كاتب الموضوع :
منصور السديري
المنتدى :
القصص المكتمله من وحي قلم الاعضاء
الجـــــــــــــــــــزء الاخير
هل مازال الامـــــ باقي ــل
نزلت بسرعه كنت أراقب الباب وانتظرالحدث اللي راح يصير وش جاب الحرمه هذي وفي الوقت هذا بالذات وش تسوي في بيت ناصر هالحزه سمحت لنفسي أدخل البيت بما أنها دخلت هنود معها شفتها تطلع للدورالثاني ولحقتها بس بدون ماتدري دخلت وحدة من الغرف أنتظرت شوي وبعدين دخلت وراها كنت شاك أنها تبي تسرق شئ وألا وش يحدها تجي في الوقت هذا بالذات واهل البيت كلهم في الزواج
كنت أمشي وراها هي وهنديها بدون ماتحس لقيتها تشيل بلاط من الحمام وتحاول في الهندي يطلع ثواني
ولمحت معها شئ أشبه بالصرة لمحتني وقلت مافيه مهرب
تنحنت وقلت
حسين : ياولد
عزيزة : من هنا
حسين : اسف بس من أنتي
عزيزة : أنت من
حسين : أنا جار أهل البيت هذا شفت حركه غريبه كنت ببلغ الشرطه بس يوم شفتك قلت أكيد انت من اهل البيت والاتقربين لهم
عزيزة : صحيح أنا خالة العروس
حسين :أسف على سؤالي ولو فيه تطفل وش المشكله
عزيزة: لامشكله ولاشئ ابد جايبه أغراض لبنت أختي
ومالقيت وقت اجيبهن ألا هالحين
حسين : الهندي ليش داخل
عزيزة : أبيه يدخل الاغراض
حسين :وشيل لبلاط وترجيعه من الاغراض
عزيزة : يالاخو هذا شئ مالك دخل فيه
حسين : يصير خير بس راح ابلغ أهل البيت باللي صار قدامي واسف مرة ثانيه
عزيزة : لحظه لوسمحت
حسين : نعم
عزيزة: لك خمسه الآف ولا تعلم أحد
حسين : ليه
عزيزة : مالك شغل تبي الفلوس والا لا
حسين : أبيها
عزيزة : لحظه طيب
XXXXXXXXXXXXXXXXXXXXXXX
دخلت عزيزة في ذاك الوقت وجابت الفلوس وللاسف أخذتها حتى بدون ماأسأل عن مصدرها
الى الان متندم لاني مابلغت عن عزيزة ماقدرت أتكلم لان الناس ذيك الايام أنشغلوا بسالفة طلاق ناصر يوم الصباحيه وانه دخل في حاله من الضيق مارتاح منها ألابعد ماطلق نجلاء كنت أرقب باب بيت أبو نجلاء علشان أشوف عزيزة واعرف منها وش اللي سوته لناصر بس مافيه أمل أذكر في وقتها جتني أمي وقالت لي أنه انسرق من بيت ناصر ليله الزواج مبلغ كبير بحدود العشرين ألف ويقولون اللي سرق واحد من الحارة يعني مافيه غريب
كنت أيامها مراهق
وخفت انه يتهموني بالمبلغ وخاصه أن معي خمسه ألآف وراح يسألون منين جبتها
خفت خفت ولاحد يلوموني
XXXXXXXXXXXXXXXXXXXXXX
الحقد ماليني من كل جهه ماقدرت أتخلص منه الله ماقسم لبوي ألابنتين عايلتنا فيها سرعقم للاسف ماطلع ألا فيني تزوجت قبل أم نجلاء بدل الواحد أثنين وكل ماتقدم لها أحد ويعلمني فيه أبوي أحاول بشتى الطرق أن الزواج مايتم لحد ماتوفى أبوي أنا وقتها كنت متزوجه وعلى ذمة رجال وام نجلاء ساكنه عندنا زوجي ماكان حابها وانا ماكنت أبيها تعيش سعيدة من زود حبي لها حقدت عليها تقدم لها زوجها هالحين كان مطلق بنت عمه لانه مايجيب عيال قلت في نفسي هذا هو حاولت فيها لين قبلت تخذه مع أنه أكبر منها وعلى قد حاله
بس للاسف مع أول سنه لها كانت حامل وأنا اللي ماخليت مستشفى مارحت لها ولامعالج ماجلست عنده حتى الدجالين
بس ماكانت قسمتي أني أجيب أحد
بس هي جابت نجلاء بعد سنه وحدة من زواجها يعني العيب ماطلع الا فيني
ليه الدنيا ماتعطي الواحدعلى كيفه
XXXXXXXXXXXXXXXXXXXXXXX
قررت أسير على أم ناصر واحاول أتسلل لجناح ولدها
علشان اشوف هل فكوا السحر عن طريق الصرة اللي تحت البلاط والابشئ ثاني بس كيف أقول لام نجلاء
XXXXXXXXXXXXXXXXXXXXXXX
عشت أحلى أسبوع مع سارة أنسانه هاديه ومطيعة وماترد لي طلب مشاء الله عليها كانت قمه في كل شئ الاكل واللبس والنظافه يعني مرة بكل معنى الكلمه وامها الله يستر عليها ماخلتلي على بنتها درب
فيصل : سارة
سارة : نعم
فيصل : تعالي حبيبتي ودي أشورك بشئ
سارة : آمرني
فيصل : لاتعالي جنبي أول
جت وجلست جنبي أسم الله عليها حطيت يدي ورا ظهرها وقربتها
فيصل:
الاربعاء بنطلع لاهلي وش رايك
سارة : حبيبي ماعندي راي بعد رايك
فيصل : خلاص تم
سارة : تم
XXXXXXXXXXXXXXXXXXXXXX
سعود
جهزت شنطة ملابس ولدي وقررت أوديه عند أمه واسافر للخارج أكمل دراستي هناك وأشوف
نفسي احس ان اربع سنين راحت من حياتي هدر كله وانا امشي وراى امي وللاسف ماحصلت شئ ابي ابني حياتي بعيد عن اهلي بعيد عن تسلط امي وسليبة ابوي
كذبت عليهم وقلت اني باخذ دورة تقريبا شهر ويوم اسقريت ارسلت لهم اني مراح ارجع الا بعد سبع سنوات
وان ولدي تنازلت عنه لامه لين رجوعي من سفرتي
XXXXXXXXXXXXXXXXXXXXXX
فيصل اليوم الاخير
رحت لاهلي يوم الاربعاء سارة ما كانت مبسوطه بس وش أسوي امي وحقها علي أني ماتذمر من تصرفاته
من يوم جينا وهي تحاول تطفش سارة باي شكل نفس طريقتها مع مرة سعود ماكانت سارة ترد وألا تشتكي مادري اللي في نفس أي هل هو سبب منطقي للي قاعدة تسويه وتحاول تذيل أفعالها به مادري هل من الممكن أنه شخص يحطم حياة الاخرين بمجرد دعوة من شخص طاعن في السن ربما كانت في وقت غضب
XXXXXXXXXXXXXXXXXXXXX
أبونادر اليوم الاخير
طلعت بسيارتي العصر كالعادة مع أني من يوم توفت هيام وحالة الوسواس من الموت صايبتني مع أني أنسان مؤمن بس ماأقدر أسيطر على الشئ هذا شئ خارج أرادتي
كنت أسوق وافكر وش لزمتي في الحياة أحس الدنيا ضيقه علي واالشيطان ماخلا لي طريق أحيانا أطلع من غرفتي أركض واقول لام نادر أني هالحين بموت بس بعد شوي أكتشف أني روعتهم على الفاضي وأني مافيني ألا العافيه
ماكنت عارف وين أنا رايح بس أكتشفت أني رايح البروامشي على غير هدى
XXXXXXXXXXXXXXXXXXXXXXX
ناصر اليوم الاخير
رحت للوالدة بعد ماخليت حنان عند أمها تطمنت عليها ورجعت لدوامي وفي الفتره هذي تواجهت أنا وحسين اللي علمني بسالفه السحر وعزيزة وانه ندمان وتفاجأة يوم درى أني عارف أنه هو مشترك بالسالفه لانه كان يطلع لي في أحلامي والشيخ يقول لي أنه الرجال هذا هو اللي بيوصل لك للي سحرك بس للاسف يوم دريت عن الصرة كانت عزيزة قد أخذتها وسافرت
بس الشيخ أكد لي أني أن شاء الله ماعلي خوف مادامها راحت بس أنتبه منها مع أن الشيخ قال لي أني مو المقصود من السحر
بس قررت أبيع البيت وأدور لي بيت ثاني في حارة ثانيه بعيد عن الماضي وابد حياة جديدة
مر أسبوع مثل البرق رجعت يوم الاربعاء العصر أجيب حنان خلاص ماصارت وصلت المزرعة وقلطني نادر في المجلس
ناصر : وين خالي
نادر: طلع مشوار
ناصر: متى يرجع
نادر : والله مدري
ناصر: خلاص ناد خالتي بسلم عليها وخل حنان تجي معها
نادر : ثواني
XXXXXXXXXXXXXXXXXXXXXX
جتني خالتي وسلمت عليها ولحظات وخلت حنان ياربي هذي حنان وألا القمر نور علينا كانت لابسه جلابيه حمراء وطالعه عليها شئ الوجه سبحان الله ينور شعرها على أني ماحب الشعر الطويل معطيها أكبر من سنها بس ماعليه كل شئ على حنان حلو ولايق قربت منا
حنان : السلام عليكم
ناصر : وعليكم السلام
مدت يدها وخميتها بدون شعور وبستها على خدودها وجلستها جنبي وانا أشوف خالتي زاريه علي
أم نادر: أخبار أمك ياناصر
وانا مو حول الدنيا ناصر: بخير وتسلم عليكم
أم نادر : الله يسلمها يالله عن أذنكم
XXXXXXXXXXXXXXXXXXXXXXX
طلعت خالتي وعلى طول ألتفت لحنان وبستها بسرعه ماانتبهت ألا يوم قالت
حنان : ناصر بعد
ناصر: حنان وش فيه
حنان : خشمي يعورني
ناصر: ألتفت لها وركزت في خشمها حنونه ليش لافه على خشمك
حنان : راح أقول بس ما تزعل أنا قلت لامي أمس أني مشتهيه تحط زمام بخشمي وهي سوته لي
ناصر: ياسلام وبأمر من ورى ماعلمتيني
حنان : ناصر أنا حبيته وتوقعتك تحبه بس أصبر لين يتحسن هالحين هو ملتهب
ناصر: ومن علمك أنه ملتهب
حنان : أمي
ناصر : أجل امشي ورى أمك لين يقطعون خشمك
حنان : ناصر لاتبالغ
ناصر: أصلا أنت مومعبرتني لو معبرتني كان شاورتيني
حنان : ناصر الله يهداك
ناصر : يالله روحي جيبي شناطك
حنان : ماراح تسلم على أبوي
ناصر: ماعندي وقت أنا مارقدت من البارح وأمي مخليها في البيت لحالها
حنان : ثواني أجل
ناصر : أحتريك في السيارة
XXXXXXXXXXXXXXXXXXXXXXX
طلعت حنان جنبي في السيارة وكان باين على وجهها أنها عندها شئ تبي تقوله
ناصر : ها حنان وش عندك
حنان : ولاشئ
اخذت يدها في يدي وقلت يالله حنونه أعرفك أذا عندك حكي
حنان : ناصر ودي أسألك من زمان بس خايفه ماتجاوب علي والاسؤالي يضايقك
ناصر : لا أسالي ليش يضايقني
حنان : ناصر ليش سفرت الخدامه
ناصر: وبس هذا اللي شاغلك أحسب الموضوع أكبر من كذا
حنان : بس الموضوع هذا محيرني من زمان وهي عندكم ليش بالوقت هذا سفرتوها
ناصر : بساطه لاني أكتشفت أنها تنقل أخبارالبيت لعمال البقاله
حنان : معقول بس شكلها هاديه وماتعرف الكلام
ناصر : هذا بلا بوك يعقاب موبس العمال حتى الجيران وبصراحة خفت على أمي منها لاتعرف طبيعة علاج أمي وطريقه أستخدامه
حنان : أذا كان كذا معك حق
ناصر خفف السرعه أنا ماحبها
ناصر : كيف نلحق نتعشى مع الوالدة
XXXXXXXXXXXXXXXXXXXXXXX
فقدت الامل في كل شئ خاصه يوم كسب زوجي الدعوة وقدر يرجعني لبيته فقدت ناصر للابد ماراح أقدر أرجعله لانه باين أنه نساني بعد اللي سمعته من أمه أنه راح ينقل من الحي ويدور مكان أقرب لوظيفته هنا الدنيا
كلها تسكرت في وجهي ومالي ألا أجلس عند الجلف زوجي اللي أحسن مافيه أني ماأشوفه ألا بعد شهرين والا ثلاثه
أسقريت صح بس ماخذت الشئ اللي حلمت فيه ناصر من كثر ما فكرت فيه احس أنه صار وهم مو حقيقه
بس اللي أيقنت فيه أن الدنيا قسمه ونصيب
XXXXXXXXXXXXXXXXXXXXXXX
مابعـــــــــــــــ أمــــــــــلي ــــــــــــد
الامل مازال باقي على فقدي أغلى ماأملك من أحبتي
أتي في مقدمتها زوجي وحبيبي ناصرتوفي في حادث مرعب نجوت منه بأعجوبه ولاكني فقدت فيه المسبب الرئيسي ودافعي للزواج طفلي اللذي فقدت في أبشع يوم في حياتي حيث فقدت الزوج والابن والاب كم الانسان مبتلى
ماذا بعد دخلت أنا وامي في الحداد وبعدها أنظمت لنا سارة عندما فقدت زوجها والسبب أنفجار في أحدى انابيب الغاز ياربي رحمتك
مرت الاشهر الاربعه بطيئه علينا ماعندنا ألا نادرالوحيد اللي أعتمدنا عليه
بعد مافكت سارة الحداد تفاجأنا باتصال من حماها سعود اللي طلب سارة للزواج وامي وافقت على طول
بعد فترة جا واخذ ولدة وسارة وسافر
خالتي أم ناصر كنت أتطمن عليها بين فتره وفترة
بس بيوم جاني خبر وفاتها اثرنوبة سكر ماقدرت أروح للرياض لانها بعيدة وخبر الوفاة وصلني متأخر
XXXXXXXXXXXXXXXXXXXXXX
اتممت عامي الستين وأمي والحمدلله مازالت على قيد الحياة أمي أصبحت مقعدة وفقدت حاسة السمع والنطق
نادر تزوج ويسكن بالقرب منا وله من الاولاد مايسد به عين الشمس كما يقول
XXXXXXXXXXXXXXXXXXXXXXX
ماذا حدث لم تكن عنوستي هي من أوصلتني الى هذا المصير اللذي توقعته امي وأخواتي ان أبقى وحيدة لازوج ولاولد لم أكن أعلم وانا أطاوعهم أني سافقد الاثنين في يوم واحد يال أقداري لم تبقي لي سوى الحسرة والندم
ربي اني رضيت بقسمتي ونصيبي فرضني
النهايــــــــــــــــــــــــــــــة
عرفان
نوف بنت نايف
لم يكن لقلمي أن يستمر لولا دعمك ووجودك دائما توجهين وتنتقدين حتى ترقى كتاباتي بالمستوى المطلوب لك الشكر والقدير
همسه
الغالية أرادة حياة وعد لان أكتب عن معاناة حواء وسأدع القلم الانثوي يسطر ماتشعر به قد تتساءلين ما السبب سأجيب دون تحفظ عندما كنت حواء في نظرك كنت من المشجعين والمؤيدين وعندما كشفت أني رجل تراجعتي صدقيني ليس ذما بقدر ماهو عتب أخوي
شكـــــــــــــــر
اراده
أم رنا
الحان الوفاء
نسمة أمل
بقايا روح
New Moon
بياض الصبح
فوز94
نوفاة
وكــل اللي مروا من هنا
الحرف يعجز أحيانا عن صيغ عبارات الشكر
شكرا على التواجد الدائم والمستمر وصدقوني لم تستمر الروايه ألا بتواجدكم
قمم الاعالي ظلالي
|
23-03-11, 10:33 AM
جديد مواضيع قسم القصص المكتمله من وحي قلم الاعضاء
العرض العادي
