عوافي شدونه


احداث متسلسله ورائعه بس قصير البارت

ننتظر زواج نايف ودلال واحداث عليا وفهاد الى وين توصل

:
نايف ودلال

_لكنها قد عاهدت نفسها ان تزوجه من افضل بنات (جماعتهم) رغم انها تشعر بالالم من تلك الفكره

....؟! ليه وش السااالفه >>>اعتقد فاتني شيء

امممم قايله انو عليا ملسونه و...فهد ماقصر فيها بس للاسف انحذف ردي ...! المره الماضيه

صحه وفلاح خذو فيصل وربوه *_^

شكرا دهن ......

السلام عليكم
يالله تجهزو للقاء نايف ودلال البارت الجاي اللي راح ينزل بكره بأذن الله
الله لايحرمني منش .... قولي آمييين

البارت السادس والخمسين
.........................................
نايف وهو يمسك بيدها:خلش مني انا جايش ابيش في موضوع مهم
ام وضحه بقلق:خير يابوي
نايف بهدوء:يمه انا ودلال بنظهر من البيت وبنسكن في شقه لحالنا
ام وضحه بصدمه:لحااالكم؟؟
زفر بضيق وهو يرى الحزن الذي رسم خطاه على وجهها:ايه يمه انا ابي اتفاهم انا ودلال لحالنا
ثم اردف:وفي وجهي اول مااحس ان حنا متفاهمين ومرتاحين مع بعض بنعود هنيا عندش
ام وضحه بالم:شف وانا امك دلال قدها مرتك وبصرك فيها بس ترا ياولدي انا بعود مع اخي لديارنا
نايف بغضب:ليه يمه وحنا ماحنا باهلش
ام وضحه بجزع:الا والله ماعدكم الا اهلي بس السلوم سلوم وانا امك يوم مات محمد جعله في الجنه قعدت عشان بناتي يربون عند اهلهم بس ذالحين قدهن نسوان واصغرهن بتعرس ماعاد لي مقعاد وانا امك
نايف بضيق:خلاص يمه بنقعد معش ماحنا بظاهرين
ام وضحه برفض:لا واللـــ......
نايف وهو يقاطعها:والله ماتــــــ....
ام وضحه قاطعته ايضا:انت اللي والله ماتحلف والله ماتعودون الا لقدكم متفقين
نايف:ليه يمه الله يهديش تحلفين خلاص اجل ناصر يسكن معش الين نعود
ام وضحه بحزن:لا يابوي اخي جاي الصبح عشان العرس وعشان اعود معه
نايف وهو يقف غاضب:والله ماتروحين وتخلينا
ام وضحه وهي تكفكف دموعها:ياجعلني ماخلا منك انت واخيك ناصر اليوم وهو يخانقني عشان بروح وانت تحلف علي
نايف بحزن وكره لتلك العادات المستبده التي تحل الفراق بين الصغار والكبار:يمه طالبش ماتبكين واذا على ابو جابر ماعليش انا احاكيه
ام وضحه:لا والله ماتحسون خاطره يكفي اني مضايقته بقعادي عندكم كل ذا المده
لكن اتاهم صوت اصمتهم وشد انتباههم:مالش مراح لا اول ولا تالي وانا ابيش
ام وضحه:لا يبه فديتك لازم اني بروح مع محمد
ابوفيصل الغاضب:شوفي طول مابناتش حيات فانتي معهن ولالش فراق منهن
وزادهم الصوت الباكي:اي تكفى يبه لاتخليها تروح
ابو فيصل وهو يضمها:افا افا وانا ابيش ياوضحه تبكين لاتبكين ماهيب رايحه شورها عندي الا ان كان مانيب ابيها
ام وضحه بحزن:الا والله ابي جعل ربي يخليك لنا بس طالبتك يبه ماتغصبني ولاتحدني على اقصاي
ابوفيصل بألم فهذا رجاء منها لايمكنه ردها:ليه يابيش مضايقش مقعادش عندنا
ام وضحه:لا يبه بس مابي العرب يحكون في محمد ويلحقه العيب
ابوفيصل بحميه:اخو لطام يكرم ابو جابر من العيب لا بالله تراش مرخوصه
وضحه ببكاء حاد جعل نايف يخرج وناصر الصامت يقترب:لا يبه تكفى لا تخليها تروح
ابوفيصل وهو يشدها لصدره اكثر فهو يشعر بألم الفراق الذي ينحر الروح نحرا بشع:طلبتني يابيش ولااحتال اردها
ناصر الذي كان يود زرعها بين اضلاعه لعلها تهدأ لكن وقف جده ووالدتها عائقا بينهما:وضحه تعوذي من الشيطان حتى لو راحت ابد متى مابغيتيها انا اوديش لها
ام وضحه وهي تقترب منها وقد ابتل صوتها اثر البكاء:يابنتي لاتسوين بعمرش كذا ولدش يبيش
وضحه التي تضم والدتها:يمه طلبتش لاتروحين لاتبعدين والله مانقوا فرقاش يمه
ام وضحه:وهي تبعدها لتقول لها بصرامه:وضحه انتي مانتيب بزر عشان ماتقوين فرقاي كلكن نسوان
ابوفيصل وهو يأشر لام وضحه:خلاص خلوها ابي اكلمها لحالنا
خرجت ام وضحه وناصر ليخلو الجو عليهما
لكن هناك من دخلت حين سمعت بكاء وضحه ورجاءاتها:يبه وش فيكم
ابوفيصل وقد تضاعف همه فأن كانت ردة فعل وضحه بهذا العنف فما ردة فعل تلك المهووسه بحب والدتها:مابه شي وانا ابيش تعالي عندي
دلال وهي تنظر لوضحه وتقترب من جدها:شفيها وضحه فيكم شي
ابوفيصل وهو يضمها:دلال يابيش امش بتعود مع خالش لديارها عقب عرسش
لم يجد ردة فعل سوا انها تخسبت تماما وكانها خاليه من الروح
ابوفيصل بقلق:دلال دلال يابيش شقومش
ابتعدت بهدوء جاف مؤلم لتخرج تغطي وجهها بعد ان كشفته حين دخلت على جدها
ابوفيصل بخوف:وضحه روحي شوفيها وش فيها
اتجهت وضحه لوجهة شقيقتها مرعوبه عليها
حين دخلت الصاله وجدت والدتها تجلس مع ناصر الذي قال لها:شفيش
وضحه بقلق وهي تصعد السلم:دلال مدري شفيها
ام وضحه برعب وهي تلحق بهن:اسم الله على جنينتي
.
.
.
.
.
.
في غرفة دلال التي دلال تجلس على كرسي مكتبها الصغير
وضحه وهي تدخل العرفه وتتجه لشقيقتها وتضمها:دلول شفيش اسم الله عليش
دلال بهدوء وعدم استيعاب:وضحه صدق امي بتروح وتخلينا
وضحه بحزن:ايه بتروح
دخلت والدتهن بهلع:شفيها
دلال التي ابتعدت عن وضحه لتنظر لوالدتها:يمه بتروحين وتخليني
ام وضحه بحزن وهي تتقدم لها:يابنتي لازم اروح مقعادي كذا مايجوز
دلال التي تقف امامها:يمه وانا ووضحه
ام وضحه بعتب:ليه يامش انتي ولا وضحه عادكن في حاجتي
دلال وقد بدأت دموعها بالانهمار:يمه انا في حاجتش الين اموت
ثم اردفت بحزم وهي تمسح دموعها:ان رحتي مانيب معرسه
ام وضحه بصدمه:وش هو ؟؟
ثم اردفت بغضب:ليه هو على كيفش العرس بتعرسين والمراح وبروح وانتي مالش علي كلمه
دلال وهي تجلس بتصميم:انا اللي بعرس مهوب احد غيري واذا بتغصبوني بفضحكم
ام وضحه بصدمه:دلال وش ذا الحكي
وضحه بتأييد:هي صادقه وانا مانيب معوده على ناصر
ام وضحه:ليه وش سوو هم مالهم شغل في مراحي
وضحه ببساطه:والله واحد عجز يقنع امي تقعد عندنا عجزان بعد من انه يضمني انا وولدي
ام وضحه بغضب وهي تخرج:امحق بنات وامحق تربيه انا اللي ماعرفت اربيكن لكن اوريكن تلون ذراعي يابنات بطني معليه معليه ياوضيحه انتي ودليل
ثم اتجهت للاسفل لتغير رأيها
مع ابتسامة وضحه ودلال
............................................................ ..........
وبعد مرور الوقت
الليله آخر ليله تسبق العرس
كانت الجده تجلس في الصاله وهي تنقهوا وامامها عليا وحصه التي جاءتهم لانشغال فلاح هذه الليله وام شاهه وضيدان
الجده وهي ترتشف فنجالها:وضحه ارب فيصل عاده يرضع منش
ام شاهه وهي تنظر لفيصل في سريره الهزاز بجانبها:ايه يمه مع انه ماام يشبع الا بالحليب الصناعي
الجده:ماعيله ارضعيه صناعي وطبيعي
عليا وهي تقبل خد ضيدان الذي في حضنها وهو يرتدي بدله شتويه وقبعه ودسين يخبآن كفاه الصغيرتان:يمه بيصير آفه
الجده:عليا ووجع اهب ياوجهش تهورين اخيش
حصه بابتسامه عادت كما كانت:مالومها يمه تقولين رضعيه صناعي وطبيعي هذا وهو صغير بكره لاكبر بياكلنا
عليا وقد مرت في ذاكرتها موقف محزن ومفرح في ذات الوقت:حصه تذكرين اول ماجا ضيدان
حصه وهي تبتسم بألم:اييه هو به احد ينسى ذيك الايام
عليا بحزن:تذكرين يوم شاهه تدور فيه في البيت كله وهو يبكي وهي ماتدري شفيه
حصه بألم:وحنا قمنا نتبعها ونبكي على بكاه
عليا التي لم تسيطر على دموعها:وكل ماحبيناه قام يتلقفنا بثمه
حصه التي تمسح دمعاتها على تلك الذكرى التي تدق في قلوبهن نواقيس الحزن:وعقبها حطته شاهه وقامت تبكي وهو يبكي وانا وانتي معهم مدري شحاجتنا
عليا وهي تمسح عينيها:الله يرحم عمتي وسميه
الكل:آميين
ام شاهه التي كانت تشاركهن البكاء فهي تتخيل حالهن في تلك الفتره:وليه ماوديتنه عند جدتكن
عليا بحب:يارب انك ترزق شاهه البر في عوالها
ثم اردفت هي تتنهد:آآه ه جعلني قبلها عيت توديه لجدتي عشان ماتزعجها وهي قعدت اربع ايام ماطب النوم عينها
الجده بحزن:ياشين مامر تيك البنت جعل ربي يعوضها خير
اتاهم صوت غائب له فتره ويحملهم الالم والشوق على شطآنه:آميين
الجده التي التفتت لتنظر لمصدر الصوت لقد توقعته حلم او سراب
حصه التي صرخت:شااااهه
ثم اتجهت لتضمها وتقبلها بلهفه:يامرحبا يامرحبا تو مانورت الدوحه فديت عينش
ام شاهه وهي تبعد حصه:وخري منها خلني اشوفها
ابتعدت حصه لتقترب ام شاهه بقلب منفطر اثر غياب صغيرته التي رحلت منها حامل وعادت لها ام لطفلين:حي ذا العين من شوفش جعلني قبلش
شاهه التي تضم والدتها بقوه:وحشتيني يابعد روحي
ام شاهه وهي تقبلها وكأنها طفله صغيره:لبى وجهش تكفين يامش لاعاد تبعدين
شاهه وهي تقبل كفي والدتها بلهفه:يازين ريحش يمه ماغاب مني يوم
ثم اردفت وهي تبعد والدتها لتنظر لمن انفطرت عينيها بالدموع فرحا وشوقا اضناها:لبى عيونش اللي امطرت من يوم شفتيني
ثم اتجهت لها مسرعه مشتاقه لتنكب علة كفيها وهي تقبلها بشده ورأسها ووجهها
ام سعد التي لم تستطع ان تتكلم اثر كتم عبراتها لتقول لها شاهه:توبه ماعاد اتعداش يمه توبه
الجده التي تقطع صوتها اثر بكاؤها:ايــ... والـــ ..والله مااعاد تعديني
عليا التي تسحب شاهه:بس ذبحتيها بالبكا
شاهه التي تقف وتسلم على عليا لتبادلها عليا بالاحضان وهي تهمس لها:اشتقت لش يالخايسه
شاهه:وانا اكثر يابعدي
ام شاهه التي تعدل برقعها:وين عوالش
الجده التي تمسح دموعها بطرف برقعها:ايه صدق بزرانش وينهم
شاهه وهي تخلع عباءتها وشيلتها وبرقعها ليتبين اسطورة الجمال الخارق:ابيهم خذاهم للمجلس وبيجيبهم عقب شوي
الجده باعجاب مفرط اصابها بالخوف على تلك الجميله بل الاسطوره:يامش جعل عيني ماتظرش تغطي
شاهه بابتسامه حب:يمه اتغطى في بيتي
ام شاهه بحب وانبهار:اي والله يامش ماشاء الله عليش ذا الصبغه خلتش تضوين ضوي
حصه بحب:ماشاء الله روعه شوي عليش شوشو
شاهه وهي تحرر شعرها البني:بغين اقصه بعد بس امي نوره حلفت علي
الجده بغضب:والله لاتقصينه ان احمس عليش
ام شاهه بتحذير:اياني واياش تقصينه اذبحش
عليا:اقولها وتقول لا بقصه
حصه بتحسر مازح:والله لايشوف فلاح شعري طول شعرش ان ينجن
اتاهم صوته الوقور المحبوب:احم احم ياعرب
ام سعد بابتسامه لانها تعرف مدى تلهفه لتلك الفاتنه وفرحته بقدومها:تعال ولا تجيك بنتك
شاهه التي تقف وتتجه له ليتبين غصنها الريان الذي ازداد جماله بعد ولادتها:الا انا اللي بجيه
ثم ضمته بحب نادر وخا له وحده:جعلني مااذوق حزنك يبه
الجد الذي يضمها بحب:يالله حي بنتي اللي هملتني عشان ذاك الاسود المخنز
شاهه بخجل:مااحد ياتي نقطه في بحر حبك ياابو سعد
الجد بفرح شعت من عينيه:هههههههههه وش اغلاش عند ابوسعد غير كذا
ثم اردف بحب اعظم:ماتعلميني من وين انتي جايبه ذا الذيابه
الجده بتلهف اكبر:ياويلي على شوفهم
الجد:ابد ابشري بهم هذا لطام جايبهم وراي
ثم اكمل وهو ينظر لعليا وحصه:قومن داخل خلن لطام يدخل
ماان انهى كلمته حتى قيل خلفه:ياهل البيت
الجد:اقلط حياك
دخل وهو ينظر لها باعجاب في كل لحظه يزداد ويشعل فتيل حبه لها اكثر:شاهه تعالي شلي سعد
تقدمت له لتحمل سعد الصغير الذي يرتدي بدله مشابهه تماما لبدلة شقيقه:اسم الله على الشيخ سعد
الجد بنغزه:مانيب لايمك لاتكرسعت يابيك (يقصد لطام)
تشربها احمرار الخجل بعنف قهي علمت معنى كلامه
لطام وهو يدخل للصاله عند جدته:هبت بنا الهبوب يمين وشمال
ضحك الجد بفرح لانصلاح الامور:ههههههههه
حين راته غاب كل ماحولها وحوله فهو البكر وهو الغناه بعد الفقر وهو الحب بعد الجمود
الجده ببكاء اعنف مماقبله:يامرحبا ياذخاير الجد
اقترب لها بعد ان سلم على ام شاهه وقبل جبينها واعطاها الصغير ليتناول كفيها ويقبلها وهو يستنشق عبيرهما:يابعد الروح والعمر انتي
الجده وهي تقبله بحب شطرته بينه وبين زوجته:حي ذا العين من جنيني
الجد وهو يجلس على احد الكنب:انتي غار سجيتي من الكل حتى من عواله من يوم شفتيه
الجده وهي تتلفت لترى احد الصغا بين يدي ام شاهه التي ترفع برقعها قليلا وتقبله بوله:عطوني اياهم
شاهه التي مدت لها سعد برفق:ها يمه سمي هذا سعد
حملته لترفع البرقع لتأخذ حريتها بتقبيله وضمه لصدرها وتنفس رائحة والده ووالدته فيه:يازين المودمي ياعرب
الجد وهو ينغز الصغير بمزاح وبخفه:هو به مودمي عشان تقولين ياوينه
الجده بغضب:لطام وش قومك على البزر لاتوجعه
ضحك الجميع:ههههههههههه
الجد بعتب كاذب:تنهزريني عشان ذا الزعطوط
الجده وهي تضمه:ذا الزعطوط خذا قلبي من شفت عويناته
ام شاهه وهي تقترب وتمد الصغير الاخر والذي اصغر حجما من شقيقه قليلا:هاش يمه هذا بداح
الجده وهي تمد سعد لشاهه:يالله ان تحفظ ماحفظت بنتي(يعني ان الصغير يشابه والده تماما)
ام شاهه وهي تحمل الصغير الاخر:من غير سواد يمه
لطام بمزاح:افا يمه حتى انتي
ام شاهه وهي تضم الصغير:جعل مايزين حالي ان كاني مانيب اشوفك مزيون
لطام وهو ينظر لجدته:اشوا زاد حزبي
الجده وهي تلف الصغير برفق:ماعليك منهم وانا امك كلك زين يابوسعد
لطام وهو ينظر لتلك الجالسه بجانب والدتها:اهم شي لااحد يقول فيني شي وشاهه قاعده بتقول بعد شايب واسود
الجد:مانيب لايمها شوفة عينك الزين متحاولها وانت مخنز
لطام وهو يبتسم:اثره طايح سوقي عندك يبه
الجده:اهم شي عندي تسوى الدنيا كلها
شاهه وهي تبعد خصلات شعرها المتناثره مما اثار مشاعر ذلك المجنون:افا يمه وانا
الجده بعنصريه مازحه:اخيييه منش انتي بنت جدش ولا هو ولدي وعيوني وقلبي
دخل ابوضيدان:من ذا اللي تغزل فيه امي اربه ابي
لطام:لايبه تغزل فيني وجدي يتوعدني
ابوضيدان وهو يجلس بجانب والدته:وانا يمه وش انا عندش
الجده:انت حلال وضحه منت بحلالي
اكتساها خجل اقبل بها على ضيق التنفس
ابوضيدان وهو يضع يده على قلبه:لبى ذا الطاري
وقفت بسرعه لتهرب للداخل وهي تقول:بروح اجيب القهوه
الجده بابتسامه:ياوجه الله ماكن القهوه قدامها
شاهه وهي تحمل شقيقها الصغير وتدير وجهه للطام:لطام شوف فيصل
لطام وهو يقوم ليجلس بجانبها:ماشاء الله
ثم انحنى وقبله بحنو ثم مال لها حين رآهم ملتهون بالحديث:قطعتي قلبي ذا الليل
لكزته لتهمس له:امس علي
لطام وهو يعلم انها خجلت لانها تميزت بهذه الكلمه حين تخجل:هههههههههههههههههه
التفت له الجميع ليقول لهم مبرراً:فيصل سوا حركه ضحكت عليها
الجده وهي تعود للنظر لابو سعد وابوضيدان:لاوالله غيرها هو اللي سوا حركات على قولتك
فأي خجلا مرغها وسطه هذا الليل
ابتسم وهو يرى جمالها يصل ذروته المجنونه باحمرار وجنتيها
همس لها:اجهزي انتي وعوالش عشان تشرفون بيتكم عقب شوي
شاهه بفرحه:ابشر
............................................................ .....
في منزل ابوفيصل
كانت تتصل بعمتها حين دخلت عليها والدتها الغاضبه
اغلقت الهتف لتنظر لوالدتها بقلق:يمه شفيش
امها:فيني ان اخيش مصدوع
هي باستغراب:ليه وش سوا ومن هو منهم
والدتها:ناصر يقول ان العرب حددو عرسش عقب اسبوعين من عرس اخيش ووافق هو وابيش
جواهر بفرح:صدق يمه
ام ناصر باستغراب:ايه صدق
ثم اردفت بغضب كامن:وش مفرحش مستعجله على العرس
جواهر بفرحه غامره فهي تتلهف للقائه لتفني حياتها من اجله وتحت قدميه:الحمددله يارب
ام ناصر بخجل من وقاحة ابنتها:جواهر ومرض وش قلة الحيا ذي اللي فيش
جواهر وهي تجلس على سريرها:آآآآه ه ه ماراح تحسين باللي فيني الا لاجيتي مكاني
ام ناصر بغضب عارم:الله يسترنا بستره وش ذا الفصاخه
جواهر بهيام:ياحظي ويابختي
ام ناصر وقد شكت بشيئ ما فأقبلت لتمسك ببنتها بعنف:جواهر وش بينش وبينه تكلمي
جواهر برعب فهي لتوها تستوعب ماقالته:والله مابينا شي يمه
ام ناصر وهي تنظر لها نظرة اشمئزاز:ماهقيتها منش يابنت بطني تعاشقين مع رجال ماتعرفينه
جواهر بصدمه:لاوالله يمه والله انش فهمتيني غلط
ام ناصر وهي تبعدها بقرف:ليتني ماجبتش ليتني ماجبتش
جواهر وهي تمسك بيد والدتها:يمه تكفين لاتهقين فيني الردا يمه
ام ناصر وهي تدفعها بشده للخلف:انقلعي مني وراش لاتنجسيني
ثم خرجت لتتركها خلفها في هول صدمتها فهي لم تعي لنفسها حين قالت ماقالته في ثورة فرحتها
............................................................ ..........
في منزل ابوسعد
كانن يجتمعن حول قهوتهن وتلم بهن الفرحه التي افتقدناها
ام شاهه وهي تنظر لفيصل الذي ينظر لهم بهدوء:اللهم سكنهم مساكنهم مدري شعنده ساكت ويشبح فينا كذا
عليا:هذا يايمه الهدوء الي يسبق العاصفه يؤسفني انه اليوم مافيه ممسا وحنا بكره ورانا قومه من صبح
شاهه وهي تحمله برفق وتقبله:فديت العيون مزينها
ثم اردفت بشوق عاصف شطر قلبها لشغفها برؤية ذلك المعتصم بالمجلس فهي حين دخلت كان هو يجري باتجاه المجلس وقالت لهم ان ياتوا به لكنه رافض ان يقابلها:ماتعلموني ولدي وينه
الجده:ياويلش ان قربتي عوالش لاجا والله ان يذبحهم
شاهه وهي تأخذ هاتف المنزل لتتصل بلطام:جعلهم فدوة له وانا معهم
ثم اكملت وهي تجيب على لطام:هلا لطام
لطام:هلا فيش شعندش داقه لاتقولين بتروحين البيت لانه تو الناس
شاهه بابتسامه:هههه لا لا ابي اللاجئ السياسي اللي عندكم
لطام وهو يهمس:من يوم جيت وهو مايداني شوفي ولا قالو له روح ماما جات قال لا ماابي الله اعلم انه تنازل منش لي انا وعوالش
شاهه بصدمه:معقوله مايبي يشوفني
لطام:الظاهر
شاهه بحزم:لطام ولا عليك امر جيبه لي غصب
لطام:اسمعي انا مايدانيني اقرب منه بخلي فهاد يجيبه لكم
شاهه باستنكار لهذا الوضع:ماشي
ثم انهت مكالمتها لتقول لوالدتها بصدمه:تدرين يمه ان ضيدان مايبي يدخل البيت عشاني فيه
الجده:يابنتي الصبح يهون ذا كله
ام شاهه مؤيده:امي صادقه كلها كم يوم ويهون
اتاهم صوت فهاد:ياعرب ضيدان جاكم
فتح الباب بصعوبه ودخل امامهم وهو ينظر لها وللصغيرين
اما هي فقد نهضت بقوه لتتسارع خطواتها له وهي تريد ان تضمه لتخمد نيران شوقها:ضيدان ابوي انا ليــــــ........
لكنها بترت جملتها حين رأته يهرب منها ليختبئ في احضان عليا وهو يصرخ:لا وخري عني مابي
صمت الجميع صدمة مما حدث
شاهه وهي تتقدم منه وهو في احضان عليا:ضيدان انا ماما تعال
ضيدان بشراسه وهو ينظر لها بغضب طفولي:لا انتي مو ماما انتي ماما هذولا(وهو يشير لابنائها)
انتزع قلبها من كلامه البريئ لتتقدم باصرار وهي تخلصه من احضان عليا لتضمه لصدرها بقوه وهو يحاول الخلاص لكن دون جدوى
لكنها شدته لصدرها اكثر حين سمعت صوت بكاءه وشهقاته وهي تهمس له:ضيدان ليه يبه ليه تبكي منو طقك منو خانقك
لم يجبها سوى بانه حاوط عنقها وهو يدفن وجهه في عنقها:ماحد
شاهه بألم:اجل ليه تبكي
ضيدان ببكاء:عشان انتي صرتي مو امي صرتي ام دادات ثانين
شاهه وهي تبعده وتنظر لعينيه التي تشبه عينيها:منو قال كذا
ضيدان:كلهم قالو
شاهه وهي تبتسم له بحب امومي:لا انا بس امك انت
ضيدان وهو يعاود عناقها بفرح:صح صح انتي بس امي انا
الجده:ياويلكم ياسعد وبداح
شاهه وهي تبعده وتنظر له بنظراتها التي يعشقها ويفهمها منذ صغره:انا برويك صبيين حلوين لما يكبرون يصيرون اخوانك
ضيدان وهو يتلفت:وين
شاهه وهي تنظر لسعد وبداح النائمين:هذولا بكره يكبرون تلعبون مع بعض وتروحون البقاله مع بعض
ضيدان بتقبل:ويلعبون معي كوره مثل فهاد
شاهه بفرح:حتى فيصل بيلعب معكم
ضيدان بغضب:فيصل لا
عليا:مالش امل مايبي يسوي هدنه مع فيصل عدوه اللدود
شاهه:خلاص فيصل لا بس انتو
ثم اتت الخادمه لتنبأعليا بان العشاء انتهى
............................................................ .........
في اليوم التالي
كانت تنزل السلم بحزن رغم انها يجب ان تكون فرحه فاليوم عرس شقيقها واختها وصديقتها المقربه
ابوفيصل:يامرحبا ببنتي
جواهر وهي تقبل جبينه:المرحب باقي صباح الخير
الجد:صباحش النور
همست ام ناصر بحيث لايسمعها سوى جواهر:ياخسارة حبه فيش
تصلبت عظامها ألما من كلمة والدتها وحزنا علة حالها
اتاهم صوته الجهوري المتميز اليوم في نظر من حوله:صبحهم بالخير
الجد والبقيه:صباح النور
الجد:يوووه الوجه يضوي
نايف وهو يجلس بجانبه بعد ان قبل جبينه:مابها شك ليه مايضوي وانا اليوم معرس
الجد وهو يفهم مغزا كلامه:مانيب معرس حتى لو تزين لي اياه
نايف:ههههههه فاهمني وكاشفني
جواهر:نايف اصب لك حليب ولا قهوه
نايف:لا لا قهوه
ام ناصر بضيق:هاتي الدله انا اللي بصب له انتي قومي اجهزي
استغرب الاثنان تصرفها مع جواهر لكنهما صمتا ظنا انها قد تشاجرت معها لسبب معين خاص بهما
ذهبت جواهر وهي تداري دمعتها عن اعينهم
نزل ابو ناصر وناصر:صباح الخير
الجميع:صباح النور
ناصر:يالله اخلص عشان يمدينا نروح الحلاق ونشوف باقي الاغراض العوال يتنونا في الخيمه
ابوفيصل:جعل ربيي مايفرقكم
الجميع:آميييين
وبعد الفطور تفرق الجميع والوجهه النهائيه العرس
............................................................ .............
في منزل ابولطام
كانت تنزل من السلم وهي تحمل صغارها:صباح الخير
الجميع:صباح النور
ثمينه التي تجلس عند والدتهامنذ البارحه:مابغينا نشوف مره غيري وغير امي في بيتنا
شاهه بخجل:امي نوره الخير والبركه
ام لطام بحب:جعل امش نوره ماتذوق حزنش
لطام وهو ينظر لها بطرف عينه فهو لن ينسى ماحدث في الليلة الماضيه حين دخلا شقتهما
لطام وهو يمسك بيدها:ادخلي برجلش اليمين
شاهه وهي تسمي وتدخل بقدمها اليمين:بسم الله
دخلا والخادمه تدفع عربة السغيران التي اتت بها عبر المصعد
زحين خرجت الخادمه نظر لها:امس علي هاه
شاهه بابتسامه:وش اسوي بك وانت قليل ادب
لطام وهو يلصق انفه بانفها:انا قليل ادب
شاهه بهمس:اممممم
همس لها بغرام وعشق لم يسبقهما به احد:احبش
شاهه وهب تعاني جنونه:وانا احبك
لطام:تهقين في يوم نفترق
شاهه وهي تضمه:لا ان شاء الله بموت عقبك يالطام
لطام وهو يستنشق عبير شعرها:مانيب مسامحش ان خليتيني
شاهه بهمس باكي:كرهتي في يوم
لطام وهويشدها حين سمع صوتها الباكي:كرهت عمري في الساعه اللي كنتي مانتيب حلالي
شاهه وهي تلكمه على ظهره:وانت ليه خليتني
ابعدها لينظر لها بعتب:كنتي تبيني اجودش وانتي تصيحين
وهو يقلده:تكفى يبه خله يطلقني
ابتسمت بألم وهي تعود لاحتضانه فهي ادمنت احضانه دون سابق انذار:اهئ اهئ وانت ماصدقت على الله كان قلت هذي مجنونه وماينشره عليها
لطام وهو يضمها:ليه تبكين حزنتي على الماضي ولا ذاله من الجاي
شاهه:خايفه اقوم في يوم مااعينك جنبي
لطام وهويدفنها في اقصى اعماقه فهي لمست وتر خوفه وهاجسه
ابتعدت عنه لتمسح دموعها:اوف هذي عادتي اخرب على عمري احلى اوقاتي
لطام وهو ينظر لعينيها:لبى عيون ضيدان اللي تشبه عيونش ولبى صوت جدتي اللي يشبه صوتش ولبى خشم وثم بداح اللي مثل ثمش وخشمش ولبى ولبى ولبى كل من يشبهش وفيه منش
استدارت وهي تخبأ وجهها بين يديها لتبكي بعنف
اتجه لها ليديرها له وهو يقبل عينيها الدامعتين وهو يقول:ماخبرتش قريبة دمعه
............................................................ ..................
في منزل ام وضحه حيث تكون العروس
ام وضحه وهي تصرخ من اسفل السلم:يادلوووووول يالله ابطينا
وضحه وهي تخرج من الحمام(اعزكم الله) وهي تحمل ابنها بفوطه بعد ان حممته:ويلي على المراح معكم
ام وضحه بحنان:مالله بكاتب لش تحضرين ان شاء الله عرس جواهر
ثم اردفت:ادخلي بالصبي لايبرد
وضحه وهي تدخل الغرفه لتلبس صغيرها
وبعد وقت دخلت دلال باحثه عن محمد الصغير:وضحه عطيني حمود
وضحه وهي تمد لها الصغير بحنان وحب فشقيقتها ستصبح عروسا اليوم
دلال التي تضم محمد وتقبله بشغف:فديت ريحتك
وضحه:دلول الله الله في عمرش وفي رجالش
دلال التي تحاول اخفاء دموعها:تكفين وضحه ترا كلمه زياده واسوي لش سيول هنيا
وضحه وهي تقترب وتضمها:ليه ليه يابعد وضحه وش يبكيش
دلال ببكاء:مدري ياوضحه قلبي موجعني احس فيه شي مهوب طبيعي
وضحه:يابنت الحلال هذا كله توتر العرس
دلال وهي تبتعد وتمسح دموعها بيدها واليد الاخرى تحمل فيها الصغير:يمكن ....يالله هاش ولدش خليني اروح امي ذالحين بتجلدني عشاني تاخرت
لكنهما لم يرا من كانت تراهما وتوادعهما بعينيها وقبلها قلبها
............................................................ ........
وفي وقت العصر وفي جناح العروس
كانت ام شاهه مرافقه ملازمه لدلال المتوتره والتي تصرخ على عليا المازحه كعادتها والبقيه
دلال وهي تنظر لعليا التي تشرب عصيرها:انتي وبعدين معش اكل ومرعا وقلة صنعه
عليا ببرود فهي تعلم بتوترها:يا قرد حظي هذا انا ساكته لاتنشبين في حلقي
دلال وهي تصرخ:يووووه جواهر ابعديها عني
ام شاهه التي تجلس دلال:يابنتي لاتوترين ترا مهوب مسوي لش شي ذا الصياح الا بيزيد الربكه ويضيع وقتش اذكري الله واقري الادعيه
دلال بحزن وهدوء عكس هيجانها قبل قليل:والله اني اقرا الادعيه من يوم قمت بس في شي في صدري احس اني ضايقه
ام شاهه:يامش هذي عادة كل العرايس وهذا شي طبيعي بس ذكر الله يهدي النفس
شاهه وهي تجلس بجانب دلال:دلول لاتخافين كلنا معش حتى وان كانت وضحه غايبه
وقفت ام شاهه متجهه لام وضحه التي منعزله تماما عنهم:ايه تكفين احكي عليها
ثم ذهبت لام وضحه لتجلس بجانبها::ام وضحه شقومش منحازه كذا ليه مانتيب جنب دلول
ام وضحه وهي تمسح دموعها:تكفين ياوضحه ياختش خليش معها
ام شاهه بقلق:شفيش
ام وضحه وقد تهدج صوتها مره اخرى:انا بسري مع اخي ذا الليل بعود لاهلي
............................................................ ...................
بـــــــــــــــــــــــــــــقـــــــــــ شـــــــــــــــادن لـــــــــــــــــــــــــــــــــــم

صباح الخيرررررر اختي دهن العود تسلم ايدش على البارت .............اكثر ماثر فيني موقف جواهر وامها اصعب شي ان البنت تشك فيها امها الي تعرفها ومربيتها انا استغربت من ام جواهر لو حد غيرها كان اخذ الموقف على ان جواهر اكيد تضحك معها او اي شي ثاني بس كبيرة انها تشك فيها ..................ضيدان فديت الي يغارون ياناس ..................لطام وشاهة مابغيت يالطام تفرح قلب شاهة بالكلام الحلو قطع قلبي وهو يتفدا بكل منهو يشبة لها اثاريك منت بهين يالطام ............... نايف ودلال ماعندي صبر علشان اعرف ويش بيصير بينهم ............ فهاد وعلياءوينكم اللة يسكنكم مساكنكم كل مااجتمعتوا حطيت يدي على قلبي كل واحد اعسر من الثاني بس احبكم واموت عليكم اختي دهن العود مرة ثانية تسلم يمنش وجعل ماتعرض على نار علي هالرواية الرائعة