كاتب الموضوع :
Gal2com
المنتدى :
الارشيف
السلام عليكم ورحمة الله وبركاته مساء الخير اخواتي الاعضاء وجمعه مباركة علينا وعليكم وكلها لحظات ويدخل علينا عام جديد ان شاء الله يكون عام خير لأمة محمد اسمحولي على التأخير لظروف خارجة عن إرادتي لكن مايصير خاطركم الا طيب اليوم راح انزل لكم الفصل الثاني عشر ويوم الاثنين بنزل الفصل الثالث عشر اتمنى ان ينال رضاكم قراءة ممتعه
الفصل الثالث عشر :
في صباااااح يوم جديد الروتين اليومي هو نفسه المعارك اليوميه للبنات قبل روحتهم لمدارسهم وجامعتهم .. ونتركهم شوي ونروح لمدرسة اصايل وفي ساحة المدرسه أصايل تأخرت بقومتها علشان كذا طافها الطابور الصباحي وبدايه الحصه الأولى وتوها داخله من بوابة المدرسة دخلت الساحة الداخلية وقعدت تفصخ عباتها وترتب شكلها الأخت مااااااخذه راحتها على الآخر وشوي وتسمع صوت المشرفه فوزيه تدعيها بصوت عالي ..
المشرفه فوزيه : هيه يابنت ليش متأخره حضرتش
أصايل : ياالله صباح خير ويش اللي بيفكني من صجتها على راسي من الصبح
المشرفه فوزيه : شنوتقولين ليش موطيه صوتش ماتقولين لي ليش متأخره
على المدرسه
أصايل : آسفه مالقيت حد يوديني علشان كذا مرت علي بنت عمي الله يجزاها خير ولين وصلتها مدرستها على طول جيت وتدرين بشوارع الدوحة زحمة من الصبح
المشرفه فوزيه : خلصيني بلا هذره زايده وبسرعه شلي شنطتش وعلى صفش
اصايل وهي تحط شنطتها على كتفها : حااااااضر وهذا انا رايحة
وفي مدرسة ساره بنت سلطان طبعاً متأخره كالعاده وأول مادخلت لمدرستها توجهت سيده للحمامات علشان تعدل شكلها وترتب شعرها وطلعت من الحمام تبي تروح صفها ماحست إلا بيد تمسك كتفها وتوها السوري بتتكلم شافت اللي ماسكتها هي بدور بنت عمها مشعل .
السوري : ومرض خضيتي بطني احسبها المشرفه صادتني
بدور : مادام انش خايفه ليه تتأخرين وتسوين فيها رويس
السوري : كيفي عاجزة من طابورنا الطويل مافيني شده عليه
بدور : انتي الحمد لله متى غدا فيش شدة شيء امشي قدامي على الصف ترى علينا ابله صفيه وانتي خابرتها زين
السوري : يالله صباح خير حد يتصبح بالفيزياء من الصبح
بدور : لاااااا وازيدش من الشعر بيت تراها علينا اولى ثانيه
السوري : علومش كنها وجهش انقلعي على صفش
وشلت شنطتها ودخلت الصف .
............................................................ ...................
وفي الجامعه محمد يوصل شيخة للمواقف ونزلت ودخلت حمام المواقف تفصخ نقابها وتلم شعرها وشوي ودخلت عليها فاطمة البنت البويه واول ماشافت شيوخ قربت منها : هلاااااااا والله شلونش شيخه
شيخه : الحمد لله وتوها بتطلع وقفت قدامها البنت : وين وين توني ماشبعت من شوفتش
شيخة وهي توخرها : تشتاق لش العافيه بس تأخرت على محاضرتي
فاطمه : معليه ياحلوووووووووه يحق لك بس وراش لين ماتطيحين
طلعت شيخة ولقت في وجهها الجازي توها جايه ومشوا مع بعض لمحاضرتهم
الجازي : شيوخ انتي ويش تبين من ذا الأشكال ذي
شيخة : ويش دراني عنها هي كل ماشافتني قامت تتلزق وتسولف وانا كذا مره وضحت لها انه مهوب مرحب بها بس لاحياة لمن تنادي خليها تولي
الجازي : ماادري نظراتها ماتريحني تحسينها راعية سوالف
شيخة : ماعلينا منها المهم ترى بعد يومين بيوصل ابوي واخواني وعمي من السفر
الجازي : زييييين الحمد لله وعمي احسن الحين
شيخة : سعود يقول انه لوماكان بخير ماكان رجعوا
الجازي : ايه صح على طاري سعوووووود ويش سويتي معه تأسفتي منه
شيخه : لااااااااا لين الحين بس كذا مره رديت عليه وكل ماجيت اتأسف منه ألقى أسلوبه جااااااااف معي علشان كذا ترددت خفت يفشلني
الجازي : مااعتقد سعود بيتصرف ذا التصرف سعود أكبر من كذا بس انتي تشجعي وحاولي
شيخة : اكيد ماتتصورين شلون اشتقت له
وماوعوا إلا بروضه تقاطع حديثهم : السلام عليكم .. شلونكم
شيخة والجازي : الحمد لله بخير انتي وشلونك
روضه : بخير انتوا شسويتوا بإمتحان أمس
شيخة : الحمد لله قدمت زين
الجازي : أكيد ماكله الكتب أكل
روضه : حرام عليش إذكري ربش ترى تجي من حبيب
الجازي :هههههههه ماشاء الله يله امشوا لا يشحوتنا الدكتور بروحه أخلاقه قافله الظاهر المدام ماتكلمه من يوم جاااااااا للدوحة
شيخة وروضه : ههههههههه الله يخس ابليسش
............................................................ ....................
وفي شركة آل سعود بدأ حمود وسالم بتنفيذ باقي الخطط للخروج من الشركة نهائياً بدون مايلفتون الشكوك لهم .. لأنهم خلال الشهرين ارتكبوا اغلاط كثيره وتسببوا في مشاكل كثيره بينهم وبين موظفين الشركة وكل هدفهم ان مشعل او واحد من العيال يتسبب في فصلهم علشان يكون الطرد منهم ويطلعون هم المساكين ومع كثرة المشاكل والأخطاء اللي كلفت الشركة مبالغ كبيره فاض الكيل بالعم مشعل على آخر مشكله صارت بين حمود وواحد من الموظفين القديرين في الشركة لأن العم مشعل كان مكلف حمود مع سيف موظف من موظفين الشركة على توثيق العهود بين شركتهم والشركة الأجنبية وكان المفروض يرسلون لهم بالفاكس والعم مشعل وصى سيف بالمهمه واول ماطلعوا حمود تبرع يرسله لكنه ماارسل شيء وتسبب بضياع فرصة كبيره للشركة ..
العم مشعل طلب حضور حمود وسيف ويوم واجههم كل واحد قام يتهم الثاني ووصل الأمر بينهم للضرب وهذا الشيء خلى العم مشعل يعصب ويكتب فيهم لفت نظر وعصب سيف على القرار الظالم في حقه ورفض يوقع هو وحمود على لفت النظر وتطورت المشكله من بينهم ودخل سالم في السالفه كشاهد مع حمود بإعتباره حاضر معهم في المكتب يوم تبرع حمود بإرسال الفاكس وشهد ضد سيف وهنا تدخل سعود بن نايف : ياعمي سيف مشهود بخبرته ومستحيل يطلع منه ذا الاهمال وهنا قاطعه حمود : شتقصد يااستاذ سعود اني انا المهمل الله يسامحك
سعود : انا ماقصدت شيء بس سيف معنا من زماااااااان يمكن نسيت بدون قصد منك اخ حمود
حمود : لااااامانسيت وهذا هو سالم شاهد
سعود : سالم انت شهدت انت متأكد من ان حمود ارسل الفاكس
سالم : ايه استاذ سعود متأكد
سيف : خااااااااف ربك يالظالم وين كنت منا اصلاً ماكااااااان موجود معنا والله يأستاذ سعود انه قال لي انا بآرسله وانا صدقته قاطعه حمود : خاف ربك ياسيف تتبلى علي انا ويش سويت لك الله فوقك ياظالم
سالم : ياسيف ياخوي تعوذ من ابليس يمكنك نسيت اذا نسيت قول بس لاتبتلي حمود
سيف : شب انت .. انت اللي خاف ربك تشهد زور
سالم : الله يسامحك ياااااااخوي لكن يجي منك أكثر
وبدت الاصوات تتعالى لحد ماقاطعهم العم مشعل : خلاااااااااااا ص انت وايااااااااه احترموا وجودي كلكم .. انا باااااااااأعطي كل واحد منك لفت نظر علشااااااان اكون عااااااادل معكم وانت ياسالم انت متأكد من شهادتك لاتظلم حد كذب
سالم وتظاهر انه انجرح من كلااااااااام مشعل : الله يسامحك ياعمي رجال ويش طولي تكذبني اذا منت مصدقني خلني اتوكل في شركة طالبتني بالإسم وانا كنت متردد اقبل علشاني كنت بينكم بس دامكم تظنوني كذاب افضل اقدم استقالتي وطلع سالم من المكتب وحاول العم مشعل يمنعه وقفه سعود : ماعليك منه انت ماغلطت عليه هو يبيها من الله علشان يوافق على الوظيفه والتفت على سيف وحمود وانتم تعالوا وقعوا على لفت النظر سيف قرب ووقع اما حمود قام يصارخ : ان مستحيل اوقع لأني ماغلطت بشيء غير يغلط وانا اتحمل اخطاء غيري
سعود : حالك حاله كلكم راكبكم الغلط وقع وخلصني
حمود : آسف ماراح اوقع
سعود : تتحدى سلطتنا ياحمود شف سيف وقع وهو ماسوى شيء غير انه اعتمد عليك
حمود : يعني انت تصدقه وتكذبني ويلتفت على العم مشعل اللي كان ساكت ويراقب وانتي ياعمي ليش ساكت عاجبك كلااااااااام ولد اخوك
سعود : تكلم مع عمي بإحترام
حمود : انت استاذ ماحد كلمك
العم مشعل : حمود مافيه داعي للمشاكل ووقع حالك حال سيف انت منت احسن منه
حمود : آسف وانا اخيرك اذا خليتني اوقع انا افضل الإستقاله ولاانه نقطه سوداء تنحط في ملفي
العم مشعل يلتفت على سعود : اسمحلي ياحمود ياتوقع ياتتوكل
حمود : مشكورين يجي منكم اكثر الحين تكون الإستقاله عندكم ومستحقاتي عندكم ماابيها
وطلع من المكتب علشان يكتب الاستقاله وعقبها قدمها لهم وطلع طلعته النهائيه من الشركة ولحق زميله سالم
العم مشعل : الله يهداه حمود على قوات راسه
سعود : ماعليك منه هذا واحد شايف نفسه على شنو ماادري والتفت على سيف وانت ياسيف مافيه داعي للفت النظر وهذا هو قدامك شقيته لأنك ماعارضت على سلطة الشركة مع انك منت مخطي
سيف : والله يااستاذ سعود اني متأكد من كلاااااااامي ولا كذبت بحرف واحد فيه
العم مشعل : خلاااااااااااص ياولدي وسامحنا ياابوك انت تعرف القانون قانون
سيف قام وحب راس العم مشعل : حشى ياعمي انت ابونا كلنا وانت بحسبة الوالد يله اترخص منكم
العم مشعل يلتفت على سعود : هاااااااااه ويش علوم الربوع متى بتوصل طيارتهم
سعود : كلمت ابوي ويقول انهم عندنا بعد يومين على خير
العم مشعل : على خير ان شاء الله وانت ياولدي ويش اخبارك مع هيا
سعود : الحمد لله احس انه عقب المشاكل اللي صارت بينا كل واحد منا راجع حساباته انت تعرف ان ابوي وابوها فرضوهااااا علي فرض لكن كل شيء تغير عقب المشكله والحين حنا سمن على عسل
العم مشعل : توصى فيها ياولدي تراااااااهاااااااا يتيمه
سعود : يعمي ويش ذا الكلاااااااام انا ابوها واخوها وزوجها وكل شيء بإذن الله
............................................................ ..........................
في بيت تركي خلود في شهرها الخامس توهاااااااا راجعه من الدوام ودخلت البيت لقت تركي وبناتها قدامها جالسين في الصاله وجلست على الكنب وهي ميته تعب حتى عباتها عليها تركي شافها قام وجلس جنبها : خلود حبيبتي تعبانه
خلود : ميته ظهري يوجعني من قعدة الكرسي
تركي : زييييييين ليش ماتاااااخذين اجازة لحد ماتولدين لأن شكل حمالك ذا متعبك اكثر من حمالك بالبنات
خلود : خلااااااااص فديتك قدمت اجازة مفتوحه والمدير وافق لي عليهااااااا لأني على قولته مجتهده وعمري ماخذت اجازات كثيره اااااااه وسندت راسها على الكنب وراها
تركي : مد يده ومسك راسها وسدحها على رجله علشان ترتاح عدل
خلود : تغديتوا والا لين الحين
تركي : ماهنالي اتغدا وانت منتي بحولي
خلود وهي تقوم : خلااااااااص ثواني ابدل وانزل لكم وتلتفت على بناتها
منيره ونوره : يابنات تغديتوا
منيره ونوره : ايه يمه الحمد لله ورجعوا يشوفون التلفزيون
طلعت بدلت لبس وجلست على سريرها ترتاح شوي تباطااااااها تركي وطلع لها ولقااااااهااااااا منسدحة قرب منها : خلود فديتش قومي تغدي معي وبعدين قيلي شوي وقامت تتغدى معه وهم جالسين خلود تعلم تركي على موعدها بكره عن الدكتوره : تركي بتوديني بكره عندي تلفزيون
تركي : اكيد بااوديش بس متى الموعد
خلود : الساعة تسع الصبح
تركي : جهزي نفسش وانا بااوصلش
............................................................ ........................
في المساء زايد عازمه ناصر على العشى برى البيت يبون يغيرون جو عقب الدوام اللي مسكهم مسكه عدله وكانوا يتعشون في مطعم فرايديز في فيلاجيو
وهم قاعدين يسولفون لفت انتباههم طاوله جنبهم وشافوا فيها البنت اللي شافوها من قبل مع شلتها وكانوا قاعدين واصوات ضحكهم واصله الدنيا ومسببين فوضى ولاهم حاشمين احد من الموجودين قامت وحده من الموجودات في شلة لبنت تنقز على زايد وتتحرش فيه وهو ولاهو جايب خبرها وناصر ميت ضحك على زايد
وثقله اللي نزل فجأة من السماء : يااااعمري على الثقل وين ايام زمان الله يرحم الحال
زايد : اسكت مني تراك دابل كبدي انت والعله اللي قدامي اعنبوهااااا تشوفني مسفهها ولا هونت كل مالها تتمادى
ناصر : منك حد قالك تغزل من البدايه هذا انت يوم بغيت تتوب ماخلوك البنات
زايد : انا الحين ماعلي منهم ابي اعرف من من بنات عمي اللي شفتها اخاف اخطب وحده وتطلع ماهيب اللي شفتها
ناصر : انا اخبران بنات عمي ثلاث الجازي وحصه وبدور يمكنها الاولى
زايد : لااااااااا انا اخبرالجويزي من اول طبه ووجها كله حب شباب والشعر اعوذ بالله ليفه لكن اللي شفتها غير مافيها شبهه بالمره من الجويزي
ناصر : لعنبو دارك تقولي ماشفتها الا لمحه وانت بققت عيونك وماخليت شيء ماشفته ياعمي روح قال لمحتها
زايد : انطم بس وشوف الطلب ليش تأخر انا تضايقت من اللي جنبك
وقام ناصر وخلى زايد جالس يتعبث بجواله وقامت البنت من مكانها وقربت من طاولته : لو سمحت اخوي ممكن الصوص اللي عندك
زايد : يتراوالي المطعم حاط على كل طاوله غرشة الصوص هذا فأكرميني وروحي من قدامي لأني ماني فاضي لك
البنت : مالت من متى الهدايه ان شاء الله مالت عليك ماعندك ذوق ورجعت لطاولتها مع جيت ناصر : شعندها الحلوة جايه عندك
زايد : رازه وجهها قال شنو ابي الصوص اللي على الطاوله حركات قديمه
نااااصر : وانت ويش قلت لهااااااااا
زايد : كل ان المطعم حاطه على كل طاوله وتضف وجهها من قدامي
ناصر فقع من الضحك ودرى ان زايد جاااااااااااد في كلااااااامه وانه بيترك عنه المغازل ووصل طلبهم وقعدوا يتعشون وبعدها تمشواااااا لحد ماتوكل واحد منهم على بيته ..
............................................................ ........................
يابوي اكتب فيك مــن الشعرابيات ..... يحلى فيــــــك اجمل واحلى قصيده
عساك دايم مني قــريب المسافات ..... لاجلك تهون المسافه لوهي بعيده
لاغبت عني عسى ماطول الغيبات ..... ونشوفك كل يوم واعـــــوام مديده
دوم على البال ياعــــزيز الصفات ..... كل خطوه فيـــك صح ورايك سديده
غيبتك تزيـــد مــن الحـــب عبرات ..... وانتظر كل يـــوم منك اخبار جديده
غـــالي ابن غـــالي من غير لفات ..... الله يديمك على المحبه ايام سعيده
ارجــــوك لا تبتعد وتزيل كل زلات ..... عن الغالي الي احبه ويامر وازيده
وكان يوم وصول الغوالي الى ارض الوطن وكان بإستقبالهم سلطان وتركي ومحمد وكانوا ينتظرون في المطار وعند بوابة القادمين واول ماشافوهم كانت فرحتهم كبيره لرؤية الوالد الغالي عائداً لهم في كامل الصحة والعافيه عاد لينير بيتاً انطفئ نوره لغياب سراجه المنير واساسه الذي يرتكز عليه وكان اللقاء بين الأبناء والوالد محمل بالأشواق .. تركي ومحمد فرحتهم كبيره وقااااااموا يسلمون عليه ويحبون راسه وايده ويسلمون على عمهم وعلى سعود ومشعل وطلعوا من المطار متوجهين لبيت العم سلطااااااااااان وماهي الا سويعات حتى وصلوا للبيت ونزلوا يسلمون على اللي داخل البيت ...
اول من دخل كان محمد : هيه يااهل البيت الجماعة وصلوا وينكم وشوي سمع اصوات البنات اللي تعالت وصوت خالته هند : هلا يمه يامحمد وينهم
محمد : هم الحين في مجلس الرياجيل عند عماني والعيال المهم هاذي اغراض ابوي ومشعل وخلي البنات يجهزون القهوة والشاهي وانا بأدخل ابوي عليكم علشان يسلم على البنات .... دخلت هند على بناتها وبنات عمهم والنسوان الكبار
السوري وشيوخ والعنود اول ماشافوا امهم راحوا لها .. السوري : يمه وين ابوي ليش مادخل علينا نبي نسلم عليه
هند : بيجي بعد شوي هو الحين عنده رياجيل بالمجلس يتحمدون له بالسلامه
شيخة : زين على الأقل يقرب صوب المقلط وحنا بنروح له والله اني مشتاقه له حيل
هند : معليه اللي صبركم ذا الشهرين بيصبركم ربع والا نص ساعه .. يمه يالعنود قومي سوي القهوة والشاهي عندنا رياجيل في المجلس يله ياشيخة انتي وساره قوموا ساعدوا اختكم ... يالله يمه
البنات : ان شاء الله يمه
دخلت هند صالة النسوان وقربت جنب الدلال تبي تقهوي نورة وفاطمه حلفت عليها فاطمه : والله ماتصبينها قومي يالجازي قهوينا
الجازي : تم ماطلبتي شيء يمه عنش ياخالتي اجلسي وانا بأقهويكم
هند : جعل ربي يصلحش ويرزقش بالرجل الصالح قولي آآآآآآمين
الجازي تذكرت زايد وانحرجت وقامت تقهوي النسوان والبنات الباقين قاعدين يسولفون وينطرون دخلة عمهم سلطان عليهم علشان يسلمون عليه ..
شيوخ في المطبخ على اعصابها تحاتي شلون يتسلم على اخوها سعود وتتسامح منه جات على بالها فكره انها تطرش مسج له وتشوف هل بيرد عليها والا لا وبدون ماتضيع دقيقه كتبت رساله وطرشت له ....
في مجلس الرياجيل اللي كان فيه سلطان وعياله واخوانه وعيالهم وصديق اخوه مشعل بوراشد وعياله وفارس وابوه .. سعود كان جالس مع فارس ويسولفون رن تليفونه برنة مسج وفتحه :
لـــــو قـسى كــل هــالـعـالـم
ادري بـقــلبــك حـــــنــــون
بــــــس لـــو قـــسى قــلبـك
ويـــن بـكـل هـالـعالم اروح
رد عليها سعود بمسج :
أنا معك في مجلس الضيق مركاك
وسبحة يمينك تلتهيبي إليا ضقت
شيخة يوم جاها المسج كنها ملكت الدنيا ومافيها وكتبت له مسج والعبرة خانقتها وطرشته له :
صـحيح رســالـة مـنك تـفرحـني
لـــــكــن صــــوتــك
يـــــريــحــني
وشــــوفــتك
تـــــســوى أغـــلى مـــــا عـــنــدي
طـلـبـتـك يـاسـعـود لاتـردني تـعـال
لـي انـا فـي الـمـطـبخ مـشتـاقـه
اسـلـم عـلـيـك تـــكـفى
لاتـردني
سعود قام من مكانه واستأذن من فارس بحجة انه يبي يجيب شغله من داخل البيت وراح صوب المطبخ الخارجي وتنحنح بصوت علشان ينبه اللي داخل وشيخه اول ماسمعت صوته ردت عليه : حياك ياسعود مابه حد غريب تعال فديتك واول مادخل سعود ماحس الا باللي حضنته بقوه وقامت تبكي وتتأسف منه على موقفها البايخ معه وانه من عقب اللي سوته وهي حاسه بتأنيب الضمير والأسف والندم كا ياكلهاااااا بكت لحد ماحست انه صدرها بيتقطع من كثر البكاااااااا وسعود كان حاضنها بقوة ويهديها : تعوذي من ابليس ياشيخه .. تعوذي منه وانا اخوش وحنا اخوان المفروض بكلاااااااااااام انقال في لحظة غضب ورفع وجهها له وقعد يمسح دموعها ويحب راسها : انتي تدرين انش غاليه عندي مثل خواتي الباقين كلكم غاليين علي ومااحب احزن وحده فيكم يله خليني اشوف الوجه الحلو يله اشوف فديت الوجه الصبوح انا يله غسلي وجهش وادعي لي خواتي ابي اسلم عليهم مدام انا موجود يله فديتش ... وراحت تدعيهم وماسمع الا صيحة العنود اللي نطت عليه وشلها سعود ونزلها وهي قامت تحب راسه ووجهه وتتحمد له بالسلامه ودخلت العنود وسلمت عليه وتحمدت له بالسلامه وجلس يسولف معه شوي ودخل عليهم زايد : وانا اقووووووووول سعود وينه اثاريك عندهم يلله معي يالحبيب ابوي يبيك امش وخل عنك ذا الماصخات شيوخ والسوري .. شيخه هين يازايد وانا اللي عندي لك شيء حلو بيفرحك لكن جزاء لك على كلمتك ماني بقايله شيء .
زايد : مااعتقد انه فيه شيء من وراش يونس ويفرح انتي والثانيه
السوري : لاااااا هزلت صرت مهزله لكل من هب ودب لكن بما ان سعودي راح اطلع احسن لي دام نوركم طلع ويش يقعدني معكم وطلعت وخلت شيخة مع زايد اللي التفت عليها : شفيش تشوفيني كذا
شيخة وهي مبتسمة : مافيه شيء يحليك يازيود والله وطحت طيحة سنعه
زايد : ويش طيحته انتي الثانية
شيخة : غزالك الشارد ياقلبي .. تحسب ماحد يدري بك
زايد : قصري حسش يالخبله ويش وويش غزالي وما غزالي
شيخة: علينا ماعليه استعبط وانا باذكرك بعدين يله وخر وانت تعرف وين تلقاني
ماقلت لك مصيرك محتاجني وطلعت وهي تقول :
يابو عيون هدبهـا سـود
لا تذبح النـاس بعيونـك
تذبح بنجل وبيض خـدود
عجزت اوصفك وش لونك
زايد جمد من الصدمه شيوخ اخته تدري بالبنت اللي شافها واكيد تعرفها وجااااااا بيلحق عليها لقاها دخلت الصالة عند النسوان بعده رجع للمجلس وبينه وبين نفسه ( لاااازم اكلم شيوخ العلوم كلها عندهاااااااا واخيراً بعرفها واذا الله كاتبها لي طلبتها وتملكنا علشان اضمن ماتروح لغيري ) ... يالله شلون تغيرت يازايد وين اللي يبي الحرية ويعشق عزوبيته عز الله انها غيرتني لاخلت ليلي ليل ولانهاري نهار حتى البنات من عقبها ولا شيء آآآآآه متى بتمر الدقايق علشان اعرفها من تكون انا ماني متأكد منهي من بنات عمي .. ويش سويتي بي يابنت الناس لخبطتيني لخبطة :
والله احبك حب ما حبه انسااان .. حبك سكن بالروح غير حياتي
حوول حياتي من بعد ظلمه الوان .. صرت اعشقك واهاب بعدك واحاتي
حبك يا غالي ما توازبه الاثمان .. متربعن وسط الخفوق وتباتي
شوفك لقلبي في عنا الوقت عنوان .. فيه السعاده والفرح يا غناتي
من قبل اعرفك كني للحزن خلقان .. عايش بهالدنيا اصارع مماتي
مكن بعد قربك صرت انا انسان فرحان .. عشت بسعاده وانمحت ذكرياتي
صارت حياتي ما بها ضيم واحزان ..وانت السبب يااغلا واعز امنياتي
انا لشوفك يا بعدي دوم ولهان ..والله احبك يا ااغلا كل البناتي
ربي يخلينا لبعض دوم خلان ..ياروح روحي يا بعد كل حياتي
............................................................ ..........................
عند مجلس الرياجيل سلطان واخوانه وعيالهم ومعهم ابوراشد وعياله اللي جاي يتحمد لهم بسلامة سلطان ورجوعه بالسلامة وكانت الجلسه حلوة لاتخلو من رائحة العود اللي عطرت المكان والعيال اللي يصبون القهوة على ضيوفهم وسوالف الشيبان الكبار ومن بين السوالف سمعوا صوت ابو راشد يتنحنح
ابو راشد : اقول يابو سعود عشاك القابله عندي
سلطان : تسلم يابو راشد لاتكلف على روحك كني ماكله
ابو راشد : انا طالبك ان تقول تم ولاتردني
سلطان : تم وانا اخوك بس مثل ماتعرف انا الحين متبع حميه عقب العلاج والدكتور قايل لي اخفف من الدسم
ابو راشد : عجل بأعزمك في مزرعتي ويش قولك
سلطان : تم ولا يصير خاطرك إلا طيب ووين مكان مزرعتكم
ابو راشد : في الشمال مكان زوين ويونس الخاطر
سلطان يلتفت على اخوانه وعياله : هاااااااااه ويش قولكم في مزرعة بوراشد
نايف : حد يعيف شوف المزارع كلنا موافقين وان شاء الله مايردنا شر بس خلونا نجهز نفسنا خلوهاااااااا الأسبوع الجاي ويش رايكم
بوراشد : خلاص الوعد الأسبوع الجاي ان شاء الله
وتم الإتفاق على الأسبوع الجاي وبعد ماطلع بوراشد وهله دخل سلطان لبيته يسلم على زوجته وبناته وبنات اخوانه وأول مادخل سلطان تنحنح : ياولد
البنات اول ماسمعوا صوتها فزوا له واستقبلوه بالأحضان اللي اشتاقت لضمته وريحته الحلوه وبدى موال البكاء من الفرحة بشوفته راجع سالم وبصحة وعافيه
سلطان كان متأثر كثير وبدأ يضحك على بناته : يابنات الحمد لله انا بخير الحين شوفوني مافيني إلا العافيه .. السوري .. شيوخ .. افااااااا والله عليكم هذا انا قدامكم ويلتفت على العنود ويحاول يهديها .. عنوووووووودي لاعاااااااااد تبكين أفااااااااا والله عليكم هذا وانا قدامكم الجازي وخواتها تقدموا من عمهم يبون يسلمون عليه انتبه لهم سلطان : مرحبااااااااا والله بالجازي شلونش يابنيتي
الجازي : الحمد لله حنا بخير الحمد لله على سلامتك اشتقنا لك
سلطان : تشتاق لك العافيه انا الحمد لله طيب ذا الحين .. حصه قربي فديتش
حصة تقرب وتحب راس عمها : الحمد لله على السلامة خارج من الشر
سلطان : الله يسلم قلبش .. وصايف وبدور كل وحده تدز الثانيه تبي تسلم قبل الثانيه وصايف : وخري يالدبه خليني اسلم
بدور : لااااااااااا انا بسلم على عمي اول
وصايف : وخري لاااااااااااااااتخافين بيزوجش واحد من عياله
بدور : وجع ويش بيقول عمي عني
سلطان : ماعليك منها تمزح معك
وقربت مها تبي تسلم على عمها سلطان وأول ماشافها رحب وهلل فيها وتذكر رغبة ولده مشعل فيها : مرحبااااااا ببنتي مها هلااااا والله بمرتنا
مها منحرجه وهي تحب راسه : الحمد لله على سلامتك يايبه .. بشرني عنك احسن الحين
سلطان : الحمد لله بخير جعلش بخير
وبعد ماسلم على البنات قرب من نسوان اخوانه يسلم عليهم وبعدهااااااااا قعد شوي معهم وعقب ترخص منهم علشان يريح شوي وطلعت معه هند تجهز له فراشه ..
واول مادخلواااااااااا غرفتهم التفت سلطان على هند : شلونش ياعيون سلطان وقلبه اللي ينبض بداخله
هند : الحمد يوم شفتك رجعت لي رجعت روحي اللي سافرت معك يوم رحت وبرجعتك ردت لي
سلطان : جعل ربي يسلم لي روحك
هند : سلطان انت احسن الحين يعني مايوجعك شيء
سلطان : بلى يوجعني
هند : اسم الله عليك وين وجعك
سلطان وهو يأشر على قلبه : هنا وجعي تدرين ليه
هند : ليه
سلطان : من كثر حبك اللي ساكنه
هند منحرجه من كلاااااااااام سلطان : الله يقطع بليسك روعتني احسب فيك شيء
سلطان وهو يحب راسها : انا الحين باارقد اريح لي شوي قيميني لصلاة العصر
ونزلت هند لضيوفها تحت .. واول ماانزلت لقت منيره وبناتها توهم جااااااااايين يبون يلحقون على سلطان قبل لايروح مكان
منيره : تستاهلين سلاااااااااامة سلطان ياهند
هند : الله يسلمك تستاهلين سلامته
منيره : الله يسلمك هاااااااااااا اربــه احسن الحين ياهند
هند : ايه الحمد لله اللي رده لي ولعياله سالم
وشوي ودخل عليهم العيال سعود بن سلطان ومشعل يسلمون على خواتهم وعلى امهم وعمتهم سعود اول ماقرب من الصاله سمع صوت البنات فقام ينحنح علشان يتغطون منه ودخلوا وسلموا على هند وعمته منيره ونسوان عمه وسلموا على بنات عمانهم وقعدوا شوي يتقهوون وبعدها كل واحد طلع يريح شوي وسمعوا صوت سعود بن نايف يتنحنح يبي يدخل عليهم وهومتنفذ وحالته حاله : ياولد والبنات قاموا ودخلوا الصاله الثانيه ودخل يسلم على امه وعمته ونسوان عمه وبعدها دعا هيا تساعده في المطبخ وراحت معه واول مادخلوا سعود : شوفي لي قدر كبير علشان نحط الخروف اللي جايبه فيه وراحت للخدامات تدور عندهم القدر وجابته له وهي ساده خشمها من ريحة سعود لأنه جاااااااااااي من عند سوق الغنم وريحته ريحة غنم وسعود كان يحط الخروف في القدر ورفع عينه لقاها ساده خشمها قرب منها : شعندش ساده خشمش
هيا : اف ريحتك خايسه بسرعه اخلص وروح تسبح
سعود : مايصيراروح وانا ماسلمت على حبيبتي هيا امريتي الجوديه وهو يقرب منها
هيا وهي تبعد عنه : سعود الله يخليك ماني ناقصك سوالف البطاله انت تدري اني مااحب الريحه الخايسه واني بااقعد ارجع لين تطيح كبدي فوقف مكانك احسن لك سعود وهويقرب : وان ما وقفت ويش بتسوين يعني الحين انا مشتاق لش وانت تسدين خشمش مني ومسكه وضمها ضمة قويه ودس وجهها في صدره وهي تحاول تدز فيه ماقدرت عليه وأخرتها حبها سعود على خدودها وفكها وهي على طول راحت للمغسله ترجع بقوة من الريحة اللي غطتها سعود كان يضحك عليها وكان يدري من قبل انها ماتستحمل الروايح الشينه بس ذالمره غير حسها تعبانه حيل قرب منها وهي وخرت عنه : حرام عليك باااااااموت من وجع كبدي اطلع غير ثيابك وانا بااشوف وحده من البنات آخذ منها ثياب وعقب بااطلع للعالم بس انت روح الله يرحم والديك .
وطلع منها وهي دعت العنود تعطيها ثيابب من عندها علشان تغير ثيابها اللي اتلفها سعود بريحته
والعنود تضحك على سوالف ولد عمها مع هيا ....
............................................................ .......................
وفي مطار الدوحة الساعة الثامنه والنصف مساءاً كان حمود ينتظر طيارته المتوجهه لمصر وشوي سمع صوت النداء على الطائره المتوجهه للقاهره توجه مع المسافرين لركوب الباص بعد ماخلص اجرائته وركب الطياره وبعدها اقلعت الطائره تاركه ورائها ارض الوطن وحمود يشوف ارض الدوحة وهي تصغر قدام عيونه : مع السلامه يالدوحه بس حكم القدر مالنا تصريف فيه هييييييييه الله يعينك ياجابر على اللي بيجيك بس مافيه غيرك نقط السالفه براسه علشان نبعد عنا الشبهه سالم وسبقني بيوم وانا الحين لاحقه وبنعيش عيشة الملوك بعد كل شيء نهبناه واذا فقدوا الفلوس بنكون بعيدين عنهم والله انك فنان ياحمود خلهم يتورطون ويحلون مشاكلهم بنفسهم .
............................................................ ...........................
وفي مخازن شركة آل سعود الحارس محمود اللي كان قاعد في غرفته سمع صوت صفارة الإنذار تعلن عن حريق صاب المخازن ومحمود من الخوف راح وكلم الدفاع المدني وماهي إلا دقائق معدوده وسمع اصوات صافرات الدفاع المدني ..
تابعوني في الفصل الرابع عشر علشان نشوف شنو صار على المخازن
البضاعة اللي في المخازن حرقتها النار
ومن اللي سبب الحريق هل هو قضاء وقدر والا لبو عبدالله وحمود وسالم دور فيه ؟
............................................................ .........................
نهاية الفصل الثالث عشر
|
15-10-10, 09:08 PM
جديد مواضيع قسم الارشيف
العرض العادي
