كاتب الموضوع :
المـتـمـردهـ
المنتدى :
الارشيف
لأخرجن من الدنيـــا وحبكـم
بين الـجوانح لم يـشــعر بـه أحـد
الفصل الثالث ...
هايم على وجهه ويحس أن كل الهواء اللي في رئته وقفصه الصدري أنتهى خلال هـالرحله كعادته أخرج الدفتر الأزرق الكبير وأتكأ على الجدار الخشن وصار يقرأ اللي كتبته حبيبته العطا هو يحبها وهو مايدري من تكون يحب الطفله الشقيه العربجيه يحب قلبها وبرائته يحب تفكيرها وسذاجته يحب لعبها وخشونته يحب كل شيء فيها يعيش مع مذكرتها هذه أجمل أيام حياته يأخذ نفس عميق قبل أن يبدأ بالقرأهـ ويطلق أبتسامه مميزه تكسو ملامحه الرجوليه تقاسيم طفل هادئ طفل يعشق مابين للثماله قلب المذكره بين يديه وقرر أنه يعيد قراءة ذلك اليوم اللي كان بمثابة نقطة تحول في حياة محبوبته
ضم الدفتر لصدره وصار يجمع اكبر كمية من الهواء في رئتيه وكل هذا علشان يحس بقعة عطر اللي خلفت دائره وحولها حبر منتثر تتغلغل بداخل مسامه وكأنها تروي حكاية أنكسار وذل وحياة بائسه وأنسانه أجبرت الكل على أحترامها تحدت كل الظروف فكانت لهاالحق بأنها تفخر بذاتها.رن الجوال بجيبه أخذهـ وسكره من دون يشوف المتصل مايحب أحد يقطع خلوته بمحبوبته أبدا حتى لو أغلى ناسه وعيونه تتابع السطور بشغفه الطفولي المعتاد...
أمس كنا جالسين انا وولد ولد عمي خبل مره هذا الولد بندخل المتوسط وهو عامل فيها بطل وعععع والله ماعنده ماعند جدتي قربت منه وصار بيني وبينه الحوار التالي:
العطا/ولد بكرهـ أخر يوم لك عند عمتك وبتروح بيتكم وش بتقول لأبوك اذا سالك عن وجهك المفقع هذا
سلطان/ اقول فقعوا وجهك وش حاشرك انت ابقوله العطا المتخلفه ضربت بنت جيرانهم واخوها فزع لها وانا فزعت للعطا
العطا/ يالكذاااااب والله لأقول انه هو ضرب بنت الجيران واخوها فزع لها وخلى وجهك خرايط وانا فزعت لك
سلطان معصب مرررره لانه عارف ان العطا بتفضحه لكن يعرف كيف يكسبها / ترى ان قلتي والله ماأخليكي تقرين الجزء اللي شريته من السندباد البحري
العطا وتقوم تحب راسه وتتمصلح معاه اخوها بالرضاعه وش تسوي / خلاص سليطين مابعلم ابقول انك بعد عطيته ذيك اللكمه على وجهه وخليت وجهه شوارع
سلطان/ طيب يالخبله قومي نروح نتفرج على ماوكلي الحين تجي والا وش رايك نروح للبقاله وناكل فصفص
العطا/ والله اني دائما اقول انك ماتجلس عند عمتك حبا فيها انك تبي تاكل من بقالتنا
سلطان/ العطاااااااااااااا
العطا/ هههههههههه طيب سكتنا يالفاشل ودي بس اشوف ابوك واقوله شوف انا خلصت سادس وأخذهـ الاول على فصلي وولدك الفاشل ماخذ الثالث
سلطان/ ومن متى الثالث فاشل يالخبله.
العطا/ ابوك كل سنه اذا اخذت الثالثه يقولي يالفاشله لكن هالمره ولده الفاشل واو واو خخخخخخخخخخ
يقوم سلطان يركض وراي بالحوش يبي يشد شعري الطويل المجعد اللي مال للأصفر من اشعة الشمس وانحاش منه بكل سهوله وبعدها نطب على ابوي بالبقاله اللي لازقه ببيتنا ونأكل علك وفصفص ونسولف مع الوالد لين يمل منا
بالليل تنقفل الكهربه ونجتمع بالحوش انا وسلطان وعمته اللي هي زوجة اخوي وبناتها وامي واخواني وابوي ونصير نفرش لكل واحد بمكان لكن انا وسلطان مانفترق وسلطان يخاف من الظلمه
بذيك الليله حلمت حلم غريب حلمت اني انا وسليطين بكهف مثل اللي تخيلته بمغامرة سندباد الاخيره وسليطين واقف ويضحك من قلبه ومعطيني ظهره ولما التفت لي ضحكت انا بعد وقرب مني وباسني بقوووهـ مره وبعدين طلع خاتمين من جيبه قال هذا لك وهذا لي أذا اعرسنا تطلعينها تراها أماااانه ياعروستي .. وجلس يضحك مرررره انا قمت من الحلم مقهوره وادبغ ببطن سليطين ياللي ماتستحي ياقليل الادب الحين اختك في الرضاعه تتزوجها والله اني لأذبحك الأهل صحيوا على صراخ سليطين وانا اتوطأ ببطنه بقوه قامت امي بعدتني واخواني التفوا على سليطين وامي تسمي علي وتذكر الله وانا ابيها تفكني بطب ببطن سليطين من ثاني اخوي سأل سلطان: وش سويت لها بتأكلك أكل
سلطان يصيح ومقهور مني كان نايم ماصحى الا ع الدبغ والترفس في بطنه: مدري عن هالمجنونه والله ماسويت لها شيء اهئ اهئ اهئ اهئاهئئئئئئئئئئئئئ.. واذا صاح سليطين من يسكته عاد قام ابوي وزوجة اخوي وكل اهل البيت هذا اما صحيوا الجيران وبعد محاولات بائت بالفشل من الجميع جيت انا بكلمه وسكت على اثرها سليطين: خلاص سلطان والله مااقصد انا حلمت بحلم وقمت مقهوره علشان كذا دبغتك لاتطولها وهي قصيره
سلطان وانقهر زود الحين كل اللي صار له بس لاني حلمت بهالحلم المتخلف: بسكت واسامحك بعد واعطيك قصة السندباد البحري بس بشرط ادبغك مثل مادبغتيني
انا وشرار تطلع من عيوني : ياسلام والله مااتدبغني لأتوطأ ببطنك . وينقز سلطان ويمسكني من كشتي وانا امسك في كشته وهاتك ياضرب وبعد ماصاح ابوي : العطا سلطان والله ان ماهجدتم انه بالعقال ع ظهوركم . طنشنا الوالد وكملنا مهاوش لكن الوالد رجع وصرخ فينا هالمره بقوه وهددنا بشيء مانحبه ولانواطنه بعيشة الله: وربي انتم الاثنين ان ماكل واحد حط راسه ع المخده وسكت لأخرجكم من باب الحوش للكلاب. وكأن الكلب ماصدق على الله وسمعناه ينبح من مكان قريب وبسرعه فكيته وفكني وكل واحد ع فراشه وفجأه أمتلأ الحوش بأصوات أهلي يضحكون علينا قهروني مره لكن مااقدر اتحرك خايفه من تهديد الوالد
وفي الصباح ماخليت احد من اهل البيت ماحكيت له عن الحلم وآخر شيء لما جاء ابو سلطان يأخذه حكيت له هو وابوي الحلم بس غير عن الكل ماضحكوا تجهمت وجيههم وكساها سواد وسكتوا وبعدين ابوي طلب مني اروح اجيب ماء من البيت وكالعاده مااروح من غير سليطين نقزت انا وياهـ وشوي ورجعنا لما رجعنا ابو سلطان اخذه ولاقال ولاكلمه على غير العاده وانا من زود البراءه قاعده اقول: ايه اسكت ولدك هالسنه فاشل وانا الاولى ..راح سلطان وانشغلنا بسنه اول متوسط خصوصا بمادة الانجليزي لأننا الاثنين مره متنحين فيها طبعا استمرينا نتبادل روايات السندباد الخمسه ونقراها ونعيد قراءتها وبعدين جاء يوم اللي اشترى فيه اخوي قصة سندريلا جنيت من الفرحه وبالعصر اشيلها واروح لسليطين اوريه واقهره والعب في حسبته لين خليتها له يقراها باليوم الثاني جاء ولد عمي اللي هو ابو سليطين وجاب الروايه مقطعه ورماها بوجهي وقعد يصيح فيني: انتي قليلة ادب مثل هذي القصص لاتقرينها ولاتخلين سلطان يقراها ياحيوانه الشرهه على عمي اللي مخليك بهالسن وبعد تكشفين. انا ماعرفت وش الرابط بين الروايه واني بسنه اول متوسط وبعد ماتغطيت بس تفكيري اكبر مني وحسيت في الموضوع شيء مو طبيعي وكنت متأكده من هذا
المهم رحت لأبوي وانا اعلمه ان ولد عمي قطع قصتي واتبكبك علشان يجيبون لي غيرها ابوي هدا الوضع لأنه يعرف اني ذكيه وشاكه في الموضوع بالليل جاب لي اخوي قصة حقت الاميره والبجعات واقراها والله اني مره انبسطت فيها واليوم الثاني العصر رحت لسليطين اوريه لكن ماقبل يأخذها مني واتفقنا اجي كل يوم العصر وهو يقرأ اللي يقدر عليه وبالفعل استمريت اسبوع وانا اجي بالعصر وهو يقرأ اللي يقدر عليه واذا جيت اخرج من البيت وابوه موجود ادخلها مابين بلوزتي وتنورتي علشان مايشوفها ابوه واستمرينا ع هالوضع لحد مابديت احاول اكتب قصه وبالفعل جلست بليله اكتب واكتب لحد ماتجاوزت ال15 صفحه ومن فرحتي اتمنى العصر يجي بسرعه وبالفعل جاء العصر واطير لسليطين واوريه القصه وانبسط لي وقال اخليها علشان يقراها وبالفعل خليتها وتولدت موهبه عندي وعنده وكمل على اللي كتبته واعطاني الدفتر في العصر وهو مبسوط وعلمني انه كمل كذا صفحه عليها وعجبتني الفكره واروح البيت واكتب والمشكله ان خيالنا كله كان مثل اللي قريناه بقصص سندباد والمجموعه الخضراء سندريلا والاميره وفله والقط ابوجزمه واستمرينا سنتين واحنا نكتب كذا وكنا نخبي هالشيء عن اهلنا خايفين يهاوشونا واحنا ب3 متوسط
بذيك اليوم كان في غداء عند ابو سلطان وجيت من المدرسه ولقيت اخواني جاهزين ورحنا لهم وانا مبسوطه بديت اكتب خواطر وابي اوري سلطان وبالفعل رحنا لهم وبعد الغداء طلع سلطان غرفته بنات عمته اللي هم بنات اخوي صاروا يتغطون عنه وانا لا لاني اخته بالرضاعه وع طول ادخل عنده واوريه الخاطره وقراها وقام يشجعني ويقول حلوه ولازم اكمل ووراني كمان خواطر كتبها هو بس من دون عناوين وجلست اضحك واتريق عليه فجأه سلطان حط يده ع راسه ودارت فيه الدنيا وطاح جنبي ع السرير كنت احسبه يلعب علي كالعاده وضربت راسه وقلت له: يوه ياعادل امام ع غفله تراني مابصدق كنت تضحك وفجأه طحت خخخخخ قوم قوم . لكن سلطان ماتحرك وفجأه بدأ جسمه يهتز بعنف مثل اللي تعرض لصدمه كهربائيه كبيره وتشنج خفت مره انا مدري كيف جاتني هالفكره شفته يعظ لسانه وبدأ يطلع دم تذكرت نوبات الصرع اللي تجي اخوي بس بعمري ماشفت وش يسوون معاه لكن بسرعه كان جنبي شرشف اخذته وفتحت فم سلطان بقوه وحشرت الشرشف وصار يعظ عليه ويهتز شوي ويتوقف شوي حطيت راسه ع رجولي وصرت اقرا اللي احفظه من القرآن لأني افتكر ان امي تقول ان زوجة اخوي تسوي كذا اذا صار مع زوجها نوبة
صرع لكن جسم سلطان كان بدأ يزرق وعيونه شاخصه بالشباك أستغربت لكن قلت يمكن للضوء أثر وبسرعه سحبت الستاره وقفلت عيونه وضميته وجلست اقرأ وابكي بصوت عالي شوي هدأ جسمه واطرافه بدت تعرق وبدا يحس فيني رفت عينه كذا مره لحد مافتح وباين عليه التعب ضميته اكثر وقلت من بين دموعي: سليطين عمى بعينك خوفتني لاعاد تسوي كذا
سلطان كأنه كان محتاج لحضن يدفيه قرب مني اكثر وقال: احس اني تعبااااان . ضميته اكثر وسكتنا وبعدين اعطيته ماء وشرب وحطيت راسه ع المخده وغطيته بالشرشف وجلست قريب منه وانا ماقلت ولاكلمه ولاهو بس لما قام يتحسس لسانه حسيت بلحظه ان روحي ترد لي لأني من شوي حسيت كأني بفقده حطيت راسي ع راسه وبدت دموعي تنزل وحس بأحساسي وضمني لصدره وفجأه دخل ابوه ولما شافنا بهالوضع من دون يعرف وشفينا وليش احنا كذا اخذ عقاله ودفني بكل قوته وصار يضرب سلطان وسلطان من غير حول ولاقوه واجتمعوا اهلي واهله ع صوت صراخي وانا ابعد ابو سلطان عنه هو مو عارف السالفه مو عارف ان سلطان تعبان هو شافنا كذا وفسر احساسنا ومشاعرنا غلط بكل قوتي نطيت ع السرير ونمت ع سلطان وصار يضربني بكل قوه لحد ماجاء اخوي وبعده وصاح فيه: وشفيك عليهم يالمجنون؟!
أحس بالألم وبعد احس بأنفاس سلطان البطيئه وصيحته المكبوته وصوت ابوه يلج بالغرفه: ياليتني مت ولاشفت اللي شفته ياليتني مت.
بعد صجه ولجه وانا متشبثه بسلطان بكل قوتي وخرني اخوي ولما علمتهم باللي صار مع سلطان قام اخوي الكبير واخذوه المستشفى وانا خرجت مع امي وانا حاقده على ولد عمي ولو ماهو اكبر مني وابو سلطان كان ذبحته واحنا طالعين من بيتهم سمعت ابوي وابو سلطان يقولوا :خلاص العطا وسلطان لازم يعرفون انهم مو اخوان ولازم تتغطى عنه.
كلمه سمعهتها ولاصدقتها وخرجت وانا كلي امل ان اللي سمعته كذبه والا من نسج خيالي الواسع..
.................................
العطا وسلطان قصه حقيقيه عاش ابطالها مرارة الويل والحسره تجرعوا آلامها واحتسوها مع كوب قهوتهم الصباحيه وامسوا بها على مفرش احلامهم المسائي كانوا ومازالو رمز للحب في كل مكان ولهم الفضل الكبير على حامل المذكره ليستعيد حياته وويستدرك ان لاحياة بدون عطاء
انتظروني في جزء قادم اكثر اثاره واعتبروا هذا مقدمه للجزء القادم
محبتكم المتمردهـ
التعديل الأخير تم بواسطة بياض الصبح ; 10-03-11 الساعة 03:10 AM
سبب آخر: إظافة رقم الفصل ^ــ^
|
23-11-10, 12:22 PM
جديد مواضيع قسم الارشيف
العرض العادي
