كاتب الموضوع :
دهــن الــعــود
المنتدى :
الارشيف
السلام عليكم
مساء الخير على الجميع وارحب بالجميع المشاركين وغير المشاركين
بالنسبه لأختي (اثرني احبه)ادري اني عله بس استحمليني انتي بدويه ومن البحرين؟؟؟
لأن اللي اعرفه ان البحرين مافيهم بدو
من غير قصور في اهل البحرين بس انا استغربت انش توشين ومن البحرين لأن القبائل اللي توش متمركزه في قطر والكويت والسعوديه
وترحيب خاص في خواتش وصراحة شرف لي ان روايتي اعجبتهم
توكلت على الغني الباسط
.............................................
في مكان التجمع النسائي
كانت الموسيقى تصدح في المكان والنساء يتمايلن مشاركات آل لطام في فرحتهم بسلامة الجد
وفي الغرفة الجانبية كانت تجلس وضحه وتحاوطنها اميراتها الثلاث
عليا ممسكة بيد والدتها وتقبلها بين تارة واخرى فتهتف بمرح:هايمه من ازين بناتش طبعاً انا مافيها قولت اظنه
ام شاهه وهي تبتسم بفرحه:علوي كن فيش عرق نجاسه
حصه وهي جالسة عند اقدام والدتها الجالسة على الكنبة:كن فيها عرق الا هي ام النجاسه
عليا:جعل لسانش القطع قولي آمين ياحصيصة
ضربتها امها بخفه على رأسها وهتفت بجزع:يويلي اسم الله على بنتي
حصه و تحرك حواجبها لتغيض عليا:يعني يمه انا بنتش وهي لا
وضحه وهي تكلم شاهه الصامتة التي كانت تمسك بكف والدتها ولم تزحزح عينيها عن وجهها:اقول خواتش مجاورات؟(مجاورات=صارن طباين)
شاهه وهي تخرج صوتها الذي زادت بحته نتيجة مامرت به قبل قليل:ماشفتي شي
وضحه وهي تضم شاهه يقوة:يامش والله اني امرض كل مالتفت وشفت عيونش كذا وانتي تشبحيني لو اني دارية ان شوفتي بتسوي بش كذا كان ماواجهتش
شاهه بذات الصوت المرهق:ليه كنتي تبين تحرقين كبدي حيه وميته
وضحه وهي تضمها بشدة لما رأت بها من حزن وتأثر عميق:كبدي ولاكبدش يابعدي
عليا وهي تضم والدتها بمرح:يمه وانا ماقلتيلي كلام حلو
وضحه وهي تلتفت لعليا:ياعوبش يامش كل ذا الحكي ولاقلت لش شي
قاطع حديثهم دخول جواهر التي بدا عليها الضيق:يمه يالله العشا
وضحه وهي تبتسم لتلك المنزعجه:جويهر تعالي سلمي على خواتش
اقتربت جواهر بضيق.........فوقفن لها الثلاث
اقتربت لها شاهه التي كانت اساساً الاقرب لها سلمت عليها:هلا والله شلونش
جواهر بهدوء:طيبه انتي شلونش
شاهه بباتسامه آسره:يسرش الحال
ثم تقدمت عليا:كيف الحال
جواهر تنظر لها بازدراء وعليا بالمثل:تمام وانتي
عليا بعدم ارتياح واضح:بأحسن حال
حصه وهي تقبل خد جواهر:شلونش جواهر
جواهر وقد بدا عليها القليل من الراحة:طيبه .....شلونش
حصه:طيبه جعلش طيبه
ام شاهه وهي تحاول ان تغير مزاج جواهر:امي
جواهر بنظرة عتب وتحاول اخفائها:لبيه
ام شاهه:النسوان اقلطو
جواهر:ايه يمه
ام شاهه وهي تمسك بكف جواهر:اجل يالله يابنات مشينا للعشا
تقدم الجميع متجهاً للعشاء
امسكت عليا بيد شاهه وهي تهمس لها:مانزلت لي من زور ذا الجواهر حتى امي هملتنا يوم شافتها
شاهه وهي تضربها بخفة على يدها:كم مره اقولش خلي منش الحكي في العرب امشي خلصيني لاتفضحينا في العرب مالنا عندهم الا امي
ثم ذهبت تاركة خلفها عليا المغتاضة
......................................................
في مجلس الرجال
ابو فيصل:يالله يارياجيل اقلطو على العشا
انتهض الجميع متجهاً للمقلط ماأن مر به ابو سعد بعد خلو الديوان من الرجال حتى امسك ابوفيصل بيده
هتف ابوفيصل بود وقد تحاوط الاثنان ابناءهم الاثني عشر رجلاً:يامرحبا والله اني صادق
احتضنه ابوسعد بشده فهذا شقيقه وابنه الذي رباه:الله لايخليني منك ياخيك ياكبر غلاك في قلبي
فرق الاثنان صوت ابونلصر:يبه يالله الرياجيل قلطو
اتجه الجدان والبقيه نحو المقلط
..............................................
ام ناصر وام شاهه وهن يوادعن آخر الحاضرات
الجده من داخل الصالة ام لطام سرينا
ام وضحه:لاوالله يمه مانتوب ماشين تو ماراحو العرب بنسمر ونتحدث
ام سعد:يامش شايبي مايتحمل السهر
ام شاهه وهي تدخل الصالة:لاتقولين عن ابي لطام شايب الا ازين الشباب
ام سعد وهي تشير لمكان بجانبها:تعالي ابي اعلمش بعلم
ثم التفتت لحفيداتها:وانتن قومن البسن عشان نمشي
عليا بمزح:شاهه ترا مفهومة تبينا نطلع عشان تقولين لامي شي ماتبينا نسمعه ولو اني عارفه وش هو ذا الموضوع
ام سعد وهي تحرك عصاها مهددةً بضربها:ياشيب عيني منش انتي ان جودتش قطعت شوشتش ذااللي مامشطتيها
عليا تمثل عدم المبالاه رغم ضحك الجميع:ياشوشو كم مره اقولش هذا اسمه كيرلي
ام سعد:هو اللي ماعادني بمخليتش تسوينه
ثم اردفت وهي تقول:جلش الصلاح الهيتيني يالله روحن البسن
خرجن البنات ثم تبعهن دلال وجواهر ووضحه من باب اللياقه
ام شاهه ووجهها يشع فرحة وراحة:سمي يمه
ام سعد بفرح: ترا اليوم ملكة شاهه
اشرق وجهها بفرحة تكاد تقفز من عينيها:انتي صادقه يمه
ام سعد وهي تعذرها:اي والله ان شاء الله صادقه
ام شاهه وهي تكاد ان تقهقه فرحاً:اعذريني يمه بس من الفرحه
ام سعد:يابنت الحلال عاذرتش من غير ماتقولين
ام ناصر وام وضحه:مبروك ياام شاهه
ام شاهه:الله يبارك فيكن والفال للي عندكن
ثم اردفت قاصدةً ام سعد:من البخيت اللي خذاها
ام سعد بهدوء:لطام ابن سعد
حل الصمت لفترة قطعها رد ام شاهه:ماعليها لاقدها عند ولد عمها اخيها وولد ابيها طولها وطوله واحد(ولد ابيها=تقصد ان عمها بمثابة والدها)
عادت القليل من الفرحه فهتفت ام لطام:ياام شاهه تراها ظهرت من بيت ابيها ودخلت بيت ابيها الاخر
ام شاهه محاولة تناسي مااحزنها:مافيها شك ياام لطام لاقدها عندش كنها في حضني
..................................................
في ممر استقبال المنزل حيث كانت تقف شاهه واخواتها وبنات عمها
عليا وهي تتصنع البراءة:ياترى امي شاهه وش تبي تقول لامي
ثمينه وهي تماشيها:الله اعلم ياختش بس الوكاد انه علم كبير والعلم عند الله
شاهه وهي تضع عباءتها على كتفها وتمسك ببرقعها في يدها:ماودكن تمسن قبل احوس مريركن(احوس مريركن=اعكر مزاجكن)
حصه:ثمينه عليا بس عاد لاتضايقن شاهه
نوره:بنات كن بنت خالكم جواهر تبي فرقانا
عليا بغيض:تكفين لاتجيبين سيرتها كل مااسمع طاريها يركبني مية جني
حصه وهي تريد اغضة عليا اكثر:ههههههه محتره منها عشان امي تموت عليها اكثر منش
عليا بقهر:تخسين انتي وهي انا عند امي اغلى منها واغلى من اللي اغلى منها بعد
نوره:ههههههههههه جات من جدها
ثمينه:ههههه اقول اسكتن تراها انتفخت من الضيقه
عليا بقهر اكثر:يابنات ماشفتوها شلون تشبح فينا كن حنا ماكلين حلال ابيها
شاهه تحاول ان تهديها:لا علوي لاتبالغين
نوره وقد فهمت لمقصد شاهه فهي تريد ان ترخي من حدة عليا:اي صح علوي انا اشوف نظرتها عادية
عليا وهي تشير بيديها:ودي ازنطها كذا
ثمينه وهي تنظر لشاهه ونوره بقلق فهي تعلم كمم عليا حاره ولن تصمت ان اثقلت جواهر العيار قليلاً:يابنت الحلال يتراوا لش(يتراوا لش=يتهيأ لك)
..........................................
في المجلس وبعد مغادرة الجميع
ابوسعد وهو يضع يده على فخذ شقيقه:ياابوفيصل ناصر ولدك جاي اليوم يبي رضاك
ابوضيدان وهو ينظر لوالده بصدمه قد اخفاها عن الجميع الا عن واحد:؟؟؟؟؟؟؟؟؟؟؟؟
ابوفيصل:ياخيك ناصر ولدي اول وتالي بس اللي صار مايرضاه الله وخلقه
ابوسعد وهو يشير لأبوضيدان:ياخيك نباش العلوم مالنا فيه حاجه
انتهض ابوضيدان وقبل رأس عمه مجبر
ابوفيصل وهو يقف ويربت على كتف ابوضيدان:ياولدي اللي صار صار وحكي في الفايت نقصان في العقل
ابوضيدان بعدم اقتناع:الله الله يايبه عز الله انك صادق
ابوسعد بفرحه:اجل اسمعو ترا عشاكم عندنا قفي الصبح(قفي الصبح=بعد غد)
ابوفيصل بحب:جعله يكثر خيرك ياخيك ماكان كلفت على عمرك
ابوسعد:الخير واحد وكرامة عشان ذا الرضا ماهيب خسارة
في طرف المجلس وبعيد قليلاً
نايف:ياكرهي للهياط
فلاح وهو يضربه بكوعه:والله ياان سمعوك ان يمردغونك هنيا قدامنا
فهاد:هياط عند جدك ولا جدي اسمه ذرابه
نايف:ياعمي يتخسر ويذبح له خروف عشان اخيه رضا
فلاح:عاد ودك جدك كل يومين زعلان
فهاد:فلسنا
فلاح:اجل خلاص انا بطلع من ذا العايله البطرانه
نايف:لاتخليني ياخيك
فهاد:وانا معكم
فلاح:ولا واحد يباريني منكم
ثم اصطنع الكبر:ماعاد الا الحبربش
افزعهم صوت الجد ابوسعد:يالله ياعوال خلونا نمشي
ابوفيصل :تو الناس ياخيك
ابو لطام:يايبه قد الساعه اثنعش
ابوفيصل:اجل ياابوسعد حياك تسلم على اهلك(يقصد حفيداته وابنته وزوجات ابنائه)
ابوسعد:يالله
نهض الاثنان متجهان للداخل وكان ابوفيصل يجهل وجود تلك الغائبات وابوسعد يظن انه انتبه لهن
..........................................
قبل ذلك بدقائق
اقتربت ام شاهه من البنات
انسحبت نوره وثمينه من الممر ليدخلن في الصالة
ام شاهه وهي تخفي ابتسامتها وتظهر الغضب والضيق في صوتها:الحين انا وياكن قاعدات لحالنا ماعلمتني بالملكة ليه
صمتن الثلاث ضيق من غضب والدتهن
عليا مبررة وهي تقبل كف والدتها:يمه وش تبينا نقولش نقولش يمه اختنا اعرست
حصه وهي تخفي حزنها لغضب والتها:يمه والله ماخبرنا العرب يتباشرون بملكة البنت
ام شاهه:وانتي ماودش تقولين شي(كانت تقصد شاهه)
شاهه وهي تخفض رأسها خجلاً وحزناً:جعل ربي يخليلي خواتي
ام شاهه وهي تضم تلك الخجلة:وانتي تهقين اني بزعل عقب ذا الخبر الزين بس كنت ابشوف وش انتن بتقولن
عليا بمرح:حرام عليش يمه وجيهنا راغت
ام شاهه بمزح:ماعليكن ذل عقب اللي شفته
حصه:يمه لايغرش ترا كلنا عاقلات بس عليا هي اللي تاكل العرب
ام شاهه وهي تبعد شاهه عن حضنها:والله ان اللي في حضني ماهيب وراها بطواله(ماهيب وراها بطواله=بنفس مستواها)
قاطعهن صوت ابوفيصل الجهوري:احم احم درب درب
اسرعن الفتيات بلبس اغطية وجيههن
لتهتف ام شاهه:لاتغطن هذا جدكن ناصر
ثم اردفت:حياك يبه حياك
دخل ابوفيصل وبعده ابوسعد
ابوفيصل:السلام علــــ
ثم التفت لجهة ابوسعد:ابن لطام مانيب قايل خلو لنا درب
اقتربت منه ام شاهه وهي في قمة فرحها وهي ترى من كان خلفه:يامرحبا يامرحبا بالغالي
تقدم ابوسعد وهو ليحتضن من غابت عن ناظريه ستة عشر عاماً
من صفعته الدنيا بها
من اجفلته الايام منها
لكن ماان رآها حتى تجدد ماكان يخفيه بين اضلاعه من حب
ابوسعد وهو يضمها بشدة:المرحب باقي يابنتي
كانت ولازالت تحب ذلك اللقب(بنتي)
ابوفيصل بغضب :وضحه النسوان راحن
ابوسعد وهو يبعد وضحه قليلاً:وش نسوانه ذولي بناتي
التفت ابوفيصل براحه:ماشاء الله من هن بناته سعد ولا سلطان
ابوسعد وهو يبتسم فهو عرف انه لم ينتبه لهن من البداية:لا وانت الصادق هذولي بنات ناصر
اصابته رعشه دبت فيما كان يحمله الخافي من جسده ولكتها خفيت عن من كان ينظر له:بنات ناصر؟؟؟
ام شاهه وهي تقف بجانب والدها وتنظر لتلك العيون الثلاث الخجله امامها:بناتي يبه
اقترب منهن ووقف امام عليا:من انتي منهن
عليا بخجل:انا عليا
ضمها لصدره بقوه:شلونش يبيش
عليا وهي خجله للغاية:طيبه يبه
ابتعد عنها لينظر لعينيها بعمق:قبل لاشبحت في عويناتش حسيت انش حية ماانتي بميته وذاالحين كني اشوفش ضو شابه
ام شاهه بابتسامه:وهي ضو شابه
عليا بخجل:يمممه
تقدمت شاهه لتقبل رأسه:مسيك بالخير يبه
ابوفيصل وهو ينظر لها بحب لما فيها من شبه والدتها:مسا النور يامرحبا من انتي منهن
ابوسعد بحب:هذي الشيخة شاهه
ابوفيصل وقد تمكن منه الشوق لتلك الفاتنه ضمها ليقول:يامرحبا بأول الخير
شاهه بصوتها المبحوح:المرحب باقي شلونك يبه
ابوفيصل وهو يبعدها:طيب يابيش دامني شفتكن
ام شاهه وهي تقرب حصه منه:يبه هذي حصه
ابوفيصل وهو ينحني لتقبل حصه رأسه:يامرحبا ببنتي اللي ماشفتها بالمره
حصه:شلونك يبه
ابوفيصل:طيب طاب حالش
ابوسعد:ناصر اخلص خلني اسلم على بناتي
ابوفيصل وهو يبتسم:هو به احد يشوف ذا الغزيلات ومايسج من الدنيا
ام شاهه وهي تتجه للصاله:انا باعطيهن خبر
وبعد دقيقتان دخل الجدان وبدأت السلامات
................................................
في المجلس
نهار وهو يميل على لطام الصامت منذ دخلو:شفيك
لطام بهدوء:مافيني الا العافيه
نهار وهو يغمز له:تفكر فيها من ذاالحين
لطام بجمود:ماجات على بالي
نهار بغموض:ادري والله
اسكتهم صوت ابوناصر:وانت يالطام ماتحب القنص
لطام:ان كان في خاطرك تشوف اللي يسرك من الصيد علمني واخاويك
ابوناصر باعجاب لذلك الحازم الصامت الصغير في السن بالنسبه له:كفو وانا ابيك
ناصر:اجل تخاوينا الاسبوع الجاي انا وابي
لطام:خلاص صار ان شاء الله
ابوناصر:خاوونا كلكم
ابونهار وقد اعجبته الفكرة:انا والله بظبط شغلي واخاويكم
ابولطام:خلاص كلنا خوياكم
ابوناصر بفرحه:الساعة المباركة
ابولطام:ياابوناصر ترا العشا عندنا الخميس الجاي لملكة ولدك لطام
ابوناصر:مبروكين ان شاء الله...........من انتو مناسبين
ابولطام:ابوضيدان
ابوناصر بفرحه اخفاها:مبروك وانا ابيك
لطام:الله يبارك فيك يبه
ناصر:مبروك يالطام
لطام:الله يبارك فيك
نايف:مبروك يابوسعد
لطام:الله يبارك فيك الفال لك ان شاء الله
............................................
في الصالة
ابوسعد:يالله ياام سعد مشينا
ابوفيصل:وين ياخيك تو الناس
ابوسعد:ياخيك العرب قدهم يبون الراحة تونا جايين اليوم من مكشاتنا
ابوفيصل:لادام كذا اجل ماتشوفون شر
ام شاهه وهي تقترب الى ان قبلت رأس وانف عمها:تكفى يبه ابي بناتي يمسون عندي الليلة ومن صبح اردهن
ابوسعد صمت لثواني ثم نظر لتلك العيون الراجيه خلف والدتهن
ابوسعد:ابشري بسعدش ممساهن الليله عندش
بدت الفرحه على محياهن
وقف ابوسعد:يالله تمسون على خير
وقف الجميع :الساري في خير
وبعد دقائق كان يقف الجميع عند السيارات موادعين
لطام:يبه
ابوفيصل:لبيه
لطام: لبيت حاج ابي اسلم على عمتي
ابوفيصل:تعال وان ابيك
ثم دخل به لداخل المنزل
ابوفيصل وهو يقف عند الباب الفاصل:ام شاهه
ام شاهه:لبيه يبه
ابوفيصل:تعالي
جاءته وهي تعلق برقعها في يدها
ماان رأت ذلك المخيف الفائق الطول حتى انحرفت لتلبس برقعها
ابوفيصل:تعالي يبيش هذا ولدش لطام يبي يسلم عليش
اصابتها الرجفه فأسمه يجدد جروح قد مضت
اقتربت وهي تمد يدها:هلا يامرحبا شلونك وانا امك
لطام وهو يقبل رأسها:طيب جعلش طيبه انتي شلونش وشلون من يعز عليش
ام شاهه وهي تغطي كفيها بطرف الجلابيه:ابشرك كل(ن) طيب
.........................................
في المواقف
ابوسعد بغضب يحاول ان يكتمه:بتعصاني ياناصر انا قلت يمسن يعني يمسن
ابوضيدان بغضب مماثل:يبه انا قايل نقعد شوي ونمشي وذاالحين تقول لي يمسن
ابوسعد:لاقدهن عند امهن ماعليهن خلاف
ابوضيدان وقد انتفخ صدغاه من الغضب:هذا الموت انهن عند امهن
ابوسعد وهو يركب السيارة اشارة منه لانهاء الموضوع:اقول والله مايظهرن من ذا البيت الليلة
صمت ابوضيدان قهر وغيض لعدم قدرته عن اثناء والده عن مااراد
اقبل لطام
لطام وهو ينظر لعمه:يبه شفيك واقف
ابوضيدان بغيض:مرتك وخواتها بيمسن هنيا
صاعقة بل تيار كهربائي قيمته 3000 فولت ضربه في المخيخ
ابوضيدان:لطام يبيك ماابيهن يمسن وش السواه
لطام بهدوء مريب:خلهن الليله يمسن وعقبها انا اللي بسنع الامور
ابوضيدان وهو يركب السيارة:نشوف وشلون بتبرد كبدي
....................................................
كانت تقف عند الباب لازالت تحت اثر صدمته لما قال ذلك الارعن بعد ان تركها والدها معه
ام شاهه:الله الله في اختك وانا امك
لطام:المدارى يخرب النسا ياعمتي
ام شاهه بحده:ماياتي من بطن الصالحه الا صالحه
لطام بصوت واثق:هذا البلا
ام شاهه بحزم:الضربه اللي ماتذبح تقوي ........... واللي يرش بماء يرَش بدم
لطام زهز يثقل الععيار:العرق دساس ياعمه
ام شاهه وهي تود تمزيقه:عز الله انك صادق عرقك وعرقه واحد(تقصد ابوضيدان)
لطام:ماالرياجيل بسوا هو سوا مثل اللي يقول يوم ماعاد للبيض والي ركبن على الاوراك ثم الغوارب(يوم ماعاد للبيض والي ركبن على الاوراك ثم الغوارب=اي ان التهاون مع النساء يؤدي الى التحكم بالرجل مما يؤدي للفساد)
ام شاهه بغضب:لطام ياولدي اهلك راحو
علم انها تعطيه اشارة لطرده: فرد عليها قائل:اثرهم صادقين يوم يقولون ان كلمة الصدق تزعل
ثم خرج تاركها خلفه تشتعل غيضاً فهو قليل ادب ولايجاريه في الحديث الا الخطباء
رباه احمي طفلتي الهشه من ذلك الوحش الكاسر
انتبهت من سرحانها على صوت عليا وحصه اللتان يهزانها :يمه يمه
ام شاهه:لبيه
عليا:شعندش واقفه هنيا امشي داخل
ام شاهه:يالله يالله امشو
ثم دخلن للصاله
...............................................
في سيارة ابوضيدان ولطام
ابوضيدان بعصبية:بس ماابي اسمع ولاصوت
ضيدان وهو يشهق من بكاء دام نصف ساعه منذ ان علم ان امه لم تأتي معهم:ابي ساهه
ابوضيدان:بكره بتجي بس اسكت
لطام:يبه خلنا نحذفه عليها ماعندك احد يبزاه
ابوضيدان بصدمه:من جدك والله مااخلي ولدي عندهم
لطام:بصرك
ابوضيدان:وش قلت لها
لطام وهو يعلم كم عمه مولع بتلك الفاتنه:قلت الصدق
ابوضيدان:...........
لطام بمفاجأه:يبه انا ابي آخذ شاهه عقب اسبوعين عندي دورة لمدة ثلاث شهور
ابوضيدان وهو يصدمه برده:يكون احسن
لطام بفرحة خافية:خلاص انا بكلم العرب واحجز كل شي من بكره
ابوضيدان بهدوء:اللي ودك
............................................
بـــــــــقــــــــــــــ شــــــــــادن ــــــــــــــــــــلـــــــــــــــــم
|
26-03-11, 09:58 AM
جديد مواضيع قسم الارشيف
العرض العادي
