تغلق لحين عودة الكاتبه

مشرفات القسم

السلام عليكم ورحمة الله وبركاته

مشرفاتنا الغوالي اسمحن لي نزلته بموضوع جديد لضيق وقتي ...محبتي


هلا بكل احبااابي ..اشتقنااالكم والله وسااامحونيه على لقصور




فرسان على جمر الغضى



الجزء الثامن والعشرون


في بيت البدور دخل ماجد اخو مضاوي وهو شايل البدور

مضاوي وهي تحط يدها على فمها:يا ويييلي وش الي صااار يا ماااجد

ماجد بصراخ:لييييه تتركيها تطلع يا خيه وانا نبهت عليييج


مضاوي وعيونها على البدور الي مددها ماجد على الارض:بدوووور يا خيه

ناظرت ماجد:وش جاااها؟؟

ماجد:طخيتها يا خيه طخيتها احسب انها سراااي الليل ..كل ربعنا معهم فوانيس والكل يا خيه يدري اننا مانريد حد يطلع من بيته


مضاوي وهي تبكي:يا وييييلي عليييج يا خيه


فتحت البدور عيونها وهي ترتجف:قتـــ قتــــ

ماجد بوجع وهو يشوفها:سااامحيني يا خييييه والله انه ماكاااان قصدي

البدور بوجع وهي تستصعب الكلاااام:قتــــ قتلتوووه يا مااااجد

ماجد:قتلنااه ادري مير حسبت ان في واحدن ثاااني مخااااويه


البدور وهي تغمض عيونها ودموووعها تزيييد:يا وييييييييلي يا وييييلي روحي قبل روووحك يا بو راكاااان

ماجد وهو متفاااجئ:وش اتقووولي الرجال كان ابو راكاااان


البدور هزت راسها:وكاااد انه هو هو الي كااان يجينا بانصااااف الليالي


ماجد:الرجال ماات وشبع موووت ...وحنا ماندري انه واحد من عيال العطاااوي

بكت البدور وهي تحس ان روحها فارقتها

مضاوي:لزوووم الحكيم يشوووفها يا ماااجد

هب ماجد واقف

البدور:مااااجد ماااجد يا خووووي... ارجاااااااك يا خووووووي لي طلبتن عندك

نزل ماجد وهو يناظرها:اطلبي رووحي يا خيه ..والله اني مدري اشلووون اكفر عن خطاااي فيييج يا ام راكااان

البدور وهي تحااول تجلس رغم الوجع الي فيها:انا ماريييد منك شي غير حاجتن وحده ارجااااك يا خوووي قووول تم

ماجد:تم يا خيه تم

البدور:ولييييدي ولييييدي اماااانتن عندك انا ادري ان مت ان اهل القبيله خذوه رهينتن عندهم لجل يغاااايضو عيال العطاااوي بسواياااهم بالديره وبالي انهبووه

ماجد:با ذن الله يا خيه انج تعيشييين وراكااان اماااانتن برقبتي مايجيييه شر ابد

البدور:للا ياماااجد انا احس ان روووحي مفااارقه

وبكت البدور وهي تذكر ان الليث مات

البدور:طلبي منك يا ماااجد انك ترحل براكااان هالحيييين بعيد من الديره خذه يا ماااجد عند عيال العطاااوي هم راح يحافظوون عليه لانه ولدهم ومنهم لا تتركه يا ماااجد يمسي الليله اهنيا ارجاااااك يا خووووي ارجااااااك

ماجد اخذ يناظر اخته مضاوي مهب عااارف وش يسوي

البدور:وش قلت يا خوووي اتركني اموووت وانا مرتااااحتن

ماجد وهو يوقف:تم يا خيه تم هالحييين اخذه وارحل من الديره

مضاوي بعدم تصديق للي يصير حواليها:وش الهرج الي انتو تهرجووونه انت يا خوووي عااارف وش راااح يصيرلك لو انت سويت الي تقوووله البدور

ناظرها ماجد بنظره خلتها تسكت من الكلام وقام متجه للخارج

ماجد:خليييج عند البدور وانا رايح اجيب غزيل وناخذ العيل ونرحل

مضاوي:ودك تاااخذ غزيل؟؟

ماجد:لا يكثر هرجج يا خيه زهبي العيل بالسرعه وغزيل لزوووم تكون معي لانه ما ندري وش راااح يكووون راي اهل القبيله بالي راااح اسويه

مضااوي:يا ويلي يا اخوووي وانا

ماجد:انتي عند رجلج يا خيه وهو يكفي ويوفي هالحييين لزوووم تشوفي البدور وش هو حالها

تركها وطلع لجل يخبر حرمته ومن بعدها عاااود ولقي مضاااوي تبكي عند راااس البدور الي اعتقد انها ماتت وهي ما ترمش لها عيين

اخذ راكاان وودع خويته وطلع من الديره ومعه حرمته

صيحت مضاااوي من بعد ما غاااب اخوها بمده باهل القبيله لجل ايشوفو البدور ومن بعد ما عاااينها الحكيم قال انها بعدها حيه مير تحتاااج لوقت طويل لين ماتفوووق من الحاال الي هي فييه

يعني بالاورغندي في غيبووبه





........................................



الشيخ ابو عساف وولده ما فرحو كثير بالعرووس الي جتهم والسبب انها صابتها حمى وغثياان مستمر



طلبو لها حكيمة الديره واعطتها العلاج وطلبت انها ترتاااح كم يوم لين ماتعاااود لها صحتها بالوقت ذا بلغ الشيخ ابو عساف وعساف علوم عن الغزو الي ناويين يغزوون الديره وانشغلو بالاستعداااد لرد الغزو عن ديرتهم


طلع من الديره فرسان كان اعتمااد ابو عساف عليهم قوي لجل ايردو الغزو لاكن من بعد الموااجهه عاود الفرسان للديره ومنهم الجريح والمقتول حينها عرف الشيخ ان الي جاايين يغزوونه مهب بهينييين ورجع يعد عداااده لمواااجه اكبر


كان عتاب وسعد وفهااد جالسين يتشاورون على خدعه ايريدون ينفذونها لجل يقدرو يحرضو الشيخ ابو عساف وربعه انه يجابههم خارج ديرته مرتن ثانيه

بينما كان قماد وربعه ومعهم عايض باخر الجيش جالسين يهرجوون لين ما سمع قماد هرج داير بين عايض وواحدن من الفرسان يساله ان كان اعرس او لا ورد عليه عايض انه بعد الغزو باذن الله راح يملك ويعرس

ظل قماد سرحاان لثواني بعدها قام ولحقه اثنين من ربعه


متعب:على وييين يا قمااااد


قماد بابتسااامه :هات الخنجر الي معك

اعطاه الخنجر جرح قماد ايده اشوي ومتعب يصرخ علييه

متعب:ليييه يا خوووي


قماد عاود وابتسم:يقولووون ان بنيت الحكيم مزيووونه وانا ودي اروووح اشوفها ان كااان ودكم تخاااوني حياااكم

مشي عنهم قمااااد متجه لخيمة الحكيم وربعه منصدمين يناظرونه وبعدها لحقووه


بالخيمه كانت

بنية الحكيم جالسه تضمد جروووح بعض الفرسان الي انجرحو بالموااجهه الي صااارت بالصبااااح وكانت شوق باخر الخيمه بعد جالسه تضمد جرووح واحدن ثاااني... الخيمه كان نايم فيها عدد قليل من الفرسان الي انصابو ويحتاااجون لعنااايه بينما كان الحكيم ببمكان ثاني يعالج جرحى باخر الجيش

طل واحد من ربع قماد بالخيمه وصاااح


متعب:ودنا ببنية الحكيييم لجل اتشوووف صاحبنا المجروووح


قامت بنية الحكيم وهي تتخيل ان الحاله الي جااايه كااايده

نوير:هاتوووه هاتوووه لداااخل

ابتسم متعب :هالحييين نجييبه

كانت شوووق تناظرهم وهي مشغوله بلف يد الفارس الي عندها

ثواني ورفع الفرسان باب الخيمه محسسين الي بالداخل ان الي جااااي حالته كااايده

دخل قماد وعيونه تدور بسرعه بكل الي بالخيمه ومن بعدها عاااود وناظر بنت الحكيم

قماد:انتي بنية الحكييم؟؟

نوير:ايييه انا وش الي يصيير؟؟

رفع قماااد يده وبااان الجرح الصغير الي فيها:يدي منجرحه وتريييد من يداويييها.. عاااد هم قالووولي

ان الي يداااوي اهنيا شوووفته بس تكفي ويطيييب الجرح

بنت الحكيم ظلت تناظر قماااد ماهي فاااهمه هو وش يرييييد؟

قماااد بابتسااامه تسحر:هاااه ما ودج تشوفيييها؟؟

متعب:اقووول يا بنت شوووفي وش هووو علااااجه ترا هذا قماااد العطااااوي

نوير من سمعت انه قماااد العطاااوي ماحبت انها تبين ضيقتها من الي يسويه ورااحت بالحااال من بعد ما طلبت منه يجلس لجل اتجيييب الدوا وتطهر جرحه

جلست مقبلااه وهو يناظرها بابتسامه وكل شوي يناااظر ربعه في حييين كانت شوق تغلي من الغضب للي قااااعدين يسووونه

انهت شوق الي بيدها وقااامت طالعه من الخيمه وهي تحس بدمها يغلي وماتعرف ليييه..بعدها بشوي طلع قمااااد في حين كل واحدن من ربع قماااد اخذ يشتكي لبنية الحكيم عن وجع فييه وهم يضحكووون


كانت واقفه قدام الخيمه بكم خطوه بعيده عن الباب وهي تناظر لقدام وتفرك ايديها مشي قمااااد لين ما وصل لجنبها ووقف وقف وماقااال اي كلمه ظل واقف يناااظر لقداااام ومن بعدها مشي خطوتين ووقف اشوي وبعدها مشي متوجه للمكان الي كاااان فييه طلعو ربعه وهم يضحكووون من بعد مافتنت فيهم بنية الحكيم للي قاااعدين يسونه


ومن بعد ماراااحو

التفتت شوق لنوير الي ما وقفت من الشتم

نوير:هذووول فرسااان ودهم يغزووون عووووذه منهم

رجعت نوير للخيمه وابتسمت شووق من الحال الي خلوها فيه



.................................


ماجد ومعه حرمته غزيل بالاوله اتوجهو لديرة اهل غزيل لين مايعرف ماااجد المكااان اليي فييه عيال العطاااوي وياااخذ لهم راكااان وظل راكااان عند غزيل تهتم فييه وتسقييه من حلييب النياااق وانشغل ماجد عنهم بتدويره لعيال العطاااوي لجل ايسلمهم الامااانه الي معه


باليوم الثاني اتفق عتاب مع الفرسان الي كانو بقافلة قوته انه يجندهم لجل ايغزوون معه بغزوته ذي ووعدهم بماال وحلال كثير من بعد ماينتهو من الغزوه وظلت عبله لحالها في الخيمه اسيره ومعها كم حرمه اتفق معاهن بعد عتاب لجل ايكونن مع بنت الحكيم وبنيته ومن بعد ما اخذ موافقتهن شرع لهن باب الخيمه لجل ينضمن لخيمة الحكيم واول ما جت عبله تطلع منعها عتاب من الطلعه

عبله:ليييه يا خوووي

عتاب:انتي بالذااات ما ودي ايااااج تعتبي باب الخيمه

عبله:ودي اكووون عوييينه معهن

عتاب:للا يا عبله للا تكفيييني الضربه الي براااسي ما ودي بضربااات ثااانيه بربعي الزمي الخيمه لين مانخلص من الغزو

التفت عتاب لسعد الي كان يضحك وشدد عليه بامر عبله

سعد:لا تشيييل همها يا خوووي بوجهي


راح عتاب ونزلت عبله عند رجووول سعد

عبله:ارجااااك يا شيييخ ارجاااااك الحال الي انا فيييه مهب بحااال خلني اكووون معهن

سعد:للا ودج اتكوووني اهنيا انتي مامنج امااان ابد والي شاافه خويي من خويتك يكفينا لجل نااخذ الحيطه منج هالحين اخلي اثنين من الحراس يوقفون بالباب لجل يمنعوونج من الطلعه

راح سعد وظلت عبله تناظرهم وهي مقهوره


جلس عتاب قريب من الليث الي كان ضايقن خاااطره

عتاب:بعدها الضيقه يا خوووي بصدرك

ليث:والله انها مهب بكيييفي احس روووحي ودها تفااارقني

عتاب وهو يناااظر الفرسان:هذا الشوووق يا خوووي الشوووق لزوووم تصبر حااالك وان شفت ان مابه فووود توكل على الله وعاااود لهم

وقف ليث:للا يا عتاااب حنا بدينا الغزو ولزوووم ننتصر بعووون الله الضيييقه تنفرج ...اقووول الجماااعه مابينو من بعد ما انتصرنا عليييهم

عتاب:وكاااد انهم يعدووون عدتهم من بعد ماعرفوان الي جايهم غزو مهب اي غزو

ليث:ليييه يا خوووي مانهجم علييهم

عتاب:ديرتهم منيعه لزووم بلاوله نجهد فرسااانهم بالغزو خارج الديره ومن عقب نحتااال عليهم بالحيله لجل ندخل الديره المهم ان كل الفرسااان مستعدييين

ليث بابتسامه:اقووول يا عتاااب ترا اخوووك رجع لعلووومه الي تخبرها هذا هو من صباااح الله خيير وهو رااايح جاااي لخيمة الحكيم ولبنيااات

عتاب هز راااسه:وش اسوي له ..كان حاله من بدينا ابد مهب عاااجبني مدري وش هوو الي يدووور براااسه


ليث:شوفة لبنيااات وكااااد هي الي عدلة الي براااسه


ضحك عتاب وليث معه



بخيمة الحكيم وبالوقت الي يطلع منه الحكيم وحرمته لجل يجمعو من النبتااات الي تنبت بالجبل لجل الدوا الي يساوونه

عااود قمااد وربعه ...مد قماااد يده لبنت الحكيم

قماااد:ما ودج اتطيبين الجرح يالي سويتي لج اجرووح بمكااان ثاااني


عليت ضحكااات ربعه على حجيه مع بنية الحكيم

نوير سايرته وبدت تفك الفااافه عن يده واخذت تداااوي الجرح وهي تكبت غيضها منهم...هي اشتكت عند امها من الي يسويه بعض الفرسان معها وقالت لها انها تتجاهلهم وماتاااخذ وتعطي معهم

قماااد:اقووول يا علتي ودواااي اليوووم الخيمه زاااايده كثييير من فضل ربي وش الي صااار

نوير:هذيلا من الي كانو بالاسر جبووهن لجل ايكووونن عوينااات لنا

قماد:اويلااااه خيمة الاسر كان فيها غزلااان وحنا مادرينا ...رااااحت علينا يا الربع

متعب:يقولووون ان باااقي اهناااك بنيه

قماد ونظره اعطااها لشوق الي كانت جالسه تداااوي وابد ما ناظرت حدهم وهي بطرف الخيمه من الجهه الثااانيه

قماد ونظره عند شوق:ايييه لزوووم نرووح ونشوووفها

متعب:اجل نطلع من اهنيا لعندها



....................................


باليوم الثاني كان الكل جالس بمكان قدام الخيمه الكبيره يناظرون الفرسان وكان قماد معهم المره ذي واقف ويصب قهوه لليث وسعد وفهاااد

اقبلت عليهم شوق ومد فهاااد ايده لجل تجي وتجلس جنبه جلست شوق وهي مبتسمه واخذ فهاد يهمس لها وهو ينظر ناحية عايض الي كان جالس قريب منهم

مد قماد فنجال لقهوه لفهااااد:لقهوه يا شيييخ فهااااد

فهاد مد يده وهو مبتسم:تسلم يا خوووي

حست شوق بقليبها وقف اول ماناظرها قماد بنظره جمدتها وهو يقوم ويتوجه لمكان ثاااني

التفت ليث لشوق الي جالسه جنب فهاااد وابتسم مع ابتسامتها واشااار لها بيده انها تجي وتجلس قريب منه ...بعض الجالسين استغربو وقامت شوق وهي متردده وجلست قريب منه

شوق:وشلووونك يابو راكااان

ليث:عز الله ان شوفتج تذكرني دوووم بوجهه

شوق:انت صحيح تشوفه يشبهني؟؟

هز لها راسه:مدري احس برااحه من شوفتج وكاني بشوفتج اشوووفه

شوق:ودي لو انه معنا اهنيا ...يا ويييلي والله اني احطه بعيوووني

ابتسم ليث

قام قماد وتوجه بالدله والفنجال لعاايض الجالس وصب له لقهوه

قماد:تفضل

عايض:عنك يا خوووي اصب انا عنك لقهوه

قماد:للا قماد مايتنااازل عن قهوته الي يسويها لزووم هو الي يصبها للجالسيين

عايض:تسلم يا خوووي

قماد بتلميحاات غير مفهومه:النووبه الي فااتت لقهوه انسكبت وماشربت منها مير النوبه ذي لزووم تشرب منها

عايض اخذ ينااظر قمااد وهو وده يذكر اي نوووبه يقصد فيها

قماد:هاااه وش رااايك بلقهوه

عايض:زيينه وتقند الرااس

قماااد:لو انك شربت منها النوبه الي فاااتت كان ذكرت انا مقصدي اي نوووبه

عايض:يا خوووي ترااني مدري وش تقصد

ضحك قماد وهو يوقف:ما عليييك مني يا خوووي ترا هرجي كثييير ...قليييل الي يفهم المقصد منه وعاااتب عليييك يا خوووي انك تااارك المهره الي ودك تشتريها

قدام الف شرااي

عاايض:ماخبرت يا خووي اني نووويت اشتري مهره

قماد:تقهوا طال عمرك تقهوا ولا تشغل بااالك بهرجي

قماد وهو يحط الحطب على النااار ونااار يحس فيها تغلي بصدره""زييين يا بنت الشيييخ طاااايل ولييث وش ودج بعد تجلسييين معه هو رجاالج ذا اهبل مايشوووف بعيووونه وشلون يرضاها انج تنططي بين الرجاااال ااااه ويلي من الحااال الي انا به

والله ان ما ودي اشغل نفسي بيها مير وش اسوي بالقلب الي تولع ووده يحترق منها"

كانت شوق تبتسم ازود وليث يسولف لها عن روحاته لشوفة راكان وامه

جلس قماد بمكان كان يقدر فيه يناظر شوق الي قامت من بعد ما انهى ليث هرجه معها ومشت مااره من المكان الي كان قماد جالس فيه ومتكي على يده وهو متمدد قليل

قماد بصوت مايسمعه حد فييه غير شوووق من اول ما مرت قداامه:وحنا ...ما ودج تقعدي معنا تسولفيين هو حلاال لغيرنا وحرام علينا

وقفت وناظرته وتلاقت عيونهم بعدها التفتت وراحت للدله وخذتها ورجعت عنده

جلس قماد وهو مبتسم لانه يدري ان دلة لقهوه خاليه ومابها قهوه لاكنه سايرها جلست قريب وصبت له واعطته رفع حواجبه وهو يناظر بالفنجال الفاضي وابتسم

بعدها صرف نظره بعيد عنها وهو يدعي انه يشرب لقهوه وشوق تحس برجفه من الي قاااعده تسويه

ناولها الفنجال مرتن ثانيه لجل اتزيده ورجعت تصب له وتعطيه الفنجال

اول ما اعطاها الفنجال للمره الثالثه وهو يطلب المزيد تلاقت اعيونهم وابتسم

شوق:اعجبتك لقهوه

قماد بابتسامه :عزالله اني ماشربت اقهوه مثلها ابد

شوق:تقهو ...تقهوا الدله بعدها مليااانه

قماد:خوفي انج تتعبي وانتي تصبي لقهوه

شوق:مابه تعب ...لجل ولد العطاااوي نصب لقهوه فارس الفرسااان لولاااه ماردينا الجمااعه بالامس مهزومين

ناظرها قماد بغيض وهو يحس بشمااته بهرجها

شوق:ازيدك اقهوه طال عمرك

قماد:هقوتي اني بعدني ماهزيت فنجالي يا بنت الشيخ طايل

شوق بابتسامه:ايييه تقهوا

قماد وهو يعاود لرفع حواجبه:قريب بعد راح اتشوفيين وتسمعين علووومن كثيره عن ولد العطاااوي وهو يغزو الديره ويسبي كل مزاييين الديره...

غمض عيونه:اويلاااااه يقولووون ان زينهن ما ينوصف

ناظرته شوق وهي تحس بدمها يغلي

ابتسم قماد ورجع يقول:ويمكن بعد ياخذون من عندنا سبيات تدرين عاااد وش راااح اسوي لو انهم خذوووج سبيه

ناظرته شوق وودها تعرف وش وده يسوي

قماد وابتسااامته تزييد:ودي اروووح واحب خشمه الي خذاااج عنده سبيه

شوق وهي تنتفض من الغيض:اتخسى وانا بنت الشيخ طااايل مايلمسوووني وانا وراااي رجااااال

قماد من الغيض لطم الدله الي بيدها ومسكها من يدها بقو وهو يصرخ عليها

الكل نط وصرخ عتاب وفهاااد عليهم

عتاب:قماااااااد

فهاد:شووووق

سحبت شوق يدها بالقو من يده والتفتت رايحه للخيمه وظل قماد يناظرها بغيض لين ما اختفت ومن بعدها التفت عنهم وراااح

التفت فهاد لعتاب:ارجاااك يا خوووي السمووحه تراها ملسونه ووكاااد غاضته بكم كلمه

زفر عتاب وهو يدري ان قماااد وكاد انه يكوون هو السبب


بمكان ثاني سمع سعد وليث صريخ جااي من خيمة عبله وبالسرعه راحو لهنااااك


تفاااجئ سعد بالحااارس بداخل الخيمه وكان ناوي يطلع ومسكه سعد وتفاااجئ انه ينزف

الحارس:يا عمي الشيييخ هي هي هي السبب

ناظر سعد عبله الي كااانت تبكي

عبله:كذووب كذوووب هو الي تهجم علي

الحارس وهو متالم:هيي الي دعتني

عبله:خسييييس والله انه كذووووب

التفت سعد على عبله وخلاها تسكت بالكف الي جاها

سعد وهو ينزع حزام سلاحه:وش ودج تسوييين هااااه وش ودج اتسوييين وانا الي قلت انج بوجهي ودج تفضحييييني

عبله وهي تتراجع والخوووف بعيونها:والله اني بريه بريه هو الي تهجم على

سعد:عتاااب ما كذب يوم قااال وانا وانا للمره الثااانيه انخدع ..لاكن عهدن علي اني اخليييج تاخذييين جزاااتج وهالحييين

تفاااجئت عبله بحزااام السلاااح الي اخذ سعد يضربها فيييه الا ان لييث دخل علييه وجره بعيدن عنها

الليث:تعوذ من الشيطااان يا رجااال واترك الحرمه

سعد:اتركني يا خوووي اتركني لزووم تاخذ جزاااتها وتعرف هي بوجه من

ليث:زين زييين يا خوووي الي خذته يكفيها واتركها ودك ايااها تموووت بين ايديييك

طلع سعد وهو مقهووور من عبله وطلب من الفرساان ياخذون الحااارس عند الحكيم لجل يضمد الطعنه الي جته من عبله

اول مادريت طيبه عن الي صااار لعبله راااحت عندها ومعها المها حاول سعد انه يمنعهن من الدخول عندها لاكن المها اصرت انها تشوفها

طلعت المها للخارج وناظرت اخوها سعد

المها:وشلووون يطااوعك قلييبك يا خوووي تسوي بيها كذا

ناظرها سعد:ما جاااها مني شي هذا كله من تحت راسها وشلووون من بعد ماقلت لهم انها بوجهي تسوي الي سوته

المها:وش سوت يا خوووي انها تدااافع عن حالها اخطت

سعد:كذوووب هي الي دعته ترااها مهب بهينه وكل الي يصيير من تحت راسها ودها تهج

المها بغير تصديق:خلها تهج انته وش اتريييد منها وش اطلااابتكم منها

سعد:انتي نسييتي يا المها انها انهبت الذهووب هي وخويتها

المها:ذهوووبكم وعاااودت ليكم وش اتريييدو منها

سعد:حنا هالحييين بغزو ويوم ننهي الغزو حينها نشوووف وش راااح نسوي معها

المها:تراااك يا خوووي اذيتها كثيير والحرمه موجوووعه حييييل ودي اطلب حرمت الحكيم لجل اتجي وتعاااينها

سعد:سوي الي تريدينه مير اخذي حذرج انتي والي معج

تركها وراااح








فرسان على جمر الغضى

الجزء التاسع والعشرون






واصل ماجد بحثه عن عيال العطاوي من بعد ماترك حرمته والعيل في ديرة اهلها بحماية شيخها ومن بعد ما وصلتها علوم ان عيال العطاوي بغزوه عاود وهو يفكر وش يسوي بالعيل هو ياخذه لهم ولا يتركه لين ماينتهو من الغزوه

لاكنه وهو معاااود تصدوله قطاعين طرق انهبوه ونهبو خيله وتركوه وهو منصاب برجله



ابو عساف جهز اقوا الفرسان عنده لجل يطلعون ويتلاقو مع عيال العطاوي وتجهز عيال العطاوي ومعهم الفرسان بعد لجل يتقدمو لجل يلاقو الفرسان الي طالعه لهم

تفاجى قماد بشوق راكبه الفرس وواقفه جنب عمها فهاد لجل تمشي معهم للغزو

مشى بفرسه ودار عليها دورتين وهو مهب مصدق انها ناويه تمشي معهم

بعدها التفت لفهاد

قماد:هذي وين ودها تروح

ابتسم فهاد:ودها تغزوو

قماد:صااادق بهرجك يا خوووي

التفت بعدها لاخوه عتاب:وانت يا عتااااب ودك تسكت على الي يصييير

عتاب وهو وده يكبت ضحكته:وش الي ودي اسكت عنه يا خوووي هي برضاها ودها تمشي معنا

التفت قماد لشوق ونظراته غاضبه وبعدها حرك فرسه وابتعد عنهم

طوال مدة مسيرهم وقماااد يحس انه مقهور من شوق الي مشت معهم ومتعجب وشلووون وافقو على روحتها معهم



عتاب:يا خوووي يا فهاااد والله اني شااايل هم لبنيه معنا وشلووون ودك تخليها

فهاد:شووق يا عتاب لها خال من اشجع الفرسان كان دايم مهتم بتعليمها الرمايه وهي ماشالله تعرف احسن عني فيها وانا لولا اني ماقد اختبرتها بيوم من الايام كان مارضيت على جيتها معنا

عتاب:زين الله يعييين


تحركت جموع الفرسان وظل بعض الفرسان لحماية الخيام الي فيها ضبيه ومعاها رجلها الشيخ والمها وحرمة الحكيم وبنيتها وبقية الحريم والسبيه الي هي عبله

واول ما تواجه فرسان العطاوي مع فرسان ابو عساف عاااود قماد لعتاب

قماد:خلها تعااااود خلها تعاااود يا خوووي

عتاب:قماااد انت وش الي يدوور برااااسك هالحييين مابه وقت ولبنيه ملزمه تجي انت وش بك

قماااد:يا خوووي مهي بزييينه بوجيهنا اننا ناخذ حرمه تغزو معنا ليييه محنا بفرسااان

عتاب:ماهو ذا الي يدووور براااسك يا خوووي قل انك مهتويها وخاااايفن عليها

اخذ قمااد يدور بالفرس حولين عتاب:وش الي اهتوي فيها انت ناااسي هي وش كااانت تسوي فيييني

عتاب:اجل يا خوووي اترك عنك الي قاااعد تفكر فييه وخلنا هالحييين بالي حنا مقبليين علييه

رجع قماد ودار حوالين شوق الي امرها فهاااد انها تعاااود ورا الفرسااان


قماااد:زييين هالحييين ودنا نشوووف وش راااح تسوييين يوم انج تنخذي عندهم سبيه

ناظرته شوق وعاااودت تناااظر لقدام وهي منغاااضه حييل من الهرج الي قاااعد يقوله

واول ما شاااف قماااد ان المواجهه بدت مر من قدام شوق وامرها

قماد:اتبعيييني

ظلت شوق واقفه بمكانها

قماد:قلت اتبعيييني

امر قماد كل الفرسان الي كانو قريبين من شوق انهم يتبعونه واخذهم لخلف التله وامرهم بالرمااايه من فووق

التفت قمااد لشوق:ما ودي اياااج تفااارقي مكااانج ذا

شوق:ودي اكووون معهم

قماااد:اسمعيييني زييين ترا معاااد فيني صبر على عنااادج ذا والله ان تحركتي من اهنيا ان قد تشوووفي شي ما يسرج

تركها من بعدها قماااد وانظم للي تحت التل لاكن شوق سوت الي براسها وانضمت للي يرمون من فوق

انتهت المواااجهه بانسحاب فرسان ابو عساف

وظلو على هالحال يومين كل يوم يتواجهون


........................................


استعاااد ماجد عافيته واخذ العيل من بعد ما قرر انه لزوووم ياخذه لعيال العطاوي من بعد ماجته علوووم ان اهل قبيلته اخذو يدوروون عليه وبدا مع حرمته رحلتهم للمكان الي عرفو ان عيال العطاااوي فييه

وبيوم كان الفرسان مستعدين انهم يواجهو فرسان ابو عساف انصاب واحدن من الفرسان ولزم قماد على شوووق انها تظل معه لجل تسعفه لجل يرتاااح من التوتر الي كان يحس فيييه طواال المده الي فاااتت

وافقت شوق وهي تشوووف ان الفااارس بحاااجه ان حد يسعفه ...رحل الفرسان وتركوها معه ضمدت جراااحه وعااانته لجل ياكل شي ومن بعدها نااام وظلت هي جالسه قريب منه

الفرسان تواجهو مع فرسان ابو عساااف وبدت الي اخذ ينسحب اكثر واكثر وهو كل يوووم يطلع لهم بفرسااان اكثر الا ان عيال العطاوي والفرسااان الي معهم كانو يسقطووون اعداااد كبيره منهم وصااارو يتقدموووون اكثر للمكان الي عااايشه فييه قبيلة ابو عساااف

انصااب قماد باصاابه خفيفه بيده الي اخترقتها الرصاصه وطلعت وظلت يده تنزف اصر علييه سعد انهم يعااااودون لجل يوقفو نزيييف الدم

الحكيم كان منشغل بفرسااان كثيره وقرر سعد انه يعاااود بيه عند شوق الي كان معها بعض الادويه واول ما قرب قماد وسعد من المكان الي تركو فييه شوق والفااارس تفاااجئو بالفااارس الي كان متهجم على شوووق ويحاااول يغدر فيهااا

انتزع قماااد الفااارس وعيونه كلها شرااار وهو يشوووف شوق الي تمزعت ملابسها وبانت اكتافها

الفااارس اول ماناااظر عيووون قماد اخذ يصيييح

الفارس:هي يا عمي هي هي الي دعتني

كانت لطمه قويه جت على وجهه من قماااد وهو يصرخ عليييه:كذووووب

الفارس وهو يزحف على الارض مبتعد عن قماااد:انا ماسويييت الا الي هي تريييده

مسكه قمااااد بيده الغير منصاااابه واحكم مسكته على رقبته وده يزهق روووحه

سعد:اتركه يا قماااااد اتركه

قماد:لزووووم يمووووت الخسييييييس

سعد:اتركه يا خووووي لي معاااه هرج لزووووم اعرفه من قبل لا يمووووت

اخذ سعد الفارس من بعد ماعرف انه هو نفس الفااارس الي تهجم على عبله

التفت قماااد على شوووق الي كااانت تبكي وتحاااول تستر اكتااافها ببقااايا الثوب المتمزق قرب منها خطوه وهو يمد يده لجل تقرب منه ... شوق ماحست بحالها وهي تندفع لصدره وهو يلمها بحييييل

كانت ترتجف من الخووووف وهو يرتجف من الغيض

سعد وهو ممسك بالفااارس وينااظر بعيووونه:وهالحيييين يا رجااال ودك اتقووول لي انت وش سالفتك مع الحريم هووو زيينن فيييك كل مالقيناااك مع وحده قلت هي الي دعتني هااه

الفارس:يي يييا يا عمي عهدن على ماعيييدها نوبتن ثااااانيه

سعد:ودك هالحييين تقووول لي الحرمه السبيه دعتك هي بعد

الفااارس:للا يا عمي للا انا نفسي شييينه وعهدن علي اني معااااد اعييييدها

سعد بعدم تصديق:هي اجل مادعتك

هز الفااارس راسه بلاااا وانهااال عليه بعدها سعد بالضرب وهو يحس انه مقهوووور منه

اخذ قماد شوق لورا الصخره الي كانت قريب منهم وهي بعدها ملمووومه لصدره وتبكي بشهقااات عاليه حاول قماد انه يكتمها وهو يلمها على صدره

قماد:ارجاااااج يابنت الشيييخ طااايل ....ترااااني موجووووع حييييل من الي جرااالج لا توجعيييين قلبي ازووود ببكاااج

شوق وهي تبعد وجهها عن صدره وتناااظر بوجهه:انت هذا الي ودك اياااه يصيييرلي

تفاااجئ من الي تقووولها ولم وجهها لصدره:انكتمي وش الهرج ذا الي قاااعد تهرجييينه....................هذا كله من تحت يدج انتي الي جيييتي بمكااان مهب مكااانج ولزمتي انج تغزييين

شوق بصوت منكبت:هذا شي مايعنيييك وانا بكييييفي

لمها حيييل قماد لصدره وهو يرفع يده المنصابه ويحيط بها شوق

قماد:لو اني ما انصبت وعاااودت اهنيا كااان شفتي الكيييف الي تحجييين عنه كان دريتي انا وش الي كنت خااايفن منه

شوق:وكاااااد انك انت الي قلتله يتهجم على

قماد:انا يابنت الشيخ طااايل!!!؟؟ انا؟!!!؟

ظلو على حالهم لين ماحس قماااد ان ارتعاااشتها بدت تخف ...بعدها اشوي عنه وناظرها وشاف نظراتها الي صارت تصد بها من خجلها للي يصيير لهم

قماد:خليييج اهنيا ودي اجييب الشال الي بسرج الفرس واعاااود لييج

تركها وعاااود للفرس واخذ الشال وجاااب الفرس وجا عندها لفها بالشال انتبهت حينها شوق ليده المنصابه بعد ما شااافت الدم الي بقع فيها من بعد مارااح لجل ايجيييب الشال

شوق:انت مصيوووب؟؟

ناظر بعيونها:ما هقوووتي ان بنت الشيييخ طااايل يهمها ان كنت مصيوووب اولااا...امشي ودنا نعااااود للخيام

لزمت شوق السكووت وهي تشوووفه صاااد عنها

صعد قماد الفرس ومد يده لها لجل تصعد معه على الفرس بالوقت نفسه اخذ سعد الفارس من بعد ما قيد ايديه وخلاااه يمشي وراااه معاااوديين للخيام وطلب من قماااد انه يسرع قدامه لجل يسعف يده الي كانت تنزف

قبل لا يوصلون للخيام حست شوق ان قمااااد بدا يفقد وعيه من كثر الدم الي نزف منه وقفت الفرس وسااعدته انه ينزل وفقد وعيه اول مالامس الارض جنت حينها شوق وهي تحاااول انها تخليه يعاااود لوعيه ومن بعدها شقت الثوب عند الاصااابه وبدت تضمد الجرح وتحاااول انها توقف النزييف

شوق:يا وييييلي يا وييييلي ارجاااااك ارجاااااك لا تتركني وش اسوووي وش اسووووي

قامت شوق تمشي رايحه جااايه ماتدري وش اتسوي وتحاااول انها تذكر النبته الي علمها الحكيم انها تشفي باذن الله من النزييف لقتها وخذتها بالسرعه تحاااول تسعف بيها قماااد


وصل سعد بالفارس الي غدر فيهم من طريق ثاااني واخذ يسال عن قماد وشوق وخبر المها بالي صااار

طلب من الفرسان انهم ياخذو الفارس وياسرونه وعاااود هو ومعه بعض الفرسان يدورون قماد وشوق


كانت جالسه ووجهها للجهه الثانيه وهي تهز راسها :يا ويييلي يا ويييلي

فتح قماد عيونه وشافها.. تحامل على نفسه وجلس من غير ماتدري وصار وجهه قريب من كتفها اول ما حست بانفاااسه التفتت وناظرته وهو العرق ينزل من جبينه

قماد:والله الي رفع سبع سمواات اني ماقلت له يسوي الي سوااه

ناظرته شوق بخوف وهي تشوف انه عاااود يفقد وعيه مرتن ثااانيه

شووق:يا ويييلي قمااااد قمااااد ارجاااااك يا ولد العطااااوي وش الي يصيييرلك

انتبهت شوق لصوت اقدام الخيل وقااامت بسرعه وهي تشوووف سعد وتركض له لجل تطلب معونته


بخيمة الحكيم مدد سعد قماد وعاااينو اصابته


المها خذت شوق لخيمه ثاانيه وقعدت تهديها من بعد مادرت بسالفة الفارس الي تهجم عليها ولزمت عليها ماتطلع من الخيمه لين مايعاااود فهاد

قدام الخيمه طلعت المها وشافت اخوها سعد الي كان باين بوجهه حجي

المها:وش فيييك يا خوووي

ناظر سعد لخيمة عبله وهو يحس انه مايعرف وش يقول

سعد:وشلوونها

المها:من تقصد يا خوووي؟

سعد:السبيه

المها:والله يا خووي البنيه مهي راااضيه تاكل الزاااد وملزمه ماتحجي معنا

سعد:قوليلها يا خيه ان حنا درينا ان الفااارس هو الي اخطى وانه اعترف بالي سوااه وان ...هي مادعته مثل ماقاال

المها:هي تدري يا خوووي انه هو الي غلط عليها وانها مادعته انت بس يا خوووي الي صدقت حجيه

سعد:زييين بلغيها ان حنا درينا وانه خذ جزااااته وباذن الله من بعد مانخلص من الغزو يصير الي تريده

المها:زين يا خووي

باليوم الثاني


دخل عساف على ابوووه بمجلسه

عسااف:ودي اعرس يا بووووي

ابو عساااف:تعرس يا عساااف وحنا بغزو

ضحك عساف:يا بوووي وش رااايك بالي ينهي لك الغزو ذا

ابو عسااف:وشلووون يا ولدي

عساف:الامر هين يا بوووي مير بلاوله خلني اعرس وانت تشوووف عقب وش راااح يسوي عساااف لجل يخلصك من الي تهجمو علينا حنا يابو عساااف نااااس كل القبااايل تهااابنا وشلوووون يجووون ذولا هالحيييين ويخلووونك يابوووي بالحاااله ذي

ابو عساف:عزالله يا ولدي اني مقد شفت ناااس ماتهاااب الموووت مثلهم ..زين يا عساااف ودي الليله اخليييك تعرس اشوووف من باااكر وش راااح تسوي

عساف بفرحه:ابشر يا بووووي ابشر


.........................



وصل ماااجد وحرمته للمكان الي كانت لخيام التااابعه لعيال العطاااوي ومعه راكااان استقبلهم الشيخ وظبيه

بداخل الخيمه سمعت شوق صياح العيل وطلعت راحت لهم بالحااال واخذت تناظر راكااان

شوق وهي تمد ايديها للعيل:احس اني شفت العيل ذا من قبل

ماجد:هذا راكااان العطاااوي

شوق بفرحه:يا وييييييلي وش اتقووول

اخذت شوق تناااظر راكاان من بعد مازاااد وزنه تغيرت ملامحه عليها

شوق:راكااان ايييه هو هو يالبي قليييبه

احضنت شوق راكااان

وكان قماد طالع من خيمة الحكيم يناظرهم ويناااظر العيل والي جو معه وظل واقف بمكاانه

تقدم سعد منهم

سعد:وش السااالفه

شوق ناظرت سعد:هذا راكااان راكااان ولد الليث وكااااد ليث يوم يدري يفرح كثييير

ناظر ماجد حرمته ورجع يناظر شوق

سعد بابتسااامه:صحيييح

ناظر مااجد:من انت وليييه العيل معكم وامه وييين هي؟؟

ماجد:هو ابو العيل وييين؟؟

سعد:بالغزو

صمت ماجد وهو يحااول يلاااقي حجي غير الي جاااي يقوله خوفن من ان ليث يعاااود للديره لجل ياخذ بثاااره من الي قتلو حرمته

ماجد:ام العيل تعطيكم عمرها

صرخت شوق وهي تضم راكاان

سعد :وش اتقووول؟

ماجد:الحرمه صااابتها حمى شدييييده وقالت ان مت خذو العيل لابوووه وهي تعطيكم عمرها مالقيينا لها علاااج والله اخذ امااانته

سعد:لا حول ولا قوة الا بالله

بكت شوق وهي تضم راكاان وقربت منها المها وحاولت انها تااخذ منها العيل الا ان شوق عيت ومارضيت تعطيها اياااه ومن بعدها خذتها هي والعيل لداخل الخيمه

حاول سعد مع ماجد وحرمته انهم يقعدو الا انهم رفضو وعاااودو لديرة حرمته عازمين انهم يضلو فيها ومايعاااودو للديره

البدور فاااقت واخذت تسال عن عيلها وعرفت ان مااجد خذاه لعيال العطاااوي مثل ماطلبت منه ظلت بالفراااش تحاااول انها تستعيد عافيتها لجل تقدر تلحق وليدها وتعاااود بيه الا ان تفكيرها بليث الي حسبت انه مااات وفرقى وليدها خلاها تتعب اكثر وتظل بلفراااش

ارسل سعد لليث من يبلغه انه لزووووم يعااااود لجل شي مهم وعاااود حينها ليث وعتاب ومعهم فهااااد

قدااام الخيمه الكبيره الي منصوبه بوسط المكااان نزلو الفرسااان وتوجهو لسعد وقمااااد الي كانو بالانتظااار

ليث:وش الي يصييير وش اترييييدني له يا خوووي

ناظره سعد وعجز لسااانه انه يقووول له بالي صااار

عتاب وعيونه تجوول بالمكااان:قماااااد وش الي يصييير؟؟

قمااااد بعد نزل راااسه وهو عااجز عن الحجي

ظهور شوق بالعيل اختصر كل الحجي وعيوووون ليييث تتسع بعدم تصديق وفرحه غاااامره تنرسم على وجهه

زادت ابتساااامته وهو يختصر المسااافه بخطوووات سريعه ويااااخذه من يدها ويحضنه بالحييييل

ليث:اويلااااااااااه

ناظر ليث راكااان بعدم تصديق ورجع يضمه وينهاااال عليه بالقبل ويزيييييد من ضمه

ابتسم عتاااب وناااظر قمااااد:وماودك اتحجي يا خوووي

بعد ما اخذ ليث كفااايته باعلااان شوقه لراكااان التفت لشوق وللي معها وقوووف وما شااااف الي تمنى يشوها حينها اندفع للخيمه يمكن تكووون جواها ومعنده ماتطلع لاكن الخيمه الي مابها حد خلااه يعاااود لهم وهو ينااااظرهم

وخيم السكوووت مرتن ثااانيه

حس بشي بدا يوجعه بصدره لاكنه تجاااهله

ليث:ام راااكااان ويييين؟؟

التفتت شوق له وعيونها تسيييل من الدمع

بعدها ناظر ليث سعد وبامر جدي:من الي جاااب راكااان يا سعد وامه ويييين؟؟

سعد:الي جااابه رجاااال ينقااال له ماااجد جابه هو وحرمته

ليث واحساااسه ان قليبه طاااح:والبدووور ماجت؟؟!؟

سكت سعد

ليث:وش السااالفه؟؟

سعد:الله خذا امااانته

كانت نظره غير مفهومه من ليث

سعد:يقول الرجال ان صااابتها حمى شدييييده عيو يلااااقو لها علاااج وانها قااالت ان مت خذووليييدي لابوووه

لثااانيه حس ليييث ان ايديييه مهي قااادره تمسك راكااان وشوووق تندفع عنده تحاااول تاخذ العيل الا انه احضنه بالحيييل وهو يقول لها تتركه

ظل ليث ينااااظر الارض وسكوووت مميت يخيم بالمكااان

كانت دموعها تسيييل بغزاااره قربت منه مرتن ثااانيه

شوق:ارجااااك يا ليييث اعطيييني راكااان

ليث :ودي اظل معه لحااالي

تركهم ليث وهو يمشي رااايح لتله قريب ومعه ركاااان وظل جالس معه بعيد عنهم وهم يناااظرونه

المها كانت بعد تبكي وتفاااجئت بيدييين تلفها وتاخذها للخيمه لجل ايلمها له وزاااد بكاااها بحضااانه هناااك

فهاااد:المها ليييه يا حبة عييني البكا

المها:مدري يا فهااااد العيل صاااعب علي حاااله من بعد امه

فهاااد:ابووه معه والكل بعد

شوق دخلت للخيمه واندفعت هي بعد لحضااان عمها فهاااااد وهي تبكي

فهاااد:يا وييييلي انتي بعد الله يعييين





تقرب عتاااب من ليث بعد ماخلاااه فتره كبيره جااالس لحاااله وجلس قريب منه وهو يحط يده على اكتاااافه

عتاب:يا خوووي ماجووور بالي صاااابك

كانت دمعه بطرف عينه حاااول ان عتاااب مايلاااحضها وهو يشغل حاله براكااان ووجع وجع كبيييير فاتك برووووحه وهو ماهو بمصدق الي انقاااال ماااتت ام العيووون الكحيله ماااتت والله ان تمووووت روووحي لو هي صحيييح مااااتت

ليث:لزووم اعاااود واتاااكد يا خوووي

عتاب بعدم تصدييق:وش الي قاااعد اتقوووله تتاكد من ويييش ؟؟

ليث:لزوووم اشوووفها

عتاب:الرجااال قال لهم انها ماااتت حول من الاسبوووع او اكثر ترجع لويييش يا خوووي ..والموووت حق وانت تدري ان ام راااكااان ماراااح تترك راكااان يفااارق عيونها لو ان هي بعدها حيه

هز لييث راسه رافض الي يقوله عتاااب والوجع يزيييد بصدره وعيووونه عجزت انها تحبس الدمع

عتاااب حس بفجيعة ليث وهو يزيييد من ضغطه على اكتااافه

كان ليث يحضن راكان وهو يحس ان انفاااسه الي كانت تطلع من جوووفه مثل النااار الي تحرق

ليث:خذ العيل يا عتاااب ما ودي احرقه بحرقة جوووفي

عتاب:تصبر يا خوووي الموووت حق وكلنا مصيييرنا الموووت

اخذ عتاااب راكاان وهو منوجع حاله على ليث وطلب من ظبيه تشوف العيل الا ان شوق اول مادريت انه عند ظبيه راحت لها وخذته


...................................



ابو عساااف اعلن الليله انه رااح يزف اولده عساااف على عرووسه متامل خير من ولده انه يخلصه من الي جو يغزووون الديره مايدري ان ولده بااات غرييق بدمه من بعد ما طعنته قوووت لين مالفظ انفاااسه الاخيره وهي بكاامل زينتها

بالصباااح قرب ابو عساااف من خيمة العرسااان ايرييد يسلم على ولده وحرمته


قوت:تفضل يا عمي الشييخ تفضل

ابو عساااف:عساااف وين هووو

قوووت:نااايم يا عمي نااايم حياااك يقووول ما وده يقوووم

ابو عساااف:ايييه وش الهرج ذا ينااام وحنا ورانا غزو

قوت ناظرته وانبهر ابو عساااف بزينها

قوت:وشلووون يا عمي يغزو وهو بعده معرس

ابتسم ابو عساااف:وش انسوي يا بنيتي الغزو ماجاااا الابوقت العرس

قوت:زييين الفرسااان كثيييره مهب بلزوووم ان رجلي يكووون معهم

ابو عسااااف:رجلج هو الي وعد ان يخلصنا من الغزو الي جااانا وهالحييين قووومي ودي اخليييه يقوووم لجل نستريييح من السااالفه ذي

قوت بابتسااامه:تفضل يا عمي ان كااان ودك تصحيييه هذا هووو قدااامك

سحب ابو عساااف اللحاااف من على ولده وشااافه غريييق بدمه

ابو عساااف:عسااااااف عساااااف يا ولدي

حينها صوبت قوووت السلااااح برااااس ابو عسااااف

ومن الخوووف برك على الارض ماهو مصدق الي يصييير له

قوووت:المووووت حق يا عمي الشييييخ

كااان على وشك انه يصيييح بالي بالقبيله الا ان قوووت خلت فوهة الباااروده بين عيونه

قوت:اسكت ...ترا ان سمعت لك صوووت فرغت الي بقي من الباااروده براااسك

ابو عساااف:انتي من ووو وش تريييييدي؟؟؟؟

قوووت:ماعرفتني يا شيييخ ناااظرني زييين تراااني ماربيييت الا قداااام عيووونك صحيييح صارلي ست اسنييين من طلعت من الديره مير ذاااكره حييييل كل فعااايلك الشييينه الي سويتها بديرتي ذاكره حيييل اليووم الي قتلت فيه امي وابوووي قدااام عيني وانا بعدني صغييره وذاكره حيييل انك خذيتني معك وخلييت وحده من عجااايز الديره تربيني عندها

ما جا ببالك اني كل يوووم انااظرك واذكر انك انت الي قتلتهم صحيييح كنت صغيره مير شوفتك قدااام عيني ماخلتني انسى

الشيخ ابو عساااف:انتي وش الهرج الي تقولييينه ..وودج هالحييين تقتليييني

قوت:ودي قليييبك بلاوله ينحرق على وليييدك الي قتلته بيدي لجل تحس بحرقة قلوبنا اما الموووت فهو جاااي ووكاد مهوب على يدي ..اهنااااك ورا الوااادي عياااال من سنييين وهم يعدو العده لذا اليوووم وودي انك تشوووف وش راااح يسووون فيييك وبقبيييلتك وانا الي جيييت من اجله انتهيييت منه الباااقي عليهم يسووون فيييك الي يريدووونه

الشيخ ابو عساااف:يا وييييلج مني يا ويييلج مني وين ودج اتروحييين من يدي

حينها انقض الرجال الي كااان واقف ورا قوووت وامسك بالسلااح الي بيدها قاومته قوووت وصااارت بينهم مشاااده لاكنها قدرت انها تخلص حالها وتهرب بالوقت نفسه كان هجوم عيال العطاااوي الي تحركو من ليلة البارحه بعد ما اصر ليث انهم يهجمو عليهم

صار الهجوووم ونجحت الخطه وقدرو انهم يسيطرووون على اهل القبيله الي استسلم نصفهم وبعضهم فر والبااقي يحااااول يتصدا لهم

انصاااب عتاااب بطلقه خلته يفقد وعيه على طووول وخذه فهااااد لمكاان قريب يحاول يسعفه اما قماااد والليث وسعد والي معهم قدرو انهم يحاااصرو الشيخ ابو عساف الي كان منهااار من موووت ولده وياسروووه من بعد ماقاااتلو الي معه


اعوااان عيال العطاااوي قدرو يمنعون قوت الي كانت ناااويه تهرب من القبيله وخذووها سبيه وهي تقاااوم انهم يمسكوها


النصر تحقق لعيال العطاااوي واستولو على القبيله وكل ممتلكاااتها

اول مافاااق عتاب وصلته البشاااير بالنصر وخذوووه للخيمه الي كانت من افخر الخيم وكانت لشيخ القبيله وهناااااك تلاقو جمييع وكلا يهني خويه بالنصر

كان يوم طويل بالنسبه لهم انهد حيلهم فيه وبلاخير نالو الي يريدونه الشيخ ابو عسااف كان يوم عسير عليه وهو يبدا صبااحه بفقد اولده ومن بعدها قبيلته وانه يكوون بلاخير اسيرن عندهم خذوووه هو وكل من قدرو ياسرونه للمكان الي بنااه هو لجل ياسر فيه من يريد وكااان مكااان زييين واستحق من طاااح فيه

بالخيمه الكبيره طلب فهاااد من بعض الفرسااان انهم يرووحو ويجيبو الي بقو مع الحريم والحريم للديره من بعد ما تطمنو انهم هم الي مسيطرين بالمكاان


عتاب كان طايح على جنبه من بعد ما اخذ علاااجه بصااابته والبقيه جالسين قريب منه كلا يعطي شوره بالي راااح يصير يوم ادخلو الفرسااان الي صااادو قوووت وهي تحاااول تهرب من الديره

الفااارس وهو يجرها وهي معنده:هذي ياعمي لقيناااها على مشااارف الديره ودها تنهزم

عتاب وهو جالس اخذ يناظرها وهو غصبا عنه يحس بدقااات قليبه تزيد وبنفس الوقت كان يحس بغيضه عليها وهو يشوف زينتها الي كانت تدل انها عروووس

الكل كان ينااظر قوت وهم يدروون انها عطاويه

قرب ليث من عتاب وجلس متكي بس على رجوله

ليث:وش راااح انسوي فيها يا خوووي

عتاب :هقوتي ان ذبحها حلااال يا خوووي

ناظر ليث عتاب باستغراب:وهي عطاااويه يا خوووي

سكت عتاب بعدها قال:الي تشوووفه ياشيييخ هو الي يصييير

ليث باستغراااب:!!!شيييخ؟؟

عتاب بابتسااامه:اييه انت يابو ركااان لزوووم تكوووون شيخ القبيله قبيلة العطاااوي وانا شويييرك وعوييينك

هز ليث راسه بلااا وهو يبتسم

عتاب:يا الربع تراااني ابااايع اخوووي ليييث على انه هو شيخ القبيله

الكل صاح مايد وهم مستعدين انهم يبااايعو على انه شيخ القبيله

ظل ليث يناااظر عتاب لفتره وعتاااب يشجعه بنظراته

قوت وهي واقفه وايديها مقيده كانت تحس بفرحه كبيره بصدرها للي وصل ليه عيال العطاوي كانت تدري ان مابه حد من الديره يدري انها هي الي قتلت عساف ووكاد ان عيال العطااوي يحسبون انها هاااربه من مواجهتهم وبنفس الوقت كانت تحس بوجع لشوفتها لعتاااب وهو جالس مصيوب برجله

عتاب:يا خوووي توكل على الله وحنا ترااانا كلنا معك

ابتسم ليث رغم الوجع الي كااان ساكن بصدره وقاااام يناااظر البقيه الي تقدمو كلهم ناحيته ومدو ايديهم له مبااايعينه على المشيييخه

ومن بعد ماهدي المجلس وجااب قمااااد واحد من البشوووت الزينه الي كانو مجهزينه من زمااان لليوم ذا ولبسوووه لليث..حينها حس لييث انه مسؤل بحق عن القبيله واهلها وهو يصرخ بداخله ان قليبه من قريب منفجع وشلووون يكووون اليووم شيخ كتم الحرقه الي بصدره وعااهد نفسه انه يكوون بخدمة القبيله واهلها

قرب ليث من قوت وهو يناظرها ومن بعدها التفت لعتاب الي اشاااح بوجهه لجهه ثاانيه ورجع بعدها ليث يناااظر قوووت

ليث:اسمعيني يا عروووس الشيخ عسااااف

ناظرته قوت وبعض نظراتها وجهتها لعتاب

ليث:صحيييح انج غدرتي بينا ونهبتي ذهوبنا ومالنا وجزات الي يسوي كذا الذبح

تلاااقت حينها نظرات عتاب بقوت وابعد نظره عنها

ليث:مير حنا بعدها درينا انج عطاااويه وبرغم ان اخوووي قال لج انج عطاااويه وبين لج هذا الشي الا انج عاااودتي مرتن ثااانيه وغدرتي فيه وتركتيه وانتي تعتقدي انج ذبحتيه وهذا كله لجل اتكوووني حرمة الشيييخ عسااااف

ناظرت قوووت الارض وهي عاااجزه انها تقول كلمه

ليث:لجل انج عطااااويه .....بس ...ما ودنا نااااذيج ولا ودنا اتكوووني وحده من السباااايا ...ولا ودنا بعد تكوووني حره وترحلي من الديره خوووفن تعاااودي وتغدري بينا لجل رجلج الي انذبح

التفتت قوت لليث واخذت تناااظره مستغربه من حجيه

ليث:لجل انج عطاااويه ودج اتكوووني حره مير تحت الوصاااه وحنا الي لنا الشووور عليييج... ولاتنسي انج شرف عيال العطاااوي...راح ايكووون لج بيييت الحااالج ونخلي عندج الي يخدمج لاكن كل حركااتج وسيراااتج وجياااتج اتكووونييين ماااخذه فيها الاذن وحنا الي نعطيييج المواافقه او الرفض ولزوووم تذكري بعد ان عيوووننا وراااج بكل شي اتسوييينه..وانه لا يخطر ببالج الغدر لان حينها ماينفع النسب يشفعلج بشي

عتاب كان يسمع لليث واعجاااب كبير بقراااره الي حكم به على قوووت والي ماخطر بباله هو انه يحكم فيه عليها

طلب حينها ليث انهم ياخذونها لواحد من لبيوت القريبه ويتركونها فيه ويخلووون فرسااان ترااقب البيت من بعيد

قضى ليث بقية اليوووم يعطيهم بعض القرااارات لجل الفرسان والغنااايم والناااس الي خذوووهم اسرى وكاان بكل حااجه يشااور فيهاعتاااب

على اخر اليووم اندفع ليث نااحية شوووق الي كااانت تحمل راكاان وخذاااه لصدره يلمه ويحب فيييه

الفرسااان ظلو ثلااثة ايااام عند الليث وعيال العطاااوي ومن بعدها قرر فهاااد انه يعاااود هو وحرمته وبنت اخووه

شوق كانت خلال الايام الي مضت اتنوم راكاان عندها وكان ليث يتمنى لو ينيمه عنده لاكنه عجز باول ليله يخليه يناام وخذته حينها شوق ونيمته عندها

اكثر الاوقااات كانت شوق اتجييب راكان عند ليث الي كاان يطلبه كل ماحس بشوق له او انه يروحقريب الخيمه ويطلبه وطووال الوقت كانت عيون قمااد عليهم وهو يحس بضيقه من الي يشوفه

بالخيمه ضمت شوق راكاان بحيييل لصدرها:للا يا عمي للا وشلووون ودك اياااني ارحل عنه

فهاااد:وش الي وشلووون ...انتي نسيييتي ان حنا لنا ديييره ولزوووم نعاااود ليهاااا

شوق:وراكااان؟؟

فهاااد:راكااان ولد الشيييخ والشيييخ ماهوب عاااجز عن ولده

شوق:انا مقدر يا عم قليييبي انربط فيييه

فهاااد:وش الهرج ذا...

التفت حينها فهاد للمها:تعااالي يا المها وشووفي المهبوووله ذي وش اتقوووول....اهرجي معها وخليها تعقل حنا لزوووم اليوووم نعاااود

طلع فهااااد وهو مضااايق من شوووق وراااح للمجلس ظلت المها تهرج مع شوووق الي بدت تبكي وهي تضم راكااان ورااافضه انها تسمع لهرجها



قوت ظلت ثلاااث ايام ماطل عليها حد الا بنيه كانت تدخل عليها تجييب لها الزاااد والماوباليووم الثااالث دخلت عليها لبنيه واستااذنت منها ان هناااك رجااال ودهم يدخلووون للبيت كانت مستغربه من هم

ومن بعد ما دخلو وكاانو حاملين صناديق فيها ملااابس وكل شي وبعض الذهووووب

الرجال:هذي من عند عمي الشيييخ يقول هي لج وان كااان بخااااطرج شي بعد اطلبي وايجيييج لبيتج

ناظرتهم قوووت:ليييه هو عمك الشيييخ خااايف مني انهبه مرتن ثااانيه

الرجال:للا يا عمه عمي الشيييخ وده يكرمج لجل انج عطاااويه

قوت:زييين اجل قل لعمك الشيييخ ان قوووت ودها بعبله تكووون معها

الرجاال:زييين يا عمه

خبر الرجال الشيخ ليث ومعه عتاب الي بدا يتعااافى من رجله ويمشي عليها

عتاب:هذي وش ودها بعد وكااااد ان براااسها شي يا خوووي ارجاااك لا تجمع بينهن

ليث بابتسااامه :ليييه يا خوووي خااايف ماهقوووتي ان جمعتهن وراااها شي مير وكاااد انودها بمن يونسها وحنا ترا عيووننا وراااهن

عتاب بتنهيده:زييين يا خوووي سو الي ودك اياااه وترا عبله بوجه اخوونا سعد بلاوله خذ بشوووره


شوق من ورا ليث وعتااب الي كاانو واقفين بطرف البيت:يا شييييخ

التفت لييث لشوق وهو يدري ان راكااان معها لاكنه تفاااجئ بدموووعها الي مغرقه وجهها

ليث:وش الي صااار

شوق ببكاء:ما ودي مااااودي ارحل ما ودي اترك راكااان

حينها جا فهاااد ويتبعه عااايض وبعدهم بشوي جا قماااد ومعه سعد الي كااان يستعد هو بعد اليوم للرحيل

فهاااد:اسمعيييني زييين يا شووق حنا لزووم نعاااود للديره وانا عهدن على اني اجيييبج بالوقت الي تريدييين تشوووفي راكااان وهذا هو عااايض بعد يقووول انه متى ماكااان ودج تجييين هو بعد حاااضر انه يجييبج

شوق:للا انا ودي اكووون لراكاان وبس ماااودي اعرس

فهاااد حس بتوتر من هرجها قدااام عااايض :اسمعيني زييين يا بنت اخوووي ..صحيييح ان اخوووي تعود كثييير انه يخليييج اتسوييين الي براااسج

مير الهرج ذا مايجوووز ولزوووم تعاااودي معي هالحييين وتتركي الي براااسج

تقرب ليث من شوووق وهو يشووف كيف هي متعلقه براااكاان وتبكي

ليث بهمس:ودج تظلي اهنيا يا شووق

شوق:ماني قااادره يا شيييخ على فرااقه هو بحاااجتي هالحييين

مد ليث ابهاام يده ليد راكاان الي مسكها وهو يناااظره بحزن للحال الي وصل ليها

ليث:وقااادره يا شووق على فراااق امج وابووج

شوق وهي تناااظر لتحت:هو بحاااجتي اكثر من حاااجتي انا لهم

هز رااسه والتفت لعااايض:وش تطلب مني يا عااايض وترخص الشوووق

تفاااجئ عااايض وكل الحاااضرييين من طلب لييث واولهم قماااد الي بلع ريقه من الي استنتجه من طلب لييث

عايض:بنت عمي الشيخ طاايل ماهي برخييصه يا شيييخ مير ان كااان هذا الي تريييده ترااها مرخوصتن من خاااطرن طيب

قرب ليث من عااايض وحط يده على كتفه:هذا هو العشم فيييك يا خوووي وانا تراااني حاضرن لك باي بنيه تريييدها اتكفل بكل جهااازها وعرسها

ابتسم عاايض والتفت لفهاااد الي كان مايدري بويييش يهرج

ليث:يا خووي يا فهااااد لا تاااخذ بهم بنت اخوووك تراااها بعيوووننا وحنا قريب باذن الله نجيييكم ونعقد قراانها مير ودنا يومين لجل الاموور تستقر بالديره بلاوله

هديت نفس فهاااد حينها وهز راااسه مواافق للي يطلبه ليث

التفت لعااايض:وانت يا خوووي امااانتن عندك ان الي بخااااطرك تقووووله وانا بعيوووني اخدمك

ابتسم عااايض:ان كااان لابدلي من مطلب ...انا مطلبي بنت الحكيم اخذها على سنة الله ورسوله

هز ليث كتف عااايض:ابشر يا خوووي


انتهى اليوم برحيل سعد الي وافق ان عبله تكون عند قوت من بعد ما اعطاها حريتها ورحيل فهاااد والمها وفرسااان قبيلتهم اما شوق ظلت من بعد ماطلب ليث قدام فهاد من الشيخ انه يخلي حرمته ظبيه تجلس مع شوق بخيمتها لين يوم عرس شوق

الليث من بعدها ارسل من الغنااايم والسلااح والمااال لكل القبااايل الي غزوها تعوييض عن كل الي نهبوووه ولجل انهم مايتركو بنفس حد غل عليهم

الغنااايم وصلت لقبيلة البدور الي تناااقلو بينهم انتصااار عيال العطاااوي وتناااقلو الاخبار عن الغناايم الي جتهم

كانت حينها البدور تتماثل للشفى ولعلووم الي جتها خلتها تسعد كثير وتشتااق اكثر لشوووفة وليدها وهي ماتدري ان الليث بعده حي




تلاااقت قووت وعبله وكلا كااانت سعيييده بشوفة خويتها

عبله:وليييه يا خيه ماقلتي لهم انج انتي الي قتلتي عساااف

قوت ببتساامه:وتهقيين يا خيه من بعد كل الي جااهم مني رااح يصدقو الحجي ذا

عبله:زييين ترا بو عساااف بعده حي

قوت متفااجئه:بعده حي ليييه ماقتلوووه!!!؟؟؟

عبله:الي سمعته يا خيه انه كاان كثيير منهااار من بعد موووت ولده وهقوووتي انهم عجزو يقتلونه والرجال ماحااول يقااتلهم خذووه اسيير ومن عقب رااح يشوووفو وش راااح يسو فييه مير يا خيه قولي لعيااال العطااوي بالي كنتي تسعييين له والي سويتييه لجل يرفعو الحصاار عنج

قوت:ما هقووتي يا خيه ماهقووتي حتى لو درو اني انا الي قتلت عسااف وكااد ما رااح يصدقو ورااح يقولو اني قتلته لجل احمي حاالي منهم

عبله:انا اروووح وخبر الشييخ ليث بكل شي

قوت:للا يا عبله للا ارجاااج ترااني حيييل مستحيه من الي جااهم مني ..انا راااضيه عن الحااال الي انا فييه يكفيييني اني هالحييين منتميه لديرتي ديرة عيااال العطاااوي وبحمى عيااال عمي وش اريييد اكثر من كذا



.................


الشيخ ابو طاايل وطااايل:هو قااال انه جاااي لجل يطلبها مننا

فهااد:الي قاله انه جااي لجل يعقد قراانها يا بووي

الشيخ طايل:وش يقصد يا فهاااد

فهاد:مدري يا خوووي وكااد يطلبها ليه هو وده ايااها لجل ترااعي ولده الي صااار من غير ام

الشيخ طاايل:عز الله انها بنيه مهبوله...الله يعييين

الشيخ ابو طاايل:قم يا ولدي يا طااايل وخلنا نجهز لجل نمشي بالصباااح لديرة الشيييخ ليث العطاااوي نبااارك له ونشوووف وش ساالفة لبنيه

طايل:ابشر يابوووي




بالمسا كان قماااد جالس بمجلس الشيخ وهو يحس انه منقهر من الي كل حين طلت ومعاااها العيل لجل ايشوفه ابوه ويظل واقف يهرج معاها لوقت طويل


باليوم الثاني كان قمااد ماار وشااف راكاان بيد وحده من البناات الي عينوهن بالخدمه

قمااد:هاتي العيل

اخذ راكاان واخذ يحبه والتفت للبنت:ويين رااحت الي كاانت عنده

البنت:عمتي شووق اهنيا قرييب رااحت اتجهز طعاام لراكاان

قماد بابتساامه خبيثه:زيين انا رااح اخذه واعاااود بيه بعد اشوي

صعد قماد الفرس ومعااه راكاان وحينها كانت شوووق طالعه من الخيمه وتفاااجئت براكاان عند قماااد الي اسرع بالفرس مبتعد وهي حينها جنت من الي يسويه

شوق:راكاااان يا ويييلي انتي يا مهبوووله ليييه تعطيييه العيل

البنت:هو الي خذاااه مني يا عمه

شوق وهي تلتفت لجل تركب الفرس القريب:الله يااااخذ روووحج

ابتعد قمااااد وماااه راكااان وكااان وده ان لييث يغضب على شوووق لانها ماقدرت تحااافظ على العيل لاكنه تفاااجئ بالي تلحقه

وقف الفرس واخذ ينااظرها بابتسااامه

شوق:هااات العيل

قماااد:ليييه تلحقييني

شوق:هااات العيل

قماااد:هو وده ايااني اخذه معي لجل اخلييه يشووف المزاييين الي على الغديير لييه انتي خااايفه علييه كثيير

شوق بغضب:هذا عيل يا ولد العطاااوي وش له بالي انت اتريييد اتشوووفه

قماااد:ودي اعلمه واخليه يشوووف وانتي عاااودي من قبل لا يفقدج الشيييخ

شوق:الشيييخ يريييد اولده...هااات العيل

ضحك قماااد وحرك الفرس ورااح عنها وظلت شووق تتبعه وهي اتهددوتتوعد لاكن قماااد ما رضي يعطيها العيل قريب من الغدير نزل قمااااد ومعاه راكااان نزلت شوق وراحت ناحيته

شوق:هاات العيل

قمااد بابتسااامه:للا ما ودي

شوق:قلت هاات العيل

قماد بنبره غااضبه:وش راااح اتسوييين هاااه

شوق:يوم يدري الشيخ بال قاااعد اتسويييه لولده حينها راااح اتعرف وش راااح اسوي

قمااد:تركتي ولد عمج لجل راكااان

شوق:هذا شي ما يعنيييك

قمااد:ولا لجل اتكوووني مرة الشييييخ

انصدمت شوق من الي يفكر فيييه وظلت وااقفه تناااظره

شوق:هااات العيل

قماد وهو يبعده عن ايديها:ماااا ودي

ليث:قماااااااااد

التفت قمااااد وشوووق لليث الي اقترب منهم واخذ راكااان من ايدين قماااااد

ليث:وش الي قاااعدييين اتسووونه بالعيل

شوق:هو الي خذاااه من غير شووور

قماد:وخذيييته وش الي راااح يصييير؟

ليث بغضب:هذا عيل يا قمااااد مهب لعبتن بيديييكو

قماااد:وانت ليييه تترك العيل بيدييين ناااس ماتقدر عليييه

ليث:صاااادق يا خوووي وانا الي كنت ناااوي اخليييك تملك على بنت الشيخ طااايل لجل ولدي ايكووون قرييب مني هقوووتي اخطيييت

تفاااجئ قماااد بالي يقوله ليييث ومعااه شوق الي كانت محتاااره لييه قال ليث لفهااد انهم قريب رااح يعقدوون قراانها وعلى من

التفت عنهم ليث لراكاان واخذ يحبه

ليث:عيل صغيير تااخذونه بضربة الريح والاااقيكم تتقاتلوون علييه عز الله اني ماعرفت اختاار من يكووون ولدي بوصاااته

قماااد:العذر والسمووووحه يا شييييخ

قرب قمااااد وحب كتف لييث وهو يعيييد اعتذااره منه

التفت قماااد لجل ايرووح وجااه صوت ليث

ليث:ما قلت لي وش رااايك بالملكه

التفت قماااد وناااظر شوق والشيييخ ليث

قماااد:الي يريييده الشيييخ حنا حاااضريين له ولجل راااكااان مستعد اسوي حتى الي ماودي اسويييه

ابتسم قماااد والتفت عنهم ورااح حينها حست شووق بنااار ودها تاااكل قليبها من الهرج الي قاله...خسيييييس زييين يا ولد العطاااوي امرك بسيييط


!! !!
!! !!
!! !!

ودمتم وديمه العطا

ان شالله متى ما خلصت الجزء الاخير نزلته

محبتي للجميع

تفتح بسبب عوده الكاتبه

حياج ودوم

تم دمج الموضوعين

مشرفات القسم

الحمد لله على السلامه وديمه وجعلها اخر الغيبات
جزء اقل ما ينقال عنه انه رووووعه تسلمين على هالابداع
واخيرا انتصرو عيال العطاوي و
البدور وليث اتوقع انها هي اللي تروح لقبيلة العطاوي لجل ولدها وطبعا تكتشف ان ليث موجووود ما مات ويجتمع شملهم مره ثانيه
عتاب وقوته اتوقع ان ابو عساف هو اللي يعلم عتاب انها اللي قتلت ولده
قمااد وشوووق يجننوون وقماد هذا ماله حل رهيب

شكرا ودوووم وتسلم يدس

هلا وغلا بوديمة

حيا الله هالطله مشتاقين لك والله

قوت ياحبي لها اخيييرا عرفنا سرها بصراحه هالبنت بنت رجال وا ن اشهد ان الدم العطاوي يجري بعروقها

بدور وولدها تحزن لكن ان شاء الله تتعافى وترجع لليث وولدها

قماد مبروووووووووووووك جاك يامهنا ماتنى بس الله يستر من شوق وش بتسوي بك شكلها ناويه توريك الشغل مضبوط

ابو عساف عساك من ذا واردى تستاهل ماجاك

وديمة ابدعتي ياقلبي وننتظر الجزء الاخير بفارغ الصبر