كاتب الموضوع :
الراكدة
المنتدى :
الارشيف
الفصل السابع عشر
****************
سافرت مضاوي لبنان شهر عسل ،،،وجهزوا لطلعة البر ،،، لأن الجد ما يستغني عن حلاله واجباري عليهم يطلعون في اجازة نصف السنه ،،، لكن هالمره بعيد في شمال المملكه ،،،عشان الربيع،،،والفقع،،،
طلال وسلمان طلعوا قبلهم بالخيام ،،، يجهزونها قبل يجون ،،، رفض الجد سفر بنات متعب الكويت ،،،يبيهم يطلعون معه للبر ،،،
يوم الطلعه ،،، بعد ما صلوا صلاة الصبح ،،،
الجد يضرب البيبان بعصاه ( يالله ،،، عجلوا علينا طلعت الشمس والمكان بعيد ،،، )
قاموا البنات ،،، والجده ،،،جهزوا العزبه اللي معهم في سيارة أبوهم واللي في سيارة جدهم ويسوقها نواف ،،،
طلع أبو سلطان ومتعب للمجلس على ما يجهزون البنات ويلحقونهم،،،
عبدالعزيز يقهويهم وفيه النوم ،،،خذا نواف فنجال فيه مويه ورشه وضحك ،،،
عصب عبدالعزيز ،،،أبو طلال يلومه ( وش فيك ،،، غرقته ،،، ترى الجو بارد،،،)
نواف يضحك ،،،( أبيه يصحصح ،،، يبي يسوق فيكم وهو راقد ،،،)
أبو سلطان ( لا يسوق إلا لطلعنا من الرياض ،،،)
أبو طلال ( إن شاء الله ،،،)
دق جوال متعب ،،،كلم وسكره ،،،
قام ( يالله ،،، توكلوا ،،،)
قاموا ( توكلنا على الله ،،،)
مشت السيارات ،،،جيب نواف وفيها أبو سلطان وأم سلطان ،،والشغاله
وجمس أبو طلال فيها عبدالعزيز وأمه والشغاله ،،، ورنج متعب فيها بناته
وقفوا بعد ساعه من الرياض ينتظرون أبو فهد عمهم سالم وعياله ،،،وأبو حمد وعياله
نزل أبو سلطان وراح بعيد منهم ،،،يقضي حاجته ،،،ونزلت أم سلطان ما عليها إلا جلالها وجلست على الرمل بدون حذيان ،،،ومعها أم طلال ،،،وجلس معهم نواف وأبو طلال
ومتعب جايب لهم العزبه معه فيها قهوة وشاهي وسنويشات منوعه وملفوفه بورق ومكتوب عليها نوع كل وحده ،،، ( صبحكم الله بالخير ،،،)
أم سلطان بحب ( يا مرحبا فديتك ،،، جعل ربي يصبحك بالخير والعافيه ،،،)
أم طلال ( وين البنات ،،،)
متعب يناظر السيارات ،،،( وحده نايمه والثانيه بتجي ،،،)
نواف في نفسه ،،،يا رب هنوف اللي بتجي ،،،
( السلام عليكم ،،،)
متعب يرحب فيها ( وعليكم السلام ،،، يا مرحبا والله اني صادق ،،،)
خاب ظن نواف ،،،
أم طلال تبتسم لها لما سلمت عليها ( مرحبا ،،، )
هند مستغربه ( وين أبوي عبدالله ،،،)
ضحك أبو طلال وضحكوا ( قريب ،،،)
انحرجت هند لأنها افهمت وينه ،،،
اقبل عليهم أبو سلطان وهو يجر الصوت ،،،
يا ما حلا مسراحنا وقت مغباش
قدام نور الفجر يبدي عموده
بخوة هل المعروف ما فيهم اللاش
الكل نفسه المراجل تقوده
الكل منهم عادته ذبح الأكباش
دايم وربعه بالكرامه شهوده
ناخذ لنا في رحلة كم مطراش
والعصر ما أحلى الصيد حزت ركوده
أم سلطان بحنيه وحب البداوة ،،( الله يعطيه العافيه ،،،ولا يغير عليه ،،،)
ابتسم متعب ( صح لسانك ،،،)
أبو سلطان ( صح بدنك ،،، محد كلمكم ،،، )
متعب يوقف يناظر الطريق ( كلمني مشاري ،،، قدهم قريب ،،،إن شاء الله ،،،)
أبو طلال يأشر ( هه،،،وصلوا ،،،)
أبو سلطان مستعجل ،،،( اركبوا ،،،اركبوا ،،،يالله يا نواف ،،،عجل)
شلوا الاغراض بسرعه واركبوا السيارات ،،،، ومشوا ،،،
في المقدمه أبو سلطان لأنه يدل ونواف معه ماجلان ،،،ووراه ثمان سيارات ،،،
سيارة متعب ووراه سلطان ،،،بعده أبو فهد يسوق فيه فارس ،،،ووراهم فهد والجازي ،،،ومبارك ونوره،،،وسياره أبو حمد يسوقها حمد ووراهم مشاري وهيا ،،،
بعد ما وقفوا في محطه يبون يعبون سياراتهم ،،،
متعب ،،،( هنوفه ،،، قومي يالفاطسه ،،، ما تشبعين نوم ،،،من مشينا وأنتي نايمه،،،)
صحصحت وضحكت ( من حلات النومه ،،،انكسر ظهري ،،،يبه بنزل شوي،،،تعبانه )
متعب يلتفت عليها وهو يمشي بالسيارة ( ببعد شوي ،،،وانزلوا طلقوا رجيلكم ،،،لين يخلصون)
مشى شوي ،،،ونزلوا البنات ،،، ونزلوا عزبتهم وتقهوا مع ابوهم ،،،على ما يخلصون ،،،
الجازي تكلم فهد ( فهد خلصت،،، ودنا لمتعب وبناته ،،،شوفهم هناك ،،،)
فهد منحرج ( وين بتروحون لهم خليهم ياخذون راحتهم مع ابوهم ،،،)
سكتت الجازي ،،،
مشوا كلهم ومروا متعب ،،،وضربوا له بوري ،،،،
ركب متعب ،،،لكنه حس بنغزه في قلبه ،،،شافته هنوف ومسكته ( يبه فيك شي ،،،)
ابتسم لها ( لا تخافين ،،، نغزه خفيفه ،،،)
هنوف تناظره بخوف ( يبه بسوق بدالك ،،،)
ضحك متعب ،،،( تسوقين ،،،ترانا في المملكه مهوب في الكويت ،،،)
هند بخوف ،،،( يبه ،،،خلها تسوق وإلا بسوق آنا ،،، لين نوصلهم ،،،ويسوق فينا واحد من الشباب ،،،إنت من الصبح وإنت تسوق ما ارتحت )
شاف متعب نظرة الخوف في بناته ،،،ووافق ،،،
خذت هنوف شماغ أبوها وتلثمت فيه ،،،وطارت وراهم ،،،
مشت وراهم ،،، من الساعه 12 الظهر إلى الساعه 2 بعد الظهر،،،محد انتبه لها ،،،
متعب ما حس فيها لأنه خذا حبه من حبوبه ونام في الكرسي الوراني مكان هنوف ،،،
الساعه 2 بعد الظهر وصلوا الاستراحه يبون يريحون فيها ،،،
آخر سياره وصلت سيارة متعب ،،،
الجميع ملتفت ينتظره ،،،
( يبه ،،، يبه ،،، قوم ،،، وصلنا الاستراحه ،،،)
قام متعب وهو مرتاح ،،،( وصلنا ،،، سقتي طول الطريق ،،،)
ضحكت هنوف تبي تطمنه ،،،( أفا عليك ،،، بنتك عن مية رجال ،،، )
ضحك وهو يناظر اللي ينتظرونه،،،( لا تقولون لهم فيني شي ،،، )
استغرب أبو سلطان ،،، ( من اللي يسوق ،،،مهوب متعب ،،،)
نواف مستغرب ،،،( لا ،،، الظاهر انها وحده من البنات ،،،)
أبو سلطان يعتزي ،،،( أخو موضي ،،، أجل متعب مهوب طيب ،،،)
خافوا الرياجيل ،،، منهم اللي راح له ومنهم اللي وقف ينتظر ،،،
أبو طلال يفتح الباب أول ما وقفت السياره ،،،( عسى ما شر ،،،؟)
ضحك متعب ( ما شر انعست ،،،وساقت بدالي هنوف ،،،)
أبو سلطان جايهم بخوف ( متعب ،،، فيك شي ،،،)
متعب يحب خشمه ( ما فيني الا العافيه ،،، انعست وساقت هنوف بدالي ،،،)
أبو سلطان وأبو فهد ( الحمدلله على سلامتك ،،،)
نواف يعتب على عمه ( يبه كان وقفتنا ،،، وخليت أبوي وإلا عبدالعزيز يسوق ،،،)
متعب يضحك بصوت ويسمع هنوف ،،،( أفا عليكم ،،، بنتي عن عشرة رياجيل ،،،)
وراح لأمه ،،،وحب راسها ،،،وطمنها
نواف يكلم مشاري ( الله ستر ،،، ما فيه نقطة تفتيش قدامنا ،،،)
مشاري قايله له هيا عن اعجاب نواف في هنوف،،،( والله واطلعت هنوف سواقه ،،،)
تضايق نواف ،،، ( تسوق في الكويت ،،، وأبوي متعب ،،،الله يهديه موافق ،،،)
مشاري مأيد ( والله أنا يوم رحت الكويت ،،، الحريم كلهم يسوقون ،،،ومحد يتعرضهم ،،،وإلا هنوف غير )ويغمز له،،،
ابتسم نواف ( إي والله غير،،،)وضحك
كل واحد أجر لأهله غرفه يتغدون ويرتاحون ويتمددون فيها شوي،،،
بعد ما تغدوا ،،، هنوف تسأل أبوها ( وين دواك ،،،؟)
متعب متمدد على السرير ،،،(في السيارة ،،،بجيبه بعد شوي ،،،)
قامت هنوف والبست ،،،(ارتاح بروح أجيبه ،،،)
خذت مفتاح السياره واطلعت ،،،
افتحت باب السياره اللي قدام ودورت لين داخت ما القته ،،،
كان فيه واحد يناظرها من بعيد ،،،ويكلم نفسه ( هاذي وش جايبها إلحالها ،،،المكان يخوف )
دخل ينادي وحده من بنات الجازي تجي عندها ،،، لأنه مهوب محرم لها ،،،
لقت هنوف العلاج تحت كشن السياره اللي ورا ،،، خذته وراحت ،،،
لما دخل فارس كان نواف طالع ،،،بيجيب له أغراض من السياره،،،
شافه وكمل ،،،وناظر هنوف داخله بعده وانصدم
وبعصبيه (هنوف)
التفتت هنوف ( نعم ،،،)
نواف لازال معصب ( منين جايه ،،،)
هنوف مستغربه ( جايه من السياره ،،، ليش تسأل،،،)
نواف ( ليش أسأل جايه من برا في الظهاري ،،،والمكان خطر،،،وما فيه أحد،،)
هنوف بعصبيه ( والله آنا رايحه أجيب دوا أبوي ،،،وأبوي يدري ،،،)
صارت عيونه حمر من العصبيه ( ثاني مره لا تطلعين ،،،إذا بغيتي شي علمينا ،،،سامعه ،،،)
مشت وعطته ظهرها معصبه ( لا ما سمعت ،،،)
مسكها عضدها ولفها ( قسما بالله لتنزلين الحالك مره ثانيه ،،،لاحش رجلينك ،،،فاهمه،،،)
انقهرت هنوف ،،، وجرت يدها ومشت ،،،
دخلت على أبوها منقهره ،،، وتنافخ ،،،
متعب كان مغمض عيونه ،،،
هند ( اشفيج ،،،تنافخين ،،،)
هنوف معصبه ( من هالخايس ولد عمج ،،،)
هند تسكتها ( أصصصصص،،،أبوي نايم لا يسمعج،،،)
هنوف بقهر ( أصلا بقوله ،،، )
هند معصبه وتكلم بشويش ( الله ياخذج ،،، يا راعية المشاكل ،،،حنا جايين نستانس ،،،وابوي تعبان ،،،لا تضيقين خلقه بتفاهاتج ،،،)
هنوف لازالت معصبه ( التافه ولد عمج مو آنا ،،،وإلا يزفني عشاني رحت أجيب دوا ابوي)
هند بضيقه ( قصري حسج ،،، شالسالفه ،،،)
قالت لها هنوف اللي صار ،،،وأبوهم يسمع بدون لا يدرون،،،
هند معصبه ،،،(هو التافه ،،، إلا إنتي قليلة الأدب ،،، ليش ما تعذرتي ،،،تدرين إنه غلط طلعتج في هالمكان بروحج ،،،وبعدين لما يقولون الرياجيل شي ،،،تسمعينهم ،،، وتقولين ان شاء الله ،،،مو تعطينهم ظهرج وتمشين ،،،)
متعب انتظر لما خلصوا كلامهم ،،، وقام ،،،
ابتسم لهند ،،،( صح لسانك ،،، الله يخليك لاختك ،،،)
التفت لهنوف ( وإنتي ،،، لا عاد تطلعين الحالك ،،، ولا عاد ترادين الرياجيل ،،،)
دمعت عيون هنوف ( يعني ألحين صرت الغلطانه ،،، آنا ما طلعت إلا قايله لك،،، وبعدين ما له شغل فيني ،،، ما ني إخته وإلا عبده عنده يتحكم فيني ،،، يا ليتني ما جيت ،،،اللي هذا أوله ينعرف تاليه ) وصاحت
قام متعب وجلس جنبها وحط يده وراها وراسه عند راسها ،،، حنان الكون كله فيه ،،،حب راسها ( هنوفه ،،،) ما ردت ،،،تنهد (هنوفه،،،)ما ردت
ابتسم بحزن ( هنوفه متحسفه إنك طلعتي معي البر،،، ) ما ردت كانت تصيح
هند تضايقت ( يبه ،،، ما عليك منها ،،، تدلع عليك ،،،)
متعب بحب لهنوف ( إذا ما تدلع قلبي علي ،،،من اللي يتدلع ،،،صدق إن قلبي تعبان شوي ،،،بس ما أقدر أستغني عنه ،،،)
هنوف بصوت باكي ( اسم الله على قلبك ،،،والله يخليك لنا ،،،)
لمها ( زعلانه يا قلب ابوك ،،،)
هنوف ما وقفت دموعها ( الله ياخذني إذا زعلت عليك،،،)
ضحك متعب ( إذا ما انتي بزعلانه ،،،اسمعي كلامي وكلام اختك،،،)
تمسح دموعها ( ان شاء الله ،،، بس نواف ما له شغل فيني ،،،)
ضحكوا عليها ،،، ما فيها رجا ،،،
*******************************
ركبوا كلهم السيارات الساعه 4 العصر ،،، راح عبد العزيز بأمر من أبو طلال عشان يسوق بعمه متعب ،،،لكنه رفض ،،،لأن عبدالعزيز ما يعرف يسوق في طريق البر ،،،
كان في المقدمه نواف وأبوسلطان ،،،وخلفه الباقين ،،،
ومتعب آخر سياره ،،،لأنه يعبي سيارته ،،، وقفوا ينتظرونه لين يخلص،،، ومشا وراهم ،،،
المسافه مهيب بعيده بقى حوالي 4 ساعات ،،،
بعد ساعه من مشوا ،،،
هيا تلتفت ورا ( مشاري أبوي متعب ورانا ،،،)
مشاري يناظر المرايه الجانبيه ،،،( ورانا ،،،)
هيا بخوف ،،،( الله يستر عليهم ،،،والله ان قلبي ناغزني ،،،)
مشاري يطمنها ( أنتي موسوسه ،،، ما فيه إلا الخير ،،،ووجهه زين ،،،)
هيا باهتمام ( ان شاء الله ،،،جعل ما فيه إلا الخير ،،،)
في سيارة متعب
هند تكلمت ( يبه ،،، اشلونك ألحين ،،،)
التفت عليها ،،،( طيب وبخير ،،، لا تخافين ،،، لو فيني شي كان رجعنا الرياض ،،،)
تاخذ نفس ( الحمدلله ،،،)
هنوف لازالت متضايقه ،،،( يبه ،،،جنطة الدوا وينها ،،، مو هنيه)
متعب يتذكر ،،،( دوريها عندك ،،،وإلا تحت السيت ،،،)
هنوف تدوره ( ما لقيتها ،،،هند شوفيها عندج ،،،)
دورته هند ما لقته ،،، ( ما لقيتها ،،، يبه وينها كانت في إيدك ،،،)
متعب يتذكر ،،،( لا حول ولا قوة إلا بالله ،،، حطيتها فوق السياره ونسيتها ،،،يمكنها طاحت يوم مشينا،،،)
ارتبكت هند ( يبه ،،، شلون ،،،؟)
متعب يطمنها ( معليه ،،،بكره إن شاء الله بنروح اندورها ،،،)
هنوف بخوف ،،،( لا يبه تكفا ،،، شلون بتاخذ علاجك الليله وباجر الصبح ،،،)
هند بخوف ( يبه ما يصير تأخر ولا حبه ،،، مو زين عليك ،،،)
متعب بقلة حيله ( وش السواه ،،،)
هند بهدوء ما تبي تربك أبوها ( يبه إلحقهم ووقفهم ،،،علمهم إنا بنرجع ،،،)
متعب يشوف السيارات ابعدت مره ،،، وغبرتها ثايره ،،،مستحيل يشوفونه وإلا يوصلهم
( ما نقدر نوصلهم ،،، الارض وعره ومحنا بلاحقينهم ،،،)
هنوف العبره خانقتها ( يبه ما تدل ،،،)
*******************************
وصلت السيارات المخيم تقريبا الساعه ثمان ،،،
اللي راح مخيم الرياجيل ،،، واللي راح ينزل مع أهله أغراضهم ،،،
أبو سلطان وأبو فهد وأبو طلال يتقهوون في بيت الشعر ،،،
طلال وسلمان مجهزين العشا لين يوصلون ،،،
سلمان يقهوي أبوه (عسى ما تعبتوا ،،،)
أبو فهد ،،،( ما تعبنا ،،، بس تكسرت ظهورنا ،،،)
ضحك سلمان ،،،( إلى أصبحنا وشفت الربيع ،،، سلمت وتعافيت ،،،)
أبو فهد ( الله كريم ،،،)
***************************
مخيم الحريم
نواف ينزل الاغراض لجدته ،،،
أم سلطان مستغربه هند ما جات تساعدها( نواف عمك متعب جا ،،،)
نواف اقرصه قلبه والتفت على خيمتهم ،،،( يمكنه نزل البنات وراح لبيت الشعر ،،،)
أصفقت أم سلطان ايدينها في بعض ،،،( والله ما جو ،،، ) وراحت لخيمتهم ما لقت أحد
اطلعت ومسكت نواف ( نواف يا ولدي عمك ما وينه ،،، )
ركض نواف لجيب جده وطار بدون تفكير بين السما والقاع ،،،
أم سلطان تصوت للجازي ،،،( الجازي الجازي ،،،)
الجازي وفهد وبناتها اركضوا لها وكل اللي في الخيام اطلعوا
الجازي بخوف ( يمه وش الجاري ،،،)
أم سلطان تضرب رجلها ،،،( متعب يا الجازي ،،،)
التفتت الجازي على فهد بخوف( متعب وينه،،،)
فهد ارتبك ،،،( يمه ،،، متعب فيه شي ،،،)
أم طلال بخوف عليهم ( أم سلطان ،،، ردي علينا ،،،وش جرا لهم ،،،)
أم سلطان تصيح ،،،( ما أدري ،،، متعب ما جا ،،، ونواف راح يدوره ،،،)
أم طلال بخوف ،،،( نواف ما يدل ،،،)
فهد يطمنها ،،،( معه ماجلان ،،،) ويأشر للشباب يروحون معه
راحوا لبيت الشعر ،،، شافوا إنه هادي ،،، يمكنهم ما دروا ،،،
فهد يكلم طلال وسلمان ،،، ( تعالوا أبيكم ،،،)
أبو سلطان ( فهد منين جايين ،،،)
فهد ( من مخيم الجماعه،،،)
أبو سلطان ،،،( متعب وينه ،،، ما شفته وراك ،،،)
فهد بهدوء ،،،( ما شفته ،،،)
أبو سلطان يصوت لسلمان ،،،( سلمان روح صوت لمتعب ياتي للعشا ،،،)
فهد يكمل كلامه ( يبه ،،، متعب ما جا ،،،)
حذف أبو سلطان فنجاله في الضو ،،،وفز سلمان
سلمان بعصبيه ( كيف يعني ما جا ،،،؟)
فهد متضايق ( ما جا وراح نواف يدوره ،،، )
عصب سلمان زياده ( الله يلعنكم ويلعن خوتكم ،،،)
وركب سيارته وطار ورا نواف ،،،
أبو طلال ركب بسيارته على ضلع قريب منهم وولع الفلاش ،،،
أبو سلطان أمرهم يشبون ضو على الضلع ،،،ويكثرون الحطب عليه ،،،عشان يشوفون مكانهم إذا كانوا مضيعين ،،،
طلال بين أمه وجدته ،،،وجده ،،،خايف عليهم
الحريم متجمعات في خيمة أم سلطان ،،،
أم سلطان ولقفه برا ما دخلت تستغفر وتهلل ،،،
الجازي مع أمها ،،، البنات مره يطلعون لها ومره يدخلون من البرد ،،،
******************************
يتبع ،،،،
|
25-04-10, 12:56 PM
المشاركة رقم: 61
العرض العادي
