كاتب الموضوع :
الراكدة
المنتدى :
الارشيف
الفصل الخامس عشر
****************
ارجعت هند وأبوها الرياض بعد إجازة العيد عشان دراسة هند ،،،
هنوف جلست عند خوالها،،،ووعدتهم إنها تجي عرس مضاوي،،،
مضاوي لازالت تجهز لزواجها ،،،اللي ما بقى عليه إلا ثلاث أسابيع ،،،،
هند وهنوف مصممين فساتينهم في الكويت عند مصمم لبناني مشهور ،،،
هند تكلم مضاوي ( اليوم موعد بدلتج ،،،متى تروحين ،،،)
مضاوي تأكد عليها ( اجهزي الساعه 4 العصر ،،،عشان عندنا مشاوير كثيره)
هند تحرص عليها ( أوكي ،،، دقي علي بوقت )
مضاوي ( أوكي ،،، مع السلامه ،،،)
هند ( مع السلامه )
طلال كان جالس يناظر التلفزيون ،،،( من تكلمين ،،،)
مضاوي تضحك وتغمز له ( يعني ما تدري ،،،)
طلال ابتسم ( ما دري ،،، بس قلبي زادت دقاته ،،،)
ضحكت مضاوي ( ما شاء الله ،،، كل ذا حب لهيا ،،،)
كشر طلال ( هيااااااااااااااااااااا)
مضاوي تضحك بصوت عالي ( هههههههههههه،،،لا أضحك معك ،،،تراها هند ،،،)
طلال يضحك ،،،( وش تبي ،،،بتروحون مكان ،،،)
مضاوي بتفكير ( إيه بنروح ،،، وش رايك تودينا ،،،)
طلال مبتسم ( والله ودي ،،، بس وش الفايده وأنتي معنا ،،،)
مضاوي تمثل الزعل ( يعني أنا عذول ،،،)
ضحك طلال ( لااااااااااااا محشومه بنت سلطان ،،،)
مضاوي بمكر ( عندي لك خطه ،،، بس أخاف تزعل هند)
ابتسم طلال ( وش خطتك ،،،)
*********************
في الكويت
تهاني وهنوف في الأفينيوز ،،،
هنوف تشتري لها جزمه وساعه وبعض فساتين الاستقبال ،،،،،
تهاني تأشر على جزمه عجبتها ( هنوفه شوفي هاذي حلوه مع بدلتج ،،،)
هنوف تفحصها ( شكله مو مريح ،،، )
تهاني تقنعها ( إنتي شوفيه والبسيه ،،، حكمتي عليه من شكله،،،دايما مستعجله ،،،)
هنوف تضحك ،،،( هههههههههه ذكرتيني بابوي ،،،،)
تهاني تكلم البياع اللبناني ( لو سمحت 37 )
جاب لها الجزمه وقاستها ،،،( إممممممم مريحه نوعا ما ،،،خندور يمكن نلقا أحلى )
اللبناني ( ما شا الله ،،،حلوه عرجلك ،،،ما بتلائي زيها )
هنوف بعصبيه ( ما ني شاريتها ،،،) وتنزلها وتطلع
تهاني تلحقها ( اش فيج خبله إنتي ،،،)
هنوف بعصبيه ( يا ملا عينه البط ،،،اشحقه يطالع رجلي )
تهاني تضحك ( هههههههه وإنتي اشعليج منه اشتريها واطلعي ،،،حرام اتطوفينها حلوه،،،والله ما تلقين مثلها ،،،مناسبه حيل لبدلتج )
هنوف بجديه ( والله ،،،حتى لو ما ألقى غيرها ما راح أشتريها ،،،)
تهاني مستمره بالضحك ( منتي صاحيه ،،،)
فروا الأفينيوز ما لقوا شي يصلح لبدلتها ،،،
وقرروا يروحون السالميه ،،،لأن مجمعاتها كثيرة وأكيد راح يلقون جزمه مناسبه لبدلتها ،،
بعده راحوا يتغدون في أحد مطاعم السالمية المشهوره ،،،
*****************************
فلة عمهم سالم
الجازي ونوره ،،،ساكنين في بيت واحد ،،،عند عمهم أبو سالم ،،،
عمهم وزوجته ما عندهم بنات،،،لكن الله رزقهم ببنات عبدالله عند عيالهم الكبار فهد ومبارك
الجازي مرت فهد الكبير ومسؤولة عن البيت والعيال ،،،لدرجه إن فارس وعبدالله وبدر ،،،يعتبرونها مثل أمهم ،،،لأنها لما تزوجت فهد كانوا صغار ،،،
دلال جالسه تقهويهم ،،،
دلال تكلم أمها ( يمه ،،،ترا مضاوي وهند بيمروني ،،،نروح للمشغل ،،،)
الجازي ( إن شاء الله ،،، متى بيجون ،،،)
دلال ( الساعه 4 ،،،)
أم فهد تذكرت ( الجازي ،،، ما كلمتي هند عن اختها ،،،)
فارس كان جالس يسمعهم ( ماله داعي تكلمها ،،،البنت رافضه ،،،)
الجازي تلتفت عليه ( رفضت ،،،وش دراك ،،،)
فارس بهدوء ( متعب يقوله ،،،)
الجازي تاخذ القهوه من يد دلال ( معليه ،،،إلى جات كلمتها ،،،)
أم فهد بزعل ( لا تكلمينها ولا شي ،،، اللي ما يكتب عسر ،،،كلمناه عشان هند وعطاها طلال وذلحين هنوف يقول رفضت ،،،نصيبه مهوب موقف عند بنات متعب)
فارس عصب ( يمه الله يهديك ،،، هذا قسمه ونصيب ،،،والمزوج في السما ،،،تعترضين على أمر ربك )
أم فهد متحسفه ( ونعم بالله ،،،اللهم اني استغفرك واتوب اليك ،،،)
نوره تغير الموضوع ( فارس ،،، ما شفت سلوم وينه ،،،)
فارس يقوم رايح المجلس ( إلا ،،،قبل شوي يلعب مع ربعه كوره )
نوره تلعنه هو والكوره ( الله يلعنه هو وذا الكوره ،،، صوت له معك ،،،ما يشبع من ذا الكوره ،،،)
الجازي بعصبيه ( تلعنين ولدك عشان كوره ،،،الله يهديك ،،،)
نوره معصبه ( أنت ما تدرين ،،،قام من النوم ما ذاق شي ،،،وراح يلعب كوره )
أم فهد بعصبيه ( لأنك أمه ،،، يوم قام ما لقى شي قدامه ،،،قومتيه ورحتي )
نوره بعصبيه ( يمه ،،،ما قام إلا على صلاة الظهر ،،، وبعدين مهوب بزر رجال عمره 12 سنه ،،،يروح للشغاله تعطيه ،،وإلا ينتظرني أخلص من صلاتي وعطيه )
الجازي تاخذ نفس ( ما صار إلا الخير ،،، بنحط الغدا بعد شوي ،،، قومي يا دلال صوتي له)
****************
وصلوا البنات المشغل ،،،وكانت هيا في انتظارهم ،،،،
هيا بعصبيه ( كان تأخرتوا بعد ،،،أنتوا ما قلتوا الساعة 4 )
مضاوي تضحك ( مرينا دلال وأخرتنا ،،،)
دلال تفتح عيونها ( كذابه ،،، والله اني لابسه عباتي من الساعه 3 )
هيا وهي لازالت معصبه ( أنا داريه إن البلا منها ،،، الاخت تحسب اني جايه مع سواق ،،،مشاري كل شوي يتصل علي ،،،ورانا مشاوير )
مضاوي مبتسمه ( وأنا أقول ليه معصبه ،،، أثرك تأخرتي على حبيب القلب )
هيا بابتسامه واسعه ( إي والله حبيب القلب ،،، يالله اخلصي علينا)
لبست مضاوي فستانها ،،،كان روعه عليها ،،،
( هاه وش رايكم ،،،)
هند تلف حولها ( روعه ،،،بس فيه شي )
هيا بتعب ( يووووه وش فيه ،،، والله ما فيه شي ،،،)
مضاوي بخوف ( إحلفي فيه شي ،،،)
دلال ( ألحين بتجننا مضاوي ،،،قولي وش أنت شايفه )
هند تضحك ( اشفيكم ،،، كليتوني ،،،فيييييييييييه)
كلهم مع بعض ( إييييييييييييييييييييييييييييييه)
هند لازالت تضحك ( فيه مضاوي )
مضاوي بعصبيه ( الله ياخذك وقفتي قلبي ،،،)
هيا ودلال يضحكون عليها،،،
هيا استأذنت وطلعت بعد ما تطمنت على فستان اختها ،،،
مضاوي غيرت وطلعت عليهم ،،،
طلعت مضاوي باقي فلوس الفستان ،،،( هند ،،،اخذي،،،أنا دخت ،،،بروح أنا ودلال نجلس في السياره على ما تدفعين وتجين)
هند بخوف ( اسم الله عليج ،،،فيج شي )
مضاوي بتمثيل ،،،( لااااااا،،،بس دوخه ،،،لا تخافين )
هند ( خلاص روحي ،،،بدفع وجيكم ،،،نروح للبيت)
دلال مصدقتها ( يعني ما فيه مشاوير ثانيه ،،،)
هند ( خلاص نكمل مشاويرنا باجر)
طلعوا مضاوي ودلال ،،،
توجهت مضاوي لسيارة طلال ،،،ووراها دلال ،،،
دلال مستغربه ( مضاوي سيارة السواق مناك )
مضاوي مستعجله ( إمشي بسرعه وإنتي ساكته ،،،)
دلال بعصبيه وهي تمشي وراها ( وين أمشي ،،،؟)
مضاوي تجر يدها ( إركبي وأفهمك ،،،)
ركبت دلال ووراها مضاوي بسرعه ،،،
مضاوي تكلم السواق ( إمش بسرعه،،،)
دلال توقفه ( لحظه لحظه ،،،مجنونه إنتي ،،، هند وينها ،،،نسيتيها )
مضاوي تضحك ،،،( لا ،،،بس مسوين فيها مقلب حلو ،،،)
دلال باستغراب ( مقلب ،،، وشو ،،،)
مضاوي قالت لدلال عن المقلب ،،،
دلال برحمه لهند ( يالشريره ،،إنتي وأخوك ،،حرام عليكم ،،،)
***************************
طلعت هند من المشغل ،،،واتجهت للسياره ،،،كانت سيارتهم جمس مغيم ما يبان اللي داخله ركبت السياره بعجله خايفه على مضاوي ،،،وبصدمه وخوف بدون لا تناظر السواق ( وين مضاوي،،،،؟ )
ضحك طلال ،،،وشهقت هند وحطت راسها على الكشن اللي قدامها ،،،
طلال بخوف نزل من السياره ،،،وراح صوب بابها وفتحه ( هند ،،، فيك شي )
هزت راسها بلا ،،،وهي لازالت منزلته وبهدوء( وين مضاوي ،،،)
طلال تضايق من تصرفها ( مضاوي راحت هي و دلال مع السواق ،،، ارفعي راسك )
هند ما تبي ترفع راسها ،،، وبحزن ( ليش راحت وخلتني ،،،)
طلال بحزن لأنه فهم من كلامها إنها ما تبي تشوفه ( تبي تخلينا على راحتنا ،،،)
هند صدمت طلال بردة فعلها ( ممكن تردني البيت ،،،)
طلال ما تكلم من الصدمه ،،، سكر الباب بهدوء ،،،وركب السياره ومشى ،،،
هند نزلت دمعه من عينها غصب عنها ،،،تضايقت من تصرف مضاوي ،،،ليه يبوني أكلم ولدهم ،،،وأجلس معه وأتمشى ،،،وهالشي هم نفسهم ما يسوونه ،،، ليش ،،، يعني أنا ما لي أم تردعني وتوجهني ،،، بس هو حلال ،،،حتى لو كان حلال ،،،المفروض اللي ما يرضونه لنفسهم ما يرضونه لغيرهم ،،،،
طلال كان منصدم وعقله ما موقف عن التفكير ،،،هل هالتصرف صح وإلا لا ،،،وهي ليه ما تبي تشوفني ،،، أكيد فيها شي ،،، وتذكر ،،،،حتى لما قلت لها بكلمك مره ثانيه لما ترجعين من الكويت ،،، ارفضت ،،،وقالت خل اللي بينا رسايل ،،، ليه معقوله كل هذا سحى ،،،وإلا ما تبيك يا طلال ،،، الله يكون في العون،،، الظاهر ما لي حظ ،،،
وصلوا الفله ،،،ونزلت بهدوء ،،،كانت متضايقه ،،،
نزل طلال وراح للمجلس ،،،وارتاح لأنه ما لقى أحد ،،،
وجلس يفكر ،،،باللي صار،،،
دخلت هند لقت جدتها ،،،وعماتها الجازي ونوره ،،،يتقهوون،،،
أم سلطان ،،،( مرحبا ،،، ما أسرع جيتوا ،،،)
الجازي مستغربه ،،، ( ما عندكم مشاوير ثانيه ،،،)
هند تسلم عليهم ( لا ،،، أنا عورني راسي ،،، ورجعت ،،،وهم راحوا يكملون مشاويرهم )
أم سلطان تحط يدها على راس هند ( اسم الله عليك ،،،خذيتي حبوب راس )
هند بابتسامه ( خذيت ،،،يا عمري ،،،لا تخافين)
نوره تبتسم لها ( وين بعض الناس يشوف ذا الابتسامه الحلوه )
الجازي تضحك ( عشان يحط عرسه مع عرس راشد ،،،)
نوره تضحك ( لونا ذلحين حضر ،،،كان تجلس معه وتطلع ،،،ما عليها من أحد )
الجازي ما تأيد ذا الشي ( يا شينها ،،، من عاده ،،، وين الحيا راح ،،،)
نوره تقلد الجازي ( يا شينها ،،،يعني ما أنتي مخليه دلال تجلس معه وتمشى هي وياه )
الجازي بخوف ( اسم الله على بنتي ،،،وحتى لو رضيت أبوها بيعيي وعمانها بينقدون عليها)
هند تبتسم بسخريه على اللي صار معها اليوم ،،، وقامت ( عن إذنكم ،،، بروح أغير وأرتاح أحس راسي بينفجر )
**********************
مضاوي ودلال يدورون في أسواق الرياض يكملون اللي ناقصهم ،،،،
دخلوا محل باريس جاليري تشتري شوية عطور ناقصتها ،،،
خذت لها كم عطر ،،،تذكرت مضاوي( بقى عطر نسيت اسمه قايله لي عنه هند ،،،)
دلال تناظر الساعه ( اتصلي فيها ترى تأخرنا ،،،)
مضاوي تبتسم ( أخاف إنها مع حبيب القلب ،،،)
دلال تعاتب مضاوي ( الصراحه موقفك سخيف،،،هند تستحي ،،،)
مضاوي تضحك ( بتشكرني عليه ،،،)
اتصلت مضاوي مره ومرتين وثلالث ،،،ما ردت هند ،،،
دلال ( يمكن مستحيه تكلم قدامه ،،،)
صوت نغمة مسج ،،، في جوال مضاوي ،،،
المرسل (( هنوده ))
ول يا كبر القهر لا صار ما باليد حيله..
والجرح من القرايب والخطا مني وفيني !!
إن نويت أشفي غليلي ما لقيت أية وسيلهـ..
كيف أبلقى دام جرحي سبتهـ طعنة يميني؟!
***نصيحه من إخت لإختها***
لا تنسين هذا الحديث الشريف
***لا يؤمن أحدكم حتي يحب لأخيه ما يحب لنفسه***
مضاوي تناظر الجوال وتناظر دلال بصمت ،،،
دلال خايفه ( وش فيك ،،،) وتاخذ الجوال منها ،،،
دلال بعصبيه ( ما قلت لك هند مو من هالنوعيه ،،،ألحين زعلت علينا كلنا ،،،الله يسامحك)
مضاوي والدمعه في عينها ( والله ما قصدت أضايقها أحسبها بتفرح )
دلال بضيقه ( تفرح وهي تقول جرحي سبته طعنة يميني ،،،تدرين من يمينها ،،، حنا أهلها)
وتكمل بعد ما تنهدت ( انصدمت فينا ،،،والله ما تنلام ،،،اللي ما نرضاه على نفسنا المفروض ما نرضاه على غيرنا ،،، وخاصة خواتنا ،،،)
مضاوي دموعها ما وقفت من قرت المسج ،،،خذتها دلال وطلعوا من المحل ما شروا شي ،،،
***************
هند بعد ما راحت ترتاح وشافت اتصال مضاوي ،،، ما حبت ترد عليها ،،، وارسلت لها مسج العتاب ،،، خلها تعرف غلطها ،،،
بعد تفكير ارسلت لاختها ،،،
احتاجلك لا ضيق الوقت صدري
أبيك تمسح عن عيوني شقاها
وأحتاجلك إذا الفرح ضم فجري
ودي تحس بفرحتي يا هناها
أبيك تسأل عن حياتي وتدري
عن ضحكت أيامي الوافي عناها
أحتاجلك في كل لحظه بعمري
لاصرت روحي كيف بحيا بلاها
دق جوالها ،،،المتصل توأم روحي ،،،ردت بسرعه ،،،
( هند ،،،فيج شي ،،،)
هند بضيقه ( لازم اتكلم معاج ،،،لأن ما لنا غير بعض )
هنوف بخوف ( ليش ،،،أحد قايل لج شي ،،،وين أبوي)
هند توضح لاختها ( أبوي اشتبين فيه ،،، هنوف مو كل شي يصير نقول لابوي عنه ،،،ترى أبوي ما يستحمل )
هنوف خايفه ( زين ،،،اشصاير )
تنهدت هند وقالت لها اللي صار ،،،
هنوف بصدمه ( وطلال اشموقفه ،،،بعد اللي سويتي فيه ،،،)
هند بضيق ( انصدم ،،، وما تكلم أي كلمه ،،،ليما وصلنا البيت ،،،)
هنوف تعاتب اختها ( ردت فعلج مو طبيعيه ،،، وإلا وحده تسوي سواتج )
هند تفهم اختها الوضع (هنوف إحنا لما كنا عند خوالي،،،كان فيه ناس يرضون إن بناتهم يكلمون أزواجهم ويقعدون معهم ومحد ينقد عليهم وبعضهم ما يرضى وما له شغل بغيره،،، لكن هنيه الوضع غير،،عند عمامي محد يرضى بنته تقعد مع زوجها ولا حتى تكلمه)
،،،وبعصبيه (ليش يرضونها علي ماني بنت من بناتهم )
هنوف كأنها بدت تفهم ( تفكير معقول ،،،بس اهدي)
هند بحنان لاختها ( هنوف ،،أنا مابي باجر انصير علج في حلج اللي يسوا واللي ما يسوى ،، ولا أبي نصيرلعبه في يد أحد ،،،لازم كل واحد يوقف عند حده ويلزم حدوده،،، أبي إذا قالوا بنات متعب خوالهم الـ........،،،يقولون ونعم التربية ،،،)
هنوف منصدمه ( هنوده جدتي نفسهم ،،،)
هند بهدوء وخايفه من هالشي ( هنوف جدتي ،،،وجدي وعمي سلمان وسلطان ،،،أنا عشت معهم فتره بسيطه ،،،لكني أقدر أقول لج إني لولاهم كان رجعت للسكن ،،، حبهم لابوي يفوق الوصف ،،،عشان جذيه مكانتنا عندهم غير ،،،تدرين إني لما رديت من الكويت ،،،لمتني جدتي وصارت تصيح ،،،وتقول ليش ما جبتوا هنوف معكم )
هنوف تمسح دموعها ( يا قلبي عليها ،،، هند عماتي ما يحبونا )
هند تاخذ نفس ( أنا ما قلت ما يحبونا ،،،بالعكس أحس إنهم يحبونا حيل ،،،لكني خايفه أنصدم منهم ،،،عشان جذيه لازم آخذ حذري مع الكل،،،وترى حتى مضاوي وهيا وأهلنا كلهم ما شفت منهم شي ،،،بس هالموقف ،،،ويمكن أنا تفكيري كبير شوي ،،،وهي ما كانت تقصد ،،)
هنوف بعجله ،،،( أكيد ما تقصد مضاوي طيبه ،،،)
هند تنهد ( هنوووف ،،،أنا اشقلت ،،، إذا كانت ما تقصد ،،،لازم تعلم ما تعودها ،،،ولازم كل واحد يوقف عند حده )
هنوف تعاتبها ( صار تفكيرج تفكير عجوز ،،،)
هند تضحك ،،،( معليه ،،،أحسن ،،،عشان كل واحد منهم يحسب لي ألف حساب )
هند عندها حكمه وسرعة بديهه ،،،يمكن لأنها مربيتها جدتها ،،،أم خالها محمد ،،،يعني كانت مرت جدها ،،،لكن لما مرضت أمها رضعتها وبعد ما ماتت هي اللي تولت تربيتها ،،، فاكتسبت منها الخبره والحكمه ،،،وعلمتها ان الحياة ما تصفى لحد ،،،يوم عدله ويوم منعوجه ،،، فلازم الواحد ياخذ حذره من كل شي حوله ،،،هند ذكيه وعاقله ،،،ما عمرها كانت الطفله الساذجه الغبية ،،، فدايما يقول لها أبوها ،،أنتي أمي ،،
بعد ما خلصوا مكالمتهم وسكرت هنوف ،،،ارتاحت هند من هالمكالمه ،،،لأن مهما صادقت من بنات عم وإلا خوال وإلا زميلات دراسه وعمل ،،،ما فيه مثل الإخت ،،،هي اللي تفهم اختها ،،،وما ترضى شي يخدشها أو يضايقها ،،،ومهما غلطت الاخت بتظل إخت ،،، مستحيل تغير عليها وإلا تزعل منها ،،،
**********************
فلة أبو طلال
من ناحيه ثانيه ،،،مضاوي دخلت فلتهم وهي شبه منهاره ،،،
سمعت صوت أهلها متجمعين في الصاله ،،، امسحت دموعها ،،،وما نزلت نقابها ،،،
ودخلت،،،( السلام عليكم ) صوتها متغير
ردوا السلام ،،،ناظرها أبوها ( مضاوي فيك شي ،،،)
جلست بهدوء ( لا يبه ،،، بس راسي يعورني ،،، عن إذنكم بروح أرتاح ) وتناظر طلال
طلال فهم نظرتها يعني تعال وراي ،،، راحت غرفة طلال على طول ،،،
انتظر طلال شوي ،،،( عن إذنكم ،،،) وقام
دخل عليها في غرفته بعد ما مر غرفتها وما لقاها ،،،
( خير ،،، وش عندك ،،،)
مضاوي مدت له الجوال ،،،بعد ما فتحت الرساله ،،،
خذا الجوا وقرا الرساله ،،،رفع راسه لاخته (وش قصدها ،،،)
مضاوي تصيح ( والله ما قصدت شي ،،،)
طلال تضايق من تفكير هند ( لا تصيحين ،،، هي تفكيرها مريض )
مضاوي تهدا ( لا طلال ،،، أنا غلطت ،،، مهوب عشانك أخوي أرضى بالغلط ،،والله لو تدري أمي وإلا أمي وضحه ،،،إن يذبحوني ،،،كيف فكرت بهالشي)
هز راسه بالموافقه ( المفروض يكون تفكيرها أكبر من كذا وتعتبرها مزحه ،،،لكن الظاهر إني تزوجت طفله ،،،تصرفها ما عجبني اليوم )
مضاوي وهي لازالت تصيح ،،،( آسفه والله آسفه ،،،)
طلال يمسح على راس اخته وهو مبتسم ( ما عليه ،،،ربك بيزينها ،،، قومي اغسلي وجهك ،،،العروس المفروض ما تبكي ) ويضحك ( بعدين تخرب بشرتك ،،،)
ابتسمت مضاوي وطلعت ( الله يوفقك ،،،)
ابتسم لها ،،، ويوفقك ،،،
*********************
بعد أسبوع من الحادثه ،،،
طلال ما فكر يرسل لهند أي رساله لأنه كان متضايق من تصرفها وتفكيرها ،،،مضاوي ما علمت هيا باللي صار ،،،حاولت تجلس مع هند تكلمها لكنها دايما تعذر إنها بتجلس عند جدتها ،،،دلال تتصل على هند وما ترد عليها ،،،
قررت مضاوي إنها تعلم هيا إذا زارتهم حتى لو خانقتها ،،،
وقررت دلال إنها تعلم أمها لأنهم بيزورون فلة جدهم اليوم ،،،
يوم الخميس اتصلت دلال على مضاوي وقالت لها إنها علمت أمها ،،،وإنها بتصرف
وصلت هيا لأهلها من الظهر تبي تغدا عندهم وتعشا ،،،
بعد الغد راحت هيا تنام في غرفتها ،،،ودخلت عليها مضاوي ،،،
( خير وش تبين ،،،اطلعي بنام دام توبي نايم ،،،وخلي روابي عندك ،،،)
مضاوي عيونها دمعت ( بتكلم معك شوي ،،،)
ضحكت هيا تحسبها تصيح عشان عرسها قريب ،،، (تعالي )
صاحت شوي وهيا تهديها ،،،عقبه قالت لها اللي صار ،،،
هيا بعد صمت طويل ،،،( تبونه يطلع معها ويرجعها للبيت قدام الناس ،،،) وباستهزاء ،،،(عادي عندكم ،،، والله ما لومها فيكم ،،، والله لو وحده فيكم ،،، ما ترضى باللي صار ،،،ويمكن أهلها يقومون الدنيا ويقعدونها ،،،هذا وأنتوا متربين على العيب والمنقود ،،،سويتوا كذا ،،، أجل لو أهلكم ،،،غير ،،، وش بتسوون )
مضاوي ،،،( والله ما كان قصدي ،،، كنت بسوي فيها مقلب بس ،،، وأيدني طلال ،،،حتى طلال زعلان من تصرفها )
هيا بضيق ( طلال الرجال العاقل ،،، ما عاد حد فيكم يعرف المنقود )
وتنهد ،،،( روحي ناديه لي ،،،)
مضاوي بخوف ( وش بتسوين ،،،)
هيا بعصبيه ( بكلمه قبل أكلمها ،،،طيرتوا النوم من عيني )
مضاوي تاخذ نفس ( ترى دلال علمت عمتي الجازي وبتكلمها اليوم ،،،)
هيا بقلة صبر ( خلااااااااص ،،،روحي نادي طلال،،،)
*********************************
فلة أبو سلطان
هند تغدا مع جدتها ،،،
هند وجها متغير من صارت لها السالفه وأكلها صاير خفيف ،،،نفسها منسده ،،،
أم سلطان ( وش فيك ما تاكلين ،،، يا أمي ،،،)
هند بابتسامه ( يمه حبيبتي ،،،كل هذا وما آكل ،،،)
أم سلطان ( وين كل هذا ،،، حتى وجهك مهوب زين ،،، قولي لي يا أمي ،،،فيه شي يوجعك )
هند بحب لجدتها ( يمه ،،،يا نظر عيني ،،،والله ما فيني إلا العافيه ،،،بس شوي دروسي صعبه وعندي هالأيام اختبارات ،،،)
أم سلطان بحنيه ( الله يوفقك ،،،ويسعدك ،،، )
دخل عليهم أبو سلطان ومتعب وسلمان ،،،متعب مبتسم( وأنا أقول وش ذا النور،،،أثر النور جاي منكم ) يكلم أمه وبنته ،،،
سلمان يجلس وهويضحك ،،،( بياع كلام ،،،)
هند تقوم تسلم عليهم وهي تضحك على كلام سلمان ،،، أبو سلطان يمسك يدها( هند ،،،إنتي مريضه ،،،)
ضحكت هند بعد ما شافت أبوها يناظرها ( إشفيكم علي ،،،ما فيني إلا العافيه ،،،بس إرهاق امتحانات ،،،من الصبح قاعده أدرس ،،،لأني العصر ما أقدر أدرس،،، بيجونا عماتي )
متعب لازال يناظر عيونها ( بكره الجمعه ،،،كان ارتحتي اليوم ،،،)
هند تاخذ نفس ( الاختبار صعب ،،،)
سلمان يبتسم لها ( وش فيها ،،،قمر،،،وجها أكبر من وجهي ،،،أنتوا بس اللي موسوسين )
متعب يمسكه من علباه ( قول ما شاء الله ،،،قوم اتفل عليها )
أبو سلطان وأم سلطان يضحكون ،،،سلمان منزل راسه ( ما شاء الله ) ويرفع راسه ( اتفوه)
هند تضحك عليه ،،،( لا أرجوك إلا هذا ،،،)
*********************
تجمعوا بنات أبو سلطان كلهم عند أمهم ،،،
طول ما هند تقهويهم ،،، وهي تحاشا تناظر مضاوي ودلال ،،، تضحك مع عماتها وهيا ،،،وعلى سوالفهم ،،، تعلق على جدتها ،،،
هيا كلمت عمتها الجازي ،،،قبل يجون لأنها عارفه باللي صار ،،،
أم سلطان تنادي الشغاله ،،،
فزت هند لها ( يمه اشتبين ،،،)
أم سلطان تمسك هند ( إجلسي ،،،أنتي تعبانه ،،، الشغاله بتجيب العشا ،،،)
هند تبتسم لها ( ما ني مسويه شي ،،، بس بشرف عليها ،،،)
راحت هند تشرف على تحضير العشا ،،،
الجازي تسأل أمها ( يمه وش فيها هند تعبانه ،،،)
أم سلطان ( يا أمك ،،، والله صاير لها كم يوم وهي تعبانه ،،، وما تاكل ،، ويوم نشدتها قالت عندي اختبارات صعبه )
الجازي ناظرت البنات ،،، بعده ناظرت هيا ،،،
هيا قامت بهدوء ،،، وأشرت لعمتها بيدها من وراهم ،،،
قامت الجازي وراحت وراها ،،،
هند كانت تحضر المواعين ،،، دخلت عليها هيا ( عاوزه مساعده يا حبيبتي ،،،)
ابتسمت لها هند ( مشكوره ،،، ما فيه شي ،،، كل شي جاهز ،،،)
عمتها الجازي بابتسامه لها ( دامك موجوده ،،أكيد كل شي جاهز ،،،)
ابتسمت لها هند ،،،
هيا تنهد ( هند )
هند فهمت ونزلت راسها ( نعم ،،،)
أشرت الجازي لها يعني اسكتي أنا اللي بتكلم ،،،
الجازي بهوءها المعتاد ( هند ،،،ارفعي راسك مهوب أنتي اللي تنزلينه ،،،و يسلم راس من رباك ،،،)
ارفعت راسها ودمعت عينها غصب عليها ،،،وكانت ساكته تنتظر عمتها تكمل ،،،
الجازي تكمل ( هند من جيتي وحنا كل يوم نكتشف فيك شي جديد ،،، زودن على حياك وأدبك ،،،وطيبتك ،،،عقلك وحكمتك وحسن التصرف عندك ،،، لما قالت لي دلال ،،،ولعلمك أنا وهيا تونا درينا اليوم ،،، عصبت وقلبت الدنيا عليها مع إنها ما درت بالسالفه إلا لما اركبت السياره ،،،لكنها المفروض ما تطيعها وتخليك ،،، وهيا ما قصرت في مضاوي و طلال ،،، ولازم تعرفين يا بنتي ترى اللي ما أرضاه لبناتي ما أرضاه لك ولا لأختك ،،، والله إن غلاكم من غلات أبوكم ،،،)
لمت هند عمتها وصارت تصيح ،،،
حست بقرب عمتها منها ،،،اللي لفت يدينها حوليها ولمتها بقوه ،،، هيا قلبها يتقطع عليها ودموعها ما وقفت
الجازي تكلمهم ( اذكروا الله ،،، )
سكتت هند ،،،( لا إله إلا الله ،،،)
هيا صوتها متغير ( هند ،،، مضاوي متحسفه وكل يوم تصيح ،،، سامحيها والله زودن على هم زواجها ،،، همك زعلك ،،، وطلال والله لو تشوفين وجهه كنه طالع من قبر ،،، )
هند منزله راسها ( هيا مضاوي اصدمتني بتصرفها،،،ولا تضايقت منه كثرصدمتي بشخصية طلال ،،، تدرين قبل يرسل لي في اليوم أربع أو خمس مسجات في اليوم ،،، ومن صارت هالسالفه ما أرسل ولا رساله ،،، حتى ما تشره علي ،،،ولا حب يستفسر ليش آنا سويت جذيه ،،، معقوله من أول مشكله يهجرني بهالطريقه،،،) تنهدت ودمعت عيونها (الله يسامحه )
هيا تعذر عليه ( هنوده حبيبتي ،،، أنا لما عرفت اليوم،، كلمته ،،،تدرين إنه زعلان ،،، يقول المفروض ما تشك ولا يكون عندها سوء ظن فينا ،،، حنا أهلها )
هند بهدوء ( وهذا بلا أبوك يا عقاب ،،، أنتوا أهلي المفروض اللي يمسكم يمسني ،،، هيا تخيلي لو إني كنت ساذجه وغبيه ورحت معاه ،،لا وبعد بدون علم أبوي ولقيت واحد من أهلنا وربعنا هناك ،،، وعرف طلال وشافني معاه ،،، ممكن يروح لابوي ويقوله أنا شفت طلال ومعه وحده ،،،وممكن أبوي ينصدم فيه ويظن فيه ظن مهوب زين ،،،وإلا يواجه طلال ويقوله إن اللي معاي هند ،،،شنو موقفي ذيك الحزه ،،، وإلا تخيلي ينزلني البيت وجدي وعيال عمنا في المجلس ،،،تدرين شبيقولون عن بنت متعب ،،،بيقولون جريئة وقليلة أدب وأصير علج في حلج اللي يسوى وما يسوى،،، هيا أنا غلطانه ،،،)
هيا منزله راسها ( والله ،،، ما كذبت عمتي الجازي يوم قالت إن حنا كل يوم نكتشف فيك شي جديد ،،،)
الجازي معجبه في بنت أخوها ( والله إن طلال محظوظ ،،،)
هيا تلتفت على عمتها ( عمه تكفين قولي ما شاء الله ،،، يكفي اللي مر فيه قبل )
الجازي تضحك ( ما شاء الله ،،، الله يهني طلال فيها )
هيا ( آمين ،،،)
انحرجت هند ،،،وابتسمت ( تأخرنا عليهم ،،،)
تعشوا وكل واحد اتجه لبيته ،،،
هند منسدحه على سريرها ،،، وتفكر بالكلام اللي دار اليوم ،،،،
سمعت صوت مسج
افتحته
المرسل ( ؟ )
لو بغيت آصد عنك ماقويت
وان بغيت أفارقك قلبى خفق
من يقول اني على هجرك نويت
قله انى قلبي بحبك محترق
وقله اني فى محبتك اعتليت
رافع الهامه على خد الشفق
وقله انى في بحر حبك رسيت
فوق مجداف الهواء قلبى غرق
سامحيني
هند متردده ترسل له ،،،وطولت وهي تفكر ،،،
لكن ما قوت ،،، وارسلت
***************************
طلال جالس على اللاب توب يكلم نواف ،،،،
( طلال إنت الغلطان وتزعل ،،،)
طلال كان متضايق بعد ما سمع كلامها من هيا ( توني أدري إني غبي ،،،)
نواف يضحك ( والله أنا من زمان قايل لك وما صدقتني ،،،)
طلال فاتح عيونه ( ترى سكت لك واجد ،،، لا تخليني أدعس على راسك ذلحين )
نواف لازال يضحك ( تعال إذا فيك خير ،،،)
طلال يضحك ،،،( والله إنك ضحكتني ،،،تصدق من زمان ما ضحكت ،،،)
نواف مبتسم ( يا خي فلها وربك يحلها ،،،)
طلال بصوت هادي ( وشلون أرضيها ،،، )
نواف مبتسم ( مشكله الأغبياء ،،، لازم يعني كل مره أعلمك ،،،)
طلال يضحك ( والله محد قالك تصير ذكي بهالأمور ،،، بالذات )
نواف يضحك ( والله محد فاهمني كثرك ،،، إسمع ارسل لها مسج حب وشوق ،،،)
طلال يرفع حواجبه وباستهزاء ( والله أرسلت من قبل ساعه ،،،وما ردت ،،،طالع فيها يعني ،، دور لي حل ثاني )
نواف يضحك ( ما شاء الله طلع عندك حركات ،،، خلاص وصل حبل من دريشتك لدريشتها ونط عليها بالغرفه ،،،)
طلال يضحك ( تخيل وش بيكون شعورها ،،،هي ما طلعت معي وسط الناس ،،،شلون أدخل عليها غرفتها )
نواف ( والله تفجر فيك ،،،خلاص احذف ورده في بلكونتها ،،،)
طلال ( هههههههههه،،،عبدالحليم حافظ ،،، اخلص علي أبي شي مفيد )
نواف يفكر ( لقيتها يا غبي ،،،أنا ما قلت إنك غبي ،،،ترى الغباء مسيس فيك )
طلال بقله صبر ( لا حول ولا قوة الا بالله )
نواف يضحك بصوت عالي ( اشتر لها هديه بذيك القيمه ،،، وارسلها لها مع مضاوي ،،،وخلها تكلم بلسانك )
سمع طلال صوت مسج
افتحه وابتسم ،،،
المرسل ( ضحكه ترد الروح )
نواف ( ضحكنا معك ،،،)
طلال يهز راسه
و تغير وجهه وزادت ابتسامته وتغيرت نفسيته 180 درجه ،،،
( نواف وجهك حلو علي ،،،)
نواف بابتسامه واسعه لأنه فهمه ( أدري من زمان ،،، طلال أحلفك بالله تقرا لي الرساله اللي غيرت وجهك لهالدرجه)
طلال بابتسامه ،،، وبحب وشوق قرا له الرساله ،،،
أنا تعلمت الهوى تحت يمناك..
درست معنى العشق حسب اختياري..
مبغاك تعشقني ولكني أبغاك..
لاضاقت الدنيا تصير داري..
وابيك لامني تزاعلت وياك
ترضي غروري قبل أجيب اعتذاري..
وابيك تدري لو أحاول بفرقاك
إني بحاول قبلها بانتحاري..!
*** مستحيل أزعل منك ،،،لكني أعتب عليك ***
نواف انصدم من كلمتها ،،، وضحك ( لااااا ما ألومك ،،، كلمتها الصراحه سحر ،،، لكن أحلفك بالله تشتري لها هديه كل الناس تكلم عنها،،، الله لا يحرمني من حنان هنوف )
طلال يضحك ( وش دخل هنوف بالسالفه ،،،)
نواف يتنهد ،،،( اختها أكيد إنها مثلها ،،،)
******************************
وصلت هنوف قبل العرس باسبوع ،،،
وكان في استقبالها أبوها وعمها سلمان ،،،
سلمان بفرح ( هلااااا ومرحباااا بدلوعة أبوها ،،،)
متعب يضرب سلمان على راسه ( احترم عمتك ،،،هاذي سمو الأميرة هنوف،،،)
سلمان يرفع له حاجب وهويسوق ( عفوا سمو الأميره ،،، ممكن أقدم معروض،،،)
هنوف تضحك ،،،( قدمه على وكيل أعمالي السيد متعب،،،وهو ينظر فيه ،،،)
متعب انصدم ،،،( أيا الي ما نيب قايل ،،،أنا أبوك وكيل أعمالك ،،،عجل وش خليتي لسلمان)
سلمان يستهزء فيه ( شفت هذا آخر حبك ودلعك الزايد لها ،،،)
هنوف تضحك ( سلمان وعمي سلطان خويا لعيالي ،،،،)
متعب يضحك ،،،،وسلمان باستسلام ( حاضر يا سمو الاميره ،،،)
وصلوا الفله ،،،وكان جدها وعمها سلطان قدامها ،،،
أبوسلطان ( يا مرحبا ومسهلا بهنوف،،،)
تحب راسه هنوف وخشمه ،،،( هلا يبه شلونك ،،،)
متعب وسلمان يضحكون ،،،( سمو الأميره يبه،،،)
وتسلم على عمها سلطان ،،،( شلونك يبه ،،،إن شاء الله بخير )
أبو طلال بحب ( يا مرحبا ،،،ابشرك طيب وبخير ،،،)
سلمان يبي يحرجها ( ما دريت يا بو طلال صرنا خويا لعيالها الأميرة ،،،)
هنوف فاتحه عيونه على سلمان ،،،وتكلم أبوها ( من قال هالكلام ،،،)
متعب فرحان ويضحك ،،،( ما أدري ،،،أنا ما سمعت شي ،،،)
سلمان يمسك يد أخوه ( احلف انها ما قالت ،،،)
متعب يلتفت على سلطان ( أحلف يا سلطان ،،،)
سلطان يضحك ( ما له داعي مصدقك ،،،هو الكذاب )
سلمان يلتفت على هنوف ( أنتي وش مسويه فيهم ،،،يالساحره،،،)
هنوف تضحك ( عامله لهم عمل ،،،)
ضحك عليهم أبو سلطان ،،،ويفرح إذا شاف عياله متجمعين ،،،ويضحكون وخاصة متعب ،،،وفي نفسه الله يخليكم لي ولبعض ،،،ويحفظكم من كل شر وعين،،،
****************************
يوم الجمعه الكل تجمع عند فلة أبو سلطان ،،، ما عدا عمتهم الجازي كانت مصخنه ،،،
ساره تاخذ أريج وتحطها في حظن هنوف ،،،( شفتي أروجه ،،،كبرت،،،)
هنوف تمسها وتشيلها ،،،لمتها بقوه وحبتها ( يااااااي تجنن،،،والله كبرت،،،)
أروجه تصيح ،،،ما تعرفها ،،،قامت ريم بنت نوره تاخذها ،،،( حرام مهيب متعوده تشوف وحده حلوه ،،،)
هنوف تضحك ( حرام عليك ،،،عمتي ساره حلوه ،،،إلا وين متعب)
دلال مستغربه ( من متعب ،،،)
هنوف مبتسمه ( متعب سمي أبوي ،،،)
دلال تضحك ( توبي ولد هيا ،،،)
هنوف ترفع حواجبها ( حبيبتي هذا متعب،،،سمي الغالي،،،لا عاد تقولين توبي يصير تروفه )
أم سلطان تسمعهم ( وهي صادقه ،،،لا عاد تسمون العيال بأسامي البنات،،،)
راحت دلال وجابت متعب من الشغاله ،،،
كان دمه خفيف ويضحك بوجه أي أحد بشيله ،،،
جلست هنوف طول اليوم تحبه وتقرص خدوده ،،،وتلعب معه ،،،وتصوره بجوالها،،،
وبعد ما راحوا المعازيم ،،،
هند وهنوف جالسات مع جدتها في غرفتها ،،،
هند منسدحه على السرير من التعب ،،، وهنوف جالسه على الكنب مع جدتها ،،،توريها وش جايبه لهم ،،،
هنوف ( يمه دهن العود ،،،والعود الازق لأبوي عبدالله ،،، وهالاساور لج دقه بحرينيه توها نازله ،،،)
أم سلطان عاجبتها دقة الأساور ( ما شاء الله ،،،هذا شي(ن) كايد )
تكمل هنوف ( والجاكيت ،،، لعمي سلمان ،،،حلو هابين فيه بالكويت وعشان يطلع فيه البر،،،)
أم سلطان تعلق ( حرام يا بنتي يلبسه في البر ،،،بيخرب،،)
هنوف ( لا يمه ،،،كلن متجمع في هالعطله ،،،خليه يكشخ عليهم ،،،)
أم سلطان بمدح ( الله يعطيك العافيه ما قصرتي ،،،)
هنوف مبتسمه ( ما سويت شي ،،،)
هند تستفسر ( ما جبتي لعمي سلطان ،،،)
هنوف تناظره بضحكه ( اشمعنى عمي سلطان اللي ذكرتيه ،،،ما ذكرتي أبوي وعماتي ،،)
أم سلطان تضحك ،،،هند مستحيه ( وجع ،،،والله مو قصدي ،،،)
أم سلطان تغمز لهند ،،،( وش عليك منها ،،،قولي أكيد هذا أبو طلال ،،،)
هند منحرجه ،،، وتأشر لاختها (أوريج ،،،)
هنوف مبتسمه ( جبت لهم كلهم ،،،لا تخافين ،،،)
********************
اليوم الثاني
متعب طلب من هند وهنوف يروحون معه لعمتهم الجازي يشوفونها ،،،
وراحت معهم جدتهم أم سلطان،،،
الجازي جالسه في الصالة تنتظرهم ،،،
دخل عليها فارس ،،،( السلام عليكم ،،،)
الجازي ( وعليكم السلام ،،،)
فارس يناظر في الحلويات والفطاير اللي على الطاوله،،،(بيجيكم أحد،،،)
الجازي ( أيه ،،،أمي وبنات متعب ،،،هند هنوف)
فارس ما علق ،،،( وين أمي والبنات ،،،)
الجازي ( راحوا يصلون وبيجون ،،،اجلس تقهوى مهوب جايين ألحين ،،،)
فارس بعجله ( صبيلي فنجال مستعجل ،،،)
خذاله فنجال وطلع ،،،
وصلوا لفلة عمهم سالم ،،، وكانت الجازي وبناتها في استقبالهم،،،
( هلا ومرحبا ،،،) وسلموا عليهم ودخلوا ،،،
أم فهد ( حيا الله أم سلطان ،،،،وشلونك وشلون أبو سلطان ومتعب )وتناظر هنوف
أم سلطان تاخذ الفنجال ( طيبين وبخير ،،، ما علينا إلا شكر الله )
بعد التحفي والسلام ،،، جلسوا البنات مع بعض ،،،والحريم الكبار مع بعض،،،
هنوف تضحك ( دلال ،،،هاذي جدتج ،،،ذبحتني بالخز ،،،)
دلال تضحك وتكلم بشويش ( تراها تحسر عليك ألحين ،،،وخاصة بعد ما رفضتي فارس ،،،)
هند مبتسمه ( الله يخليه لها ،،،)
دلال تنصحها ( هنوف ،،،نصيحتي لج ،،،والله ما تلقين أحسن من فارس ،،،طيب وحنون )
هنوف مبتسمه ( عشانه عمج تمدحينه ،،،)
دلال تحلف لها ،،،( والله العظيم مهوب عشانه عمي ،،، فارس أطيب من أبوي عندنا ،،،وإذا أبوي رفض لنا شي،،، ما شفناه إلا جايبه ،،،ولا يحب أحد يزعل عليه ،،،حتى ما ينام إلا يرضيه،،، يا ليتك تعرفينه والله ما ترفضينه )
أم سلطان تصوت للبنات ( مشينا يا بنات ،،،)
الجازي تحلف عليهم ( والله ما تروحون إلا متعشين ،،،ترانا مسوين عشا ،،،)
أم سلطان ( وشو له عشا ،،، جايين نشوفك ونمشي،،،)
أم فهد بعتب ( يا أم سلطان ،،،بنات متعب أول مرة يدخلون بيتي وما تبينا نعشيكم ،،،)
جلست أم سلطان مجبره ،،،
بعد العشا ،،،
راحت هنوف لمغاسل الضيوف ،،، تغسل وتعدل عشان يطلعون ،،،
نزلت طرحتها عشان تلم شعرها ،،، رافعه يديها على طول شعرها الناعم ،،،تبي تلفه ،،،
ما حست إلا بالباب اللي وراها انفتح وضربها بقوه ،،،
كان مستعجل يبي ياخذ جواله ويطلع ،،، ما حب يدخل من باب الصاله ،،، ففضل يدخل من باب المغاسل اللي يفتح على الباب الوراني ،،،ومنها على طول للدرج بدون ما يكشف الحريم فتج الباب بقوه ،،،وضرب في أحد
(آآآآآآآآي،،،)والتفتت وراها،،،
ناظرها ونزل عينه ( آسف ) قالها بهدوء ،،،وطلع وسكر الباب ،،،على طول ،،،
هنوف بصدمه نزلت يدينها ،،،وانفل شعرها ،،،
**********************
اتمن لكم قراءة ممتعة ،،،
مع خالص حبي
الراكده
|
23-04-10, 12:14 AM
المشاركة رقم: 56
العرض العادي
