لأنها لن تعود للكاتبة قلب دبي

للكاتبه قلب دبي
لانها لن تعود

هناك ،،
كانت الرؤية واضحة،،
ساحقة ،،
و حارقة ،،،!!
وهناك ،،
شعرت بأنني لا أملك إلا القليل،
الهزيل،،
الممل الطويل ///!
إلى هناك ،،
مشيت وأنا أبحث عنهم ،
ضاعت خطاهم،
وساروا أدراج الرياح ،،!!!
ثم هناك ،،
بكيت وبكيت عليهم ،،
وأي ذنب اقترفته نحوهم ،،
هل حبهم جريمة ؟
أم صدق مشاعري هزيمة ؟؟
هنا ،،
أسكب دمعتي اليتيمة إليكم،
نحوكم ومنكم وفيكم ،،
هي لكم،
وليست لي أبداً،
قطعاً لا أريد أن أعترف بهذه التحفة،،
لكم الرأي السديد في إبداء ما ترغبون ،،
عودة بعد غياب طويل جداً،
كان تفكيري فيه منحصراً في فكرة جديدة،
لا أعلم إن كانت موفقة ،
ولكن ما أعلمهُ جيداً أنكم
هنا ،،
و
هناك ،،
كي تؤازروني في ملحمتي الشائكة،
متجسدة بإيماني بهذا المبدأ :
[ لا أحد يستطيع إهانتك إلا بمساعدتك ].
هنا أخيراً ،،
قد تكون آخر نزف أدبي لي،،
وقد تكون بداية المنعطف،،
ومنهل المفترق الحي الذي أحدثكم فيه،،
ومن يعلم الغيب فينا ؟؟


¨°•?? لأنها لن تعود ??•°¨


أول قصة أطرحها إليكم بعد تفكير مطول،
وتردد كبير جداً،،
وخوف من ان تكون "مجرد رواية"..
ومع هذا فهي الآن بين أيديكم،
تتحرق شوقاً لسماع آرائكم ،،
فهل ستنصفوني ؟!!

ضحكن بقوة عليه وهو يقول باستهجان : what ????!!!!!!...
وهمست وحدة : فديت هالفلبيني والله ...

" نظرت إليهن وهن يتضاحكن بشدة عليّ، ألهذه الدرجة أبدو مهرجاً بلباسي الغريب ؟ أم أنني (هجين) بين طراز من جنسية أخرى لوني يختلف 100% عنهم !! "

مشى عنهم وهو يسمع همساتهن وسمع ع الطاير وحدة تقول : يا الله ترزقني بواحد يشبهه بس مواطن هههههههههههههههه ...
كانت أجواء الطيارة مشكلة ضغط نفسي عليه ويا ضغط هالشلة التافهة وحسسه ان كل شي غبي هو يالس يسويه،
وصل غرفة الاستراحة ، تأكد من خلوها .. ومن عقبها ///
سند ظهره ع الكرسي وهو يفكر بتمعن : يا ترى كم بيلس أتحمل هالوضع، هذا أول يوم لي وانا مب قادر أتحمل ؟؟ كيف يا ربي أتحمل وأنا يعاملوني كـ "فلبيني" دخيل شكله يثير الاستغراب،
تجاهل نظرات المضيفة سنا اللي ابتسمت له ويت بتناديه : مستر ســـ...... !!
لكن ضاع كلامها بعد ما قرر إنه يتوجه لغرفة الطيار حمد نفسه، ع الأقل يقدر يقوله اللي في قلبه ..
/
صد عليه الطيار حمد بابتسامة : هلا سعود .. شو رايك بالرحلة من بدايتها ؟
سعود تنهد بقوة : والله انها كانت تمام ولو انها متعبة وايد ويا طلبات الركاب، بس اللي قهرني شلة من بنات البلاد تمن يعلقن عليه وع شكلي اللي يسمع ما استوى مضيف ريال غيري ف هالدنيا ..
حمد : هههههههههه ما عليه لازم ما تزعل لان اصلاً جنسيتك المعلقة ف اللافته ع صدرك ما تساعد ان جيه يكون شكلك ..
سعود : ما عندكم لافتة واحد هندي .. يمكن في مجال يشبهني ههههههههههه ..
حمد : لا والله هههههههههههه .. ما علي هالرحلة ما حصلنا بس الرحلات الياية ان شا الله بتحصل..
سعود : ان شا الله ..
حمد : ع فكرة باجي لنا ربع ساعة ع الوصول.. فسير خبر الركاب يلبسون الأحزمة ..
سعود لوى بوزه : بعد بجابل شيفتهم ؟؟ خلاص ولا يهمك ..
ابتسم له الطيار حمد، وصد ع الطيار المساعد : احمد ربك انك طيار مب مضيف ههههههههه ..
/
" وصلت طيارة الإمارات وحطت على ديار ألمانيا، كانت الرحلة متعبة، ولكن التعب اختفى حين سمعت صوت ارتطام إطارات الطيارة بـ أرض ألمانيا، لم أنجز شيئاً للمشروع أبداً، وليتني استطعت أن أقوم بشيء، لقد وقفت طيلة الوقت أراقب ما سيحدث من جراء نظرات الناس لي "
بعد ساعتين من خلو الطيارة، نزلوا الطاقم الفني، مع المضيفين والطيارين، ولاحظ سعود مدى ترحيب شرطة المطار بـهم وكأنهم رؤساء دولة أو ناس لهم مكانه مرموقة، باختصار كانوا وكأنهم يمشون والناس تطالعهم على أساس انهم (V.I.P) !! ..
انفصل سعود عنهم ولاحظ ان سنا المضيفة كانت تطالعه بنظرات لوم لانه طول الرحلة كان مطنشنها،
سعود فيه نقمة عودة ع الجنس الناعم سببتها ....... أميرة ، لكن منو أميرة ؟؟
/
وصل الفندق وهو يتساند بقوة ع السرير،
مر ع باله طيف خليفة ربيعـه ، وسنده اللي ما رام يآزره ف هالمحنه ..
وتذكر أمه اللي ماتت من الصياح يوم عرفت انه بيسافر ..
تذكر أخوه "سالم" اللي الكلى متعبتنه .. وولده مطر .. وبنته مريومة ..
وابتسم على طاري اخته خلود ..
لكن سرعان ما تضايج لأن خلود مصيرها مرتبط بمصير أميرة ...
يقول عن أميرة خاينة ؟؟ مممم يمكن ،، او يمكن ينعتها بالـ جذابة، لكن أميرة اسم على مسمى / كانت أميرة حالمة، وأحلامها كانت فوق... فوق وااايد .. بس سعود مب قدها !!
عقد حواجبه وهو يفكر بعقل،
أميرة لو كانت تحبني ما رضت إني أنهان !!
وأي إهانة شنيعة حصلتها منج يا بنت أمج وابوج ؟؟؟؟؟؟؟؟
/
قالها فـ قرارة نفسه : تذكر يا سعووود ؟!!!



1)
دش البيت وتم يزاعج بقوة : اميييييييييييييييه .. اميييييييه وينج ..؟؟
يت امه تركض وهي ظاهرة من المطبخ التحضيري وايدها ع قلبها : بسم الله بسم الله .. ها ها شو مستوي ؟؟؟ شبلاك تزاعج ؟؟
ابتسم سعود وحب راسها : امييييه توظفت اخيراً توظفت ..
أمه طالعته وهي مب مصدقة : احلف .. احلف بس انك توظفت ..
سعود وهو طاير من الفرحة : والله اني توظفت .. والله ...
ام سعود : وين وظفوك ؟؟
سعود : في فندق .........
ام سعود : فندق عاد ؟؟ ما حصلت وظيفة حكومية ؟
سعود : يلا عاد اميه الحمدلله لقيت وظيفة..
ام سعود بارتياح : الحمدللــــــه ع كل حال .. عاد الحين ما باجي الا العروس ..
سعود وطاري العروس ع باله : انزين خلني اسير ابشر خلووود ..
ام سعود ابتسمت بخبث : خلود ولا ربيعة خلود ؟؟؟!!!!!
ركض ولا جنه سمعها وركب فوق صوب حجرة خلود ..
دخل عليها بدفاشة وهي نقزت من صوب الباب : بسسسسسسسسسسسسسسسم الله .. (طالعت سعود اللي يبتسم بنصر) ايه ايه شوي شوي في شي يسمونه استئذاااااان .. ما علموكم في المدرسة ؟
سعود بكبرياء : عدال عدال يا ام الاتيكيت شوي شوي ..
خلود : لا عدال انته عن يطيح نصك ..
سعود : جب جب .. شو تسوين يالسة روحج ؟
خلود : ماشي والله يالسة ألعب بالموبايل واطرش مسجات حق ربيعاتي ..
سعود : انزين ما باركتيلي ..
خلود باستغراب : ع شو يا حسرة ؟
سعود : توظفــــــــــــــــــــــــــت ..
خلود بصدمة : احلف !!
سعود : ههههههههه شبلاكم محد طايع يصدقني ..!!
خلود : لاه لاه لاه .. بعد 3 سنين انتظار .. حصلت الوظيفة .. كلللللللللللللوش ..
سعود : اح اح نشكر تعاونكم معنا الصراحة ..
خلود : ووين توظفت ويا هالراس ؟
سعود : في فندق ..........
خلود : اونه اونه 5 نجوم .. وناوي تتم ع هالوظيفة على طول ؟
سعود : مممممم الصراحة مادري .. بس الحين احمد ربي اني حصلت وظيفة ..
خلود : هي والله صدقك .. الواحد هالايام ما يحصل الوظيفة الا بطلعة الروح او بالواسطة ، بس تعال جوف الأجانب، بس لان اسمه اجنبي يسوونه خبير ويوظفونه على طول ..
سعود يطالعها باستهزاء : اشتغلت راعية السياسة.. انزين سكتي احسن لج ..
خلود : تغار لاني مثقفة ..
سعود : اقص ايديه اذا انتي مثقفة .. يلا بلا رمسة زايدة واتصلي بـ أمورة بسرعة ..
خلود : منو أمورة بعد ؟
سعود : أميرة.... ربيعتج اميييييرة .. افففف منج ..
خلود : ههههههههههههههه .. توني مسكرة عنها ..
سعود : ردي اتصليبها وخبريها اني توظففففففت ..
خلود : انزين اصبر ..
اتصلت لـ أميرة وهي ميتة من الضحك على سعود اللي متشوق بس يسمع ردة فعلها ..
بعد محاولاااااااات عديدة وافقت تحطه ع السبيكر ..
أميرة : هلا خلود ..
خلود : هلا اميرة شحالج ..
اميرة : مسرعج اشتقتيلي توج مسكرة عني ..
خلود : هههههههههه لا ماشي بس يايتنج ببشارة ..
اميرة : خير ان شا الله ؟؟
خلود : اخويه سعود توظف ..
اميرة : اووونه .. يستاهل اخوج كل خير ..
سعود ياه احباط من ردها البارد ويلس يأشر لـ خلود ..
خلود : مشكورة وما قصرتي ..
اميرة : ووين وظفوه دام تخصصه ع قده ؟
سعود تغيرت ملامحه !!
خلود : ف فندق ........
اميرة : فندق ؟؟؟؟؟؟؟؟؟؟؟؟؟؟؟؟ (صخت شوي) انزين ؟؟
خلود : شو انزين .. بس ييت اخبرج ..
اميرة : انزين قلت لج مبروك شو المطلوب مني الحين ؟
خلود : اميرة بلاج جلبتي علي ؟؟
اميرة : لا صج يعني تبين شي الحين لاني بسكر ..
خلود: لا والله ؟؟ ( شلت السبيكر ) انتي شو تقصدين ؟؟
سعود انقهر : خلود حطي ع السبيكر !!
خلود سوت له طاف وهو على طول حط ع السبيكر ..
أميرة كانت ترمس : اخوج يبا يشتغل مضياف للساير والراد لان تخصصه في الضيافة الفندقية.. وانا سألت وعرفت ان راتبه ما بيكون اوكيه لان كل اللي يشتغلون مهندة و... فهالتخصص !!
خلود شلت السبيكر للمرة الثانية : اميرة انتي شو تقولين هاي مب رمستج اللي اعرفها ،، انزين وبعدين ؟؟ ،، لا والله ؟؟ ،، والحين ما اشتغل في الحكومة خلاص يعني مفتشلة منه ،، انزين خلاص انسي عرضه مثل ما هو نسى ،، نحن ميتين عليج ؟؟ ،، عدال من زينج ولا من زين شيفتج ؟؟،، مليووون ؟؟ هي اجوف الخطاطيب مكودين في بيتكم ،، والله اخويه بيحصل لانه عارف قدر نفسه مب انتي،، ذلفي ذلفي ..
نش سعود بانكسار وهو يفكر بردة فعل اميرة البايخة !!
ظهر من الحجرة وهو مطنش خلود اللي يلست تزقره لكن من دون فايدة ..
قفل باب حجرته عليه، وزخ موبايله بقوة واتصل ع (خليفة) ربيعه ..
خليفة : هلاااااا بو خلوووف ..
سعود : هلا !!! ،،
خليفة : ها بشر شو قالولك الأهل ؟؟
سعود : ماشي فرحوا لي وباركوا لي ..
خليفة : فرحوا لك وباركوا لك وجيه ترمس ؟؟
سعود ما علق ....
خليفة : اييييه سعودوو شبلاك ؟؟
سعود : ما فيه شي ..
خليفة : لا تخبل بي ارمس ولا بظهر لك من سماعة التليفون وبظربك ..
سعود : اوووه ما فيه شي ..
خليفة : امك قالت لك شي ؟؟
سعود : لا ..
خليفة : اختك ؟
سعود : لاء ..
خليفة : عيل اخوك ..
سعود : قلتلك لاء ..
خليفة : منو عيل .. (شهق) رمست ابوك ..
سعود : لا ما رمسته .. خلاص من الآخر رمست اميرة ..!! ارتحت ؟؟
خليفة : لا تقول لي انها ما تبا الوظيفة ..
سعود : هيه .. تقول انها تفشل ..
خليفة : انزين ؟
سعود : بس .. افكر اودر الوظيفة ..
خليفة : لا والله ؟؟
سعود : بس المشكلة الثانية ان اختي تضاربت وياها وهددتها..
خليفة : تدري عاد ؟؟ زين سوت فيها اختك ..لان هاي طماعة .. اموت واعرف شو اللي يفشل في الوظيفة ؟؟ ليش الناس تعايب ع شغله انته بتشتغلها وبتتعب فيها بعرق جبينك ؟؟
سعود : لا تنسى اني بيلس أضيف الناس و .....
خليفة : بتستوي حرمة مثلاً ؟؟
سعود : ما قلت جيه بس يعني هاي الشغلة للحريم ..
خليفة : وشحقه من الاساس اخترت هالتخصص عيل ؟؟
سعود : توني عرفت انه يفشل ..
خليفة : اسمح لي اقولك انك حمار ..
سعود : نعم ؟؟؟!!!!
خليفة : هيه حمار .. وحمار عود وعنده جحشين بعد .. عيل حد ياخذ بشور حرمة ؟
سعود : بس انا اخترتها وقلبي تعلق بها ..
خليفة : عدال يا قيس.. انا اعرفك عدل انته ما حبيتها ولا شي بس لانها عطتك ويه وانته ما تنعطى ويه ..
سعود : خليفة مب جنك يالس تغلط علي ؟؟
خليفة : لانك غبي ويبالك ضرب بعد ..
سعود : لا والله ؟؟ وشو الحل ؟
خليفة : الحل الوحيد انك تنسى هاي اللي يسمونها اميرة، خذ لك ملكة احسن هاهاهاهاهاها ..
سعود : تستخف بدمك اونك ؟ والله مب فايج لك ترى بسكر ف ويهك ..
خليفة : ياخي ابغي اغير جو .. انزين خلاص .. انسى أميرة وريحنا ..
سعود : هذا اللي بيخليني اتينن اليوم .. يا خي شقااااايل انساها !!!
خليفة : انا بصراحة من جفتها هاك اليوم تسلم عليك ف المول ما ارتحت لها سبحان الله،
سعود : لو سمحت لا تغلط عليها ..
خليفة : سعود خلك عاقل شوي.. وحدة تباك تيلس عاطل عن العمل عشان بس ما تشتغل شغلة راتبها ضعيف ؟؟ شو هالمنطق .. هاي ما تبا مصلحتك وهاي أنانية بعد !!
سعود : معقولة تفكر جيه ؟
خليفة : يا خي ما سمعت المثل اللي قاله جورج عطا الله (يا مأمن النسوان مثل الماي في الغربال)
سعود لا إرادياً ضحك : ههههههههههههههههههههههههههههههههههه حسبي الله عليك الحين ها مثل ؟؟
خليفة : شسويبك احاول اخفف دمي عشان تضحك ..
سعود : ويا هالويه ..
خليفة : المهم الحين ع شو رسيت ؟
سعود : بتم ف وظيفتي وبجوف أميرة يمكن قالتها بدون قصد ..
خليفة : المهم بتم صح ؟
سعود : ان شا الله ..
خليفة : انزين لا تنسى عيل موعدنا باجر في الفندق ..
سعود : افا عليك .. ^^ ولا يهمك ..
/
في الفندق ..
د. عيسى : حيا الله خليفة وسعود، مبروك ع الوظيفة .. عاد ان شا الله تكونون قدها ..
خليفة + سعود : ان شا الله ..
عيسى : بس ابغي أخبركم ان اللي تم قبولهم في الوظيفة وانتوا منهم عشرة أشخاص..
خليفة بغباء : هااا ؟؟
سعود باستغراب : يعني عشان جيه قبلتونا نحن مع بعض ؟
عيسى : تقريباً، بس على فكرة اللي يوا وتقدموا كانوا حوالي 25 شخص وقبلنا منهم 10 ..
سعود : وكلنا بنتوظف مرة وحدة يعني ؟
عيسى : الظاهر ما فهموكم آلية اختياركم والتحاقكم بالوظيفة يا أخ سعود ..
خليفة : نحن اللي عرفناه انكم قبلتونا على اساس ان بنتوظف في قطاع الضيافة الفندقية وهو تخصصنا،
عيسى عقد حواجبه : وما خبروكم ان قبولكم مبني على أساس شرط ثاني ؟؟
سعود : محد خبرنا بشي ..
عيسى : عموماً ما راح أي شي عليكم، وع الساعة 12 بيكون هناك اجتماع مع كل المقبولين العشرة وبنفهمكم المسألة بشكل أوضح ..
سعود وخليفة : ان شا الله ..
/
خليفة: اييييييه .. صدق اللي قال .. ( أنا جامعي، وليت حظي جـا .. معي !! )
سعود : اسكت دخيلك ولا تتفلسف، بعدين شحقه مب متفاءل، يمكن سبحان الله يقبلوننا نحن بس،
خليفة : انته ما سمعته شو يقول، نحن مبدأياً قبلونا بس، وانا اقووول شو السالفة قبلونا ويا بعض،، مب العادة ان نكون ويا بعض ..
سعود : يا ربي هاللي بيرفع اللي الضغط والسكري .. اسكت اسكت وخلني أفكر ف رمسة الريال ..
خليفة : ليش خطبك وانا مادري ..
سعود بإجرام : اسكت احسن لك ..
خليفة بمرح : هههههههههههه انزين ..
/
في غرفة الإجتماعات بالفندق،،
د. عيسى : أحب أرحب فيكم جميعاً، واهنئكم على تخطيكم أول عقبه في مجال التوظف في فندقنا،
شرات ما تعرفون نحن قطاع يشجع بالدرجة الأولى توظيف المواطنين، وهذا اللي خلانا نختاركم انتوا، وبصراحة ومما لا يخفى عليكم ان المتقدمين كانوا متراوحين بين عرب وأجانب ومواطنين، اخترنا المواطنين كلهم واللي هم انتوا، 10 مواطنين بالضبط، ما يعني ان نسبة المواطنة ارتفعت لـ 40% ولله الحمد،
خليفة يهمس لسعود : وايد يتفلسف ها .. ما سمع اللي يقول ( اذا كان الكلام من فضة فالسكوت من ألماس!!)
سعود : من ذهب احيده لا تيلس تتفلسف .. واسكت خلنا نسمع الريال شو يقول ..
عيسى : نبغيكم تنفذون مشروع لمدة شهر، يخص تخصصكم، وطبعاً كل واحد منكم تقدم لطلب الوظيفة وهو حامل معاه شهادة تخصه، عندكم مهندس الكمبيوتر لازم يسوي مشروع يخص الهندسة في الكمبيوترات، والمتخصص في الأعمال يدور له مشروع يخص البزنس، وهلم جرا طبعاً،
ياه سؤال من أحد المتقدمين : دكتور عندي استفسار ..
عيسى : تفضل ..
الريال : ممكن توضح لنا ماهية المشروع بصورة اوضح ؟
عيسى : المشروع لازم يمثل موضوع حي، فرضاً بضرب لكم مثال بسيط بعيد عنكم لكنه بنفس الفكرة، عندكم مثلاً الدكتور، وعادة ما ينطلب منه يسوي هالمشروع لكن انا اضرب لكم اياه كمثال، فمثلاً يبدى اول شي بالبحث عن شي يخص تخصصه، فيختار طب الجراحات التجميلية، ومن بعدها يبدى بعمل بحوثه وكل شي على هالموضوع،
اللي يختلف في المشروع انه مطلوب منكم مشروع بدون كلام، نبغي صور، عرض، احصائيات، وتقرير المشروع ما يتجاوز 4 صفحات، نحن نركز على عرض المشروع وفكرته ،
خليفة : وكل ها بنسويه ونحن نداوم ؟
عيسى : لا طبعاً بتداومون اسبوع نعرض لكم فيه بعض المشاريع السابقة، ومن عقبها بتكون هناك إجازة مدتها شهر تبدون فيها المشروع وتسلمونه كحد أقصى بعد شهر ..
سعود : بس ما تحس يا دكتور ان مدة الشهر هذي قليلة جداً بالنسبة لمشروع ضخم يحتاج ان نحن نبذل كل الإمكانيات في طرحه وعمل البحوث عليه ؟
عيسى : بالعكس انته احسب انك بتواجه 30 يوم وكل يوم فيه 24 ساعة، يعني عندك 720 ساعة تشتغل فيها ..
سعود : بس يا دكتور عيسى، هالمدة بيتخللها تفكيرنا في فكرة المشروع ..
عيسى : بسيطة فكروا قبل هالشهر عندكم اسبوع ..
سعود : آسف بس أنا أطالب انكم تطولون المدة ..
خليفة ينغزه ويهمس له : ايه سعودو شبلاك معاند .. صدق اللي قال طرار ويتشرط ..
تكلم واحد ثاني : انا مع الاخ في ان المدة وايد قصيرة .. فيا ريت تطولون المدة ..
وياه التأييد من شخص ثالث : هي نعم استاذ المدة قصيرة جيه ..
رد الدكتور عيسى وطالع سعود بتحدي : خلاص نسوي تصويت، ..
/
أخيراً رسوا على إن المدة تكون 4 شهور فقط لا غير مع عدم طرح أي مواد وأفكار مشاريع سابقة، واللي خلاهم يرضخون لطلب سعود انهم فيما سبق كانوا يعطون مدة اطول عن الـ4 شهور للموظفين لتقديم المشروع لكن مع تعيين الاستاذ عيسى تغير كل شي ،

خليفة : مب هين سعودوووو .. يالله يعني بنريح 4 شهوووور !!!
سعود : ههههههههههههه اي بتريح وهالمشروع وراك .. انته لازم تفكر وتسوي شي يسوى ..
خليفة : اقولك كله كلااااام ما عليك منهم ..
سعود : هيه بس ع الاقل نبدى بالفكرة هالشهر ..
خليفة : هيه صدقك .. ويا ويهه بعد هدد اونه فكرة المشروع اتيني قبل شهر ..
سعود : انزين نش بنظهر انا مييييييت من اليوع ..
خليفة : هي والله حتى انا بطني يعورني من اليوع ساعتين ونص وهو يرمس .. يلا نش ..
سعود : شو رايك اعزمك ع الغدا ؟؟
خليفة : لا والله العزيمة عليه انا، ولا تقول لا ..
سعود : خ خ خ خ خ هذا اللي كنت اترياه هههههههههه ..
خليفة : ويا هالراس ..!!!!
/
بعد العزيمة ركب السيارة وألف فكرة تحاوط باله ..
بس وين الفكرة المميزة اللي بتخليني أبدى في مشروعي ؟؟؟؟؟

يتبـــع / (2) قريباً



)
بعد ما رد سعود البيت ..
دش الصالة وجافهم متيمعين : هلااااااا بهل البيت ..
سالم : هلا هلا .. وينك ياخي ما تنجاف ما صدقت تتوظف ؟؟
سعود : هههههههههههههههه يا خي قول مبروك جاملني ع الاقل ..
سالم : ماشي مجاملات يلا مناك .. خخخخ
مريومة بنت سالم تركض له : عمييييييييييي سعوووووووووود ..
سعود يشلها بحب : فديييييت مريومتي والله ..
مريومة : وينك يا القاطع ما تستحي ما تسأل ..
سعود يطالعها بغباء : انا ما استحي ؟؟
سالم : ههههههههههه مريومة عيب ..
سعود وهو شالنها يلس ع القنفة: ههههههه لا خلها عادي .. الا وين امي ؟؟
خلود : راقدة ..
سعود : غريبة .. مب من عوايدها انها ترقد هالوقت ؟؟ا
خلود : ماشي كانت مصدعة عقب الغدا ورقدت ..
سعود : ايوااا .. (يطالع خلود باستفهام) في شي مستوي ؟؟
خلود : ماشي ..
سعود : تقصين عليه انتي ؟؟ اونه ما بلاج شي ..
خلود أشرت له ان سالم موجود : اقولك ما في شي ..
سالم : ياخي ليش معاند وتبا تسوي شي من لاشي ..
سعود وذهنه متشتت : لا بس جيه يعني استغربت ان اميه اول مرة ما تريتني ع الغدا ..
خلود : تبا غدا ؟
سعود : مممم لا والله الحين مابا ..
خلود : تراك ياي من الدوام تعبان وحالتك لله ..
سعود : مالي نفس ..
خلود تطالعه بنظرة : لازم تاكل بلاك انته !!
سعود وهو يحاول انه ما يعصب : انتي اللي بلاج معاندة .. خلاص مابا ..
خلود : سعود ينيت انته لازم تاااااكل !!
سعود غيظ : ما تفهمين انتي ؟؟ مابا .. مابا .. ماااااابا !! حشى حتى الأكل بالغصب ..
سالم : الله يهديك هي ما قالت شي ها يزاها تحاتيك ..
خلود طالعته بحزن ونظراتها كانت ممزوجة بنظرات غريبة عليه !!
سعود : انتوا تعرفوني عدل ماحب حد يلح عليه فـ شي .. ليش تعاندون ؟؟
خلود : انزين خلاص خلك يوعان بس لا تزعل ..
سعود عقد حواجبه : يكون احسن ..
سالم : ما خبرتني شو سويت في الدوام ؟ وعسى القطاع الخاص مريحنك ..
سعود وهو يحاتي السالفة اللي خلود بتقولها : أي مريحني الله يخليك .. الا كرفونا من اول يوم .. وبعد 4 شهور ببدى اداوم !!
سالم :4 شهور ؟؟ شحقه !!
سعود : يبونا نسوي مشروع حق الشغل، واذا كان المشروع اوكيه بيقبلونا .. تخيل ؟؟؟
سالم : وشو اللي يحدك يا خوي .. سير دور لك وظيفة ثانية ..
سعود : انا الصراحة فكرت فهالشي قبل، بس يوم اتذكر اني انذليت 3 سنين وانا ادور الوظيفة اقول احسن لي ارضى بالهم، وبعدين اذا ياني القبول من مكان ثاني خلال هالـ 4 شهور بسير .. (تذكر) بس تعال !! انا وقعت على عقد وبجيه ما يستوي اخل به !!
سالم : عيل عرفوا يزخونك من ايدك اللي تعورك ..
سعود : هيه والله صدقت ..
خلود : سعود بعدك زعلان مني ؟؟
سعود ابتسم لها : الله يهديج انا ما زعلت منج بس انتي دومج ويا هالطبع تحبين تلحين ع الأوادم ..
خلود : خلاص آسفة ..
سالم : وحليلكم يا اخواني .. فيلم هندي روعة الصراحة الدمعة ف عيني بس مادري كيف يودت عمري ..
خلود و سعود : ههههههههههههه ..
سالم : في سؤال وايد يخطر ع بالي هالأيام ..
سعود : خير ان شا الله ..
سالم : الحين انته اسمك سعود .. واختك خلود .. ع نفس الوزن .. اشعنه انا سالم ؟؟
خلود : شو قصدك ؟؟
سالم : اشحقه ما استويت حمود ولا عبود خخخخ ..
سعود : ههههههههههههه ويا هالويه .. قلت بتقول شي الحين ..
سالم : شو نسوي بعد .. تعالوا وين سارت مريومة ؟
سعود : اكيد في المطبخ ..
سالم : الله يعيننا ع هاي البنية .. الحين منو بيرضى ياخذها وهي 24 ساعة في المطبخ ..
خلود : هههههههههههههه حرام عليك سالم بعدها صغيرة ع هالسوالف ..
سالم وهو يتثاوب : آآآه انا خلاص وصلت حدي .. يلا تمسون ع خير ..
سعود وخلود : وانته من اهل الخير ..

بعد ما راح سالم ..
سعود : خلود انا طول الوقت وانا على اعصابي .. شو مستوي ؟
خلود : كلمت اميرة اليوم ..
سعود بلا مبالاة : وخير يا طير شو اليديد ؟
خلود : يلست اسألها ليش قالت هالرمسة عنك .. تخيل يلست تستسمح مني وانها ما كانت قاصدة ..
سعود بشك : معقولة ؟؟؟
خلود : انا روحي بعد كنت مب مصدقة ان اللي ترمسني هي نفسها أميرة اللي سبيتها سب أمس .. ما حيدها تسكت عن حقها ..
سعود : انزين ؟؟
خلود : ماشي قالتلي قولي حق امج تتصل في امي لانها تباها ..
سعود : عشان جيه اميه قافلة على عمرها ؟
خلود : لا عادي هي اتصلت فيها وخبرتها ان المفروض انك تخطبها من البداية بليا لف ودوران ..
سعود بعدم اقتناع : وهلها كانوا بيرضون آخذ بنتهم وانا حافي ومنتف ؟؟
خلود : شدراني !! المهم خبرت امي ان بالخميس هم يتريونا انسير لهم ..
سعود تفاجأ : نخطب نخطب ؟؟
خلود : هي ..
سعود : حلفي !!!
خلود : والله بلاااااااك !!
سعود : انزين وامي ليش ما تغدت ؟
خلود : اميه قفلت على عمرها الباب بعد ما ظهرتني وقالتلي بتصل في ابوج ..
سعود باستغراب : ابويه !!
خلود : هيه .. ومن حزتها ما جفتها الا يوم فجت الباب وقالت انا مابغي غدا تغدوا روحكم ..
سعود : عيل اكيد السالفة تخص ابويه ولا من متى اميه تحب الحكرة في الحجر ؟؟؟

" يشكل أبي عقدة لا حل لها في حياتنا بشكل عام وفي حياة أمي بشكل خاص، أمي تعتبر رهينة في سجن والدي، فهي معلقة بسببه، لم يرد تطليقها، أو حتى السكن معها، وهذا ما نحن نعتبره إهانة كبرى في حقنا نحن كأبنائه، لا حقوق، ولا واجبات، ولا أي شعور بالمسؤولية أبداً !! "

/

دق سعود باب حجرة امه : اميييه واعية انتي ؟
ما ردت عليه امه على طول،، فتحت الباب وطلت عليه : سعود ؟؟ رديت من الدوام ؟؟
سعود ابتسم لها وحب راسها : هيه رديت .. شحالج يا الغالية ؟
ام سالم "وأم سعود ف نفس الوقت" : الحمدلله .. ها بشر شحال الدوام ؟
سعود : ما علينا من الدوام انتي خبريني .. صدق اللي سمعته انج اتصلتي ف ابويه ..
ام سالم : هيه اتصلتله .. خلود خبرتك ؟
سعود : هيه ..
ام سالم : عيل خبرتك عن سالفة أميرة وأمها ..
سعود : هيه ..
ام سالم : اسمعني يا سعود، صح ان امها قالت تعالوا اخطبوا، بس مب معناته انك تسير وتخطبها وانته مب مقتنع، لازم اول شي تفكر عدل ..
سعود : يا اميه لو اني مب مقتنع جان ما خليت خلود تخبرها..
ام سالم : يعني خلاص نتوكل ان شا الله بالخميس ؟
سعود : ان شااا الله .. الا اميه صج شو قالج ابويه ؟
ام سالم حاست بوزها : ابوك يقول مشغول وانه مب لازم ايي ..
سعود عقد حواجبه : حشى الشغل حتى بالمسا ؟؟
ام سالم : اسميك تستهبل وايد .. يعني مصدق انه مشغول بشغل زين .. ؟؟
سعود : الله يهديه يا اميه .. لا تسيئين الظن ..
أم سالم : يالله الله يهديه .. بس انته لا تشل ف خاطرك انه ما بيي ..
سعود : مب مشكلة نحن بس سايرين نجس النبض .. المرات الياية خله ايي ..
ام سالم : ع قولتك .. يالله الله ييسر اللي فيه الخير ..
/
سالم : بنت منو هاي ؟
سعود : بنت ابوها وامها .. هاهاهاها..
سالم : يا حبك حق الاستهبال .. اقصد ناس زينين ؟ نعرف اهلهم نحن ؟
سعود : تعرف فلان الفلاني ؟؟
سالم : هيه ..
سعود : ابوها يستوي ولد عمة امه ..
سالم : ههههههههههههههههههههههههههههههههههههههههههههههه ..
سعود : ايه يا الهرم انا قلت شي يضحك ؟؟
سالم : ولد عمة يدة ابوها .. خيييييييييبة .. ما تعرف نسب أجرب ..
سعود : اوووه وانا شدراني .. وانته كله بس يالس تتشمت ؟؟ يا خي لا تستنذل علي ..
سالم : بس مب جنك استعيلت وايد .. يعني يبالك تستلم الراتب وتيمع وجيه ..
سعود : انا بشرح لهم ظروفي .. بس ع الأقل عشان ما يرمسون ويقولون اني لعاب ..
سالم يحط ايده ع جتف سعود : والله وكبرت يا سعود وبتستوي معرس ..
سعود ابتسم : ليش تتحسبني ياهل ويا هالويه ؟؟
سالم : نععععععععم !!! صج قليل ادب انا اخوك العود ..
سعود : هههههههههههه الا فرق 5 سنين ..
سالم : و5 سنين شويه ويا هالويه ؟؟ صكيت انا الثلاثين ..
سعود : وييييه شيبه استويت ..
سالم : عدال 5 سنين وبتستوي شراتي يا الكهـــــل !!!!
/

يـوم ( أميـرة سعود )

" وضعت عطري المفضل ( مانيا بلاك كود"جورجيو أرماني" ) وأنا أتعمد أن أحسن من مظهري كي أبدو بشخصية جذابة أمام أهل أميرة، ولقد انتظرت كثيراً هذا اليوم وأحمد ربي بأنه قد تحقق "

دخلت خلود ويلست تطالع سعود اللي كان يعدل غترته وهي مصدومة :
الله يغربل ابليسك ليكون بتسير جيييييه ؟؟
سعود زاغ : اويه شكلي غلط ؟؟
خلود : انته ع شو ناوي ؟؟ تباها تغير رايها وتخلي الملجة اليوووووم !!!
سعود ابتسم براحة : يا الخايسة وقفتي قلبي .. ( بثقة) اح اح عاد ادري اني محطم قلوب العذارى ..
خلود : والله انها محظووووووظة فيك ..
سعود : السبال ف عين اخته غزال ..
خلود : هههههههههههههه لااااا جد والله .. فديتك كلك ع بعضك حلو ..
سعود : انزين جلبي ويهج ما حب المجاملات ..
خلود : هههههههههههههه طاعوا اللي استحى ..
سعود : خخخخخخخ ويا هالويه (يطالعها بتمعن) وانتي شحقه حاطة هالميكب ؟؟ شو مستوي؟
خلود : اوووه سايرين نخطب لك اليوم لازم اكشخ ..
سعود : سيري غسلي ويهج ولا تعورين راسج ... يوم بتعرسين سوي اللي تبينه ..
خلود : سعوووووووود حرام عليك ..
سعود وهو يعدل غترته : وينه سالم ؟
خلود : بعده ما ظهر من حجرته (بنرفزة) الشيخة مب راضية عليه اليوم يمكن ..
سعود : عيب عليج هالرمسة مهما كان هاي مرت اخوج ..
خلود : هي مرت اخويه بس ولا عمرها حسستنا بهالشي .. عايشة جنها غريبة عنا ..
سعود : انزين سيري كشخي مريومة تراها بنت اخو المعرس ..
خلود : ياللـــــــــــــــــــــــــــــه !!

بعد لحظات دشت أم سالم وفي ايدها المدخن ..
ام سالم : يا حاااافظ ع الريحة الغاوية .. اول مرة تحط عطر شرات الأوادم..
سعود بإحباط : افا .. يعني دوم احط شرات الحمير ؟
ام سالم : ما تنلام ساير عند الحب لاااازم ..
خلود وهي تبتسم : عاد منو قده اليوم .. معرس شباب .. معرس شباااااااااااااب ..
سعود : لا لا كمليها وارقصي بعد ..
خلود : هيييييه برقص عندك مانع ؟؟
ام سالم وهي تدزها : سيري تلبسي وبلا رمسة زايدة خلني ادخن اخوج ..

دخل سالم بعد دقايق ..
سالم : يا حاااااااااااافظ ع الريحة .. ما حيد يوم سرت اخطب عطرتوا المكان جيه !!
سعود : ما كان عندنا اختراع اسمه عطر خخخخخخخخ ..
سالم : جب جب .. اللي يسمع يقول متزوج من قرن .. الا من 6 سنين ..
سعود : لا وااااايد شويه .. خخخخخخخخ ..
سالم : لا تتفلسف وايد .. وانتي يا ام سالم تعالي بسرعة وبخريني انا خله يولي الناس بتي تسأل عني أنا مب عنه ..
سعود : لا والله ؟؟
سالم : هيه عيل شو تتحرى .. الناس بتقول هالغاوي منوووه .. على طول بيقولون هذا اخو سالم وطالع عليه ..
سعود : يلا يلا سير العب على غيري ..
ام سالم : تعال تعال سلوم وبلا رمسة زايدة ..
ويا عندها ورفعت كندورته ومن عقبها حطت المدخن داخل الكندورة وردت نزلت الكندورة (فهمتوا شي خخخ؟؟)
سالم : افا ريال وعندي ولد وبنية وتزقريني سلوم ؟؟ صج تفرقة !!
سعود : من الله انا اسمي مكسر تباه يكسرونه لي ؟؟
ام سالم : وانته (تطالع سالم) اشعنه ما تخلي حرمتك تدخنك ..
سالم تضايج بس خذها بروح رياضية : ما احب الا عودج ..
ام سالم استانست : هييييه اتحسب انا بعد ..
سالم يطالع سعود : ايه بسك من دشيت عليك وانته تعدل فهالغترة .. اظني اظني انها تحللت الحين واستوت شوربة ..
سعود : هيهيهيهيييي وايد دمك خفيف .. شسوي احاول اخليها شرات دوم بس مب طايعة تستوي ..
سالم : لازم النفسية غير اليوم خخخخخخخخ ..
ام سالم ترفع كندورة سالم وتدزه : يلا سير .. خلني اتدخن روحي ..
سالم : ههههههههههههه افا يا الوالدة جيه تعاملين ولدج العوووود ..
ام سالم طالعته بنظرة وسالم ضحك : ههههههههههه خطيرة الوالدة تخوف الواحد يوم تطالعه خخخخ..
سعود يطالع الساعة : اخبركم جنها استوت ثمان ونحن ما سرنا ..
ام سالم : هي والله .. يلا بسرعة سير خبر حرمتك يا سالم وانته سعود خبر اختك خل يخلصون بسرعة..
سالم : اميه ما بتي حرمتي !!
ام سالم بخوف : ليييش ؟؟
سالم : مطر تعبان شويه ..
ام سالم : وييييييه بسم الله عليه .. (نشت) بسير اجوفه ..
سالم زخ امه : لالالا ما يحتاي اميه ..
ام سالم فهمت قصده وصخت ..
سعود يبا يغير الجو : انزين يلا نشوا خلنا نسير ..

دخلت خلود وهي مبوزة : اميه لا تلبسين عباتج ..
ام سالم حطت ايدها ع قلبها : بسم الله شو مستوي ..
خلود : اميره تقول العزيمة حق الرياييل مب حقنا ..
ام سالم : شووووه !! ع الاقل خل تتعلم الأدب شو هالرمسة ..
خلود : هي قالت اونه امها محد ولا كانت عادي بتستقبلنا ..
ام سالم بإحباط : ويييه وانا ما خليت لا سويرة ولا ترجية الا وحطيتها ..
سعود بعدم اقتناع : ليكون غيروا رايهم ..
خلود : لالالا ما ظني .. انته ما عليك سير ويا سالم وخلاص ..
سالم : شو السالفة ..
ام سالم : خلاص سيروا وخبرونا كل شي اول بأول ..
سالم وسعود : ان شـا الله ..
/
في بيت "العروس" !!!
كان البيت فخــــم جداً بطريقة ما توقعها سعود، وهاللي خلى سعود يتوتر أكثر خاصة إن مستواه المعيشي مستحيل يوصل لمستواها،
دخلتهم الخدامة، ويلسوا في بداية الميلس الواسع والعــــود ..
سالم بهمس : يا بوك طحت ع ناس مريشين ههههههههههههه ..
سعود باحتقار : ليش ناوين يتبنوني هم ؟؟
سالم : شوي شوي كلتني بهالعيون .. خيبة مب وراثة خذتها من امييييه وخلتك تزيغ بنظراتك شراتها خخخخخخ ..

سكتوا بعد ما لمحوا ريال يعطونه في الخمسين داش واقترب منهم يسلم عليهم ..
عم الصمت بعد ما يلس مجابلنهم، وما تكلم مووووليه !!

بعد فترة من الصمت !،
بو أميرة : منو فيكم سعود ؟
سعود وهو يبلع ريجه من الزياغ : انا ..
بو أميرة وهو يتفحصه من ساسه لراسه : عيل انته اللي ياي تخطب بنتي ..
سالم حب ينهي الموضوع : نحن يايينك يا بو أميرة ..
بو أميرة قاطعه : وانته منو ابوه ؟؟؟
سالم : انا اخوه ..
بوأميرة : وابوكم وين ؟
سعود : ما رام ايي ..
بو أميرة باستغراب : معقولة ؟؟
سالم انقهر من اسلوبه : يا بو أميرة الريال ينشرى بشخصيته مب بـ أبوه ولا بيزاته !
بو أميرة : واخوك فيه شي من هالثلاث ؟؟
سالم تنرفز : شووووه ؟؟؟
بو أميرة نش وطالعهم : نشوا نشوا ..
سعود من زود صدمته جحظت عيونه وسالم بصدمة : نعم ؟؟
بو أميرة : نش مب ياي أطردك انا ..
نشوا اثنيناتهم .. وزخ بو اميرة سعود من جتفه وأشر له من الباب الزجاجي على الكاراج،
كانت فراري حمرا موجودة برقم مميز ..
بو أميرة : هاي سيارة اميرة ..
سعود : ................ لا تعليق !!
بو أميرة : تروم تشتري لها مثلها ؟؟؟
سالم من زود صدمته ما عرف شو يقول : يا اخ انته شو تقول ؟؟
بو أميرة طنشه : تروم تشتري لها بيت شرات هالبيت ؟؟
سعود نزل راسه من زود فشيلته ..
بو أميرة وهو يرص ع جتفه : عندك بيزات تشتري لها ألماسات وأطقم ذهب ؟؟؟
سالم غيظ : شو نحن يايين عندك عشان تذلنا ؟؟؟
بو أميرة يزاقر وهو مطنش سالم بالمرة : اميييييييرة ..
بعد لحظات ظهرت أميرة ..
بو أميرة : تبينه هالولد ؟؟؟
أميرة وهي تطالع سعود بجرأة : لا ماباه ..
سعود انصدم وحس الدنيا تدور فيه بس ما رام يتكلم ..
بو اميرة يدز سعود لين الباب : لو انها موافقة كنت يمكن اقتنع وازوجك اياها واصرف عليك يا الفقير، بس يوم انها ما تباك.. ما عندك كرامة؟؟ صج انك ويه فقر .. اظهر برع بيتي انته واخوك اللي جنه بقرة جايفة حريجة .. اظـــــــــــــــــهـــــــــــــــــــر !!!

على صدى الصوت من صارخ بو أميرة، وسالم وسعود من صدمتهم نشوا وهم مب عارفين شو يسوون،
اللي استوى كان بمثابة صفعة لسعود،
وف نفس الوقت إهانة لعايلته ولاهله ..
ركبوا السيارة،
وسعود جامد ما يتكلم،
الا دموعــه، اللي أعلنت الإنهــيار !!!!

يتبـــع / (3) قريباً



)
صد سعود على سالم وهو يحاول انه يجذب نفسه وروحه اللي كانت شوي وبتطلع من زود الصدمة،

" الذيب يعـــوي قبــــل يغدر بمسكين ......وانتي غدرتـي خافقـي فـي سباتـي
لو كان غـــــدرك فـي كفوف الموازين ......لكـان رجـح كـل غــدر البـناتـي
انتي السـبب سقـتي على القـلب جـرحين ......غدر الغـــرام وموجـع الذكـرياتـي
وانتي الســــبب والـيــوم لالا تلومين ......وان جـاك بـاكر شوفـي اشلون يأتـي "

حط سالم يده ع جتفه في محاولة منه عشان يهديه : خلاص يا سعود هد أعصابك ..
سعود وهو يتنفس بقهر : أهانتني يا ســالم، (يصارخ بقهر) انزين شحقه قالت لي تعال، كنت بنثبر في البيت وما بيي أذل نفسي وأنزل راسكم، أنا ما طلبت منها (بضعف) والله ما قلتلها بيي أخطبج اليوم، هي اللي حددت، هي اللي قالت حق خلود تعال .. (تغير صوته) انزين ليش جيه سوت؟ أنا ما ضريتها ولا قلتلها شي.. حرام عليها اللي سوته (وقف السيارة ونزل راسه ع السكان ويلس يصيح) والله حراااااااام !!!

دق هرن قوي من السيارة اللي وراه لانه وقف السيارة بدون سابق إنذار،
تلاحق سالم وتبادلوا الأماكن وخذ سالم السيارة عشان يسوقها،
وقفها ع ينب الطريج بعد ما تجاهل صرخات الريال اللي كان راكب السيارة اللي وراهم ..
ورد صد على سعود : وبعدين يعني يا سعود،
صد عليه وعيونه محمرررين من القهر : ماقدر أتجاهل اللي استوى ..
سالم : لا تتجاهله بس تقدر بذكاءك انك تنساه ..
سعود : واذا انا نسيت اللي استوى لي .. انته بتقدر تنسى الاهانة اللي يتنا ؟؟
سالم : اكيد بنسى، لان اللي قال هالرمسة مب واحد جايف خير، الا من يومين متعزز وياي يتبطر علينا..
سعود : انا مالي ويه اجوف امي بعد اللي استوى ..
سالم : بكل بساطة قولها ان ماشي نصيب، وخلاص ولا جنه شي استوى ..
سعود : وامك بتصدق بهالسهولة ؟؟
سالم : ان شا الله بتصدق..
سعود: آآآآه والله اني متضايج
سالم بغيظ : سعود وبعدين وياك؟؟؟ لا تنسى انك ريال ..
سعود بضيج : وإذا ريال يعني ؟ جيه الريال ما يعبر عن مشاعره يعني ؟؟
سالم : يعبر بس بطريقة رجوليه، انته تتكلم شرات خلود بالضبط، بالله عليك شو الفرق بينك وبينها؟؟؟
سعود : يعني ما بكون ريال ف عينك الا اذا كنت جامد ؟؟
سالم : انا ما قلت جيه.. بس دموعك هاي لا تنزلها ع شي ما يسوى/ وهاي الزفتة اللي فكرت تخطبها ما تستاهل هالدمعة/ اصلاً ماشي حرمة في الكون تستاهل هالدموع،
سعود بقهر عمره اكثر من سنة : انته تقول جيه لانك ما تحب حرمتك وما حسيت بالسعادة وياها،
سالم رفع حاجب واحد بغيظ : وانته يعني اللي جربت الحب ويا أميرة؟؟؟؟ كلنا في الهوا سوا ..
سعود يتنفس بقهر : انا ادري ان كل البنات جيه بس .... بــــــس كنت متوقعنها غييييير !!
سالم : وبعدين يعني ؟؟؟
سعود : خلاص خلاص بسكت ....

عم الصمت في كـل الأرجـاء،
وحرك سالم السيارة ،،
سعود ماله إلا يصد ويتلفت ع السيايير اللي تمر بمحاذاتهم ..

"أعود لأسترجع أجمل لحظات حياتي قبل سويعات معدودة، حينما كنت طيراً سعيداً سيحلق قريباً نحو قفص ذهبي بمحض إرادته وحده، ولكن الطرف الثاني (أميرة) لم يكن ليرغب بي، أكرهها الآن وأكره فيها غرورها السخيف، ....................... "

سالم : بلاك وين بعد سرحت، يلا انزل ..
سعود زخ سالم من ايده ..
سالم : شو بلاك ؟
سعود : سالم لا تزعل ع الرمسة اللي قلتها لك مساعة ..
سالم ابتسم له : ههههههههههههه لا ما بزعل لا تحاتي .. ادريبك هالرمسة ف خاطركم من زمان وانته طلعتها لا إرادياً
سعود : طاعوا قام يظهر الرمسة من عنده!!
سالم : ههههههههههههه خلاص خلاص أتمصخر.. يلا انزل .. وشرات ما اتفقنا ..
ونزلوا وكل واحد فيهم مجهز رمسة يمكن الباجين يقتنعون بها ..
/
في البيت سعود وسالم تموا فاجين حلوجهم من الصدمة،
ام سالم وخلود جالبينها مناحة ويصيحون على سعود
اللي استنتجه سعود إن أميرة اتصلت عشان تتشمت وتقول لـ خلود نهاية قصتها ويا سعود،
وخلود يلست تسبها وما قصرت أم سالم وياها ..
سعود يحب راس امه وبحنان : اماية شحقه الحين تصيحين ؟
ام سعود وهي تطالعه بأسى : حسبي الله عليها حتى فرحتنا ما اكتملت .. حسبي الله عليها !!!!!
سعود ابتسم : وانا اقول الحمدلله اني عرفتها ع حقيقتها قبل ما اتورط وآخذها ..
خلود بنقمة : مادري شحقه جايفة عمرها علينا، نست أيام اول يوم كانت تتسلف مني فلوس عشان تاكل ..
سالم طالعها بنظرة : خلود !!! ودري هالمعاير عنج !
خلود صخت ويلست تعض شفايفها من زود القهر ..
سعود بانكسار : أنا بسير أرقد ... عن اذنكم ..
سالم : حشى دياية !! بعدها الساعة 8 ..
سعود باستهزاء : تراني تميت طول الليل سهران أمس، ههه اوني كنت معرس ..
وسار عنهم وكل واحد فيهم قلبه متقطع ع حال سعود !!
/
يلس سعود في الحجرة، لمح موبايله يرن كذا مرة بس تجاهل الموبايل وحطاه ع السايلنت ..
يلس يفكر فـ أشيا وايدة، في حاله، في حياته اللي ما جرب انه يعيشها مع أم وأبو متفاهمين،
لو كان طرف واحد منهم ميت كان الموضوع بيكون أهون، لكن اللي يقهر وجودهم اثنيناتهم،

" أمي وأبي شبه منفصلان كما تعلمون مسبقاً، ولكن الجديد هو أن هذا الانفصال كان منذ أكثر 10 سنوات، لا أذكر مدة الانفصال بالضبط، ولكني متأكد أنهما انفصلا بمحض إرادة أبي، الذي تخلت له أمي عن أغلى ما لديها لكي تسانده، ولكنه وجد بنت الحسب والنسب التي جعلت له اسماً، ومع ذلك فالجميع يعلم أن أبي لا يمثل لنا أي موقف إيجابي في الدعم والمساندة، ربما يمثل موقفاً مخزياً لنا بعض الشيء، فها هو ينتقل كالفراشة بين امرأة لأخرى بعد وفاة بنت الحسب، ولم نراه منذ أعوام إلا أحياناً وفي دقائق معدودة "

/
.......... : السلام عليكم ..
سالم : هلا خليفة وعليكم السلام، ماشا الله أسرع عن كنتاكي ..
خليفة : هههههههههههههههههههههههههههههه .. شو نسوي بعد فاضين وما نصدق حد يعزمنا..
سالم : حياك الله يا الغالي ..
خليفة : الله يحييك ويبجيك .. عيل وينه سعود ؟
سالم : الله يسلمك سعود معتكف ف حجرته..
خليفة : هالريال لو يودر عنه الاحاسيس شوي بيرتاح ..
سالم : ما عليه مهما كان توه مصدوم وبعده ما جرب الحياة زين ما زين ..
خليفة : صدقك والله..
سالم : عيل سير له الحجرة أحسن ..
خليفة : وينها حجرته ..
سالم يطالعه بنص عين : خلووووف ..
خليفة بإحراج : هههههههههههه ... اوه صح انا ساير كم مرة .. تصدق نسيت ؟ خخخخ
سالم : هههههههههههه ما عليه ..
خليفة : احم .. ما بجوف مطبات وانا ماشي ..
سالم : هههههههههههههههههههههههههه .. لا تحاتي كلهم تحت الا سعود فوق ..
خليفة بخيبة أمل : أوكي ..
ركب فوق وهو يمني نفسه ان يمكن يجوفها،
خليفة على الرغم من القساوة اللي مغلف نفسه فيها،
إلا إنه كان يتمنى مثل ما يسمع انه يلتقي بوحدة بالصدفة،
ويحبها وتحبه، ويعيشون بسعادة،
كان يدري إن هالشي شبه مستحيل خاصة مع وضعـه ..
تنهد بحزن ودق باب حجرة سعود ومن عقبها فتحها ..
سعود بمفاجأة : اوووه خليفة !!!
خليفة يمثل انه مصدوم : اوووه سعود ؟ شو يابك هني ؟
سعود ضحك غصبن عنه : ههههههههههههههههههه يا خي خلك جاد يوم واحد بس ..
خليفة : شسويبك يعني مثلاً بكون يني جدامك ..
سعود : ويا هالويه ..
خليفة : صح تعال مبروك ع فسخ الخطوبة ..
سعود تغير ويهه : خبروك ؟؟
خليفة : لا العصفورة خبرتني ..
صخ سعود وما تكلم موليه ..
خليفة صك الباب ويلس صوب سعود : يلا عاد عن الحركات، اصلاً تدري ان هاي كلها حوباتي لانها أصلاً ما تستاهلك (يقلد صوت العيايز) انا قلت لك يا وليدي ودرها بس انته عنيد وراسك أيبس عن البطيخة ..
سعود ابتسم بحزن : هيهيهيهييي بايخة ..
خليفة : والحل يعني؟
سعود : في خاطري أرد لها اللي سوته ..
خليفة : يعني شو ..؟؟
سعود : أرمسها وأسبها لين أرتاح ..
خليفة : عندك رقمها ؟
سعود : مممممم اظني مرة كنت صارق رقمها من اختي ..
خليفة : يا الداهية، شو تتريى نش واتصل،
ظهر سعود الرقم من السدة
زخ سعود موبايله : تعال شحقه حارق تلفوني حضرتك ؟
خليفة : شسويبك قلت دامك ما بترد بتصل كم مرة لاني ضامن ان رصيدي ما بيخلص خخخخخ
سعود : ويا هالويه من يومك زطي ..
خليفة : اقول اتصل اتصل ولا تتفلسف وايد ..
سعود : انزين شو اقولها ..
خليفة : انته دق الرقم وحطه ع السبيكر ..
سعود : اوووكيه ..
على طول من اتصل ..
- ألو مرحبا ؟
خليفة حط ايده ع حلج سعود ورمس : لا هلا ولا مسهلا، شو هالصوت؟ بنية صوتها جيه ؟؟
أميرة بمياعة: شوووه!! انته منو ؟
خليفة : اليني الأزرق يا ام صوت نشاز ..
أميرة بصدمة : انته شو تقول يا المعفن ؟؟
خليفة: أنا معفن يا معفنة ؟
أميرة : انا معفنة يا القذر ؟؟
خليفة : إذا انا قذر عيل انتي زبالة .. ههههههههههههههههههههههههههههههههههه
وضحك سعود وياه ..
أميرة : صج ماشي حيا ..
خليفة : مادري منو فينا اللي ما فيه حيا .. يلا جلبي ويهج ..
أميرة : اوووووووووووه ..صج سخافة
وصكت فـ ويهه ..
خليفة وسعود : هههههههههههههههههههههههههههههههههههههههههههههههههه ..
خليفة : استانست الحين ؟
سعود : ههههههههههههههههههههههههه والله حاس اني يالس اضحك جيه بليا نفس ..
خليفة : خلاص شو رايك نرش ع ضحكتك ملح يمكن يظهر فيها نفس ..
سعود : هيهيهيهيهييييي باااااايخة ..
خليفة : انزييين وين بتعزمني ؟
سعود : صدق ما تستحي انا اليوم رفضوني لازم انته اللي تعزمني عشان تواسيني ..
خليفة ببلاهة: يلا عاد عن الاستعباط انزين .. بعدين سالم اخوك قال تعال تعشى عندنا..
سعود : لا دخيلك خلنا نظهر ..
خليفة شق الحلج : بس طبعاً ع حسابك العشا ..
سعود : اطلب المطعم اللي تباه ..
خليفة : مممممم .. نش بسرعة ولا تضيع الوقت .. ورانا درب ..
/
في السيارة ..
سعود : يعني صج يوم قالوا ان مخك ها عبارة عن قوطي ..
خليفة : انته اللي قوطي، حشى اعتبرها رحلة ، سفرة ، سيااااااحة .. شو المشكلة يعني ؟
سعود : انته متأكد انك صاحي ؟
خليفة: هيه .. صح انا شحقه متعب عمري وأشاورك .. ياخي كيفي سيارتي اسوقها وين ما أبا ..
سعود بانتقام : اوكي بنسير الشارجة .. بس يا ويييييييلك يوم الردة تخليني أسوق ..
خليفة : ما عندي سالفة أعطيك سيارتي عشان تخربها ..
سعود : انزين انزين بنجوف ..
وانشغل سعود بتأمل المباني في الشارع،
لين ما وصلوا جريب الشارجة، صوب مطار دبي،
لمح سعود "كلية الإمارات للطيران"،
ابتسم يوم تذكر أمنيته انه يكون طيار، ويدرس هناك، بس أمه ما طاعت تتحسب انه طول حياته بيتم راكب الطيارة وما بينزل لهم خخخخخ ..
/
في مطعم "بر وبحر (الشارقة)"
سعود باستهزاء : شو بتطلب يا بر ؟
خليفة : ما دري عنك يا بحر .. يلا لا تستحي كله بحسابك اطلب واتمنى ..
يا النادل (ماعرف شو يسمونه بالعامي خخخ)
خليفة : لو سمحت بغيت ام الربيان ويا البشاميل ..
سعود فاج عينه عليه ومبينه اللوعة عليه : ؟؟!!!!!
خليفة : بدال ما تطالعني بهالعين الفولاذية انطق شو تبا ؟
سعود وهو يتأمل المينيـو : ممممم .. خلاص بغيت مشكل سي فود ..
النادل : والشراب ؟
خليفة : شو تبا طبقات ؟
سعود : مادري كل ها وين يسير .. بغينا 2 ببسـي ..
وسار عنهم ..

خليفة : لاااا ابغي عصير انا ..
سعود : صدق انك زطي .. يوم العزيمة عليك توديني آكل كيمة وبراتا وجاي حليب .. ويوم قلتلك ذاك اليوم أبا أبرد يبت لي ماي .. زين مني قلت له اييب ببسي ..
خليفة : حشى يا الحقووووود .. انا ما بتضارب وياك عشان خاطر الأكل، بس عقب ما ناكل براويك ..
سعود بنص عين : بنجوف ..
وفعلاً استلموا الأكل وكل واحد هجم ع أكلته ..
بعد ما خلصوا ..
خليفة : آاااااه وجبة شهية وغنية .. سعود شكلي بخليك تسوق عني ..
سعود : عشم ابليس في الجنة .. بالمشمش هاهاهاهاا ..
خليفة : عيل خل الاكل ينهضم شوي ومن عقبها بنظهر ..
سعود : اوكي ..
(لحظة صمت)
خليفة : اخبرك سعود شو فكرت حق المشروع العلة ؟
سعود : اووووه تعال انا ولا فكرت بشي .. وانته ؟؟
خليفة : عصرت مخي وتصدق انصدمت ان في فكرة حليلها ما نشفت..
سعود : عن الاستهبال وارمس ..
خليفة: هههههه .. قلت بكلم إدارة كذا فندق انهم يستقبلوني كم يوم في فنادقهم، وبجوف أسلوب الضيافة عندهم، وعقب بسوي مقابلات مع المتخصصين في قسم الضيافة، وإحصائيات بالنسبة لرضا المتعاملين.. يعني الـ Customers.. اوه صح انته شو دراك فهالكلام بعدك ياهل ..
سعود باستهبال : عدال يا المثقف ياللي عندك خبرة فوق العشر سنوات فهالتخصص ..
خليفة صدق عمره : هي عاد تدري على طول عينوني وزير في التخصص ..
سعود : شكلي وايد خليتك تحلم .. وزير في تخصص ؟ من وين يت هاي .. نش نش ..

في السيارة ..
سعود يكلم عمره :
بـــر وبحـر ، انزين ليش ما كان الإسم بر وبحـر وجـو ؟؟
الضيافة ، في البـر والبـحر والجـو ..
(لمح مبنى كلية الإمارات للطيران)
ممممممممم .. هني عندهم الضيافة في الجـو ..
يعني مضيف ؟؟؟
يعني !!! ؟؟
خليفة يقطع عليه حبل أفكاره : جفت ويهك في المراية ؟
سعود بانتقام يصد له : انته شو يخصك بحيسه شرات ما أبا ليش راز الويه ..
خليفة : هههههههههههههههه .. ياخي أحب أقطع ع الناس أفكارهم ..
سعود : صج انك نـذ... استغفر الله ..
خليفة : ههههههههه .. شو يضمني انك ما تخطط تجتلني ..
سعود : لو عندك شي يسوى يمكن بفكر .. بس مالت عليك ما تشهي حد يجتلك ..
خليفة : الحمدلله طمنتني .. خلاص عيل بقول للفندق لا يعينوني مدير عشان ما تطمع فيه وتجتلني..
سعود ولا جنه سمع : لا تتفلسف وايد انا يالس افكر في المشروع.. وفـ بالي فكرة .. يبالها تخطيط..
خليفة : شو هي ..؟؟
سعود بإجرام : ما بقولك هههههههههههههه ..
/
اليوم الثاني ..
من الصبح انطلق سعود لـ مبنى طيران الإمارات،
ولو انه كان يتمنى يدخل الكلية نفسها، حلمه الأول وليس الأخير،
التقى بالاستاذ "محمد" وشرح له مشروع الوظيفة بشكل مبسط ..
محمد بإعجاب: والله فكرتك حلوة.. بس تتوقع يقبلونها في الفندق؟
سعود: هم قالوا يبون شي يخص تخصصنا، واظني كوني في الضيافة الفندقية، بكون متساوي في الرتبة مع المضيف في الطيارة ..
محمد يفكر : مممم لا .. الضيافة الفندقية في هالناحية رتبتها أكبر ..
سعود: بس انا حاب اخوض هالفكرة ..
محمد: انا بودي أساعدك.. لكن شو رايك أخلي موضوعك عند رئيسي في القسم لانه يتعامل مباشرة مع الطيارين وفي احتمال كبير انه يساعدك ..
سعود : مشكور وما تقصر ..

ومـع الأستـاذ "فهد"
فهد : انته تدري ان هالشي يعتبر مجازفة عودة صح ولا ؟
سعود : هيه ادري.. وعشان جيه اخترت المشروع ..
فهد : انا ما اقدر ارفض لك هالمشروع لاني انا روحي بودي أعرف شو نهايته معاك.. لكن عندي سؤال بسيط ..
سعود : تفضل ..
فهد : حد يعرف فكرة المشروع غيرك ؟
سعود : لا والله انا الا امس يتني الفكرة وعلى طول ييتكم ..
فهد : انا بجوف جدول الطيارين حسب الرحلات اللي تناسبك وتوافق مواعيد رحلتهم، لكن ابغيك تعرف شي مهم وايد، ان هالموضوع تكتمه حتى عن أجرب الناس لك ..
سعود : ان شا الله..
فهد: طبعاً عشان اوضح لك من البداية، فمهنة المضيف ماجد اشتغل فيها مواطن، واذا صادف فهالمضيف يترقى على طول يعني ما يتم مدة طويلة ..
سعود : اهـا ..
فهد : نحن بنخليك تتنكر بزي أجنبي.. عشان تقنع الركاب بجدوى خدمتك لهم .. واظني انته عارف ان صعب الناس خصوصاً هل بلادك انهم يتأمرون ع واحد من جنسيتهم.. مادري اذا فهمتني او لا ..
سعود : لا فهمتك ..
فهد : خلاص عيل .. بجري مكالماتي وبخبرك بتكون مع أي طيار وفي أي رحلة ..
(بعد اتصالات متعددة)
فهد : بتكون مع الطيار "حمد" وان شا الله لمدة شهرين سفرتكم بتكون لألمانيا/ الهند/ ماليزيا/ تايلند/ ومن عقبها الردة لـ دبي ..
وهذا رقم الطيار حمد، ان شا الله تتفاهمون ع تفاصيل السفر بأقرب وقت .. لا تنسى ان موعد الرحلة بعد اسبوع بس ..
/
" لا أكاد أصدق أنني سأحقق حلم العمر في أن أكون موظفاً –حتى ولو كنت وهمياً- في شركة طيران الإمارات، أتمنى أن أنجح في فكرة هذا المشروع، كي أثبت لأميرة أن وظيفتي التي استعرّت منها هي التي ستجعل إدارة الفندق تفخر بي وتمنحني أفضل العلاوات "

" تقابلت مع الطيار حمد، وشرح لي كافة الأمور المتطلبة مني، والأهم من ذلك أسلوبه الجيد معي، ويجب عليّ أن أنفذ كافة ما يطلبه الركاب مني بلا تذمر أو عبوس في الوجه، أعانني الله على ما سأراه، وعلى غربتي لشهرين متتاليين ! "

سؤال خطر على بال سعود،
يا ترى كيف بيكون موقف هله من سفرته المفاجأة ؟؟
تنهد برهبة، ومشى يخبرهم ..
اليوم موعد السفـر، وما يدري كيف قدر يكتم الخبر عنهم هالكثـر !!
يا ترى طموحاتك يا سعود بتتحـقق،،
ولا بيكون مصيرها مجهول محد يعلم به إلا الله ؟؟

يتبـــع / (4) قريباً



(4)

[مؤلـــــم.....أن لا يعجبك في الأنثى إلا جـمـالـهـا !!]


انصدمت أم سعود من قرار سعود المفاجىء بالسفر،
ام سعود : يعني شقايل تسافر ؟؟
سعود بتوتر واضح يحاول يخفيه بالضحك : ههه .. يعني عادي بالطيارة بلاج اميه ..
خلود بحدة : سعود انته امسات مقدم ع وظيفة كيف تسافر ؟
سعود : الوظيفة بتبدى بعد 4 شهور .. وانا.... اناا ..
سالم : ما عليه اميه خليه يغير جو ..
ام سعود : لالالالا .. نسيتوا ذيج المرة يوم سافر لندن ؟؟
سالم : يا امايه هالمرة غير .. اكيد سعود ساير لسبب ..
خلود : وشو هالسبب اللي يخليه يبدي بلاد الغربة ع بلاده ؟
سعود : انا ما بديت بلاد الغرب ع بلادي.. بس انا صج لازم اسافر
خلود : وليش لازم ؟
سالم : خلود انتي ما يخصج في السالفة عشان تتدخلين وتحاسبين سعود ..
ام سعود : لا خلها تحاسبه .. انته سكتنا عنك وما حاسبناك وخذت ..........
سعود غيظ : اوووه طاعوا كيف بيجلبون السااالفة .. السفرة هاي عشان الدوام ارتحتوا الحين ؟
سالم : وليش ما خبرتنا قبل ..
سعود : ليش يعني ؟
سالم : انا بعد بسافر !!
سعود : بتسافر ؟؟؟؟؟ ليـــش ؟
خلود : سعود سالم كليته تعبانة ولازم يسافر .. لازم انته تتم ..
سعود بخيبة أمل : محد خبرني انك بتسافر ..
سالم : خلاص سعود انته سير وحاول ترد قبل سفري .. ان شا الله أنا بسافر بعد اسبوع ..
سعود ومبين عليه القلق: والله ما يمديني ..
سالم : خلاص توكل انته والله يحفظك..

توجه سعود لأمه اللي سارت عنهم وانزوت في الصالة تصيح ..
سعود بحنان يحب راسها : اميه شحقه زعلانة .. والله انه السفرة مب لعب والله انها تخص الدوااام..
ام سالم: كلكم بتسافرون وبتهدوننا رواحنا مب حرام عليكم حرمتين روحهن في البيت ؟
سعود : خلاص بتصل في ابويه ايي يجوفكم ..
ام سالم : لالالالالالالا .. خلنا جيه احسن ..
سعود ابتسم : يعني راضية الحين ؟
ام سالم تصد بويهها عنه: انته ولد ومالي شور عليك شو أسوي !!
سعود: فديتج يا الغالية ان شا الله برد بأسرع وقت..
ام سالم : الله يحفظك يا الغالي وهالله هالله بعمرك..
/
فـي المـطار،،
توجه سعود لغرفة تبديل المضيفين وبدل ملابسه،
مات من الضحك على عمره وهو يجوف الإسم (Habeeb rangahay) وإنه فلبيني الجنسية،
التقى بالطيار حمد ورحب فيه بحفاوة،
وبدى مشوار الألف ميــــــل
بـهالخطوة!!
/
وعادت لـه ذكرياته القديمة،،
ابتسم، وهو يتذكر كل هالمواقف اللي استوت له، واللي وصلته لهاليوم،
حس بالغربة وهو روحه في الفندق، فـ فضل يتصل بخليفة،
حاول كذا مرة لين ما شبك الخط..
خليفة: الــــوووووو ..
سعود : ههههههههههه حشى حشى ليش تصارخ ..
خليفة: قلت يمكن ما تسمع صوتي..
سعود : ههههههههه ويا هالويه.. شحالك ..؟؟
خليفة: بخيييير .. انته شحالك وشحال السفر وياك ..
سعود : ماشي الحال.. ما جفنا خيره من شره لين الحين ..
خليفة: شكلك فـ ألمانيا صح ؟
سعود : هيـه .. شقايل عرفت ؟
خليفة : انته قلتلي هاهاهاهاهاها ..
سعود: ويا ويهك بعدك ما ودرت هالحركات المايعة عنك ..
خليفة: عداااال اللي يسمع مفارجني من كم سنة، الا يومين ويا هالويه ..
سعود: ههههههههههههههههه ..
خليفة: ومنو وياك الحين ؟
سعود: تصدق اني روحي ..
خليفة: انته قلتلي انك بتسافر عشان المشروع .. شو يعني ناوي تجوف خدمة فنادق برع؟؟؟
سعود: هــا ... هي هي تقريباً.. خلوف لا تستعيل بتعرف كل شي فـ وقته ..
خليفة: هيه صح ما خبرتك ..
سعود: ها ..
خليفة وهو يتذكر الموقف
" كانوا في حوش البيت، تحديداً جدام باركات السيايير،
يوم اتصلتبه أم سالم عشان ايي بسرعة البيت لان بو سالم موجود،
كان يصارخ بقوة، وسالم راقـد من التعب، وام سالم وخلود يالسين يعقون عليه من ذيج النغزات يمكن يحس ع دمه ويفارج ..
يا خليفة يهدي الموقف وهو مب فاهم شو السالفة: خلاص خلاص ما حصل الا الخير ..
صد عليه بوسالم والغيظ واصل أشد حدوده : وانته منو بعد ؟
خليفة بعبط : انا سعود ..
بوسالم يطالعه باحتقار : تستهبل ويا ويهك ..؟؟
خلود ظهر صوتها : ابويه سعود سافر خلاص وهكوه ربيعه رد عشان تصدق ان خلاص سعود سااااااار...
بوسالم: انتي جب محد كلمج (يطالع خليفة) وانته .. بأي حق تودي سعودو المطار؟
خليفة: انا التاكسي ..
بوسالم يزاعج عليه: انته متأكد انك فـ كامل قواك العقلية ؟
خليفة يحاول يخفي التوتر اللي بدى عليه بالضحك : لا يمكن نصها ..
ام سالم : الحين انته شو تبا منا ياي تضاربنا..
بوسالم: انا ياي أأدب ولدج اللي ما يعرف السنع يسافر بدون ما يتصل ولا يودع، بس فالح يطرش مسجات انا مسافر وما وصيك على امي، حضرته يستهبل؟؟ ولا خاطب لي أميرة؟ انتو شو تبون مني؟
ام سالم : لا حول ولا قوة الا بالله .. ما نبا شي منك توكل انته ..
خليفة: يا بوسالم استهدي بالله انته شحقه معصب، (ولع المصباح السحري عنده) هيه صح بو سالم انته تاجر؟
بو سالم : وانته شو يخصك ؟
خليفة ببراءة مصطنعة: اكييييييد عندك خياط ..
بوسالم: لا والله !!!
خليفة: مب انته راعي محل "بوسالم" في فريج المرر، هذاك المشهور واللي يخور ويسوي كنادير مغربية حق الحريم ..
بوسالم غيظ: أياااااا الهرم !!!!! "
قطع عليه كل شي صوت سعود : اييييه وين سرحت خسرتني رصيد ويا هالويه ..
خليفة: ههههههههههههههه لا ماشي بس تذكرت موقفي ويا ابوك ..
سعود: ليش يا البيت ؟
خليفة: هيه.. امك قالت لي ايي لان سالم تعبان وخافت تخبره ويتعب عليهم زيادة..
سعود: اكيد كان مغيظ ..
خليفة: اقولك شو شرشحني وانا كوووووول واضحك بس والله قلبي كان شوي وبيوصل لبطني من الزياغ.. حشى ابوك ولا جرانديزر ..
سعود: ههههههههههههههههه .. وشحقه كل ها ؟
خليفة: شكله ابوك استخبر انك خطبت اميرة مادري منو ..
سعود تغير شكله : انزين ؟؟
خليفة : ماشي بس كان ياي مغيظ ويقول يبا ياخذ أميرة ..
سعود بقلق: وابويه شدراه ان اسمها اميرة ..
خليفة: بصراحة ما سألته، يلست استهبل عليه لين ما لاعت جبده مني وظهر ..
سعود: زين سويت.. بس شو سالفة أميرة هاي !!
خليفة: ما عليك انته منها .. انته ما تقول انك نسيتها ؟
سعود: هيه بس يعني ............
خليفة: سعود نحن ما بنتناقش فهالموضوع أبداً .. وأوقف عوي واتكلم سيدة ..
سعود: هههههههههههههه ..
خليفة: اتخبرك انته مب مصدق ان رقمك فاتورة ؟
سعود : ليش يعني ؟
خليفة: وحليلك بترد مفقر وبتفقر أزيد بسبة فاتورة التلفون .. لالا يا حرااااام ..
سعود : اوه صح تعال انا راحت هالسالفة عن بالي .. يلا عيل خلاص مع السلامة ..
خليفة: ههههههههه مع السلامة
/
في وقت لاحق،
نزل سعود اللوبي يجيك اذا كان مطعمهم هناك فيه أكلات حلال أو لا ..
وزين انه حصل سوالف Sea Food فطلب له ويلس ياكل بهدوء..
لاحظ ان في وحدة ما طاعت تشل عينها عنه وهو ياكل،
لين ما قرر يتبع خطة خليفة يوم ينتبه ان في وحدة تطالعه،
خلص أكله وحط ايدينه تحت لحيته ويلس يطالعها..
ابتسمت له ورد هو الإبتسامة لها بغرور،
مشت صوبه وتكلمت بصوت هامس : Can I have a seat?
سعود بعبط : هـا ؟؟
ردت وابتسمت بكبرياء : أقدر أقعد ؟؟
سعود تلعثم : تفضلي ..

"كانت ملاكاً مصوراً في صورة إنسان، جميلة، وجميلة جداً جداً، بيضاء بعض الشيء، طويلة قليلاً، رشيقة، شقراء، وعيناها مستديرة كالجوزة، على الرغم من بعض الجحوظ في عينيها إلا أن ذلك أكسبها قليلاً من التميز في عيني!"

........: اسمي جويل and you؟؟
سعود وهو مبهت من جمالها : سعود ..
جويل: تشرفـنا !! .. انت from where؟؟
سعود وهو يحاول يطيل مدة الحوار بينهم : من وين تتوقعين ؟
جويل: الصراحة باين عليك اقطري على سعودي،guess more !! I cant ..
سعود ضحك : ههههههههه لا لا إماراتي ..
جويل تفاجأت : سوري ما عرفت أخمن، آنا لبنانية ..
سعود بخيبة أمل : لبنانية؟ تحسبتج كويتية ..
جويل: هههههه فيني أصول كويتية.. my grand mother كويتية ماخذة لبناني ..يقولون اني اشبهها بعد
سعود بإعجاب : بس ماشا الله تتكلمين كويتي عدل ..
جويل: لاني سكنت بالكويت تقريباً 15 سنة ومن 6 سنين رديت لـ لبنان، and because of war قمنا ندور بهالعالم ..
سعود : اها تشرفنا ..
جويل : اسمحلي قعدت جذي بلا احم ولا دستور بس والله لان بطت جبدي وانا قاعدة روحي ولما شفتك قاعد روحك قلت أكلمك يمكن أنسى الملل شوي .. مممم شكلك مسافر روحك right ؟
سعود: هيه صح .. مسافر للشغل بس ..
جويل: اييـه good good .. انت كم عمرك ؟
سعود يفكر : قولي داخل الـ26
جويل: ماشا الله زين .. انت من وين من الامارات ؟
سعود: من دبي ..
جويل: اتصدق على كثر ما اسمع الناس تطري دبي بس ما تحمست اروحها ؟
سعود: ليش يعني ؟
جويل: ما أدري يمكن لأني اتعودت ع البراد هالكم سنة ومتخيلة ان جو دبي ناااار ..
سعود : سيري لها بالشتا الجو يكون حلو ..
جويل: ايه ان شا الله .. عندك شغل هالحزة ؟؟
سعود: لا والله .. ليش ؟
جويل: شرايك آخذك بجولة سياحية لجم منطقة اهني.. حرام ياي للشغل وتحرم روحك من المناظر السنعة..
سعود: اوكي ما عندي مانع !!
/
"بدوت كالدمية التي لا تعرف إلا هز رأسها في المحافل الإجتماعية، كنت أدرك أن شكلي مضحك بشكل رهيب، ومع ذلك لم أنبس ببنت شفة، حتى اتخذنا قرار ركوب التاكسي واستطعنا خلال ذلك الوقت أن نتحدث ونتسامر بعيداً عن التكلف والتصنع، فتحدثت هي عن عائلتها الصغيرة المكونة من والدها وجدتها القاطنان بعيداً عنها، ثم "تفلسفت" على نفسي وتحدثت عن عائلتي ولكن ببعض التكلف، فلم أذكر لها أني قد مررت بتجربة خطوبة فاشلة، ولم أذكر لها عيوب أبي بل اكتفيت بإخبارها أن أبي يقطن بعيداً عنا، وبالطبع لم أتوقف عن طرح التعليقات بشأن اختي خلود وصديقي خليفة، حتى داهمنا الوقت، وقررنا العودة إلى الفندق، ونشوة الفرح بين كلينا بإيجاد رفيق مؤقت قد غمرتنا"


يتبـــع / (5) قريباً