كاتب الموضوع :
dali2000
المنتدى :
القصص المكتمله
________________________________________
مر الاسبوع ثقيل على نوف وفهد الي كل ما يقترب موعد يوم ملجتهم وهمهم يزيد....
اما حصه وعاليه فكانوا صج مستانسين ولا حاسين بعمرهم يجهزون للملجه ويدتهم فرحانه اكثر منهم اما محمد فكان معصب من قرارهم لين ما فطيم حرمته حاولت انها تفهمه انهم ان شاء الله بيتعودون على بعض وجاسم وعبدالله يحاولون يغيرون رايي يدتهم ويفهمونها ان الي تسويه غلط بس ما كان لهم أي فايدة ....
حصه : تصدقين اخاف نوف تسوي بعمرها شي
عاليه : اسكتي انا خايفه اكثر منج واذا تزوجوا احس انهم ما بيكملون مع بعض لانهم على قولتهم خوان
حصه : ههههههههههههههههه على كيفهم استووا اخوان الله يعينا على باجر ....
عاليه : تعالي فستاني باجر بيبه
حصه : هي ترانا بنسير انا ونتي الصالون اما نوف بتييها وحدة تعدلها وفطيم بتم وياها
عاليه : حلو اخوي معرس خخخخخ
حصه : عقبالج حبيتبي
عاليه : اااااااااااااامين
حصه : عفانا الله قولي عقبالج انتي بعد
عاليه : ههههههههههههههههه عقبالج
حصه : جب جب
وتمول يسولفون وبعدين كل وحدة منهم صكرت عن الثانيه لانهم يبون يرقدون لان باجر بيكون يوم ملجه فهد على نوف .......
نوف نشت الصبح جافت الفستان جدامها كان لونه تركواز رهيب خذت نفس وسارت تسبح يت حقها امها وقالتلها انهم بيبون الملاج يملج العصر وفليل بتكون الحفله ....
اما فهد فما كان راقد طول الليل يفكر بريم وكيف هو سوا فيها جيه ونوف كيف بتعيش وياه وما حس بعمرة الا وتلفونه يرن فهد اول ما جاف الرقم استغرب .......
فيصل : مرحبا بالمعرس
فهد : والله انك متفيج لو كنت مكانك بكسر الدنيا على راسك
فيصل : جب جب يالله اتجهز بيييك بعد شوي
فهد : وين بنسير
فيصل : انا بييك وبتجوف
جهز فهد عمرة ومر عليه فيصل ووداه الحلاق وخلاه يتعدل وفهد كل ما فيصل يسوي شي يعصب منه ويقوله انا ما باخذها واذا خذتها باخذها على ورق بس وفيصل كل ما يسمع رمسته يعصب منه بس يمسك عمره ....
لين ما يا وقت العصر سار فيصل ويا فهد بيت بو عبدالله والكل كان متيمع هناك كان فيصل مخلي فهد يبين صج انه معرس ونوف كانت توايج من فوق وجافت فيصل ويا فهد ..
نوف : ياريت ريم شراتك يا فيصل يا حظ الي بتاخذك والله انى خسرتك وين بلاقي واحد شراتك
دشوا داخل وبو عبدالله وبو محمد كانوا خايفين ان فهد يسوي شي ويفشلهم جدام الملاج بس فهد اعتذر منهم وظهر .... وقال انى بيي بعد شوي فيصل على طول ركض وراه
فيصل : وين ساير
فهد : خلني يا فيصل والله مب رايم انا عادي بس نوف حرام
فيصل : بقولك شي انت تدري انا ليش ياي وياك
فهد : ليش لانك طيب ومحد شراتك
فيصل : لا لانى اعرف انك بتروم تنسي نوف فيصل
فهد : كيف
فيصل : مثل ما سمعت لانى اعرف انك بتروم تسعدها ياخي والله حرام عليك والله انها احلى من ريم لو تلاحظ هالشي
فهد : اااااااااااه يا فيصل ماقدر صدقني ماقدر
قطع رمستهم عبدالله الي يا صوبهم وقالهم لازم يدشون داخل
عبدالله : يالله فهد ترى ابوي وعمي معصبين
عبدالله جاف فيصل وسا ر صوبه ...
عبدالله : مشكور فيصل ما تقصر واسمحلي على أي شي يا من صوبي غلط بحقك
فيصل : افا عليك نحن اخوان يالله خل نسير تراه معرس دلوع
دشوا داخل وملج فهد على نوف وساروا الملاج وسأل نوف وهي وافقت لانها مب رايمه تسوي شي ويدتها وياها رد الملاج لهم وقالهم مبروك بهالحظة فيصل دمعه عيونه وفهد لاحظ هالشي ...
كل شي جاهز والبنات جاهزات والعروس نفس الشي نوف بطلت شعرها لانه كان قصير وقاصتنه مدرج وحاطه ميك اب على لون فستانها ومحددة عيونها بطريقه حلوة بس تعابير وييها هي الي مخربه عليها ع الساعه 10 نزلوها تحت والكل تم يسمي عليها ماشالله عليها حلوة وجميله والكل لاحظ انها مب مبتسمه وكل ما يسألون حد من الحريم البنات او امها تقولهم مستحيه مب عارفه شو تسوي بس نوف كان فكرها ويا ربيعتها ريم لانها تمنت انها تجوفها بهاليوم وياها بس ريم كانت فبيتهم وما يت الملجه وفيصل فضل هالشي عشان فهد ما يجوفها .......
دخل فهد على انغام هاديه ودخل وياه عبدالله وجاسم ومنصور والكل كان ملاحظ اان جو المعاريس متكهرب من العايله طبعا وصل عندها فهد وحبها على راسها على طول تموا الحريم يزغرطون وام عبدالله تمت تصيح وام محمد حاسه فيهم سلموا على اختهم وساروا عنها فهد ونوف تموا قاعدين محد منهم رام يرفع راسه عشان يجوف الثاني وصلت الاطقم وحاول فهد يلبس نوف بس مب رايم يمسك ايدها حاس بايده ترتجف نوف كانت حاسه فيه بس ماسكه عمرها من الصياح ام محمد ساعدت ولدها ويدتهم كانت صج مستانسه لانها حققت حلم ريلها وريحت عمرها من الوصيه ....
حصة وعاليه حبوا انهم يسون جو حق نوف وفهد سارت عاليه جدامهم وتمت ترقص والبنات يصقفون حقها وفهد ناقع عليها من الظحك اول مرة يجوفها جيه ونوف كانت تجوفها وتبتسم عاليه تقربت من اخوها وعطته بوسه على خده وابتعدت نوف لفت ويهها عشان تجوف فهد طاحت عينها بعينه رفعت عينها على طول ياربي كيف فهد ريلي فهد الي كنت اعتبره اخوي واكثر كيف بعيش وياه على اساس انه ريلي ......
كملوا قعدتهم لين ما يات الساعه11 قصوا الكيك وشربوا العصير وساروا فوق عشان يتصورون
والمصورة عصبت منهم محد منهم راضي يظحك وحركاتهم كانت وايد بارده .....
عدت اول ليله على خير عبدالله قالهم اذا كانوا يبون يقعدون ويا بعض بيخلونهم ع راحتهم بس محد منهم كان يبي هالشي بو عبدالله حس بالذنب كيف سوا فبنته هالشي ...
اليدة : بو عبدالله صدقني بيكونون احلى اثنين اصبر عليهم
بوعبدالله : يمه هايلا ما يبون بعد نحن غصبناهم وانا بنتي ما ارظى عليها اعطيها لواحد ما يباها
اليده : فهد عاقل اصبر عليه انت بس
بو عبدالله : الله يسمع منج
عدت اول ليله على خير نوف كانت مب رايمه ترقد طول الليل من كثر ماهي خايفه من رده فعل ريم فقررت انها اطرشلها مسج ....
( تمنيتج تكونين وياي هاليوم ريم انا مالي ذنب والله انى مظلومه شرات فهد دخيلج خلينا ربع )
ريم قرت المسج وانصدمت يعنى شوة تباني اكون وياها بهاليوم على طول بدون تفكير دقتلها
نوف : الو
ريم : شقصدج اكون وياج بهاليوم ليش شو فيه اليوم
نوف : ليش انتي ما تدرين
ريم : شو ادري
نوف : بس فيصل كان موجود
ريم : لا تيبين طاري اخوي ع لسانج شو صار اليوم ارمسي
نوف : ملجت على فهد اليوم
ريم : لاااااااااااااااااااااا لاااااااااااا نذله اكرهج اكرهج
وعلى طول صكرت التلفون نوف من كثر صدمتها بهالكلمه ما حست بعمرها الا وهي داقه على فهد
فهد انصدم من جاف رقمها تردد يرد ولا لا شو اقولها كنت اتمصخر وياها احينه شو بقولها ياربي تردد بس قبل لا تصكر رد عليها :
فهد : الو
نوف : فهد حرام ريم فهد
فهد : شفيها ريم
نوف : انا نذله والله اني نذله كيف اخذ منها قلبها كيف
فهد : نوف هدى انتي مالج ذنب
نوف : ليش ما رمسنا ليش ما وقفنا ضدهم ليش
فهد : هاي رغبه يدتي نوف ونحن ما نروم عليها
نوف : فهد انا ماقدر اعيش وياك دخيلك افهمني
فهد : والله انى حاس فيج ولا تخافين انتي حرمتي جدام الناس بس نوف انا ما اروم اغصبج على شي انتي ما تبينه
نوف : ليش نحن فهد ليش
فهد : الله يعين الي بعدنا يا نوف ما ندري شو مخطط لحصة وعاليه
نوف : لا ما بخليهم يسون شي بأختي لو الموت
فهد : هدى اعصابج انتي احينه
نوف : شو احينه شو بنسوي يعنى بنسكت
فهد : عندج راي ثاني
نوف : جبان جبان اكرهك
وصكرت التلفون بويهه .................................................. ..فهد انصدم من رمستها اول مرة نوف تقوله هالشي عذرها بس خذ بخاطره منها .................
مرت الايام والشهر الاول مضى على خير فهد ما رمس نوف فيها ولا مرة ولا جافها اما نوف فنشغلت بدراستها عاليه وحصه وفطيم كانوا متكفلين بكل شي من تجهيز حق نوف ويدتهم فاطمه ما سارت العين من يوم الملجه قالت انها بتم فبوظبي ليوم العرس وحمدان يصر عليها وكل يوم تقريبا يدق لها ويقولها تيي تولهنا عليج بس هي كانت ادخل الرمسه من الاذن اليمين وظهرها من اليسار خايفه انهم يسون شي بغيابها اذا سارت عنهم لانها لاحظت ان فهد ونوف بعاد عن بعض بشكل هي ما كانت تتصوره بعد ما كانوا اقرب الناس لبعض بو عبدالله حاول يقنع امه برايي عياله بعد ما أثروا فيه وكان باوقات يعصب منها ومن برودها وهي تسوي فيه شرات ما تسوي بحمدان وتقوله كلمه تسكته ( وصيه ابوك هاي )...........
نوف حصلت حقها ربيعه معرسه بالجامعه وتسير وتيي وياها اما ريم دوم بروحها ادش كلاساتها وتظهر من الجامعه على طول .................
تحدد موعد العرس بيكون شهر 6 بعد الامتحانات على طول ...............
فبيت بو عبدالله كان اليوم الاربعاء دش جاسم البيت جاف يدته قاعده بروحها وسار وييلس صوبها ......
جاسم : اشحالج يدو
اليده : بخير يسرك حالي حمدلله ع السلامه
جاسم : الله يسلمج
اليده : جاسم طلبتك
جاسم : تم يدو افا عليج بس لا تقوليلي سوق دخيلج
اليده : ههههههههه امبونك ما تيلس فالبيت تودي منو السوق من ورانا
جاسم : يدوووووووووووووو انا ما افكر بهالسوالف لا تفهميني غلط
اليده : صخ انزين دق حق فهد ولد عمك ابا ارمسه
جاسم : ما يحتاي هو بيي احينه بيمر علي بسير وياه
اليده : عيل قوله يدش اباه بسالفه
جاسم : شعندج يدو ان شاء الله غيرتي رايج
اليده : اسمع جسوم هاذي وصيه يدك تفهمون انتوا شو يعني وصيه يعنى محد يروم يغير هالشي
اليده كانت ترمس على دخلت فهد الصاله ..........
فهد : محد يقول شي يدو وصيه يدو بتتنفذ
اليده : ادريبها بتتنفذ بس الي يجوفكم انت وحرمتك ما يبشر بالخير كل واحد منكم بصوب عنبو على الاقل احترموا وصيه المرحوم ..........
جاسم : فهد ايلس بسير ازقر نوف
فهد : بس بنتأخر
اليده : لا تسير شكله ما يستاهل ظفرها عنبو حد يودر بنت عمه حق الغريب
جاسم : جوف انا ماحب اعق اختي على واحد ما يباها تراها اختي على عيني وراسي
اليده : شيخه الحريم هاي نوفو
دشت نوف على هالموقف لانها توها يايه من الجامعه كان عندها تسليم بروجكت وتاخرت بالدوام ....
نوف : السلام عليكم
فهد انتبه انها لابسه الدبله وما حاطه شي ثاني بايدها لانها كانت متعوده انها تلبس خواتم اشكال والوان على حسب لون بدلتها .......... ويهها متغير 180 درجه عن اول ........
اليده : وعليكم السلام شعنه متأخرة حبيبتي مب من عوايدج
نوف : كان عندي شغل يدو ولازم اخلصه تدرين كورس تخرج هاذا
جاسم : خلاص سيري غرفتج احينه
نوف : ان شاء الله
فهد : لا صبري ابا ارمسج
اليده : توه ما افتكرت
جاسم : شو تبا تقولها ؟؟؟
نوف انتبهت ان لهجه جاسم وايد متغيره وشكلهم كانوا يظاربون لانه كان صج معصب
فهد : من بعد اذنك يعني جاسم ...
جاسم : ما يحتاي تستاذن تراها حرمتك
نوف : نسير الميلس فهد
فهد مسكها من ايدها وخذها نوف استغربت من هالحركه بس هي تدري ان فهد قصده شي ثاني او عشان اليده ....وساروا بروحهم ...
اليده : هاذا اول الخير
جاسم : الله كريم يالله يدو انا بسير عنج بترياه برا
اليده : الله وياك
بالميلس فهد دخل الميلس ودشت نوف وراه اول شي سوته هي انها بعدت ايدها عن ايده ....
فهد : نوف انا مالي ذنب بالي استوى بينج وبين ريم
نوف : ما الومك انت ما يخصك
فهد : اسمحيلي ادري انى مقصر
نوف : لا عادي اصلا انا فاهمتنك
فهد : خلاص عيل خلينا نتفق من احينه انا ونتي بنكون شرات الاخوان حتى بعد ما نعرس ..
نوف من سمعت هالرمسه استانست من خاطرها وفهد حس فيها ...........
نوف : اللي يريحك
ومن ظهر عنها ذاك اليوم ما جافته خير شر ولا سمعت صوته ............
مر الوقت طويل على عاليه وحصه لانهم كانوا يتريون هاليوم أكثر من أي وقت بكشختهم واناقتهم ...
نوف انشغلت بدراستها لانها خريجه وفطيم تكفلت بكل شي وام عبدالله وام محمد بتجهيزات العروس الي كانت ما تحس ان عرسها قرب ...........
اما ريم فهي تعد الايام عشان تتخرج وتفتك من شي اسمه دراسه وتبا تشتغل وتنسي عمرها فهد وتنتبه لحياتها .........
(22-6) اليوم موعود للكل يوم زفه فهد على نوف الكل كان مستانس الا فهد الي حاس ان هاليوم اخر يوم بحياته .......
عاليه وحصه كانوا سايرين دبي عشان يكشخون اما فطيم فتمت ويا نوف وياتهم راعيه الصالون الصاله .......
فهد كان يالس ع البحر وفيصل وياه ..............
فهد : دنيا والله انها دنيا
فيصل : ههههههههه كشخه والله انت معرس
فهد : هههههههه نكته حلوة يا برودك ياخي
فيصل : تعال بسرعه من شهر العسل تراني بملج
فهد : بذمتك
فيصل : هيه والله
فهد : بتاخذ منو
فيصل : بنت عمي
فهد : مبروك فصووووووول والله وكبرت افا عليك وريم ؟؟
فيصل : امممممممم هي ما تبا تعرس تقول بتكمل دراستها وبتشتغل
فهد : زين اروم اخذها الثانيه يعنى
فيصل : هههههههههههههه حشم يا ريال
فهد : متفيج تراك
فيصل : وانا شو قلت احينه
فهد : قم خل نسير يبالي اكشخ معرس اوني
فيصل : يالله قم واحلى معرس بعد
فهد : جب جب
فيصل : صلوا على محمد صلوا على محمد
فهد : هههههههههههههههههههههه سخييييييييييييييييف
جو الصاله كان خبال عاليه وحصه كانوا احلى من الحلا كله ماشالله عليهم ولا ملكات الجمال
يترقصون ويسولفون ويا ربعهم .... فطيم كانت بعد حلوة لدرجه ان ريلها محمد مب راظي يخليها تنزل من السياره .....
دشت ام عبدالله على بنتها نوف الي كانت قمر 14 كانت بنت ولا كل البنات عروس قمر ماشالله
نوف كانت حاطه مكياج مخلنها احلى من قمر 14 وتمت امها تسمي عليها .....
ع الساعه 10 و 45 دقيقه قرروا انهم يدخلون العروس على انغام حلوة وهاديه نوف كانت حاسه الدنيا مسوده يوبهها وحاسه بفهد الي انظلم وياها الكل كان عارف ان نوف مب مستانسه ولا فهد .....
على انغام هاديه وموسيقى ولا اروع كانت خصيصا للمعرس والعروس دشت نوف وكانت قمر 14 الكل تم يطالعها ويسمي بالرحمن عليها ..........
حتى ربيعتها الي تعرفت عليها بالجامعه اول مرة ما عرفتها لان شكلها كان متغير وااااااااااااايد دشت نوف وركبت ع الاستيج وابتسمت للناس وكان تقول بخاطرها على الاقل هاليوم ما بيتكرر مرة ثانيه خلني افرح حتى ولو حق نفسي .....
يست نوف ع الكوشه والكل قام يسلم عليها ويسمي بالرحمن وكذا حرمه قالوا حق ام عبدالله وين كنتي خاشه هالقمر عنا وام محمد تقولهم سموا بالرحمن بتحسدون حرمه ولدي ويظحكون واليده كانت قاعده بعيد محد حس بغيابها لانهم كانوا مرتبشين ..........
ع الصوب الثاني الكاميرا كانت تصور يوله الشباب بقاعه الرياييل جاسم ومنصور ايولون من خاطرهم وفيصل دش وياهم ونوف من جافت فيصل نزلت راسها بلارض ...
وبعدها بدقايق حصلوا فهد يرزف وركظت حصه حق نوف تخبرها ونوف رفعت راسها وتمت اطالع الشاشه من خاطرها لاول مرة تتأمل فيه لهاي الدرجه ....
نوف : حصة دخيلج سيري ازقريلي اسما دخيلج
حصه : اسما منو
نوف : ربيعتي بتحلصلينها قاعده ع الكورنر هناك ( وتأشر حقها )
اسما حست انها نوف ترمس عنها اسما هي ربيعه نوف المعرسه الي تعرفت عليها بالجامعه بس ما تعرف الي صار بينها وبين ريم اسما كانت دوم وياها اسما ما تعرف سالفه فهد ويا نوف بس هي كانت حاسه ان نوف مغصوبه على هالشي لانها ما حصلت ولا مسج بتلفونها من ريلها فهد ولا حتى اتصال بعكسها بفتره خطبتها تلفونها ما وقف من اتصالات ريلها .........
سارت اسما صوب نوف ويست حذالها ............
نوف : سوري تعبتج
اسما : لا عادي افا عليج
نوف: اسوم خايفه
اسما : من شوة
نوف : من كل شي من سالفه اسمها عرس
اسما : بتتعودين صدقيني
نوف : انتي ما تعرفين شي عشان جيه الكلام سهل تقولينه
اسما : تريتج تخبريني بشي طول فترة ملجتج ما قلتي ما حبيت اضغط عليج
نوف : خلاص باجر بدقلج ترييني
اسما : هههههههههههه بتكونين مشغوله صدقيني
نوف : لا تحااتين هالشي بس انتي تريي اتصالي
اسما : ان شاء الله مبروك حبيبتي
وباستها وسارت عنها ................
ع الساعه 12 قالوا انهم بيدخلون المعرس انطفت الانوار وعاليه كانت مسويه جو على دخلة اخوها . الجو كان ظلام غير ليتات زرقا ظاهرة من ورا كوشه نوف ...
فهد كان نازل من على الدري ووياه منصور وجاسم وبو عبدالله وبو محمد وعبدالله اخوها ...
فهد ماشالله عليه حليو البنات اول ما جافوة اتخبلوا كل وحده منهم فجت عيونها على جمال فهد واخوان نوف .......
ساروا صوب الكوشه سلم فهد على نوف وحبها على راسها حط عينه بعينها فهد لاول مرة يتأمل بملامح نوف ونوف حست بنظراته بس كانت منزله راسها وساروا اخوانها صوبهم وسلموا عليها وتصوروا وياهم .... وما صارت دقايق وكانوا الشباب بيظهرون يت حقهم يدتهم وعيونها كانت غرقانه بالدموع ....
اليده : احينه اروم اقول اني ربيتكم صح
بو عبدالله وبو محمد حضنوا امهم وباسوها على راسها وتصورت وياهم وقفت بالنص بين نوف وفهد ومسكت ايد كل واحد منهم .........
قبل ما تسير عنهم هدت ايدهم وحطت ايد نوف بأيد فهد وسارت عنهم نوف اول مرة تحس برجفه بأيدها وجسمها كله وأول ما سارت عنهم فهد هد ايده عنها ........ نوف اظايقت من حركته بس هو كان يردلها الحركه الي كانت مسوتنها فيه من فترة يوم مسك ايدها وهي هدته ايده عنها .....
جاسم ومنصور ما قصروا تموا ايولون من خاطرهم وعبدالله يالس يجوفهم من بعيد ويضحك عليهم حاولوا انهم يدخلونه وياهم بس ما رضى ....
________________________________________
ظهر بو عبدالله من الصاله وسار وراه بو محمد ومنصور وجاسم وعبدالله وياهم بس تأخر عبدالله شوي لانه سار يسلم على امه وعمته الي لحقوا عليه وما رام يلحق الباقين لانهم ظهروا على طول ..........
ام عبدالله : عقبالك يا ولدي
عبدالله : بعدني امايه صبري عليه
ام محمد : وين بعدك اختك الصغيرة عرست ونت شو تتريا ان شاء الله
عاليه وحصه ساروا صوبهم ......... عبدالله اول ما جاف حصه وعاليه اييون صوبه ما انتبه لهم وايد ....لانه ماعرف عاليه ......
حصه : مرحبا الساع ممكن نتعرف
عبدالله : بسم الله الرحمن الرحيم هلا بأختي هلا بالقمر
حصه : بس عاد استحي
عبدالله ما عرف عاليه لان شكلها كان صج متغير ...............
عاليه : من زينها خخخخخخ
عبدالله : ها لا شوة اختي حلوة
حصه : ههههههههههه شكله ما عرفج
عبدالله : ليش منو الشيخه
عاليه : هههههههههه هيه والله ما عرفني
حصه : بطتي هاي
عبدالله : عاليه ؟؟؟
عاليه : لا بطتها خخخخخخخ
رفع عبدالله راسه عشان يجوفها ومن جافها انصدم طاحت عينه بعينها كانت صج متغيره ومحلوه بزياده ابتسم حقها هي لاحظت ان نظرته حقها غير على طول شلت عمرها وسارت بعيد عنهم .......
حصه : ههههههههه استحت وحليلها بطتي
عبدالله : يالله بترخص عنكم
ظهر عبدالله برا وجاف منصور بروحه يظحك سار صوبه ........
عبدالله : اوة اوة يعلها دوم هالبسمه
منصور : ههههههههههه عرس اختي لازم افرح
عبدالله : الله يدوم هالفرحه علينا دوم
منصور : مب عشان جيه بس
عبدالله : ليش شو عندك بعد ...
منصور : شو بعد فهد اتزوج يعنى ريم ما بياخذها وانا الي باخذها
عبدالله : ههههههههه خلص دراستك انت اول
منصور : بخلص وبشتغل وباخذها
عبدالله : لين ما تخلص البنت عرست
منصور : لا ما بتعرس بتترياني
عبدالله : ليش ترمسها ؟؟
منصور : يا ريت
عبدالله : البنت ما عندها هالحركات لا اتم تيي صوبها حشيمه البنت عن حركاتك
منصور : احبها والله احبها
عبدالله : هي ما تباك فكر بهالشي
منصور : خلاص صكر السالفه وسار عنه ...........
بالصاله نوف وفهد كانوا قاعدين محد منهم رايم يرفع راسه عشان يجوف الثاني قعدوا لين الساعه 1 تقريبا بس ساروا فوق بعد ما قصوا الكيك ...........
ساروا فوق دخل فهد ويا نوف الغرفه عشان يصورون .................
بس نوف حست ان فهد مستانس هاليوم اكثر من يوم الملجه ....
فهد : ما يخصني ابا اصور بروحي كم صوره
نوف : خذ الصور كلها حقك انا مابي اصور
فهد : احسن شي تسوينه
نوف : لا والله بنجوف منو بيصور أكثر
فهد : لا تحاولين انا اكثر
نوف : وييييييييييييو انا صورت قبل اكثر عن 100 صوره
فهد : بل عليج بيزاتي كلهن خلصن ع الصور
نوف: ههههههههه محد قالك عرس
دشت عليهم الحرمه بهالوقت عشان تصورهم وفهد خذا اكثر من وضعيه بروحه ...
سلمى : لو سمحتوا ممكن توقفوا قدام بعض
وقفوا هم الاثنين بس هي مسكت ايد نوف وخلتها على جتف فهد وحطت ايد فهد على جتف نوف وخلت عيونهم تتلاقى مع بعض ....
هاي ثاني مرة فهد يحط عينه بعيونها ونوف نفس الشي نوف حست باحساس غريب داخلها اول مرة تحس فيه وعلى طول نزلت عيونها ....... فهد ابتسم من حركتها بس سلمى قالتله انها لازم ترفع راسها ... فهد مد ايده ورفع راسها نوف انصدمت من حركته ورفعت راسها وجافته مبتسم ابتسمت بويهه وكملوا التصوير وخذوا اكثر من 50 وضعيه ويا بعض .....
ع الساعه 2 فليل سلموا على اهلهم وساروا كل واحد منهم بصوب اما فهد ونوف فساروا دبي على طول لانهم بيسافرون بعد ما تطلع النتايج ......
وهم بالطريق نوف حست بالملل فقررت انها تشغل الراديو بس كانت مستحيه انها ترمسه ..
"نوف" ياربي هلانسان شكله ما يدانيني حتى كلمه مبروك ما قالي متى ايي باجر ابا ارمس اسوم واقولها كيف اصرف ....
"فهد" شو اسوي كيف اصرف وياها هي ما تباني مغصوبه علي كيف بتتحمل العيشه وياي ما اقدر اعودها علي ....
مدت ايدها نوف عشان تشغل الراديو بس ما عرفت كيف تصرف وياة ..
فهد : ههههههههههههه يبالج كورس شلي ايدج بتخربينه
نوف سكتت وما قالت أي شي وهو حس بعمره انه قال كلمه ممكن تجرحها بس بدون قصد .....
وصلوا الفندق بعد ساعتين نوف حست برجفه بجسمها اول ما ادشوا الغرفه ....
فهد : ام كشه بسير اسبح تبين اييب لج شي من تحت ولا .....
نوف : لا مابا احس عمري تعبانه بسبح وبرقد
فهد : احسن شي تسوينه
نوف : ادري
فهد : خلاص سيري اسبحي وانا بسير تحت وبيي
نوف : اوكي
فهد : نوف
نوف : هلا
فهد : لا تخافين انتي بتظلين اختي شرات ما كنتي ....
نوف صخت وما قالت شي ....
سار فهد عنها تحت وهي سبحت ورقدت على طول ويوم يا كان متوقع انها اتم واعيه تترياه بس جافها راقده سار صوبها ويهها تأمل فيه حس باحساس كان يبا يتقرب منها بس مسك عمره ونش عنها وسار يسبح ورقد ...........
فبيت بو عبدالله كانوا ياسين بعد ما ردوا من العرس يسولفون ....
اليده : يالله باجر ابا حد يوصلني البيت
عبدالله : افا يدو تمي ويانا
اليده : بيي يوم انت بتعرس
عبدالله : ههههههههه ما عندج عروس حقي انا بعد
اليده : هههههه يا ولدي انا الي سويته بفهد ونوف غلط انا عارفه هالشي بس وصيه يدك ما اروم اردها وانتوا عاد براحتكم سوا الي تبونه
عبدالله : بس نا ابا عروس من صوبج
ام عبدالله : جيه ونا وين رحت
عبدالله : نتي ع العين والراس
اليده : امممممممممم ما عندي يا وليدي
عبدالله : افاااااا حصلتي حق فهود وفريتيني بحر
اليده : هههههههه ماعاش منو يفرك
حصه : وانا يدو ابا معرس
جاسم : انطبي نتي عيب عليج هالرمسه
اليده : بتاخذون شوري
عبدالله : افا عليج يدو من ايدج هاي لايدج هاي
بو عبدالله : بس امايه اذا بغوا زين اذا ما بغوا لا تجبرينهم
اليده : شعندك انت تتحرطم صخ مكانك
عبدالله : ههههههههههههههههههههه
اليده : امممم عبدالله بياخذ عاليه
عبدالله : والله
اليده : جوف ما تباها قول
حصه : عليو البطه
عبدالله : جب انتي اباها يدو
جاسم انصدم من رمستهم وما رام يعلق جاسم يبا عاليه داشه بخاطره بس ما رام يقول شي ...
منصور : وانااااااااااااا
جاسم : وانااااا
حصه : وانااااا
يدتهم يودت راسها وسارت عنهم وخلتهم بروحهم ..............
الكل تم يظحك عليها رمسوا شوي وبعدين ساروا يرقدون ..........
ف اليوم الثاني نوف نشت من الصبح استغربت من المكان الي هي قاعده فيه واستوعبت انها عروس .....
سارت سبحت ويوم ظهرت حصلت فهد ناش ....
نوف : صباح الخير
فهد : صباح النور الساعه جم ؟؟
نوف : الساعه 12 الظهر
فهد : وييه تأخرت بالرقاد
نوف : محد بيقولك شي لاتخاف انت مش ف البيت
فهد : متفيجه تنكتين بعد
نوف : ..........................
انا ليش اسكت عنه ليش ما اتحمل رمسته شرات قبل ليش كل كلمه يقولها حقي احس انه يجرحني فيها .... سار هو يسبح واستغلت هالفرصه ودقت لربيعتها اسوم ..
اسما استغربت من اتصالها لانه صج اتصلت .....
اسما : السلام عليكم
نوف : وعليكم السلام اشحالج اسومه
اسما : تمام اخبارج انتي مبروك يا عروس
نوف : أي عروس الله يهداج اسما ابا مساعدتج
اسما : بشوة ؟؟
نوف : بقولج شي بس اباه يكون بيني وبينج اسومه انا انجبرت على هالزواج شرات فهد .........الخ ( خبرتها السالفه بالكامل وباختصار )
اسما : يعنى انتوا الاثنين ما تبون بعض
نوف : بقص عليج لو قتلج ما اباه قبل هي كنت ما اباه بس من البارح ماعرف احس بشي غريب اول مرة احس فيه اول مرة احط نفسي بمكان الزوجه حق فهد
اسما : هو يحبها
نوف : هي وانا متاكده من هالشي تدرين في اوقات افكر انه اقوله يعرس علي وياخذها
اسما : اياج تحاولين هالشي اسمعي ريلج حقج انتي وبس فهد انسان طيب حاولي تكسبينه صدقيني بتكونين سعيده بحياتج يدتج لو ما تعرف هالشي ما كانت بتسوي الي سوته نوف فكري بعقلج ليش تخلين الغريب ياخذ منج حقج فهد حقج انتي وبس حطي هالشي فبالج واذا هو ما يحبج خليه يحبج غصبن عنه ....
نوف : واذا ما قدرت
اسما : مافي شي اسمه ما قدرت حاولي بس بدون ما تبينين حقه هالشي واول شي تسوينه اكشخي واذا قالج شي قولي عروس ومن حقي .....
نوف : ان شاء الله خلاص احينه يمكن يظهرمن الحمام اذا حصلت فرصه بدقلج باي
اسما : باي
صكرت نوف عن اسمها وبراسها الف كلمه وخطه من كلام اسما حقها ...
فهد بدا يميل حقها ونوف نفس الشي بس كل واحد منهم حاط فباله ان الثاني ما يبيه .......
تكشخت نوف ولبست احلى ما عندها وحطت ميك اب خفيف طالعه قمر ماشالله عليها كعادتها ظهر فهد من الحمام وجافها مسويه بخور وريحته معطره الغرفه بالكامل ...
فهد : يالله يالله اونج احينه تبين تقولين انج شاطره
نوف : انت شعليك انا عروس وكيفي بسوي الي اباه
فهد : لا والله أي عروس أي خرابيط انتي تسمين هاذا عرس
نوف : هيه ليش انا كم مرة بزوج بحياتي
فهد : ههههههههههههه ويا راسج ام كشه
نوف : مالت عليك اسكت بس الله يخليك
فهد : يالله اللبسي بنظهر نتمشى
نوف : صج وااااااااو
فهد : توج تقولين عروس لازم نخليج تصدقين عمرج هلاسبوع خخخخخ
نوف : غصبن عنك
سارت نوف وتلبست وكشخت وهو نفس الشي نوف تلف الوقايه بطريقه حلوة حتى فهد يعيبه لبسها وتم يراقبها وهي تلبس وهي ملاحظه هالشي بس ما قدرت تقول شي ............
ساروا تغدوا بمطعم وهي كل ما تنزل راسها عشان تاكل يحط عيونه عليها ( يالله محلاها انا ويني عنها كل هالسنين )
تصرفاتها شرات اليهال واسلوبها حلو .................
خلصوا ع العصر تمشوا صوب بحيره خالد بالشارجه وقالت نوف حق فهد انها تبا تسير المول تتشرى اغراض حقها ...
فهد : ويا ويهج واغراض العرس وين وديتيهم
نوف : انا اصلا ما اشتريت شي فطيم وامي الي اشتروا كل شي
فهد : ههههههههه
نوف : قول انك بخيل وفك عمرك
فهد : تهبين الا انتي مشي وياي
ساروا صوب وافي سيتي دشت نوف المول وكل ما تجوف محل تسير تشرى ذوقها ماشالله وايد حلو وكانت تتشرى لشهر العسل لانهم بيسافرون بعد اسبوعين فرنسا .....
تعبت نوف من المشي .....
نوف : فهد تعبت ابا شي عطشانه
فهد : اوكى ترييني هني بسير اشتريلج شي وبيي
نوف : اوكى
سار فهد ياخذلها عصير واستغلت هالفرصه وسارت باريس غاليري خذتله ساعه ومجموعه عطور ..... وظهرت بسرعه من المحل ...
يوم ردت جافت فهد ياي صوبها وكانوا شله شباب متجدمينه في واحد منهم جاف نوف ما رام يخوز عينه عنها لانها محدده عيونها بطريق تخلي أي واحد يلتفت حقها ولبسها كان مرتب وطالعه حلوة ....
يا صوبها واحد من الشباب هي ما كانت منتبهه لان نظرها كان مركز على فهد وكشخته الي مالي عليها الدنيا بنظرها ...
االشيخه التفتت صوبه بدون قصد يوم سمعته وقط عليها الرقم وتم وراها فهد من جاف المنظر عصب من خاطره وسار صوبها على طول .....
هي من النوع الي ما تخاف من شي وبكل برود ردت عليه
نوف : ما اتنزل اخذ رقم واحد شراتك بايع عمره وشرفه بتذلف عن ويهي احينه ولا اييبلك الشرطه
....: افا حبوبه والله ان عيونج تذبح
نوف : حشم نفسك ترى ريلي وياي
الولد انصدم يوم سمعها تقول ريلي وما حس الا بأيد فهد عليه ..
فهد : لو تكمل طريجك يكون احسن
...: السموحه اخوي
وسار عنهم فهد كان صج محرج من الموقف ..
فهد : تغشي
نوف : ليش
فهد : قتلج تغشي
نوف : ليش انا مب متعوده اتغشي
فهد : عيل قومي خل نرد البيت
نوف : اوكي يالله
قهد انقهر من برودها وياه .......... وهم بالسيارة نوف قررت انها تفتح الموضوع وياه ...
نوف: فهد ملل شغل المسجل
فهد : مالي خلق
نوف : انت ليش محرج انزين
فهد : كل الي استوى وما تبيني اعصب
نوف : ليش تغار ؟؟
فهد : شو قصدج
نوف : جوف انت بيي يوم وبنفترق عني فيه صح ولا لا
فهد : ..................
نوف : لا تقولي تغشي وتفرض علي شي تروم تسوي هالشي حق حرمتك مب حقي
فهد : ليش انتي شوة
نوف : بس انا ما عطيته مجال ورديتله بالمثل لا تحسبني شرات هالبنات
فهد : محشومه
سكتت شوي عنه وقالت الطف الجو احسن من ازيده ......................
نوف : فهود انا يوعانه
فهد : ابتسم يوم سمعها تسولف شو تبين ؟؟
نوف : ابا سلطه
فهد : بس
نوف : هي بس تحسبني شراتك دبه ما اصدق اجوف اكل
فهد : هههههههههههههههه ويا ويهج
وصلوا الفندق واول ما نزلت نوف من السياره تغشت فهد استغرب منها ما توقع انها ممكن تسمع رمسته ....
وصلوا الغرفه ....
فهد : نوف ليش تغشيتي
نوف : عشان ريلي قالي تغشي
فهد : هههههههههههه اونج تسمعين الرمسه
نوف : شسوي لازم اخليك اصدق عمرك شوي
فهد : ههههههههههه ملسونه ما اروم عليج بس تصدقين مالوم الريال يوم لحقج
نوف : ليش
فهد : لاني لو مكانه بسوي نفس الشي
استحت نوف وتمت تبتسم ,...
نوف : يوعانه سير اطلبلي اكل
فهد : من عيوني بدق احينه
اتصل فهد بالرسبشن وطلب منهم اوردر .
تعشوا ويا بعض ... وتموا يسولفون شوي وبعدما خلصوا سارت نوف تغسل ايدها
.وهي كانت بالحمام تغسل ويهها ................
فهد : نوف وين اغراظي
نوف : ماعرف شدراني في شنطتين تحت ما فتحتهم
فهد : وين أي صوب
نوف : صوب الكبت مناك
فهد جاف شنطتين ثنينتهم نفس اللون ..
فهد : أي وحده منهم مالتج
نوف : ماعرف افتح أي وحدة
فهد : مالتج وحده منهم صح ؟؟
نوف : ماعرف هاي عاليه وحصه حاطينها يمكن يبوني احط لهم هدايا فيها
فهد : ههههههههههههههههههههههههههه تعالي اخاف ابطل شنطتج
سارت نوف صوب فهد وكل واحد منهم بطل شنطه من الشنط بس نوف مسكت شنطه فهد وفهد مسك شنطه نوف ............
نوف اول ما فتحت الشنطه جافتها شنطه فهد رفعت راسها عشان تجوفه لقته ساكت وعيونه على الشنطه ....
نوف : فهد شفيك هاي شنطتك
فهد : ........................
سارت نوف صوبه واول ما جافت الي بالشنطه ويهها استوى احمر وفهد تم يظحك عليها............
الشنطه كانت عباره عن ثياب نوم للعروس ومكتوب بطاقه عليها من فوق بعد ما تخلصين منها ااترسيها هدايا ورديها لاصحابها .... التوقيع ( حصوص+ علايه )
نوف ما رامت تمسك عمرها وعلى طول نشت وسارت صوب التلفزيون وشغلته فهد تم يظحك عليها وشل اغراضه وسار يسبح ....
نوف : الله يغربلكم ان شاء الله شو هالموقف البايخ الي انحطيت فيه
فهد تأخر بالحمام ملت من التلفزيون وسارت صوب الشنطه فتحتها مرة ثانيه وطلعت الي فيها كانت متروسه ملابس حلوة ورقيقه اذكرت كلام اسما لما قالتلها ريلج حقج دافعي عن حقج شلت بجامه من داخل كانت حلوة لونها ابيض ورقيقه ..... بخرتها وعطرتها وفضت الشنطه وحطتهم كلهم بالكبت ...........
اول ما ظهر فهد من الحمام دشت هي وراه فهد كان تعبان قاله انه بيرقد تم يتقلب ماياه رقاد يفكر بنوف وبالموقف الي استوى وياه بالمول ...........
ماشالله عليها احلى من ريم بوايد والكل يتمناها حتى الغريب يوم جافها سار صوبها ليش انا الوحيد الي مب رايم اسعدها انا لازم ارمسها وتم يترياها لين ما تظهر حط راسه ع المخده وتم يفكر لين ماحس انها ناويه تظهر من الحمام .....
ظهرت نوف شوي شوي لانها كانت حاطه فبالها انه راقد سارت صوب المنظرة تعطرت ونشفت شعرها وسارت صوب الكرفايه عشان ترقد وقبل ما تقعد حست بفهد انه واعي ....... ارتبكت ف البدايه بعدين خلت عمرها عادي .........
نوف : ليش مب راقد
فهد : ما يايني رقاد
نوف : ليش بشو تفكر
فهد : افكر بالدنيا الي تجبر الانسان على شي هو ما يباه
نوف : فهد اذا انت تبا ريم انا ما بمنعك من هالشي
فهد : ههههههههههه ادري اصلا باخذها الثانيه وانتي بترحبين فيها
نوف : شووووووووووووة تخسي الا انت اول طلقني بعدين خذها
فهد : لا والله ليش اطلقج بخليج تشتغلين حقها
نوف صج عصبت من رمسته ...
نوف : اسمع تباها انا ما بمنعك من هالشي بس انى انا اكون وياها لا يا انا يا هي
فهد : لا والله هههههههههههه شفيج اسولف
نوف : هاي ما فيها سوالف
فهد : ليكون تغارين
نوف : وليش ما اغار ان شاء الله
( فهد من سمع رسمتها ما صدق عمره نوف تقول هالرمسه نوف بنت عمي )
فهد : تتمصخرين صح
نوف : كيفك تصبح على خير
فهد : صبري نوف ابا ارمسج
نوف : شتبي ؟؟؟
فهد : انتي للحين ما تبيني
نوف سكتت ما عرفت بشو ترد ..............
فهد : دخيلج قولي تبيني ولا لا
نوف : اسمع فهد بالبدايه بقولك الصراحه كنت اكرهك بس احينه ماعرف احس عمري ما اقدر اقولك او ارفظلك شي ..............
فهد : جاوبي على سؤالي تبيني ولا لا
نوف : ولد عمي ما اروم اردك
فهد : يعنى انتي مغصوبه علي ؟؟
نوف : لا مش مغصوبه
فهد : نوف الصراحه اليوم عصبت عليج لاني اعترف انى غرت من الريال
نوف : غصبن عنك اصلا ما تقول اختك انا
فهد : ههههههههههههه اختي قبل احينه حرمتي
نوف : ...................................
فهد : فديت الي تستحي انا
نوف : جب جب
ضحك كل واحد منهم للثاني فهد تجرأ ومسك ايد نوف وباسها استحت ونزلت راسها بلأرض وبهاليوم اكتمل زواج فهد من نوف مب بس على اوراق .......مثل ما كانوا يتوقعون ....
مر اول اسبوع على خير وكل واحد منهم يتعلق بالثاني اكثر من قبل نوف قدرت تخلي فهد يحبها وينسى بيوم انه كان يحب ريم ..............
ونوف حست ان فهد مالي عليها الدنيا ما كانت تجوف ريال ممكن يسعدها قد ريلها فهد .....
الكل فبيت بو محمد وبيت عبدالله عن الوناسه الي ردوا فيها هم الاثنين البيت وشقد كانوا صج متعلقين فيعض مستغريبن معقوله هلاثنين الي كانوا مب رايمين ينسجمون ويا بعض ...
بو عبدالله اتصل بامه وهو مستانس من الخاطر من قرار امه ......
اما فهد اول ما ظهرت النتايج على طول خذ نوف وسافروا فرنسا وعاشوا احلى ايام حياتهم ...
اما بالنسبه لعبدالله ملج على عاليه بعد فترة قصيره من زواج نوف وفهد وجاسم كمل دراسته وما فكر بشي اسمه زواج من بعد عاليه ................
منصور نسى ريم بعد ما اتخرج من الثانويه ولا فكر فيها ...... وكمل حياته ويا ربعه وسوالفه البطاليه ...........
حصه خطبتها يدتهم حق حمدان وافقوا اهلها حصه كان متردده فالبدايه بس اول ما جافت حمدان ارتاحتله لانه قدر يملك قلبها باسلوبه الحلو ......
بعد سنه نوف يابت ولد صغيرون سمته عبدالله على اسم اخوها .........
اما ريم فكملت حياتها وتعرفت على اسما لانهم يداومون بنفس المكان وكانت تعرف اخبار فهد ونوف من اسما ........
ونوف اول ما يابت ولدها عبدالله زارتها ريم المستشفى واعتذرت منها على تصرفها وردوا ربع شرات اول ..........
فيصل عرس من بنت عمه وعاش وياها وعلاقته بفهد شرات اول ما تغيرت .......
فهد ودر الاتصالات واشتغل بشركه ابوه وعاش احلى ايامه ويا نوف وعياله .............
تمت بحمد الله
|
07-01-09, 09:01 AM
عيال العم للكاتبة شيطونة راك
جديد مواضيع قسم القصص المكتمله
العرض العادي
