كاتب الموضوع :
دهــن الــعــود
المنتدى :
الارشيف
السلام عليكم
صباح الورد بما ان الكثير طالب بالتعريف فأبشرو وهذا التعريف
الجد لطام زوجته شاهه
عياله سعد ومتزوج بنت عمه نوره وعيالهم لطام 34 سنه ..بداح31سنه..فهاد29سنه ..ثمينه21سنه
ناصر ومتزوج وضحه بنت عمه وعنده شاهه19سنه..عليا18سنه..حصه17سنه::::::::وبعدماطلق وضحه تزوج وسميه آل مصلح جابت ضيدان 4سنين وماتت وهي تولده
صيته ومتزوجه ولدعمها واخو نوره سلطان وعندهم نهار33سنه..عساف 31سنه..فلاح 28سنه..نوره 20
................................
الجد نهار وزوجته ثمينه متوفين
عيالهم سلطان ونوره
................................
الجد ناصر وزوجته جواهر متوفيه عياله
فيصل ومتزوج هيا وعندهم ناصر33سنه..نايف29..جواهر 19سنه
وضحه متزوجه ناصر ولد عمها لطام
محمد متوفي متزوج ساره وعندهم وضحه 21سنه..دلال 19سنه
.........................................................
توكلت على البارئ القدوس
البارت الخامس
***********
في بيت ابو ناصر الهادي
فتحت باب غرفة النوم بعد ماتفقدت باقي قصرها الصغير (يالله وحشتني شقتي هذا هو المكان نفس اللي خليته قبل سنه افففف المكان مليان غبــــا.......... قاطعها صوته)
ناصر وهو يحذف غترته على السرير:نظفي المكان على الماشي الين يجي بكره وخلي الخدم ينظفونه كله
وضحه وهي تحط عبايتها ولفتها ونقابها على السرير:لا ماأقدر اخلي المكان كذا بروح اجيب الاغراض عشان انظف الجناح كله
ناصر بصدمه:من صدقش الناس رقود وين تنظفين ذا الحزه
وضحه وهي تبعد القعده الصغيره اللي في غرفتهم:قلتلك ماأقدر انا بنفظ السرير وابدل الديباج وانت ارقد وانا بشوف شغلي(الديباج=غطاء السرير)
ناصر ببرود مصطنع:كيفش(نزلت تجيب اغراض التنظيف)
ناصر وهو يحط لفتها ونقابها على وجهه ويحذف نفسه على السرير بابتسامه:لبى الريحه وراعيتها (وتاه في عالم وضحه )
ايقظه من حلمه اليقظ:ناصر قوم خلني ابدل الديباج
ناصر بارتباك وهو يبعد اغراضها عنه:ها..اي انشا الله
بدأت تعمل بجد وبعد عشر دقائق:يالله خلصت
امسكها ليقربها منه فيضمها مبتغياً ان يدفنها بين عظامه العوج.........ثم ابعدها بسرعه كالملسوع وخرج مسرعاً للصاله الصغيره التي في شقتهم ليتركها تنهار خلفه
ناصر وكفاه تحتضن رأسه:ذليت من شي ماسلمت منه ربع ساعه ماتحملت شلون الايام الجايه يالله رحمتك
اما في الداخل كانت جالسه على سريرها وهي منهاره:لهالدرجه كارهني بس انا استاهل انا اللي جبته لنفسي....آآآآآه ه ه
................................
في بيت الشعر
لطام بغضب نادراً مايظهر عليه:فلااااح احشم نفسك
فلاح بهدوء:انا من صدقي وبخطبها بس ابيكم تعاونني على الشيبان
نهار بنرفزه:فلاح الموضوع ذا مهوب مزح مثل عادتك هذي بنت عمك وترا حنا كلنا اخوانها لاتحسب ماوراها الا ابي ناصر
لطام وقد هدا قليلاً:لحظه يانهار خلنا نفهم وش ذا العلم الجديد
فلاح:انتو شفيكم علي
عساف:فينا انك تكلم في موضوع مافيه مزح وانت ماخذ الموضوع ضحك
بداح:فلاح انت صادق في اللي تقوله
فلاح بتوتر:والله اني صادق بس الشيبان بعيييون عشانكم(بعييون=يرفضون)
فهاد باستغراب:عشانا؟؟
فلاح:ايه لأنكم الكبار ماأعرستو وانا اصغركم مايصير اخطب قبلكم
لطام:حنا ماحنا ببنات عشان نعرس بالدور
فلاح:عاد انتو ادرى بشيبانكم
لطام بهدوء:انت صامل؟؟
فلاح بحماس:اي والله صامل
لطام:خلاص انت اقدم وحنا معك (اقدم=اقبل)
فهاد بمزح:الحين انت البزر تعرس قبلي
فلاح:ترا مابينا الا سنه يالخبل
بداح:والله وكبرت يافليح
فلاح:جعل امحق حكي اولٍ بزر وعقبه كبرت ..ليه انتو خابريني احبي
الكل:ههههههههههههه
********
بعد مرور الوقت دخل عليها كانت ترتدي قميص قطني يصل الى تحت الركبه مباشره وتشتغل بهمه
ناصر:يعطيش العافيه
انتفضت قليلاً:الله يعافيك.....ثم اردفت:تبي عشا اسمح لي لهيت ومانشدتك
ناصر وهي ينسدح على السرير:لا مشكوره بس اخلصي عشان تريحين قبل الصلاه شوي
وضحه وهي منهمكه في عملها:انشا الله
وبعد مرور اربع ساعات لم تغفى عينه وهو يتبعها بعينه وهي تعمل باجتهاد
ناصر:يابنت الحلال خلاص
وضحه بتوتر وهي تعيد السجاد مكانه:خلاص هذا آخر شي(انتهت من عملها الشاق وذهبت اكرمكم الله الى الحمام لتستحم...........وبعد مرور ساعه الاربع خرجت وهي تلف نفسها بروبها )
كان يتابع التلفاز ولكن حين خرجت محت كل تركيزه وبعثرته بشكلها الأسر
وضحه وهي تجلس امام المرآه وتضع كريمات الترطيب على جسمها:ناصر ترا انا بنام في الصاله وانت اخذ راحتك في السرير
ناصر بحزم:لأ نومه في مكان غير جنبي لأ(ثم انتبه لما قال)ثم اردف..اقصد لازم ترتاحين عقب ذا التعب
اخفت ابتسامتها التي تعبر عن فرحتها لما قال حتى وأن حاول تحوير المعنى ثم ذهبت لغرفة التبديل لترتدي بجامتها البيجيه الحرير ثم اقبلت عليه بغصنها الريان لتختبئ في فراشها
ناصر وهو يغلق التلفاز ويتمدد بجانبها:ترا ماحد يدري انش عودتي الا ابي ومااتوقع انه امداه يعلمهم
وضحه بخجل:خلاص اجل انت انزل قبلي بكره وعلمهم لأني مستحيه منهم والله
ابتسم لخجلها المفرط الذي لازال كما هو حتى وان غابت اعوام ليس عام واحد.................صمت الاثنان رغم اشتحان الجو بينهما
لحظات حتى احست به يجذبها ناحيته ويضمها بقوه ليستكين وجهه في شعرها البني
وضحه بتوتر:ناصر
ناصر وهو يهيم بها هي فقط:ماراح اسوي لش شي(لكن قلقها وخجلها لم يهدأ)
بعد مرور نصف ساعه ناصر:يابنت استكيني اقلقتيني بحركتش قلت لش مانيب مسوي لش شي
استكانت خجلاً.....لاتعلم لماذا اصابها التوتر حين دخول بوابة احضانه رغم انها كانت لاتنام سوى على احضانه
.........................................
الله اكبر الله اكبر.............الله اكبر الله اكبر
اشهد ان لااله الا الله .......اشهد ان لا اله الا الله
ام شاهه وتنهض بعد نوم متعب اكثر ممايكون مريح:يالله اصبحنا واصبح الملك لله وش ذا النومه المحقا .........مان انتهت من كلمتها حتى راتها تدخل بخجل مخفضةً رأسها
جواهر:صباح الخير يمه
وضحه وهي تظهر غضبها الكاذب:هلا صباح النور ثم تركتها لتذهب للوضوء اعزكم الله
جواهر وهي تجلس في الصاله حزينه لما وصل غضب عمتها
وضحه:يالله قومي روحي غرفتش صلي
جواهر بصوت يتحدر للبكاء:بصلي عندش
وضحه بقسوه:لا يالله روحي غرفتش خلصيني
جواهر وقد بدات تبكي وتقبل رأس وضحه وتضمها رغم برود وضحه:يمه تكفين خلاص سامحيني والله ماعاد اقول مثل ذا الحكي مره ثانيه
وضحه وهي تبعدها:ماأقدر نفسي ماتقدر تسامحش
خرجت جواهر هاربه من هذا الوضع
وضحه بحزن:ياجعلني قبلش وقبل زولش سامحيني يامش بس ابي لش الزين انا بعد ماقدرت اهدي اللعب شوي كاني مادري انها ماتحمل شي....الله يلعنك يابليس الهيتني من الصلاه وقامت تصلي
.............................. ..
في نفس المكان بس تحت
ابوناصر يالله مشينا
نايف:لحظه يبه ناصر مابعد جا
ابوناصر يخفي ابتسامته:اخيك اليوم مهوب في حالك يمكنه يصلي في شقته
نايف بابتسامه:اجل يالله قبل نتأخر على الصلاه قده بيقوم
واتجها للباب اكن اوقفهما صوته:لحظه خلوني ازين ثوبي
تبادل نايف ووالده النظرات ناصر: شفيكم
ابو ناصر وهو يفتح الباب ليخرج:ابد سلامتك يالله مشينا(وخرج)
نايف وهو يهمس لناصر:صباح الخير ياعريس
ناصر وهو يخفي ابتسامته: اصبح اصبح
وتبعا والدهما الذي سبقهم للمسجد
..................................................... .
الجد وهو يلكز فلاح وفهاد وعساف وبداح بطرف عصاه:قومو الصلاه الصلاه
دخل لطام الذي يغطي وجهه بغترته بعد انتهاءه من الوضوء:استغفر الله استغفر الله....(قبل رأس جده) صباح الخير يبه
بو سعد بحب:صباح النور يبوي ها نصلي
لطام:لحظه ابواني عادهم يتوضون
ابوسعد بعصبيه وهويلتفت على العيال اللي ماصحو:وذا الجعاريه مابعد قامو(الجعاريه=الكلاب)
ثم اردف:عطي جركل الماء
لطام وهو يبتسم لعلمه بما سيقوم به جده:ابشر(اعطاه الجركل)
ابو سعد ويصب الماي على العيال:قومو خلصوني
استيقظ الجميع وهو يجري باحثاً عن الماء للوضوء
لطام:خلك وياهم
ابوسعد:اندبهم من يوم قمت ولامنهم اللي تحرك
دخل ابولطام وابو نهار وابوضيدان ونهار:السلام عليكم
الجد ولطام:وعليكم السلام
الجد:يالله نصلي
الجميع يالله
استوى الجميع للصلاه...اتى فلاح مسرعاً ليصطدم بنهار الذي كان على طرف الصف ثم اتى فهاد وعساف وبداح يجرون لينظمو للصف
............................................................
كانت تقف امام الغاز الارضي وهي تضم شالها على كتفيه وتنفخ بين كفيها باحثةً عن الدفء
شاهه وهي تنتفض:يالله متى يدفا الماي جمدت
دخل عليها وهو خائف:ساهه
شاهه بفجعه:شمقومك من فراشك من غير هدوم(انحنت عليه وحملته وهي تغطيه بشالها متجهه لخيمتها هي واخواتها وجدتها)
وضعته على فراشه وغطته:يالله ارقد انا بروح اجيب حق ماما جده ماي واجي
ضيدان:بسلعه
شاهه وهي تضمه:ابشر بس انت لاتقوم م فراشك الين اجي
ضيدان وهو يعود للنوم:انذين
دخلت عليا ترتعد برداً وتهمس:صباح الخير
شاهه وهي تضمها لتدفيها وبهمس مماثل:هلا صباح النور...وين اختش
عليا:برا توضا
شاهه وهي تبتعد عنها:احرصي على اخيش توه جايني في المطبخ لحاله
عليا وهي تفرش سجادتها للصلاه:اني قبل اظهر توعى ونشدني منش وقلت شوي وتاتي الظاهر ماصدقني وجاش يدورش بس ماعليش خلاص انا عنده
شاهه وتتجه للجد لتوقظها:يمه ...يمه
الجده وهي تفتح عينيها:لبيه
شاهه وهي تمد كفها لتعين الجده على النهوض:يالله يمه الصلاه
الجده:اصبحنا واصبح الملك لله
شاهه وهي تعدل جلالها وبرقعها:لحظه يمه بروح اجيب الما الدافي عشان توضين في الذرا(الذرا=حاجز)
الجده:الله يجزاش خير يابنتي ويكبر حظش
ذهبت شاهه وماهي دقائق حتى دخلت ومعها الماء:يالله يمه
الجده:تعالي قوميني يامش
............................................... ..
وبعد شروق الشمس استيقظ الجميع
في بيت الشعر والكل جالس بانتظار اكتمال الفطور
ضيدان الذي يجلس بجانب فهاد كالعاده:فحاد
فهاد:لبيه
ضيدان بحماس:اليوم تلوح ويانا عند الوحوس(الوحوش)
فهاد:ههههههه اسمها الابل
فلاح وهو يغمض عين ويفتح الاخرى:هذا حضيري ماتنفعه حياتنا
ابوضيدان وهو يضم ابنه:اقول احترم نفسك لاتغلط على الرياجيل
بداح:ههههههههه من الرياجيل لاتقول بابا سنفور
ضيدان بصدمه لأنه يعرف ان فلاح وبداح وعساف ونهار لايسمونه سوى بابا سنفور:بابا انا سنفور
فهاد:الاهم السنافر ماعليك منهم
ابو ضيدان:سمعت فهاد شقال هم السنافر
الجد وكأنه يخاطب الكبار:لاتشره عليهم وانا ابيك حطو دوبهم دوب البزر
فلاح:حلوه يبه النغزه
الجد:اقول تلايط يارجال
ضحك الباقي عليه
اكتمل الفطور وبدأ الجميع بتناوله
................................. ...
شاهه وهي تضع آخر طبق على السفره:يالله سمو
الكل:بسم الله (وشرعوا بالاكل)
وبعد مرور نصف ساعه
الجده:الحمالله جعله يكثر خيركم
الكل:فيه العافيه(وبدو البنات يشيلون الصحون)
عليا:تسلم ايدش ياشوشو على ذا الريوق اللي كانه ريوق ملوك
الجده:جعلني قبلها بنت ناصر راعية بيت جيده
عليا:يمه مايصير كذا كل ماجبنا طاري شاهه قمتي تمدحينها وحنا مالنا رب
الجده:كلاً غالي بس شاهه غير
عليا:هذا بلا ابوك ياعقاب
الكل:هههههههههههه
...............................................
دخلت عليها للمره الثانيه
جواهر بحزن:السلام عليكم
ام شاهه وهي تشاهد التلفاز دون ان تنظر لها:وعليكم السلام........ها طاح مافي راسش
جواهر وهي تقترب منها لتلقي نفسها في احضانها:والله اني ندمت على حكيي
ام شاهه وهي تضمها بشده:انا ماسويت ذا الشي الا عشان تدرين انش اغلى من سار على الارض عندي
جواهر وهي دافنه وجهها في احضان عمتها:رضيتي علي يمه
وضحه:وانا زعلت اصلاً
جواهر:والله يمه اني مانمت من امس
وضحه:انا شكلي بزعل مره ثاننيه
جواهر وهي تمسح دموعها:من اللي بيخليش تزعلين
ام شاهه:هههههالرضوه غصيبه يعني
جواهر:ههههههوالله عاد كيفش بس زعل مره ثانيه مافيه
ام شاهه:طيب امشي نروح نسوي ريوق لاني لذا الحين ماتريقت
جواهر:لا قومي البسي عشان بنتريق انا وانت وامي برا على حسابي
ام شاهه:تراش قلتي على حسابش
جواهر وهي تخرج لتستعد للذهاب مع عمتها
..................................
ابو سعد بعصبيه:يالله اخلصن علي ابطيت على ذودي
حصه ومن داخل الخيمه:ياناس من يرضي ان حنا نركب في البدي كن حنا غنم
عليا:هههههههههههه اخلصي جدي
ضايق
واتجهن ليركبن في (البدي) كانت سيارة الجد
شاص وماكان يشوف عدل بس هو مايرضى
ان احد يسوق فيه كان راكب قدام وجنبه
الجده وشاهه وفي حضنها ضيدان وفي البدي
نوره وثمينه وحصه اللي تحلطم وعليا وام نهار
وام لطام اللي ركبن باختيارهن رغم اصرار شاهه على انهم يركبون قدام بس هم مارضو يقولون
(نبي هوا ربي)
حصه:يافشلتي ان شافوني رفيقاتي وانا في ذا الحال المزري
نوره:وابشرش ترا العيال يضحكون علينا
عليا وهي تتطنز:يافشلتش ياحصيصه العيال واقفين ويتمصخرون عليش
ام نهار:الله يقطع بليسش ياعلوي لاتزيدينها عليها
ثمينه:خلها وياها حصيصه بنت ناصر وذابحتها الحضاره
...........................................
..
فلاح وهو واقف برا بيت الشعر ويضحك على اللي في البدي
فلاح:هههههههههههههه ياعيال تعالو شوفو جدكم وش سوا في النشوان
طلعو وفقعوها ضحك عساف:اما اشكالهم تحفه
فهاد:فليح الظاهر المدام معهم
فلاح وهو يمثل انه بيغمى عليه:يالبييييه
ظربه نهار على راسه:احترم نفسك
فلاح وهو يدخل:لالالا انا لازم اتمم الموضوع
راح عند عمه ناصر وقام يحب راسه وخشمه:طالبك يبه ماتردني
ابوضيدان:والله انه تم
فلاح:انا ابي اعرس ولاني معين احسن من بنات عمي وخصوصي حصه
ابوضيدان نزل راسه وهو يبتسم وبعد فترة صمت رفع راسه:يابيك لوانها ذبيحه ماعشتك
ابو لطام بفرحه:اجل شوفو لاتجيبون طاري عند ابي الين اقوله ونخطب رسمي لانه بيزعل ان درى ان ذا الخبل المرعوش خطب وماعلمه
بداح اللي واقف جنب عساف عند باب المجلس وبصدمه:سواها المدموغ
فهاد وهو يضحك بصوت واطي:هههههه اشهد انه اجيدنا الحين حنا اللي اكبر منه ماسويناها وهو في دقيقه خلص الموضوع
عساف:ياويله من جدي لوانه يدري والله ان يمحق ذا العرس على راسه
..............................................
وصل الجد واللي معه
الجد وهو ينزل من السياره:يالله انزلن ونزلن
الاغراض
نزل الكل حصه الغاضبه:آآآي ياكبي آآي
ياراسي رايحه ملاهي مهوب رايح للبل
نوره:ههههههههه اقول اخلصي بس جيبي
الاغراض
الجد ينادي شاهه اللي كانت تنزل الاغراض
الثقيله لان البنات مايقدرونها:شااااهه
شاهه وهي منهمكه:لبيييه يبه
الجد:يابيش ادخلي الشبك واحلبي لنا من الابل
شاهه اللي معروفه بعدم خوفها من اي شي على عكس الباقي الا الجده:ابشر يبه
عليا وهي تمسك ايد شاهه:احرصي على عمرش
شاهه بابتسامه:ماعلي شر انشاالله(وخذت
الطاسه ودخلت )
اول مادخلت استنكرت الفحل اللي يراقبها
مع انه مهجور(مهجور=مربوط) راحت عند وحده
من النوق وبدت تحلبها
وبدت تسمع هدير الفحل اللي قام يتحرك
بقوه يبي يقطع الخيط...........
فجأه ماشافته الا وهو يشلع المركابه من الارض وجاها يجري حذفت الطاسه وقامت تركض تبي توصل باب الشبك بس.................................
................................. .................
بــــــقـــــــ شادن لـــــــــــــــــم
التعديل الأخير تم بواسطة نوف بنت نايف ; 29-12-10 الساعة 09:41 PM
سبب آخر: تنسيق النص ^_^
|
29-12-10, 03:20 AM
جديد مواضيع قسم الارشيف
العرض العادي
