الجــــــــــــــــــزء الســــــــــادس


( قبل الاخير )


وبعد ما سكر علي عن خاله ظهر من حجرته وراح الصاله وما حصل امه وراح حجرة عويش ،،، ودق عليها ،،، قامت عويش وفتحت الباب ،،،

علي : صباااااااح الخير

عويش ومخليه عمرها زعلاانه : راحوا عني دبي

علي وهو يضحك : تستاااااااااهلين

عويش : اللي يسمعك يقول مسويه جريمه

علي : تصدقين كسرتي خاطري ،،، سكتي دخيلج لا اصيح

عويش : يوعانه

علي : نفس الشعور ،،، سبحان الله

عويش : بروح اخلي هالسوده تحطلنا ريوق

علي : وامي وووووووووووين ؟

عويش : يمكن في حجرتها

علي : خلاص انا بروح اشوفها لان خالي بيي وانتي خلي سيرمني تحط الريوق

عويش : بيي عدنا ؟؟

علي : لا عند اليران

عويش : الله يستر


راحت عويش المطبخ وراح علي يشوف امه ،،، وهو رايح حجرة امه سمع صوت في الصاله ،،، راح بيشوف منوه بالصاله ،،، لقى خاله محمد لاف على امنه ويحبها على راسها ويالس يراضيها ،،،

علي : احم احم

محمد : روح ارقد يالاسود ،،، هذا اللي بيظهر يشوفها

علي وهو يضحك : والله يت الصاله ولا حصلتها ورحت عند عويش اتخبرها

محمد : اعترف وقول انه ما منك فايده يالاسود

يه علي ويلس عدال امه ومخلي عمره زعلاان : تشوفينه يقولي اسود وما منك فايده وانتي ساكته

امنه وهي تبتسم : حمود كله ولا علوووه

محمد وهو مستانس : فديت هالابتسامه وفديت حمود وعلوووه اللي ادافعين عنه

علي : انا خليتها تبتسم ،،، ايدك في مخباك ،،، و1000 يكفني هذا مراعاة لظروفك

محمد : افااا عليك ما يغلن عليك ،،، بس بشرط !!

علي : شوه ؟؟

محمد : عطني 2000

علي : اوكي ولا يهمك بعطيك 2000 بس بشرط

محمد : اشرط ،،، اخر زمن علوووه يتشرط علي

علي : عطني 3000

محمد : تنكت ولا تحاول

علي : ما شي حذف اجابه

محمد : مثقل دمك

علي : شو دراك ؟؟

وتم علي ومحمد يتقايضون وامنه تضحك عليهم ومحمد مستانس ان امنه رضت عليه ،،، وبعد شوي

عويش : احم احم

محمد يكلم امنه : شو فيهم عيالج يتحمحمون ،،، وديهم المستشفى يمكن لاحقنهم برد

عويش وهي تبتسم : شحالك خالي ؟؟؟

محمد وهو يشوفها بطرف عينه : بخير خالج

عويش : خالي

محمد : جب ولا كلمه ،،، ماشي مكتبه ولا غيره

الكل قام يضحك على محمد

عويش وهي تضحك : لا ما ابا اروح مكان خلاص ،،، بس كنت ابا اقول انهم ما شلوني دبي

محمد وهو يرفع ايده : الحمدالله

عويش : الله يسامحك

علي : وين الريوق ؟؟؟

عويش : الحين بتيبه

وبعد شوي يابت سيرمني الريوق وتريقو وتموا يسالفون ،،، وامنه رضت على محمد ومحمد رضى على عويش ،،،

امنه : حمود تراك بتتغدا عدنا

محمد : فالج طيب يام علي ،،، بتغدا عندكم

علي : صدق دب ما تعذر سيده وافق ،،،

محمد وهو يضحك : اسمع كلام اختي ،،، فيها شي ؟؟

علي : لا ما فيها شي يالدب

محمد : شوف عمرك ،،، معدي 100 وقريب بتوصل 200

علي وهو يشوف عمره : بسم الله علي ،،، لو هذا وزني ما بتحصلني داش كلية الشرطه بيقولولي روح بيع طماط جدام بيتكم

الكل قام يضحك على علي

في دبي ،،، مبارك ولعيال كانوا مستانسين راحوا البحر وبعدين راحوا حديقة الخور ودخلوا عالم الثلج واستانسوا واااايد فيه



مبارك : مب بسكم ،،، يله خلونا نظهر جدامنا درب

وديمه : شوي بس بنلعب ،،،

مبارك : ودوم يله بس ،،، بنطلع وبنروح نشتري بدل حق شموه وبنرد العين

وديمه : ان شاء الله

وظهروا من الحديقه ،،، وراحوا يشترون بدل حق شموه ،،، نزلت نوره ووديمه ويا مبارك وتم المر وحمدان في السياره ،،، بس وديمه عيزت من اللف في المحل وردت السياره ،،،

المر وحمدان اول ما شافوها يايه صوبهم سكروا السياره تمت ادق ولا طاعوا يفتحولها ،،،

المر: افتحلها لا ايي ابوي ينازع

حمدان : اصبر بطفربها ،،، محد الحين بحايز عنها

قام حمدان وفتح الدريشه : روحي بعيد شوي وبسألج ثلاث أسأله اذا جاوبتي عليهن بفتحلج الباب

وديمه : والله لخبر ابوي عليك

المر : لو خبرتي بتصفعين في البيت ،،،

حمدان : وانا بنتفلج شعرج

ردت وديمه على ورا : يله اسأل وفكني

حمدان رفع صبعه وسألها : كم هذا

وديمه : شايفني حوله جدامك ؟؟؟

حمدان والله بسكر الدريشه وبخليج تخيسين برا لحد ما ايي ابوي وبقوله هيه ما طاعت تدخل

المر : جاوبي يله يالحوله

وديمه وهي شوي وبتصيح من الضيجه : واحد

حمدان : حوله ،،، هذا 2 مب واحد

وقام حمدان والمر يضحكون عليها ،،،

وديمه : والله جذاب

المر : عطها السؤال الثاني يمكن تجاوب صح وتدخل

حمدان : مممممم شوفي لو انا ما كنت اخوج ،،، وانتي مش اختي ،،، انزين

وديمه : يا ليت

حمدان : اكمل ولا اسكر الدريشه تخيسين برا

وديمه : خلاص كمل ،،،

حمدان : انزين لو شفتيني في الكوفي شو بتقولين عني ،،، ياااي يخبل من جماله ولا عوذ بالله من هالشيفه

وديمه : اكيييد بقول يااااااي يخبل من جماله

حمدان : انا بأدبج عشان مره ثانيه ما تجذبين

المر : اقولك سكر الدريشه وخلها تخيس برا

وديمه خلاص ما قدرت تتحمل وصاحت

حمدان : خلاص مسحي دموعج افراج بس عقب السؤال الثالث

المر : انا بسألها

حمدان : أسأل أسئله من اللي بالي بالك مب اسئله استهبال

المر : افا عليك اعجبك انا

ويمه وقفت عند الباب

المر : بسم الله من هالشيفه

حمدان : شو هالسؤال ؟؟؟

المر: بعدني ما سألت !!!

حمدان : اتحرى بعد

المر : دموعج هاي دموع صدقيه ولا دموع تماسيح ؟؟؟

وديمه وهي تمسح دموعها : دموع تماسيح

حمدان : اول مره تجاوب صح

وفتح الباب حقها

وديمه : والله خل ابوي ايي ان ما خبرته عليكم

حمدان : افاا ودووم نمزح وياج

المر : بنشتريلج حلاوه

وديمه : الحين مساكين ،،، ما عليه تخلوني برا واقفه وانتوا داخل ،،،

حمدان : عادي تستوي في اكبر العائلات

مبارك : ليش ما نزلتوا ؟؟

حمدان : مالنا حايه ننزل

مبارك : زين ،،، تبون عشى ولا نخليهم يسولنا في البيت عشى

المر : اكيييييييد نبا

وديمه : ياكم الدب

المر : جب ما يخصج

مبارك : بس ،،، شو هاه

وستكوا ،،، وهم رادين راحوا اشتروا عشى والساعه عشر وصلوا ،،،

اليوم الثاني ،،، قام مبارك الساعه 11 الظهر وطلع الصاله وحصل امنه وشموه ،،،

مبارك : السلام عليكم ،،،

امنه : وعليكم السلام والرحمه

شموه تقلد امها : وعليكم والرحمه

مبارك يضحك عليها : وكبرت شماني وتسلم

امنه وهي تحضن شما وتحبها : فديتها حلاة رمستها

مبارك : شفتي البدل اللي شريتهن حقها ،،،

امنه : هيه شفتهن ما تقصر يكثر ملابسها

مبارك : خليني ادلعها اخر العنقود

امنه : الله يخليك لنا

شموه : ابوي بيب بيب

مبارك : لا ما شي بيب بيب

راحت شموه وشلت الشاهي ولفت على ابوها : تبا

مبار وهو يبتسم : هيه ابا

وبعد شوي قام حمدان ونوره ووديمه ،،، وراحوا الصاله تيريقون ،،، سلموا وقعدوا يتريقون ،،،

نوره : والله السيره حلوه كنت اتمنى تكونين ويانا

امنه : المره الثانيه ان شاء الله

مبارك : عاد نبا درجات حلوه ،،،

وديمه : انته تامر بس ودنا مره ثانيه

مبارك : لو يبتوا درجات حلوه بوديكم دبي وبنيلس فيها يومين واذا ارتحتوا فيها بنطول

نوره : حلو والله ،،، ان شاء الله نبيض الويه
امنه : ما بنروح العمره هالسنه ،،،

مبارك : بنروح ان شاء الله وبنروح دبي بعد

وديمه قامت تحب ابوها : الله يخليك حقنا

حمدان : وانا اذا يبت درجات حلوه ابا تعطوني التلفون على طوووول ،،،

مبارك : اسمحلي يتم عندك وقت الدراسه لا ،،، بس في الاجازات فالك طيب ،،،

حمدان : عيل نفس الحال ،،،

نوره : وينها عويش من يومين ما شفتها ؟؟

امنه وهيه تشوف مبارك : راقده

وديمه : بروح اوعيها خاست رقاد

مبارك يغير الموضوع : وين المر ؟

حمدان : راقد ما طاع يقوم

مبارك : خله يقوم يتريق ويتجهز لصلاة الجمعه ،،،

حمدان : ان شاء الله

قام مبارك يبا يظهر بس ما حصل تلفونه

مبارك : وين تلفوني ؟؟

امنه : يمكن في الحجره ما يبته

مبارك : لا يبته اتريا عبيد يدقلي

وديمه : وشموه وين ؟؟؟

مبارك : شموه + تلفوني = اقرا الفاتحه على تلفوني

دخل حمدان وهو يايب شموه وبيدها التلفون

امنه : وين حصلتها ؟؟

حمدان : شاله التلفون ورايحه عند المر

مبارك : يدبه

شموه وهو تضحك : دب

ورن تلفون مباك وظهر برا وامنه شلت شموه وراحت تشوف الغدا ولعيال كل واحد راح حجرته

بعد المغرب كان مبارك بيظهر لانه مواعد اخوه عبيد يروحون الصناعيه ،،،

وهو ظاهر شاف شموه ظاهره من الصاله وبيدها ورقه تلعب فيها شل الورقه وقراها ،،،
؛؛؛ من حقي ان أعيش ؛؛؛

ابوي وامي ... انا ما احبكم ،،، هيه ما احبكم ،،، اكرهكم تعرفون شو يعني اكرهكم ،،، وكرهي لكم انتوا زرعتوا في قلبي ،،، زرعتوا عقب ما خوزتو حبكم ،،، ابوي انته تهتم في مزرعتك اكثر مني ،،، ليتني مزرعه عشان تهتم فيني وامي انتي تهتمين في حفلاتج وطلعاتج اكثر مني ،،، ليتني يمه كنت حفله عشان اتين اتزوريني ،،، انا صح معوق بس قبل يوم كنت اشوفكم كنت انسى اعاقتي بس عقب ما قطعتوني ونستوني واهملتوا ولدكم ،،، احس اعاقتي شي كبير هم كاتم على صدري ،،، انا استويت انسان مجروح ،،، الدكتور ما يقدر يعالجني ،،، ولا عنده دوا حق جرحي ،،، انتو دكتوري وانتوا دواي ،،، بس هذا قبل الحين انا انسان ميت ،،، وانتوا السبب في موتي

بس لا تنسون شي واحد ،،، وهو اني انسان ومن حقي اني اعيش

ولدكم ،،،

سهيل


عقب ما قرا مبارك هالرساله اللي كانت ويا الملصقات اللي كانت ويا عويش وفرهن عليها محد شلهن من الصاله،،، اتأثر برساله هالولد ،،، وقطع تفكير مبارك شموه اللي قامت تصارخ فرحانه يوم سمعت صوت تلفونه ،،،

مبارك رد على التلفون لانه كان عبيد اخوه لانه تأخر عليه ،،،

مبارك : الحين بظهر لا تعصب

عبيد : خست انا برا

مبارك : اسمحلي بوسلطان الحين ظاهر ،،،

عبيد : اترياك ،،،

وسكر مبارك عن عبيد وظهرله برا ،،، في السياره

عطى مبارك اخوه عبيد الرساله ،،،

عبيد وهو مستغرب : من وين يبتها ؟؟

خبره مبارك بسالفة عويش واللي سوته ،،، وكيف وصلت الرساله بيده

عبيد : هذا كله يظهر من عويش ؟؟

مبارك : سبحان الله يا عبيد ،،، الله يبتليك ويعطيك دوا بلوتك ،،،

عبيد : شقايل ؟؟

مبارك : يعني انا اول ولد لي من ميثه كان معوق ويمكن هالشي اللي خلااني افترق عنها وضايقني هالشي وكرهت طاري المعوقين بس الله عوضني بـ آمنه وبعيالي وهالرساله احسها اثرت فيني يمكن الله كتب اني ما انحط في هالموقف واني انا اكون مكان هالابو اللي تجاهل ولده ،،،

عبيد : يوم تشوف مصيبة غيرك تهون عليك مصيبتك

مبارك : الحمدالله ،،، تعرف على شوه ناوي ؟؟؟

عبيد : شوه ؟؟
مبارك : ان شاء الله يوم بتتخرج عويش من الثنويه ،،، بخليها تدخل تربيه خاصه

عبيد : معقوله ؟؟؟!!! هذا كله تأثير الرساله فيك ؟

مبارك : هالرساله نبهتني للاشياء انا كنت اعتقد انها عاديه ،،، ونفس ما تقول اللي يشوف مصيبة غيره تهون عليه مصيبته ،،،

يوم السبت بدت الدراسه ،،، عقب ما داوموا لعيال يلس مبارك ويا منه وطبعاً عطاها الرساله وقرتها وقالها انها أثرت فيه ،،،

امنه : يعني الحين مب زعلاان من عويش ؟

مبارك : لا ،،، بس عتبان عليها شقايل تروح هالمكان وما تخبرني ،،،

امنه : تعرفك لو دريت انك ما بتوافق

مبارك : بس الحين تغير كل شي


امنه : يعني مب حاط في خاطرك عليها ،،،

مبارك وهو يبتسم لـ امنه : لا وقوليلها اذا يابت نسبه مجهزلها مفاجأه حلوه ،،،

امنه : ان شاء الله

مبارك وهو يشوفها بطرف عينه : ما تخبرتيني شو هالمفاجأه ؟؟

امنه وهيه تبتسمله : اذا تباني اعرف بتخبرني مب لازم اسألك يمكن ما تباني اعرف

مبارك : هذا احلى شي فيج يـ امنه ،،، ما داني الحرمه الفضوليه واللي تبا تعرف كل شي ولا عاد اذا محد قالها بتجلب الدنيا عليك

امنه تضحك وتموا يسولفون وامنه استانست من التغير اللي صار لمبارك ومبارك رغم عصبيته بس انسان طيب يحبها ويحب عياله

شموه : ابوي تبا ؟

مبارك :هيه ابا هاتي

شموه : ما با

مبارك ومخلي عمره معصب : هاتي

شموه تروعت وركضت عند امنه : ما با مالي

مبارك : عيل ليش تقوليلي تبا ؟

شموه : هاه

مبارك : عيل ليش تقوليلي تبا ؟

شموه : هاه

مبارك : لواتتج مب علي يالدبه

شموه : انته دب

قام مبارك شلها وتم يلاعبها ،،،

مبارك : امنه

امنه : آمر

مبارك : شو رايج اليوم نسوي عزيمه عقب المغرب ونعزم اخوي عبيد وعياله ،،،

امنه : شو المناسبه ؟؟

مبارك : مب لازم مناسبه ،،، ولا لاني مستانس والله حتى هالكلمه اشوفها شوي

وتم يحب شموه ويطفربها

امنه : انزين بدق حق محمد اخوي اذا ما عنده شي بخليه يوديني السوق عشان اشترى الاشياء الناقصه للعزيمه

مبارك : وانا ؟؟

امنه : شو فيك ؟؟
مبارك : انا بوديج

امنه وهي مستانسه : الحين ؟؟

مبارك : هيه قبل ما ايون لعيال من المدرسه

امنه : اوكي بودي شموه عند سيرمني

شموه : لا لا بيب بيب ماليد

مبارك يضحك عليها : فالج طيب يابنت مبارك

وتم يلعب ويا شموه وامنه راحت تتجهز

وبعد نص ساعه ظهروا ،،، وفي السياره ،،،

مبارك : عبيد ما يرد علي

امنه : يمكن مخلصه اجازته ومداوم اليوم

مبارك : نسيت والله انه اليوم داوم

راحوا الجمعيه وشتروا اللي يبونه ،،،

شموه : حواوه ابوي كافي

مبارك يقايض فيها : ماشي حلاوه بشتريلج حليب

شموه : لا حليب حواوه

وتمت تصارخ وهيه في العربانه ،،،

مبارك : كم حلاوه تبين ؟

شموه وهيه ترفع ايدها واحد ثنين واااااااااايد حواوه

مبارك وهو يضحك عليها : 1 ولا 2 ولا واااااااااااايد

شموه : وااااااااااااااايد وتضحك

مبارك : لوتيه

وقرصها على خدها

شموه : أي عور

مبارك : هههههههههههههههه

وعقب ما خلصوا ،،، في السياره تم مبارك يلاعب شموه ،،،

امنه : مبارك انتبه

مبارك : اللي عنده هالقمر وين ينتبه

شموه : ابوي قطوه قطوه

مبارك يقرصها على خدها : وين القصوه يالجذابه

شموه : في البيت قطوووووووه كبيره

مبارك : الحين استوت في البيت زين

وتمت شموه تلعب في التلفون ،،،

مبارك : هاتيه لا تخربينه حقي ،،،

شموه : ما طاعت

وصاح التلفون ،،،

مبارك : هاتي حبيبتي

شموه رفعت ايدها بسرعه عشان ما تعطيه اياه وطاح التلفون تحت ،،، نزل مبارك ياخذه ،،،

امنه وهيه تصارخ : مبااااااااااارك انتبه

رفع مبارك راسه بسرعه بس ما قدر يتحكم في السياره وظرب بطرف الشارع وانجلبت السياره ،،، والناس تجمعت بس ما قدروا يسون شي لحد ما توصل الشرطه والاسعاف اللي كانوا يسمعونه صوت ريال ،،، وفي هالدوامه وفي هالاله اللي صنعها الانسان خسر مبارك امنه ام عياله والانسانه اللي حبته وخسر شموه القمر اللي كانت تخليه يضحك حتى لو كان ضايج

الساعه 2 ونص الظهر ردوا لعيال من المدرسه انصدموا بالناس اللي عندهم في البيت وكانت ريحه البيت كلها سدر والخلطه من دهن الورد ودهن العود والكافور والياس والصندل اللي غسلو فيها امنه وبنتها،،،

حمدان والمر ظهروا ميلس الريايل وحصلو علي اللي ظهروه من الكليه عشان يحظر عزا امه وشموه

حمدان وبخوف : شو استوا

علي منزل راسه وساكت ودموعه تنزل على ويه ولا قادر يرد على اخوه

المر يلس على ركبته عدال علي : علي شو استوى ؟؟ ابوي شو فيه

علي وبكل حزن : ابوي في حجرته

وقام يصيح ما تحمل اسألت اخوانه وهو ما يقدر يرد

راح المر عند عمه عبيد : عمي ابوي شي فيه ؟

عبيد وهم يحط ايده على كتف حمدان : امك واختك شموه

حمدان : شو فيها امي وشموه ؟؟؟؟؟

عبيد ما قدر يقولهم انهم توفوا

قام حمدان والمر دخلوا داخل يشوفون ابوهن

اول ما دخلو الحجره لقوا عويش ونوره وديمه لفات ببوهن ويصيحن

حمدان : وين امي ؟

نوره وهي تشاهق من الصياح : امي راحت يا حمدان خلاص ما بنشوفها مره ثانيه راحت وشلت شموه

وردت اتصيح ،،،

المر والدموع في عينه : خلاص يعني راحت راحت ،،، ابوي قولي الصدق وينها ؟؟

حمدان اول ما سمع الخبر طلع وراح حجرته وتم يصيح ما قدر يتخيل البيت بدون امه ،،، ولا بدون الشموه اللي يحبها ويلعب وياها ،،، منوه بيقوله دب
بعد شوي ين بنات عبيد وخذن بنات عمهن حجرهن وعبيد دخل عند مبارك

عبيد : اذكر الله يا مبارك

مبارك وهو حاط ايده على ويه : انا السبب يا عبيد انا ،،، يعني دووم ما اشلها السوق ليش اليوم بالذات لو خليت اخوها يشلها ما كانت راحت عني وخلتني ما كنت بنحرم من حس شموه

عبيد : مبارك شو هالرمسه ،،، انت اانسان مؤمن بربك وهذا يومهن محد بيموت ناقص عمر ،،،

مبارك : استغفر الله العظيم ،،، أنا لله وانا اليه لراجعون ،،،

عبيد : قوم تسبح وصل ركعتين شكر لربك وظهر ترا اكرام الميت دفنه وبعدين بوديك المستشفى يداون الجرح اللي بيبهتك ،،

مبارك : وجرح قلبي من يداويه

عبيد : الرب قادر على كل شي وخلك مع ربك

وظهر عبيد عنه

وعقب ما صلوا العصر دفنوهن ومحد من لعيال قدر يسلم على امنه وشموه قبل الدفن ومبارك ما حب يحطهم بهالموقف خاف يخسرهم

ومحمد اخوها حضر العزا اول يوم وما قدر يحضر مره ثانيه وكان خيال امنه ما يفارقه كانت له الاخت الحنونه وعمرها ما زعلته وعقب العزا راح العمره يحاول يتناسى شوي ،،،


وبموت امنه واختفاء ضحكت شموه من البيت تبدل حال مبارك وعياله ،،، كانوا يردون من مدرستهم على غرفهم امنه هيه اللي كانت تجمعهم على قهوة العصر بس عقب ما راحت محد يتجمع العصر ولا يظهر ،،، ومبارك ما قدر يظهرهم من عزلتهم لانه هو روحه محتاج حد يظهر من عزلته وفقدان لزوجته وام عياله وفقده لشموه اللي ما قادر ينسى ضحكتها ،،، الشي الوحيد اللي ريح مبارك ان امنه كانت راضيه عليه ومستانسه منه


الــنــهـــايـــه