمتت فهي ان تكلمت بكت
ام وضحه بتنهد:آآه اسمعي وانا امش اللي ربش كاتبه هو اللي بيصير هذا اول شي ثاني شي انتي وش تحسين وش تبين وترا ماحد بغاصبش على شي واهم استخيري وشوفي وش يصير
دلال:يمه انا استخرت وانا موافقه
ام وضحه وهي تضم تلك الباكيه:جعله مبارك وجعلش عليهم من الملافي الخضر قولي آمين
لم تسمع سوى صوت بكاءها ابعدتها لترى وجهها
ام وضحه بقلق شديد:وش فيش ماتبينه
دلال وهي تبكي:لايمه بس احاتيش لارحت من اللي بيقعد عندش
ام وضحه بفرح:يابنت الحلال انا في بيتي وهندياتي عندي ولاعلي الا العافيه
.....................................
انتهو من الاجراءات
بدأ الجميع بالمباركه
ابوضيدان:فلاح نهار دقوا على جدتكم
فلاح وهو يخرج :الا بروح لها
ابوضيدان وهو يلحق به ليمسك فيقول له بضحكه:هنا هنا يافليح من اليوم ورايح ماتعتب باب البيت الى يوم العرس
ضحك الجميع
فلاح بصدمه:والله ماطرا علي اللي طرا عليكم
ابوضيدان وهو يعود للجلوس:انا علمتك
فلاح وهو يجلس ويخرج هاتفه:انا اعلمكم بس خلوني اعرس
ابونهار:ابولطام متى تبون العرس
ابولطام:متى مابغيتوه
ابونهار:اجل عقب عرس فلاح بشهر
الجد:لا وش هو له تخسرون ذا العوال العرس مع عرس فلاح
ابوفيصل:ياخيك كاعلينا قاصر خل كل منهم يعرس في يرم
ابوسعد:لا انا قلت العرس مع عرس فلاح
ثم التفت لنهار المبتسم والراضي كل الرضى عن هذا القرار:ها يانهار وش تقول
نهار بابتسامته الفخمه:فلوسي جاهزه وانا مانيب ظاهر من شورك العرس مع عرس فلاح
ابوسعد بابتسامه:خلاص هذا المعرس بنفسه قال العرس عقب شهر بلغوا العرب
ابونهار:خلاص اللي تشوفونه
ابوسعد وهو يهمس لابوفيصل:وانتو متى عرسكم
ابوفيصل:بنيت محمد مابعد ردت
ابوسعد بصرامه:لااحد يغصبها خلوها على راحتها
ابوفيصل بحب:مافيها شكه بس لابغيت الصدق انا ودي انها تاخذه احاتيها ياخيك كلت قلبي المحاتاه الوضيحي عند ناصر وكنها في حضني اما نايف مايظهر اللي وراه ودليل ادنات ماحسها(ادنات=اقل شيئ)
ابوسعد:ماعليك ولد عمها ولاهوب ظايمها ان شاء الله
ابوفيصل:ان شاء الله
................................................
في اليوم التالي في لندن
شاهه وهي تقترب منه
لتهزه بخفه:لطام لطام يالله قوم
لطام وهو يبتسم وهو يخبئ وجهه في الوساده:وش تبين بلطام
شاهه:هههههههه ابي اشوف عويناته
التفت لها ليعتدل:يابعد لطام انتي تعالي
شاهه بدلع:لأ انت اللي تعال
لطام وهو يرفع حاجب:اقولش تعالي
شاهه وهي ترجع بظهرها للباب:وانا اقولك تعال
فاجأها وهو يقف ويتجه لها بسرعه وخفه لم تتوقعها
امسك بها:ها هذا انا جيتش وش تبين
شاهه وهي تبعد يديه:مثل اللي كنت تبيه مني
قبلها بقوه ليقول لها :هذا اللي انا ابيه
ضربته بخفه في كتفه:قليل ادب انا ماقصدت كذا
دفعته وهربت للخارج
لتتعالى صوت ضحكته التي ايقنت ان قلبها يرفرف عند سماعها
بعد مرور الوقت خرج وهو يرتدي بدله انيقه
لطام وهو يقبل خدها:صباح الخير
شاهه وهي تمد له اطباق الفطور:صباح النور والسعاده
ثم اردفت:يالله ياشاطر ود هذولي على الطاوله
لطام وهو يضحك:آخر عمره اجدل المواعين
شاهه بضحكه:هههههههه عادي حبيبي تصير بأحسن العايلات
اتاها وفي عينيه نظره ماكره:حلوه حبيبي منش
شاهه وهي لم تدقق في كلمتها فقالت بخجل:ترا ماقصدت اللي في بالك هي اصلاً طلعت عفويه
لطام وهو يأخذ منها باقي الاطباق:وهي احلى وهي عفويه
اتجهت بىخر الاطباق للطاوله:خلص خلنا نتريق ورانا موعد
جلسا على الطاوله
لطام بهدوء:ودي اسمعها وهي من قلبش
شاهه في نفسها:والله ان تبطي
شاهه بخجل:صدقني هي بتطلع من غير شعور لانها راح تكون من القلب
لطام وهو ينظر لها بنظرة الحب والتهديد:تدرين اني ممكن اذبح اللي ياخذش مني حتى وان كنتي انتي
شاهه بينها وبين نفسها:لاتقول كذا تكفى لاتعاون قلبي علي خلني اصمل فيك ماب اهدم كل اللي سويته
شاهه بصوتها العالي:يووه يلطام على كذا بنتأخر
لطام وهو يبدأ بالاكل:ايه انتي عاد اليوم شفقه على الموعد
شاهه:هههههههه مثل شفقتي على امي وابي
لطام:هههههههههههه
.................................................
بــــــــــــــــــقــــــــــ شــــــــادن لــــــــــــــــــم
|
18-06-11, 08:55 AM
جديد مواضيع قسم الارشيف
العرض العادي
