كاتب الموضوع :
الراكدة
المنتدى :
الارشيف
الفصل التاسع عشر
****************
الفجر
قبل طلوع الشمس ،،،قرر يمشي ،،،
خذا مفتاح السياره ،،، ( نواف ،،،)
التفت على أخوه ،،،( هلا ،،،)
طلال بهدوء ،،،( ملزم ترجع للرياض ،،،)
هز راسه بتأكيد بدون ما يتكلم ،،،
( مر أبوي ،،، تراه بيتضايق ،،،إن درا إنك رحت ما مريته ،،،)
بهدوء ( إن شاء الله ،،،)
*********************
هنوف ما نامت طول الليل ،،، حست إنها مختنقه ،،،بعد ما صلت الفجر
( هند بتنامين ،،،)
هند ميته من البرد ،،،( إيه ،،، بنام شوي لين تطلع الشمس ،،، برد ،،،)
حاولت تنام ،،،ما اقدرت ،،،
إلبست قبعه صوف وحطت شالها الصوف على إمتونها ،،، طلعت برا الخيمه تبي تنفس هوا نظيف يمكن ترتاح ،،، حست بالبرد ،،، بقعد في سيارة أبوي أدفا ،،،
رنج أبوها ورا خيمتهم ،،،
فتحت الباب واركبت ،،، جلست تأمل البر ،،، الجو ،،، على كثر ما هو بارد إلا إنه منعش ،،،
بعد شوي بتشرق الشمس ،،، وبيبدي اليوم الجديد ،،، وبيصحون كلهم ،،، يضحكون ويسولفون ،،، وآنا لين ألحين ما نمت ولا حتى فيني النوم ،،، وياليت صدري منشرح إلا متضايقه وتعبانه ،،، يا ربي عيني ،،، شاسوي ،،،
سمعت صوت سياره وهي لازالت تفكر ،،، التفتت بهدوء ،،، جت عينها بعينه ،،،
غمضتها يمكن أحلم ،،، رجعت التفتت قدام بهدوء ،،، ليش يا نواف ،،، حتى وأنا صاحيه ،،، أحلم ،،، ليش قلت لهيا إنك تحبني ،،، روبي طفله والطفل ما يجذب ،،، نزوه ،،، يمكن ،،، لكن بسرعه انتهت نزوته ،،، حرام عليك ،،، نزلت دمعه دافيه من عينها ،،،كنت اتمنى أعيش طول عمري بجنب أبوي ،،، الظاهر مكتوب لي البعد عنه ،،، آآآه
انصدم لما شافها ،،، تنهد ،،، هنوف ،،، وش جابك في طريقي ،،،
وش فيها ناظرتي بهالنظره ،،، تفكر ،،، أكيد تفكر ،،،لأنها ما تغطت ،،، وش تفكرين فيه ،،، ابتسم باستهزاء ،،، يعني بتفكر فيني ،،، أكيد تفكر بخطبة سلمان ،،،
تنفس بعمق ،،، ونزل من السياره ،،،
فتح بابها بجرأه ،،، التفتت بخوف ،،،
شافته ،،، وصدت الصوب الثاني ،،،( نواف ،،،)
ابتسم بحزن ،،،( ما شفتيني من اليوم جنبك في سيارتي ،،،)
هنوف بهدوء ،،،( لا ،،،)
زاد الحزن في عيونه ،،،( بس أنتي ناظرتيني ،،،،)
هنوف تلثمت بشماغ ابوها ،،،التفتت عليه ،،،( كنت افكر ما انتبهت لك ،،،)
نواف يناظر عيونها ،،، وبهدوء ( وش تفكرين فيه ،،،)
ما ردت عليه ،،،
بنظرة حزن
( ليه ما تردين ،،،)
ارفعت عينها بعينه ،،،( نواف اشتبي ،،،)
نواف لازال يناظر عيونها ،،، برقت عينه بحزن ( لا توافقين ،،،)
نزلت عيونها ،،،( ليش ،،،)
ما نزل عينه ،،،( إنتي عارفه ،،،)
التفتت الصوب الثاني ،،،( إنت اللي تنازلت عني ،،،)
نواف عمض عيونه ،،، ما يبي صورة عيونها تختفي من عينه( لا تصدين عني ناظريني ،، )
ناظرته باستسلام ،،، ابتسم (والله ما تنازلت ،،، ولاني متنازل عنك ،،، كنت ماشي للرياض ما بي أسمع موافقتك ،،،)
ناظرته هنوف بحده ،،،( يعني تنازلت لهم بسهوله ،،،)
ابتسم حس بانتصار لما عرف شعورها ناحيته ،،،( لكني ألحين هونت ،،،)
وهددها ( وافقي وشوفي وش بيصير ،،،)
تحدته ،،، وصدت عنه بكبر ،،، ( لعلمك راح أوافق ،،، فلا تهور ،،، فكر قبل لا تندم ،،، )
انقهر منها ليه تصد عنه ،،،( ما نب نادم ،،،) وسكر الباب بقوه ،،،
*****************************
عندهم غدا لنسيب أبو طلال ،،، أبو فيصل وأهله ،،،
تفاجئوا بجية أم فيصل وبناتها ،،،
تضايقوا اللي في المخيم ،،، خايفين يصير مشاكل ،،،
هند خايفه ،،، لكنها تعزز وواثقه من نفسها ،،،
طلال فرح بجية صديق عمره فيصل ،،، لكن فرحته ما اكتملت ،،،
أما أم طلال فرحانه ومرتبكه من وجودهم ،،،
أبو سلطان يرحب ،،،( يا مرحبا يا بو فيصل ،،، كيف حالك ،،،)
أبو فيصل رجال فيه خير مع الرياجيل لكنه عصبي ومتسلط مع أهله ( الله يرحب بك ،،، وزان حالك ،،، حنا طيبين وبخير ،،،وما ننشد إلا عنك ،،،)
التفت على فيصل ،،،( كيف حالك يا فيصل ،،، مبروك ما جاك ،،،)
ابتسم فيصل ،،،( زان حالك ،،، والله يبارك فيك ،،،)
أبو سلطان ،،،( تممتوا له ،،،)
فيصل برزانه ،،،( ننتظركم تلفون وانتمم ،،، )
أبو سلطان يصوت لطلال ،،،ويشاوره ( الليله تمايم طلال سمينا عندنا ،،، )
هز راسه بالموافقه ،،،( إن شاء الله ،،،)
***********************
في مخيم الحريم
هيا تطبخ الغدا و هند جالسه عندها ،،، ما تبي تروح لجمعتهم ،،،
( هند أعذرينا والله ما ندري إنهم بيجون ،،، )
ابتسمت هند ،،،( أدري والله ،،، وبعدين مالي شغل فيهم ،،، )
( سلاااااااااااااااااااااااااااااااام ،،،)
هيا تناظر هند ،،، وضحكوا
( اشفيكم ،،،)
هند تضحك ،،،( اش هالكشخه كلها ،،،)
ترفع متونها بدلع ،،،( بحرهم ،،،) التفتت على هيا ( سوري هيا ،،، )
هيا تضحك ،،،( ألحين المفروض اللي تتكشخ هند ،،، )
هنوف تكش على اختها ،،،( خبله قلت لها وما رضت ،،، فحتريت وكشخت ،، عشان أحرهم )
هند تلوي فمها ،،،( رحتي لهم ،،،)
هنوف تطلع ( بروح ألحين ،،،) وتأشر بيدها ( باااااااااااااااااااااااي ،،،)
ضحكت هند ،،،( والله إني أحبها هالبنت ،،،)
هيا تضحك ،،،( وأنا بعد ،،، سوالفها حلوه ،،،)
هند بحب لاختها ،،،( فديتها ،،، مادري شلون بعيش بديره وهي بديره ،،،)
هيا بحزن ،،،( بتاخذ ولد خالي ماجد ،،، وتعيش بالرياض ،،، قريبه منك ،،، )
ضحكت هند ،،، ( إيييه إن شاء الله ،،، البنت رفضت ،،، يعني ما راح تاخذه ،،،)
حبتها هيا ،،،( احلفك بالله أنتي صادقه ،،،)
هند بابتسامه ،،،( والله العظيم ،،،)
هيا تمسح دمعتها ،،،( هند طلبتك كلميها عن نواف ،،، وتعيشين معها في بيت واحد ،،،)
هند منحرجه منها لأنها عارفه إنها مهيب راضيه ،،،( بحاول فيها ،،، بس ما وعدج بموافقتها ،،،)
*********************************
هنوف كانت لابسه ،،، جلابيه مخمل فوشي بدانتيل بيج حول الصدر والكموم ،،،
وشال بيج بدانتيل فوشيا ،،، وحاطه كحل في العين ولابسه عدسات رمادي ،،، وروج فوشيا
طلعت منهم لخيمة أم طلال ،،،
ناظروها ،،، وتعجبوا ،،، ابتسموا عماتها وجدتها لأنهم عارفين وش قصدها ،،،
سلمت وجلست جنب عمتها أم طلال ،،، وحلفت إنها تصب القهوه ،،،
رفعت كمها ثلاث أرباع وصبت القوه مع ابتسامة نصر ،،، لأنها ناظرت خيبه الأمل في عيونهم ،،،
صوت رجال ،،،( تغطن يا حريم ،،،)
تغطوا ،،،
دخل أبو طلال وعياله يسلمون على مرت خالهم ،،،
وقفت احترام لهم ،،،
أبو طلال يسلم من بعيد ،،،( كيف حالك يام فيصل ،،، عساك بخير ،،،)
أم فيصل بهدوء ورزانة المره الكبيره ،،،( زان حالك طيبه وبخير ،،،كيف حالك وحال العيال)
قامت نجلا تسلم على عمها ،،، حبت راسه ووقفت تحفاه ،،،( كيف حالك يبه ،،،)
أبو سلطان ،،،( طيب وبخير،،، كيف حالك ،،،)
( الحمدلله بخير ،،،) التفتت على نواف ،،،( كيفك نواف ،،،)
نواف عارف حركتها لأن طلال واقف جنبه ،،،( طيب وبخير ،،،)
ناظرت طلال ،،،( وإنت كيفك ،،،)
طلال من غير نفس ،،،( طيب ،،،)
أمها واختها انحرجوا من تصرفها ،،، والباقي انقدوا عليها ،،، أما هنوف ماتت من القهر ،،،
طرت عليها فكره ،،، قامت ومرت على طلال ،،، ونواف يناظرها ،،،( تبون الغدا تراه جاهز )
ابتسم طلال ،،، يبي الفكه ،،،( يبه بروح أشوف الغدا ناخذه معنا ،،، تراه جاهز ،،،)
انقهرت نجلا ،،،
ابتسم نواف على تصرفها وعلى غيرتها ،،،
وراح ورا أخوه ،،،
*****************************
في خيمة المطبخ
************
هند جالسه على صندوق أغراض المطبخ ،،، تضحك مع هيا ،،،
دخلت عليهم هنوف معصبه ،،،( هاذي ما تستحي ،،، تسلم على طلال ،،، زين ما باسته بعد )
تضايقت هند ،،، ونزلت راسها ،،،
هيا انقهرت من هنوف ،،، ليه تكلم قدام هند ،،،
دخل طلال ،،، وناظر هند منزله راسها ،،،
جلس جنبها ،،، وحط يده وراها ،،، وخرت يده منحرجه ،،،
ضحك ،،، ( اطلعوا برا حلوا عنا شوي ،،، ماحد ياخذ راحته حتى في المطبخ ،،،)
هيا وهي طالعه تجر هنوف معها ،،، تضحك ،،،( وما لقيت تاخذ راحتك ،،،إلا في المطبخ ،،، بس شوي وإلا بيحترق الرز )
طلال يضحك ،،،( زين ،،، فارقي ،،،)
طلعوا ،،،
ناظرها بحب ،،،( وحشتيني ،،،)
ابتسمت و بهدوء ،،،( أكيد ،،،)
ابتسم ( ناظري عيوني ،،، وبتعرفين ،،، ترا يبين عليها الشوق ،،،)
في نفسها ،،، خليج واثقه من نفسج ،،، مستحيل يكون يبالغ وإلا يكذب ،،، لكنه جا يسلم ،،، معقوله تكون واحشته ،،، ناظرته بعتب ،،، وفهمها ،،،
( هند ،،، أنا ما جيت أسلم عليها ،،، أنا جيت لما قالي خالي ،،، أم فيصل تبي تسلم علينا ،،، انحرجت منه وجيت مع أبوي واخواني ،،، والله ما حد في قلبي غيرك ،،،)
ابتسمت ،،،( أدري ،،، واثقه من نفسي ،،،)
ضحك ،،،( يحق لك الثقه ،،، لو ما عندنا غدا ،،،خذيتك نتمشا شوي ،،،)
رفعت حاجب ،،، ( ومن قالك إني أصلا بطلع معك ،،،)
ابتسم ،،،( والله أنا داري إنك ما نتب طالعه معي ،،، لكني أتخيل ،،، حرام ،،،)
ابتسمت باحراج ،،،( لا مو حرام ،،،)
********************************
بعد ما طلعوا هنوف وهيا من خيمة المطبخ ،،،
صادفوا نواف ،،، واستغرب ،،،( وين رايحين ،،،؟)
هيا تضحك ،،،( طردنا أخوك ،،،)
ضحك ،،،( هند عنده ،،،)
هيا ،،،( أجل ليه طردنا بيطبخ الغدا،،، أكيد عنده ،،،)
ناظر هنوف ،،، ورفع حاجبه الأيمن ،،،( والله ما نتب هينه ،،،)
هنوف تخاف لما تشوف نواف ،،، لكنها ما تبين له ،،،( تحمد ربها ما فجرت فيها ،،،)
تقلدها ،،،( وإنت كيفك ،،، مالت عليها حتى ما تعرف تدلع ،،،)
نواف سرح في عيونها ،،، وهذا حاله كل ما وقف معها ،،، والله محد يعرف يتدلع غيرك ،،،
صوتك ،،، عيونك ،،، حركاتك ،،، كلها دلع ،،،
هنوف انحرجت من نظرته ،،، والتفتت على هيا ،،،( هيا الغدا بيحترق ،،، )
ضحكت على طريقتها بتخليص نفسها ،،، جرتها ،،،( يالله امشي نخرب عليهم ،،،)
التفتت على نواف وغمزت له ،،،( قرب السياره ،،،و اخذوا الغدا ،،،)
ابتسم ،،،( إن شاء الله ،،،)
*******************************************
عزمت أم حمد ،،،أم فيصل على القهوه العصر في خيمتها ،،،
راحت هند لخيمة عمتهم موضي ،،، عشانها أكدت عليهم كلهم يجون
ساره تصب القهوه على الحريم ،،،
وهنوف جالسه بين هند ودلال ،،،
نجلا جالسه قريب منهم ،،،
نجلا تبي تنتقم من تصرف هنوف اليوم وتحر هند بالمره ،،،
( هنوف عيال عمك تنازلوا عنك ،،، وقدموك هديه لسلمان بن ماجد ،،،)
هنوف بدلع ،،،( يا حبيبتي آنا مخيره ،،، واحترت من اختار ،،، من جيت للرياض وآنا انخطب ،،، الظاهر ما فيه بنات في الرياض ،،،)
انقهرت دلال من ردها ،،، مع إنها فاهمه إنها ما تقصدها ،،، لكنها ضربت على الوتر الحساس ،،،
نجلا تلوي فمها ،( انصحك تختارين ولد الأمير ، فلوس وخير وعلم ،، ) وتناظر اختها عبير
هنوف تقلدها وتلوي فمها ،،،( أفكر ،،،)
قاموا العجايز ،،، وفرشوا برا الخيام ،،، وطلعت معهم هند وهيا وساره ،،،وما بقى إلا البنات
عبير تكلم دلال بشويش ،،، ( ما كنها تشمتت فينا ،،،)
دلال متضايقه ،،،( يمكن ،،،)
عبير بهدوء ،،،( وش عندها متكبره ومغتره بروحها ،،،)
دلال بشويش ،،،( مغتره بجمالها ،،،)
تضايقت هنوف من تصرفهم ،،، وطلعت منهم وراحت ورا الخيام وخذت معها المسجل ،،،تبي تمشى بروحها ،،، ناظرت الصغار يلعبون كوره،،، ضحكت على أشكالهم ،،، كانوا رافعين دشاديشهم وحاطينهم داخل سراويلهم ،،،
طلت في سيارة أبوها ،،، ما شافت المفتاح ،،، حسافه مشتهيه أسوق ،،، شافت شي تحت تاير السياره ،،، شنو هذا حبل ،،،؟ بلعب فيه ،،،
جرته ،،، طلع في وجها ،،، صرخت ،،، بسم الله ،،،
بعدت شوت ،،، رفع راسه ووقف ،،،وقرب شوي ،،، كانت تسمي وتقرا قرآن وكل ما بعدت شوي قرب ،،،
شافوه الاولاد الصغار ،،، بعضهم طاروا لابوها ،،، يعلمونه ،،، وبعضهم راح للحريم ،،،
******************************
عند الرجال ،،،( يبه متعب إلحق هنوف بتاكلها الحيه ،،،)
متعب راح يركض ووراه الموجودين ،،، أبو طلال وأبوه وعمه ،،، وعيالهم ،،، والباقي يناظرون من بعيد ،،،
ناداها بصوت هادي علشان ما ينتبهه الثعبان بوجودهم وينقض عليها ،،( هنوف ،،،)
التفتت عليه برجاء ،،،( ارجعي شوي شوي ،،،)
ارجعت شوي ،،، تقدم وراها ،،،
طلال بصوت هادي ،،، (وقفي ،،، واقري المعوذات ،،،)
هنوف كانت تقرا ،،، هزت راسها بالموافقه ،،،
نواف جاب البندق بيضرب راس الثعبان ،،، امسكه متعب ،،، شوي ،،،
دلال صارت تصيح ،،، ندمانه ،،، هند صمت ،،،هيا تقرا المعوذات في صدرها ،،، جدتها تدعي ،،، وكل الموجودين حالتهم يرثى لها ،،،
ناظروه كان يمشي وراها شوي شوي ،،،
محد عارضه ،،،لأنهم عارفين إن له تجارب كثيره في البر ،،،
لمها من ورا ،،، فزت خايفه ومسكها ،،،بشويش ،،،( أششششششششش ،، لا تخافين ،،،)
تحرك معها شوي شوي ،،، تحرك وراهم الثعبان ،،، وتحرك لين وصلوا آخر السياره ،،، ولفها عمها سلطان بسرعه ورا السياره ،،، وجرى فيها بسرعه ،،،
وانقض عليهم ،،،لكنهم اختفوا ،،،
مسكها أبوها ،،،( الحمدلله على السلامه ،،،)
ناظرته وفقدت الوعي ،،، مسكها ،،، علشان ما تطيح على الأرض ،،، وهاذي حالتها إذا خافت ،،، لازم يجيها هبوط في الضغط مفاجئ ويغمى عليها ،،،
شالها عمها ،،، ودخلها خيمتهم ،،،
توعت بعد عشر دقايق ،،، وكان جدها وعمانها وعماتها وبناتهم حولها ،،،
ابتسم عمها سلطان ،،،( الحمدلله على السلامه،،،)
جلست ،،، ( الله يسلمك ،،،)
جدها ،،( الله ستر عليك ،،، وإلا والله إن عشاه الليله عليك ،،،)
متعب دمعته في عينه ،،،( اسم الله على بنتي ،،،)
هنوف تحس بالخوف ،،،( يبه ،، وين راحت ،،،)
ضحكوا عليها ،،،
الجازي تضحك ،،،( فجر في راسها نواف بالبندق،،، )
نوره ،،،( فجر في راسها ،،، إلا قطعها مية قطعه ،،، ودفنها بعيد ،،،)
هنوف تتخيل ،،، الثعبان ياكلها ،،،غمضت عيونها قوه ،،، حطت يدها على صدرها وقالت بصوت واضح ( الحمدلله ،،، )
ضحكوا عليها ،،،
استغربت ،،،( وين أمي وضحه ،،،؟)
ساره متضايقه ،،،( تروعت عليك ،،، وجاها هبوط في السكر ،،، )
خافت هنوف عليها ،،،( وألحين شلونها ،،،؟)
ساره ،،،( ألحين كويسه ،،،)
قامت بسرعه وداخت ،، جلست ،،،مسكها أبوها ،،،( وش فيك ،،،)
ابتسمت له ،،،( لا ما فيني شي ،،، دخت لأني وقفت بسرعه،،،)
أبو سلطان ،،،( وقفي شوي شوي ،،، توك متوعيه ،،،)
قامت شوي شوي ،،،
راحوا كلهم لأم سلطان ،،، إلا هند لأن أعصابها تلفت بعد ما شافت إختها طيبه ،،، وتبي تنام
***************************
مشى فيصل وأهله لخوالهم ،،، مخيمين قريب منهم ،،،
بيسلمون عليهم ويجلسون عندهم يومين ،،، ويعودون للرياض ،،،
*******
بعد يومين
زارهم خالهم أبو سلمان يتطمن على هنوف لأنه سمع باللي صار لها ،،،
وياخذ منهم الموافقه ،،، لكنه تفاجأ لما قاله متعب برفض هنوف ،،،
( أحد يدري برفضها ،،،)
متعب مستغرب ،،( لا ،،،)
أبو سلمان ،،،( لا أحد يدري ،،، وأبي أشوفها أتطمن عليها ،،،)
متعب استحي يرد خاله ،،، وحاس إن فيه شي بيصير ،،، الله يستر
( إن شاء الله ،،،)
جلس أبو سلمان في خيمة اخته أم سلطان ،،، وتكلم معها في موضوع قبل يجون البنات يسلمون عليه ،،،
ناداهم أبوهم يسلمون على خاله ،،، في خيمة جدتهم ،،،
كانوا كلهم متجمعين ،،، عماتهم وبناتهم ،،، وأم طلال وهيا كلهم جايين يسلمون على خالهم ،،،
دخلت هند مع أبوها ،،، ( السلام عليكم ،،،)
رفع أبو سلمان عينه ،،،( ما شاء الله ،،، هاذي هنوف ،،،)
ابتسمت الجازي ،،،( لا ،،، هاذي هند ،،، الكبيره ،،،)
حبت خشمه وراسه ،،،( شلونك يبه ،،،)
يناظرها ،،،( زان لونك ،،، كيف حالك ،،،)
ابتسمت ،،،( الحمد لله طيبه وبخير ،،،)
التفت على أم سلطان ،،،( مرت طلال ،،،)
انحرجت هند ،،، أم سلطان بابتسامه ( إيه مرته ،،،)
أبو سلمان ( ما شاء الله ،،، طلال ما طاح إلا واقف ،،،)
أم سلطان تمسك يده ،،،( اذكر الله ،،،)
ضحك ،،،( ما شاء الله تبارك الرحمن ،،،)
ابتسم لهند ،،،( وين الهنوف ،،، مهيب جايه ،،،)
متعب قارصه قلبه بهدوء ،،،( بتجي ذلحين ،،، )
دخلت ،،، ونزلت طرحتها على متونها ،،،
بابتسامه عذبه ،،،( سلام عليكم ،،،)
أبو سلمان ،،، متفاجأ ،،،( وعليكم السلام ،،،)
كلهم متفاجئين حتى أبوها ،،،
هنوف لابسه فستان مخمل أسود ضيق وعليه شال أسود مطرز تطريز هندي بالأحمر ،،،
وما حطت في وجها غير الروج الأحمر ،،،
أبو سلمان يلبس نظارته ،،،( ما شاء الله ،،، أنتي الهنوف ،،،)
حبت خشمه وراسه ،،،( إيه طال عمرك أنا هنوف ،،،كيف حالك ) وابتسمت
ناظرها وابتسم ،،،( بخير الله يسلمك ،،، ) جلس يتحفاها ويسولف معها ،،،
هند ابتسمت ،،،والتفتت على هيا ،،،( محد سأل عن حالي ،،،)
هيا والضيقه تعصر قلبها ،،،( وش يبي فيك ،،، مره متزوجه ،،،)
ضحكت هند ،،،( على الأقل مجامله ،،،)
ابتسمت هيا ،،،( الدنيا مصالح ،،،)
أم سلطان ،،، غمزت للجازي ،،، قامت الجازي متعذره وخذت بناتها وخواتها ،،، إلا على دخلت أبو طلال وسلمان وأبوهم ،،،
غمز أبو طلال لهيا ،،، طلعت وخذت أمها ،،،
خافت هنوف وتمسكت باختها ،،، متعب حس بخوفها وتضايق ،،، كلمها بشويش ،،، ( لا تخافين دامني معك ،،،)
ابتسمت بخوف ،،،( الله يخليك لي ،،،)
هدا المكان وحل الصمت ،،،
************************************************************ ******
فجأه،،،،
تكلم أبو سلمان ،،،( الهنوف ،،،)
الهنوف تناظره برهبه ،،،( سم ،،،)
أبو سلمان بهدوء ،،،( سم الله عدوك ،،، قالوا لي إنك رافضه ولدي سلمان ،،، وأنا ما صدقت ،،، حنا مختارينك أنتي بالذات ،،، زين وعقل وعلم ،،، وإلا سلمان كلن يتمناها ،،، أمير ولد أمير وجامع الدين والعلم ،،، وأنا جاي أسمع رايك ،،، منك مهوب منهم )
هنوف ارتبكت ،،، استجمعت قواها وتكلمت ،،، ( آنا أدرس بالكويت وما أقدر أخلي دراستي)
أبو سلمان يحدها ،،،( هذا مهوب عذر ،،، تبين تكملين دراستك ،،، مهوب طاردك ،،، كملي معه ،،، تراه يدرس فأمريكا ،،،والعلم كله هناك ،،، وإلا ولدي ما يشرفك ،،،)
انقهرت هنوف واستقوت بعد ما كانت خايفه ،،،
( والله يا يبه يشرفني ،،، والدراسه صح مو عذر كافي ،،، لكن اللي ما تعرفه إني انخطبت قبل ما تخطبون ،،، وكانوا ينتظرون ردي ،،، واعتقد ما يجوز خطبه على خطبه ،،،)
اسغرب أبو سلمان ،،،( ومن اللي خاطبك ،،،)
هنوف بثقه ناظرت أبوها اللي ما علق ،،،( نواف ولد عمي سلطان ،،،)
صمت
التفت على أبو طلال بهدوء ،،،( أنتوا خاطبينها ،،،)
ابتسم أبو طلال بإحراج ،،،( إيه نواف كان خاطبها ،، وكنا ننتظر ردها ، جيت وطلبتنا ،،وعطيناك ،،)
أبو سلمان يتشره عليه ،،،( ليه تعطوني وأنتوا لكم نفسن فيها ،،،)
أبو طلال ،،، (يا خال ،،،أنت لو تطلب ارقابنا ما رديناك ،،،)
ناظرها أبو سلمان ،،،( وذلحين يا بنت متعب أنتي مخيره بين ثنين ،،، من تبين ،،، ولا ني بطالع لين آخذ ردك ،،، )
انحرجت ،،، شلون تختار وهي ألحين بوسطهم ،،،
جدها أبو سلطان ،،،( هنوف اختاري مانتي مجبوره على واحد ما تبينه ،،، )
خذت نفس ،،، ناظرت أبوها ،،، اللي اشر براسه بالموافقه ،،، بعدين ناظرت جدتها كانت منزله راسها ،،، تنهدت ( اعذرني ،،، آنا بختار ولد عمي نواف ،،،)
أبو سلمان يعدل نظارته ويناظر فيها ،،،( تختارين نواف ،،، سلمان أمير قبيلته صيته يذكر عند القاصي والداني وعند كل القبايل ،،، ترفضينه ،،، وتختارين ولد عمك ،،،)
ناظرته بهدوء وابتسمت،،،( إذا سلمان أمير قبيلته ،،، ولد عمي أمير بعيني ،،، )
ابتسم عمها سلمان ،،، أبو سلطان انشرح صدره وارتفع راسه ،،، أبو طلال ابتسم و ناظر متعب اللي فرح من رد بنته ،،، أم سلطان فرحانه ومفتشله من أخوها ،،، تفاجئوا بردها ،،، حتى هند اختها وأكثر وحده تعرف هنوف تفاجأت ،،،
ابتسم أبو سلمان ،،، ( عشتي ،،، وتراك يا بنتي كبرتي في عيني ،،، يوم ما بديتي الغريب على ولد عمك ،،، والله لو عند متعب بنت ثالثه ما خليتها ،،، عز الله بناتك متربيات )
هنوف صارت ترجف ،،، ما توقعت إنها ييطلع منها هالكلام ،،،
طلع أبو سلمان ،،، وحطت راسها على كتف أبوها وغمضت عيونها تبي تجمع قواها اللي خارت بعد ما طلع أبو سلمان ،،،
أبو سلطان مبتسم ،،،( هنوف ارفعي راسك ،،، تراك رفعتي روسنا اليوم ،،،)
قام أبو طلال وحب راسها ،،، انحرجت ودمعت عيونها ،،،( صح لسانك ،،، والله إنك سمو الأميره صدق ،،، أميره بشكلك وأميره بكلامك )
سلمان يضحك وفرحان بنفس الوقت ،،،( لا يكون صدقتي إنك أميره ،،، عشان كذا تشوفين نواف الأمير ،،،)
متعب معجب في بنته ،،،( غصبن عليك أميره واللي بياخذها أمير ،،،)
انحرجت و ضحكوا ،،، قامت وطلعت ،،،
*************************
انتشر خبر رد هنوف بين أهل الخيام ،،،
أبو طلال يعلم أم طلال بالسالفه ،،،( والله إنها ارفعت راسي يومها قالت إن نواف أمير بعينها)
أم طلال فرحانه ،،، رغم إنها كانت تبي عبير بنت راكان لنواف ،،،إلا إنها هونت بعد ما درت إن نواف يبي هنوف ،،، أولا لأنها تدري إن نواف مهوب راد عليها اللي براسه بيسوسه ،،، ثانيا ما تبي تظلمه مثل طلال ،،، ( فديت عيونها ،،، والله إن غلاها زاد بعد ردها ،،،)
أما هيا كانت أسعد إنسانه لأنها أكثر وحده تعرف بحب نواف لهنوف ،،،
*******************************************
سلمان علم طلال ومشاري باللي صار بين أبو سلمان وهنوف ،،،
طلال بفرح ( بروح أعلم نواف ،،،)
سلمان مستغرب ( وين نواف ،،،؟)
وهو مستعجل ( عند الحلال ،،،)
سلمان يمشي وراه ( خلاص بروح معك ،،،)
ولحقهم مشاري
اركبوا وطاروا لنواف ،،،
استغرب نواف ،،، وش اللي رجعهم ،،، تو طلال رايحن مني ،،،
مشاري يضحك ،،،( خشمك خشمك ،،، طال عمرك ،،،) حب خشمه
ضحك سلمان ،،،( خشمك خشمك ،،، سمو الأمير ،،،)
نواف يضحك ،،،( وش عندكم فقدتوا الذاكره ،،،،)
طلال بابتسامه ،،،( والله مهوب حنا اللي بنفقدها ،،، ذلحين أنت اللي بتفقدها ،،،)
رفع حواجبه باستغراب ،،، ( وش عندكم ،،،)
سلمان يمثل البكي ( جايين نعزيك ،،،)
رفع حاجب ( في مين ،،،،؟ )
ضحك سلمان ( في العزوبيه )
ما فهم ( يعني إيش ،،،،؟ )
طلال بابتسامه واسعه ( يعني بتزوج ،،، و زوج سمو الاميره لازم يكون أمير )
بغباء ( ما فهمت )
سلمان يهز راسه بأسف ( لاااااا حالتك تروع ،،، يعني بتودع العزوبيه لأت هنوف اختارتك على الأمير سلمان )
يمسك كتف عمه ( من جدك ،،،)
سلمان يضحك ( إي والله ،،،)
نواف بفرح ( كيف ،،،؟)
قالوا له اللي صار ووش قالت هنوف
فتح عيونه على الآخر( تكذبون ،،،)
ضحكوا عليه ،،،( والله صدق ،،،)
سكت ومشى بهدوء بدون أي تعليق
سلمان يصفق بدينه ببعض ( لا حول ولا قوة الا بالله ،،، الرجال انجن)
مشاري يضحك ويدعيه ،،،( سمو الأمير نواف ،،، بكتب معروض ،،،)
طلال بضحكه عاليه ،،،( راح مجنون ليلى ،،، شكله جاه الالهام ،،)
معقوله هنوف توافق بسهوله ،،، يمكنها كانت تميل لي شوي ،،،ما أعتقد ،،، أو يمكنها خافت من المشاكل ،،، وخافت على أبوها ،،،أكيد ،،، بنات عمي يسون أي شي ولا يصير في أبوهم شي ،،،
الحمد لله ،،، اللي فيها خير في أبوها أكيد بيصير فيها خير لزوجها ،،، ابتسم ،،، أمير في عينك ،،، والله أنتي الأميره في عيني ،،، وأجمل أميره ،،،
راح متعب لمخيم خوال بناته يبي يعلمهم بموافقة هنوف على نواف ،،،
محمد ارتاح انهم ما غصبوا هنوف ( أنت متأكد إنها اللي موافقه ،،،)
ضحك متعب ،،،( أنت متوقع إن هنوف بتنغصب ،،، أنت ما سمعت ردها يوم قالها خالي ،،، ترفضين ولدي الأمير وتوافقين على ولد عمك ،،، قالت ولد عمي أمير في عيني ،،،)
محمد مستغرب ،،،( معقوله هنوف يطلع منها ذا الكلام ،،، طول عمرها طفله في عيني ،،، ما أحس إنها بتكبر ذا البنت،،،)
عامر بابتسامه ،،،( تربية عمتي أم محمد الله يرحمها ،،، )
محمد يتذكر أمه ،،،( الله يرحمها ،،، ما كان يمر عليها شي وإلا يمر موقف ،،، إلا تعلمهم منه حكمه ،،، وتعلمنا حنا بعد ،،،)
متعب مبتسم براحه ( الله يرحمها ،،، متى بتمشون ،،،؟ )
محمد ،،،( ناصر وسعود بيمشون باجر ،،، وإحنا بنقعد أسبوع ثاني ،،، )
ناصر بشوق لهنوف ،،،( شرايك ناخذ هنوف ،،، ترى ما بقى شي على الدراسه ،،، )
محمد يأيده ،،،( أحسن خلها تروح تجهز شغلها ،،، ولا تعنيك بعد للكويت ،،،)
متعب بتفكير ،،،( بقول لها ،،،)
ناصر ،،،( خلاص حنا بنمركم باجر ،،،إذا بتروح خذيناها ،،،)
متعب يسلم عليهم بيمشي ،،،( على خير ،،، يالله في أمان الله ،،،)
( في أمان الكريم ،،،)
************************************************************ *****
في الليل
*******
هنوف ما تعشت ،،، جالسه تفكر وتعمل شعرها في خيمتهم ،،،
دخلت عليها هند ،،، ضحكت ،،، ( سموالأميره أبوي عبدالله يناديج ،،،)
هنوف ناظرتها بعصبيه ،،،( بس خلاص ،،، لا تذكريني ،،، بانسى ،،،)
هند رافعه حواجبها ،،،( والله ،،، إنتي اللي جبتيه لنفسج ،،،)
حذفت المرايه داخل الشنطه ،،،( لا حول ولا قوة إلا بالله ،،، إمشي قدامي ،،،)
عقبه تذكرت وألتفتت على اختها ،،،( فيه أحد هناك ،،،)
ابتسمت هند ،،،( مثل منو ،،،)
خزتها هنوف ،،،وضحكت هند ،،،( خلاص خلاص ،،،آسفه ،،، لا ما فيه أحد ،،، إلا أبوي ،،، بس أتوقع هاذي حزتهم ممكن يجون ،،،)
هنوف وقفت ،،، ( ما يصير أبوي وأبوي عبدالله يجون هنيه ،،، عشان أضمن ما حد يجي ،)
هند تقلد هنوف،،،( لاااا وينج يا لجريئه ،،،وآنا مو مثلج أستحي ،، بسوي وبفعل ،،، وين هذا كله طار ،،،)
هنوف بضيقه ،،،( أولا آنا ليلحين ما ملجت ،،،وبعدين ما دري اشفيتي ما أحب أسمع طاريه)
تنهدت هند ولمت اختها ،،،( يمكن خيره ،،، عشان ما انتفارق ،،،)
هنوف كأنها تنتظر اختها تلمها ،،، لمتها بقوه ،،،
تأخروا وجا أبوهم يدورهم ،،، كانت هنوف لامه اختها ،،،( هنوف فيك شي ،،،)
هند تمسح عيونها وتوخرها ،،،( لا يبه ما فيها شي ،،،بس مشتاقه لنا عشان بتروح الكويت)
ابتسم وهو عارف مهوب ذا اللي فيها ،،،( أكيد ،،، )
ابتسمت ،،،( أكيد ،،،)
متعب يحط يده ورا ظهرها ،،،( خالك ناصر بيمرنا بكره رايح الكويت ، تبين تروحين معه ،)
ناظرت أبوها بحزن ،،، وهزت راسها بالموافقه ،،،
تبي تهرب من المكان ،،، متضايقه ،،، تحس بكتمه في صدرها ،،، برجع لمكاني لراحتي لديرتي لأغلى ناسي ،،، خالي محمد وخالاتي وتهاني ،،، فديتهم ،،، والله مشتاقه لهم ،،، يا ليت هند ترجع معي ونرد مثل أول ،،، جرت النفس ،،، شلون نرد مثل أول وأبوي مو مثل أول ،،، قبل مجرد اتصال مني يجي بسرعه بدون تردد ،،، أما ألحين ما يجي إلا يجيبه أحد ،، دمعت عينها ،،، الحمدلله يمكنها خيره ،،،
( وين رحتي ،،،)
ناظرته بحزن وابتسمت ( معاك ،،،)
ضحك ،،،( باين على وجهك ،،، إنك رحتي لبعيد ،،، امشي نروح لأبوي ،،، تراني قلت له إن خالك بيجي ياخذك بكره وتضايق ،،، يبي يجلس معك شوي ،،،)
( إن شاء الله ،،،)
هند تطلب أبوها ،،( يبه ممكن أروح معهم هاليومين اللي باقيه من الاجازه ،،وأجي بالطياره،)
متعب بابتسامه ،،،( والله أنتي مره معرسه ،،، استشيري رجلك ،،،)
انحرجت هند ،،، وضحكت هنوف
ضحك متعب ،،،( يا بعد ضحكتي ،،،)
دمعت عيونها ،،،( يبه لا تقول هالكلمه والله تضيق خلقي ،،،)
متعب يمسح دمعتها ،،،( امسحي دموعك ،،، ولا عاد اشوفها ،،، وامشي قدامي ،،،)
ابتسمت بحزن ،،،
البست واطلعت معه ،،، أما هند اعتذرت تبي تصلي ،،،
*************************
هنوف بابتسامه لجدها وجدتها ،،، حبت روسهم ،،،،
أبو سلطان يأشر على المكان اللي جنيه ،،،( اجلسي هنا ،،،)
بهدوء ،،،( إن شاء الله ،،،)
أم سلطان تناظرها ( ليه ما تعشيتي ،،، ترا أكلك قليل ،،، مهوب زين ،،،)
نزلت عينها عن جدتها ،،، ( مو مشتهيه ،،،)
جدها يمسح على شعرها ،،،( ليه يا بوي مانتي مشتهيه مستوجعه ،،،)
ناظرته والدمعه حايره بعينها ،،،( لا يا حياتي ما فيني شي ،،،)
ناظر فيها أبوها ،،،( أجل إذا أنتي صادقه ،،، ذوقي لك شي ،،،)
أم سلطان ،،،( فيه حليب ،،، اخذي معه شابوره ،،،)
هنوف ما تناظر في جدتها ،،،( بعد شوي ،،،)
( السلام عليكم ،،،)
خافت والتفتت بسرعه ،،،
ضحك أبوها اللي فهمها ،،،( وش فيك ،،،)
ابتسمت ،،،( ما فيني شي ،،، )
سلمان لاف فروته عليه ،،،( اليوم البرد زايد ،،، ما عندكم شي دافي ،،،)
هنوف ترفع غوري الحليب من الدفايه ،،، وتصب له ،،،( تفضل ،،،)
سلمان يطلع يدينه ،،،( دام فضلك ،،، كيفك اليوم ،،،)
ابتسمت ،،،( الحمدلله بخير ،،،)
سلمان يشرب الحليب ،،،( وين البنات ما أشوفهم ،،،) قصده خواته
هنوف تصب لها حليب ،،،( يمكن ينومون عيالهم ،،، بعدين برد الليله أكيد ما راح يجون ،،،)
سلمان ،،،( خساره ،،، العيال بيجون يسمرون معهم ،،،أجل بقول لهم لا يجون )
أم سلطان ،،،( ليه ما يبون إلا البنات ،،، خلهم يجونا ،،، نجلس معهم شوي ،،،)
هنوف قامت ،،،( عن إذنكم ،،، بروح أنام ،،،)
سلمان يضحك ،،،( اسمري معنا ،،،)
ناظرته ،،،( وراي سفر ،،،)
تخرع سلمان ،،،( بتسافرين ،،،متى،،،؟)
أم سلطان منصدمه ،،،( وين بتسافرين ،،،؟)
هنوف بهدوء ،،،( للكويت باجر مع خالي ناصر ،،،)
صمت في المكان
راحت هنوف تبي تنام ،،، لكن ما جاها النوم ،،،
هند متضايقه تبي تروح ،،، ومهيب قادره تستأذن من طلال ،،،
سمعت صوته يكلم بالجوال ،،،
قررت تروح له تستأذن ،،،لأن ناصر بيجي الصبح ياخذهم ،،، لكنها خايفه
كان يكلم ،،، معطيها ظهره ،،،
أوا ما سكر الجوال ،،، كان الجو هادي ،،، سرح
بصوت هادي من وراه ،،،( طلال ،،،؟)
خاف من الصوت ،،، والتفت عليها ،،، شهقت وغطت وجها ،،،
( آسفه عبالي طلال ،،،)
ضحك نواف ،،، ونزل راسه ( لا تروحين بنادي طلال ،،،)
هند من الصدمه ما عاد تحركت من مكانها ،،،
نواف دخل خيمة جدته ،،، وأشر لطلال وطلع وراه ،،،
ضحك نواف ،،،( إلحق على مرتك ،،، أغمى عليها ،،،)
طلال فتح عيونه ،،،( وش تقول ،،،)
نواف مبتسم ،،،( أقول ،،، أمرتك ورا الخيام ،،، رحت منها يمكن صار فيها شي ،،، )
طلال مستغرب ،،،( ليه ،،،)
( معطيها ظهري ،،،وتحسبني أنت ،،، نادتني بنعومه ،،، تلال ،،، يوم التفت عليها شهقت روح لها يمكنها ماتت )
ضحك طلال ،،، ونواف يدعي ،،،( يا رب أوعدي ،،، يا رب ،،،)
راح طلال وهو يضحك ،،،( يا ويلك ،،،إذا كذبت علي ،،،)
شافها واقفه ما تحركت ،،،
( هند ،،،)
التفتت وارفعت وجها الأحمر رغم بروده الجو ،،،وناظرته ،،،( موقف لا أحسد عليه ،،،)
ضحك ،،، ( معليه ،،، لا تستحين ،،، أشوى إنه نواف ،،وإلا لو سلمان كان ما سكت،،، )
مسك يدها ،،،و كمل بهدوء ( امشي انتمشى شوي ،،،)
مشت لأنها تبي تكلمه ،،،
مشوا وهم ساكتين ،،، كل واحد في نفسه شي ،،، لين ابعدوا شوي ،،،
هند تلتفت وراها ،،، ( طلال وقف ،،، الخيام اختفت ،،،)
طلال يتنهد ،،،( خايفه وإنتي معي ،،،)
ابتسمت هند ،،،( لا بالعكس ،،، لكني ما قلت لأبوي ،،، )
ناظرها بتأمل ،،،( وش كنتي تبين ،،،)
انحرجت ،،،( كنت أبي أستأذنك ،،،)
استغرب ،،،( في إيش ،،،)
خذت نفس ،،،( بروح مع خوالي باجر الكويت ،،،)
ابتسم ،،، ( وتستأذنيني ،،، وين أبوي متعب ،،،)
نزلت راسها ،،،( أبوي يقول عندج رجال استأذني منه،،،)
ضحك ،،، ( صدق ،،،أجل ما فيه روحه للكويت ،،،)
استغربت ،،،( ليش ،،،؟)
ابتسم (إلا بشرط ،،، لما توافقين نسهر مع بعض للفجر ،،،)
ابتسمت ،،،( من صجك ،،، برد ،،،)
ابتسم ،،، (معي فروه،،،)
ناظرته ،،،( وإنت برد عليك ،،،)
غمز لها ،،( إذا خايفه علي ،،، خليني معك في الفروه ،،،)
انقلب وجها أحمر ،،،( خلاص هونت ماني رايحه للكويت ،،،)
ضحك عليها ،،،( اتضحين بالروحه ،،، عشان ما تبين قربي ،،،)
وكمل بهدوء ،،،( روحي للكويت استانسي ،،، وسلمي على خوالي ،،،)
ضحكت ،،،
وكمل ( شفتي سحرتيني ،،، حتى خوالي غيرتهم ،،، أكيد إنك ساحره )
ابتسمت ونزلت راسها ،،،( اعذرني طلال ،،، برجع الخيام ،،، أحس بالخوف ،،،)
طلال مسك متونها،،، وناظر في عيونها ،،،( لا تخافين مني ،،، أنا أحرص عليك أكثر من نفسي،،، )
هند منحرجه منه ،،،( آنا مو خايفه منك ،،،آنا خايفه أتأخر وما أقدر أجهز أغراضي بسرعه )
ضحك وحب جبهتها،،،( حلو العذر ،،، إمشي قبل لا أتهور ،،، وتخافين مني صدق ،،،)
*******************************
وصل لهم خالهم ناصر الساعه 6 الصبح ،،،
حملوا أغراضهم معه ،،، وراحوا يسلمون على جدتهم ،،،
دمعت عين أم سلطان ،،،( الله يحفظكم ،،، هند متى بترجعين ،،،)
هند مبتسمه ،،،( بعد كم يوم ،،، خلاص بتنتهي الإجازه ،،، بسلم على خوالي وبجي بالطياره)
أم سلطان تمسح دمعتها ،،،( وأنتي يا هنوف متى بنشوفك ،،،)
هنوف بهدوء ،،،( يمه ،،، يمكن ما أجي إلا في الصيف ،،،)
أم سلطان بحب لهنوف ،،،( تعالي في عطلة عيد الأضحى ،،،)
هنوف تعتذر ،،،( إن شاء الله ،،، بس ما أوعدج ،،، لأن دراستي شوي صعبه ،،،)
متعب يستعجلهم ،،،( يالله الرجال واقف برا ينتظركم ،،،)
حبوا راس جدتهم ،،، وطلعوا ،،،
مروا جدهم وسلموا عليه ومشوا ،،،
*******************************
اتمنى لكم قراءه ممتعه ،،،
لا تنسون الردود الحلوه ،،،
مع خالص حبي ،،،
الراكده ،،،
|
28-04-10, 10:24 PM
المشاركة رقم: 71
العرض العادي
