كاتب الموضوع :
دهــن الــعــود
المنتدى :
الارشيف
السلام عليكم
صباح النور على الجميع
اليوم جيت ببارت راح تتغير بعده موازين الروايه
راح تتغير مسارات حياة جميع الابطال
اما شكري وتقديري هالمره لكل من فادني بخصوص بدو البحرين واقولهم ماقصرتو لاهنتو
انا قدمت البارت البوم عشان عندي اختبار يوم الاحد بس فيه بارت يوم الثلاثاء والسبت مثل موعدنا
اتمنى لكم الاستمتاع بالبارت
توكلت على القادر البصير
البارت الثاني عشر
.........................................
دخلت غرفتها وهي تحمل حذاءها في يدها
ماان فتحت الباب ودخلت حتى دخل هو خلفها مباشرة
ناصر بن فيصل بصدمه:كنتي لابسة كذا عند العرب
وضحه وهي تظهر القوة بينما كانت ترتعش خوفاً منه فهو لايحب هذا النوع من اللبس:ايه ....عادي كلهم نسوان
ناصر بغضب:وجهش مافيه حيا مظهره سيقانش وعضودش وصدرش
وضحه بندم لم تبينه:ناصر الله يهداك هذا لبس النسوان في العشيات عادي
ناصر وهو يقترب منها ويصرخ:لاتقولين عادي مهوب عادي انتي ارتكبتي الحرام والعيب
وضحه بخوف تتقي بيديها ضرباته القادمه:طيب خلاص ماراح البسه مره ثانية
ماان رأى حركة يديها التي آلمته
اقترب منها حتى اصبح بينهما سنتيمترات قليلة
هتف لها برقة وحنان والم:وضحه شفيش مانيب ضاربش
نظرت له بخوف ثم انزلت يديها ببطء ثم انزاحت لسريرها لتجلس عليه بهدوء
اما هو فقد وقف ينظر لعينيها التي يعشقها بألم لما وصلت درجة التعقيد بينهما
اقترب منها :وضحه انتي عاجبش اللي حنا وصلنا له
وضحه وقد اصبحت في منتصف دوامة البكاء:انت اللي وصلتنا لذا الدرجه
ناصر بهدوء:طيب انا ابيش ذاالحين تظهرين اللي في خاطرش كله
وضحه وهي تبكي حسرة لهذا النفور بينهما فهي لاتستطيع ان تستغني عنه لثانية واحد فكيف بعد مرور عام كامل على فراقهما لتفجع بعد ذلك انه قد اغلق حصون قلبه عنها
وضحه وهي تشههق اثر بكاءها:وش تبيني اقول تبيني اقولك اني تحسفت عدة شعر راسي على اللي سويته وعقبه فجعتيني بعرسك علي مرتين متاليات ولا اقول اني اموت كل ماشفت خالي وجدي اللي كذبت عليهم وقلت لهم انك طلقتني عشان ماخليهم يحسون خاطرك
ثم صمتتت ماعادت قادرة على اكمال كلامها
اقترب ليضمها لكنها ابعدته عنها بعنف
وضحه بقوة منبعثه من مصدر الاوجاع:اللي صك قلبه عني مالي حاجه فيه
ثم تركته وخرجت للغرفة الاخرى في شقتها التي لاتحوي سوى سرير
...............................................
في ذات المنزل لكن في الاسفل
ابوناصر بعد سلامه على بنات شقيقته:اربكن بتمسن عندنا
شاهه:ايه فديتك
ابوناصر بصدق:يامرحبا وانا صادق
عليا:المرحب باقي جعلني قبلك
عليا وهي تميل على حصة التي تستكين بجانبها:حصوص شكلش منتهيه من التعب
حصه وهي تدعك عينيها بخفة:اسكتي عيوني طبقت
عليا:قومي روحي نامي
حصه والنعاس قد تمكن منها:تبيني اروح وانا ماأدل المكان
عليا :خلي شينة الحلايا بنت خالش تدلش المكان
حصه:عليا جنبي بنت العرب
اصمت الجميع وقوف الجد وابنه
ام شاهه:هايبه قدك بتسري
الجد:اي والله يابيش قدني تعبان برقد لي شوي عشان اقوم اتهجد
ام شاهه بحب:جعل ربي يسخيلك بالعافية.........وانت ياختك بتسري بعد
ابو ناصر:ايه يخيش وراي مغباش الصبح عندي مراجعات
ام شاهه:الله يقويك
جواهر وهي تقف وتقبل والدها جدها بدلع:تصبحون على خير
والدها وهو يقبل خدها:وانت من اهله يامي
الجد:وانتي من اهله يابيش
ثم ذهب الاثنان باحثان عن الراحة
ام ناصر وهي تقف:يالله تصبحون على خير
الجميع:وانتي من اهله
ام شاهه:اقعدي شوي
ام ناصر:لايابنت الحلال اقعدي مع بناتش وانا بروح لشايبي
ام شاهه وهي تبتسم:دامش بتروحين لشايبش اجل ماتشوفين شر
ام ناصر وهي تبتسم:طيب تبون شي
ام شاهه:سلامتش
ذهبت ام ناصر لتختلي ام شاهه ببناتها الاربع
عليا:يمه
ام شاهه:لبيه
عليا:حصوص تبي ترقد
ام شاهه وهي تمد يديها لحصة:تعالي ارقدي في قلبي
عليا:يمممممممممه لاتدلعينها كذا وانا قاعدة
ام شاهه وهي تضم حصة التي جلست بجانبها:انتي على الاقل خذيتي الدلع شوي ولا واجد اما هي ماذاقته
جواهر وهي تقف بغضب بسيط:يمه انا بروح ارقد تبين شي
ام شاهه وقد رأت في طفلتها ماأحزنها:والله ماتروحين الين نسري كلنا مع بعض
جواهر بحزن:يمه تكفين استغفري وانتي في مكانش قدني تعبانة وبروح ارتاح
عليا بنغزة:جواهر الله يهداش تفجرين امممي(اكدت على نطق كلمة امي لكي تريها انها ليست والدتها)
جواهر بنغزة لاتخلو من الغضب:انا وامممي ننجاز
عليا وهي قد اتتها الفرصة لكي تقول ماخبأته في صدرها:اللي حطها امش ويش هو
جواهر بغضب:امي غصب عنش
علي بغضب مماثل:اقول لاتصدقـــ
قاطعتها امها بصوتها الحازم:جواهر عليا الظاهر انه مالي حشمة ولاقدر عندكن
جواهر:الحشيمة لش يمه
عليا وهي تقف بعصبية:لاتقولين يمه ماهيب امش
ام شاهه وهي تقف بجانب عليا:عليياااا ولاكلمة زيادة
ثم اردفت وهي تنظر لابنتها بغضب:انتي بنتي اللي جيتي من بطني لكن جواهر بنتي وبنت اخي اللي انا في خيره وفوق ذا كله هي بنتي اللي ربيتها يوم بيوم وسنة بسنة ومن مس بنتي كنه مفقع عيوني
كانت تنظر لوالدتها بصدمة وقد تناثرت دموعها مع اول كلمة نطقت بها والدتها
عليا بصوت هزه البكاء:صادقة يمه صادقة هي اللي ربت في حضنش ولا انا جعل ربي يخليلي شاهه اللي ضمتني انا وحصة
ثم تركت الكل لتلبس عباءتها ونقابها
اقتربت منها شاهه التي تعلم ماالذي يريحها في هذه الحالة
ضمتها لصدرها بقوة ليتعالى بكاء عليا المختلط بنشيج عالي الصوت:لاتبكين وانا اختش مايكفيش اني انا ابيش
عليا وهي تخبأ وجهها في صدر من اعتنت بها منذ الصغر:شاهه ابي اجع البيت
شاهه بهدوء:ابشري ابشري
عليا باصرار:الحين
شاهه كانت تخبأ دموع نادر ماظهرت للملأ فكانت تخاطب نفسها قائلة:ياويلي من كسرش ياعليا هذا ماكنت ابتعد منه ليه يايمه كذا ليه
ام شاهه وهي تبعد شاهه لتضم عليا:بتخليني ياعليا عقب ماحييت اعود مثل قبل
عليا وهي تبتعد عن والدتها:ماحييتي الا من يوم شفتي بنتش
ام شاهه بحزن:وانتي ماانتي ببنتي؟
عليا وقد عقد لسانها عن الاجابة
ذهبت للهاتف بصمت لتتصل على والدها
وضعت السماعة على اذنها
اقتربت والدتها لتضع يدها على مغلقة الخط
ام شاهه بغضب:نذرن على خيط رقبتي لاتظهرين من ذا البيت الليله انه حرام عليش السلام علي
حصة وهي تبكي:يمه لاتغبنينها
ام شاهه بحزم:اص ولا كلمة ماحد منكن يفتح ثمه بكلمة وانا احكي
ثم امسكت بيد عليا وسحبتها لتلك الغرفة التي شهدت اللقاء بينهم
حصة وهي تبكي:شاهه خلينا نمشي
شاهه بحزم:بتغضبين امش
حصة:امنا خاشرونا فيها العرب
جواهر بخجل وهي تقترب منهم:بنات والله العظيم اني ماقصدت انه يصير ذا كله
شاهه وهي تغتصب الابتسامة:يابنت الحلال ماصار شي امي ذاالحين تحاكيها ويطيح اللي في راسها
نظرت لها حصه بنظرة غضب ثم جلست بجانب شاهه
.
.
.
.
.
.
.
.
ام شاهه:تعالي اقعدي جنبي بدال ماانتي واقفة كذا
جلست بجانب والدتها
ام شاهه:مااقولش لاتبكين بالعكس ابكي لأن البكا ذا ياما خذا من الهموم اللي في قلبي
ثم بدأت بسرد اوجاعها:جيت من ابيش عمري تسع تعش سنه خليتكن وراي اكبركن شاهه ام ثلاث سنين وانتي ام سنه وحصة عمرها شهر
ثم ابتسمت بألم ودموعها قد بللت برقعها:حتى صدري ماجف من الحليب المهم جيت عند ابي مطلقة وسبب طلاقي يهد الرياجيل تفرقو ابي وعمي والسبه انا وانا ماكلا قلبي الا انتي وخواتش خبر قلبي لاجا تالي الليل وقمت اسقي من عين في عين غرقت هدومي من الحليب يتراوى لي زول شاهه وضحكتش اللي كلت قلبي ووجه حصه اللي ماشبعت مني ولاشبعت منها قمت كل يومين اطيح عليهم والسبب فراقي عنكن قام ابي ودق على ابي لطام وقاله البنت تبي بناتها قاله ابشر بس ابيش حالي بيني وبينكن زاد تعبي قامت ام ناصر جعل ربي يرزقها العافية ويخليلها عوالها حلفت ان جواهر بنتي الين تقوم الساعة وجابت اغراضها وحطتها في حجرتي كنت افرح في كل يوم اشوفها تكبر قدامي كل مافي قلبي من حب وحنان حطيته لجواهر اول مانطقت كلمة ماما قالتها وهي في حضني ولي ماترقد الا في حظني ولاتفت شبر الا انا معها وحولها كل ماشفتها طريتن علي وخاصه انتي لأنش كبر جواهر
ثم اردفت بضحة سخريه من القدر:يوم جا مره كنت طالعه من دوامي وجواهر معي في نفس المدرسة قالت تكفين يمه ابي اشتري اغراض من السوق ضروري رحت انا وياها السوق وقمت افتر انا وياها في لمحة بصر قلبي آجعني وشفتكن قدامي بنفس الصوره اللي خليتكن فيها قلت ياجواهر يامش خلينا نعود انا تعبت قالت ان شاء الله وساعة التفت الاجدتش قدامي يوم هنا قربت غصب عني ولاشفت احد غيرها سمعتها تقول لبنية معها حصه اخلصي خلينا نمشي
بغا يوقف قلبي يوم دريت انها حصه بنتي اللي خليتها لحمة حمرا اليوم قدها مره بس وعاني من اللي انا فيه شيين جواهر اللي قالت يمه شفيش وابيش الله شفته معكن عودت البيت وانا ضايقة بي الوسيعه
شفتها ماقدرت اقرب منها ولاالمسها ولــــــــــ
اصمتها يد عليا التي ربتت على فخذها:بس يمه جعلني قبلش لاتتعبين عمرش
انخرطت في بكاء اشد لمدة ليست بقصيره
ثم قالت بصوتها المبلول:يابنتي جواهر قطعه من كبدي لكن فيه مرة نشدوها وقالو من اغلى عوالش قالت المريض الين يشفى والبعيد الين ياتي والصغير الين يكبر عرفتي وجواهر يامش ذبحتها النغرة مثل ماهي ذابحتش
واللي خلقش في بطني انش اغلى من روحي انتي بالذات انتي اللي بغيت اموت من فرقاها ذاك الحين كنتي ماكله قلبي وعقلي بحركاتش وضحكش وسوالفش اما شاهه جعلني قبلها كانت هي وابيها في عالم ثاني ياخذها ويقعد هو وياها لحالهم ويسولف عليها ويتعجب عليها علمها سوالف غريبه عجيبه ينطقها ويلاعبها لحالهم كنت اغار لاشفتها تعومس لاغاب ابيها وهي عمرها سنه ونص ولاشافته ماعاد تصك ثمها من الضحك بس لاجا النوم لازم حضني لاجا الوجع لازم حضني هذا اللي خلاني اتعلق فيها بذا الشكل
عليا وهي تحتضن والدتها:يعني انا اللي كنت بنتش
ام شاهه وهي تحتضنها:ههههههه انتي بتقطعيني من بناتي
عليا وهي تشد من احتضان والدتها:ابيش لي لحالي
ام شاهه وهي تبعدها قليلاً:اوعديني انش تعذرين جواهر
عليا بابتسامة:تعالي معي
ثم ذهبتا للصالة حيث التوتر
ذهبت عليا لتقف امام جواهر لتشدها واقفة:مع انش سخيفة وحريتيني قبل شوي بس انا آسفه
ضمتها جواهر وهي تبتسم:ومع انش اسخف ورفعتي ظغطي بس انا بعد آسفه
كانت تقف وترى لهن بحب
....................................................
ناصر بن فيصل وهويدخل الغرفة التي حوت جسدها ودموعها منذ اكثر من ساعتين
ناصر وهويقف عند الباب:وضحه
وضحه وهي تبكي:...................
ناصر برجاء فخم:طيب ردي علي
وضحه :نعم
ناصر وهو يبتسم محاولاً تغيير الجو:جهزي نفسش سفرتنا عقب اسبوع
وضحه بغضب:مابي اروح
ناصر باستفزاز:بتروحين
وضحه:ناصر قلتلك مانيب رايحه
ناصر وهو يقترب منها:يازين اسمي في ثمش
وضحه بعصبية:ناصر خلك من الضحك وكلمني جد
ناصر وهو يقبل خدها بلطف:آسف
وضحه وهي تحت تأثير الصدمه فذلك المجنون يعرف كيف يسحرني:مانيب قابله اسفك مانفعني ذا الاسف يوم اعرست علي مرتين
ناصر وهو يقبلها مره اخرى بنفس الطريقه:احبش
وضحه بعتب:واللي يحب يوجع اللي يحبه
ناصر وهو يقترب منها اكثر:وليه توجعيني من اول
وضحه وهي تنظر في عيني:غبيه ولا افهم لكن البلا من العاقل اللي قلت انه بيدمح زلتي
ناصر وهو يشير على قلبه:هذا استاجع حييل منش ومن سواتش فيه
وضحه وقد عادت لهمر الدموع:يالبى القلب وراعيه ليتني مت ولاآجعتك
ناصر وهويضمها بعنف ليطفأ نار ثائرة لها عام تستعر:لاتقولين كذا ان متي مت معش
وضحه وهي تحتضن خصره:اسم الله عليك من الموت
ثم اردفت:ليه اعرست علي
ناصر وهو يبعدها قليلاً لينظر في عينيها فيمازحها قائلاً:الظاهر عادش منتغره منهن
وضحه بابتسامه وقد نشت كلام دلال:واقطعك ان جبت طاريهن مرة ثانية
ناصر:ههههههههههههه فيها ذبح بعد
وضحه:اجل ويش
........................................................
في منزل ابوضيدان
كان جالساً في الصالة يفكر ماذا حل بتلك الاميرات الثلاث
لم ينمن خارج المنزل يوماً
فكيف ان ينام الليله وهولم يدخل غرفة كل منهن وينظر لها طويلاً وهي نائمه
ابوضيدان بصوت هامس:يالله ياربي ان كاني حفظتهن وهن تحت عيني احفظهن وهن بعاد مني
ثم تحول تفكيره في تلك الصغيرة المعذبه
رباه لما ان افعل بها هكذا الايحق لها ان تزف في ليلة يملاها الفرح فهيي قد تعذبت منه ومن غيره ولم تنطق كلمة
ولكن لطام سيعوضها عن كل ظلم مني اللهم اسعدها ووفقها
فتحول تفكيره الى طفلته التي سيتقدم لخطبتها فلاح
اليست صغيره بل طفله لااستطيع ان ازوجها فهي لاتزال جاهله بأمور الدنيا
فيتحول تفكيره للثالثه
لقد اشتقت لضحكتها اليوم كان وجهها يشع اثر فرحتها مااجمل تلك الضحكه التي ماان اراها تغيب دنيا الهموم عن ناظري
وعلى هذا الحال استمر في تفكيره حتى نام جالساً
..........................................................
اما في جهة اخرى
كان جالس في الصالة العلوية يشاهد الاخبار
اتته اخته وجلست بجانبه بعد ان مسحت زينتها:مسا الخير
التفت لها ثم همس بهدوء كالعادة:مسا النور
قالت له برجاءها الذي لايرد عنده:لطام ابي وجبه
لطام بهدوء:عطيني التلفون اطلب لش
ثمينه بمرح:بس ترا الحساب علي
لطام بنفس النبره:اقول انتي ماتوبين لازم كل مره احلف يعني
ثمينه:شسوي ابيك تحلف علي عشان احس انك تسمعني ومنته لي
لطام بغموض:ليه انا بارد لذا الدرجه
ثمينه وهي تقبله بشدة:لذا الدرجه واكثر بس اموت فيك
ضمها له:وانا احبش
ثمينه بفرحه:هههئ وش اسوي في عمري لطام يقول لي احبش يابخت عيني
لطام:انش داريه اني احبش ياالسلقه لاتصيري مهوله
ثم اردف:قوليلي اربش استانستي في العشا
ثمينه وقد بدت في عينيها لمعة التشويق:وناسه وناسه وناسه عندهم بس فيه وحده من النسوان ناشبت بنات ابي ناصر
لطام بغضب:من هي؟
ثمينه:جواهر بنت فيصل
لطام باستغراب:وش فيها عليهن
ثمينه:والله مدري حتى شاهه اللي ماتضبق بين فيها الضيق اليوم
لطام وقد حل عليه الهام الهدوء:ليه وش سوت لين دريتي انها ضاقت
ثمينه بنغزه:انت مهوب قصدك انت تبي تسمع طالريها
لطام يريد احراجها:شي طبيعي بين الرجال ومرته
ثمينه وقد بدى عليها احمرار الخجل:ياشينك لاصرت كذا
لطام:وش كذا
ثمينه وهي تغير محور الحديث:انت بتطلب لي ولا لأ؟
لطام بابتسامه لم تظهر حتى لثمينه الجالسه بجانبه:يالله عطيني التلفون
ناولته التلفون وطلب له ولها وجلسا يتسامرون
........................................................
في شقة ام شاهه
جواهر وعليا وحصه وام شاهه كانوا يلعبون ب(ورقه)(الجنجفه)
اما شاهه كانت جالسه على الغنفه ةتنظر لهن وتشجع فريق عليا وجوار تاره وفريق امها وحصه تاره
عليا بحماس:جوجويابعد حيي ابيها لنا ذا المره
حصه بدلع:اصلاص انتو خسرانين خسرانين اطلعو بكرامتكم احسن
جواهر بانفعال:العبره في النهايه ياحبيبتي
عليا وهي تقلد حصه:خسرانين خسرانين
ثم اعادت صوتها:انتي اصلاً دابله كبدي مجري امي شختارتش عليه
حصه وهي تضم والدتها:على الاقل احسن منش
عليا باستغراب مصطنع :انا مدري امي راحت تستلحقش المفروض انها تخليني انا آخر العنقود(تستلحقش=تأتي بك بعد فترة طويله)
حصه وحاجباها يتراقصان:لأنش عاهه
جواهر وشاهه وام شاهه:هههههههههههههههههه
عليا:يازينكم وانتو تضحكون علي
المفروض انكم تضحكون على ذا الطير اللي يلحقونه البزران(تعبيراً عن شدة النحف)
وعادن الثلاث للضحك:ههههههههههههههههههه
حصه ببرود استفزازي:حيل حيل عيبي قومش الغبن ان حنا فايزين عليكم
وقفت شاهه
ام شاهه:وين
شاهه:الحمام الله يكرمكم احس بدوخه الظاهر من النعاس بروح اغسل وجهي
ام شاهه بحنان:روحي ارقدي جعلني قبلش
شاهه:لافديتش ابي اقعد معكم
ام شاهه:اللي ودش
ذهبت شاهه للحمام اكرمكم الله
واكمل البقيه اللعب والضحك
ام شاهه وهي تضحك:حصوص نطلعهم
حصه بحماس:يالله
ثم وضعن اوراقهن في الارض لتصدم عليا وجواهر
جواهر وهي تنظر للاوراق بخيبه:يوووه ثالث مره نخسر
عليا بعصبيه:كله منش ماتعرفين تلعبين
جواهر بعصبيه مماثله:من اللي خسرنا في المرتين الاولى
عليا مبرره:كنت توني ماحسيت بالحماس
ام شاهه وحصه:هههههههههههههههههه
حصه:جعل حيلكن بينكن
ام شاهه:ذاالحين بيتلاقطن مثل الدياكه
جواهر:اسم الله علينا
عليابلهجه مصريه :دحنا سمنه على عسل انا والبت قواهر
جواهر:يالله انا اللي بخبص الورق
وبدأت تلخبط الورق
عليا باستغراب:يمه ليه تلبسين جلال افصخيه مابه الا بناتش
ام شاهه:يامش والله اني اموت من السحا لافصخته ولا ارتاح الابه
جواهر:تخيلي ماتفصخه الا لاقدني انا وياها في سريرنا
حصه:ياحظش نمتي عمرش كله في حضنها
ام شاهه وهي تضمها:وانتي بعد بتنامين في حضني
عليا وهي تضع يديها على خصرها:اي والله وانــــــــــ
اصمتهن تلك الصرخه التي صدرت من الحمام
شاهه:يمممممممممممممه
عليا بهمسه:شاهه
حصه:يمه اختي
جواهر:الله يستر
اما من كانت اول من نهض رغم تقدم السن فيها:اسم الله على جنينتي
وتوجهن للحمام بركضن
.
.
.
............................................
بــــــــــــــــــــقـــــــــــــــــ شـــــــــــــــادن لـــــــــــــــــــــــم
|
30-03-11, 08:11 AM
جديد مواضيع قسم الارشيف
العرض العادي
