الجزء الثامن عشر :~
( مستقبلي المجهول )
فلتأتي أيها المستقبل بفرحك و حزنك فليس هناك ما هو أسوأ من حاضري ..
أمجاد ,, الساعه 10
اتجهت للمطبخ بتعب و أنا شايلة الصينيه ,, دخلت و شفت أمي بوجهي ,, حطيت الصينيه بالمجلى و تكلمت : وهـ بس مت من التعب .
ردت أمي و هي عند الثلاجه : كله عشان رونق يهون ..
عضيت على شفتي لما تسللت لخاطري ذكرى رونق ,, انهبلت أبي أكون معه بهالليله ليلة عمره بس عرس رونق عرس رجال بس و حاطينه ببيتنا و أمي محتاجتن اليوم بالحيل ...
حتى ندى !!
ما قدرت تكون مع رونق بهالليله لأنه ما تقدر تترك بنات أسماء مع الشغاله ,, يعني صفت على عماتي هدى و نهى !!
: أمجاد .
التفت لصوت فيصل و رديت : لبيه ..
رد فيصل و هو يمشي بسرعه و بيدينه الدلال : خوذي املي هالدلتين بسرعه !!
أخذت الدلال من بين ايدينه و سويت اللي قال لي عليه ,, عطيته الدلال و رد علي فيصل : هاتيهن بسرعه العرّيس بيمشي .
جمدت للحظات بعد ما سمعت كلمته ,, يعني رونق بتروح للحفر ,, لا يا ربي ما أقدر أتحمل ...
جلست على طاولة المطبخ و حطيت راسي على الطاولة ,, عضيت شفايفي أمنع عبرتي تطلع و ما مرت ثواني إلا و دموعي بدت تاخذ طريقه على وجهي ...
ــــــــــــــــــــــــــــــــــــــــــــــــــــ
رونق ,,
كنت كل ما أمشي خطوه تتضح لي صورته أكثر ,, كان ملتفت للسياره و مورينا ظهره و ما بان إلا ثوبه الأبيض و شماغه ....
وقفت لما حسيت إنه ما يفصلن عنه إلا بضع خطوات لكن إيد خالد كانت أقوى من و سحبن لقدام أكثر ,, ثبتّ رجليني بالأرض أمنع الحركة و أنا ميته من الخوف لكن خالد كان يحاول يقدمن أكثر و مع احتكاك أقدامنا على الإسفلت و وشوشاتنا التفت علينا البدوي ..
نزلت نظري بمجرت ما شفت جسمه يلتف ,, و أصغيت سمعي للحديث اللي قدامي ..
خالد : هذي عروسك مبروك عليك ..
تكلم البدوي : الله يبارك فيك ,, حيا الله بنت العم ..
رفعت راسي لما حسيت به قريب من لكن اللي صدمن إنه سحب ايدي اليسار ,, تمسكت أكثر بثوب خالد و كأنه بيتقطع بين ايديني ..
سحبتن اليد السمراء لحد ما وصلت الجنب الثاني من السياره ,, فتح لي الباب و توجه لباب السواق ..
سمعت خالد يهمس : رونق اركبي ..
بلعت ريقي و تكلمت بصوت واطي : خالد تكفى ...
قطع خالد كلامي : توكلي على الله ..
لفيت للسياره و تعلقت أنظاري بالمرتبه العاليه ,, و باليد الكبيره اللي تسندت بهدوء على القير ....
التفت على خالد و دموعي بدت تاخذ طريقه على وجهي : خالد لا خلاص ماودي ..
ابتسم خالد و سحب ايدي و هو يهمس باذني : مطلق ميب ياكل ....
سحبت أكبر قدر من الهواء بصدري و تلاحقت بعده الأنفاس السريعه ..
استجبت لإيد خالد اللي تسحبن للسياره .. رفعت رجلي و ثبته و حاولت أركب لكني حسيت إن جسمي ثقيييل و موب قادره أشيله ,, ما كان إلا أقل من لحظه و حسيت إني استقريت على المرتبه ,, استوعبت اللي صار لي لما شفت ايدين خالد تنفك من خصري و سمعت ضحكات مكتومه من الانسان الغريب اللي جنبي ...
سكر خالد الباب و سمعت صوت خشن جنبي : الله يجزاك خير يا بو عبدالله ..
انزويت بأبعد نقطه عن الصوت الغريب و سمعت صوت ريحن : هاه عاد لا أوصيك على أخيتي ..
رد البدوي و ما كنت أشوف إلا إيده السمراء لأني منزله راسي : لا توصي ,, بنت العم بعيوني ..
رد خالد و ايده على كتفي : هذا العشم يا ولد عايض ..
رد البدوي : ما عليك زود ..
قرب خالد راسه لأذني و تكلم بهمس : تراتس منتب رخيصه بس إني داري إن الرجال اللي مثل مطلق قليل و أنتي تستاهلين كل خير ..
ما صدر من أي ردة فعل و لا حتى التفت لخالد لأني كنت عتبانه عليه بالحييييل ..
سمعت صوت البدوي يرد : شكلك منتب مخلينا نسري !!
علت ضحكة خالد و ملت السياره و رد : يله توصلون بالسلامه ..
رد البدوي : الله يسلمك ..
حسيت بخالد يبعد راسه عن الدريشه و السياره تتحرك ,, التفت بسرعه يمين و مالقيت خالد ,, التفت ليسار و تعلقت عيني باللي جنبي ,, رجعت ركزت نظري على قدام و أنا أشوف السياره تطلع من الحاره ..
هنا أمي و أبوي و محمد و هدى و عبدالرحمن و أسماء و خالد كلهم هنا و ذكرياتهم هنا بلعت ريقي و الغصه سدت حلقي !!
سمعت كلامه و تراجعت لأبعد نقطه عنه ....
مطلق : لا يضيق صدرتس يا بنت العم مالتس إلا الحشيمه ..
عضيت على شفتي و عيوني تدور لحظه عليه و لحظه على الطريق ,, أشوف السيارات تقل كل ما أبعدنا عن وسط القصيم ,, أبترك القصيم ,, لا لا ما أصدق و الله منتب رخيصه علي يا أرض أهلي بس الدنيا شييييينه ..
.
.
.
.
مطلق ..
من مشينا و أنا أشوفها خايفه بس ما سويت لها شي إلا كلمتين كنت أظن إنهن بيطمننها و خوفنها أكثر ,, أدري إني المفروض أتكلم معها أو حتى أسوي مثل أي معرس لكن البنت خايفه أبصبر لين أطلع برى الديره تكون هدت شوي ...
مسكت الطريق السريع ,, طريق القصيم الرياض ,, أبروح للزلفي و من الزلفي على الحفر و هذا الطريق المعروف للي يبي يروح من القصيم للحفر ..
حاس الدنيا ميب شايلتني من الفرحه ,, كنت حاط ألف حساب لرفض أهلها لكن الحمد لله ربي سهل كل شي ,, ابتسمت يوم شفتها بجسمها الصغير مستقره بأخر المرتبه و تكلمت : بردانه ؟
سمعت أو يورالي إنها قالت : لا ..
رديت : أنا رجلتس لا تستحين ..
ما ردت و اكتفت بالصمت ..
لفت نظري يدياتها اللي تفركهن ببعض و مديت ايدي و احتضنت ايدها البارده ,, حسيت برجفتها و رديت : لو تدرين هالقلب و شلون مستانس يا رونق ..
و تابعت لما شفتها التفتت علي ثم رجعت نزلت راسها : إلا تعالي وش هالاسم لتس !!
و كملت لما شفتها ترفع راسها عشان أطلعها من الخوف : وراه ما سموتس وضحى و إلا نوره و إلا نفله ..
.
.
.
.
رونق
كنت مرتبكه بشكل فضيع ,, لحد ما قالي عن أسمي ..
و رديت بسرعه : لاااا .
سمعت قهقته و رد : علامهن وضحى و نوره ..
رديت بحياء و أنا أحاول أكون طبيعيه : لا زينات بس اسمي زين .
رد و هو مركز عيونه على الطريق : زين بس غريب شوي .
رديت : أمي اللي مسميتن ..
رد : اييييه ..
من قولته ايه عرفت ان عنده خبر بجنسية أمي !!
مر الوقت و هو يسولف علي ,, أحيانا أنسى نفسي و أخذ و أعطي معه و أحيانا يغلب علي الحيا و أرد يا بإيه أو لا ...
كنت بين لحظه و الثانيه أرفع راسي و إذا شفته مشغول بالسواقه أتأمله ,, كان أسمر شوي و عيونه حاده ,, له عوارض و جسمه كبيييير قوه يعني جثل !!
ما أدري وشلون بديت أهوجس به ,, أخذتن الأفكار لتركي و بديت اقارن بينهم تركي جسمه رياضي و هذا جثل ,, تركي وسيم و ابيض و تارك بس الشنب اللي زاده حلا أما هذا أسمر و له عوارض و يخوف اذا ناظرن شكله كأنه صقر !!
بكل المقارنات كفة تركي هي اللي ترجح إلا بالأخلاق ,, أنا ما أعرف مطلق و أخلاقه لكن تركي أثبت لي إنه موب قد المسؤوليه ابد و كرهته ,, إيه كرهته و الله كرهته ,, أجل وشلون يجين الضيم منه و لا أكرهه و أنا من طبعي لا كرهت أحد مستحيل أرجع أحبه و هذا اللي صار مع أخت مي ,, بعد زواجه حاولت أحبه بس عجزت قلبي عيا !!!
حسيت باهتزاز السياره والتفت يمين كانت الدنيا ظلمه ,, التفت يسار و شفته يبتسم ,, يمه حتى ابتسامته تخوف !!
بلعت ريقي و أنا أشوف نور السياره الموجه على الطريق الرملي و رجعت عيوني على مطلق ,, كنت أبي أسأله أبي أقول شي لكن الخوف عقد لساني ,, سمعت كلامه و شكله حس بخوفي : لا تخافين نبي نجلس بمكان زين و نرتاح لنا شوي ..
بلعت ريقي بصعوبه بعد ما شفت ابتسامته المطمئنه ..
دقايق و وقفنا ,, نزل و تفحص المكان و رجع طفى السياره و نادان : انزلي ..
درت نظري على المكان و ما شفت غير ظلام و نور السياره بس ,, التفت لورى و شفته ينزل شي شكله فرشه ,, تقدم لقدام السياره و فرش الفرشه و حط المركى و نزل شنطه كبيره ,,
رجع للسياره و فتح الباب اللي من عندي و تكلم : وراتس ما تنزلين .
بلعت ريقي و تلفت أناظر المكان من دون لا أتكلم ..
رد بعد ما مسك ايدي : تخافين يالحضريه !!
رديت بسرعه : لا اااا بس ظلماء ..
ابتسم ابتسامته المخيفه و رد : طيب يله افصخي عباتس و انزلي !!
تمسكت أكثر بعباتي و رديت : هاه !!
سحبن مطلق من ايدي و نزلت ,, سحب نقابي و حطه بالسياره و سحب طرحتي لكني تمسكت به ,,
رد مطلق و عيونه تخترق ملامحي : يا وجه الله وش هالزين يا بنت عبدالله .
عضيت على شفتي و نزلت راسي و قلبي يرقع ,,
مرر ايده على وجهي بهدوء و حسيت بقشور ايده الخشنه تمخش وجهي !!
مطلق : الله يحفظتس و يخليتس لي ..
نزلت راسي أكثر و أنا حاسه إن الحر ذبحن مع إننا الحين ببداية الشتاء ..
رد مطلق بعد ما انتشرت قهقهته بالمكان : ههههههه لا تنكسر رقبتس ..
رفعت راسي و سرقت نظره له لكني ما قدرت أكمل و رجعت نزلت راسي ..
تكلم مطلق بعد ما انتهت نوبة الضحك لكن ما زالت البسمه تغطي وجهه : طيب فكي عباتس ..
رديت بهمس : لااا برد .
رد و هو يفك طرحتي : أجل هذي فكيها ..
مشيت مع مطلق و ايدي ضايعه وسط ايده لحد ما جلسن بالفرشه ..
مطلق و هو واقف : اقعدي يا مرة مطلق هنيا لين أشب الضو و أسوي القهوه ..
جلست و قام هو و نزل حطب من صندوق الحوض و رجع كب عليهن شوي بنزين و شبهن ..
توجه للسياره و سكر أنواره و رجع ..
فتح الشنطه و طلع منه دله و علب صغيره ,, عرفت ان الشنطه اللي بين ايدينه عزبه ..
سوى القهوه و أنا أتأمله ,, هذي فرصتي ألاحظه من دون لا يدري لكنه بين الفتره و الثانيه يسرق نظره لي و أحاول أصرف نظري عنه حتى لا يعرف إني أناظره ..
رد مطلق : قطعتيني من المناظر!!
بلعت ريقي بروعه و قلبي بدأ يضرب ,, يمه وش عرّفه ؟؟
صدق لا قلت عيونه تقل عيون صقر !!!!!!!!!
حسيت به يجلس من الجانب الثاني للمركى و يتسند على وجه السياره ,, عدلت جلستي بسرعه بحيث إني أبعدت ايدي عن المركى ..
رد مطلق و الضحكه باينه بعيونه : ما قلتي لي وش اللي عجبتس فيني يوم انتس تناظريني .
نزلت راسي و أنا أتمنى الأرض تنشق و تبلعن ,, يا كرهيلي وشوله أناظره من زينه !!
رديت بسرعه أتهرب : متى بنمشي ؟
تعدل بجلسته و رد : أبك أنتي من صدقتس خايفه !!
درت نظري على المكان و لاحت لي أنوار الشارع البعيييده : بس .. بـ..ـس المكان يخوف شوي .
رد مطلق و هو يتناول صحن التمر و يفتحه : لا لا ما هقيتها منتس يالحظريه تخافين و رجلتس معتس ..
ابتسمت ابتسامة اعتذار و رديت : و الله موب كذا بس عشان الظلام قوي .
رد مطلق و هو ياكل من التمر : الظلام قطعناوه بالضويه ..
رديت بسرعه : طيب افتح أنوار السياره ..
سحب ايدي و حط به تمره بعد ما شال العبسه عنه و رد و عيونه مركزه علي : نور السياره يكشفنا ..
قام بسرعه بعد ما شاف القهوه بدت تطيش شال الدله بطرف شماغه ..
شي جديد عرفته عن مطلق يغاااار ..
جاء و جلس و حط الدله قدامه ,, صب لي فنجال و اخذته بهدوء ,, ارتشفت رشفه صغيره و سبقن سؤاله و فنجاله بين ايدينه : وش رايتس بقهوة البدو ..
ابتسمت بهدوء و رديت : ريحة القرنفل قويه ..
ضحك و رد : هههههه إيه هذا اللي يميز قهوتنا !!
و ركز نظره على الأرض و بدأ يهوجس ..
صار لي ربع ساعه و هو ساهجن و يهوجس غريبه وش به ..
سحبت الدله و مديت ايدي له و تكلمت : فنجالك برد هاته أصب لك غيره !!
انتبه و شرب الفنجال اللي بيده بسرعه و مده لي ,, صبيت له فنجال ثاني و أخذه و كشر يوم شافه ,, قرصن قلبي لما شفته يكب الفنجال بالتراب و يرجعه لي لكنه تكلم و كأنه يجاوب على السؤال اللي دار بعيوني : صبي بقاعة الفنجال ..
صبيت له بحذر و مديته و أنا أراقب ردة فعله بخوف لكنه ابتسم لما شاف الفنجال و رشفه برشفتين و مده مره ثانيه و رد : هذي سلومنا يالبدو و لازم تتعودين علاها ..
رديت و أنا أمد له الفنجال : ان شاء الله .
شفته عض على شفته و رجع يفكر شوي لكنه ما طول تفكيره لأنه التفت علي و ناظرن ثم شال المركى اللي بيننا و حطه قدامه و أشر لي على المكان اللي جنبه و تكلم : قربي هنيا ..
ناظرت المكان اللي يأشر عليه و ابتسمت بارتباك ...
رجع أشر على المكان بدون لا يتكلم ..
شلت نفسي بهدوء لكن قلبي يرقع و جلست جنب المكان اللي أشر عليه و قبل لا أستقر ايده حاوطتن مع خصري و سحبن له أكثر ,, كان جسمي يرتجف لأول مره أصير بهالموقف المرعب !!
.
.
.
.
مطلق .
لاحظت ارتباكها و قربتها بإيدي ,, ما احتجت تعب لأنها كانت خفيفه ,, حسيت بجسمها يرجف بين ايديني و قربتها أكثر ,, كانت كل ما أقربها أنفاسها تزيد ,, كانت مستحيه بالحيل و الدليل هالوجه الحيي اللي قدامي ..
تكلمت و أنا مبتسم : لا تستحين أنا رجلتس ..
عضت على شفتها من دون لا ترد لكني رديت و أنا أأشر على القمر : يوم إنتس صغيره كنتي مثل هالقمر قصيره و متينه ..
التفتت علي و ردت بسرعه : أنت تعرفن و أنا صغيره ؟
ابتسمت يوم شفت عويناتها الصغيره المدوره مفتوحه على الآخر و رديت : درست مع أخوتس خالد المتوسط و الثانوي ..
و كملت يوم شفته ساكته : شفتس مره تلعبين بالشارع أنتي و بنات أصغر منتس ثنتين ,, و يوم انكن شفتن خالد هجيتن للبيت ..
و كملت و أنا أضحك : بس عاد أنتي عشانتس متينه قدر يمسكتس خالد و ضربتس و ما فكتس من ايده إلا ...
ابتسمت و ردت : من اللي فكن ؟؟
تذكرت إن اللي فكه من خالد هو تركي و تركي هو خطيبه سابقا و تكلمت بسرعه : أنا أنا اللي فكيتس .
و كملت : بس عاد بعده ما جيتي على بالي أبد و يوم خطبتس ذكرن خالد بهالموقف ..
ابتسمت و ردت : بس منب متينه مره ..
رديت و أنا أضحك : و الله إنتس متينة بالحيل و قصيره و حممممممراء ..
و كملت لما شفته تضحك : هذا العرق الشامي ؟؟
ردت : ما أشبه أمي ..
لما قالت أمي تذكرت الموضوع اللي لي ساعه أقلبه ببالي و تكلمت مثل عادتي بدون مقدمات : شوفي يا بنت الناس تراي أبيتس تعاملين أمي زين ..
ردت بعد ما سكن جسمه : طيب .
كملت : و ترااا أهلي ما دروا بعرسي ..
استقام جسمه بسرعه و ردت : وراااه ؟
رديت بعد ما عصرت ايدينه بين ايديني : لا تسألين ليه و العجوز إن جاتس منها شي تحمليها !!
شفت السؤال بعيونها و رديت : تراها طيبه مير الشيطان ما خلا أحد ..
و كملت : هاه وش قلتي ؟؟
ردت و صوتها مخنوق : وش أقول ؟
سحبتها لي أكثر و رفعت راسها و خليت وجهها مقابل وجهي و تكلمت : تبي تتحملين العجوز ؟
ردت و هي ترمش بسرعه : ايه ..
لا حظت إن صوتها راح و دارت عيوني على وجهها و ركزت أكثر بأهدابها الرطبه ,, أيقنت إنها تحاول تخفي دموعها و لثمت جبهتها و رديت : و الله ما تشوفين الضيم و أنتي على ذمتي ..
عضت على شفتها و هي مرتبكه ,, حررتها من بين ايديني و مديت لها الفنجال عشان أضيع ارتباكها و صبت لي و مدته أخذته و رشفته و أنا أشوف الساعه 12 إلا ربع ..
مدت لي ايدها لما شافت الفنجال فاضي ,, ركزت نظري على كفها ايدها الممدوده ,, كانت مليانه و بيضاء و ووو
بدل لا أعطيها الفنجال سحبت كفها و لثمت باطنها حيييل ثم شميتها و رجعت لثمتها وسط ارتعاشة ايدها بين ايديني ..
حررت ايدها و وقفت بسرعه بعد ماحطيت الفنجال بالأرض و تكلمت : يله سرينا ..
.
.
.
.
رونق
ما صدقت فك ايدي سحبته و ضميته و جسمي كله يرجف ,, فرحت لما قال كلمته البدويه سرينا و فهمت إنه يبينا نمشي ..
راقبته و هو يكب القهوه على الضو و يدفنه عشان تطفأ شلت الفناجيل و حطيتهن بالعزبه و رجعت و شلت الفرشه و سفطته لكنه سبقن و أخذه من و ركبه بالسياره ..
نفضت عباتي عن التراب و لبست طرحتي و نقابي ..
حطيت رجلي على طرف السياره و تمسكت بالمرتبه لكن رجلي زلقت ,, شهقت و شكل مطلق سمع هالشهقه ..
ضحك بصوت عالي و رد : هههههه هاتي ايدتس ..
رفعت عباتي و تمسكت بالباب و ركبت هالمره بسلام وسط تعليقات مطلق علي و على طيحتي ....
كملنا طريقنا و أنا أحاول أجمع المعلومات اللي عرفتهن عن مطلق عشان تكتمل الصوره قدامي ..
مطلق بن عايض من حفر الباطن ,, ااااا بدوي ,, أطباع البدو لازم أتعلمهن عشان ما يزعل ,, اااا وش بعد وش بعد !! ايه غيور يا الله هالصفه تخلين أخاف لو عرف بموضوع عزام وش يبي يسوي ؟؟
أكيد بيطلقن ,, ساعته يمين بالله لأفضح عزام و اللي جابه و ما راح يهمن أحد ...
حسيت بريحة أكرهه قووووه ,, التفت بسرعه و انصدمت يوم شفت مطلق يدخن و تكلمت بسرعه : مطلق أنت تدخن ؟؟
رد بعد ما نفث الدخان اللي بجوفه : ايه ..
و كمل لما ماسمع من رد : أنتم يالحضر تستعيبون هالشي و احنا عندنا عايدي .
رديت بقهر : كلنا مسلمين و الدخان حرام ..
رد : الله يفكنا منه ..
رديت بحذر : عندنا حتى لو الواحد يدخن عيب إنه يدخن عند الناس أو حتى عند أهل بيته ..
ما أدري وشلون قلت هالكلام و ما أدري وشلون ما حسبت عواقب هالكلام لأني شفت مطلق التفت علي و ركز عيونه علي ,, بلعت ريقي و تعلقت عيوني بعيون الصقر و أنا ميته من الخوف !!
فتح الدريشه و حلت ( رمى ) الزقاره و رجع ناظرن و رد : عندكم سلوم تغلبوننا بها .
ابتسمت على ردة فعله و تنفست بارتياح و سألته أغير السالفه : كم بقى ؟
رد و هو يناظر طريقه : ساعه و ناصل ..
تسندت على المرتبه و ركزت نظري قدام باقي ساعه و ألتقي بأهله بأمه اللي أرعبن كلامه عنه ,, ضرب قلبي و بديت أفرك ايديني ببعض و أنا أدعي الله إنه ييسر لي هالموقف الرهييب !!
لكن صوت انبعث من مسجل السياره ملأ الجو راحه و طمأنينه صوت أحبه و أرتاح له صوت الشيخ ماهر المعيقلي يقرأ سورة آل عمران ..
تنهدت و التفت لمطلق و ابتسمت من تحت الغطا ابتسامة شكر ,, أكيد حس إني مرتبكه و حب يخلين أهدأ ..
أدري ما تبان ابتسامتي لأنه تحت الغطا لكن عيوني يضحكن اذا ضحكت و شكله انتبه لهالشي و عرف اني أبتسم لأني شفته يبتسم لي و يرجع يركز نظره على الطريق ..
همست بداخلي و أنا ممتنه له : يا ربي إنك توفقن و تسخره لي !!
ــــــــــــــــــــــــــــــــــــ
نهاية الجزء الثامن عشر ...
دعواتكم عندي اختبارين هالاسبوع من أصعب الاختبارات ...
و راح أحاول أنزل الأسبوع الجاي مع إنه فيه عندي ماده السبت الجاي لكن أبضغط على نفسي و لو أنزل صفحتين المهم ما أخلف بوعدي ...
28-05-10, 03:53 PM
جديد مواضيع قسم القصص المكتمله من وحي قلم الاعضاء
العرض العادي
