كاتب الموضوع :
safsaf313
المنتدى :
القصص المكتمله
الـــبــآرت الخــآمــس عشر
رحلت بغربة دياري
أدوربالحياة إنسان
أدور من يفهمني ..
وبجرحي يواسيني
لقيت إني على طبعي ...
وعلى صدقي كثيرأنهان....
تعبت ومالقيت إللي على همي يقاسمني.
:::
:::
:::
بــعد اســبوع ..
بــآلمــديــنــه
سحر : ويش رايكم نروح المزرعه نغير جو واليوم الجو غيوم وامطار
شوق : طيب بكلم عمي بقوله بنجيه بالمزرعه
رغد : دقي وقولي لنا بسرعه عشان نجهز
شوق : اوكي حتى عماتي راح اكلمهم يروحون معنا
قبل تفتح جوالها .. دقت ام سامر
شوق : هلا عمتي توي بدق عليك
ام سامر : اخباركم .. ويش مسوين
شوق : بخير الحمدلله ..كيفك انتي والعيال
ام سامر : الحمدلله بخير .. شوقه انا داقه اقولكم اننا بالطريق للمزرعه تعالوا
شوق : ههههههه توي بكلم عمي
ام سامر : خلاص يالله الحقونا قبل يأذن الظهر
شوق : اوكي الحين بقول للبنات يستعجلون ... قفلت من عمتها وبسرعه تجهزوا لان كلهم متحمسين والجو حلو
بالسياره
ريم : بنات شوفوا في مطر عالقزاز
رغد : افتحي الشباك ريحة المطر تجنن
شهد وفيها النوم : تكفوووووون كوايـــت نعسانه مووت
هنادي كانت وراها اخذت علبه المويه ورشتها على شهد ... انطلقت صرخات شهد بالسياره ..
شهد : غــــــــبببيييـــــــــــــه انتي ...
هنادي تضحك : صحصحي معنا بدل الكسل والخمول حقك
شهد تنزل طرحتها اللي مبلوله مويه .. وتلف على المقاعد الخلفيه ..: هين ياهنادي ماراح انسها لك وبردها
هنادي : طيب طيب الله يوفقك .. "اخذت الكيس اللي جابته من السوبر ماركت "..مين تبي سنكرس
سحر لفت عليها : طبعا انا .. اعطيني سفن وسنكرس ..<<بسكوتي ومشروبي المفضل بالكشتات خخ
ريم : جبتي كيندر ؟!
هنادي تدسه عن ريم : لا ماجبته غالي صاير بــ3 ريال
ريم : والله لو بعشره بتجبينه بس اعطيني شفتك حطيتيه بالشنطه
هنادي : شوفي بعطيك واحد بس غيره لاتحلمين فيه
ريم عصبت : هيه انتي .. انا اعطيتك عشره وقلت لك ويش تجيبين لي ولسحر ... يالله هاتي طلباتنا
هنادي رمت العشره بوجهها : خذيها اصلا انا مشتريه كل شي من بنكي الخاص
سمر : قصدك من بنك السرقات اللي تسرقين من فلوسنا طول الشهر
هنادي تفتح بسكوت تويكس وتاكله بلامبالاه : والله مهما تعددوا الاشخاص فالمال واحد .. مال ابوي يعني حلالي ..
سحر فتحت عيونها على كبرها : الحين عرفت كل مافتحت درجي القى فلوسي ناقصه .. اثاريك تسرقين
رغد صرخت عليهم : الله يرجكم الله اللي يقول انكم سيدات اعمال ترى كلها ريال وريالين ومسوين لها قضيه ريم تحط يدها على خصرها : مهما كان اسمها سرقه وهالخبله ذي ماتعرف الحلال والحرام
هنادي : وابشرك بعد بسحب منك لما تاخذين مهرك .. بصفيك على الحديده
شوق : هههههههههههههههههههههههه الله يرجك ياهنادي ماتتركين سوالفك .. ترى تكذب عليكم انا اعطيتها الفلوس
هنادي : انا وانتي واحد صح شوووقتي ؟؟!
شوق : صح ياقلبي .. يالله عاد عن الهوشات شوفوا الجو كيف يجنن
سحر تحط على الشباك وتتنهد : آآآآآآآآآآه ... كلهم لفوا عليها مستغربين من حركتها
شهد : سلامتك من الآه ..
هنادي تطالع بالطريق وعايشه الموقف : آآخ بس لو معي حبيبي .. ونتمشى بذا الجو .. ويمسك يدي ويقول لي احبك ياهنودتي .. وانا خدودي تصير حمراء واضربه على يده اقوله ترى استحي ...
خيم السكوت على البنات .. وبعدها انطلقت ضحكاتهم ..حتى السواق يضحك
الكل : هههههههههههههههههههههههههههههههههههههـــــآآآآآآآآ آآآآي
رغد ميته ضحك : ههههههه لالالا .. فيك شي اليوم ياهنادي
جلالي : هنادي انت لا يحلم انت مايعرف رومنسيه زوج في قول اهبك انت في شوته بعيد
الكل : هههههههههههههههههههههههههههه
شهد تتكلم : اشـــ...ــووف .. وجــ...ـهــ...ك ههههههههههه
هنادي تلف عنهم : بلاكم مستهينين فيني ..
سمر : اشك انك تعرفين الرومنسيه ..
هنادي : اقول اسكتووا بس ويش عرفكم فيني
شوق : ههههههه لاتزعلين بس لو شفتي شكلك وانتي تحلمين .. يضحكـــــك
هنادي : عادي اهم شي واثقه بنفسي
شهد صحت زين : امووت على الواثقين . اقولك لقطي خشتك
رغد تضحك : شوفي خشمها يرقص
هنادي : يرقص .. ليش هو خشم والا خصر
ريم وسحر وسمر : ههههههههههههههههههههههههههههههههههه
شوق : والله عليك كلمات ياهنادي مدي من وين مطلعتها ..
هنادي: ماتشوفين لخبله ذي تقولي خشمك يرقص
شهد : محش يالدلخه
هنادي ترمي عليها شيبس ليز : اقول اكلي وانتي ساكته
شهد : يم يم .. الحين بفرمه من الجوع
ريم : شوق بس عمتي ام سامر اللي راحوا
سمر : ياليت تجي هديل وحنين
هنادي : ايه ياليت تفلها هدووله معي .. مو انتم الله لا يبلنا بس جالسات
شوق : خلاص قربنا اهجدوا
:::
:::
:::
بالرياض ...
فهد : انا مضطر ارجع جده يبه
ابو رياض : ليش ماتستقر هنا وانا ابوك ..
فهد : يبه كم مره تفتح معي هالموضوع قلت لك ماقدر اجي هنا والحياه متعود عليها هناك
ابو رياض : هناك مثل هنا .. لازم ترجع وتكون مع اهلك وجماعتك هنا
فهد : يرد الله خير ... ان شاء الله مايصير الا اللي يرضيك
رياض : متى طيارتك
فهد : المغرب
ام رياض : الحمدلله يعني بتتغدى معنا
فهد ابتسم : ايه ياخالتي بتغدا معكم
ندى وقفت بتطلع غرفتها ..
ابو رياض : على وين ياندوو ؟؟
ندى : بروح غرفتي يبه .. وعيونها على فهد اللي نظراته له حرقتها من اول الجلسه
امها : اجلسي معنا يايمه .. ليش تحبسين روحك بغرفتك انتي صاير لك كم يوم متغيره
ندى : لا متغيره ولاشي يمه .. بس افكر بالاختبارات ناسيه اني ثالث ثانوي ولازم اشد حيلي
الكل : الله يوفقك ياررب
ندى : امين .. الحين بروح غرفتي .. وراحت بسرعه عالغرفه
اول مادخلت كانت عارفه انه بيلحقها قفلت باب غرفتها .. وجلست على مكتبها .. فتحت لاب توبها الفوشي دخلت على المسن ماشافت ليان ولا دانا اللي كانوا 24 ساعه على المسن
ندى : يارربي وين اختفوا من رجعنا مالهم حس حتى جوالاتهم مقفله ... ويش سوى معهم فهد ... آآآآه حتى الطلعه محاسبني عليها .. تذكرت صورها والمقاطع ..مسكت راسها تحس بدوخه وصداع ..
ندى ويدها على راسها : متى اخلص من المشكله ذي .. فهد احس ولاهامه اللي صار معنا لو يدري ابوي والله غير يذبحني والا هزاع آآآآه بـــــس راح اموت من التفكير حتى نوم ماتهنى فيه ... مشت باتجاه سريرها قبل تجلس اندق باب غرفتها ..
ندى : ميـــن ؟!
امها : افتحي ياندى .
ندى : ياربي اكيد بتسالني كالعاده وتزن فوق راسي لين تعرف لكن مستحيل اقول ..
:::
:::
:::
بالمزرعه ..
هنادي : خلونا نلعب غميمه ..
خلود : موافقه ..
ريم : بس بدون غش خص نص هنووده
هنادي تكشر : ياربي ليش دايم يركزون علي بالغش بالمدرسه وبالبيت وبكل مكان .. اووف
سحر تدقها بقوه : هيه لاتكوني ماتدرين ليش
هنادي : لا ماعرف ليش علميني ؟
سحر : لانك اكبر نصابه على سطح الارض
هنادي : طيب طيب خلونا نبدأ بسررعه ..
خلوود : ريم عليك العد .. يالله ابدي
بجــهـه قريبه ماهي بعيده كثير كانت شهد ورغد مع بعض
شهد : احس مستواي رجع حسن من اول
رغد : ايه ملاحظة .. بعد اللي صار تغيرت فيك اشياء كثيره
شهد ترجع شعرها عن وجهها لان الهواء يلعب فيه : اممم زي ويش تغير فيني
رغد : اخلاقك مرره متحسنه حتى مع شوق وانتي تكرهينها
شهد تغير وجهها : لاتقولي تكرهينها يمكن ماحسيت فيها بس مهما صار هي اختي وبتظل اختي
رغد : مشاء الله والله في تحسن ملحوظ بقناعاتك ..
شهد : رغد بلا تطنز ..
رغد : انا ماتطنز على قولتك .. بس تعالي كوثر علامها علينا
شهد باستغراب : علمي علمك .. ماتطيف مني كلمه على طول تشب فيني
رغد : يالله بالمهفي ويش نبي فيها اللي يبينا نبيه غير كذا الله يسهل عليه
شهد : صدقتي ... الا شخبار عبودك يحلووه
رغد : اخـــبـــ...... قاطعهتها نغمه الرسايل
شهد تشوف الساعه ومستغربه : مين اللي يرسل الحين
رغد كمان باستغراب : مدري بشوف الحين .. اول مافتحتها ارتسمت بسمه عذبه على شفاتها وقرات احرف رسالتها اللي اخذتها لدنيا ثانيه
صبآح آلخير" يـ/ آحلى صبأح بدنَيتيَ ،،
صبآح آلنور" يـ/ نور طلَعوآلقلبً حيأ به .."
هلآ بآلحبً يومَ أنهً تغنى وطلتهً "طله) ،،
هلآ بـ\ آلشوقًَ لأ غردَ منَ محيأك وعذآبه ..]
حضؤركَ بهجَة آلجوريً وزهرًألكآديَ:
وفلة حضّوركً بهآ ! رومأنسيهً "
وموسيقى× حيلَ جذآبه×
شهد : ههههههههههه اكيد عبوود
رغد بانت غمازاتها من ابتسامتها : يس افكورس ماي بيبي
شهد تقلدها : ماي بيبي .. هاتي خلينا نشوف حبيبك ويش كاتب لك .. قرأت الرساله
شهد : وـآآآآـو صراحه مرره حلو المسج
رغد تسحب الجوال وتضمه لصدرها : وه بس فديته .. تكفين ياشهد تقولين الصدق بالله مافيه ملح يذوب الواحد ط
شهد : ملح !!.. الله يخلف على عقلك بس
رغد تغمض عيونها وتتذكر شكله : وي وي فديته والله يجنني بكل مافيه بسماره بغترته بسكسوكته بشعره .. آآآآه اروح ملح معه
شهد : هو ماهوشين بس تبين الحق انتي تخبين عليه هو بس من عيونك راح فيها كيف لو شاف وجهك .. وتمقل بك زين والله غير يستخف
رغد : بس بعيوني احلى من العالم كلها
شهد : وووع والله اللي دايم معه خويه بالشكل احلى منه ولا في وجه مقارنه بينهم
رغد تفكر : قصدك يوسف خويه ؟؟!!
شهد : والله مدري ويش اسمه بس اللي مره تهاوشت معه
رغد : ايه ذاك يقول عبود البنات يغازلونه صح احلى بالشكل بس سامج مايعجبني مرره الولد اذا جاء مزييوون مره وابيض وناعم مايدخل مزاجي احسن شي لما تحسين فيه رجوله بشكله وتعامله زي عبودي فديته
شهد : اقول ويش رايك نروح عند عمتي وشوق ابرك لنا من سوالفك لوعتي كبدي بعبودك ووع عليك وعليه
رغد تمشي قبلها : اقول مناك تحصلين واحد مثله روحي زين ... واتجهت للبيت .. وشهد تضحك وتلحقها
كانت تدور لها لها مكان تخبئ نفسها فيه عن خلود عشان ماتكشفها .. لفت بالمزرعه شافت المستودع قررت انها تتخبئ وراه .. مشت بأتجـــاهه بسررعه .. لما قربت سمعت صوت جاي من داخل المستودع .. شافت الطاقه وراحت لها عشان تشوف مين اللي داخل ..
...: خلاص طيب اعرف انك تحبني كل ماشفتني بتعيد لي نفس الكلام
...: ويش اسوي بقلبي يحبك من كنا صغار .. بس انتي ماتقدرين حبي لك
...: ويش تقول انت !!.. انا احبك زي ماتحبني نسيت رسايلي لك والا تتناسى
...: مانسيتها ومستحيل انساها .. ولسى محتفظ فيها وراح احتفظ فيها لاخر يوم بعمري حتى لو كنتي لغيري
... مسكت يده بحب : ان شاء الله ما اكون لغيرك .. كل يوم ادعي ان ربي يجمعنا مع بعض ومايفرقنا ونخسر حبنا لبعض
...: لو تروحين مني اموووت .. مدري ويش يصير فيني .. انا احب كل مكان يجمعني فيك .. يكفي اني اتنفس نفس الهواء اللي تتنفسيه
...: احـــــبــــكـ .... قرب وطبـــع على خدها بوسه تعبر لها عن حبه وعشقه الابدي لها
لفت بسررعه والدموع مغرقه عيونها .... مشت خطوه وخطوه وخطوه حست الارض تلف
فيها اللي شافته شل جسمها وعقلها وكل حواسه ... كانت بتطيح لكن استندت على الجدار .. خانها قوتها واندثرت دموعها على خدها الناعم .. تلاشت كل احلامها واصبحت مجرد سراب
كانت تلاحقها .. تلاحقه من سنين وماكانت تعرف الخافي ... سر انكشف لها كانت جاهله عنه او بالاصح كان من المستحيلات انه يصير .. جلست على الارض وتبي تصرخ وتنادي اي احد
.. لكن صوتها بذيك اللحظة اختفى .. تحس باحد يخنقها وبدت الدنيا تسود بعينه الى ان غابت
عن الوعي ..
بالبيت اللي بالمزرعه ..
رغد وقفت : انا طالعه اتمشى لحالي ..
شهد ابتسمت لانها فاهمتها زين : انتبهي لطريقك ..
رغد تغمز لها : لا تخافين علي ان شاء الله بدير بالي ..
شوق : مري على الاسطبل شوفي الجموح ..
رغد : اوكي .. من عيوني .. يالله سيوو
طلعت وبعدت عن الكل .. اتصلت على رقمه اللي حافظته عن ظهر قلب
جاء صوت كل وله وشوق لها : يــــآآهــــــــــــــلآ وغــــــــلآ
رغد : هلا فيك .. كيف حالك مع الجو اللي يجنن ؟!
عبدالله : الحمدلله مبسوط
رغد : ماطلعت تتمشى ؟
عبدالله : لا استنى يوسف والشباب يجون بنطلع على طريق القصيم للاخر الليل ونرجع
رغد بفرح : صدق !!.. انا بمزرعتنا الحين وعلى طريق القصيم
عبدالله بصدمه : ياشيخه !!.. شفتي كيف الصدف دايم تجمعنا
رغد : ايه شايفه .. مدري ويش يسمونه ذا
عبدالله : اكيد له علاقه بالحب والقلوب
رغد : واثق بالمره انت ..
عبدالله : ههههههههههه ايه واثق .. بشريني عنك ويش مسويه
رغد : والله الحمدلله مستانسه مع الجو الحلووو
عبدالله : تخيلي لو اننا الحين مع بعض ... اتذكرت كلام هنادي بالسياره ..
رغد : ههههههههههههههههههههههههههههههههههههه
عبدالله : دوم الضحك يارب بس على ويش
رغد : ذكرتني بكلام اختي اليوم بالسياره ههههههه
عبدالله : ليه ويش قالت
رغد تلف بجهة المستودع .: تـــ...ـــقــــ...ــوووول ... شافت سحر على الارض صرخت
ســــــــحـــــــــــــر .. رمت الجوال وركضت لها
رغد ترفع راس سحر : سحر سحر .. ويش فيك .. " تهزهــآ" ..سحررررر ارتبكت ماتدري ويش تسوي .. مسكت يدها تشوف نبضها كان بطئ مره ...
رغد تصارخ : يــــــــــــبــــــــــــه .. الحقوووني .. ســــــحر سحر .. ضربتها على خدها بشويش ..قامت تهذي بكلام
رغد مصدومه ارتسمت لها الصوره ... وقفت ودخلت المستودع وماشافت احد .. طلعت وجلست تصارخ شافت هنادي جايه تركض ومعها ريم
ريم من بعيد : ويش فيك رغد
رغد ودمعتها على خدها : الحقوووني سحر مغمى عليه .. واتجهوا لها
::
::
:::
:::
يوسف : اهدى يا عبدالله ان شاء الله مافي شي
عبدالله : وشلون مافي شي وانا اسمعها تصارخ وكأنه تبكي ..
يوسف : يمكن شافت شي وانفجعت .. والا يمكن احد عندهم صار ه شي خلاص استهدي بالله
عبدالله : كسرت جوالها ما ترد عليا .. اكيد في شي هي ماترد الا اذا كان في شي
يوسف يحاول يهديه : خلاص ياشيخ نكدت علي .. قلت لك بأذن الله مافي شي ..
عبدالله : ياررررب
::
::
شوق تمسح على شعرها : سحر ويش تحسين فيه ؟
سحر تشرب مويه : الحمدلله احسن الحين .
شهد : ويش صار لك تكلمي ..
سحر تذكرت اللي شافته وسمعته .. حاولت تتمالك نفسها : كنا نلعب ورحت اتخبئ عن خلود جيت ورى الشجره وحسيت بدوخه وماحسيت بنفسي الا وانا بحضن رغد وبعدها ماحسيت بشي الا لما صحيت قبل شوي ..
شوق : يمكن قرصك شي
رغد : لا شيكت عليها اسئلي ريم وهنادي مافي مكان اصابه او شي كذا
سمر تمسح دموعها : خلي السواق يوديك المستشفى
سحر : لا مايحتاج الحين بخيرر واقدر امشي
شوق : لالا خليك مرتاحه
عمتها : بسويلك شي دافي تشربيه اكيد اخذتي برد مع الهواء البارد والمطر
رغد تذكرت جوالها : يؤؤ نسيت جوالي بروح اجيبه .. وطلعت تدوره ..
سمر : وانا بروح مع خلود بالصاله
هنادي : سحر تبين اجيب لك شي
سحر : لا مابي شي
ريم : ممكن تخلونا لحالنا .. ابي اتكلم معها
شوق وشهد وهنادي : طيب .. وطلعوا برى وقفلوا الباب ..
ريم : سحر ويش صار ماكان فيك شي
سحر : سمعتي ويش قلت لهم .. غيره ماصار شي
ريم : حطي عينك بعيني .. انا اعرفك اكثر من نفسي .. فيك شي
سحر : ريم بليززز انا تعبانه حيييل .. خليني ارتاح ولاتشغلي بالك مافيني الا كل خير
ريم بشك : ماني مرتاحه لكلامك احس فيك شي بس راح اخليك على راحتك
طلعت وخلت سحر لحالها .. نزلت دمعه وحيده .
ونْ قلْبي مِن مصًآبـه ونّـة القلبْ الجَـريحْ
.............. وَنْ مِن فَرقىً حبيبٍ گآنْ له أغلَى روُحْ
گآنْ بسْمَـہْ،، گآنْ فَرحَـه گآنْ لَـه الگوُن الفسِيحْ
.............. وِيلْ قَلبيْ صَآر يشْگـي عَلّ مَن ضِيمْـه يزُوح
ودّيْ أنسًى ،، ودّيْ أقْسًى ودّيْ أرحَلْ واسْتِريحْ
.............. ودّيْ أرحَـلْ مِنْ حَيـآتِكْ مَـآ بُقى بالجسِمْ روُحْ
گنتْ أحِبّگ ،، گنتْ أودّگ ،، گل مَآ جَآلگ صَحِيحْ
.............. يُومْ گـآنْ الحُبْ شَـآمِخ بينَنآ مِثلْ الصُروحْ
للأسًفْ إنّي عَرفتْ مَعنًى الحُبْ عِندگ شِحيـحْ
..............لإـآ وفِيتْ ولإـآ دَريتْ بإنـه [ قِلبيْ بگ ] ينُوحْ
مـَآتْ حبّگ مَـآتْ نَبضگ قَلبْي أصْبحْ بالضَريحْ
.............. وَحْدگ قَتلْتْ نَبضْـي لإـآ تِجيْ تَطلبْ السُموحْ
لإـآ تِحـآوِلْ لْيَّ تِرجعْ،،، لإـآ تَألـفْ أو تَبيحْ
.............. لإـآ تَعتذِرْ مآلگ أمَلْ مَآني بالقَلبْ الصّفُوحْ
رآحْ ذآگ الوَقتْ َلوّل رآح مِنگ يالفَصيـْح
.............. گنتْ طَيّبْ يُومْ أسَـآمِحْ مآ عِدتْ أنْآ ذآگ المزُوحْ
مِنْ حَيـآتِي يلآ أرحَــلْ مَآ بُقى شيٍ مَليحْ
.............. گل گذبكْ ،، گلْ گلامگ اگِتشفْته وبوُضوحْ
صِرتْ اضْحَگ لّبِعآدگ صِرتْ مِنْ قَلبيْ طِريحْ
............ مَآتْ ذآگ الشَخصْ الليْ گآنْ مِنْ أجْلگ يِصيْحْ
دخلت عليها رغد .. مسحت دموعها بسرعه ..
رغد : اذا تعبانه نأجل كلامنا بعدين
سحر : ويش عندك ؟!. قولي
رغد : كنتي تحبينه ياسحر ؟!
سحر طالعتها بصدمه : ويش تقصدين
رغد : انتي تدرين بالزبط ويش اقصد .. يوم شفتك طايحه واخذتك بحضني قمتي تهذين بأسمه .. من متى تحبينه ياسحر ؟!
نزلت دمعتها وجرحت خدها بهدوء .. كيف بتبدأ الكلام كيف بتشرح صدمتها بأغلى انسان بحياتها .. أنسان بنت احلامها الورديه معاه انسان كل عرق فيها يشهد على حبها لها .. كيف بتشرح سهر وتفكيرها فيه سنين طوال .. تلعثمت بكلامها من وين تبدأ ووين تنتهي !!..
سحر تخبي وجهها بيديها وصوت نحيبها يملئ الغرفه .. اخذتها رغد لحضنها تحالو تهديها وتحسسها بالآمــان وانها بتكون ملجأ وقت ماتحتاجها ..
رغد تهديها : ياقلبي اهدي البكاء ماراح يفيدك .. بيزيد تعذيبك ..
سحر تدفن وجهها على صد رغد وتبكي بقووه : صــ..ــدمــنـي !!.. يحـــب اخــ...ــتـ...ــي ..
يـــحــــب أخــــتــــي ..ائـــــهههههـــئ .. ليش ليش يارغد الحب عذاب ؟!
رغد تمسح على ظهرها وشعرها بنعومه وهدوء : هو الـــحـــب كذا ياسحر .. ياما أتعب ناس وياما عذب ناس ..ويـــامـــا قـــتــل قــــلــــوب حبت بأخــــلآص
سحر تبعد عن حضن رغد وتمسك يدها وجهها غرقان بدموعها وصارت تتكلم كلمه وتشهق بعدها الف شهقه : تعرفين ايش معنى يحب اختي .. يحب اللي من دمي ولحمي .. اخر شي توقعته هالشي "غطت وجهها بيدها وقالتها بحرقه ". يارغد قلبي ماات .. والله مات من الكلام اللي سمعته ... سكتت شوي ورجعت بعد ما أخذت نفس طويل وتجددت دموع عينها .
طول السنين ذي يحبها وانا احلم فيه ...كل يوم وكل ساعه مايفارق خيالي .. بنيت كل شي معه هو .. هو بس ..
تأثرت بكلامها ..صدمتها في الانسان اللي تحبه وصدمتها اكبر لما اكتشفت إن أختها هي اللي فازت بقلبه وهي كانت عايشه في وهم وحلم انتهى على واقعها المرير .. مسحت بيدها دموعها .. ورفعت الشعر عن وجهها
رغد ضمت يد سحر بيديها حسستها بالدفئ والحنان : سحر القلب مايختار .. الحب مايترك لك خيار ابدا .. انتي قلبك اختاره وهو قلبه اختار غيرك ... لاتخلي اللي صار لك يأثر عليك وعلى حبك لاختك او يأثر على مستقبلك .. انسي قد ماتقدري او بالآصح تناسي اللي صار لاتوقفي عند العتبه ذي وخليها حافز يحزفك لشي آكبر وآحسن
سحر آرتاحت شوي بعد ماطلعت اللي بقلبها لكنها لا زآلت تتألم وتحس بضياع وشتات ماحسته من قبل .. مسحت دموعها بمنديل ورمته عاللارض
رغد باستها على خدها : اتمنى انك تفكرين كويس .. وتتأخذين القرار الصحيح وماتغلطي مره ثانيه .. اخليك الحين مع نفسك ..
طلعت رغد وسكرت الباب على سحر وتركتها تحاسب نفسها وتفكر باللي صار معها وتتاخذ القرار اللي يناسبها وتكون قادره على إنها تنفذه .. سندت نفسها على الجدار وهي تفكر بكلام سحر لها .. قلبها يألمها على بنت عمها
رغد ( اللي صار لك ياسحر صعب صعب مرره .. راح يترك فيك أثر مستحيل ينمحى بسهوله
.. آآه من الحب وسوايآه محد مرتاح .. الله يكون بعونك ياحبي الله يكوون بعونك )
:::
:::
فتحت جوالهــآ تفــآجأت بالمسج الموجود .. اضطربت نبضات قلبها .. استولى عليها الخوف والرعب .. هوى قلبها من بين اضلاعهــآ .. تغيرت ملآمح وجـــهـهـآ وارتبكت .. راحت للمطبخ بسرعه حتى محد يلاحظها.. ارتفعت درجة حرارة جسمها تحس العرق كساها من آولــهــا الى اخرها .. ... اخذت كاس مــاء بارد يمكن يبرد عليهــآ ..
ستي : مــامــا انتي تعبان ؟؟!!
شوق : لا .. بس عطشانه شوي .. جلست على الكرسي رجولها ماعاد تحملها تفكر بكلام المسج .. خفق قلبها بسرعه .. وقف الوقت في هذي اللحظة بس تمنت انها ماتت وماكملت حياتها الى هذا الحد
شوق ( وابــــــــتــــــدت قــصـــــة عــــــذابــــــي بجــــزئــــهـــآ الـــثــــآنــــــي )
نزلت دمعه يتيمه من عينها .. رفعت اصابعهــآ ومــــســـحــتــــهــآ .. وبــداخــلــهـــآ تتنــمـنــى
يـــحس فــيـــهـــآ .. يمـــســـح دمــعاتــهــآ ... يشيل من همومها وألآمـــهـــآ التي لاتــعــرف الـــنـــهـــآيـــه ..
تمنيت ارحل لعالم عليه الفاتحه تقرا
و رفض موتي يواجهني بوجه القادم المخفي‘
يا ترى شفتوا جسد ميت ورفض يستقبله قبره !
انا هذي معاناتي واظن اللي مضى يكفي ..!
دخلت هديل وشافتها سرحانه ..ملامح وجهها الساحر كلها حزن وسواد الكون مكتسيه .. قربت منها وحطت يدها على كتفها
هديل وكأنه عرفت اللي شاغل بالها : شووقه ليش جالسه لحالك ؟؟
شوق : كنت جايه اشرب مويه .. وبرجع بس سبقتيني
هديل : بس شكلك مرره حزينه وعيونك تلمع ..
شوق : ههههه يتهيئ لك انا بخير مافيني شي لا تشغلي بالك علي
هديل : طيب قومي حطي معي الحلى ونروح بعدها للبيت الشعر الجو جونان
شوق : اوكي يالله طيب
:::
:::
:::
بعد الغداء
الكل : الحمدلله ..
ام رياض : بالعافيه عليكم
الكل : الله يعافيك
فهد : انا طالع توصون شي
ابوه : وين يبه بدري ؟؟.. تونا ماصار موعد طيارتك
فهد يوقف : بروح اسلم على جدتي من زمان عنه ..
ام رياض : دايم تسأل عنك
فهد : والله مقصر معها
ابوه : سلم عليها يبه ..
فهد يمشي بخطى واثقه : اشوفكم على خير
الكل : مع السلامه
ندى (( اووف اخيرا افتكيت منه كاتم على انفاسي .... افراااااااج ))
أمــــا بالمدينه بهذا الوقت .. وتحديدا ببيت ابو سيف
كان ابو سيف عازم اخوانه والعايله كلها على الغداء كالعاده كل اسبوع عند فرد من افراد العايله ..
كوثر تهمس بأذن ساميه : صح قررتوا الملكه تكون بعد الاختبارات
ساميه اتعكر مزاجها : ايه صح .. سيف افندي يبغى كذا
كوثر : انتي شفتيها .. كيف حلووه والا عاديه
ساميه : ووع قرويه وشكلها مرره بآآآد .. صدقيني انك احلى منها مليوون الف مره بس ويش نقول حظ الله لا يبلانا
كوثر تلف على الجهه الثانيه والقهر مالي قلبها : اخوك اعمى انا عيال خوالي متهاوشين عندي ورافضتهم وهالسيف ماني عاجبته .. والله حاله
ساميه ترقع : الله يرزقك اللي احسن منه .. اخوي مافيه خير
كوثر : بس القلب ومايهوى ياسوسو
ساميه : يالله هذي قسمه ونصيب
كوثر (( آآآه يالقهر احس اني بموت من القهر يروح يخطب وحده مانعرفها ويتركني انا ..
أنــــــــــــا يتركني ... ))
ساميه تمسك يدها : كوثر وين وصلتي ؟؟!!
كوثر : معك معك ..
ساميه : لا منــــتــــ.... سمعت صوت سيف ينادي عند الباب
سيف : ســـــــــــــآآآمــــــــيـــــــه !
وقفت بسرعه واتجهت لــه .. وقفت قدامه
ساميه : نعم ويش تبي
سيف : في احد من البنات
ساميه : ايه في كوثر وضحى و جود
سيف : قولي لهم يروحون الصاله الثانيه بسلم على جدتي واجلس اسولف معاها شوي
ساميه : لا فشله اقولهم سيف بيدخل اطلعوا ... دفها مع كتفها ورفع صوته
سيف : لو سمحتم يابنات ابي الم على جدتي مابطول ..
الجده : يالله يابنات روحوا الغرفه الثانيه الولد بيدخل
كوثر تاخذ العبايه بيدها : قايمين ياستو مايحتاج تقولي سمعنا الباش مهندس ايش يبغى
جود تسحب كوثر من يدها لانها عارفه جدتها راح تخاصم كوثر وتهمس لها : ياويلك منها امشي يالله والله بتوريك بعدين عالكلام اللي قلتيه
كوثر تسحب يدها من جود : امشي امشي بس ..
ساميه تلف على اخوها : روح ادخل على جدتك يامطيع ذابحك البر ياعيوني
سيف يصر على اسنانهم ويخفض صوته : بعرف ايش سويت لك حتى تعامليني كذا .. كل هذا عشان خطبت ريم ورفضت اخطب كوثر
ساميه تعطيه ظهرها وتمشي : انت ادرى .. ياخوي ياولد أمي وأبويا
سيف ولع من حركتها وكلامها ويحلف ويتوعد فيها بداخله لكن تمالك نفسه عند اللحظة الاخيره .. ومشى بأتجاه صالة الضيوف .. ودخل عليهم
سيف : الـــــــســـــــلآم عـــــلـــــيـــــكـــــم ...
:::
:::
:::
بــــعــــد يـــومـــيـــن
قربت الاختبارات وبدأ العد التنازلي للطلاب والطالبات ..
كانت تذاكر كيمياء فاتحه الكتاب على سريرها وماسكه القلم والدفتر تسطر اي شي مهم
بالها ماهو يم الدراسه ولا يم المذآكره .. من بعد اللي صار معها وهي تغيرت صارت انسانه ثانيه .. ازداد هدوئها وقل كلامها .. واغلب وقتها بغرفتها لحالها عذرها الوحيد المذآكره
لكن بالواقع هي بوادي والمذاكره بوادي ..
سحر (( مابقى شي كلها ثلاث ايام وتبدأ الاختبارات وانا بالي لسى معاه .. خلاص ياسحر هو مادرى عن حبك ولا سأل فيني ..هو يحب سمر .. ايه يحب اختك .." تكلم صوت ثاني".. بس هي سرقته منك .. سرقت من حبيته طول عمرك ومن ملك قلبك ... " رجع عقلها يتكلم " .. معقوله ياسحر بتحقدي على اختك .. معقوله بتخربي عليها حياتها زي ماخربت حياتك ؟؟.. وهدمت كل الآحلامك وآمالك ؟.. )) حطت يدها على راسها افكار × افكار تدور بتفكيرها
سحر بأصرار : لازم انسى ... لازززززززززززززززززززززم ..
دخلت ريم وهي تشوفها شارده البال ..
ريم : سحووره .. اللي ماخذ عقلك يتهنى فيه
سحر ابتسمت : الله يسلمك افكر بالاختبارات .. قلقانه مرره اخاف ماجيب نسبه
ريم تخبطها على يدها : لا ان شاء الله تفائلي بالخير تجديه .. بعدين انا حاسه اننا بننجح وبتفوق كمان الله مايخيبنا .. احنا تعبنا وذاكرنا .. وان شاء الله نحصل اللي نبغاه
سحر تتنهد تنهيده طويل تطلع كل شي كاتمته بصدرها : يـــــــآآآررررب كون معنا
ريم ترفع يدها : آمـــــــــيــــــــن يـــــآآآرب
دخلت برجتها المعتاده ... انقلب جو الغرفه من هدوء وسكون الى ازعاج وصراخ
ريم وسحر بلآمبالاه لانهم اتعودوا على حالة الهيجان الشبه يوميه لها ..
هنادي : الله يالاخضر يافن طرب ... علم خصومك ويش معنى اللعب ... وقامت تناقز فوق سريرها
ريم تصارخ عليها : بـــــــــــــس صجيتينا ... كل ذا فرح
هنادي : الله يخلف عليك .. ماعندك وطنيه انتي .. السعوديه فازت
سحر : وخير ياطير اذا فازت الله يقويهم بعد
هنادي تحط يدها على خصرها : فازت على إيران ... الله تقولين انتي وياها لاتتعبين نفسك وتتابعين المباراه خسرانين مافيها كلام .. وتمد لسانها لهم
ريم : مبررررررررووووووووك .. بس طسي عنا نبي نذاكر
هنادي : الله يلطف فيكم .. خذوا اجازة اووف منكم .. خلونا نفرح ونشجع ياختي
سحر تمسط الدب الابيض اللي اهدتها لينا وترميه علي هنادي : اقووولــــك آآآآووووووت ..اابي اذاكر حسبي الله على بليسك
هنادي تمشي عنهم وتغني وترقص وتدف اي شي بطريقها مثل المجنونه ..
ريم : بعرف متى تعقل هنادي وتترك سوالف المبارايات والكوره والخرابيط
سحر : افلقيني اذا عقلت ابو طبيع مايجوز عن طبعه
ريم : الله كريم وقادر على انه يغيرها
بغرفه ثانيه من غرف البيت
رغد : هههههههههههههههههههه من جدك عبودي
عبدالله : ايه من جدي اتكلم .. ويش بلاك تضحكين
رغد : ماتوقعتك تطلبني هذا الطلب
عبدالله : تحبيني ؟؟
رغد مدت بوزها : ويش السؤال هذا ياعبودي ؟؟
عبدالله : جاوبيني بالاول تحبيني والا لا
رغد : انا ما احبك انا أتــنـــفـــس هـــوآآآك
عبدالله : مقدر على هذا الكلام يارغودتي
رغد حمر وجهها : انت اللي تجبرني اقولك هالكلام عليك اسئله الله يسامحك بس ...
عبدالله : ويش قلتي بطلبي ؟؟
رغد بتفكير : امممممم خلني افكر حبيبي .. وانا ارد لك خبر
عبدالله : اذا ماتبي خلاص ماله داعي اهم شي رضاك ياعمري
رغد : لا مو مسأله ما ابي بس بشوف اوضاعي ناسي اني اختبر
عبدالله تذكر : يووووه نسيت والله ...
رغد : ما الومك لا تدرس ولا شي
عبدالله : نسيتي اني انتساب ياحلوووه بالجامعه
رغد : انتساب مو انتظام وغبي اذا ماتنجح
عبدالله : افا عليك انا دايم انجح بمتياز ..
رغد : يووووه لاتقول يمكن كلها مقبوووول هههههههه
عبدالله يتغلى عليها : مقبووول هين يالمغروره
رغد بدلع : يحق لي مغروره ... لأنك انت السبب
عبدالله : يابنت بتهبلين فيني انتي .. والله العظيم مقدر اتخيل حياتي بدووونك
رغد ويدها على خدها : وتهقى ان حالي احسن منك ... بالعكس انت حستني حوس بحبك
دخلت شهد تصارخ :عـــــــــشـــــــــــاء عشاء عشاء ... "وتصرخ بصوت اعلى عشان تسمعه ".. تعالي تعشى برد العشاء وانتي تكلمين الجوال
رغد تغمز لها وتأشر لكن لاحياة لمن تنادي
عبدالله : والله يارغودتي صدق يوسف يوم سماها متوحشه ..
رغد تردد صوت ضحكها بالغرفه من كلمة عبدالله
عبدالله : روحي تعشي لا تطلع لي مع السماعه وتفرمني
رغد : هههههههههه اوكـــ....ــــي
عبدالله : مع السلامه
رغد بحب وغنج : مع السلامه تؤبر آلبــــي .. قفلت الجوال .. ومسكت شهد يدها وتجرها للصاله جر .
رغد : بشويش علي بشويش انا ناعمه ما اتحمل خشونتك ..
لفت عليها شهد وطالعتها بنظرات استحقار وهي متقصده ..نفسها تعمل بوجهاا خرايط
شهد : لالا امووت على انوثتك ... سوري مادريت انك مثل القطن لازم نداريك
رغد تضحك على شكل شهد اللي عصبت : امززح ياروحي .. تلف يدها على رقبتها .. لاتصيري بايخه وتزعلي مني .. تدرين اني ما استغنى عن خدماتك
شهد : انتي اللي ماتقدريني .. يالله روحي تعشي ... لفت عليها رغد وهي تضحك
رغد : هههههه عجبتيني ..وانتي تقولي عشاء عشاء عشاء ...ههههههه
شهد تروح للغرفه بغرور : احسن رفع ضغطي الباشا بتاعك
رغد : امشي بس نتعشى قسم ميته جوووع .. بمووت
شهد : يالله طيب
جلسوا الكل على السفره وبدوآ يأكلون وكل وحده تهرج من راسها
لفت ريم على شوق : شووقه ليش ماتأكلين معنا ..
شوق : بالعافيه عليكم ياقلبي ... مالي نفس أكل
ريم : ليش طيب ؟؟.. لك كم يوم ماتأكلين كويس
شوق : ماعليش كلوآ انتم بالعافيه .. انا رايحه غرفتي بنام ..
هنادي : بدري الساعه 11
شوق : احس بتعب وخمول .. اذا مانمتم ذاكرووا اوكي
ريم وسحر وسمر : اوكي
هنادي تسايرها : طيب طيب بذاكر
شوق : ايه ذاكري والا قسم بالله بعلم عمي عليك
هنادي تمثل : لا تكفين الا ابوي ... قولي له انا ادبي يعني جالسه بالبيت جالسه
شوق عارفه هنادي وعنادها : طيب سوي اللي تبين انا ليش حارقه نفسي عشانك طز فيك
هنادي تكمل اكلها : اوكي اوكي بذاكر امممم مكتبه عشانك بس
رغد وشهد ماتوا ضحك عليها وعلى تفكيرها بتسكت شوق بأسهل ماده وتذاكرها
شهد : قولي نحو بلاغه .. جغرافيا .. مو مكتبه الله يلطف فيك
هنادي : والله نفسي اذاكر مكتبه يعني بتصفحها تصفح كمان
ريم : اللهم لك الحمد انها ادبي .. هذي لو علمي تدج
هنادي : شفتي اختك كيف تعرف ويش يناسبها ريحت راسها ودخلت ادبي .. الحياه بنعيشها مره وحده خلينا نعيشها زي مانبي
مشت شوق لغرفتها وتركتهم يتكلمون كلمه هنادي كانت بصفاء نيه وتحمل معنى البراءه والطهر لكن عند شوق كان لها معنى ثاني مختلف جدا ..
شوق (( الحياه بنعيشها مره وحده .. صح عليك ياهنوو ... بس ويش تقولين بأنسان عاش حياته مدفون بقبره فيها قبل ما يجيه الموت .. ) اخذت دفترها وكتبت فيها كلماتها
لِعَبتْ بِي " الدنّيا " وِ حَسبّي عليهَا
ما قَصِرِتْ فِي [ِ طعنتِّي ]ِ
. . | لِعنبُوِوِوِها ~
. . | لِعنبُوِوِوِها ~
. . | لِعنبُوِوِوِها ~
في هـ الزِمِنْ حتىا بِقايا عِ‘ـَزِوِتِيّ
خَطوِّا طِعُوِنْ فِي الظَهرِْ وِ نِحتُوِهـا
يا ليتهُمْ قبلْ إنكشَافْ الأقِنعَة دارِوِ محازِنْ {ِ دنيتّي }ِ وِ عِذرُِوِها
لعَبوِّا بـ حِ‘ـَسبة ( دمعِتّي ) وِ ألمآسِي
حتىا مَلامِحْ بـ سْمِتّي ضيعُوِهّا
وِالله لوِلا رِهبتِه يا إلهّي ~
لـَ أنهِيّ معَالِمْ عِ‘ـَيشتِّي ڪِلْ أبوُِهـا . . !
:::
:::
:::
في اسابيع الامتحانات
بعد مرور اسبوع من احداثنا
بـــآلـــجـــامعـــــه
رغد تترجاها : شهووده بليزز .. بس هالمره
شهد : رغد ماودي تجربين اللي جربته تذكرين ويش كنتي تقولين لي ... الحين انقلبت الآيه
رغد تمسك شنطتها وتضمها لحظنها : احبه ياشهد والله احبه لدرجه الجنون .. اموت لو يبعد عني لحظة عبدالله لقيت فيه الأم اللي فقدتها .. والاب اللي يغيب عنا بالايام ... الاخت اللي تركتنا وراحت لحياتها .. فيه اشياء واشياء تخليني ابوس الأرض اللي يمشي عليها
شهد مسكت يدها : عارفه كل اللي تقولينه .. وحاسه فيك بس ياخوفي مايكون حب يارغد الاعجاب بهذا الزمن يشبه الحب كثير .. لكن في فارق بسيط
رغد بأستغراب : اللي هو ؟؟
شهد : لما تعجب بشخص وتظن انك تحبه لكن تفضل نفسك عليه بالاول .. لكن لما تحب تفضل اللي تحبه على نفسك واهلك ومالك
؛؛
ومـــضـــــه بــســــيــــطـــه :
من فلسفتي الخاصه ..اذا حبينا شخص فأننا نكون في اتجاهين ..الاتجــاه الآول نخلص له ونكون اوفياء مهما دارت الايام وان كُــتِــبَ علينا الفراق فأن الحب لــذة مرارتـــه الفراق .. ويكون للشخص حيز ومكان واثر في القلب لا يُــنــتســى .. ونتذكر ماقال ومافعل .. آمـــــــآ اذا كان الاتجاه الــثــاني .. فيكون عنده الانانيه في حب ذاته ويقــدم نفسه على اغلى الناس عنده حتى لو كان يحبه ..فليتيقن انه ليس حبــاً وانما محض اعجاب ليس اكثر ..
؛؛
رغد : حب ياشهد وربي حب ... مستعده اموت لجل يحيا هو ..
شهد : طيب امشي خلينا نطلع خلصنا اختبار وكل شي
رغد تشيل شنطتها وعبايتها : يالله بس اول ترى اليوم كشختي غير
شهد : كنت مستغربه من البيت بس مشيتها بمزاجي
رغد : طيب ويش رايك قلت
شهد : تجننين وربي بيخق يوم يشوفك
مشوا خطوتين والا في صوت وراهم يناديهم ..: بنات بنات
رغد : هلا كوثر
كوثر وين رايحين بدري.. اجلسوا نسولف مع بعض
شهد : والله طالعين مشوار مهم
كوثر بتفحص وعيونها شوي وتطلع : اي مشوار بكشختك انتي ورغد
رغد : رايحين لبيت عمتي اليوم
كوثر : تصدقون لو خواني ماتزوجوا كان خطبتكم لهم .. وربي حرام هالجمال محد يشوفه
شهد ورغد حمرت وجيههم وتلخبطوا
شهد : تسلمين كوثر من ذوقك
رغد بخجل : ماعليش كوثر مضطرين نمشي تأخرنا
كوثر : طيب بكره ذكروني اقولكم سالفه صارت
شهد ورغد يأشرون لها : اوكي باي
بــمــدرســــه البنـــات
عبير : هههههههههه صدق
هنادي : لو شفتي شكله وربي تموتين ضحك عليه لسى ماشاف شي تنسيم كفر سيارته ولاشي عند اللي بسوي
عبير : ياويله وحطيتيه بدماغك ..
هنادي : خليه يولي وربي لاردها له
عبير : اووص لاحد يسمعك توهقينا .. امشي يالله
هنادي : تعالي لينا جايبه صورهم بماليزيا .. خلينا نروح نتفرج الفرجه ببلاش
عبير : امشي ويش ورانا
جلسوا عند شلة ريم وسحر
ريم : خير ليش قطت الوجه
عبير : بنتفرج !!
لينا تفتح الالبوم : لحقتوا توي بوريهم .. بسم الله
سحر تسحبه منها : هاتي بتفرج انا اول
لينا تغمز لها : يؤؤؤؤؤؤؤؤؤ نسيت انتي عليك توصيه ملكيه في صور خاصه بوريك هي
ريم فهمت لينا وانفجرت ضحك مع لينا وسحر كأنها ماسمعت شي اخذت الالبوم تتفرج فيه
هنادي : مين موصي عليها ليوونه
لينا : امزح انتي الثانيه على طول صدقتي ...
سحر : ليوونه مين اللي لابس احمر هنا .. وتأشر على الصوره
لينا فز قلبها : وه وه وه هذا هزوزي فديته
ريم : هزوزي لايكون هزاع ومدلعته
لينا : ايه هذا هزاع ويش رايك فيه سحووره
سحر تتمقل بصورته : مشاء الله يابنت ماتوقعته يحطم القلب .. وربي صاروخ .. سحبت هنادي الصوره .. وهي وعبير يطالعونها
عبير وهنادي : هذا هزاع يابنت
لينا : والله العظيم ... بالله مو لايق علي
ريم : اكيد وين بيلاقي احلى واجمل منك
لينا : يابعدي ياريومه .. ترفعين معنوياتي
سحر : بس مرره ماتوقعته كذا ليوونه بس يالله طحتي باللي تتمني
لينا : وهذا اهم شي .. غمزت لها... عقبالك مع اللي يبيك وميت عليك
هنادي ترفع يدها للسماء وبرجاء وصوت مترع : امين وانفك من ثنتين بالبيت
الكل : ههههههههههههههه
عبير : ياويلي منك هنادي تبين تفتكين منهم
لينا تهمس لسحر : ترى معي صور لمعاذ ترجاني اوريك هي خخخخخخخخ
سحر : ووع من زينه يخرع
لينا : حرام عليك والله انه حلووو
سحر : طيب حلوو بس مايعجبني
لينا : ههههههههههههه مالومك وربي يقهر ويفقع المراره
:::
:::
رغد : ما راح اتأخر .. بس شوي وجايه
شهد : طيب يالله اخلصي بسرعه
كانوا موقفين جنب محطه مالها حركه كثيره وهالمكان حددته رغد لعبدالله عشان تقابله
عبدالله : يالله طس استنى برا
يوسف : جزاتي تطردني
عبدالله : اذلف يالله خل رغودتي تدخل هنا يالله
يوسف يفتح باب السياره ويطلع : الله يازمن ...والله رحنا وطي .. يصير خير ياعبوود
نزل وراح خلف السياره وركب فوقها وحط رجل على رجل
شهد : هذا خويه نزل يالله اسرعي
رغد : بالله كيف شكلي اهم شي الروج
شهد تدفها : يالله بس لايكثر .. وطلعت رغد واتجهت للسياره ..
قبل تفتح الباب كان قلبها ينبض بسرعه فظيعه .. ترددت لكنها فتحت الباب اول مافتحته جاا هواء المكيف البارد يبرد عليها حرارة الموقف .. دخلت وبهدوء قاتل سكرت الباب ...
رغد بنعومه : السلام عليكم
ارتبك حس انه تهور لما طلبها تمنى انه ماطلبها ولا يرتبك قدامها بذا الشكل وهو الرجال المفروض يكون جريئ
عبدالله والتوتر بصوته : وعليكم السلام ... هلا رغد ..
رغد تحس بتوتر فظيع وزاد توترها من توتر عبدالله : كــ..ـــيـــفــــك
عبدالله : الحمدلله .. كيفك انتي ويش مسويه << بدأ يصير طبيعي الولد خخخخ
رغد : بشوفتك صرت بخير ..
تردد يقدمها لها الحين والا يأجلها شوي .. كيف يتكلم وهو متوتر ومضطرب
رغد هدأت شوي : ايش فيك عبدالله ماتوقعتك بترتبك كثير زي كذا
عبدالله : شوفتك تربكني ماني مصدق انك بجنبي .
رغد تحمد ربها انا عليها الثلمه والا بانت ملامحها الخجلانه اللي صارت بلون الدم من الحياء
(( طيب دامك تستحين من الاول ليش تجين .. بنات اخر زمن .. <<~ كأني دخلت عرض .. شوتـــه لبــــــرآآآ>> ))
مسك يدها وهو يهمس لها :
صباحك صبح ما تصبح به آحدقبلك
صباحك صبح يحفظك ربي الواحد الأحد.
صباحك وردة زرعها من يحبك للأبد.
صباحك شهد من ذاقه ماشبع منه أحد
رغد تضغط على يده : وربـــــي احبــــــكـ ياعبوود
عبدالله : ماهو اكثر مني صدقيني ... لو بيدي اخذت غصب عن الكل واروح بك لابعد مكان مافيه الا انا وانتي ..
نزلت راسها كلامه يفجر بداخلها الاحساس .. وقربها منها يزيد خدودها حمره .. ولمست يده تحسسها بأمان فقدته ... نفسها تخلي الوقت يوقف وتعيش معه لحظه ماتنسها عمرها كله ..
حط يده تحت دقنها ورفع وجهها : لــــيــش خجلانه ؟!!
رغد ماتدري ويش تقول له لكنها اكتفت بالصمت ... نزل اللثمه عن خدها ... وتوقف الوقت عنده وهو يتـــأمل اللي اســـرت قلبه
::
::
شهد : خلوني انزل اروح البقاله اشتري لي شي اكله بدل الجوع ويسليني في انتظار رغد
نزلت واتجهت للبقاله .. وهي تشوف مجموعة شباب شوي ويأكلونها بعيونهم وتهامسون عليها طنشتهم ودخلت وهي عارفه انها لافته للنظر بعبايتها المخصره اللي مبينه معالم جسمها الرشيق اللي كأنه مجسم منحوت ... وكمان غطايتها ونص خدها برآ .. طبعا الناس لهم الظاهر حتى لو كان الباطن سليم والنيه لايشوبها أي شائــب
::
اول مادخلت راحت قسم البردات عشان تشتري ايس كريم وببيسي ومويه .. اول ماخلصت حطت اغراضها بالسله معها مشت بتلف عشان تشتري شكولاته وعلك .. اول مالفت صدمت فيه كانت بتطيح لكن يده كانت اسرع وضمها لصدره بحركه لا إيراديه .. دفته عنها بسرعه
شهد صرخت عليه : ماتشوف اعمى
يوسف : ما انتبهت لك انتي اللي طلعتي بوجهي .. على العموم اسف
شهد : باي بنك اصرفها
يوسف : بنك الاعتذار .. ويك ويك ويك
شهد جلست تلم اغراضها ونفسها تموته بين يديها ,, وقفت ودفته ومشت تكمل اغراضها الباقيه
يوسف :ووجــــع حقيرررره ... راح للثلاجه واخذ له بيبسي ومشى ..
عند المحاسب انتظر اللي قبلها يحاسب بكت دخانه وهو متقصد يـتأخر عشانها .. خلص وجات بعده تحاسب ..
شهد : كم الحساب لو سمحت
الهندي : 35 ريال ... فتحت شنطتها البيج وطلع محفظتها اللي طقم الشنطه واعطته الفلوس
يوسف (( يؤؤؤؤؤ مشاء الله ويش ذي البنت جسم وبياض ... اروح ملح عند هاليد اللي كأنها مرايآ ... اخ بس يوم لمستها بغيت اخق معها .. حسبي الله عليك يابنت الاجواد ... بتموت على هالجسم ... ))
اخذت الكيس ولفت شافته وراها اعطته نظره احتقار ومشت للسياره .. وهي تسمع كلام من الشباب اللي يعاكسونها لكنها معطيتهم أشـــــــكـــــل بالعريض
دخلت السياره ونزلت غطايتها وجلست تأكل وتغني على بال ماتجي رغد ..
بـــآلـــســـيـــاره ..
رغد متفاجئه : ليش عذبتك نفسك حبيبي .. وربي شوفتك عندي اكبر هديه
عبدالله : انتي اكبر من هالهديه لو بيدي اجيب الدنيا كلها تحت رجولك ..
رغد مسكت يده وضغطت عليها بحب وركزت عينها في عينه : تأكد ياعبدالله لو تطلب روحي ماتغلى عليك ابــد ابيع كل الدنيا واشتريك ...
عبدالله رفع يدها وباسها : ان شاء الله بوفي لك بوعدي بأقرب وقت يارغــد
رغد : ان شاء الله ياقلبي .. والحين اعذرني تأخرت لازم اطلع .. مسكت اللثمه بتلبسه
عبدالله مسك يدها ونزل اللثمه ... وقرب منها حتى حس ان انفاسها هي انفاسه .. وصارت له اقرب من الحلم البعيد .. لما قرب منها حرارته انفاسه تلفحها وحرارتها بتدت تعلى ..
عبدالله : رغوودتي لو في اكثر واكبر واروع من احـــــبــــك كان قلتها لك ...
انصبغ وجهها باللون الاحمر كلامه يربكها وقربها منها يربكها اكثر واكثر .. حست ان الدم بعروقها اتجمد من حركته وقلبها هوى من بين اضلاعها.. بحركه سريعه منها بعدت عنه
::
::
فتحت الشباك ورمت علبه البيبسي .. كان جالس على السياره قبالها لان سياتها وسيارته قريبه من بعض مرره .. طالعها بنظرات بارده وبعد الدخان ونفث الهواء من فمه
شهد تطالعه من فوق لتحت بنظرات استحقار : الحمدلله والشكر
يوسف كأنه سمعها تقول شي : ويش قلتي يا بنت
شهد ترفع حاجبها : واذا خاطبك الجاهلون فقولوا سلامــا
يوسف يحرك يده والدخان فيها : تدرين يامتوحشه انك سخيفه وغبيه
شهد : انت السخيف يا سخيف
يوسف : مابرد عليك لان اللي يكلم بنت ناقص عقل ودين زيها ...
ارتفع ضغطها منه نفسها تخنقه وتؤاده بأرضه .. اسلوبه السخيف وكلامه الأسخف بنظرها .
ماتدرين ليش تكرهه وماتطيقه كل ماتوشفه تعصب من لاشي .. مجرد انها تشوفه قدامها تتجنن .. ماتدري هو كره والا شي ثاني .. قاطعها دخول رغد
شهد ترفع الشباك : اووف اخيرا رحمتيني وجيتي ..
رغد ترتجف : جلالي امش يالله احس انه بيغمى علي
شهد : يؤؤؤؤ من ويش يابنت
رغد تحط الكيس الاحمر جنبها : اسكتي بس اقولك كل شي لاوصلنا البيت وربي ماني مصدقه اللي صار
:::
:::
:::
يُبَه شِفْنِيْ .. عَلَىْ كَفّ الغِيُوْم أَنْقِشْ تَفَاصِيْلِيْ
ـــ حِكَايَات الكِبَرْ .. بِيْت العُمُرْ .. مَعْزُوفَة أَحْلامِيْ
أَغَانِيْ شُوْق .. تَنْهِيْدَة شِقَايْ .. وفَلْسَفَةْ لِيْلِيْ
طَرِيْق التِّيْه .. نَبْضَات القِصِيْد .. وُمُعْجَمْ أَوْهَامِيْ
تِسَلَّلْت الأَمَلْ ظَمْيَا .. أَبَرْوِى مِنْ تَعَالِيْلِيْ
ـــوَأَثَارِيْهـَ الظَمَا أَفْضَلْ .. مِنْ إِنِّيْ أَشْرَبْ أَيَّامِيْ
بَنِيْتْ الحِلْمْ مِنْ تُربَةْ خُفُوْقِيْ .. وَاِنْهَدَمْ حِيْلِيْ
سَرَقْتْ الخُوْف مِنْ مِحْجَرْ عُيُوْنِيْ .. ضَاقْ هِنْدَامِيْ
أَرَتِّبْ مَكْتَبَةْ عمْرِيْ .. وتِنْفِضْهَا مَنَادِيْلِيْ
ـــيِطِيْرغبَار يِخْنِقْنِيْ .. وِيْنْخَرْ [ حِزْنَهْ ] عظَامِيْ
شَحَبْ .. وَجْهْ الصّبحْ وَأَصْبَحْ بِدُوْن ألوَانْ يِشْكِيْلِيْ
ـــبِعَادِيْ .. وَاِنْكِسَارَاتِيْ .. وِبَعْضِيْ صَارْ مِتْرَامِيْ
عَلَىْ أَطْرَافِ الشِّفَاة اليُوم .. غَنَّتْنِيْ ..مَوَاوِيْلِيْ
تَعَبْ .. نَظْرَةْ عَتَبْ .. آهَاتْ .. زَادَتْ مَعْهَا آلامِيْ
وكَفِّيْت البَصَرْ عَنْهُمْ .. سَقَطْ تِمْثَالْ يِحْكِيْ لِيْ
عَنْ أَشْوَاكِ القَهَرْ وشْلُوْنْ تنَامَتْ .. تَحْت أَقْدَامِيْ
تِهِبّ الرِّيْح .. وِيِتْرَامَىْحَنِيْنْ .. وَاَلْتَحِفْ وِيْلِيْ
وَأَخَبِّيْنِيْ .. وَرَىْ ذَاكْ الجِدَارْبِسَلَّة .. أَعْوَامِيْ
يُبَهْ قَبْل الشَّهَرْزِرْتَهْ .. طَرِيْقٍ كَانْ يِضْوِيْ لِيْ
قَهَرْ ذَابَتْ لِيْ شُمُوْعَه .. وَسَاحَتْ ضِيْم قِدَّامِيْ
عَدَدهَا كَانْ عِشْرِيْنٍ تِهَذْرِ يْمُوْت .. تِبْكِيْ لِيْ
هِنَا طِحْتِيْ .. هِنَا صِحْتِيْ .. هِنَا كَانْ الجُرُحْ دَامِيْ
هِنَا خَانْ الصِّدقْ كِلِّكْ .. هِنَا كِنْتِي تِنَادِيْلِيْ
هِنَا طَاحْ الوَرَقْ .. " مِحْتَارْ " .. نَادَىْ حِبْر أَقْلامِيْ
حَكَىْ لِيْ كَمْ سَنَة مَرَّتْ .. وَأَنَا أَطْلِقْ بِالدُّجَىْ خِيْلِيْ
أَدَوِّرْ مِنْهُوْ يِسْمَعْنِيْ .. وَأَرِدّ بْسَرْجأَثَامِيْ
بَذَرْتْ الحُبّ بِدْرُوبِيْ .. وِقَفْتْ أَنْطِرْ .. مَحَاصِيْلِيْ
نِبَتْ قَمْحِيْ .. سَنَابِلْ طَعْنْ .. وَأَعْلَنْ حَزَّةْ إِعْدَامِيْ
خَشَعْ .. قَلْبْ الحِزِنْ .. فِيْنِيْ بَعْدْ هَمْسَاتْ تَرْتِيْلِيْ
ـــوِكَثَّفْآهَتِيْ عَبْرَة .. وِبَلَّلْ شِيْلَة لِثَامِيْ
يُبَهْ .. شُوْفْ الغِيُوْم الّلِيْعَلَىْ كَفْهَا .. تَفَاصِيْلِيْ
تلاشت .. بَعْدِمَا سِمْعِتْ .. خَبَايَا مُوْجَزْأَحْلامِيْ
تنتظر الخبر هل هو اكيد او مجرد كذبه حتى تعيش بقلق نفسي طول الايام اللي فاتت ... كانت مجهزه ردها من قبل مالها الا هالحل الوحيد ... الخوف ساكن قلبها من اسبوع او اكثر .. وكل يوم تنتظر على شرفة انتظارها أن ينزف لها خبر وفاتها .. ملت الانتظار ... وملت من كثر ماتصبر نفسها .. تتمنى إن كل شي ينتهي لكنها متيقنه انه لابد من تجرع كأس المرار ... وان عاصفه هوجاء بنتظارها .. قد تعصف بجروحها وآلمهـــآ
:::
:::
:::
ريم : اووف تاخرتوا علينا اليوم ناسين ان بكره عندي احياء لازم انام واصحى اذاكر
هنادي : اقول انطمي بس .. الحين انتي ملكتك بعد الاختبارات ولا سويتي شي .. وكل همك الدراسه
ريم : الدراسه اهم من الملكه ..
شهد : اووص خلاص ترى راسي بينفجر من الصداع
سحر : انا اشوف كل شخص اثنين... ابي انآآآآآآم
رغد : وهذا حنا وصلنا .. يالله انزلوا
هنادي زلت وقفت عند باب العماره : اشتقت لك ياسريري .. وركضت اولهم للبيت
سمر : الله يرفع عنها بس
رغد : امشوا ادخلوا يالله
:::
:::
:::
بهذا الوقت كان عن جدته اللي ساعدته بكل شي ووقفت معه
سيف : ويش رايك جدتي
الجده : توكل على الله وطنش كلام امك واخواتك ..
سيف ينزل راسه ويتذكر اخته اللي تغيرت معاملتها معه : بس ساميه بالمرره ياجدتي كارهتني
الجده : اختك ذي حقوده من صغرها .. لايهمك كلامها ... انت تبي البنيه وانا ساعدتك ياوليدي بكل شي ... لاتخلي تعبنا يروح يايمه
سيف : انا غير ريم ما اتزوج ياجدتي ... بس مابي اجيبها عند اهلي وتكون غريبه بينهم واحس ان خواتي ماراح يخلونها بحالها
الجده تمسك عصاها : ذاك الوقت ياولدي انا اللي بوقف بوجههن كل وحد عايشه حياته ومالهن يتدخل بحياتك وزوجتك
سيف يبوس يد جدته اللي ربته : الله لايحرمني منك يايمه ويخلي لي ياررب
الجده : ويخليك بعد لي انت الغالي محد وصل غلاتك بقلبي ..
:::
:::
:::
كان على مكتبه .. لف الكرسي بعد ماخلص مكالمته
فهد والشر بعيونه .. ووحشه آسره : ههههههههههههههههههههههههه اخيرا بيصير اللي ابيه ... طحت ومحد سمى عليك .. تلعب بمين يافيصل .. تلعبون على بنات الجابر .. ههههههه.. " تكلم صوته المجنون " ... ضربت عصفورين بحجر واحد ...
طلعت من صدره آه طويله : آآآآآآآآآآآآآآآآآآآآآآآآآآآآآآآه ... بنشوف يا أنـــا يـــاقـــلـــبـــي المــيـــت
وقف ولملم اوراق .. وبقايا شتاته... قانونه الحياتي نظامه دكتاتوري لا يسمح لأستئناف الاحكام بأن تشوبه .. هو قاضي محكمته الظالمه ومُــصــدر قــوانين وضعيه .. محكمه لايوجد بها اي شخص سوآه هــو والذي يقــــاضيـــــه ...
سُحًقٍاً لَكَْ آيـٌــًهـٍـَـْا [ الّـــَــفَــــهُـــدِ ]
أُي قــلـــبـــاً تـمـتلـكـه [ بــداخلــك ]
؛؛
؛؛
ومــــن الــغــريـــب القــــآدم الــى محـكمــتــه ؟!
وليــالــي حبــاً بيــن رغــد& عبداللـــه .. الـــى متى حـــبــلــهــا ممــدود ؟!
تــحــطم قلبها على شاطئ مشاعرها .. ماذا سيترك من بقايا خلفه ؟!
ببــرائــتــهــا وجرئـــتـــهــا أي جٌـــرم سترتكبه ؟!
بطهرها ونــقــائــهــا وتــبــدد جـرآحها .. ماذا سيكون الآتــي ؟!
|
09-04-10, 02:58 PM
المشاركة رقم: 21
جديد مواضيع قسم القصص المكتمله
العرض العادي
