السلام عليك ورحمه الله وبركاته

شدونتي كل عام وانتي بالف خير
تسلم يدينك يالغلاا على هالبارت الرائع

لطااام وشاهه
صدق لي قالواااا ضب الحبيب مثل اكل الزبيب اللحين الرجال جالس يضرب وينافخ مع وجهه وانتي جالس تمقليم فيه سلاماااات من زين حلاياه والا طبعه بس وش نقول الحب اعمى
لا وهو بكل قواة عين يقولك اصبري علي وتحمليني لاتكسريني كسروكم ا خلو فيك ظلع صااحي انت الي استح على وجهك وكف يدك
بدوووحي يارب تشفيك وتخليك لامك وتطمن قلبهاا عليك

ناصر و وضحى
الف الف مبروك الافي وجعله عبدا صااالح واخير شرف ما بغى اشوي وتطلع روح ناصر من المحاتهاااااا
وضيح وجع انتي في حاله تبين نويصرك اهجعي يمال الي مانب بقايله خلك في وجعك وطلقك ولا عليك منه


حصه وفلاح
الله يشفيك ويعافيك ويرفع عنك البلااااااا يارب ويطمن فلاح عليك والله عورني قلبي عليه وهو يشوفك كذا تتعذبين
وهو مو قادر يسوي شي لك

جوااهر وعساااف
ياني مشتاقه اشوفهم بيت واحد واشوف كيف عساف يتصرف مع الجوهره بس ماعجبني كلامه لضيدان ويزرع فيه العنف
وان الضرب هو العلاج اكيد اللحين الجوهره بتاخذ عنه فكره ان يده طويله

شدوونه جعل يمينك تحج يالغلااااا

هلا شدون ياقلبي تسلمين على العيدية وكل عام وانتي بخير ياعسل ...........بارت حلو مليء بالاشياء الحلوة ماعدا حال حصوص الي يعور القلب

شاهة ولطام حياتهم متذبذبة مع انو مرت بينهم شهور وصار عندهم عيال بس احسهم محتاجين وقت طويل يتفاهمون فيه

ولطام بعد لازم يتنازل شوي ويغير من حالته مع شاهة وخصوصا اذا كانو منفردين مع بعض مايصير هالتقلبات الي مخربة حياتهم غير كذا لاينسى فرق السن بينهم مو قليل لذلك من حق شاهة عليه يحسسها بحبه ويسمعها كلام حلو خصوصا وانها طول حياتها كانت كاتمة احزانها بقلبها وانحرمت من اشياء كثيرة

بداح يعور القلب مرضين كل واحد اصعب من الثاني وهو بسن صغير اتمنى مايكون مصيره نفس مصير عمه وينعاد الحزن على ام لطام بالذات


وضحة الحمد لله انو ولادتها عدت على خير ويتربى بعزهم هي وابوه ويشوفونه يكبر بينهم ......بس وربي تحكمات العجايز مبالغة شوي خير لو جاء معاهم ناصر المستشفى وانتظر برى غرفة الولادة والله هالشي يريح الحرمة وتحس بقيمتها عند زوجها ماراح يقلل من اهمية الزوج وبعدين يفضلون تروح مع سايق هندي اجنبي وهي تطلق بدل زوجها محرمها لو صارت لها ولادة بالسيارة مع زوجها اهون وحتى صراخها يسمعه زوجها ولا رجال غريب اجنبي


وحتى الرجال ممنوع يعبرون عن فرحتهم ولا بيعتبرونها عيبة وتقليل رجولة اول ولد غير البكر له فرحته بس الكتمان حسرة بالقلب بصراحة



عساف شهالافكار الماصخة والهمجية الي يعلمها لضيدان وين راح تعليمهم وشهاداتهم اذا عندهم الضرب مرجلة للحرمة اجل نهار وفلاح ماهم رياجيل لانهم يعشقون حريمهم ويعاملوهم باحترام والا لازم الضرب اجل كيف بيعيش مع الدلوعة جويهرة الي ماتتحمل احد يدوس لها على طرف بتلوع كبده منها ههههههه

الا متى جويهر شافت عساف مااذكر والله اجل شافته وماتوقعته انو بيكون هو نصيبها اجل خلاص تحلم فيه على كيفها وشكلها بتعيش احلام وردية قبل زواجها منه وبعدين بتصحى على شي ثاني


عليا والله حالة جمالها مابيغطي على عوابتها وطولة لسانها ورمي كلام ماينقال لولد عمها الافضل تعدل اسلوبها من نفسها لايعدله لها فهاد بطريقته وهي الي بتجني على حالها


حصوص شهالعين الي صابتها مرة وحدة لايتركون البنت لاتروح من ايدهم شهالامراض الي ابتلو فيها بنات ناصر جمالهم جاب لهم المرض والتعب الله يشفيها حالها وحال فلاح يحزن من قلب

اتوقع ابوها وعليا يرجعون بسرعة اذا عرفو بحالتها والله يعينه هو وام شاهة على هم بناتهم يبيلهم يحصنوهم من العين لانو زينهم زايد وملفت للنظر


في انتظارك شذونة على نار

سلام شدونه عيدك مبارك وعيدية حلوة منك

لطام وشاهه
هالشاياب المخرفين ان خبري الشايب يدلع وشياب الروايات مغير يقهرون حريمهم جعل يدينكم الكسر وعلقولت المثل شين وقوات عين على شين هالطام الا انه ينافخ ويصارخ وشاهه ياقلبي هالمسكينه حبته بقوة ومتحمله شين طبايعه الله يخليلك عيالك ويشفيلك بداحك

حصة وفلاح
ياقلبي حزنوني ربي يخلفكم باللي احسن منه

وضحى وناصر
ياكثر الحريم اللي تدور رياجيلهم لحسوا بوجع الولاده بس خبري انه تصيح فيه سب وتلعن وضرب وهذي تتغزل فيه بلاك ماحسيتي بالوجع الصدق " ابي ناصر ... ويه ويه .. ناصر احبك "" الله من الخرطي والدلع الماصخ

عليا وفهاد
الحين ياعلاوي الحين تتحسرين هذا سوايات يالخبله تستاهلين وطبخن طبختية يارفلا اكلية وتستاهلين باللي يجيك من فلاح لكن امشي على الخطة الخماسيه الخنفشاريه النسائية وراح يطيح اللي براسه

جواهر و عساف
عسافوه يالدعله ليه تربي الولد على الضرب جعل اول يد يمدها يمدها عليك وتعرف قرك
جواهر والله من لمن شفتيه وسمعتي كلامه لاوالله ضاعت علومك وقلبك اخترع الله يعوض عليك

نوره وصقر
للحين ننطر عرسكم والعزيمه للحين ماوصلت لنا من شدونه ابي ازهب الفستان

دلال ونايف
اخوه يصير خير بعد العرس نتفق تكونون اخوان او شي ثاني

ثمينه ونهار
لبى العشاق ربي يتمم عليكم ويكملها ويرزقكم بالذرية الصالحة " واذا جبتوا بنت سموها مشاعل ولكم السمايه"

تسلم يدينك شدونه وننتظرك على خير ولا تطولين علينا

السلام عليكم
جمعه مباركه على الجميع
حبايبي اليوم ان شاء الله بينزل بارت
اختكم\شادن

السلام عليكم


البارت الثالث والخمسين
............................................
شاهه بحزن على شقيقتها الصغرى:وهي اللي طرحت بزرها؟
الجده:اي بالله هي اللي طرحته ....... والله يامش انها متحطمه جعلني قبلها
شاهه بأسى:وامي شلونها
الجده وهي تتذكر حال ام شاهه:هذي هي بين اخيش الصغير وبين حصه والله يامش اني ذاله عليها من الحزن والتعب
شاهه برأفه:تكفين يمه احلفي عليها
الجده:لا والله يامش مانيب حالفه عليها اقطع كبدها وبس
شاهه وهي تنظر لسعد الصغير الذي شرع بالبكاء:يالله يمه مع السلامه ولدي يبكي
الجده بشوق ولهفه:من ذا منهم
شاهه:هذا سعد
الجده:لبى صوته جعله بعد صوتي ...... يالله حافظش ربي
انهت مكالمتها وحملت صغيرها الجائع:اسم الله عليك
ام لطام بقلق:من ذا اللي طرحت بزرها
شاهه بحزن يغلفها:حصه جعلني قبلها
عليا التي كانت تسكب لنفسها فنجال قهوه:هاااااه ليه
شاهه:امي شاهه تقول فيها تابعه
ام لطام بحزنن:جعل ربي يعوض قلبها خير
عليا وشاهه بصدق:آمييين
....................................................
في المستشفى
كانن ام ناصر وام وضحه يحاولن ان يوقظن الصغير لكن لاجدوى
ام ناصر وهي تقبله:لبى العوينات اللي مافتحتها
ام وضحه بحب:ماكني اشوف الا امه
ام ناصر بنفي:لا والله نسخة ابيه
اتاهن صوت من كان يفتح الباب:لا هوب لامه ولا لابيه غادي لخالته
ثم تقدمت لتسلم على امها وام ناصر:مبروك ماجاكم
ام ناصر:يبارك في حياتش ويرزقش مثله من عمرش
ام وضحه:آمييين ياربي
ثم اردفت بغضب:من انتي جايه معه
دلال بابتسامه:لاتخافين جايه مع جدي
لم تكمل كلمتها حتى دخل جدها:سلام عليكم
ام ناصر وام وضحه:وعليكم السلام
ثم قبلن جبينه
دلال وهي تحمل الصغير:لبى روحه ياربي يازين الصبياااان
ابو فيصل وهو يضع عكازه بجانبه:هو به زين ولا شين لحمة ملفوفه في خرقه(خرقه=قطعة قماش)
ام ناصر بحب احتل قلبها وفاض وهي تنظر لتلك(الخرقه):ذا الخرقه ذالحين تسوى عندي الدنيا كلها
الجد وهو يامر دلال:دليل هاتيه خليني اشوفه
دلال وهي تقرب الصغير لجدها:سم يبه
الجد وهو يحمله:اسم الله عليك
ثم اردف بابتسامه وهو يرى الصغير بين يديه:يالله اصلحه جعل مهوب واحد
ثم انحنى وقبل جبين الصغير واطال في قبلته ثم اتجه ليأذن في اذنه
.............................................
في غرفة حصه التي كانت لتوها تستيقظ من سباتها
ام شاهه وهي تحتضنها:الحمدلله على سلامتش ياروحي
حصه بألم يخالطه حزن العالم:الله يسلمش
ثم اردفت ودمعاتها تنهمر بحراره:تكفين يايمه راح راح وانا اشوف
ام شاهه ويه تشد من ضمها:اشششش قولي الحمدلله على كل حال النسوان بعضهن تموت مالها نما وبعضهن ماتحمل الا عقب عشر وخمس تعش سنه ولا انتي الحمدلله عادش صغيره والعمر قدامش ولا فيش عوق الحمدلله
حصه ببكاء مرير:يمه بموت من الحره اني ماقدرت اسوي شي
ام شاهه:هذي كتبت ربي وانا امش مايجوز تعترضين عليها
حصه وهي تخبئ وجهها في صدر والدتها:آآآآآآه ه ه ه
دخل من كان ينتظر صحوتها بشغف:سلام عليكم
ام شاهه بهدوء:وعليكم السلام
اقبل وهو يرى نظرة عينيها المتألمه والحزينه:الحمدلله على سلامتش
حصه وهي تحاول ان تتماسك:الله يسلمك
ام شاهه التي رن هاتفها وقفت متجهه للاستراحه:انا بكلم التلفون وبجي
ثم خرجت للتركهما لوحدهما
حصه وهي تخفض انظارها بألم:انت متضايق؟
لم يجبها سوى انه جلس بجانبها ليشدها لصدره بشجن:تضايقت يوم شفتش بذيك الحاله انا آسف اللي ماحسيت فيش
كانت تتعلق بجيبه متلهفه للمزيد من دفئه
ابعدها بعد فتره ليست بقصيره لينظر لوجهها الذي يعشقه:يروح البزر ولاتروحين مني
حصه:استاجعت من الفجعه استاجعت
فلاح وهو يعود لضمها وتهدئتها:بس خلاص اللي صار صار وبكاش مهوب راده
ثم داعب ارنبة انفها بمزاح:بعدين تراني اطالبش باثنعش ولد مهوب واحد ولا اثنين
شهقت بصدمه:ليه انا قطوه
فلاح وهو يقبل جبينها:ههههههههههه ياجعلني ماخلا
.....................................................
كان يقف عند اشهر محل للزهور ليستلم باقة الورد التي اختارها باللون الازرق
وبعدها اتجه لمحل الحلويات ليختار اكبر سلى شوكولاته ليتجه بهما للمشفى
.
.
.
.
.
طرق الباب
ليسمع جده يقول:من هو
ناصر:انا يبه
وبعد ثواني:تعال
دخل وهو يتلهف لتقبيل الصغير وامه
ناصر:السلام عليكم
الجد ووضحه وام ناصر وام وضحه:وعليكم السلام
اتجه ليسلم على امه وام وضحه ثم اتجه لها وهي تشير له ان لايفعلها بسبب وجود جدهما
لكنه انحنى عليها ليقبل جبينها تحت حرجها الذي وصل لذروته:الحمدلله على سلامتش
الجد بمزاح:الرجال ماعاد استحى
تعالى خجل وضحه اكثر وتعالت ضحكات ام ناصر وام وضحه
ناصر بابتسامه فرح:ليه يبه يوم جدتي جابت ابي وش سويت
الجد بضحكه:تخلويت بها هي وابيك وقمت اقهويها وامطخ ابيك ذاك الحين عندي ان مابه من البزران الا ابيك
تعالت ضحكاتهم
ناصر:اجل لاتلومني لاحبيت بنت محمد
الجد:لا بالله مانيب لايمك وانا ابيك
ناصر وهو يتلفت:اجل الشيخ وينه
ام ناصر وهي تتجه لسرير الصغير لتحمله:ابشر به
ناصر الذي ماان رآه حتى تعالى توتره للقمه رغم جموده الخارجي
ام ناصر وهي تمد الصفير له:سم
ناصر وهو يحمل الصغير بحذر بالغ:اسم الله عليك
اما الصغير كأنه كان يرفض ان يرى احدا عينيه قبل والده فقد تعالى بكاءه ليقبض قلب والديه حبا له
ثم فتح عينيه لينتزع قلب ناصر وهو يرى ذاك الصغير بوجهه الاحمر وعينيه المنتفختين وفمه الصغير بلونه الاحمر القاني
ناصر وهو يقبل جبين الصغير بقبله طويله كأنه يريد ان يروي ظمأ سنين الصبر:ياعرب قد شفتو ازين من ذا الصبي
الجد:ابد قريد الصغير
وضحه:حرام عليك يبه ذا الزين كله وقريد
ناصر بضحكه:ذا القريد يسوى الدنيا كلها عندي
الجد:ههههههههه لاشك فيها يابيك
ثم اردف:وش نويتوا تسمون الشيخ
ناصر الذي يمد الصغير لوالدته:اسمه معروف من قبل ياتي اسمه فيصل
الجد بحزم آمر:مالك لوا وانا ابيك اسمه محمد
صمت الجميع حزنا على ذكرى ذاك الراحل في قلب المسن الذي لم ينسه يوما
ناصر بتلبيه:ماصار الا هو اسمه محمد
............................................................ ............
في شقة نهار
كانت تقوم بترتيب ملابس صغيرها بابتسامه فرح
دخل عليها بعد ان بحث عنها في ارجاء الشقه ليقول لها:وش تسوين
نظرت له ثم عادت لعملها:ارتب اغراض ولدي
جلس بجانبها ليضم كتفيها:تدرين لو هملتيني عقب ماياتي بذبحش
ثمينه وهي تحتضن خصره:جعله مايهملني الموت ان هملتك
نهار وهو يضغط على كتفيها بحزم:كم مره وانا انبهش من ذا الحكي
ثمينه برقه وهي تقبل كتفه:فديتك ياروحي انا
نهار:بشريني من مرت فلاح شلونها
ثمينه بأسى:لا الحمدلله صارت احسن وبيرخصونها بكره ان شاء الله
نهار وهو يذكر حالة اخيه الذي يحاول اخفاء حزنه:فلاح متأثر واجد من روحة ذا البزر
ثمينه وهي تمسك ببطنها:مالومهم والله ان ذا اللي في بطني ذالحين يسوى عندي الدنيا
نهار وهو يمسح على بطنها برفق:جعل ربي يعطينا اياه كامل وبصحه تامه
ثمينه:آمييين يارب
............................................................
وبعد مرور خمسة ايام على مامضى من احداث
كانت تجلس امام المرآه وتنظر لنفسها
فهي تحاول ان تخطط عما ستغيره في نفسها غداا فغدا ستنهي فترة نفاسها وقد حصلت على عدة صالونات تجميل من احد منتديات المغتربات
دخلت عليا:شاهه
شاهه وهي تنظر لها عبر المرآه:هلا
عليا:دريتي ان عساف تملك جواهر
شاهه بفرح:الله يوفقهم ويهنيهم
عليا وهي تتذكر مكالمتها:آميين اسكتي ياان امش فرحانه فرح
شاهه ببسمه:اكييد هذي جويهر مهيب حي الله
هليا بحزن:دريتي ان حنا بنمشي بعد يومين
شاهه بحزن مماثل:ايه علمني لطام
عليا بحيره:ودي اروح عشان اشتري باقي اغراض عرس نايف انا حتى فستان العرس ماشريته وودي اقعد لاني مابعد شبعت منش
شاهه وهي تضمها:والله اني انا اللي قدني شفقه على الدوحه واهلها
عليا وهي تؤازرها:يابنت الحلال احمدي ربش ماعاد باقي الا خمس تعش يوم وتاتين تحضرين عرس نايف
شاهه وهي تبتعد عن شقيقتها:امانه علوي لارحتي دقي علي وطمنيني على حصوص وامي
عليا وهي تبتسم لتلك الذكرى:تدرين ان امي طلعت من الاربعين
شاهه بابتسامه ساحره للغايه:اممم ادري بس اللي ماتدرين اني انا بطلع من النفاس بكره
عليا بصدمه:صدق بس انيت على حسبتي باقي لش ثلاث ايام
شاهه:لا ياحلوه انا بيني وبين امي يومين بس وامي طلعت من نفاسها امس وانا بكره
عليا:اشوا بكون عندش لاطلعتي من النفاس عشان اخذ سعود وبدوح عنش
شاهه بحزن:والله اني احاتي بدوح لاشبيت البخور وش بسوي به
عليا ببساطه:لاتبخرين الين يرقد هو اخذه انا وانتي بخري غرفتش وتبخري
شاهه:مايرقدون مبكر جعلني قبلهم
عليا:خلاص اجل انا اللي باخذهم طول اليوم وانتي الهي في عمرش
شاهه بحب:جعلني والله قبلش جعل ربي مايخليني منش
............................................................ ..
في جناح حصه وفلاح
كان يجلس هو وهي امام التلفاز يتابعون احد البرامج
ولكن موضوع البرنامج تحول من مشاكل اجتماعيه الى موضوع اطفال
التقط فلاح جهاز التحكم ليغير القناه لكنها منعته حين قالت له:لاتغيره فلاح خلني اشوفه
فلاح وهي يغيره ويقول لها بحزم:مامن متابعته خير
ثم حل الصمت الذي قاطعه نحيبها الخافت
ضمها بقوه لصدره لعلها تهدئ فهي منذ خرجت من المستشفى على هذا الحال الحزن يسيطر على حالها لاتنام ليلاً
رغم ان جدتهما تمرها كل يوم لتأخذها لاحدى النساء التي تعالجها بالقرآن
كان يخطبها وكانه يخاطب صغيرته:حصه ياروحي انا خلاص اهدي مايجوز اللي انتي تسوينه في عمرش كذا وتضايقيني
حصه من وسط بكاؤها:والله غصب عني والله غصب
فلاح بهدوء:اكثري من ذكر الله والله بينسيش اياه
حصه وهي تبتعد عن حضنه لتمد يدها للمناديل وتمسح دموعها المنهمره:ان شاء الله
ثم اردفت بحزن:آسفه حبيبي والله مهوب ودي اني اضايقك بس وش اسوي
فلاح:يابنت الحلال اهم ماعندي انتي ولا ارتحتي انتي وافرحتي تأكدي اني انا مرتاح وفرحان
حصه وهي تدفت وجهها في صدره وتجهش في البكاء:والله اني احبك يافلاح
فلاح وهي يضمها بحزن:وانا كل ماقلت لش شي بكيتي خلاص هذا انا بأسكت
............................................................ ..
في منزل ابو سعد
كانت ام شاهه تضع فيصل الصغير في حضن ضيدان الذي كان يصرخ ويبكي ليحمل الصغير
ضيدان وهو يقبل الصغير بشده وبعنف وحقد طفولي:حبيبي فثول
ام سعد التي تجلس امامهم:يامال فرقا العين من غير شر ذبحك حبه ياماخوذ
ام شاهه:هههههههه ياويله على ذبحته
ام سعد بابتسامه:جعله مايغليني غلاه لفيصل
ام شاهه:هههههههههه جعل ربي يخليهم لي كلهم ويجعلهم عضدا بعض
ام سعد بحب:آميين ياربي
ثم اردفت:ياقردنا لاجات شاهه بعوالها بيذبحهم
ام شاهه بقلق:جعله بس ماتضربه الشهوه
ام سعد بقلق:اي والله قال ابطت عليه ولاجات بيغدي قلبها مع عوالها
ضيدان الذي قذف بالصغير بقرف:يعععع يزوع
ام شاهه وهي تحمل الصغير بسرعه:هئئ اسم الله الرحمن الرحيم ليه ياماما تحذفه كذا
ضيدان وهو يركض متجهاً لجدته ليقول بكره:عشان هو وصخ يزوع
الجده التي تضمه:يامك هذا بزر
ضيدان:وانا
ام سعد بتشجيع: لا انت رجال كبيير
ضيدان بابتسامة فخر:فهاد يقول انا كبيير
ام سعد:ييوووه العلم فيه فهاد اجل مانيب لايمتك
ام شاهه وهي ترضع الصغير من صدرها:ودي اعرف وش فهاد يسوي به
ام سعد:يابنتي المعطي في السما والله انه من طحس في القاع وهو يموت عليه وذاك يصدع عنده
ضيدان الذي بدت عليه علامات الحرج همس في اذن جدته:جده انا صح عيب اطالع امي وضحه
الجده:ههههههههه يالبى خشتك اي بالله عيب
فانسحب الصغير متجها للمجلس رغم ضيقه من خلوه من والده وفهاد
............................................................ ..
في منزل ام وضحه
دلال التي تقذف الصغير قليلا في الهواء:يالبى حمود يالبى حمود
وضحه بخوف:دلول تكفين لايطيح
دلال بضحكه:وش تبين به نتفه وجيكر
وضحه التي اتجهت لها لتاخذه منها:وش ابي فيه...... شعليش ماواجهتي الموت عشانه بكره بشوفش وش بتسوين لاجا لش بزران
دلال:هههههه مااخليش تلمسينهم
وضحه:والله يادليل وانا اللي مخليتش تلعبين بولدي
دلال:احسن هذا عقاب لش عشانش ولدتي قبل عرسي
وضحه:ماينخاف عليش يمه منش
دلال وهي تعود لحزنها:والله اني اتمنى انهم ياجلون العرس الين تطلعين من النفاس
وضحه وهي تلف صغيرها:والله يادلول انه بيصير خوفش ذا ذكريات تضحكين عليها بعدين صدقيني هالتوتر اول شي وبعدها كل شي بيصير عادي
دلال:البلا اني ابيش في الاول بس
وضحه بتخفيف عن توترها:يااسم الله على نايف منش لاتاكلينه ليلة العرس
دلال بغيض:ليه شقالو لش وضحه يوم شافت ناصر
وضحه ببرود لكي تغيض دلال:حبيبتي انا وناصر غيييير
دلال:نعم نعم ليه ان شاء الله وش فيكم زود لاجدكم اطيب من جدنا ولا ناصر ارجل من نايف
وضحه وهي تضم صغيرها:ههههههههههههه يافضحي تدافعين عنه من ذالحين
دلال التي امتلكها الخجل:مدري وش مصبر ناصر عليش يالخبله
ثم اتجهت لغرفتها
لتتعالى ضحكات وضحه في الاسفل:هههههههههههههههههههههههه
.........................................................
في مجلس الرجال
ابوسعد:ياناصر انت دريت ان آل دبيس حددو موعد العرس
ابوفيصل:متى العرس
ابوسعد:عقب ثلاث شهور
ابوفيصل:الله يوفقهم
ثم اردف:وعرس عساف وجواهر وش صار عليه
ابوسعد:لا ابشرك اقنعته يأجله الى شهرين قدام
ابوفيصل:الحمدلله خلاص خله يأكد حجوزاته ويبلغني عشان ابلغهم
ابوسعد:ابشر
ابوفيصل بحب:انت ماشفت ولد ناصر
ابوسعد بابتسامه لفرح شقيقه بهذا الصغير:الا شفته جيتهم ذاك اليوم وعينتك رايحن لموعدك في الطبيب
ابوفيصل باقتراح:وش رايك يالطام لو حنا عقب العرس نمشي كلنا صوب البل
ابوسعد بفرح:ياليته والله
ابوفيصل:خلاص اجل بنلغهم ونمشي نقعد لنا اسبوع ونعود
ابوسعد:خلاص ابشر تم
............................................
في غرفة جواهر
منذ ان عادت من منزل عمتها وهي تعيش في قوقعتها لوحدها فهي لازالت تحت تأثير الصدمه
فصدمتها بعساف لازالت تتوارد في ذهنها
نعم تذكرت ماحدث معها قبل سنين فاتت وكان هو بطل قصتها
التي اصبحت بعدها هي رماد
القصه التي اوشكت فيها على موتها
رباه فأي نعمه انعمت بها علي
شكرا يالهي شكرا
اللهم اجعلني ممن يقدرون نعمتك اللهم اعني على اسعاده فو الله لو اراد روحي لاهديته اياها
.........................................................
بـــــــــــــــــــقــــــــــــــــ شـــــــــــــــادن لــــــــــــــــــــم